رواية جراح القلب الجزء الثانى2 الفصل الاول1والثاني2 بقلم شيمو الخطيب

💔جراح القلب الجزء الثانى💔

بقلم شيمو الخطيب

احمد وهنا سمعوا خبط جامد على الباب واتفزعوا منه جدا 

هنا بخوف : احمد، هو فيه ايه، انا خايفه قوي 

احمد؛ :متقلقيش، يا هنا خير ان شاء الله 

هنا:(مسكت ايده) انت رايح فين متسبنيش، انا بصراحه قلقانه يكون حد عايز يتهجم علينا 

احمد: سيبي ايدي ياهنا، هروح اشوف مين اللي بيخبط بالشكل ده، وبعدين حد مين اللي هيتهجم علينا، اهدي كده ومتخافيش ياحبيبتي، اهم حاجه اوعي تخرجي من الاوضه مهما حصل، فاهمه، مهما حصل،، 

وسابها ومشي 

احمد فتح الباب ولقى شاب بينهج وبيبص على الشقه اللي جنبهم 

احمد: خير، مالك فيه ايه 

وليد؛ :انا اسف جدا بس صاحبي تعبان قوي ومش عارف اشيله انزله مستشفي وبرن على البواب، لكن للأسف نايم، ممكن حضرتك تساعدني 

احمد: ايوه طبعا، مفيش مشكله ثواني بس هجيب المفتاح 

هنا لبست اسدالها وخرجت بسرعه:لا يا احمد استنى، انت متأكد من كلامه

احمد بغيظ، :انتي مين قالك تخرجي، اتفضلي ادخلي وعدي الليله دي يا هنا، 

هنا : احمد انا خايفه عليك وحاسه ان قلبي مقبوض بجد، عشان خاطري بلاش تروح 

وليد :احم، انا اسف يامدام لتدخُلي، بس فعلا صاحبي تعبان جدا وتقدري حضرتك تشوفي بنفسك 

احمد بغيظ اكبر :انت اتجننت ولا ايه، تيجي فين وتشوف ايه، (وبص لهنا)، اتفضلي ادخلي اوضتك وانا ثواني وراجع، (قال تيجي تشوفي قال) وبص لوليد، اتفضل انت كمان وريني صاحبك، ورزع الباب وراه 

هنا :يارب احفظه وعديها على خير يارب، أعوذ بالله من الشيطان الرجيم، سلم يارب 

بقلم شيمو الخطيب

*** ************

نرجع لمؤمن ومي 

وصلوا البيت ومي طلعت شقتهم ومؤمن دخل 

ام احمد كانت بتقرأ قرآن ومستنيه الفجر، 

مؤمن :السلام عليكم،ازيك يا امي

ام احمد :الحمدلله ياحبيبي 

مؤمن :(قعد على ركبته قدام كرسيها) ها ياست الكل فرحانه ياحبيبتي 

ام احمد :حبيبي يابني، طبعا فرحانه طول منا شيفاكو فرحانين، ربنا يسعد قلوبكوا يارب، بس قولي، اطمنت على اخوك ووصلته لحد الباب 

مؤمن، :وانا اوصلوا لحد الباب ليه هو صغير، كفايه وصلته للعمارة وهو كمل هههههه٠

ام احمد :طب طمني هو كويس، وهنا كويسه يامؤمن، طمني ياحبيبي 

مؤمن :والله امركوا غريب ايها النساء تموتوا في القلق والحزن، ده لسه سايبك مبقالوش ساعه، لحقتي تقلقي عليهم، ههههه

ام احمد :عمرك مهتحس بغلاوتكوا عندي غير لما تخلف ويبقى عندك طفل، هتعرف قد ايه انا بخاف وبقلق عليكوا، مؤمن،، انت وأحمد زرعتي اللي انا وابوك زرعناها، لكن ابوك بقه سابني ومشي الله يرحمه وملحقش يحصد، زرع ومحصدش، وانا دلوقتي عايزه أبلغه ان الزرعه طلعت صالحه يا مؤمن، وأن ربنا عوضني بيك انت واخوك، ربنا يباركلي فيكو يا ولادي، ويحفظكوا من كل شر

