رواية جراح الحب
الحلقة التاسعة والعاسرة
بقلم شيمو الخطيب
الحلقه ٩
من رواية جراح القلب
عند هنا وام احمد في البيت
طبعا هنا قلقانه جدا و نفسها احمد يتصل ويطمنها..لكن هي لسه هتستنى، كل شويه كانت بترن عليه وهو بيكنسل، وطبعا القلق سيطر عليها اكثر لكن اللي كان بيصبر ها انه اكيد لسه في المقابله ومش عارف يرد عليها، وقعدت تدعيله كثير من كل قلبها ان ربنا يوفقه ويتعين ويبقى اكبر مدير حسابات في مصر
************
مصطفى سأل احمد هتقدر تشيل مسئوليه الحسابات كلها يا احمد
احمد.. ان شاء الله يا فندم ربنا هيقدرني
مصطفى سكت شويه وقال... للاسف يا احمد اغلب شباب جيلك معندوش الطموح اللي عندك انت بصراحه ممتاز من كل النواحي واهم ناحيه ان انا مرتاحلك نفسيا وده يخليني اني اعينك بدون تفكير مني، احساس كبير جوايا بيأكدلي انك فعلا قدها
احمد بفرحه ومش مصدق اللي بيسمعه.. بجد يا فندم حضرتك بتتكلم بجد انا مش مصدق اللي بسمعه يعني انا خلاص ا تعينت معاكم في الشركه اللهم لك الحمد الف حمد وشكر لك يا رب وطبعا احمد قام وقف ومش عارف يعمل ايه، راح لمصطفى وسلم عليه وباسه وهو مش مصدق انه خلاص اتعين وقعد يدعي ربنا كثير ويشكره على فضله عليه
مصطفى مذهول من احمد وطبعا قاعد مبتسم على اللي احمد بيعمله وقال.. اهدي بس كده، في ايه مالك انت كنت مستقل بنفسك ولا ايه، يا ابني انت من شكلك وشهادتك اللي قدامي دي بتدل على انك انسان في منتهى الاجتهاد وتستحق اكبر من كده وان شاء الله هتكون عند حسن ظني فيك انا متاكد
احمد... ان شاء الله يا فندم حضرتك مش متخيل ان دي كانت امنيه حياتي اني اتعين في شركه كبيره والحمد لله ربنا حققها لي وليا الشرف طبعا اني اكون مع حضرتك
مصطفى.. الحمد لله يا سيدي الفضل طبعا لربنا ثم للانسه هنا شكلها بتعزك قوي
احمد.. هنا،، هنا دي اختي والله مش عارف اعمل معاها ايه ربنا يسعدها يا رب ويوفقها في حياتها
مصطفى.. يا رب ويوفقك انت كمان،، بص يا سيدي ان شاء الله تقدر تستلم شغلك من بكره و هحملك مسئوليه اختيار كم محاسب كده حصل عجز فيهم ياريت متخذلنيش في اختيارك
احمد.. اطمن يا فندم ربنا يقدرني واكون عند حسن ظنك
مصطفى.. تمام يا احمد تقدر تتفضل دلوقتي وعلى معادنا بكره ان شاء الله
احمد.. ان شاء الله يا فندم،، واستاذن احمد ومشي
احمد والفرحه مش سيعاه واول حد فكر يكلمه كان هنا طبعا عشان يطمنها
احمد بتمثيل.. الو ايوه يا هنا اخباركم ايه
هنا بلهفه.. مش وقت اخبارنا يااحمد طمني عملت ايه
احمد.. للاسف يا هنا وسكت..
