#أحببت_ازعر
#الجزء_الثالث
#بقلم_مريم_اليوسف
مجد :احكي عمي عم اسمعك
اخد نفس عميق ليحكي .. بس قبل ماينطق حرف .. تفاجئو بثلاث سيارت سوود .. حاوطوهن .. وانفتحت البواب مع بعضها .. كانت كلها رجال ومسلحة ومن بين هالرجال الشيخ نمر وابنو تحسين
الكل بصوت واحد :الشييخ نمررر؟؟
الشيخ :السلام عليكم
الكل ردو السلام
قرب من مجد وتحسين وراه وقال بهدوءغاضب :شو يلي عم تعملوو ؟
مجد :شييخ
الشيخ :خراااس
سكت مجد ونزل راسو
طبعا الكل متفاجئ بحضور الشيخ نمر بجلالتو لضيعتن ويلي متفاجئين فيه اكتر رضوخ مجد لالو وبيعرفو مجد ازعر ومابهاب حدا
الشيخ :يلي عملتو انت واوباشك بتصلحوه ليرجع متل ماكان
مجد :امرك
الشيخ :والحقني ناطرك بالبيت
هز براسو بخيبة امل .. حضور الشيخ خرب عليه كلشي .. عثواني ضحى كانت رح تصير الو
التفت الشيخ ع العالم وقال :لاتواخذوه ولد طايش .. ويلي عملو ازرعوه بدقني
قرب المختار منو وقال :نوورت الضيعة بالشيخ نمر والله ... تفضل شيخ ..تفضل .. والله مابتطلع من ضيعتنا قبل مانقوم بالواجب ..
الشيخ : عشت يا مختار ..ان شاء الله الايام جاية
المختار :جيرة الله ...
الشيخ :حلفتك بالله ما تحلف .. والله مشغول .. والله لو معي وقت بتشرف فيكن .. خلص ان شاء الله رح اجي واتبارك فيك وباهل هالضيعة بس مو اليوم اعذرني
المختار : والله مابتنعذر انت يا شيخ ... كلامك اموار .. انت بتحكي وبتنفز وبس ومحدا بيتعرض
الشيخ :بوركت يا مختار .. يلابالاذن .. بالاذن يا رجال
الكل صارو يودعو الشيخ بحرارة
وصل لسيارتو وفتح الباب وعم يركب .. اتطلع نظرة اخيرة على مجد وقال:مجد ناطرك
مجد :بأمرك شيخ
استغربو اهل الضيعة انو حتى بيعرف اسمو ..
ركب بالسيارة بالمقعد الخلفي ..وتحسين سكر عليه .. وسيارة الشيخ مشت وراحت ..
ناصر ابتسم ابتسامة شماتة بوجو وحط ايدو ع كتف ابوه ليمشو .. اما يحيى كان متخربط لماشاف الشيخ نمر بهل الجاه والوقار ..وعرف انو الوصول لبنتو ياسمين صعب .. اتطلع بمجد وحس حالو انو هو ومجد بنفس الكفة .. لف وراح ركب مع ابوه واخوه ورجعو ع بيتن
قرب تحسين من مجد وحط ايدو على كتفو ليهديه
اتطلع فيه مجد نظرة عتب وبعدلو ايدو عم كتفو ومشي بقهر ..
مجد :مراد اليوم المسا بدي كلشي يرجع متل ماكان .. جيب الشغيلة يلي بالمزرعة يساعدوكن ..
مراد وهو زعلان على حالو اخوه وقال :ماشي
ركب سيارتو..قرب تحسين يركب معو .. بس مجد سبقو وساق بسرعة
تحسين قرب من مراد وقال : شبو
مراد:لو متاخرين شوي كان ابو ناصر عاطي بنتو لمجد ..مجد كان رح يصلح كلشي اذا ابو ناصر بيعطيه ضحى بس جيتو انتو
تحسين :وخربنا كلشي ؟!
هز براسو وراح لعند حمود ..
مراد : روح جيب كل شغيلة المزرعة .. وانا رايح ع المدينة جيب عدة جديدة للمحلات ...
______________________
رجعو عيلة ضحى عبيتن .. وكأنو جايين من حرب ومنتصرين .. والابتسامة ع وجوهن .. والفكرة يلي كانت عم تدور براس بكر هية انو اجا حدا يقدر ع مجد
دخلو وقعدو بغرفة القعدة
ام ناصر :شو كان صاير
بكر :تور وهايج
ام ناصر :مين ؟؟
بكر :كم في حيوان بهل الضيعة ..ويتطلع على ضحى يلي نزلت نظرها بقهر .. لانو عرفت انو عم يحكي ع مجد .. ومن لما راحو عرفت انو مجد عامل مصيبة .. وكانت عم تدعي بقلبا انو مايكون متهور وعامل شي مشانها
ام ناصر :طيب حكولنا
بكر :مقهور بسبب القرار يلي وقعنا عليه مشان نقلعو من الضيعة
ضحى شهقت وقالت :بدكن تطالعوه من الضيعة
بكر :قومي من خلقتي وليه .. ماني ناقصك اصلا كل المشاكل من ورا راسك .. قومي انقلعي .. عشوي كان رح يلويلي دراعي .. بس اجا الشيخ نمر بالوقت المناسب
ندى :لك فهموناا
بكر :قومي انقلعي انت واختك من وجهي .. لو بتموت مارح خبرها بشو صاير .. تضرب منها لهل الفلتان
قامت ضحى بقهر ولحقتا ندى
يحيى :انا رايح ع المشفى بدكن شي
امو :لا ياعمري الله معك
طلع يحيى وحكت ام ناصر :لك خلصونا احكولنا شو صار .. ومين هاد الشيخ نمر
ناصر :شيخ عشيرة الورد
ام ناصر بصدمة :كاان عنا بالضيعة ؟؟
ناصر :اي ..
