رواية ميراث نور
بقلم لينا بسيوني
الفصل السادس والسابع
فجأة الكهف ضلم واتصدمت من اللى شوفته !!!
الاضاءه كانت بتنور وتطفى زى فلاش الكاميرا ...
شوفت حاجه بتتحرك فى الاناء اللى فوق الخشب المتفحم
الاضاءه أنطفت ورجعت .
فشوفت فيران كبيره بتخرج من الاناء !!!
الاضاءه أنطفت ورجعت تانى .
فشوفت الفيران بتجرى ناحيتى !!!
الاضاءه أختفت تماما.
قولت لنصير :
عيب اللى بيحصل ده يا نص , مأتفقناش على كده .. الحق عليا يعنى؟ !!
قالى وهو بيضحك :
معلش يا عم نور , الشغل شغل , والصراحه أنا جايب أخرى من جدك ...
هسيبك أنا بقى وأخرج أتفسح ، بقالى كتير محبوس ياجدع , وهبقى أجيلك كل فين وفين , أمسى عليك !!!
قولته :
يا نصير !!! . ماتسبنيش محبوس فى الكهف أرجوك !!
ماردش عليا.
حسيت بالفيران عند رجلى , جريت من مكانى فى الضلمه , فلقتنى بدوس عليهم برجلى .
الاضائه رجعت ....
فشوفت الفيران كلها تحتى وبتطلع على جسمى , وقعتنى على الارض وبدأت تعض وتاكل فيا!!!
أغمى عليا من هول الموقف ....
فوقت بعدها و فتحت عينى , لقيت الكهف منور , والفيران أختفت !!!
بصيت على دراعى وجسمى , لقيتنى سليم ومفيش أثر لعض الفيران , فعرفت أن ده كله خداع بصرى مش حقيقه !
الدنيا ضلمت تانى وسمعت صوت كأن حد بيحك سكينه فى جدار الكهف .
الاضاءه رجعت على طريقة الفلاش .
شوفت طارق أبن عم نيللى وهو بيسن سيف طويل وبيبصلى بغل .
ضلمت تانى وفضلت فترة مضلمة، بعدها الاضاءه رجعت .
فوجئت بيا مكتف فوق المنصه اللى عليها مقام جدى !!!
وفيه أتنين مثبتنى وحاطين رأسى على خشبه زى اللى بيقطعوا عليها اللحمه !!
سمعت صوت نيللى وطارق فوق المنصه , بصيت عليهم لقيتهم بيشدوا السيف من بعض وبيتخانقوا على مين اللى يقطع رقبتى !!!.
وبعدين بصوا لبعض وضحكوا , و قربوا عليا وهما ماسكين السيف الكبير مع بعض ونزلوا هما الاتنين بالسيف على رقبتى , رأسى أنفصلت عن جسمى وسمعت صوت خبطتها على خشب المنصه !!!
بعدها شوفت نفس المشهد بيحصل بس لحد تانى , حد بتتقطع رأسه بالسيف على المنصه .
كان لابس جلابيه كمها واسع , أول ماقطعوا رأسه وأترزعت على المنصه سمعت حد بيصرخ وبيقول:
دياااااااب !!!!
فجأة ثعبان كبير خرج من كم جلابيته الواسع وهجم عليا !!
بعدها فوجئت بيا فى مكان تانى , بيت كبير بدورين!!
كنت فى الدور الاول وسمعت صوت واحد وواحده بيتكلموا فى الدور التانى .
جريت على السلم , فلقيت واحد شبههى بالضبط .
جدى ناير !!!!
كان قاعد بياكل على الترابيزه وقدامه واحده حامل , تقريبا مراته ليلى .
شوفت الحامل وهى بتقوم من على الترابيزه فى نفس اللحظه اللى بيترمى فيها شعلة نار كبيره على البيت .
قولتلها وانا بصرخ :
خدى بالك من النار ... حاسبى !!!
بس فوجئت بشعله النار جات فيها مباشرة وولعت فيها ,
جدى جرى عليها وحاول يطفيها بس البيت كله كان بيولع حاولت أخرج من البيت معرفتش،والنار مسكت فيا وأتحرقت مع البيت !!!
بعدها لقيت نفسى قدام الكهف من بره , شوفت جدى وهو قاعد جمب نصير الجن وبيتكلموا , نصير كان ساعتها بيخيط فى القميص ....
بعدها سمعت جدى بيقول غداف !!
بصيت ورايا لقيت زى طائر أسود لبس فى وشى !!!
فوقت مفزوع , فتحت عينى لقيتنى نايم على الارض و رجعت جوه الكهف تانى .
جسمى كله كان عرقان , و بيترعش , سمعت صوت العصافير , فعرفت أن الصبح طلع .
فيه خرم فى جدار الكهف مدخل شعاع شمس , و كان المصدر الوحيد للاضاءه فى الكهف فترة النهار .
جريت على باب الكهف وحاولت أفتحه ,معرفتش خالص
شيلت حجر كبير من الكهف وحاولت أكسر بيه الباب بس الامر كان أشبه بالمستحيل .
الباب مكنش بيتأثر خالص مع أنه خشب !!
جريت على الخرم مصدر اضاءة الكهف ، كان منفد لبره الكهف , بس ضيق أوى , على أد دراعى بس !!! مايدخلش حتى راسى .
بصيت من الخرم , فشوفت البت سندس فوق التبه وبتقرقض بسنانها غصن شجره !!
ناديت عليها ماسمعتنيش فى الاول .
عليت صوتى ..
اتلفتت يمين وشمال , وكملت قرقضه فى غضن الشجره !!!
صرخت بصوت عالى جدا وحسيت أنى حبالى الصوتيه هتتمزق .
فوقفت وبصت على الكهف من فوق التبه وقالت :
أنت بتنادى عليا ياسيدى ؟!