هنا قلبها وقف وحست ان هي خلاص الدنيا بتضيق عليها... ايه يا احمد اترفضت ولا ايه
احمد ساكت،، ما تنطق يا احمد ودموعها نزلت وصوتها اتخنق
احمد حس ان هنا بتعيط لحق نفسه قال.. لا الا دموعك يا هنا وبصوت عالي انا اتعينت يا هنون باركيلي يا حبيبتي
هنا بفرحه.. بجد يا احمد وقامت تتنطط وطبعا ناديه وام احمد فهموا وناديه زغرطت واحمد سامع فرحتهم وفرح بيها جدا
هنا.. الف مبروك يا احمد ربنا يوفقك يا رب
احمد... تسلميلي يا احلى اخت في الدنيا
هنا زعلت لكن قالت في نفسها مش وقت زعل النهارده.. انا بجد اليوم ده من اسعد ايام حياتي احمد قفل معاها وقرر يكلم ندى
احمد.. الو ايوه يا ندى باركيلي
ندى.. خير يا احمد على ايه
احمد.. انا اتعينت في اكبر شركه مقاولات
ندى.. بجد اتعينت ايه يا احمد في الشركه
احمد بفرحه.. مدير حسابات الشركه ايه رايك بقى
ندى.. مبروك يا حبيبي ربنا يوفقك يا رب( وطبعا كان في فرق في رد الفعل بين هنا وندى كبير)
فايزه سالت ندى.. خير يا ندى مبروك على ايه
ندى.. احمد اتعين مدير حسابات في شركه مقاولات كبيره يا ماما
احمد سمع فايزه وهي بتقول ببرود.. ماشي قوليله مبروك كنت فاكراه اتعين مدير مجلس اداره الشركه ولا حاجه
ندى.. ان شاء الله قريب يا ماما
احمد.. قولي لمامتك ان انا في اول السلم لسه وان شاء الله هاوصل وهبقى صاحب شركه
ندى.. ما تزعلش يا احمد انت عارف ماما بتهزر
احمد.. عادي مش هتفرق يا ندى
ندى.. يعني ايه مش هتفرق قصدك ان كلام ماما مش فارق معاك
احمد.. ندى انتي ليه كل ما ابقى فرحان بتحاولي تنكدي باي طريقه بقولك ايه ياندي انا هاقفل معاكي دلوقتي سلام يا ندى و قفل في وشها السكه
احمد نفسه يروح البيت بسرعه عشان يفرح مع عيلته اللي بتحبه بجد لكن شاغل تفكيره رد فعل فايزه وندى البارد اللي ضايقه جدا لكن هو مااستبعدش ده لانه ده طبعهم على طول
احمد راح البيت و كانت هنا مستنياه في بلكونه شقتهم اول ما شفته في الشارع داخلت جري
هنا بفرحه... احمد جه يا ماما،،،،، احمد جه يا خالتي وفتحت باب الشقه احمد طلع يجري على السلم شاف هنا مستنياه
احمد.. هنونه حبيبتي بجد مش عارف اقولك ايه يا وش السعد والهنا يا هنا وضحك
هنا بعشق.. اوعى تقول حاجه يا احمد انت لو ماكنتش مجتهد ما كانش تدخلي هيساعدك في حاجه اجتهادك وتعبك هو الاساس يا احمد
احمد.. ربنا ما يحرمني منك يا قمر ولا من وجودك جنبي
هنا من كل قلبها.. يا رب يا احمد يا رب
طبعا ناديه وام احمد باركوله كثير ودعوا ربنا يوفقه ويسدد خطاه
مؤمن داخل لقى في دعاوي وفرحه
مؤمن.. ايه ده اكيد في دعاوى وفرحه وبوس واحضان يبقى اتقبلت يا معلم.. قول اه
احمد.. اه يا سيدي اتعينت كمان مش اتقبلت بس
مؤمن... الله الله الله قشطه عليك يا ابو حميد يا جامد، بس طمني محاسب ولا مدير
احمد.. يا ابني اخوك جامد وميلقش عليه غير مدير
مؤمن... حبيبي يا ابو حميد ربنا يوفقك يا حبيبي يارب خلاص انا هاروح لعمك عبده اقوله يحجز لنا كلب بالمناسبه السعيده دي وانت اللي هتحاسب يا معلم
كله ضحك واحمد قال.. يا ابني حرام عليك سيب الراجل يسترزق،، لا يا سيدي انا هعزمك بره في اكبر مطعم
مؤمن.. ايوه كده اموت انا فيك وقام باسه
هنا.. لا يا احمد خليها بعد اول مرتب تقبضه من الشركه عشان الفرحه تبقى فرحتين
ناديه وام احمد وافقوا على كلامها وايدوها كمان
مؤمن.. تصدقي انتي بت فقر ما هو ممكن تبقي عزومتين واحده دلوقتي وواحده بعد اول مرتب لكن اقول ايه فقر،، وعليا الطلاق فقر،،
هنا.. طلاق!! يا عم اتجوز الاول وبعدين احلف بالطلاق وبعدين انت همك على بطنك وخلاص
احمد.. هو كده طول عمره طفس
اللحظه دي الباب خبط وكانت ندى
مؤمن.. ندى اهلا وسهلا اتفضلي وكانت فايزه وراها
ندى.. هاي يا جماعه ازيكم
فايزه.. ازيكم يا جماعه
احمد متفاجئ لكن رد وقال وعليكم السلام اتفضلي يا ندى اتفضلي يا حماتي
ندى وفايزه سمعو رد احمد و انهم فعلا مقالوش السلام اتكسفوا جدا( وفايزه عوجت شفايفها بضيق وقالت
فايزه.. ايه يا احمد مزعل ندى ليه
ام احمد.. اتفضلي يا ام ندى اقعدي الاول وبعدين نتكلم
فايزه.. ما بلاش ام ندى دي يا ام احمد انا ما بحبش حد يقول لي كده
مؤمن.. هو حضرتك مخلفه حد ثاني نقولك باسمه ولا حاجه يا ام ندى.