بكر :عملولنا كاسة شاي بعد الغدا وبنحكيلك شو القصة
ناصر :قايم قول لندى تعمل
امو :وقلن يجهزو حالن مشان نروح عبيت عمك
ناصر :رايحين عبيت عمي ؟؟
امو :نحنا مو انتو
ناصر :مين انتو ؟
امو :انا واخواتك البنات .. رايحين نشوف جهاز ضحى بنت عمك يلي عم تجهزو .. عزمتنا مرة عمك
ناصر :لكن انا بروح لعند العريس .. لعند ابن عمي
امو :اي روح روح قلن يعملو شاي لابوك .. وبعدا روح وين مابدك
ناصر : هههه يلا رايح
ام ناصر :اي ابو ناصر احكيلي شو عمل هالمغضوب
__________________________
المسا
دخل مجد ع البيت وكانت خالتو واختو قاعدين
زينة :اهلين حبيبي حطلك عشا
مجد :لا لا .. مالي نفس .. ما اجا مراد
نجوى :لا .. ع الضهر اخد كل الشغيلة وراحو .. وينو صحي
مجد :كلفتن بشغلة ..
قربت زينة منو وشبكت اصابيعها وحطتون ع كتفو وقالت :طيب ليش قالب خلقتك .. بس ماتكون انت وضحى مارجعتو لبعض
اتطلع فيها بطرف عينو وقال :ليش ماحكتلك
زينة :مالحقت .. فورا اجا اخوها واخدها .. قالتلي اسالي مجد هو بيحكيلك
مجد :ههههه ليش هية خلتني اتركها
زينة :ومقهور ؟
مجد :معقول كون مقهور من هيك شي .. بس في شغلة تانية زاعجتني شوي
زينة :وكيف اقنعتك
مجد :ههههه بتعرفيها اكتر مني
زينة :دخيل قلبا .. بعمرا ما تخلت عن حدا بتحبو
مجد :ولا انا رح اتخلى عنها
زينة :عم اتذكر لما كنا بالمدرسة صغار وكنا انا واياها بنفس الصف .. كل بنات المدرسة محدا قبل يرافقني .. مافي غير هية اجت ورافقتني .. مع انو ابوها كان استاذ بالمدرسة عطول يفصلنا عن بعض ويعاقبا بس هية ماكنت ترد .. وكأنو عم يحكو ويعاقبو حيط .. تقلي مستحيل اتركك انتي رفيقتي ... يعني لولاها كان صار معي شي مرض نفسي من تنمر الاستاذة والطلاب علي .. بس لما رافقتني اكتفيت فيها وصارت كل حياتي .. عنجد ضحى بتجنن بتنفدا بالدم
مجد مبتسم بفخر وهو عم يسمع هيك حديث عن حبو وبنت قلبو ..
زينة :دخيل قلبا وانا بموت فيها ... روح يامجد ان شاء الله مابتكون الا من نصيبك قول امين
مجد وهو مبتسم :آمين
زينة :اكيد انفتحت نفسك ع الاكل .. شو رأيك نحطلك عشا
سمع صوت سيارة مراد
مجد :اي حطولنا عشا ناكل انا ومراد
زينة :اي ماتكرم عينك وعين مراد
راحو ع المطبخ .. وشوي دخل مراد .. كان لابس طاقية شمسية شلحها وضربها على مجد بس مجد مسكها بسرعة قبل ماتوصل ع وجهو
مراد: ***** عليك وعلى حجشنتك
مجد :هههههه هيك بتحكي مع اخوك الكبير
مراد :كلن كم شهر لا تدوشنا فيهن .. لك اقسم بلله مافيك عقل
مجد :لك شبك
مراد : بكرا روح انقبر كمل حق العدة لابو الخير
مجد : ماشي بروح .. قلي شو عملتو
مراد : المحلات رجعت خلنج عم تضوي ضوي .. العدة للمحلات كلها جديدة بكياسها .. وحتى جبنا صهريج مي وشطفنا الساحة من زيت المطعم
مجد :عملت منيح
مراد عض ع اصبتو وقال: بدي قووم نتفك .. مين طلع خسران بهل الشغلة غير حضرتك
مجد :كان كلشي ماشي لولا جيّت ""كان بدو يشتم بس سكت وقال : لولا جييت الشيخ ..نزع كلشي .. العما ولووو ..
مراد :رحت لعندو
مجد :لا بكرا بروح
مراد :وين كنت
مجد: كنت مختلي بحالي شوي ..وعم فكر شوبدي اعمل بأهل هالضيعة ..
مراد :مابرد انتقامك
مجد.: لا والله
مراد :خلص خوفتن منك وهاد بكفي ... ومتل مابقول المتل خوف الكلب ولاتضربو
مجد : اي والله كلاااب من صغيرن لكبيرن
مراد: عيفن اخي .. عيفن .. اهل الضيعة بعد جيت الشيخ لقو حدا يشدو ضهرن فيه عليك
مجد :وهاد يلي حسبتلو
مراد : انت بتعرفو للشيخ يعني قاعد معو .. ولا بس من بعيد وانو ابوه لتحسين
مجد :لا قعدت معو وحكينا ... اما شو هالزلمة يا مراد .. والله انو شيخ
مراد :بس ااخ لو متأخر خمس دقايق بس
مجد :شفتلي هالحظ .. بس الله كريم
مراد حط ايدو ع بطنو وقال :انا جوعان .. وين خالتي وزينة
مجد :عم يحطولنا عشا هلا بنتعشى انا واياك .. بس قلي ليش مانك ماكل
مراد:شوبدي اكل
مجد :فلافل 😂😂😂
مراد :هههههههه ليش ضل فلافل ولا ضل حمص ..
مجد :وشو قالو صحاب الدكاكين
مراد :خليني ساكت مابدي اقهرك
مجد :يلا خليك ساكت بكون احسن ..
انفتح الباب ودخلت زينة حاملة صدر الاكل(صينية كبيرة مدورة ) وقالت :يا حيالله بالشباب
مجد : يسلمنن يا اختي
_____________________
ببيت عم ضحى
قاعدين النسوان والصبايا مجتمعين .. وقدامن تياب كتيرة وهدول من جهاز العروس بنت عمها لضحى يلي كمان اسمها ضحى ع اسم التيتة 😅😅 .. وكان بالاجتماع ام ناصر وسلفتها ام منهل ام العروس وسلفتها التانية ام جابر
وصبايا عددن ٤ غير ضحى وندى والباقي بنات عمامن
ام ناصر :بجننو ياعروس وتشوفي وتهريهن بالهنا ..
