رواية جراح القلب الفصل الرابع4والخامس5والسادس6 بقلم شيمو الخطيب

الحلقة الخامسه والسادسه

بقلم شيمو الخطيب 

مؤمن خرج من المطبخ واتفاجئ بأ احمد

مؤمن بتوتر.... احمد،،!!! انت واقف هنا من امتي؟

احمد... لسه حالا ليه فيه حاجه

مؤمن.. لا ابدا انا بسأل

احمد.. مالك كده متوتر ليه

مؤمن... ولا متوتر ولا حاجه انا بس قولت زمانكوا نسيتو ان في شاي بيتعمل وضحك

احمد... انت بتقول فيها الحق ماما وخالتي بقه فكرهم ان الشاي وصل

مؤمن.. ماشي 😂😂

احمد دخل لهنا المطبخ وكانت مصدومه وخايفه يكون احمد سمع حاجه لكن اتطمنت من رد احمد علي مؤمن واتأكدت انه مسمعش

احمد... اي يا هنا مالك شكلك زعلان، اوعي يكون الواد مؤمن زعلك ف حاجه

هنا... لا ابدا مفيش حاجه يا احمد اتطمن

احمد.... يعني متأكده ان مفيش حاجه وان الواد ده مضايقكيش

هنا... لا والله ابدا مؤمن ده مفيش أطيب منه

الا صحيح.. كنت جاي المطبخ ليه

احمد.. كنت بستعجل الشاي ياستي اللي مش راضي يتعمل ولا يتشرب

هنا.. بضحك مصطنع... طب الحق بقه اشربه سخن قبل مايبرد وانا هحصلك على طول

احمد... حاضر ياهنا بس متتاخريش بقه

هنا... حاضر يا احمد ومشي احمد وهنا اتنهدت بألم وحمدت ربنا انه مسمعش حاجه

مؤمن واقف في البلكونه بيشرب الشاي واحمد قاعد سرحان

ناديه... اي يا عريس سرحان في اي كده

احمد.. لا ابدا مفيش حاجه بفكر في شغلي بكره

ناديه... شغلك برده يا عريس

احمد... ضحك.. اه والله يا ناديه شغل وبعدين انا لو بفكر في ندى اكيد هكلمها على طول

ناديه... ربنا يسعدك يا حبيبي

احمد... تسلميلي ياست الكل

دخلت هنا لمؤمن البلكونه وسألته

هنا... تفتكر يا مؤمن احمد سمع حاجه

مؤمن.. لا معتقدتش ياهنا متقلقيش

هنا... خايفه قوي يكون سمع انا ساعتها ممكن اموت نفسي

مؤمن... يابنتي بلاش الكلام ده أحمد لو كان سمع كان بان عليه لكن هو مش باين عليه أي اندهاش

هنا... ربنا يستر يا مؤمن

مؤمن... متقلقيش ياهنون وبعدين سيبك من النكد ده وركزي في ريحة الكباب اللي تجنن والله عم عبده ده راجل سكره معيشنا ف الريحه وبس.. استنى شوفي هعمل فيه اي

مؤمن...الله عليك ياعم عبده تسلم ايدك على الريحه الحلوه دي

عم عبده... تسلم يا بشمهندس ربنا يجبر بخاطرك

مؤمن.... طب والنبي بقه هاتلى حتة لحمه حلوه من اديك الحلوين

عم عبده.... انا عنيا ليك يا بشمهندس 

مؤمن... تسلم عينك بس استنضف الله يخليك وضحك جاامد

عم عبده... عيب عليك يا بشمهندس احنا لحمتنا زي الفل

مؤمن... ياراجل قول كلام غير ده انا شايفكو بالليل وانتو بتدبحوا الكلب قبل الفجر

في القهوه جنب محل عم عبده وكل اللي قاعد عليها ضحك على كلام مؤمن وهنا ضحكت وقالت

مؤمن.. حرام عليك كده الراجل يزعل

عم عبده... بضحك.. عيب يا بشمهندس كده هتوقف حال المحل

مؤمن... تصدق ياعم عبده الحي ده كله لو شافك بعنيه وانت بتدبح كلاب بالليل هيصحي الصبح يشتري منك عادي سيبها لله ده الرزق بإيد ربنا

وبعدين انت اي حاجه من ايدك شفا يا عم عبده ياسكره

عم عبده... والله منا عارف اقولك اي يا بشمهندس مره تحسسني ان اللحمه حلوه ومره انها وحشه انا احترت معاك والله متحضرينا يا استاذه هنا

هنا... بحرج... والله يا عم عبده انت زي الفل مؤمن بس اللي بيحب بهزر حقك عليا انا

عم عبده... ربنا يجبر بخاطرك يابنتي انا عمري مزعل من البشمهندش ده حبيبنا كلنا

مؤمن... احلى صباح عليك يا عم عبده ياسكره،،،،، وكل اللي قاعد واللي واقف ضحك على حوارهم