فايزه بضيق.. لا يا مؤمن لكن انا بحب تقولي يا فايزه، سهله عليك ولا ابسطهالك وضحكت جامد قوي
مؤمن.. لا ثواني ادخل اراجع على الحروف عشان اعرف انطقها
احمد بزعيق.. مؤمن خلاص بقى وبص لندى وقالها انتي زعلانه ليه يا ندى هو انا ضايقتك في حاجه
في اللحظه دي هنا وناديه استاذنوا عشان يمشوا ولكن ام احمد قالت.. تمشوا ليه اقعدوا معانا انتو مش اغراب..
فايزه.. معلش يا ام احمد سيبيهم على راحتهم وبعدين احنا كمان عايزين نتكلم على راحتنا
طبعا كله تنح من كلامها وهنا وناديه مشيوا على طول وهما علي اخرهم منها
ومؤمن نفخ بضيق وسابهم ودخل
ام احمد.. ليه كده يا ام....... قصدي يا فايزه دول مش اغراب واصحاب بيت ليه تحرجيهم كده
فايزه.. ايه يا ام احمد هو انا قلت حاجه غلط كل اللي قلته سيبيهم على راحتهم كده انا غلطت
ام احمد بنرفزه.. لا يا ستي مغلطتيش انا داخله اعمل شاي
فايزه.. لا معلش الشاي بيتعبني ممكن كابتشينو يا ام احمد
مؤمن خرج على آخره منها.. لا والله مش موجود لو عايزه نعملك سحلب او عناب لو تحبي
فايزه.. لا تمام الشاي كويس احمد قاعد على اخره وندى مكسوفه من كلام مامتها لانها زودتها وهما كانوا متفقين يصلحو مش يبوظو وهي كده عكت الدنيا على الاخر
احمد.. اظن كفايه كده ونتكلم عشان نخلص من الليله دي
فايزه.... ايه يا احمد انت مالك كده مش طايقنا من ساعه ما جينا وبصت لندى انا قلتلك بلاش اجي
احمد... استغفر الله العظيم، انتي عايزه ايه يا حماتي
ندى.. خلاص بقى يا ماما احنا جينا نصالح احمد تقومي تبوظي الدنيا
فايزه.. انا يا ندى،، انا بوظت الدنيا انتي مش شايفه خطيبك مش طايقني من ساعه ما دخلت عموما انا هريحكم انا ماشيه
ندى.. ماما استنى،،، استني يا ماما يووووووه
ونزلت فايزه واحمد ما فكرش يقولها اقعدي ولا يقوم وراها
ندى بصت على احمد لقيته حاطط رجل على رجل ومرجع راسه لورا و مش في دماغه حاجه
ندى.. احمد ايه البرود اللي انت فيه ده ده انت حتى ما هانش عليك تقول لماما اقعدي
احمد.. الا قوليلي يا ندى هي مامتك هتعرف تروح من هنا ولا هاتوه
ندى.. انت بجد مستفز قوي
احمد بزعيق.. انا اللي مستفز ولا هي انتي مش شايفه هي بتتكلم ازاي ولا بتقول ايه بصي يا ندى انا عارف طبع مامتك كويس وممكن استحمله عشانك لكن ان هي تضايق او تزعل حد من اهلي فده اللي مش هسمح بيه ابدا لازم تفهميها كده،، الا اهلي يا ندى،، فاهمه الا اهلي
ندى عارفه ان مامتها غلطانه.. خلاص بقه يا احمد ممكن ما تزعلش عشان خاطري
احمد.. اظن انتي سمعتيها حتى وهي بتباركلي على الوظيفه اسلوبها بجد كان مستفز جدا
ندى.. خلاص بقى يا احمد عشان خاطري ما تزعلش وبعدين انا عايزه احتفل بالمناسبه دي وعايزه اتغدى معاك ممكن تعزمني بره
احمد.. ماشي يا ندى ممكن لكن لو خرجنا هنا ومؤمن وامي وخالتي هيجوا معانا لاني وعدتهم
ندى.. لا طبعا انا مش خارجه مع هنا دي خالص
احمد.. على فكره اللي انت ما تعرفيهوش ان هنا هي السبب فى انى اتعين في الوظيفه دي ولها فضل كبير في كده
ندى.. طبعا اصلها بترسم على كبير
احمد.. ندى اتكلمي عنها بأدب احسنلك
ندى.. باقولك يا احمد ممكن ما تجيبش سيرتها قدامي تاني، بليز يا احمد لو بتحبني، احمد بجد انا بحبك وبغير عليك وخصوصا من هنا دي ممكن متكلمش عنها قدامي تاني
احمد.. ندى هنا دي اخ.......