ام منهل :كيف لقيتلي تيابها حلوين
ام ناصر :شو حلوين .. بطيرو العقل .. مبروكين ياعروس
ضحى بخجل :يبارك فيكي مرت عمو
ام جابر :وشو جهزتو كمان للبيت
ام منهل :جبنالا فرن غاز وسجادة ومد اوضة وفرشة صوف وحرامات .. وعدة مطبخ كاملة هدول النواقص
ام جابر : خير الله.. وانشاءالله يعجبها ام غطاس خانم 😏😏
ضحكت ام ناصر وقالت: هههههه ضحكتيني يا ام جابر .. والله ماحدا بيتجرأ وبيحكي الصدق غيرك
ام جابر : شيلنا منها ولوو ناقصنا شوفة حالها ونأوذتها .. بس بدي اعرف عشو شايفة حالا .. سقألله ايام زمان لما كانت متل القملة المفروكة عند حماتي
ام منهل :اي حاجتكن عاد .. هية كانت تتمسكن مشان حماتي الله يرحمها تحبا .. وتعمل حالا مرضية من بيناتنا كلنا
ام ناصر :معك حق .. وحماتي كانت تحبا كتير وتعتبرا السلفة المفضلة عندها .. ونحنا ماكنا نعرف نتبهور متلها
ام جابر :عكل حال الله يعينك ياضحى ع هيك حماية
ام منهل :شبك ولوو بلشتي تخوفيها للبنت
ام جابر :لا اطمني ماخافت ولا على بالا.. وليي على جيل هالايام وخصوصا البنات عم يخلقو متفرعنين ومكيودين ولا مية حماية بتقدر تسلم منهن .. سقألله لما كانو يقول الكنة كننها بتكن جننها بتجن .. هالايام بالعكس .. الحماية بدها رضاها من كنتها
ام ناصر :هههه لك شبك شبك .. لتكون كنتك عم تعذبك
ام جابر :لك اذا مافيك تحكي شو بتعمل
ام ناصر :بتعن ههههه
ام جابر :عم نعن هههههه
ام منهل :صحي ام ناصر شو قصة مجد الازعر
ضحى كانت شاردة بالتياب وعم ترتبن مع البنات ويحطوهن بشنتت السفر بس لماسمعت اسم حبيبها نقزت واتطلعت عليهن والكل التفتو واتطلعو عليها بالاضافة لزورة من عيون امها خلتها تحط راسها بالارض
ام ناصر انقهرت من ام جابر لانها عم تقهرها وقالت : شبو مجد؟ ليش عم تسألي
ام جابر : عأساس معد يرجع .. ولا من كم يوم بنخبر انو رجع ودق بابكن
ام ناصر :تندقلو شي رزة الاهي(الرزة: هية عبارة عن حديدة طويلة شوي والها حلقة براسها بيربطو بالحلقة حبلة البقرة او الدابة وبدقوها بالارض لما بدا ترعا مشان ماتبعد وتهشل ) وام ناصر قصدها بهل الحكي انو مجد شي حيوان ولازم حدا يدقلو رزة ويربطو فيها
ام ناصر : مافشر يطول ضفرها
البنات ماحكو شي .. بس عيونن على ضحى يلي مقهورة كتير من حكي امها
ام منهل :قومو ياصبايا خدو هالتياب لجوا كملوهن ضب مع باقي الجهاز وجيبولنا عدة المتة نشرب انا ونسوان عمومتكن
قامو الصبايا ودخلو ع غرفة البنات وقعدو ع الارض وراحت بنت تحضر المتة لامها ونسوان عمومتها
ضحى قعدت بالزاوية ومبين القهر على وجها
حكت ضحى بنت عمها :شبك ضحى ليش هيك زعلتي
ضحى :مافي شي
ضحى٢: هلأ انتي بتحبيه لهل الشب ولا شو
ضحى : هلأ شو بهم اذا بحبو او لأ .. سكرو ع الموضوع
..: بشرفك ضحى احكيلنا .. والله صار عندي فضول اعرف شو عم يصير وشو القصة .. مابنخبر الا جايب جاهة وجاي لعنكن ...معقول بحبك لهل الدرجة
: وانتي بتحبيه ولا لأ
:هلأ هو عنجد متل ماعم يقولو ازعر وسرسري
كل وحدة صارت تسأل سؤال فضولي وبدن يعرفو شو القصة .. وبدن يعرفو مشاعر بنت عمن شو هية تجاه هالشب
بس وقفا سؤال بنت عمها لما قالتلا عنجد ازعر وسرسري وردت عليها :ومين قال انو ازعر .. شو شفتو من زعرنتو
: كان حرامي جاج
ضحى :كان حرامي وهلأ تااب .. ولاحدا يحكي عليه
: وشبك هيك ادايقتي ليكون بتحبيه
ضحى :اي بحبو وبموت فيه
ندى بتهديد:ضحىى
ضحى جكر باختها :ليش لخبي عنن هدول بنات عمي .. وكل الضيعة بتعرف وقفت عليهن
: اي اي ضحى احكيلنا كلشي .. بتحكو مع بعض؟؟
:شقد بتحبو بعض
:كيف تعرفتو ع بعض
:عنجد مانو حرامي ..طيب منلو هالمصاري والاملاك والسيارات
ضحى :شبكننن ...شوبدي احكي فهوني من وين بدي بلش
ندى :انا برأيي لاتحكي احسن ماتخبر امك
ضحى :وتخبر .. اي بدي قول قدام كل العالم انو بحبو وغيرو مارح اخد .. واصلا الشغلة صارت واضحة اكيد ماعم يجي من راسو كل مرة كل مرة
ندى :يعني عاجبك هالسيط الحلو يلي عم تطالعيه على حالك
ضحى :انا ماعم طالع شي هية العالم بتحكي
ندى :وليش عم تخليها تحكي
ضحى :والله يعطوني اياه بتخرس العالم
: هلأ انتي عنجد بتحبيه ولا عم تمزحي
ضحى :لك شبك انتي كمان .. ليش لأمزح والله بحبو
:بس يعني شفتي انتي وين وهو وين
ضحى : كيف يعني انو انا متعلمة ومعي شهادة وهو لأ .. انا كل هي الشغلات مابتهمني .. انا بدي اياه رجاال
انفتح الباب وفاتت البنت يلي راحت تضيف امهاتن : شو عم تحكو بدوني