مؤمن باس ايديها وباس جبينها، :ربنا يباركلنا في عمرك ياست الكل وتعيشي وتشوفي احفادك يارب 

ام احمد:ههههههه طب اجوزك بس وربنا يسهل بالباقي يارب، 

مؤمن :ان شاءالله هتفرحي بينا، وربنا يقدرنا ونسعدك ياست الحبايب، 

وسابها ودخل اخد دش واتوضي ونزل عشان يصلي الفجر في الجامع

بقلم شيمو الخطيب 

****************

عند ناديه 

ناديه قاعده بتعيط في اوضة هنا، وبتدعي ان ربنا يسعدها، ومستنيه النهار يطلع بفارغ الصبر عشان تروح وتطمن على هنا

سمعت الفجر بيأذن قامت استغفرت ربنا ودخلت اتوضت وطلعت عشان تصلي

صلت وقعدت تقرأ شوية قرآن يصبرها على فراق بنتها الوحيده، وفجأه الباب خبط 

ناديه (فتحت الباب) :مؤمن تعالي ياحبيبي اتفضل 

مؤمن :قلب مؤمن يادودي، انا راجع من الجامع لقيت نور الريسيبشن مفتوح قلت اكيد انتي لسه صاحيه وحزينه وبتعيطي ومقضياها دراما، واحساسي الصراحه مخيبش، 

ناديه :بعياط،، فراقها واجعني قوي يا مؤمن، حاسه اني بقيت لوحدي، 

مؤمن اخدها في حضنه : حبيبتي يا ناديه، هنا مش بعيده عنك، دي كلها ربع ساعه، وبعدين مين قال انك وحيده، امال احنا رحنا فين، انتي كده بقه بتزعليني، هو انا مش ابنك، اه انا مش محترم، وشايل الالقاب، لكن ممكن احاول ابقى محترم لو ده هيخليكي مبسوطه، ها اعمل كده ولا قلة الأدب جايه على هواكي يادودي، ههههه

ناديه :هههههه ربنا يسعدك يابني يارب، انت اغلى من ابني، ده انا اللي مربياك ياواد، وكنت بغيرلك وانت صغير بإيديا دول هههههه

مي نازله تطمن على ناديه بعد مصلت، وسمعت كلامهم 

مي :اووووووه ايه ده يادودي ، دي كده بقت فضايح علني، اخص عليك يا مؤمن، كنت بتعملها وانت صغير ههههههه، 

مؤمن باستغراب منهم الاتنين :لا والله، قال يعني البت نزلت من بطن مامتها، عارفه مكان الحمام، مانتي كنتي بتعمليها انتي كمان، حتى اسألي خالتي عايده، وبعدين، ايه جو القرف اللي دخلتونا فيه ده، لكن انا اللي غلطان ياناديه اني بهون عليكي، انتي تستاهلي قلة الاحترام، 

ناديه،، :حبيبي يامؤمن، ده انا بهزر معاك، وبعدين ده دليل اني بحبك، وبموت فيك كمان، وانك متربي على أيدي، 

مي :خالتي سيبك منه ومن قرفه ده، وخلينا فيكي انتي، عامله ايه ياحبيبتي، طمنيني عليكي 

مؤمن ضربها على راسها، :قرفه، تصدقي انتي اللي مقرفه، يابنتي انا ان شاء الله هبقي اكبر مهندس فيكي يا مصر، والبنات هتجري ورايا بالكوووم،(هو عاوز يغيظها وخلاص) 

مي :صكت على سنانها بغيظ لأنها بتغير عليه من نفسها، :مؤمن متستفزنيش وابعد عني دلوقتي انا مخنوقه 

مؤمن :بذمتك يا ناديه مش انا اضحك عليا في البت دي 

ناديه :فشر، دي مي ست البنات كلها، وعمرك متلاقي زيها 

مؤمن :صحيح انا بشهّد مين على مين، 

انا بس عايز اسألك، هي دي مي اللي قابلناها اول مره، دي كانت نسمه وصوتها مبيطلعش، لكن دلوقتي تحسي انها قلبت على علي علوكه هههههههه