ندى قاطعته... عارفه انها اختك يا احمد بس بلاش تجيب سيرتها قدامي انا بتضايق يا اخي ممكن ولا مش ممكن
احمد.. ماشي يا ندى
ندى.. خلاص يلا بقى اعزمني انا الاول وبعدين ابقى اخرج معاهم براحتك
احمد.. ماشي يا ندى ثواني هقول لماما ومؤمن
ام احمد.. يا ام احمد يا ست الكل
ام احمد.. نعم يا حبيبي
احمد.. انا خارج يا امي انا وندى ومش هتاخر ان شاء الله ويا ريت تبقى تعتذري لخالتي وهنا على ما اجي واعتذر لهم بنفسي
ام احمد.. والله ما انا عارفه هاقولهم ايه بس حاضر يا احمد ربنا يسهل
طبعا ام احمد كانت سامعه ان فايزه مشيت زعلانه وقالت احسن في داهيه
مؤمن في اوضته هيطق من ندى و فايزه ومش عايز يبين لاحمد عشان ميتدايقش
خرج مؤمن من الاوضه... ماما،، يا ماما هو احمد فين
ام احمد.. خرج يا حبيبي مع ندي
مؤمن.. والحيزبونه امها خرجت معاهم
ام احمد.. لا اسكت يا واد يا مؤمن دي نزلت متضايقه بعد ما حست ان احمد اخوك شويه وهيخنقها
مؤمن.. احسن تغور دي ست مش طبيعيه، مفكره نفسها بنت الباشا وهي ولا تسوا، انا لو مكان احمد كنت خنقتها فعلا
ام احمد.. احنا كل اللي يهمنا ندى يا مؤمن واحمد اخوك بيحبها يبقى معلش لازم نستحمل عشان خاطر اخوك
مؤمن.. انتي مش شايفه هي عملت ايه في ناديه وهنا والله لولا وجود احمد لكنت طردتها دي ست بارده وقليلة الذوق
ام احمد.. يا حبيبي معلش احمد مش هيتجوزها هي لكن ندي شكلها مش زي مامتها و هو ده اللي يهمنا
مؤمن.. الله اعلم يا ماما ندي تربيه فايزه
ام احمد.. مش شرط يا حبيبي يخلق من ظهر الفاسد عالم ربنا يهدينا ويهديكم يا اولادي
يلا بقى تعال معايا نروح نطيب خاطر هنا وناديه عشان ما يزعلوش
مؤمن.. يلا يا امي
مؤمن خبط على الباب وناديه فتحت
ناديه.. ادخل يا حبيبي اتفضلوا
ام احمد.. حبيبتي حقك عليا انا اوعوا تزعلوا
ناديه.. عيب عليكي يا ام احمد انا عمري ما ازعل منكم وبعدين الست دي طبعها باين لينا كلنا يعني ليس عليها حرج هههههه و كله يهون عشان خاطر احمد
ام احمد.. والله كنت متوقعه ده منك طول عمرك عاقله وبنت اصول يا ناديه ربنا يفرحك بهنا يا رب
مؤمن... بالمناسبه هي هنا فين
ناديه.. بتصلي يا حبيبي هتخلص وهتيجي
هنا خرجت وسلمت عليهم لسه ام احمد هتتكلم
هنا.. خالتي انا عارفه انتي هتقولي ايه كويس قوي ما لوش لازمه الكلام اعتبرينا ما سمعناش حاجه وما تضيعيش فرحتنا باحمد
ام احمد.. حبيبتي يا بنتي ربنا يكملك بعقلك يا رب بنت ناديه بصحيح
هنا دخلت تعمل شاي ومؤمن دخل وراها
مؤمن.. هنا انتي بجد...... واتفاجئ من شكلها....
الحلقه ١٠
رواية جراح القلب
دخلت فايزه البيت وهي على اخرها وبتشتم في احمد واللي جايبينه
مراد.. بسم الله الرحمن الرحيم مالك كده في ايه بتتخانقي مع دبان وشك ليه
فايزه.. باقولك ايه يا مراد سيبني في حالي دلوقتي
مراد.. طيب فهميني في ايه وفين ندى انتم مش خارجين رايحين لاحمد مع بعض
فايزه.. احمد و زفت والله ما انا عارفه بنتك بتحبوا على ايه ده بني ادم مستفز وبارد
مراد.. احمد!!! بالعكس ده شاب زي الفل و بصراحه اول مره احس ان بنتك ندى بتعرف تختار دي عمرها ما اختارت حاجه صح في حياتها حتى اصحابها كنت دايما بعترض عليهم وانتي للاسف بتقويها عليا
فايزه.. باقولك ايه يا مراد يا تقول كلمه كويسه يا تسكت خالص لكن هتتكلم عني انا وبنتي مش هسمحلك
مراد.. انا اساسا قرفت منك انتي وبنتك،، واكيد رحتي تغلطي في الناس هناك واحرجتي بنتك طول عمرك يا فايزه طالعه فيها قوي وعايشه عيشه غير عيشتك خالص دايما بتتعاملي مع الناس من فوق مع انك ممكن تكوني اقل منهم، يا شيخه حرام عليكي ده من تواضع لله رفعه وانتي ما عندكيش حاجه تتعالى بيها على خلق ربنا بالعكس احمد وعيلته احسن منك مليون مره
فايزه.. انت اتجننت ولا ايه يا مراد انت عارف انت بتقول ايه
مراد.. ولا باقول ولا ما بقولش هي كلمه اخيره عايز اقولهالك انت هتضيعي بنتك يا فايزه.. هتضيعي بنتك.. وسابها ومشي وهي هتموت من الغيظ من كلامه اللي زود خنقتها بعد اللي احمد عمله فيها
*******،،
احمد خرج هو وندى يتغدوا بره احتفالا بالوظيفه الجديده
ندى... قولي بقى يا احمد ست هنا دي كانت السبب ازاي انك اتعينت في الوظيفه دي
احمد.. ندي انتي مش قلتي متجبش سيرة هنا تاني بتتكلمي عنها ليه دلوقتي
ندى.. لا بس انا حابه اعرف عملت ايه حضرتها
احمد.. بلاش ننكد على بعض يا ندى نفسي مره اكلمك او اخرج معاكي ونرجع كويسين ممكن ولا مش ممكن
ندى بضيق... ممكن يا احمد ممكن
وقعدوا واتغدوا وهزروا كثير وكان يوم حلو لاول مره بعد الخطوبه
عند ناديه،،،،،،، ،
دخلت هنا تعمل شاي ومؤمن دخل وراها
مؤمن.. هنا انتي بجد... واتفاجئ من شكلها!!!