***

دخل احمد اوضته واتصل على ندى

احمد... ندى ازيك يا حبيبتي وحشتيني انتي لسه نايمه ولا اي

ندى... بنوم ها يا احمد انت متصل دلوقتي عشان تقول وحشتيني 

احمد... بضيق شديد معلش ياستي ممكن حضرتك تديني ميعاد اقولك فيه كده 

ندى.... احمد انت كده بتفوقني بليز يا احمد اجل كلامنا لما اصحى 

احمد... لا وعلى أي يتأجل خالص 

ندى... احمد يلا يا حبيبي تصبح على خير وقفلت واحمد هيطق منها ومن برودها اللي مكنش مكتشفه قبل كده 

خرج احمد علي صوت مؤمن ودخل البلكونه وبص شاف هنا موجوده 

احمد... مؤمن انتو واقفين هنا بتعملوا اي 

عم عبده لمح احمد ف البلكونه وقاله 

عم عبده.. الحقنا يا استاذ احمد اخوك هيوقف حالنا وضحك 

احمد... لا عاش ولا كان اللي يزعلك يا عم عبده متاخدش على كلامه مؤمن بس بيحب يهزر 

عم عبده... أنا عارف يا استاذنا انتو على دماغي من فوق 

مؤمن... والله منا مزعلك ياعم عبده وهنزل آكل من عندك احلى حتة لحمه زي الفل 

عم عبده... تنورني يا بشمهندس 

نزل مؤمن لعم عبده واحمد واقف هو وهنا ف البلكونه 

احمد..بضيق... انتي واقفه ليه كده ياهنا 

هنا.. يعني اي واقفه ليه كده يا احمد.. عادي يعني كنت بشرب الشاي انا ومؤمن 

احمد... ومدخلتيش شربتيه جوه ليه لازم يعني البلكونه وبعدين انتي شايفه ان في شباب واقفين وعنيهم على البلكونه اي لازمة الوقفه دي 

هنا... أنا ماخدتش بالي منهم عموما انا هدخل عن اذنك 

دخلت هنا وسابت احمد مخنوق من ندى وردها وزاد خنقته لما شاف هنا ف البلكونه 

مؤمن نزل وراح لعم عبده وقاله 

مؤمن... جهزت ساندوتش الكلاب.. قصدي الكباب يا عم عبده 

كله ضحك عليه جامد وعم عبده ضحك وقال 

عم عبده... طبعا جهز بس يارب ميوجعش بطنك يا هندسه 

مؤمن.... ضحك جامد وقاله عيب عليك يا راجل يا طيب قولتلك ان اي حاجه من ايدك شفا 

احمد واقف مخنوق من اخوه وتصرفاته او يمكن هو مخنوق من الدنيا كلها وحاسس ان الدنيا ضيقه عليه قوي 

دخل احمد اوضته وقفل عليه وحاول ينام لكن هيجيب النوم منين وهو بيفكر ف ندى وتصرفاتها 

مؤمن طلع وهنا كانت بتحكي لناديه وأم أحمد علي اللي هو عمله وقعدوا كلهم يضحكوا مع بعض 

لكن هنا حاسه ان احمد مدايق ونفسها تدخل تسأله مالك وتطمن عليه لكن للأسف صعب 

هنا قامت وقالت 

هنا... ماما.. خالتي انا همشي بقه لاني محتاجه ارتاح شويه 

ناديه خديني معاكي يا هنا انا كمان عايزه ارتاح 

ام احمد.. لا انتو هتسيبيني لوحدي العيال دي هتدخل تنام وانا هقعد لوحدي 

ناديه... ادخلي يا حبيبتي ارتاحي انتي كمان ولما تصحي هتلاقينا قدامك احنا لينا مين غيرك بس يا ام احمد 

ام احمد.... خلاص اعملوا حسابكو نتغدى مع بعض النهارده 

ناديه.. مالوش لزوم التعب يا ام احمد بعد الغدا نبقى نقعد مع بعض شويه

ام احمد.. لا والله احنا هنقضي اليوم مع بعض روحوا بس انتو ارتاح وبعدين لما تصحو تعالو على طول هنجهز اكل خفيف وناكل سوا 

مؤمن... خلاص بقه يا ناديه ام احمد قالت نتغدى مع بعض يبقى نتغدى مع بعض... الواحد مش عارف بطنه وجعاه ليه.. الله يسامحك ياعم عبده علي لحم الكلاب اللي بتأكله لينا 

ضحكوا كلهم وقالو حرام عليك والله الراجل طيب ولحمته زي الفل 

مؤمن ضحك وقال عارف والله بس انا بحب اهزر معاه 

هنا وناديه مشيوا ومؤمن دخل ينام شويه وأم أحمد دخلت برده تنام شويه عشان تلحق تصحى قبل العصر 