ناديه :هههههههههه ومين علي علوكه ده يا واد 

مؤمن :ده حد كده سوابق واجرام، وصاحب الليمبي كمان، ههههه 

مي بزعيق :انتي بتضحكي ياخالتي،(وبصت لمؤمن) دلوقتي مش عجباك، فعلا خدتني لحم و رمتني عضم 

مؤمن رفع ايديه :وربنا انا لسه ماخدتك، انتي من الاول وانتي عضم، ههههههه

ناديه: هههههههه، مؤمن عيب كده، دي مي الرقه كلها ههههههه

مي :تصدقي ياخالتي، انا بقيت حاسه انك بتأكدي على كلامه، 

ناديه بتمثيل :انا!! ابدا، ابدا، ده انا بتكلم بجد 

مؤمن :يادودي ياجااااااامد، هههههههه 

مي قربت تعيط من تريقة مؤمن عليها، اوك ياخالتي، انا كنت نازله اطمن عليكي وطالعه 

ناديه :مي حبيبتي احنا بنهزر وانتي عارفه مؤمن، طب تعرفي لولا وجودكو معايا، كنت قضتها عياط، انتو بجد هونتو عليا،(وحضنت مي) اوعي تزعلي ياقلب خالتك 

مؤمن :مي انتي عارفه اني بهزر، بس ده ميمنعش برده انك قلبتي على علي علوكه هههههه

ناديه خبطته، ومي بصتله بشرز وضيق 

ناديه، :مخلاص بقه يامؤمن، اكيد هيا هترجع مي بتاعت زمان هههههه

مي بصتلهم ودبت برجلها في الأرض زي الاطفال ولسه هتطلع من الباب، مؤمن مسكها 

مؤمن، :(قرب منها قوي وهمس في ودنها) هتمشي وتسبيني واقف كده، 

مي:بدموع،،، عايزه اطلع ارتاح شويه، 

مؤمن: طب ليه الدموع دي، طب تعرفي ان انا قصدت اني ازعلك عشان اصالحك بطريقتي 

مي شهقت، :لا انا مش زعلانه، وابعد عني يا مؤمن عايزه اطلع، 

ناديه في اللحظه دي سابتهم ودخلت المطبخ 

مؤمن، :بهمس، ابعد ايه بس، انا لما صدقت قربت، وقرب منها وحاوطها بايديه من وسطها وقربها ليه قوي

مي : عشان خاطري يا مؤمن سيبني، خالتي هتقول ايه علينا 

مؤمن :انتي مراتي، وانا مبعملش حاجه غلط، كل الحكايه انك زعلانه وانا بصالحك، فيها حاجه دي، 

مي :طب خلاص، انا مش زعلانه، وعمري مزعل منك، سيبني بقه يا مؤمن، بجد قلبي هيوقف، 

مؤمن :طب هاتي بوسه وانا اسيبك 

مي؛:اقسم بالله انت مجنون 

مؤمن قرب منها، وهي من قربه ليها تاهت ومبقتش قادره تسيطر على نفسها

مؤمن: بحبك يامي، ومجنون بيكي، وباسها لأول مره باشتياق كبيييير، 

مي فاقت، وبعدت عن مؤمن، ودخلت جري المطبخ لناديه 

ناديه :ايه يامي مالك وشك اصفر كده ليه 

مي:قلبها بيدق بسرعه، وذهنها شارد، هاه لا يا خالتي مفيش 

ناديه فهمت :امممممم، اكيد الواد مؤمن تعدي حدوده، بس خلي بالك، الواد ده مش سهل، هههههه

مي:ايييييييه، خالتي!!! ، واتكسفت ونزلت وشها في الأرض 

ناديه رفعت وشها :مي ياحبيبتي، انا عارفه انك بتحبي مؤمن جدا، وهو كمان بيحبك، وعارفه كمان انك خلاص مراته حلاله، يعني محدش يقدر يكسر كلمته عليكي، ولا يعترض على حاجه وأن ممكن يحصل بعض التنازلات وهتبقى حلال لأنك مراته قدام كل الناس، بس ياحبيبتي العادات والتقاليد، بتجبرنا نحترمها، وبتجبرنا كمان اننا نحط حدود ومنتخطهاش، عشان الناس وكلامهم اللي مش بيخلص، حبيبتي، انتي زي هنا والكلام اللي بقهولك هو هو اللي قولته لهنا، عايزه مهما كان حبك لمؤمن، تحطي حدود بينكو، لحد متبقي في بيته، وملكه، ساعتها اي حاجه متاحه، وربنا يسعدكم ياقلب خالتك، 