هنا انت بتعيطي،، بجد انا بتأسفلك بالنيابه عني وعن احمد وعن امي وعن كل اللي جرحك
هنا.. متتاسفش يا مؤمن حصل خير
مؤمن.. انتي بتعيطي ليه دلوقتى
هنا... مؤمن انا ما بقيتش باعمل حاجه غير اني بعيط تعبت قوي ولاول مره هقولك انا عايزه افوق يا مؤمن لكن بجد مش عارفه، مش عارفه
مؤمن.. حبيبتي لازم تبقى قويه و بتتحكمي في عواطفك بعقلك مش بقلبك في حالتك دي عقلك لازم هو اللي يشتغل عشان تقدري تواجهي و تعدي الازمه
هنا.. هحاول يا مؤمن،، بجد نفسي اخرج من الكابوس ده
مؤمن.. هتخرجي يا حبيبتي ما تقلقيش
مؤمن تليفونه رن وكانت مي بص مؤمن لهنا وهنا فهمت بصته انه مش عايز يرد قدامها
هنا صبت الشاي وخرجت لناديه وام احمد وقعدت معاهم
مؤمن.. خرج البلكونه يرد على مي
مؤمن.. الو ازيك يا مي
مي.. الحمد لله يا مؤمن انت عامل ايه
مؤمن.. انا تمام الحمد لله دورت عليكي كثير في الجامعه وما لقتكيش وبجد كنت قلقان عليكي جدا
مي.. بجد كنت قلقان يا مؤمن
مؤمن.. عندك شك يا بت في كده ده انتي عشره من زمان،، وضحك
مي.... عشره من زمان! ماشي.. الله يجبر بخاطرك
مؤمن.. المهم طمنيني ما جيتيش ليه النهارده
مي بزعل.. ماما تعبانه قوي يا مؤمن ومعرفتش اسيبها واجي
مؤمن بخوف... الف سلامه عليها ايه خير تعبانه مالها
مي.. ماما عندها القلب يا مؤمن بتجيلها ازمات على طول وانا ما بعرفش اسيبها وهي عندها الازمه
مؤمن.. الف سلامه عليها يا مي طب ما فيش حد من قريبكم يبقى معاكم،، اصحابكو ا،، اي حد
مي.. للاسف بعد وفاه بابا محدش من عيلته بيكلمنا احنا اصولنا صعايده وكلهم قاطعوا بابا من يوم ما اتجوز ماما لانهم كانوا عايزينو يتجوز بنت عمه لكن هو اختار ماما وقرر يقعد في القاهره
مؤمن.. طيب وعائله مامتك ما فيش حد منهم يساعدك
مي.. ماما ما لهاش اخوات كانت وحيده وطبعا بعد وفاه جدي وجدتي ما بقالهاش حد
مؤمن.. لا حول ولا قوه الا بالله ربنا يعافيها يا رب ويخليها لك و لو احتاجتي حاجه كلميني وماتتردديش اعتبريني اخوكي ولا اقولك بلاش اخوكي دي اعتبريني جاركو،، قريبكو،، اي حد غير اخوكي دي الله يباركلك، وضحك
مي.. هطير من الفرحه والسعاده وقالت حاضر يا مؤمن هعتبرك صديق مقرب
مؤمن.. صديق!! يلا اهي احسن من اخ وضحكوا الاتنين
مؤمن.. هو انا ممكن اتصل بيكي على طول اطمئن على مامتك ( مامتها برده يا لئيم) 😂😂😂
مي.. طبعا يا مؤمن تقدر تتصل في اي وقت
مؤمن.. اهم حاجه هي حالتها كويسه دلوقتي ولا محتاجه حاجه
مي.. لا هي احسن دلوقتي والحمد لله ربنا بس يعديها على خير
مؤمن.. ان شاء الله هتعدي، صلي انتي بس وادعيلها بالشفاء ان شاء الله هتبقى زي الفل
مي.. تسلم لاهتمامك يا مؤمن
مؤمن.. يا بنتي ما تقوليش كده ما قلتلك انتي عشره من زمان وضحك، وقفلوا على وعد بمكالمه ثانيه.