هنا اول مادخلت الشقه جريت علي اوضتها ورمت نفسها على السرير وفضلت تفكر في كلامها مع مؤمن ودموعها نزلت غصب عنها 

ناديه دخلت وقالت 

ناديه... هناااا.. هنااا 

هنا مسحت دموعها وقامت نعم ياماما 

ناديه.... لحد امتى هتفضلي كده ياهنا (وبصوت عالي) انتي بتعملي ف نفسك كده ليه يابنتي 

هنا... لحد ما اموووت يا ماما.. انتي ليه مش حاسه بيا 

ناديه بصدمه.. أنا!!! انا يا هنا مش حاسه بيكي ده انا  اكتر واحده تعبانه عشانك انا اكتر واحده موجوعه لكسرتك دي ليه يا هنا بتقولي كده 

هنا... بزعل... أنا اسفه ياماما بس كلكوا عايزني ادوس علي زرار عشان انسى وده صعب.. صعب قوي والله ياماما... وعيطت جامد 

ناديه... هو صعب بس لازم تحاولي مش تستسلمي وبعدين مين كلنا اللي عايزينك تنسى هو في حد تاني عرف 

هنا... اه يا ماما للأسف.. مؤمن عرف كل حاجه 

ناديه بصت لهنا بلوم... طبعا ده وانتو ف المطبخ بتعملو الشاي مش كده 

هنا بصدمه... عرفتي منين ياماما 

ناديه... صوتك كان عالي وانت بتعيطي ياهنا وفهمت انك ممكن تكوني بتحكي لمؤمن 

هنا... بخوف شديد... ماما،،،، يعني ممكن يكون احمد سمع وفتحت بقها بصدمه.. يعني خالتي سمعت 

ناديه.. لا يا حبيبتي متقلقيش احمد كان في اوضته وانتي عارفه انها بعيده عن المطبخ وخالتك انا شتت انتباهها عشان متسمعكيش بس ليه تحكي لمؤمن يا هنا 

هنا..  انتي عارفه ياماما مؤمن قريب مني قد ايه وهو زي مايكون كان حاسس لكن مكدب نفسه 

اهم حاجه انتي متأكده ان احمد مشمعش 

ناديه... بقولك كان في اوضته ياهنا.. فوقي بقه يابنتي وارجعي هنا اللي كانت ضحكتها بتسمع الدنيا كلها حرام عليكي نفسك وحرام عليكي تعذبيني معاكي 

هنا... اعذبك!!!! ليه ياماما بتقولي كده انا لايمكن اعذبك ابدا 

ناديه.... لا ياهنا بتعذبيني،، شكلك وإهمالك ف نفسك ووشك البهتان ده كل لما اشوفه اتعذب عشانك فوقي ياهنا عشان خاطر امك 

هنا... اوعدك ياماما هحاول انا عمري ماهقبل ابقى سبب لعذابك ولو ثانيه حاضر يا ماما ممكن بقه متقلقيش عليا 

ناديه.. ده متوقف عليكي انتي مش عليا انا 

هنا... حاضر ياماما ياريت نقفل موضوع احمد ده خالص 

ناديه... ياريت ياهنا ياريت 

هنا طبعا ريحت مامتها بالكلام بس لكن هي متأكده ان احمد طبع صورته على قلبها صعب انها تمسحها بسهوله وناديه كمان حاسه ببنتها وحاسه انها بتطمنها وبس وانها مش هتقدر تنفذ وعدها وتنسى احمد وقعدت تعديلها كتيييير ان ربنا يفرح قلبها يارب 

خرجت ناديه على اوضتها وحاولت انها ترتاح شويه لكن قلبها وجعها على بنتها الوحيده ومن كتر التفكير فيها استسلمت ونامت 

هنا طبعا كل اللي بتعمله انها بتفكر في احمد وبس اللي سيطر على كل مشاعرها لكن هي مش بايديها اي حاجه غير البكي واستسلمت للنوم بعد دموع وحرقة قلب لايعلم بها الا الله.. *********

بقلمي شيمو الخطيب*******

مؤمن دخل اوضته وكل تفكيره ف هنا وحبها الكبير لأحمد وشتم اخوه في سره 

مؤمن... غبي انت قوي يا احمد مش لاقي غير ندى وتحبها انا مش عارف مش برتاح ليها ولا لعيلتها ليه لكن نقول ايه بقه النصيب 

ام احمد... واد يا مؤمن انت اتجننت ولا اي بقيت بتكلم نفسك كمان 

مؤمن... لا يا أمي ولا بكلم نفسي ولا حاجه كل الحكايه ان في موضوع شاغلني كده وبحاول اشوف ليه حل 

ام احمد.... طب متقولي يا حبيبي وانا اساعدك في حله 

مؤمن.... لا يا أمي للأسف مينفعش الموضوع ميخصنيش عشان اقولو،، ان شاء الله هوصل لحل قريب متقلقيش انتي بس 