قولتلها بصوت عالى :
أيوه ياسندس بنادى عليكى .
فضلت تبص على الكهف من بره وهى بتدور على مصدر الصوت بعنيها , بس مكنتش شايفه الخرم فقالتلى :
أنا مش شايفاك ياسيدى !!
قولتها بصوت عالى :
أنا أهو ياسندس , أنزلى من على التبه وقربى من الكهف هتشوفينى .
قالتلى :
لاياسيدى ماينفعش أقرب من الكهف ,أنت محذر محدش ينزل من التبه ويقرب من الكهف خالص والا هتلعنه.
قولتلها :
انتى عبيطه يابت!!! مانا بنفسى أهوه بقولك أنزلى من على التبه .. تعالى أفتحى الكهف أنا محبوس !!
قالتلى :
مش هينفع ياسيدى أنت محذر مش ممكن تكون بتختبرنى !!؟ وعايز تشوف ولائى ليك !!!
لا ده أنا أفهمها وهى طايره , وعمرك ماهتمسك عليا غلطه ياسيدى ناير.
... مدد .. ياسيدى ناير مدد!!!
قولتلها :
يابت والله أنا ما بختبرك ولا حاجه , انا محبوس فى الكهف يابت الهبله .
قالتلى بثقه :
مهما قولت ياسيدى هفضل مخلصالك وعمرى ما هكسر أوامرك ومش هقرب من الكهف أبدا .
هو أنا هبله , عايزنى أقرب من الكهف علشان تلعنى !!
روحى ياشيخه يلعن ميتين أهلك !!!
قعدت على الارض وسندت ضهرى , تقريبا وصلت العذاب الجديده هتبدأ بالليل .
أنا كان أيه اللى جابنى الكهف !!! منك لله ياسندس .
قولتلها بصوت عالى :
لالالا , سندس مالهاش ذنب أنا اللى طمعت وكنت عايز أطلع بمصلحه من الكهف .
فجأة لقيت الكهف بيضلم !!
ايه دا أحنا لسه فى عز النهار !!!
بصيت على الخرم مصدر الاضاءه لقيته زى مايكون مسدود , بحاجه سودا .
بصيت جوا الخرم وركزت على الحاجه اللى سدت الخرم ...
فلقيت حاجه سودا ليها عينين ومنقار وبتقرب عليا وبتخش الكهف من الخرم .
رجعت ورا بعيد عن الخرم .
فلقيت غراب دخل من الخرم , وقف قدامى , وحسيته بيحنى رأسه كأنه بيرحب بيا أو بيسلم عليا !
فهزتله رأسى أنا كمان .
شاور بمنقاره على رجله واللى كان لازق فيها ورقه مطويه .
مديت أيدى وخدت الورقه من رجله.
الورقه كانت خامتها غريبه شبه البلاستيك ومتينه .
فتحتها وفضلت أفك طياتها كانت مطويه طبقات كتير, لما فتحتها لقيتها فردت صفحه كبيره فى حجم فرخ الورق .
مكتوب فيها :
من ناير الى حفيدى أو حفيدتى :
لو الرساله دى وصلتك يبقى أنت فكيت لعنة الكهف وحررت نصير والجن اللى بيخدمونى .
وبالتالى حارس الكهف شاف نصير خرج وجيه يسلملك الرسالة .
أتمنى طبعا تكون ساحر ومتحتاجش الرساله دى وتعرف تقرأ الكتب اللى فى الكهف , بس لو مكنتش ساحر , فأكيد نصير عملها معاك ورجع الورث تانى علشان ينتقم منى ومن نسلى
فلازم تعرف التلت تعزيمات اللى مكتوبين تحت فى الورقه انا كتبت نطقهم بالعربى وبالانجليزى ,علشان تتأكد من النطق الصح للكلمات .
التعزيمه الاولى علشان تستدعى بيها الجن .
التعزيمه التانيه بعتذبهم وبتخليك تسيطر عليهم .
التعزيمه التالته بتصرفهم عنك لفتره بس بيرجعوا تانى لانهم ورث وهيفضلوا معاك للابد وهتورثهم لعيالك .
دى التعزيمات اللى بتخليك تسيطر عليهم .
أنما لو عايز تخوفهم منك .
هتلاقى فى نفس الرساله وتحت التعزيمات مخطط لمحول كهربا وطريقة تركيبه لو عرفت تركبه صح وأستدعيتهم هتكهربهم جامد وهيترعبوا منك لآنهم هيفتكرونى
ولو مش هتعرف فما تحاولش أحسن وكفايه التلت تعزيمات .
وأبقى خد بالك من حارس الكهف،
(الغراب اللى جابلك الرساله ) دا حفيد غرابى وصديقى الوفى " غداف " واللى بيحرس الكهف وبيورث الرسالة دى لنسله .
أتمنى لك التوفيق ياحفيدى أو حفيدتى ,
وصيتى لك ان تستغلهم فى صنع الخير ولا تستخدمهم فى أذية الغير ..
أوصيك ألا تتقاضى أجر فى خير.
وأجعله فى ميزان حسناتك فى الجنه.
لعل الله يغفر لى ولك ولاجدادك أجمعين .
جريت على المحول , وبصيت على التانك , الحمد لله مليان بنزين , مشيت ورا مخطط جدى ناير بالضبط وعرفت فكرته .
حفظت التعزيمات التلاته فى سرى زى أسمى .
و قبل الشمس ماتغرب ,قولت التعزيمه اللى بتستدعيهم .
لقيت نصير قدامى وحواليه خيالات للجن اللى معاه .
نصير كان بيتلفت حواليه .. وبيدرك اللى حصل.
كان مندهش جدا وأتصدم لما شافنى واقف فى الكهف وعلى كتفى حفيد غداف .