*****،،،،،،، **********
احمد قام وصل ندي لبيتها وندى ضغطت عليه يدخل
ندى.. عشان خاطري يا احمد تعالي نقعد جوه شويه
احمد.. ندى انا متاخر خليها يوم تاني وخصوصا اني بجد تعبان ومرهق قوي
ندى.. انت كده هتزعلني وهتحسسني انك مش عايز تدخل عشان ماما
احمد.. بصي يا ندى انا طول عمري صريح،، بصراحه كده انا مش برتاح فوجود مامتك ولا هي بترتاح في وجودي وانا اللي مصبرني اني ان شاء الله هنتجوز وتبقى تظبط مواعيدها لزيارتك في اوقات ابقى فيها مش موجود في البيت،، اللي محيرني اني مش عارف هي ليه بتعاملني كده
ندى.. احمد صدقني الكلام ده بيزعلني قوي لكن ماما طيبه والله هي بس.....
قاطعها احمد.. ندى انا ما يهمنيش مامتك ايه انا كل اللي يهمني انتي ايه و اتمنى ما تكونيش زيها لاني عمري ما هاكون زي عمي مراد
ندى.. وماله بابا بقه يا سي احمد
احمد.. مش موضوعنا دلوقتي كل واحد حر في حياته وباباكي راجل زي الفل وانا بحبه جدا يلا بقى ادخلي وسلميلي عليه
مراد خارج وشكله متضايق
مراد.. وتسلملك عليه ليه يا احمد طب ما تدخل انت سلم عليه بنفسك
احمد.. عمي والله وحشتني انا اسف والله كنت عايز ادخل بس بجد مرهق وتعبان جدا
مراد.. مبروك يا احمد على الوظيفه الجديده ربنا يوفقك يا ابني انت تستاهل كل خير يا حبيبي
احمد.. تسلم يا عمي الله يبارك فيك
مراد.. متزعلش يا احمد من فايزه انت عارفها انا والله مش عارف هي عملت ايه لكن هي ما بتروحش حته غير و تعمل مشاكل و شكلها كانت جايه متضايقه فهمت اكيد انها نيلت الدنيا حقك عليا انا وارجوك اوعي تاخد ندي بذنب مامتها
احمد.. ما تقولش كده يا عمي وبعدين انا عمري ماهاخد ندى بذنب مامتها انا اكبر من اني اعمل كده
مراد.. ربنا يباركلك يا ابني يا رب يلا لو هتروح تعالي وانا هوصلك
احمد.. بص لندى وقالها.. مش عايزه حاجه يا ندى هاكلمك لما اروح ان شاء الله
ندى... لا يا احمد شكرا
احمد يلا يا عمي ومشي هو ومراد
***********
مؤمن دخل من البلكونه بعد ما كلم مي وقاعد سرحان
هنا.. مالك يا مؤمن سرحان في ايه كده
مؤمن.. لا ولا حاجه ياهنا
هنا.. عليا انا الكلام ده، انت جاتلك مكالمه وشكلها مهمه،، مش هتقولي مين بقى اصل الفضول هيموتني
مؤمن.. ضحك انتي كمان بقيتي فضوليه،، مفيش يا ستي دي زميله ليا في الجامعه
هنا.. بجد!! زميله!! شكلك وقعت ولا ايه والله هفرح فيك قوي
مؤمن.. اقولك بصراحه يا بت يا هنا انا مش عارف احدد مشاعري كويس، حاسس ان انا متلخبط، مي معايا من سنه اولى في الكليه تعتبر هي اقرب بنت ليا، بنت محترمه ومتدينه واحسن حاجه فيها انها محافظه على نفسها وعامله حدود مع اي احد بكلمها، كنت دايما برتاح معاها لكن السنه دي مختلفه
هنا.. وليه مختلفه حصل حاجه جديده
مؤمن.. بصي انا السنه دي بقيت ما بحبش اقعد في الجامعه وهي مش موجوده ولو موجوده ما بحبش اروح البيت، بقيت بحب اسمعها وهي بتتكلم، و بحب اشوف كل ردود افعالها على اي كلمه بقولها، بحب اشوفها وهي ماشيه، وهي قاعده، بحب اشوفها في كل حالاتها متضايقه، وفرحانه باختصار هي بقت محور حياتي كلها ياهنا( وهرش في رأسه) هو ده بقى اسمه حب هههه
هنا فرحانه للمؤمن جدا.. لا يا خفيف ده اسمه استعباط واستهبال مش حب خالص ههههههه
مؤمن... طيب الحمد لله طمنتينى كنت فاكره الحب ههههه
هنا.. والله انت مجنون بس بجد فرحتني قوي يا مؤمن ربنا يسعدك ويكرمك(وغمزت بعينها) انت ومي يا رب
ناديه...ايه يا ولاد بقالكو ساعه بتتكلموا بهمس كده ليه في ايه ما تعرفونا
مؤمن ضحك.. يا نهار ابيض حتى ناديه بقت فضوليه. وضحكوا كلهم
وفجاه الباب خبط وكان احمد
مؤمن فتح.. ايه ده انت جيت لا يا عم مش عايزين لبن النهارده
ام أحمد.. حد يقول كده لاحلى مدير شركه في مصر