ام احمد.. ربنا يدلك على الصح ياقلبي ويحميك من كل شر 

مؤمن... يارب ياست الكل وميحرمني من دعواتك ابدا 

طبعا كله من إجهاد اليومين اللي فاتو دخل ونام على طول الا  أحمد اللي لسه بيفكر في موقف ندى ومتغاظ منها جدا 

،،،،،،، 

بعد العصر هنا صحيت وبصت على مامتها لقتها بتصلي دخلت اتوضت وخرجت عشان تصلي 

ناديه.. هنا انا هروح لخالتك ولما تخلصي حصليني 

هنا.. حاضر يا ماما 

راحت ناديه لام احمد ودخلت كان أحمد واقف ف البلكونه ورحبوا بيها كالعاده

احمد شاف فارس من البلكونه نازل من عربيته دخل عشان يستقبله 

احمد... ماما فارس جه ياريت تدخلوا جوا وتحضرو غدا خفيف من اديكو الحلوين 

ام احمد... عنيا يا حبيبي 

احمد... يسلملي عيونك يارب 

،،،،، 

هنا خرجه من شقتها لقيت فارس طالع على السلم 

فارس... هنا ازيك كويس والله اني شوفتك ده انا حظي حلو قوي على كده 

هنا... ازيك يا استاذ فارس،، شكرا لذوق حضرتك 

فارس.... هنا انتي ليه رسمي قوي كده ممكن بلاش استاذ وحضرتك دي.. ممكن؟ 

هنا.... هحاول ان شاء الله 

احمد استغرب فارس مطلعش كل ده ليه وفتح الباب يشوفو فين 

احمد اتفاجيئ... اي ده انتو واقفين كده ليه 

فارس... مفيش يا سيدي انا طالع بالصدفه قابلت هنا وقفت اسلم عليها 

احمد..بضيق.. . والله امممممم وانتي ياهنا مدخلتش على طول ليه 

هنا برعشه... والله كنت لسه داخله بس اتفاجئت  بفارس  

فارس قلبه رقص من الفرحه لما سمع اسمه من هنا 

اما احمد.. كان نفسه يولع فيها.. ازاي تقولو فارس

احمد... انتي كمان شيلتي الالقاب شكلكو اخدتو على بعض جامد 

هنا في قمة الاحراج لأنها مأخدتش بالها انها فعلا شالت الالقاب.. لا مش كده خالص انت بس 

احمد يقاطع هنا بعصبيه... هنا اظن الوقفه علي السلم دي متنفعش وانت يافارس ياريت متتعرضش لهنا ف اي مكان عشان متحطهاش في موقف مش لطيف،،، اتفضلي يا هنا ادخلي معاهم جوه 

هنا دخلت جري متغاظه على فرحانه على خايفه مشاعر كتير ملخبطه 

اما فارس استغرب رد فعل احمد وقال 

فارس.... مالك يابني مكبر الموضوع كده ليه انت شوفتنا في شقه مفروشه ده يادوب على سلم بيتكو. 

احمد بزعيق..... فاااارس انا بحذرك تتكلم كده تاني وبقولك ومش هعيد كلامي تاني.. هنا دي خط أحمر.. خط أحمر يافارس... ماشي 

مؤمن خرج علي زعيق احمد 

مؤمن... في ايه يا احمد بتزعق كده ليه وموقف فارس على الباب كمان... ادخل يافارس وفهمني في  ايه 

فارس دخل وحكي لمؤمن اللي حصل 

مؤمن.... فارس هنا دي بجد اكتر من اختنا واحنا بنخاف عليها من الهوا وبعدين متنكرش انه غلط وقفتكوا على السلم اي حد طالع او نازل هيقول اي واحنا حي شعبي الكلام بيتنشر ف ثانيه 

وانت ياعم احمد هدى نفسك كده وروق ده انت حتى عريس جديد،، اسيبكو ا انا بقه تتصافوا واشوف هنتغدي ايه في الليله دي 

احمد وفارس قعدوا واتكلموا مع بعض واتصافوا وفارس اعتذر لأحمد.. والحمدلله الموضوع خلص واتغدوا وكل واحد روح على بيته واليوم عدي

********

بقلمي.. شيموووو الخطيب 

، ********

تاني يوم هنا صحيت من النوم ونزلت على جامعتها

قابلت احمد خارج مستعجل رايح على شغله

هنا.. صباح الخير يا احمد

احمد... بزعل.. صباح النور ياهنا

هنا.. انت لسه زعلان من موقف امبارح

احمد... انتي شايفه اني مزعلش

هنا... الموقف جه صدفه والله ومش مقصود خالص

احمد... أنا عارف انه مش مقصود بس الناس متعرفش ياهنا

هنا... وانت خايف عليا ولا خايف من كلام الناس

احمد.. الاتنين طبعا محبش حد يقول عليكي كلمه مش كويسه

هنا... خلاص يا احمد صدقني مش هتتكرر تاني وبدلع.. ممكن متزعلش 

احمد... ضحك علي شكلها ودلعها وقال ممكن ياهنا،، يلا عشان منتأخرش هركبك وامشي 

هنا... لا شكلك مستعجل امشي انت يا احمد عشان متتأخرش 

احمد... لا متقلقيش يلا بس عشان اطمن عليكي 

مؤمن... سيبها يا احمد وامشي انت انا كده كده رايح الجامعه هاخدها ف سكتي 

احمد.. تمام يلا انا بقه سلام 

هنا ومؤمن... سلام يا احمد 

مؤمن وهنا ركبوا ومشيوا وفي الطريق

مؤمن....هنا وقفتك مع فارس كانت غلط ياريت متتكرش تاني. 