رميت التعزيمه اللى بتعذبهم , فلقيت نصير ماسك رأسه وبيصرخ هو واللى معاه .
وقال وهو مرعوب :
ناير !!!!!
قولتله :
لا حفيد ناير ... واللى على كتفى حفيد غرابه ...غداف .
نصير خبط راسه بأيده وهو بيقول :
أخخ نسيت حامى الكهف !!!
قربت من محول الكهربا وقولت لنصير :
جدى ناير بيسلم عليك وباعتلك التحيه دى .
وشغلت محول الكهربا .
فسمعت صرخاتهم وسمعتهم وهما بيترجونى أوقف .
وقفت شويه , فلقيت نصير بينهج جامد وبيقولى :
أنت عرفت تركب المحول أزاى !!؟
نسيت أقولك انا مهندس كهربا أد الدنيا , شوفت بقى يا نصه , أنا كمان مابقولش كل حاجه .
وشغلت المحول تانى وانا بقوله وبقول للجن اللى معاه :
أحلى مسا على فخادكم يارجاله !!!
أترجانى أوقف , قولتله :
أفتح باب الكهف الاول , وانا أفصل المحول .
قالى وهو بيتكهرب :
حاااااااااضضضضضضرررررر
لقيت باب الكهف أتفتح .
شيلت شنطتى ومشيت ناحية الباب وخرجت بره الكهف .
فقالى وهو بيتكهرب :
أننننت ... كدددده .. خددددعتنى .
قولته وانا بقفل باب الكهف :
واحد بواحده والبادى أظلم , هسيبك أنا بقى وأخرج أتفسح بقالى كتير محبوس ياجدع , وهبقى أجيلك كل فين وفين أمسى عليك.
مشيت بعيد عن الكهف وطلعت التبه فلقيت سندس بتتنطط من الفرحه وبصت على الغراب اللى على كتفى وقالت :
الله أكبر مدد ياشيخ ناير مدد , رجعت غرابك غداف تانى !!
مردتش عليها وكملت مشى بعيد عن الكهف .
مشيت ورايا وهى بتقولى :
شوفت أنك مكنتش محبوس ولا حاجه , أها منكم يا أسياد عليكم حركات , بس أيه رأيك ياسيدى نجحت فى الاختبار اهوه .
وقفت وقولتها :
أها الصراحه نجحتى بأمتياز ... فى أختبار الهبل .... أنتى تستحقى قلادة الدوله التشجيعيه فى العبط ... ياشيخه روحى منك لله , عبو أى حد يمشى وراكى .
سكت شويه وقولتها :
أمشى قدامى ورينى أغنى واحد فى ام القريه دى , خلينا أبيع الارض وأخلع من عش المجانين اللى وقعت فيه دا .
قصدك معتز باشا .
ومين معتز باشا دا كمان !!؟
قولتلها :
حفيد الدكتور عمر صديقك ياسيدى.
أى حد ماشى , أمشى قدامى ومتودنيش عند جن تانى فاهمه .
هزت رأسها وهى مش فاهمه حاجه ومشيت قدامى .
فضلنا ماشيين لحد مادخلنا القريه تانى .
الناس برده أتجمهرت عليا, وأندهشوا أكتر لما لقوا الغراب على كتفى !!!
ومشيوا ورايا وفضلوا يبوسوا فيا!!
وصلنا عند فيلا فخمه فى وسط القريه وبتطل على النيل مباشرة .
شوفت فى البلكونه راجل كبير فى السن واقف وساند على عصاية خشب .
شاورلى أدخل الفيلا .
هشيت الغراب اللي كان لسه قاعد على كتفى ، وجيت أدخل الفيلا لقيت الناس هتدخل ورايا , فلفيت وقولتلهم :
أيه ياجدعان البلد كلها هتدخل بيت الراجل !!! وبعدين أحنا مش أتفقنا تظبطوا البارتى بتاعت المولد الاول .. لا كده أزعل أوى ... كده أنتوا عايزين ناير يزعل .
الهرج والمرج زاد أكتر , ولقيت ناس بتلطم وفوجئت بالنسوان بتصوت وبتقول :
يالهوى ... يالهوى ... سيدى ناير هيغضب علينا .. ياخرابى !!!!!!
ياديك أمى ... شكلى عكيت الدنيا .
قولت لسندس اتصرفى بسرعه فهميهم دول فكرونى هلعنهم !!
سندس قالت للناس :
الشيخ الساحر سيدى ناير عفى عنكم !!! وبيقولكم أستنوه عند المقام لحد مايجى !!!
سمعت صوت زغاريد وناس بتشكر ربنا وفيه اللى سجد على الارض !!!
وبدأوا ينصرفوا ناحية المنصه .
اهل القريه دول هوبا خالص .
سندس برده أصرت تستنانى بره الفيلا وماتروحش معاهم !!
سيبتها على البوابه ودخلت الفيلا واللى كان فيها جنينه كبيره مش مزروع فيها غير ريحان بس , كان مخلى الجو حوالين الفيلا مريح جدا ومنعش.
مشيت فى الجنينه لحد ماوصلت لباب الفيلا .
فلقيت الراجل العجوز مستنينى على الباب ، لابس بدله و شعره أبيض ووشه أحمر ، ساند على عصاية مطرزة وفخيمة ، فيه شبه من الممثل مصطفى فهمى !!!
سلم عليا بحراره وقال :
أهلا وسهلا ...أتفضل ... اتفضل .
دخلت الفيلا واللى كانت واسعه جدا من جوا وفاضيه تماما من العفش مفيهاش بس غير كنبه كبيره صوفا وتلفزيون ضخم قدام الكنبه !!