ناديه.. تعالي يا حبيبي سيبك من الواد ده،، ده بيحقد عليك
احمد.. حبيبتي يا ناديه والله انا ما باخدش على كلامه ليس علي المجنون حرج،، وبص لهنا، ازيك يا هنا
هنا.. الحمد لله يا احمد كويسه وقامت تدخل اوضتها
احمد.. ناديه انا اسف بجد مش عارف اراضيكي ازاي اوعي تزعلي، وانا ان شاء الله هاجيب ندى تعتذرلكو بنفسها
ناديه.. اوعى تعمل كده يا احمد احنا والله مش زعلانين خالص اهم حاجه فرحتنا بيك يا حبيبى
احمد.. طيب هنا شكلها زعلانه قوليلي اراضيها ازاي
ناديه.. يا حبيبي ولا زعلانه ولا حاجه هي ممكن تكون متضايقه شويه ومع الوقت هتروق
مؤمن.. عايز تراضيها اعزمها بره دلوقتي هههه
احمد.. والله انت عيل طفس ربنا يهديك يا ابني والله،، وكله ضحك عليه
كل واحد روح على بيته بعد كده
مؤمن رجع ودخل اوضته وبيفكر في مي والنوم مجافيه من كثر التفكير، فجاءه تليفونه رن و كانت مي
مؤمن.. الو... واتفاجئ من صوتها،، مي ما لك يا حبيبتي في ايه
مي مش مركزه في كلام مؤمن طبعا.. الحقني يا مؤمن ماما تعبانه قوي وانا مش عارفه اتصرف اول مره ما تقومش على طول انا هاموت عليها يا مؤمن
مؤمن.. طب اهدى بس وانا ان شاء الله مسافه السكه واكون عندك قولي بس العنوان بسرعه
مي قالت العنوان لمؤمن وقام لبس بسرعه و نازل
احمد.. مؤمن! انت لابس رايح فين دلوقتي
مؤمن محتار مش عارف هيروح عندهم لوحده ازاي وبصفته ايه
مؤمن.. بص يا احمد في واحده زميلتي والدها متوفي وعايشه مع والدتها بس اتصلت بيا دلوقتي وقالتلي ان والدتها تعبانه وهي مش عارفه تتصرف
احمد.. ماشي يا مؤمن الحقها يا حبيبي وانا كمان هدخل البس واجي معاك
مؤمن.. لا يا احمد متتعبش نفسك، انت عندك شغل مهم الصبح، انا بس محتار هاروحلها بصفتي ايه وانا مش حابب حد من الجيران يقول عليها أي كلمه مش كويسه ،، دبرني يا احمد اعمل ايه.
احمد.. بص ملهاش غير حل واحد
مؤمن.. الحقني بيه ابوس ايدك
احمد.. هنا.. خدها معاك وهيبان انها صاحبتها وانت اخوها وجاي عشان يبقى معاهم راجل واختك متروحش لوحدها
مؤمن.. هو حل كويس تفتكر ناديه هتوافق
احمد.. هتوافق ان شاء الله جرب انت بس واهي محاوله
مؤمن.. يا رب يا احمد يا رب
دخل احمد يلبس عشان يروح معاهم ومؤمن راح لناديه وخبط على الباب
ناديه.. حبيبي في ايه خير رايح فين كده
مؤمن.. محتاجلك يا ناديه في خدمه انسانيه
ناديه.. خير يا حبيبي اؤمر
مؤمن.. انا محتاج هنا معايا ضروري
هنا سمعت.. خير يا مؤمن ما لك زعلان كده ليه
مؤمن.. مي يا هنا والدتها تعبانه ومش عارفه تتصرف انا بصراحه محرج اروح لوحدي فاحمد اقترح عليا اخدك معايا عشان ما حدش يتكلم عليها
هنا.. ماشي يا مؤمن ثواني وهاجي معاك على طول، وجريت هنا من قدامهم عشان تلبس
ناديه.. في ايه يا ولاد ما تفهموني
مؤمن.. هافهمك لما ارجع يا حبيبتي
احمد خرج.. ناديه ما تقلقيش هي خدمه انسانيه وهنيجي علي طول،، وبعدين انا ومؤمن معاها ما تخافيش
ناديه.. يا حبيبي انا مش خايفه على هنا انا بس قلقانه عليكو كلكم
احمد.. ما تقلقيش يا ست الكل هنكلمك على طول
مؤمن.. احمد خليك انت عشان شغلك الصبح انا مش عارف هنرجع امتى
احمد.. ما ينفعش اسيبك انت وهنا في وقت زي ده وبعدين انت عايز تطمع في الثواب لوحدك ولا ايه يا مؤمن
مؤمن.. تسلملي يا اخويا يا رب واستعجل هنا
يلا يا هنا،،،،
هنا.. انا جهزت اهو يلا بينا
ومشيو الثلاثه وبتحاوطهم دعوات ناديه ليهم بالسلامه
نزل مؤمن قدام بيت مي وطلعوا جري ومؤمن خبط
مي بعياط.. مؤمن الحقني
مؤمن.. اهدى يا حبيبتي وفهميني ايه اللي حصل
مي.. والله ما عارفه كانت بتتكلم معايا عادي وفجاه ما قدرتش تاخذ نفسها
مؤمن.. ما تقلقيش يا مي هتبقى زي الفل ان شاء الله
احمد طلع جري.. مؤمن انا اتصلت بالاسعاف وهتيجي حالا..