هنا... خلاص يا مؤمن مش هتتكرر تاني انت عارف انها مش مقصوده 

مؤمن... عارف انا بنبهك بس 

هنا... مؤمن تفتكر احمد اتضايق امبارح قوي كده ليه لما شاف فارس معايا 

مؤمن... فهم قصد هنا بس حب يفوقها.. هنا احمد خاطب وبيحب خطيبته وغيرته عليكي كأخت مش اكتر فوقي بقه وركزي في كلامي 

هنا بصت لمؤمن بدموع وقلتلو... ليه كده يا مؤمن طب سيبني يا اخي اعيش الخيال حتى حرام عليك 

مؤمن.. مينفعش تعيشي الخيال يا هنا لازم تواجهي الواقع انا عارف اني رخم وقسيت عليكي لكن والله ده ف مصلحتك صدقيني 

هنا... طب اتفضل انزل وصلنا 

نزلوا وكانت ولاء صاحبة هنا مستنياها 

ولاء... هنون وحشتيني اخبارك اي 

مؤمن سابهم مع بعض ومشي على كليته 

هنا... الحمدلله يا ولاء انتي عامله اي.. 

ولاء... مالك يا هنا شكلك تعبان ليه كده 

هنا... لا ولا حاجه انا زي الفل 

ولاء... انتي هتكدبي عليا مالجواب باين من عنوانه 

هنا... بدموع مفيش يا ولاء انا كويسه  ومشيت لكن ولاء جريت وراها 

ولاء.. هنا حبيبتي طمنيني عليكي حد دايقك في مشكله بينك وبين مامتك طمنيني ياهنا متسبينيش كده 

هنا.. إترمت في حضن ولاء وعيطت جامد وقالت 

احمد خطب يا ولاء. *******

________

الحلقه ٦

من جراح القلب 

بعد ماولاء فضلت تسأل هنا مالها وزعلانه ليه

ولاء.... هنا حبيبة طمنيني عليكي حد دا يقك. طيب في مشكله بينك وبين مامتك، هنا فهميني متسبينيش كده

هنا.... اترمت في حضن ولاء وعيطت جامد وقالت

،،،،، احمد خطب يا ولاء،،،،

ولاء بصدمه... احمد!!! انتي تقصدي احمد جاركو 

هنا.... هزت راسها بنعم 

ولاء... تقصدي احمد المرشدي ياهنا 

هنا بنرفزه... اه يا ولاء هيكون احمد مين يعني 

ولاء... أنا مش متخيله خطوبه مره واحده طب ازاي وفجأه كده 

هنا.... تخيلي بيحب واحده من وهو في الجامعه وانا معرفش وكمان خطبها وانا كنت اخر من يعلم وقال ايه نسي يقولي أصلها واخده كل عقله 

ولاء.... بصدمه من اللي بتسمعه 

هنا حبيبتي خلاص متزعليش نفسك وكل شيئ نصيب ولازم تنسيه يا هنا وتكملي حياتك 

هنا... انتو بتطلبو ا مني المستحيل احمد لايمكن هعرف انساه (ودموعها نزلت زي المطره) 

ولاء... انتي بتقولي انه بيحبها من زمان يعني انتي من الاول مش ف دماغه ياهنا لكن اللي محيرني انتي ازاي محستيش بحبه ليها 

هنا... اهو اللي حصل بقه،، انا مخنوقه قوي ياولاء حاسه ان نفسي اموت واخلص من العذاب ده 

ولاء.. الف بعد الشر عليكي يا حبيبتي اوعي تقولي كده هنا انتي بنت متدينه وعارفه الصح من الغلط وبصراحه اللي انتي بتعمليه ده غلط، احمد مبقاش من حقك ولازم تفكري في مصلحتك وتفوقي  وبعدين احمد مش نهاية العالم ياهنا 

هنا... بس مش شايفه غيره يا ولاء اعمل ايه ف نفسي بقه 

ولاء.. ربنا قادر ينزع حب احمد من قلبك زي مزرعه فيه ادعي ربنا وهو هيجبرك،، صدقيني يا هنا 

هنا... ونعم بالله ربنا يكتبلي الخير أينما كان يارب 

ولاء... يارب ياحبيبتي 

دخلت سلمي عليهم 

سلمي... حبايبي،، وحشتوني موت يابنات 

وبصدمه... مالك ياهنا معيطه ليه كده. 

