الحب الأخير
بقلم نجلاء لطفي
الفصل الخامس
.أفقت من هذا المشهد على صوت خلفي يقول وهو يضع يده على كتفي ويحيطني بذراعه:
-إنتي زيي من عشاق البحر؟؟ منظر ساحر لفيت العالم كله بس ده أجمل منظر
قمت من مكاني مسرعة وأبعدت ذراعه فوجدته عادل عيد المخرج فقال بإبتسامه لزجه:
-تعرفي حاتم ده طول عمره ذوقه عالي في الستات مايقعش غير واقف فعلا عرف يختار زوجه جميله وصغيره ومزاجها عالي
-ميرسي على المجامله دي عن إذنك
أمسك بيدي وقال:
- إستني تعرفي إن وشك ينفع للسينما إيه رأيك نعملك تجربة تمثيل أنا متأكد من نجاحك؟؟
-لأ شكرا ما بحبش التمثيل أفضل إني أكون على طبيعتي
-وهو مجنني غير طبيعتك عامله زي القطه المتوحشه
رن جرس الموبايل فوجدته حاتم فقلت له:
-صباح الخير يا حبيبي أنا كنت باتمشى على البحر وقابلت الأستاذ عادل عيد المخرج أه أهه واقف بيتكلم معايا، إنت جاي طب يالا في إنتظارك
رأيت علامات الغضب على وجهه لكنه إبتسم بسخافه وقال:
-بتهربي مني يا قطه ؟؟ لسه الأيام جايه كتير وهنتقابل أكتر
بمجرد أن إنتهى من كلماته كان حاتم قد وصل فسلم عليه مرحبا وقال:
-كويس إنك عرفت منه
-المدام حد مميز ما يتنسيش بسهوله
نظرت إليه بحده وقلت لحاتم :- تصور الأستاذ شايفني أنفع كممثله؟؟
فضحك حاتم وقال:- هو بس بيحب يجامل الكل
فقال عادل:- دي مش مجامله فعلا المدام عندها جاذبيه وهتبقى هايله قدام الكاميرا
فقال حاتم وهو ينظر إلي:- لا المدام مالهاش في السينما أخرها البيت وأنا وبس
فقلت لأنهي الحوار:- يالا يا حاتم نفطر عن إذنك يا أستاذ
مشينا وسمعته يقول:- يدي الحلق للي بلا ودان
قال لي حاتم بحده:- إيه اللي هببتيه ده كسفتي الراجل مش قادرة تقفي تتكلمي معاه 5 دقايق؟؟
-مش قادرة أستحمل سخافته دقيقة واحده..ده كان بيعاكسني
-إنتي عبيطه؟؟ عادل هيبصلك إنتي؟؟ إنتي فاكره نفسك إيه عشان كل الناس تجري وراكي؟؟
-مش فاكره نفسي حد وعارفه إني حتة بياعه في محل بيمر عليها كل يوم خمسين واحد زي عادل وبرضه بيعاكسوني
-بطلي عبط في الوسط الفني كلمات المجامله كتير بس إنتي اللي مش متعوده
-وعادي إنه يحط إيديه الإتنين على كتفي وأنا قاعده؟؟
-عادي فيها إيه بيهزر معاكي
-إنت ما بتغيرش لأن طبعك كده دمك بارد ولا لأن أنا ما أستحقش تغير عليه؟؟
وقف ونظر إلي بحده وغضب وقال:
-دمي بارد؟؟ أعتقد الإجابه التانيه
-إنت صح
دخلنا قاعة الطعام وفقدت كل شهيتي لتناول أي شىء فقد كان بإستمرار مصر على أن يشعرني أني لاشىء، مجرد فتاه إشتراها لمدة عام لتؤدي دور زوجته. إنتبهت على صوته يقول:-
-هتاكلي إيه؟؟
-فنجان قهوة
-بس كده؟؟ مش كنتي جعانه من شويه؟؟
-كنت
-إسمعي أنا مابحبش لوية البوز والقمصه بتاعة الستات وماليش في النكد وباحب أفطر ومزاجي رايق
-حاضر هاسيبك وأقوم أقعد على البحر
-إنتي إتجننتي ؟؟ أقعدي معايا لحد ما أفطر الناس هتقول إيه؟؟
-حاضر
-وإفردي وشك
-فيه أوامر تانيه ؟؟
-لأ
أحضر النادل القهوة والإفطار لنا خصيصا فقد إنقضى وقت الإفطار لكن أوامر مدير القريه أن كافة المواعيد لاتنطبق علينا، وبينما يضع الإفطار سمعت صوت بعث السعاده في نفسي إنها
فيروز فطلبت من النادل أن يرفع الصوت قليلا ، وإستمتعت بصوتها وهي تغني (شايف البحر شو كبير)فابتسمت ونظرت من نافذة المطعم تجاه البحر، فقال حاتم:
-وكمان بتحبي فيروز؟؟
-ليه لأ؟؟ ولا فيروز حكر على الأغنيا والمثقفين بس؟؟
-تعرفيها منين؟؟
-من الراديو كل يوم باسمعها الصبح وأنا بأعمل شغل البيت وأجهز الأكل لإخواتي قبل ما أنزل شغلي باسمعها في إذاعة الأغاني
-وكمان بتطبخي؟؟
-أه
-وبتسمعي مين كمان؟
- عبد الوهاب وأم كلثوم وعبد الحليم وأحيانا فريد
-ده إنتي مزاجك عالي أوي وبتفهمي في الطرب
-الفن مش محتاج شهادات ومؤهلات عشان تحس بيه الفن إحساس بيقدر المطرب من خلال الكلمه واللحن ينقلهولك ده لو كان مطرب ومن خلال الأداء لو كان ممثل
-طبعا كنتي بتتفرجي على أفلامي بالتذاكر المجانيه اللي كنت باديها لخالتك
- شفت فيلمين ولما ما عجبونيش بقيت أسيب إخواتي يروحوا مع خالتي بس أخر فيلم ما رضيتش أوديهم عشان فيه مشاهد خارجه وألفاظ ماتنفعش البنات الصغيرين يسمعوها
-لا يا شيخه؟؟ عايزة تفهميني إنكم ساكنين في المعادي ومربياهم في مدارس راهبات؟؟
-وهي الأخلاق و التربية بتوع المعادي بس وبولاق لأ؟؟ أنا رأيي إن الفنان لازم يقدم رساله أو يناقش فكرة أو يحاول يغير في المجتمع أو حتى ممكن يعمل فيلم كوميدي يضحك الناس لكن من غير مشاهد وحشة أو ألفاظ شوارع وإلا تفرق إيه السينما عن التوكتوك؟؟
-محدش سألك عن رأيك يا ست الشيخه إحتفظي بيه لنفسك، يالا أن شبعت تعالي نقعد على البيسين عشان أخد تان
-يعني إيه؟؟
-يعني أعري نصي اللي فوق وأدهن كريم وأقعد في الشمس عشان أخد لون برونزي
ضحكت وقلت :
-ماهو عبده الفران بيعمل كده بس بياخده قدام الفرن مش على البيسين
ضحك وقال:- وبقيت أتقارن بعبده الفران..يالا يا أخر صبري