قالى كانه بيقرأ أفكارى :
ماتستغربش أنا مبحبش الدوشه الكتير فعلشان كده محطتش عفش فى الفيلا , تصدق أنك شبه جدك جدا !!
بصيتله بأستغراب .
فقالى :
أها هو أنت مفكرنى زى أهل القريه مفكر أن ناير رجع , لا أنا عارف تاريخك كله .
وضحك وكمل كلامه وقال :
أستنا هوريك حاجه !!!
سابنى وراح ناحية أوضه فتحها بالمفتاح ودخل .
شويه وطلع تانى فى أيده البوم صور ،وقالى :
بص كده على الصور دى .
قعد يفر فى الالبوم بتاع الصور وهو بيقول :
دى صورة جدك مع جدى عمر فى القاهره .
شوف بقى الصوره دى ...
دى صورة جدك ناير وهو شايل جدك احمد فى اللفه !!!
وقعد يورينى صور أجدادى وأبويا وهو مكملش سنتين !!
كنت فرحان طبعا ومندهش , بس كنت حاسس أنه فرحان أكتر منى !!
قالى وهو مبتسم :
أنا فرحان اوى أنى شايفك قدامى .
اصل حضرت جدى عمر وانا صغير خالص ،وكان على طول بيحكيلى عن قصة الساحر ناير واتعلقت بشخصية جدك لدرجة انه كان بطلى ومثلى الاعلى .
أنا فرحان اوى أنى شايفك قدامى .
لما شوفتك دلوقتى افتكرت زمان لما كنت بقعد على حجر جدى ويحكيلى عن مغامرات الساحر ناير .
أيه رأيك نتغدى النهارده مع بعض !!!؟
الصراحه انا جعان اوى ومكالتش من أمبارح !!
ضحك وقال :
الساحر ناير جعان فى قرية النيارين والله عيب علينا !!!
نادى على حد من الخدامين وقاله :
الساحر ناير هيتغدى عندنا النهارده لو الاكل معجبوش مش عايز أقولك ممكن يعمل فيك أيه !!؟
الراجل بصلى وهو مرعوب وقال لمعتز باشا :
ربنا يستر .
وخد نفسه وجرى !!!
قالى :
وايه بقى اللى رجعك قرية النيارين تانى يا حفيد البطل .
قولتله :
جاى ابيع ورثى اللى فى البلد وأرجع تانى !!
قالى :
الارض !!؟
أها .
الابتسامه أختفت من على وشه وقال :
انا فكرتك جاى تستقر وسط أهلك وناسك الحقيقيين !!
قولتله :
لا حضرتك فاهم غلط , انا ماليش فى حوارات جدى دى .. انا الحمد لله فى هندسه كهربا ومترشح لبعثه ومحتاج ابيع الارض علشان مصاريف البعثه وكده .
سكت شويه وقالى :
طيب ماتبعش كل حاجه ،سيب حاجه تربطك بأصلك برده
سكت شويه وقالى :
لآ أصل أيه .. حضرتك شايف الدنيا هنا فى البالالا خالص ومش هينفع أعيش هنا , أنا مكملتش يوم واحد وكنت هتجنن..
قولتله :
والصراحه أنا عايز أخلع من هنا فى أسرع وقت , وتقريبا حضرتك الوحيد اللى تقدر تشترى الارض .
بص يا...
أسمى نور يا معتز باشا .
قالى :
بص يانور, أنت لسه شاب صغير ومتعرفش مصلحتك فين !!!
فضل يهرى كتير ويقولى أصلك وفصلك وأجدادك والضوفر عمره مايبقى ميه والهبد ده .
سيبته يهرى خالص وقولتله :
مع أحترامى لشخصك ياباشا, كلام حضرتك على رأسى من فوق والله , بس أنا واخد قرارى ومش هرجع فيه , فهل حضرتك عندك أستعداد تشيل ولا أدور فى حته تانيه !!
أتصدم من ردى وقالى :
الفلوس موجوده , بس أنا برده مش هشترى الارض كلها منك , هشترى حتة الارض الصغيره بتاعت دياب الضباعى ,هو تمنها بما يرضى الله 5 مليون جنيه .
وأظن ان البعثه بتاعتك مش هتصرف اكتر من كده , وياسيدى لما تبقى ترجع من البعثه لو لسه مُصر تبيع أرض أجدادك , أبقى تعالا وانا أشتريها .
فضلت أفكر فى العرض بتاعه .
فقالى كأنه بيقرأ أفكارى , ماتفكرش كتير , محدش هيجرؤ يشترى أرض معتز باشا عرض يشتريها .
المره دى انا اللى اتصدمت , كأنه بيقولى يا أما أقبل عرضه ياأما مش هيخلى حد يشترى الارض .
وافقت بينى وبين نفسى علشان فكرته كويسه ،
مش علشان ضغط عليا , وحسبتها من ناحية تانيه ,كأنى بسقع الارض علشان سعرها يزيد .
قولتله:
موافق .
بس انا ليا شرط علشان أشترى أرض عم دياب , هو مش شرط هو طلب .
قولتله بأستغراب :
طلب أيه ؟!!!
معتز باشا قالى
قبل ما أطلب الطلب ... هو نصير الجن معاك؟!
أيه ده هو أنت تعرف نصير كمان !؟
ابتسم وقالى :
بعدين هتعرف أنا عرفته أزاى !!.. أنا أخر حاجه أعرفها أن جدك حبسهم فى الكهف !!!, هل أنت لما روحت الكهف حررتهم وبقوا معاك !؟
ابتسم وقالى :
اها حررتهم وحاليا بكهربهم فى الكهف .... يعنى مش معايا دلوقتى !!!
ضحك بصوت عالى وقالى :
طيب ما انت طلعت بتفهم فى السحر أهوه ,ابن الوز عوام ,
بص ياسيدى الطلب بتاعى يخص واحد زميلى فى الشغل عنده بنت ...