:تعي ضحى عم تحكيلنا عم مجد
:حرامي الجاج ؟
ضحى :حاج تقولو عنو هيك
ندى :ههههه بتستاهلي
ضحى :اي بطلت احكي شي .. فتحو سالفة تانية
:بشرفك ولووو احكيلنا
ضحى :شوبدي احكي
:شو حبيتي فيه
ضحى :شهم ورجال وعمل معي موقف محدا بيقدر يعملو معي
ضحى٢:هلأ هاد الازعر صار شهم ورجال .. خبرتي اليوم شو عمل بالساحة
ضحى :لا شو عمل
ضحى٢ :حكولا بنات
: مااجا هو واخوه ومدري مين كمان كسرو محل الحلاقة ومطعم الفلافل
ضحى :لييشش
: ييي يا حزينة اصبح مامعك خبر .. راحت عليكي
ضحى :بشرفكن احكو شو صار
ندى :انا بخبرك
ضحى :ليش انتي بتعرفي ؟؟
ندى :اي ناصر حكالي
ضحى :شو صاار
ندى :ما اهل الضيهة مقدمين عريضة للشرطة مشتكين عليه وبدن يقلعوه من الضيعة بس هو مدري كيف قدر يسحب العريضة من المخفر واجا ع الساحة وصار بدو ينتقم منكل واحد موقع عليها وبلش بالمطعم و صالون الحلاقة
ضحى صفنت بوجه اختا شوي.. بس كان حبها اعمى لمجد ومستحيل تشوفو مذنب وقالت بقلبا :بيستاهلو والله ماقصر فيكن
ندى عم تكمل الحديث : وصارو العالم يطلبو منو يهدا ومايكمل .. لانو قالو المحلات صارو خرابة
: ومايقربو عليه ويقتلوه
:خبرت انو محدا استرجى يقرب عليه
ضحى بثقة :شايفين انو رجاال .. مين من اهل الضيعة عندو جرئتو
:هلأ هي بتسمهيا جرئة هي اسما ولدنة حرام
ضحى :المهم تحطو الحق ع مجد .. ليش ماشفتوها من جهة تانية .. ليش اهل الضيعة بدن يطفشوه شو عم يعملن .. ليش الكل ظالمو
ندى :اي اختي لاتنحري كتير عليه .. يعني انتي لو مانو معمي على قلبك كنتي شفتيه متلنا وازود
ضحى : عنجد بحزن عليكن .. بتقيمو الواحد من برا وبتحكمو عليه بدون ماتعرفو اصلو
:ليش هاد الو اصل .. نص اهل الضيعة بقولو عنو ابن حرام
ضحى :عفكرة هاد الكلام بدكن تتحاسبو عليه عند رب العالمين .. عندك دليل انو ابن حرام
سكتت يلي حكت هيك
ضحى :وحتى لو ابن حرام انا بحبووو
ندى :وهو بحبك 🙂
كلن ضحكو مع انو الوضع كان متوتر شوي
ضحى :ههههه بعرف يقبر قلبي
: كملي ندى شو صار كمان
ضحى :صحي شو صار
ندى :صارو العالم يترجوه انو يوقف .. سكت شوي بعدين قلن بوقف بشرط واحد
ضحى :شو هو
ندى :انتي
ضحى :اناااااا😳
ندى :اي قلو لابي بتعطيني ضحى وكلشي بيرجع متل ماكان
ضحى حست حالا طارت من الفرح وهية عم تسمع السالفة : اييي كملي .. يقبر قلبي انا اكبر احلامو ريتو يكفني .. كملي وليه
ندى :ابي كان رح يوافق لولا
ضحى :عرفانة انو في لولا بالنص .. لانو لو صاير وعطاه كنت خبرت .. بس بكل الاحول فرحت كتير ...واتأكدت انو بحبني كتير .. ياعمري يامجودي وانا بموت فيك يا غلااتي
البنات عم يضحكو عليها
ضحى :اي لولا شو ؟
ندى :صحي بنات خبرتو بالشيخ نمر لما اجا ووقف مجد عند حدو
:اي اي خبرنا ..
:وانا تفاجئت الشيخ نمر اجا لعنا ووقف بوجه مجد ومجد مانطق بولا حرف قدامو
:كأنو في شي مو مفهوم
:بس بقولو بنتو ياسمين ملكة جمال عنجد ؟ حدا شافا
ضحى :لا ملكة جمال ولاشي عادية جدا .. من وين عملتوها ملكة جمال
الكل بصوت واحد :بتعرفيها ؟؟
ضحى :اي ماهية دكتورة عظمية ومع يحيى بالمشفى زميلتو ..
:حلوة ولا لأ؟
ضحى :بصراحة اي حلوة كتير .. بس كمان مو فائقة الجمال .. بس انو بتحسيها حلوة وامورة ودكتورة وحكيا بجنن .. بشكل عام بتنحب
:قال مهرها ٥٠٠ ليرة دهب هيك كانو يحكو وقال محدا عم يتجرأ ويطلبها
:بكرا بيجيها شي وزير او شي مسؤول .. متل هية بياخدها صاحب منصب والو نفوذ
ضحى : اي تسطفل الله بهنيها
________________________
مجد فات ع غرفتو ورما علبة الدخان وموبايلو ع الارض جنب فرشة ورما حالو ع الفرشة وتسطح عليها .. حمل جوالو وبعتلا رسالة : سأمت وحدة الليل .. وانا بأنتظار طيفك البعيد .. اسعى اليه جاهدا لكن في كل مرة يبتعد اميال بقدر التي تقدمتها وكأننا نركض على عجلة في كل خطوة اتقدمها تبتعدين خطوة .. تعبت من احلامي كل ليلة تدخولين الي وتقولي لي انا جئت انا حقيقة حان الوقت لنكون مع بعض وترمين نفسكي في حضني محللة لي ومحللٌ لك .. اشم عطرك الدافي وانعش فؤادي .. اغلغل اناملي في خصلات شعرك واضمك واتنفسك حتى ينقطع النفس .. لا اريد شيء بعدها... الموت بين يديك وبأحضانك .. هذا الشيء يكفيني .. انتظرك في احلامي يا كل احلامي .. احبك
"المتيم في عشقكي معشوقكي الازعر😘😉"
ضغط على الارسال ورجع بعتلها رسالة تانية
صوتك وهمسك هذا ما احتاجه الآن بل ليس كل ما احتاجه بل كتعويض عن حرماني منك .. بأنتظارك اريد ان اغفى على صوتك...