مي حضنت ناديه :انتي احلى ام وخاله في الدنيا، ربنا ميحرمني منك ابدا، 

مؤمن واقف بره ومش مصدق انه باس حبيبته ومراته، حاسس مشاعر مختلفه، لكن كل اللي مسيطر عليه انه فرحااااان قوي ،

مؤمن :انتو هتباتو جوه، مش عايز شاي على فكره 

(مي وناديه خرجوا من المطبخ) 

ناديه :ومين قالك اني بعملك شاي، انا بنضف شوية حاجات في المطبخ ، عشان اروح بكره لهنا رايقه كده، ويلا بقه طرقوني عشان اعرف انام 

مؤمن بص لمي:، احلى احساس انك تطردي شر طرده 

مي:شكلك مجربها كتير ياحبيبي، ههههههه

مؤمن :خِفه يابت، ههههه 

وضحكوا كلهم، وكل واحد فيهم صمم ان ناديه تبات عندهم، لكن هي رفضت وبشده لأنها نفسها تنام مكان هنا وعلى سريرها، وهما قدروا ده ومشيوا كل واحد على شقته 

بقلم شيمو الخطيب 

***************

عند هنا 

هنا رايحه جايه في الشقه وقلقانه جدا على أحمد خصوصا انه نزل ومخدش الموبايل معاه، وخايفه تفتح باب الشقه 

لكن قررت تفتحه وتشوف احمد فين. 

فتحت الباب وبصت من وراه بحذر، لكن سمعت صوت الاسانسير بيتحرك، 

قفلت الباب بسرعه ودخلت وقلبها هيطلع من مكانه من الخوف 

هنا (بتكلم نفسها) : هتعملي ايه يا هنا، هتسيبي احمد كده، من غير متطمني عليه، طب اكلم مؤمن، لا حرام زمانه نايم وهقلقه وخلاص، طب اعمل ايه ياربي، ربنا معاك يا احمد ويرجعك ليا بالسلامه 

في اللحظه دي احمد دخل من الباب 

احمد بضيق:السلام عليكم 

هنا جريت عليه :وعليكم السلام يا احمد، طمني عليك يا حبيبي، عملت ايه، وليه اتاخرت كل ده 

احمد بصلها بغيظ : كنت بنزل جارنا المستشفى، واستنينا لما حد جه خده بعربيه لان مش معاهم عربيه، وبعدين متأخرتش للدرجه دي يعني 

هنا :حمدلله على السلامه يا حبيبي، المهم انك بخير، انا كنت هموت من القلق عليك

احمد بصلها ومردش........ 

هنا :فهمت ان احمد مدايق منها، :احمد، انا عارفه انك زعلان مني، وعارفه كمان اني غلطانه، لكن حقك عليا، قلقي وحبي ليك هو اللي خلاني اطلع واقولك متنزلش معاه، احمد، انا بخاف عليك من الهوا، بخاف تبعد عني، (وعيطت) ، يعني هو ذنبي اني بحبك، ذنبي اني بخاف عليك، 

احمد :(قام بسرعه من مكانه) ومسك وشها بين ايديه،، وحط راسها علي صدره

حبيبتي، انا عارف ومقدر احساسك جدا، بس لازم ياهنا تسمعي كلامي، مهما كان احساسك، وزي مانتي بتحبيني، انا كمان بحبك، وبغير عليكي من نفسي، ومش هسمحلك تتكلمي مع حد غريب، هنا، انا فعلا ادايقت منك جدا لما كسرتي كلامي وطلعتي من الاوضه واتكلمتي معاه،انا مش عايز حد يشوفك ولا يتكلم معاكي غيري، انا بغير من نظرة الناس ليكي يا هنا، مش عايز حد يبصلك، (وبص في عنيها وقال)لكن عشان خاطر اجمل عيون ولاني فعلا بتوجع لما بشوفها بتدمع، هعديها لأنها اول مره واتمنى متتكررش تاني، ياحبيبتي 