قاطعته و قولتله :
لامؤاخذه ياباشا لو بقاطعك , بس هو حضرتك شغال أيه ؟!!
ضحك بصوت عالى وقالى :
جهه سياديه عليا !!
اتصدمت وقولتله :
أمممم ...علشان كده ماحدش هيجرأ يشترى الارض , الصراحة يا باشا أنتوا بتخوفوا أكتر من الجن والعفاريت !!!.
كمل ياباشا كمل ...
أبتسم وكمل كلامه وقال :
فيه واحد زميلى فى الشغل ويعتبر أقرب صديق ليا , عنده بنت مكملتش 12 سنه , بعد ما مامتها ماتت , البنت تعبت جدا ومحدش قدر يعرف علتها ايه !!
أبوها لف بيها على كل الدكاتره اللى فى مصر واللى بره مصر , ومالقاش علاج لبنته , جاب شيوخ بس كلهم طلعوا نصابين طلبوا فلوس كتيره وبرده معرفوش يطلعوا الجن اللى عليها .
هو أبوها حاليا رافض موضوع السحره دا تانى , بس أنت غير كل السحره ...
أوعى يكون طلب حضرتك أنى أطلع الجن اللى لابس البنت ؟!!!
بالظبط , تبقى خدمتنى وخدمت صديقى خدمه مش هنسهالك أبداا...
حضرتك فاهم غلط خالص .. أنا ماليش فى السحر ومعرفش أعمله , باشا أنا كنت محبوسة امبارح فى الكهف والجن كانوا بينفخونى .
لولا الغراب جابلى رساله من جدى , وعرفنى أخرج أزاى وأسيطر عليهم أنما أنا معرفش أشتغل بيهم والكلام ده ,
أسف ياباشا مش هعرف أعمل اللى حضرتك عايزه , ممكن أعك الدنيا والبنت يحصلها حاجه!!!
لا متخافش مدام عرفت تسيطر عليهم مش هيغدروا بيك والموضوع مش مستاهل يانور , أسال نصير جدك كان بيعمل أيه , وأعمل زيه
الفكره مش فيك أنت , الفكره فى الجن اللى معاك ,واللى يعتبر من أقوى الجن وغير كده متمرسين وعندهم خبره فى الحاجات دى، بحكم شغلهم مع أجدادك ....
ياباشا أنا والله ما ليا فى الكلام دا خا....
قطع كلامى وقال :
كده مابقاش طلب , بقى شرط , لو مانفذتهوش مش هشترى الارض !!
ياباشا كده أنت بتضغط عليا !!
أها بضغط عليك ، انا مش بقولك سيب شغلك وأشتغل ساحر ,دى مره واحده بس , هتخدمنى فيها وليك مفأجاه ياسيدى لما ترجع !!!!
مفاجأه ايه ؟ !!!
حاجه تخص جدك , بس مش هديهالك الا لما تنفذ اللى طلبته منك !!!
فكرت شويه وبان عليا أنى هوافق وقولته :
من غير بس , فيه عربيه هتاخدك بعد الغدا من قدام الفيلا توديك وترجعك فى نفس اليوم .
طيب خليها بكره طيب , على ما أروق الجو مع نصير والرجاله , أصلى زودت العيار معاهم شويه ....
ضحك بصوت عالى وقال :
الله أنا بحب القصص دى أوى , ماتحكيلى أيه اللى حصل معاك فى الكهف امبارح؟! ....ولا أقولك خليها واحنا بناكل أحسن ...
قعدنا وأكلنا والاكل كان لذيذ جدا ، وكان من كل حاجه نوع , علشان لو مابحبش نوع معين من الاكل !!
حكيت للباشا اللى حصل معايا فى الكهف وكان بيسمعنى وهو مستمتع جدا ومتأثر بالاحداث كأنه طفل !!
قعدت معاه وقت كتير بعد الغدا وقضينا السهره بنحكى فى كل حاجه ...
حكيتله عن أختراعى وحياتى قبل ما أجى القريه ولاقيتنى لا أراديا بحكيله على نيللى !!!
الناس بتوع الجهات السياديه دول عندهم هيبه غريبه ،
بتخليك تقر بكل حاجه بمزاجك !!
الوقت كأن أتأخر فاستأذنت , عرض عليا أبات عنده فى الفيلا بس قولتله أنى لازم أروح الكهف , قبل ما أروح مشوار بكره ....
سلم عليا بحراره قبل ما أمشى وحضنى وقالى :
أستمتعت جدا بالوقت معاك , أنت شخصيه عبقريه وعصاميه زى جدك , وقصتك شبه قصة حياته ,حسيت فعلا أن التاريخ بيعيد نفسه !!
شكرته على حسن أستضافته ومشيت
خرجت من البوابه ....
لقيت البت قاعده على الأرض وسانده راسها على البوابه ونايمه!!!
بت ياسندس !
فطت من على الارض وقالتلى :
نعم ياسيدى ..
أنا نسيتك خالص يابت , ونسيت أقولهم يطلعوك أكل !!!, أنتى كلتى يابت !!؟
كنت جعانه أوى ياسيدى وقولتهم على البوابه ومرضوش يأكلونى !!! بس خلاص لما شوفتك شبعت ..
ناديت على البواب بتاع الفيلا فجه جرى وقالى :
أؤمرنى ياسيدى ناير !!
قولتله :
أزاى يعنى الدرويشه بتاعتى تسيبوها كده من غير أكل؟ !!!
الراجل أترعب وركبه كانت بتخبط فى بعضها , وبص على سندس , وطلب منها السماح ...
فقولتله :
أجرى روح هاتلها أكل من اللى أتفضل جوه !!
جرى وفى أقل من خمس دقايق كان جايب شنطه كبيره أوى مليانه أكل ،واداها لسندس .