ضغط ع الارسال وهو عم يتأمل المكان الفاضي يلي رح يجي منو الرد او ممكن يكون الرد بأتصال .. تنهد بتعب وتجلس اخد علبة الدخان وسحب سيجارة وسحب الريموت وشغل التلفزيون وارتكي على ركاية وصار يقلب بهل القنوات والسيجارة بتمو .. وكان كل قناة يقلب عليها يعمل عليها نظرة ويرجع يعمل نظرة على الموبايل
_____________________
عند ضحى
حست شي عم يرج بصدرها ..عرفت انو مجد
ضحى :تضربو انتو و المتة معد نطلع من الحمام هلأ
ضحى٢: لك ع وين رايحة تعي حكيلنا كيف تعرفتي ع بدر الدجى تبعك
ضحى :رح اعملها عحالي .. ثواني وراجعة
قامت بسرعة وراحت اتجاه الحمام .. قربت لتفتح بيطلع بوجها ابن عمها منهل عم ينشف اديه
ضحى خجلت ورجعت خطوتين لورا
علق المنشفة مكانها وقرب منها :كيفك بنت عمي
ضحى مع ابتسامة مجاملة :اهلين كيفك انت .. ان شاء الله منيح
منهل :الحمد لله .. بالاذن
تركها وراح وهية دخلت ع الحمام وسكرت وراها
فتحت الرسائل والابتسمة فورا غمرت خدودا ..
كبست ع الرد وظهر الكبيورد .. بس اصابيعها توقفو محتارين شو بدا تكتب
ضحى :ياربي من وين بجيب هالحكي والله مابعرف اكتب متلو .. اممم .. لروح ع غوغل شوف شي اقتباس للحب
بس تراجعت لما تذكرت مرة قلها : مابدي اقتباسات .. كلمة بحبك تكون طالعة من قلبك بتكفيني
ضغطت على الازرار وكبست على الارسال وناطرة الرد وعلى وجها ابتسامة ضاحكة لانو عرفانة شو رح تكون ردة فعلو لما يقراها
___________________
عند مجد
كان بعدو عم يقلب .. بس سرعان مارمى الريموت واتجلس واخد الموبايل ليقرا الرسالة يلي وصلتو ومتأكد انها منها
فتحها وقرها .. وضحك ضحكة كبيرة .. الرسالة هية عبارة عن كلمة بحبك ..
ضحك لانو عرف انها حاولت تكتبلو رسالة وماعرفت وهو تذكر لما قلها كلمة بحبك من قلبك بتكفيني ... وسبب ضحكو لانو عطول بترد عليه بهل الكلمة .. وابدا مابمل منها الا انو بيفرح فيها وبيضحك من كل قلبو
ضغط على الاتصال واتصل فيها
.......................
شافتو عم يتصل فورا ردت واول مافتحت سمعت صوت ضحكتو وفورا قال :وانا بموت فيكي
حكت بصوت واطي :بعشقك
مجد :كيفك حبي
ضحى :كالعادة مشتاقة
مجد :ياعشقي انتي ... شو اخبارك كيف كان يومك
ضحى :نحنا هلأ عند بيت عمي
مجد :اها .. وعند ايو بيت عم
ضحى :ابو منهل
مجد :وضرورية هالروحة
ضحى :اي عم نشوف جهاز بنت عمي
مجد :عقبالنا
ضحى :آمين .
مجد :ومن وين عم تحكيني
ضحى :من الحمام
مجد : ومع مين قاعدة
ضحى :انا والصبايا
مجد :اي منيح .. يعني ماشفتي حدا من ولاد عمك
ضحى :مبلى شفت منهل وانا جاية ع الحمام
مجد :اييي
ضحى :شو اي بس سلم هلي وضل طالع
مجد :طيب .. وشو كمان
ضحى : بس هدول ... اي صح كانو البنات عم يحكولي شو يلي صار بالساحة اليوم
مجد :اي وشو عم يقولو بلله
ضحى :مامهم المهم عرفت شو صار .. وانا معك بيستاهلو
مجد :ع لحظات كان ابوكي وافق
ضحى:اي خبرت وزعلت كتير ..بس كمان فرحت
مجد :وشو يلي فرحك
ضحى :انو مشاني كنت رح توقف كلشي .. عنجد انا بحبك وبموت فيك
مجد :ماقلتلك انتي كل احلامي
ضحى:بس ماقلتلي شو قصة الشيخ
مجد :ولاشي انسي
ضحى :كيف انسى .. وعحسب حكين انو في شي بينك وبينو
مجد : اي الشيخ زلمة معدل ومحترم وشيخ .. وماحبيت اكسر كلمتو لانو هو الوحيد يلي حسيتو بيفهمني وبيحترمني
ضحى :اي منيح والله .. لكن جيبو جاهة بركي ابي بيقبل ومابحب يخجلو
مجد : فكرت فيها ياعمري قبلك .. بس خايف ابوكي يخجلو ويردو وكون انا السبب .. هاد الشيخ نمر مو اي حدا
ضحى حست حالا زعلت وانو معقول مستحيل تكون بحياتا لحبيبا
مجد : شو يا عمري وين رحتي
ضحى :انو معقول مانكون من نصيب بعض
مجد : لاتحكي هيك .. ان شاء الله مابنكون الا لبعض بس انتي لا تزعلي
ضحى :ان شاء الله
مجد : وبعدين نسيتي انك وعدتيني انو اذا مامشي الحال تهربي معي
تلبكت وماعرفت شو ترد .. هية مستحيل تعمل هيك بس قالتلو هيك مشان مايتركا
ضحى :روحي ليك سامعة حركة برا .. حتى روح ع البيت بحكي معك .. لاتنام ها
مجد :مزال قلتلي لاتنام يعني مارح نام ..