هنا ابتدت تتخنق من السؤال ده.. كل شويه مالك، مالك 

ولاء ردت.... لا مفيش ياستي واحد دايقها وهي جايه وحظه انها مردتش عليه فهي متغاظه انها مردتش وانتي عارفه هنا مبتسكتش 

سلمي... يعني لازم تتخانقي مع دبان وشك على الصبح لا وكمان زعلانه انك مردتيش انتي بجد ملكيش حل ياهنا والله 

هنا ضحكت ضحكه مصطنعه عشان تعدي الموقف ومشيو على المحاضره 

سلمي بتتكلم في المحاضره عن أن شركة عمها منزله اعلان وبتطلب فيه محاسبين.. هنا بسرعه افتكرت كلام أحمد لمؤمن وهو بيقولو نفسه يتعين في شركه كبيره وليها اسمها. وسألت سلمي

هنا.. شركة عمك دي كبيره ياسلمي 

سلمي... دي أكبر شركة مقاولات في البلد يابنتي 

هنا بتحمس.... بجد!! طيب تمام انا اعرف محاسب زي الفل ممتاز جدا وخريج تجاره بتقدير امتياز 

سلمي.. تمام ده ينفع جدا قوليله يروح الشركه ويقدم اكيد هيبقى ليه مكان 

هنا... طب بقولك اي يا سلمى متيجي نروح الشركة نتأكد من الإعلان وان لسه فيه وظايف وبعدين ابقى اقوله عشان بس ابقى متأكده من كلامي 

سلمي... دلوقتي ياهنا؟ وبعدين تروحي انتي ليه هو يهمك قوي كده.. وغمزت بعينها 

هنا... يابنتي ده جاري وزي اخويا وبعدين ريحي نفسك اه يهمني 

سلمي.. خلاص تمام بس بشرط

هنا.... امممممم خير 

سلمي.... تعزميني على غدا 

هنا... حاضر يا طفسه،،،، وبصت لولاء

ها ياولاء جايه معانا ولا ايه 

ولاء... لا ياستي المحاضره هتخلص وانا هروح على طول مش ناقصه صداع ومواصلات وقرف 

هنا... براحتك، انتي اساسا فقر وضحكوا التلاته 

وفعلا المحاضره خلصت اللي هما مسمعوش منها حاجه خالص وهنا كانت متحمسه للمشوار ده جدا،، وراحت هنا وسلمي على الشركه ودخلوا على السكرتيره على طول 

هنا... هي دي شركة عمك بجد يابت ياسلمي ولا هتفضحينا 

سلمي ضحكت... والله عمي ودلوقتي هتشوفي 

هنا... ماشاءالله دي كبيره فعلا. 

سلني بفخر... طبعا يابنتي 

هنا... اتنيلي والنبي ويلا خلينا نخلص 😂😂😂

سلمي دخلت للسكرتيره 

سلمي ... ازيك يازينه، عمي فاضي ولا عنده ناس كالعاده 

زينه... لا يا انسه سلمي انتي جيتي في وقتك ده كان لسه هيمشي عشان يقابل شخصيه مهمه،، هبلغه بوجودك اتفضلوا ارتاحوا 

سمح مصطفى بيه ليهم بالدخول وفعلا دخلوا 

سلمي... ازيك ياعمي وحشتني جدا والله 

مصطفى.. اهلا حبيبتي خير حاسس ان الزياره دي وراها حاجه وبص لهنا وقال اهلا بالقمر اتفضلي اقعدي ياحبيبتي

هنا... شكرا ياعمي 

سلمي.. دايما ظالمني ياعمي والله الموضوع المره دي يخص هنا مش انا خالص 

مصطفى... خير ياهنا 

هنا... أنا بس ياعمي كنت عايزه اسأل عن الإعلان اللي شركة حضرتك منزلاه لتعين محاسبين هو لسه قائم ولا خلاص 

مصطفى... لا ياحبيبتي لسه قائم انتي عايزه تتعيني ولا ايه 

هنا.. لا مش انا ياعمي انا كلية آداب لكن جاري خريج تجاره بتقدير امتياز وهيعجب حضرتك جدا والله 

مصطفى... طيب تمام قوي عموما الإعلان مش طالب محاسبين فقط لا مطلوب كمان مدير للحسابات وده اختياره هيكون عن طريقي انا وهو طبعا هيكون عليه مسؤلية اختيار باقي المحاسبين الجدد وده طبعا هيعتمد على ذكاءه تركيزه ف شغله وقراراته وطبعا عندي شوية شروط في الشخص ده 