سماح المره ده يا سيدى ناير , وحياة مقامك ما هعملها تانى !!! سماح المره دى ياستى سندس ..
قولته بحزم :
خلاص روح دلوقتى
خد نفسه وجرى من قدامى
بصيت على سندس لقيتها بتعيط !!!
مالك يابت !!
فوجئت بيها بتحاول تبوس أيدى !!! وهى بتقول :
طول عمرك ناصفنى ياسيدى ,حتى من قبل ماتظهر وتتجسد!!
روحى كلى ياسندس وبطلى عبط ..
سيبتها ومشيت , فمشيت ورايا برده.
رايح فين المره دى ياسيدى !؟
راجع على الكهف .
ماشى !!
ومدت أيديها فى الشنطه وأحنا ماشين وطلعت موزتين ،
اداتنى واحده وهى بتقول :
والنبى ماتكسف ايدى ياسيدى خدها منى وأدينى البركه.
خدتها منها وأكلتها وأحنا ماشيين !!
وفضلت سندس على كدا طول الطريق للكهف، تمد أيديها فى الشنطه وتدينى اكل .
مره الاقى فى أيدى ورك فرخه , مره حتة لحمه , مره طبق مكرونه ورز !!!
خلصنا شنطة الاكل الكبيرة قبل مانوصل التبه اللى عند الكهف !!!!
استنت هى فوق التبه ... ونزلت أنا الكهف .
قربت من الكهف وفتحت الباب , لقيت الدنيا مضلمه ومسمعتش صوت المحول !!!
طلعت الموبايل بتاعى وشغلت الكشاف ودخلت الكهف , بصيت على المحول لقيته وقف علشان الماتور أتحرق !!
ناديت على نصير وقولته :
يانصه ... عمو نور جه .. أطلع يانصه عايزك .
فمردش عليا !!!
فقولت التعزيمه اللى بتحضرهم .
فلقيته قدامى وفضل يتلفت يمين وشمال ، وأول ماشافنى حط أيده على وشه وقال وهو مرعوب :
كفايه كهربا بقى!! أنت أيه ياجدع !!! مفترى !!؟
ده أنت سيبتنا نتكهرب لحد مالمحول اتحرق !!!
جدك عمره ماعمل معانا كده كان عنده رحمه , والمحول بتاعه كان بيتحرق بسرعه .
احنا فضلنا نتكهرب طول النهار والمحول ما أتحرقش الا من ساعه بس !!!
أصلى عملت تعديل بسيط فى المحول مايخلهوش يسخن بسرعه , لامؤاخذه بقى يانصه , أنت اللى غدرت فى الاول , ومتخافش ياسيدى أنا مش جاى أكهربك أنا جايلك فى مصلحه .
مصلحه أيه !!؟
بت ملبوسه وعايزين نطلع الجن اللى عليها ..
هو ده الكلام ... ياجدع الدنيا دي غريبه جدا !!
من كاام سنه جالى جدك وكان بيكهربنا ساعتها برضه , وقالنا على أول شغلانه معاه .
لا خد بالك دى هتبقى أول وأخر شغلانه .. ده حوار كده هنقضيه علشان امشى بيعة الارض .
أيه ده هو جدك مقالكش أن احنا ماينفعش نقعد من غير شغل وخدمه والا هنشتغل عليك !!!
مش فاهم !!
هفهمك بس لما نخلص الشغلانه دى الاول !! , أنت طبعا ميح فى السحر صح؟ !!!
ومش عايز اعرف حاجه عنه !! انا بس عايزك تقولى جدى كان بيعمل أيه فى المواقف اللى زى دى ،والباقى بقى عليكم انتوا جن فى بعضيكم ،وبتعرفوا تتعاملوا مع بعض .
موافق بس شرط !!
شرط أيه أنت كمان؟ !! مش المفروض ده شغلك !!؟
قالى والدمعه كانت هتفر من عينه :
يعنى هو مش شرط هو طلب ورجاء منى ومن الجن اللى معايا ...
أيه !!؟
مانتكهربش تانى الاسبوع ده !!
ماردتش عليه
فقالى وهو بيستعطفنى :
خليك جدع بقى .. دا فى جنى مننا مخه اتلحس خالص وبقى ناسى أسمه , المشكله أنا احنا كمان نسينا أسمه ومحتاسين معاه دلوقتى !! ريحنا حتى أسبوع بعد دش الكهربا اللى خدناه النهارده ده !!! , محدش عمل معانا كده فى أجدادك كلهم ... أنت غشيم أوى !!!
ياسطى نصه من عنيا , أتعدلوا أنتوا بس وأنا ياعم مش هكهربك لمدة أسبوعين قدام .
فرح أوى , وتقريبا سمعت الجن اللى معاه فرحانين وحسيتهم بيحضنوا بعض !!
فضل نصير معايا لحد الصبح ما طلع، شرحلى جدى كان بيعمل أيه فى المواقف دى .
لبسنى زيه وقالى أفتح الصندوق اللى على الترابيزه
وأطلع منه السبحه الطويله !!!
وقالى أخدها معايا علشان بتدى هيبه قدام الناس ...
وفيه جن معين بيخاف منها , الجن اللى أجدادى أتغلبوا عليهم قبل كده، أول مابيشوفوا سبحة أجدادى بيفتكروهم وبيخافوا .
خرجت مع نصير من الكهف فلقيت الغراب وقف على كتفى طلعت على التبه وقابلت سندس ، ومشينا ناحية فيلا معتز باشا .
سندس فضلت ماشيه ورايا برده ...
أول ماوصلنا الفيلا لقيت عربيه بى أم سودا مستنية قدام الفيلا , معتز باشا قالى أنها هتوصلنى القاهرة وترجعنى القرية تانى .