سكرت وخبت الموبايل ورجعت لعند الصبايا
_______________________
بالمشفى
انفتح باب غرفة ياسمين دخلت ودخل وراها يحيى...قربت من اول كرسي وقعدت عليه ومبين عليها التعب
يحيى :مبروك يا احلا دكتورة
ياسمين :عنجد مابعرف كيف اتشكرك .. شكرا كتير لانك وقفت جنبي .. وشجعنتي اعمل هالعملية
يحيى: انا ع طول رح كون جنبك بس انتي وثقي بحالك .. وخوفك حاولي تسيطري عليه
ياسمين :بتعرف لو مادخلت معي العملية وشجعتني مستحيل كنت اقدر اعملها .. عنجد ماني مصدقة هي اول عملية بعملها عنجد كتير فرحانة .. بس لساتني متوترة
يحيى : كان لازم تعمليها وتخطي هالخطوة ويصير الك مكان بغرفة العمليات ... انت من اليوم مو بس دكتورة متدربة صرتي دكتورة نظامي وبشهادة مني
ياسمين مع ابتسامة :شهادتك بتكفيني وبتغنيني عن كل الشهادات
يحيى اكتفى بابتسامة حب وهو عم يتطلع فيها
ياسمين : بس كيف لقيت العملية خايفة الولد تطلع رجلو مايلة 😥
يحيى :ههههه شو مايلة ما مايلة .. هلأ انا صح مابعرف زيادة بالعظمية بس الدكتور احمد كان عم يأشرف ع العملية وكان عم يراقبك بنظرات اعجاب .. واكيد لو في غلط بشغلك كان قلك هي رجل مو حيلا
ياسمين : ماهو الدكتور احمد مابيحكي شي ولابقول اذا منيح او لأ بس بيكتفي بالصمت .. بس صح متل ماقلت لو في غلط كان بهدلني
يحيى : فارض هيبتو هههه
ياسمين :بس والله اتقطع قلبي على هالولد حرام مابيستاهل ... وكمان اتطرينا نزرعلو سياخ رح تعذبو
يحيى : دخيلو يلي قلبو طيب .. وكمان بدك تتعودي عهيك حالات ويكون قلبك قوي .. وبالنهاية هيك ربك كاتبلو
ياسمين :اي والله .. وبهل المناسبة عازمتك ع فنجان قهوة
يحيى :وانا قبلت
ياسمين :ههههه بس بدك كلمة
يحيى :معقول روح عحالي فرصة متل هي
نزلو ع الكافيه وطلبو قهوة وقعدو ع طاولة
يحيى بتعرفي انو ابوكي كان عنا بالضيعة اليوم
ياسمين بصدمة :عم تحكي جد ؟؟ ليش
يحيى :هاد ياستي القصة .....
___________________
عند البنات
: يلا ضحى احكيلنا كيف تعرفتي ع مجد
:عن طريق اختو ماهيك .. هية رفيقتك من ايام الابتدائي
ضحى : صح اختو رفيقتي من زمان .. بس انا كنت متلكن ماكنت طيقو لمجد ولا طيق شوفتو .. بلشت قصتي انا واياه من ايام الجامعة .. كنت عطول شوفو يوصل اختو او اخوه التاني يوصلها .. وهاد الشي ابدا ماكان يعنيني .. انا علاقتي مع زينة ولا مرة جبنا سيرة اخواتها او سألتا عنن .. المهم لمرة قررنا انا واياها نطلع من الجامعة ونروح ع السوق كان ناقصنا شوية غراض .. ونحنا عم نتفتل بالسوق انسرق جزداني
:كيف انسرق
:ليكون هو يلي سرقو
ضحى :لااا ماهو يلي سرقو .. يلي سروقو واحد ابن حرام .. شمطو من ايدي وهرب انا صرت ولول وابكي ولميت نص السوق علي بس محدا قدر يمسكو للحرامي .. والجزدان كان فيه كل وراقي وفي مصاري والموبايل ..
:وشو عملتي
ضحى : قدمت شكوى للشرطة .. وخليت عندن رقم ندى اختي مشان اذا لقوه ..
: والتقى الجزادن ؟؟
ضحى :اي تاني يوم اتصلو فيني وقال لقوا الجزدان بس ماقدرو يمسكو الفاعل .. وتاني يوم رحت استملت الجزدان وكان كلشي فيه من غير المصاري .. قلت المصاري تروح الله لايردا .. المهم وراقي وموبايلي رجعو
:اي وين القصة .. وكيف تعرفتي ع مجد
ضحى :ماهون هلأ رح تبلش القصة
#####فلااااش_بااااااك#####
قاعدة ضحى وزينة بحديقة الجامعة ومعن كتب وملخصات عم يتناقشو بموضوع معين
ضحى : ذكرينا لما نروح نمر ع المكتبة نجيب كرتون ملون ..
زينة : انت لاتتعذبي انا بقول لاخي نمر نجيبو بطريقنا
ضحى :اي بكون احسن .. وبتجي لعندي نعملون عندي اوكي
زينة :ليش تعالي انتي
ضحى :لك مابتعرفي اهلي .. مابخلوني روح لعندك قال لانو عندك اخوات شباب
زينة :وانا كمان مارح اجي كمان انتي عندك اخوات شباب
ضحى :يعني بلا غلاظتك بتعرفي وضعي
زينة :لا مابدي بنعملو هون بالجامعة بالاوقات الفراغ
ضحى :تضربي ايه
زينة : انا فهمانة على اهلك لانو اخواتي بيعتبروهن زعران مابخلوكي تجي .. وانا مشان اخواتي ماني جاي
ضحى :يعني ماحلك تعرفي وضعي وكل مرة بتهتيني بهل الحكي ... والله بالنسبة الي انتي واخواتك على عيني وراسي بس اهلي ماعم يتقبلو هالشي
زينة :والله مقدرة وضعك .. بس خلص خلينا هون بالجامعة لاعندي ولا عندك
ضحى :ماشي متل مابدك .. بس لاتنسي الكرتون عليكي
زينة :هههه تكرمي
رن موبايل ضحى
ضحى :الو ... مين ... نعم .. لحظة .. لحظة ... مين انت يا ابن الكلب ... لك لحظةة ... ايو صور ... عن شوووعم تحكي
فورا تغير شكلها وصارت ترجف .. وهالشي خلا زينة تخاف متلها وتوقف قدامها
سكرت الموبايل وبأيدها عم ترجف .. وفتحت ع الواتساب
زينة بخوف :لك شبك وقعتيلي قلبي ..