هنا، :عمرها مهتتكرر تاني يا احمد، وانا اسفه لو دايقتك، حبي ليك وخوفي عليك هو اللي خلاني اعمل كده، اسفه بجد ياحبيبي

احمد ضمها لحضنه وقال،:متتاسفيش يا قمري، ويلا بقه ندخل الاوضه لاني هموت من التعب،

ودخلوا اوضتهم يرتاحو من تعب اليوم، وبسرعه هنا نامت في حضن احمد، واحمد بصلها بعشق وضمها ليه بقوه وابتسم وراح في النوم 

بقلم شيمو الخطيب 

******************

تاني يوم الصبح في الشركه 

فارس، رايح الشركه ويكاد يكون نايم ولسه مفاقش 

دخل مكتبه، وطلب من عم سيد القهوه بتاعته بس دوبل، 

فارس:الحقني بالقهوه ياعم سيد، انا حاسس ان عنيا هتطلع من مكانها 

سيد،: اكيد كنت سهران امبارح بعد فرح استاذ احمد، ربنا يسعده يارب 

فارس : اه ماهو ربنا يسعده، ويعذبنا احنا، يلا كله يهون، مسيره يبقى مكاني، ويشوف اللي انا شوفته 

عم سيد:ههههههه، الله يجازيك يا استاذ فارس، ربنا يسعدكو انتو الاتنين يابني 

فارس: تسلم ياراجل ياطيب، الحقني بقه بالقهوه 

خرج عم سيد، وسلمي قابلته قدام مكتب فارس، وشاورت انه ميتكلمش معاها ويعلي صوته عشان تعملها مفاجئه لفارس، وفعلا دخلت المكتب 

سلمي، :السلام عليكم يا حضرة المدير المحترم 

فارس اتفاجئ، :سلمي، حبيبتي، انتي ايه اللي جابك هِنا، 

سلمي :ايه ده!! انت مش عايزني اجي ولا ايه، وبعدين اعتبرني جايه لعمي مش ليك يا سيدي 

فارس:ياقلبي انتي تيجي في اي وقت واي مكان، دي كفايه دخلتك اللي ظبطت دماغي احلى من كوباية القهوه، ههههههه

سلمي : انت بتساويني بكوباية القهوه يافارس!! 

فارس :اااه من القهوه، واللي بتعمله فيا. مإنتي متعرفيش القهوه دي ايه بالنسبالي، لو تعرفي كنتي فهمتي قصدي وعرفتي اني بمجّدك والله ههههههه

سلمي : ماشي ياسيدي، المهم انا كنت جايه اطمن عليك، وهروح اسلم على عمي وامشي على طول عشان معطلكش عن شغلك 

فارس:لا تمشي ايه، هو انتي مش هتروحي تباركي لهنا، دي موصياني لازم اجيبك عشان عارفاكي ندله ومش هتروحي وهتكتفي باتصال، وعلى فكره قبل أي غلط منك، هي اللي قالت مش انا، ههههههه

سلمي :والله! بقه هي قالت كده، ماشي ياهنا، عموما هشوف واقولهم في البيت، واقولك هعمل ايه بالضبط، اسيبك بقه واروح لعمي، وبعدين ارجعلك تاني، سلام 

فارس :بحب،،، سلام ياحبيبتي

بقلمي شيمو الخطيب

***********،،،،، *******

العصر كده الكل بدأ يجهز عشان يطمنوا على العرسان 

وفعلا راحو واحمد وهنا رحبوا بيهم جدا وكانو فرحانين انهم قاعدين في وسط عيلتهم ومؤمن ومي كالعاده قالبين الجو مرح وفارس انضملهم هو وسلمي بعد شويه، وكانت قاعده جميله والكل مش عايزها تنتهي 

الباب خبط وكان وليد 

مي فتحت، ووليد اتفاجئ بيها، 

وليد : انا اسف، بس كنت عايز استاذ احمد 

مؤمن :مي انتي بتكلمي مين...... 

                      الحلقة الثالثة من هنا

لقراءة باقي الفصول الجزء الثانى من هنا

لقراءة الجزء الاول جميع الفصول كاملة من هنا