هنا بخوف... شروط ايه ياعمي 

مصطفى... بصي ياستي اول حاجه انه يكون ذكي ومخلص ومجتهد جدا في شغله 

هنا... وثانيا

مصطفى... الشكل ياهنا انتي عارفه اننا شركه كبيره وبتعتمد برده على المظهر العام لانه بيقبي واجهه لشركتنا ولازم تبقى واجهه مشرفه لو الشروط دي متوفره في الشخص اللي عندك يبقى يجي ويقابلني 

هنا بفرحه... إلا متوفره ياعمي،، دي متوفره جدا  احمد هيعجب حضرتك شكلا ومضمونا وان شاء الله يبقى عند حسن ظن حضرتك 

مصطفى.. شكلك بتعزيه قوي ياهنا هههههه 

هنا بكسوف.. اه طبعا ده يعتبر اخ ليا (ونزلت راسها للارض) 

مصطفى.. يبقى تمام كده يجي يقابلني بكره وربنا يقدم اللي فيه الخير 

هنا... إن شاء الله ياعمي وشكرا جدا لحضرتك واسفين على تأخير حضرتك واستأذنوا ومشيو 

هنا حاسه انها طايره من الفرحه لان حلم احمد هيتحقق وكان عندها ثقه انه ان شاء الله هيتقبل وهيبقي مدير الحسابات مش مجرد محاسب

هنا... يااااه يابت ياسلمي لو عمك عين احمد،، بجد هيبقى احساس تاني خالص،، تعرفي انا نفسي في ايه، نفسي ف صاروخ ياخدني على بيت حالا عشان أبلغ احمد باللي حصل

سلمي... انتي متحمسه ومهتمه ليه كده ياهنا انا مستغرباكي بجد

هنا... مستغربه ليه ياسلمي الموضوع كله ان احمد متربي معايا وبعتبره زي اخويا وهفرح جدا لو ساعدته في تحقيق حلمه

سلمي بعدم تصديق... ممكن عموما ربنا يعينك وتساعديه 

هنا.. هيعيني يا بارده وان شاء الله هيبقى احلى مدير حسابات فيكي يامصر

سلمي بصت لهنا وضحكت ده انتي واثقه بقه

هنا... طبعا يابنتي انتي فاكراه قليل في البلد دي ولا اي

*************بقلمي شيمو الخطيب

عند احمد في شغله،، 

ندى بتتصل على أحمد وطبعا مبيردش عليها لانه مدايق من موقفها منه امبارح وانها قفلت في وشه وقلتله لما اصحى هكلمك وقرر انه يعاقبها بإنه ميردش عليها ويتجاهلها تماما. 

احمد بيبص لموبايله.. برده مش هرد يا ندى،، بقه انا تقوليلي اقفل عشان مفوقش ماشي ياندي براحتك انتي الجانيه على نفسك

بعد عشر دقايق باب المكتب خبط

احمد... اتفضل 

دخلت ندى زي القطر وخبطت بايديها على المكتب وقالت 

ندى... ممكن افهم انت مبتردش عليا من امبارح ليه 

احمد بصدمه من دخلتها... واتكلم ببرود.. معلش اصلي مسمعتش التليفون 

ندى.... بلاش برودك ده يا احمد انا من امبارح بتصل وانت ولا انت هنا ممكن افهم ليه كل ده 

احمد.. اولا صوتك ميعلاش عليا مره تانيه ثانيا.. (واتكلم بتريقه) انا كنت نايم ومرضتش ارد على التليفون وافوق ومعرفش انام تاني

ندى... احمد من فضلك متتكلمش معايا بالطريقه دي انت عارف طبعي كويس ايه الجديد في كده 

احمد بزعيق.. الجديد اننا اتخطبنا يا انسه وبعدين انا مكنتش بتصل بيكي الفجر انا اتصلت بيكي الضهر يعني المفروض تكوني صاحيه 

ندى... ماشي يا احمد وصادفت اني كنت نايمه ده مبرر يخليك متردش عليا لحد دلوقتي 

احمد.. لما تقفلي السكه في وشي وتقولي اقفل عشان مش عايزه افوق يبقى كان لازم افوقك يا ندى وعموما انا قررت وقت متكوني صاحيه وفاضيه ابقى اتصلي انتي، لكن انا،، ، لاء

ندى... يعني ايه يا احمد تقصد انك مش هتكلمني تاني خلاص

وبعدين انت محسسني اني عملت جريمه،، اعتبرني بدلع عليك يا احمد 

احمد.... ندى انا بصراحه مش فاضي لجدالك ده نهائي وعندي شغل كتير 

ندى بدموع... احمد انا بحبك ومش عايزه امشي وانت زعلان مني بالله عليك خلاص يا احمد انا مقدرش على كده بجد 

احمد بدأ يهدي اول ماشاف دموعها خلاص ياندي ممكن تستنيني بس شويه هخلص واجي اوصلك 

ندى بفرحه... أنا هستناك العمر كله يا احمد المهم متكونش زعلان 

احمد... خلاص ياندي مش زعلان والله انتي عارفه مبقدرش ازعل منك لكن ياريت الموضوع ده ميتكررش تاني 