قعدت ضحى وايدها عم ترجف وتشوف صور عارية مطبقة عليها صورة وجها
ضحى صارت تبكي وتقول والله هدول ما انا والله ما انا
سحبت زينة الموبايل بسرعة واول ماشافت اول صورة شهقت وحطت ايدا ع تما
زينة :لك شووو هااد
ضحى :مابعرف .. مابعرف .. والله ما انا .. والله
زينة :شو ما انتي هي انتي ...شوفي منيح
ضحى :سحبت الموبايل منا وقالت :عم قلك ما انا .. اكيد تطبيق .. والله تطبيق
قلبت ع تاني صورة شهقت بخوف .. ووقف حجر عينا من صدمة المشهد .. لاحظت عليها زينة انو في شي صدمها .. اخدت الموبايل من ايدا واول ما اجت عينا ع الصورة رمت الموبايل بسرعة
زينة :الله لايوفقك شو هالصورة .. ومين هاد يلي معك
ضحى : عم قللك مابعرف لاتزيدها علي .. مشاان الله ..
زينة اخدت الموبايل ورجعت اتطلع ع الصورة وبسرعة طفت الموبايل وقالت استغفر الله العظيم
ضحى دفنت وجها بين ايدها وصارت تبكي :ياربي شو اعمل بهل المصيبة ... دخيلك شو اعمل
زينة :ضحى عنجد هالصور ما الك
رفعت راسا وقالت :عم قلك والله مو الي .. والله ما انا .. الوجه اي وجهي بس اكيد مطبقينا ع اجسام عارية والله ما انا .. اصلا ولامرة تصورت هيك شي .. اكتر صورة ممكن اتصورها بدون حجاب وفاردة شعري .. اكتر من هيك والله مابتصور
زينة :ليكون حدا مصورك
ضحى بعصبية :زينةة ماني ناقصتك مين بدو يصورني وانا بهيك مناظر
زينة :طيب اهدي اكيد في لغز بالموضوع
ضحى :اكيد اكيد .. الصور تطبيق والله تطبيق
زينة :صحي مين يلي اتصل فيكي
ضحى : واحد كلب قلي رح ابعتلك صورك يا فلتانة وتفرجي ع فضايحك
زينة : العما بقلبو ... الله يفضحو .. ماقلك شوبدو
ضحى :قال رح يتصل ويتفاوض معي ... الله لايوفقو .. لك عشو بدو يتفاوض
زينة :ضحى اهدي وروقي .. لازم نفكر .. ونعرف من وين جاب الصور
ضحى :زينة عم قلك تطبيق
زينة :فهمانة انو تطبيق بس صورة وجهك من وين جابا .. وكمان هاد شعرك لاتنكري
ضحى :والله صوري ماطلعت من الموبايل .. لك الك ولامرة بعتلك صورة وانا بلا حجاب .. والله ماببعت صوري لحدا
زينة : طيب فكري منيح ... اكيد هالصور طالعة من موبايلك
ضحى عم تبكي :والله موبايلي محدابيمسكو ... والله
زينة :ضحى روقي .. ليش هيك عم تبكي لازم تفكري
ضحى :بشوو بدي فكر .. انا انتهيت .. بتعرفي اذا وصلو هالصور لاهلي شو رح يعملو معي .. رح يشختوني ع البلوعة .. واذا بلعت ورق المصحف مارح يصدقو انو هدول تطبيق فوتوشوب.. صح اهلي متحررين شوي .. بس هالشي بس قدام العالم اما بالنسبة لعقليتن عندن عصبية قبلية .. صح عم يخلونا نتعلم انا وندى بس بدن غلطة صغيرة ليلاقوا حجة ويقعدونا بالبيت .. مشان الله يازينة قوليلي شو اعمل
زينة: والله ادي مربطة .. تعي نخبر الشرطة
ضحى :اكيد ابن هالحرام رح ينشر صوري اذا خبرنا الشرطة اكيد بكون حاسب حساب انو اعمل هيك تصرف
زينة :بس مين هو ابن هالحرام ..لازم نعرفو ... فكري مين اخد موبايلك .. مثلا بعتيه ع التصليح او هيك شي .. ايمت موبايلك بعد عنك
ضحى :لما انسرق بس(سكتت بصدمة ) اكيييد هو ..يلي سرق الجزدان ... اكيد اخد الصور من الموبايل وطبقن
مسكت راسا بين ايدها : انا انتيهت ... انا انتهيت 😭😭😭
زينة :لك اهدي اكيد في طريقة
ضحى :طريقة شوو .. ياربي دخيل اسمك تساعدني وتكون جنبي ..
رن موبايلا .. اتطلعت ع الرقم ووقفت دمعتا على خدا وهية عم تتأمل الرقم بخوف
زينة :مين ..
ضحى :هو هو
زينة :ردي وشوفي شوبدو
ضحى :خايفة .. خايفة
زينة :لك ردددي وشوفي شوبدو
ضحى :الله لايوفقو .. (ردت بصوت مرتجف) الوو
: شو ياحلوة عجبوكي الصور
ضحى :ياحقير يا واطي ...انت من وين بتعرفني .. شوبدك مني ... وهدول الصور كيف مطبقن
:ههههعههههه انا مابعرفك بس بنتعرف هههه وشوبدي منك بدي كتير ... والصور كيف مطبقن عيب نكشف سر المهنة
ضحى :يا ابن الحرام يا حقير والله لاشتكي عليك وخليهن يجرجروك
:ههههه اذا عندك الجرأة روحي اشتكي .. بس يكون بعملك انابفوت من هون وصورك رح تصير بكل موبايلات البلد من هون
ضحى: الله ينتقم منك .. الله يفضحك
:المهم ياحلوة سمعي شوبدي منك مشان الصور تضل بالحفظ والصون
ضحى :بدك مصاري .. قلي شقد بدك .. مستعدة ادفع بس حل عني
:ههههههعه رديهن عجوعتك .. ماني بحاجتك ولابحاجة مصرياتك .