هشيت الغراب وركبت فيها , لقيت سندس بتلف الناحيه التانيه وبتركب معايا !!
قولتلها بعد ما ركبت العربيه :
أنتى رايحه فين !! أنزلى يابت , أنا رايح مشوار مهم !!
رجلى على رجلك مش هسيبك ياسيدى .
أنزلى ياسندس مش ناقصاكى !! انا رايح مشوار مايعلم بيه اللى ربنا .. أنزلى ياماما .. أنزلى ياحبيبتى !!!
قالتى وحستها هيغمى عليها :
حبيبتك !!!... قمسا بالله وغلاوتك عندى ما هسيبك بعد الكلمه دى ... والله لو هيقطعونى شرايح مانا سايباك ياسيدى ناير !!!
لسه هرد عليها .. لقيت معتز باشا جالى عند شباك العربيه وقالى :
أيه هتاخد الدرويشه بتاعتك معاك !!؟
قبل ما أشرحله ...
كمل كلامه وقال :
مفيش مشكله بس أبقى خليها فى العربيه , عايزين نبقى خفاف على الراجل ، وماتنساش الراجل أسمه ياسين عوده وبنته أسمها كارمن...
العربيه أتحركت وبصيت على سندس اللى جمبى واللى بتسقف برجليها من الفرحه علشان هتسافر معايا!!!
تليفونى رن ساعتها ولقيت أسم نيللى على الشاشه فكنسلت عليها وانا بقول :
هانت يانيللى ... هانت ...
وصلنا الفيلا سيبت سندس فى العربيه ونزلت وقفت على البوابه وقولت للامن :
عندى معاد مع ياسين باشا ، قوله الشيخ نور ناير..
الامن فتحلى البوابه ودخلت الفيلا واللى كانت فخمه جدا من بره ومن جوه
أبو البنت رحب بيا وسلم عليا بحراره وقالى :
أنا كنت رافض موضوع السحره ده تماما , بس لولا معتز باشا, هو اللى أقنعنى وقالى أنك غير كل السحره .
معرفتش أرد عليه وأقوله أيه , فقولته :
أن شاء الله والف مبرووك .. الطاعه لله .
طلعنى الدور التانى ودخلنى أوضه فلقيت بنت صغيره
متكتفه فى السرير ،وعماله تشتم في الخدامه وبتقولها :
ياخاينه ... بتخونى جوزك مع صاحب محل البقالة اللي علي اول شارعكم !!!
هوبا من أولها كده !!!
سألت أبو البنت علي مكان الحمام فشاورلى عليه دخلت أتوضيت ورجعت ...
وقفت فى نص الاوضه وتوكلت على الله وقرأت بتباث وبثقه صورة الزلزله كامله بدون زياده أونقص وجيت عند الايه الى فيها كلمة أشتاتا وقولتها 7 مرات .
فحسيت أن الاوضه بقت واسعه جداا!!! ,وسمعت صوت خبط جاى من جوه الدولاب ورياح هبت مع ان الشبابيك مقفولة !!!
فعرفت أن دى علامات صرف جن العمار اللى قالى عليها نصير .
أستدعيت نصير بعد ماصرفت جن عمار البيت .
فجه ونسيت وقولت بصوت عالى :
ايه رايك يا نصير؟!!
تمام كده أنت ماشى صح , بس أبقى وطى صوتك وأنت بتكلمنى علشان الناس مايقولوش عليك مجنون , حرك شفايفك من غير صوت وانا هسمعك زى مانت بتسمع صوتى فى دنك كده !!..ثوانى بقى أشوف شغلى .
نصير بص على البت وفضل متنح فيها وبعدين أختفى !!
بصيت على البت لقيتها بتبرقلى و بتقولى :
نصر مين !!! محدش واقف فى الاوضه غيرك أنت وبابا وسعاد الخدامه هو ,انت بتكلم الهوا !!!.. انت مجنون ؟!!
ماردتش عليها وبصيت على نصير اللى رجع تانى فقولت بصوت وشوشه:
ها أيه الدنيا !!؟
حط ايدك على راسها كده !!!
جيت أحط أيدى على راسها , لقيت البت هتعضنى , فسحبتها بسرعه !!
فلقيت نصير فاطس على نفسه من الضحك !!
أنت بتهزر يانصير فى الشغل , البت مالها !!؟
قالى وهو لسه بيضحك :
بص هي مش ملبوسة , بس العن !! البت مجنونة ودماغها سايحه خاالص.
متأكد يانصه ؟! .. البنت شكلها مش مريحنى !!
عيب عليك يا نينو انا مش تلميذ , البت مش ملبوسه بس مجنونه وبتجيلها نوبات صرع ...
عندها مرض أيه يعنى ؟!!!
لا انا مش دكتور نفسى ومش بفتى فى حاجه معرفهاش .. انا مؤمن بالتخصص ،
كل اللى أعرفه أنها مش ملبوسه وبيجيلها نوبات صرع ,أنا أخرى أقولك على وصفة الاعشاب المعالجه للصرع واللى جدك كان بيستخدمها وعرفتها منه .
بصيت لابوها وقولتله :
بنتكم زى الفل مافيهاش حاجه ولا عليها جن ،وبالنسبه لنوبات الصرع اللى بتجيلها ممكن تكون بسبب وفاة والدت...
قطعت كلامى لما لقيت البنت بتقول :
غراااااااب !!!
البنت كانت بتبحلقلي بطريقة مرعبة ...بحلقتلها انا كمان
وقلتلها :
تقصدى ايه بغراب؟!
انت مربي غراب !
قلتلها :
وعرفتى منين ؟!!
قالتلى:
شميت ريحته... شكله بيحبك اوى.. بيتمرمغ فيك .