مؤمن.. كنا جبنا الدكتور على طول يا احمد
احمد.. المستشفى افضل طبعا في حالتها دي هتعملها اللازم و تطمنا عليها ان شاء الله اطمني يا انسه مي
مي.. يا رب.... يا رب
الاسعاف جت واخذت والدة مي ودخلوها غرفه في المستشفى والدكتور خرجهم كلهم عشان يكشف عليها
مؤمن واقف جنب مي يهديها وهيموت عشانها وهنا دموعها نزلت على شكل مي وحزنها على والدتها
احمد.. ايه يا هنا انتي جايه تصبريها ولا تعيطي معاها
هنا.. صعبانه عليا قوي يا احمد
احمد.. ادعيلها ربنا يشفي والدتها ويقومها بالسلامه
هنا.. يا رب يا احمد يشفيها ويعافيها
مؤمن.. مي اهدي ان شاء الله هتبقى كويسه والله
مي.. مش باين يا مؤمن ماما اول مره يحصل لها الاعراض دي ربنا يستر دي لو جرالها حاجه انا هموت وراها
مؤمن.. يا بنتي ما تقوليش كده حرام عليكي ان شاء الله هتبقى كويسه
مي بعياط.. يااااااااااا رب
الدكتور خرج و كله جري عليه
الدكتور.. للاسف يا جماعه لازم تتنقل غرفه العنايه حالا
مي بعياط شديد.. ليه يا دكتور هي حالتها خطر
الدكتور.. لا ان شاء الله خير هي هتتحط تحت الملاحظه لانها عندها السكر عالي والضغط كمان وده لازم يظبط و للاسف هي في غيبوبة سكر
مي.... سكر!!! بس هي معندهاش سكر
الدكتور... للاسف يا انسه هي عندها سكر وعالي جدا كمان
احمد.. طيب يا دكتور هي الحاله هتستقر امتي
الدكتور.. والله يا استاذ معرفش بس ان شاء الله خير ما تقلقوش هنظبط الضغط والسكر وهتبقى زي الفل ان شاء الله
احمد.. شكرا يا دكتور
مؤمن.. مي خلاص بقى يا حبيبتي ما تعيطيش الدكتور قال هتبقى كويسه عشان خاطري بطلي عياط
مي بحب شديد لانها سمعته اول مره يقول يا حبيبتي... أنا خايفه يا مؤمن خايفه عليها قوي،،، مؤمن
مؤمن.. عيون مؤمن
مي.. ممكن تخليك جنبي، وجودك معايا مطمني قوي
مؤمن.. حبيبتي انا معاكي لاخر يوم في عمري
مي بصت لمؤمن وكانت بصتها كفيله تقولو كل كلمات الحب الموجوده
احمد.. هنا ما تفهميني هو ايه اللي بيحصل ده، اوعى يكون مؤمن طب ولا حاجه
هنا.. افهمك ايه،، اظن الموقف واضح جدا
احمد.. مؤمن اخويا بيحب!!! يا نهار ابيض اخيرا ده اخر واحد كنت افكر انه يحب
هنا.. ليه يا احمد مش بني ادم وعنده قلب اهم حاجه بس انه يختار صح،، ومي شكلها بنت ناس وطيبه
احمد اتضايق من كلمتها وقال في نفسه اكيد قصدها ان انا اختياري كان غلط
مؤمن قال لاحمد انه ياخد هنا ويروح وهيقعد هو مع مي
احمد فعلا خد هنا وروحوا وهماساكتين خالص وكان كل واحد بيفكر في كلام التاني
لكن هنا قالت صحيح يا احمد انا شفت فارس في الشركه امبارح
احمد.. فارس!!!