ضحى عم تبكي :لكن شوبدك
:بدي اياكي بس مو بالحلال هههههههه
ضحى :فشررررت .. عم تسمع فشرررررت والله بدبح حالي ولا بخليك تطولني يا واطي ياحقير يا ابن الحرام
:هههههه مارح دقق عحكيك لانك منفعلة ومتوترة .. وبكرا متل الشاطرة رح تجي ع العنوان يلي رح ابعتلك اياه اي ياشطورة ...
ضحى :واثق من حالك كتير .. لاتنطر ع الفاضي والصور معك وروح خ******
:شو قوي عصك عدنو
ضحى :لانو مستحيل بيع شرفي لواحد رخصي ودنيئ متلك يا ابن الحرام ...
: طيب تسطفلي مارح اجبرك .. بس رح شوف وجه اهلك بكرا لمايشوفو صور بنتن بكل الضيعة .. هههه رح يقولو هي المثقفة بنت المثقفين شو عم تعمل .. وعم اتخيل اخوكي بأي طريقة رح يدبحك ...
مصدومة وماعم تحكي .. دموعا هية يلي عم تحكي
: معك مهلة من هون لبكرا الساعة وحدة..ههههه مابدي اخر الموعد مشان مايحسو اهلك عليكي .. ع الوحدة رح فضي حالي كرمالك ياحلوة .. يلا بااي 😘😘
وسكر نزلت الموبايل عن ادنها بأنهيار وهمست بحزن :انا انتهيت
زينة :مشاان الله لاتحكي هيك .. وكلي امرك لا الله
ضحى :دخيلك يا الله مالي غيرك .. يارب تكون معي .. وتخلصني من ابن هالحرام .. مستحيل انا روح لعندو مستحييللل حتى لو بدي انفضح قدام كل خلق الله مارح روح .. المهم كون عند ربي طاهرة وشريفة
زينة :شو ناوية تعملي .. بشو عم تفكري
ضحى :ماعم اقدر فكر بشي .. راسي رح ينفجر
التفتت ع زينة مسكتلا اديها التنتين بترجي وقالت :انصحيني قوليلي شو اعمل .. لو انتي محلي شو بتتصرفي
زينة :بخبر اخواتي مافي غير هالحل
ضحى :واخواتي رح يصدقو .. وبعدين اخواتي شوبدن يعملو .. مارح يطلع بأيدن شي ...والله اخواتي اوادم وماخرج مشاكل واذا خبرو رح يخبرو الشرطة واذا خبرو الشرطة انا انفضحت
زينة :طيب خلينا نروح هلأ
ضحى :وين بدي روح .. وكيف بدي قابل اهلي .. ياربي رح مووت
زينة :شو رأيك خبر اخي مجد وهو يتصرف
ضحى :لا لا دخيلك لسه قدام اخوكي بدك تفضحيني .. وشوبدو يعمل اخوكي .. مارح يطلع بأيدو يعمل شي
زينة : طيب بركي بيقدر .. وكمان اخي متل مابتقولو ازعر يعني بركي بيعرف يتصرف مع هداك
ضحى :مشان الله طلعي من رااسي .. قومي قومي خلينا نلاقي حل لهل المصيبة
طلعو لبرات الجامعة وكان مجد واقف بالسيارة وناطر اختو
ضحى :اخوكي ايمت اجا ؟
زينة :اجا من زمان بس انا اجلتو شوي .. تعي معنا لنوصلك
ضحى :لا لا رح روحي بسرفيس
زينة :ليكي كيف حالتك منهارة ع الاخر
ضحى :انشالله موت وارتاح
زينة :بترجاكي تعي نوصلك
ضحى :لا لا خلص روحي انا بدبر حالي
مجد قاعد بالبيكب وعم يتطلع ع اختو ورفيقتها تصرفاتن مو طبيعية وضحى مبين انها بكيانة .. بس مااهتم للموضوع .. لانو مدايق من تأخير اختو ... حط ايدو ع الزمورر وضغط عدة ضغطات
ضحى :روحي خلص ليكي عم يزمرلك هلأ بينزعج
زينة :طيب رايحة بس انتبهي ع حالك وانا رح احكي معك اول ماوصل .. خلينا نضل ع تواصل
ضحى :ماشي ..يلا روحي باي
زينة :بااي
تركتها وراحت ركبت مع اخوها
مجد بعصبية :اذا ماخلصتو برجع بعد ساعة
زينة :ماني ناقصتك انت كمان
التفت عليها وقال :ليش شو عندك زينة خانم
زينة :البنت واقعة بمصيبة كبيرة كتير .. مشان هيك اتأخرت معها
مجد اتطلع ع ضحى يلي تعبانة وواقفة وشاردة وقال :شبا
زينة :مابقدر احكي .. المشكلة كبيرة ومابتنحكى
مجد بضحكة جانبية : شو متضحك عليها واخد يلي بدو اياه ورماها
زينة :مين هاد
مجد :حبيبها
زينة :انت شوو عم تحكي البنت اشرف من الشرف .. ومابتعمل هيك لو بتموت
مجد :لكن شو هالمشكلة الكبيرة
زينة :خلص مافي شي امشي خلينا نروح
مجد :طيب انزلي اندهيلا خلينا نوصلا شكلا مابطمن
زينة :عجزت فيها مارضت
مجد:بالناقص
مد ايدو ليحرك الفتيس .. بس صرخت زينة وقالت:ضحىىىى.. مجد وقف وقف
رفع راسو مصدوم .. كانت اختو فاتحة الباب ونازلة لحقها بعيونو لقاها عم تركض ع جمعة طلاب .. فتح الباب ونزل .. قرب منهن وكانت ضحى مغمي عليها بالارض وزينة رافعتلا راسا وعم تحاول تفيقا
مجد :بعدي هيك خلينا ناخدا ع المشفى
قرب حملها وزينة عم تمشي جنبن بخوف .. فتحت باب البيك اب وقربت الكرسي لقدام لانو البيك اب الو مقعد خلفي بس مافي غير باب واحد
طلعت زينة بسرعة لورا وقعدا ورجعو الكرسي متل ماكان وقعدو عليه ضحى وربطلا الحزام .. وزينة من ورا سندتلا راسا ع الكرسي منيح .. وفورا راح ركب مكانو وانطلق ع اقرب مشفى