قلتلها :
ياا دا انتى حاسه الشم عندك قوية اوى !!
مش انا اللي شميتك!!
وشورتللي علي قطة قاعدة في ركن في الاوضه !!!
نصير ضحك وقالى :
مش بقولك مجنونة يا "نينو "، فيه ريشه من ريش حفيد غداف علي كتفك ،مطرح ما كان واقف الصبح .
ضحكت وقلت لابو البنت :
ماشاء الله بنتك ذكيه جداا عرفت ان عندي غراب عشان شافت ريشة سودا على هدومى...
نفضت الريشة من علي كتفي فنزلت على الارض .
وهمست لنصير وقلتله :
اقول للراجل ايه !!؟
قالي :
قوله بنتك كويسة ومفيهاش حاجه وأديله وصفة الصرع بتاعة جدك اللى هقولهالك دى!!
قولت للراجل بنتك زى الفل و وقولتله على الوصفه اللى قالى عليها نصير وقلتله ميربيش قطة ولا كلب ولو هيربي حيوان يبقي من ذوات الدم البارد زى سلحفاه او سمك .
الراجل شكرنى وحاول يدينى فلوس .
نفذت وصيه جدى وقلتله:
مبخدش فلوس فى الخير ..
ومشيت ناحيه باب الاوضه وورايا الراجل .
نصير قالي :
علي فكرة انا سألت قرين البنت وقالى أنها هى اللى قتلت أمها و قتلت عيله صغيره كمان صاحبتها ,وهتقتل كتير , روحها سودا وكلها شر !!!
حبيت احذر ابوها فقلتله قبل ما اخرج من الاوضه ان بنته قتلت اغلي حد عندها وهتفضل تقتل، وحكيتله قصه سيدنا الحضر لما قتل غلام بيرهق أهله وكان هيضلهم
مكنش قصدي حاجة والله بس جات في مخى كده وقلت اقولهاله
معرفش ليه!!!
لقيت ابوها بيزعقلي و زقنى وطردنى بره !!!
نصير كان واقع على نفسه من الضحك لما الراجل طردنى
وقالى :
علشان تتعلم ماتقولش كل حاجه !!! رايح تحكى للراجل قصة سيدنا الخضر !! بتقوله أقتل بنتك!!
انت عبيط يا نينو !!!
رجعت العربيه وركبت جمب سندس اللى كانت نايمه فى العربيه و رجعنا على القرية ...
طول الطريق سندس كانت نايمه خالص , حسيتها مستمتعه بالكرسى بتاع العربيه كسرير ..
صعبانه عليا البت دى برده , مالهاش بيت وبتنام فى الشارع !!
لقيت نصير جه و قعد جمبى سألته وقلتله :
ايه موضوع القرين اللى سألته دا ؟!!
كل بنى ادم منكم لما بيتولد، بيتولد معاه قرينه من الجن بيفضل معاه طول عمره لحد ما يموت وتنقطع الصله بينهم
قرينك بيبقى عارف عنك كل حاجة و عاكسك فى كل حاجة
هو اللى بيوسوسلك وبيوزك على الشر على طول , من الاخر شيطانك اللى راكبك ،ولو عايز تحضر قرينك بتقف قدام المرايه وتقول اسمك بالمقل..
قاطعته وقلتله :
بس بس بس . انا ناقص !!! قرين ايه اللى احضره مش كفاية عليا انتوا .
فضل يحكيلى طول الطريق عن حالات زى البنت اللى كنا عندها ..
نصير لذيذ برده ومسلى , سلانى لحد ماوصلنا القريه .
روحت لقيت معتز باشا عارف كل اللى حصل , وكان بيضحك عليا هو كمان !!!
ياباشا انا قولتلك ماليش فى الحوارات دى ،أهو الراجل طردنى من بيته وكان هينفخنى !!
أنا لو مكانه كنت هنفخك برده، رايح تقول للراجل فيما معناه أقتل بنتك !!!
لا انت كمل فى البعثه بتاعتك , وشغل الكهربا !!! مش بتاعتك الشغلانه دى خالص يا نور !!
عدى عليا بكره أكون جهزت الفلوس والعقود .
هتشترى الارضين بقى , أديك شوفت أهو، أنا ماليش فيها !!
لا طبعا , أرض دياب بس , الشرط كان على أرض دياب بس .
ماشى بكره الصبح هبقى عندك اخلص واخلع من هنا على طول ,وربنا يسهل بقى بعد البعثه
سكت شويه وكملت كلامى وقولتله :
طب بالنسبة للمفاجأة اللى قلتلى عليها ؟!!
بكرة ان شاء الله واحنا بنخلص الورق هديهالك
سلمت عليه ومشيت من عنده
ومشيت ورايا سندس برده .
روحت على الكهف وانا فرحان جدا , أخيرا هقبض بكره وابقى مليونير .
وصلت الكهف , سيبت سندس على التبه ودخلت الكهف وغيرت هدومى وبصيت على الشنطه فشوفت القميص !! فأفتكرت حاجه !!
أستدعيت نصير .
خير يانينو !!
قولتله :
انت كنت قولتلى أن القميص فيه امكانيات أقوى من الاخفاء فاكر !!؟ ... اليوم اللى غدرت بيه فيه وحبستنى فى الكهف .
قلبك أسود اوى يانيمو , طبعا فاكر , البس القميص وتعالا عند المرايا اللى فى الدولاب .
لبست القميص وبصيت على نفسى فى المرايا اللى فى الدولاب .
قالى :
أيه اللى تعرفه وجربته فى القميص؟
أنه بيخفى لما زرايره كلها تتقفل , وأنه بيغير لونه على حسب الرغبه لما ألف لفه كامله .
ضحك وقالى :
بس !!!
أخلص فيه أيه تانى !!
قالى :
بص يا سيدى .......