ندى قربت من أحمد ومسكت ايديه وبصت في عينيه صدقني يا احمد مش هيتكرر ابدا. وباست كف ايده وده خلي أحمد يدوب في ثانيه

احمد... والله ماعارف اقولك ايه دوبتيتي في لحظه وضحكوا الاتنين 

،،،،،،،،،،،،،،،،،،،،،،،، 

عند مؤمن في الكليه 

مؤمن قاعد في المحاضره وبيفكر في هنا وحبها لأحمد وقد ايه هي صعبانه عليه جدا  وبيفكر في ندى اللي من وجهة نظره مش لايقه على أحمد خالص ولاتنفع تبقى مراته لكن ده نصيب ومحدش يقدر يتحكم فيه.. فاق مؤمن على صوت مي 

مي.......... مؤمن... مؤمن ايه يابني رحت فين كده 

مؤمن... هااا.... لا مفيش انا معاكو 

مي.. معانا فين بس انت مش معانا خالص 

مؤمن...  هو حصل حاجه ولا ايه 

مي... لا ابدا الدكتور خلص المحاضره وانت في دنيا تانيه 

مؤمن... اسف ماخدتش بالي.. يلا بينا نمشي 

مي خرجت مع مؤمن اللي حاسه ان فيه حاجه شغلاه وبصتله وقالت 

مي.... مؤمن، انت في حاجه مديقاك 

مؤمن... لا متقلقيش انا بس مرهق ومنمتش من امبارح 

مي... طيب هتدايق لو قولتلك ايه اللي خلاك منمتش امبارح 

مؤمن.. لا مش هدايقك ولا حاجه بس مفيش حاجه معينه اقولهالك ممكن يكون شويه أرق وهيروحوا لحالهم ههههه

مي... طيب ممكن نقعد في الكافتيريا شويه نشرب حاجه مع بعض

مؤمن... لا معلش اعذريني يامي انا مضطر امشي لاني بجد مرهق جدا 

مي بزعل... متخافش مش هخليك تعزمني 

مؤمن.. لا طبعا الموضوع مش كده خالص كل الحكايه اني محتاج ارتاح شويه 

مي بزعل... ماشي يا مؤمن براحتك واسفه لو كنت دايقتك، عن اذنك 

مؤمن... استنى بس رايحه فين،، انتي هتزعلي زي العيال الصغيره ولا ايه، خلاص ياستي انا مقدرش على زعلك وهاجي معاكي وهعزمك كمان مش خساره فيكي والله ههههه

مي ابتسمت لمؤمن وبصت في الأرض 

مؤمن... بتقفشي بسرعه انتي يامي يلا ياستي خلينا نشوف هتدفعيني كام النهارده 

ندى ضحكت ومشيوا مع بعض 

قعدوا مع بعض كتير والوقت سرقهم ومؤمن محسش بالوقت نهائي وكان مستمتع جدا بالقعده مع مي،، وطبعا مي كانت بتعشق كل تفاصيل مؤمن ولكن في صمت، وقضوا احلى وقت مع بعض

مؤمن.... اه يابنت اللذينا انا اتأخرت قوي ومحستش بالوقت خالص 

مي.... تصدق وانا كمان محستش بالوقت نوهائي 

مؤمن... نوهائي جايبها منين دي وبعدين الرقه دي كلها متقولش نوهائي دي خالص ههههه 

ندى ضحكت وقالت اصل صحابي دايما يقولوها من باب الروشنه يعني 

مؤمن... روشنه،، مااشي،، المهم دلوقتي في الست ام احمد هتفتحلي محضر بسبب التأخير ده.. منك لل.... 

مي.... سكت ليه متكمل الدعوه 

مؤمن.. اقولك بصراحه قلبي مش مطاوعني  ادعي عليكي (وبص ف عينيها) 

مي بصت لمؤمن بعشق كبييير  وفاقت من عشقها ده وقالت 

احم.. وهي الست ام احمد هتفتحلك محضر ليه يا سي مؤمن 

مؤمن... حلوه سي مؤمن خليكي على كده على طول هههه،، الست ام احمد ياستي اكيد مستنياني على الغدا وانا طبعا اتأخرت والنتيجه انها اكيد مأكلتش لحد دلوقتي واول مرجع البيت هتاكلي ان شاء الله ههههههههههههه 

مي ضحكت وقالت 

مي... خلاص يلا بينا نمشي قبل ما الست ام احمد تغضب علينا 

ومشيوا الاتنين 

******

نرجع لهنا وسلمي في الشركه 

هنا وسلمي ماشين في ممر الشركه وهنا طبعا نفسها ترجع البيت بسرعه لكن اتفاجئت بحد مكنتش تتوقع تشوفه في الشركه ابدا.......... 

                   الحلقة السابعة من هنا

لقراءة باقي الفصول من هنا