CMP: AIE: رواية ميراث نور الجزء الثانى2الفصل الثالث والرابع والخامس بقلم لينا بسيوني
أخر الاخبار

رواية ميراث نور الجزء الثانى2الفصل الثالث والرابع والخامس بقلم لينا بسيوني



الجزء التاني ميراث نور

الفصل  الثالث والرابع والخامس 


بقلم لينا بسيوني


الشاب مد أيده علشان يسلم عليا وهو بيقول : 


أعرفك بنفسى أنا شهاب خزاعى!! 


مسلمتش عليه وقولتله : 


خزاعى؟ !!! أنا حاسس أنى سمعت الأسم ده قبل كده !!

سمعت نصير وهو بيلطم وبيقول :

مش عارف سمعت الاسم فين قبل كده!!! , خزاعى الساحر اللى جدك قتله , اللى قدامك يبقى حفيده , ركز يانينو أمال كنت جايب أمتياز فى الكليه أزاى! 


الشاب كان مادد أيده وبيبصلى وهو مبتسم وقالى : 


أيه هفضل مادد أيدى كتير , ولا بتسأل نصير الجن تسلم ولا لآ؟ !!! 


نصير قال فى ودنى : 


أوعى تسلم , أنت فاهم , أوعى يانينو... 


فتحت أخر زرار فى القميص فظهرت  بعد ماكنت مخفى وقولتله : 


شيل أيدك علشان مش هسلم عليك , وأتفضل بره الكهف. 


شال أيده و ضحك بصوت مصطنع وهو بيقول : 


قول لنصير أنى مش عامل سحر على كفى , وانى مش جى  علشان أأذيك بالعكس يانور أنا جاى أتعرف عليك علشان نبقى أصحاب !!! 


قولتله : 


أذيه ؟!!! أنت مفكر نفسك تقدر تأذينى مثلا !!! أنت ناسى أنى جدى معلم على جدك قبل كده ولا مبتقراش تاريخ أجدادك !! 


سمعت نصير بيقولى : 


عفارم عليك يانينو , أيوه كده !!! أديله ومتبينش أنك خيبه !!! 


شهاب قالى : 


يانور أنا جاى أتصاحب عليك , ومش جاى علشان أنتقم , على فكره أنا زيك بالضبط ما أخترتش أنى أبقى ساحر , أنا طالب فى كلية طب ومتفوق جدا. 


و الجن اللى معايا ورثتهم عن أبويا اللى ورثهم من جدوده, وفضلوا يرهقونى لحد ما قدرت أسيطر عليهم  . 


سكت شويه وكمل كلامه وقال : 


الجن دول حاجه وحشه أوى يانور وأوعى تثق فيهم ,

المفروض تثق فى بنى جنسك أكتر من كده , وماتخليش جنى زى نصير يحركك ويقولك تعمل أيه ومتعملش أيه !!! 


قولتله بثقه : 


ومين قالك أنى مخترتش أبقى ساحر!! , وان الجن اللى معايا بيرهقونى!!!

واضح أنك عندك مشكله ياشهاب , أو مفكرنى ساحر ضعيف علشان أسمح للجن يرهقونى ,أنا بعون الله أقوم بجيش جن لوحدى . 


سمعت صوت نصير فى ودنى  بيقولى : 


حلو الاداء ده , بس متأفورش أوى , علشان متنكشفش !!! 


وانا مش جاى أشكك فى قدراتك لاسمح الله , وصدقنى يانور أنا مش بحمل أى ضغينه ضدك ,بالعكس أنا جاى أستفاد من علمك وأبقى تلميذك , وأحط أيدى فى أيدك ,  أنت مالكش ذنب فى اللى عمله جدك فى جدى , وكمان انا مؤمن أن الابناء مالهمش ذنب فى اخطاء أبائهم وأجدا.... 


قطع كلامه لما شاف سندس جاية بتجرى من أخر الكهف علينا , وقالت : 


فيه أيه ياسيدى ومين ده !!؟ بنى أدم ولا جن !!؟ 


قولتلها : 


خشى ياسندس جوه دلوقتى !! 


سندس مردتش عليا وفضلت تبحلق فى شهاب وقالتله : 


هو مش أنت اللى كنت بتسأل على سيدى لما كان فى القاهره !!؟ 


وبصتلى وقالت : 


أنا فاكره الراجل ده ياسيدى كان بيسأل عليك لما سيبت البلد وسافرت القاهره.. 


يااه ده أنت عينك عليا من أول ماوصلت البلد بقى !! 


قالى : 


أها جيتلك أكتر من مره لما سمعت أنك رجعت تانى البلد وللاسف مالحقتكش قالولى انك سافرت وسيبت البلد , وأول ماعرفت أنك رجعت تانى جيتلك  , علشان أحط 

أيدى فى أيدك !! تصور يا نور  الجن اللى معاك على الجن اللى معايا , أحنا ممكن نحكم العالم...

سندس قطعت كلامه و قالت : 


أنا مش مرتاحه للراجل ده ياسيدى !!! 


فقولتله : 


أهو لا جن ولا أنس طايقك فى الكهف !! 


وقلبت وشى وقولتله : 


أتفضل أطلع بره الكهف و أياك تعمل الحركه دى تانى وتدخل بيتى من غير أستئذان , أياك أصلا تنزل من فوق التبه وتقرب على الكهف , فاهم ؟!! 


قالى وهو متوتر : 


انت فاهم غلط والله ... انا مكنش قصدى أضايقك .. انا بس كنت عايز أبهرك علشان تصاحبنى !! أنما انا طبعا ماجيش جمبك حاجه !! أنا لسه بتعلم السحر ومحتاجك تبقى أستاذى !! 


هو انت مفكرنى عبيط يا شوشو !!! هصدق الكلمتين دول وأقولك تعالى فى حضن عمو نور !! 

أنا هعد لحد 3 لو لاقيتك قدامى هلعنك اللى باقى من عمرك أنت والجن اللى معاك , أطلع بره !! 


من غير ماتعد انا خلاص ماشى , بس المره دى أنت اللى أبتديت !! 


ومشى ناحية الباب  ونفد منه وهو مقفول !!

قولت




 لسندس بعصبيه : 


تانى مره لما أقولك تدخلى جوه , تسمعى الكلام على طول ... فاهمه !! 


هزت رأسها وجريت على المطبخ فى أخر الكهف... 


نصير ظهر وهو قاعد على المكتب وقالى وهو قلقان : 


لازم تتعلم السحر بسرعه يانينو , الواد ده ساحر مخضرم , ومعاه جن قوى جدا , ده غير المخلوقات اللى أقوى من الجن واللى أكيد ورثها هى كمان , ولو وصل لأزاى يستغلهم , لا أنت ولا أى ساحر على وجه الارض هيقدر عليه !! 


مانا بذاكر أهوه يانصه هقطع نفسى يعنى !!! , مش كفايه سايب مشروع الاختراع بتاعى وبدرس فى السحر !! 


يانور أبوس أيدك أفهم , انت لو ماتعلمتش السحر فى أسرع وقت وبقيت ساحر قوى كمان , الواد ده هيرجع وهينفخك , وساعتها مش هتعيش علشان تكمل مشروعك أصلا !!! 


فاهم والله يانصه ... بس برده صعبان عليا المشروع بتاعى يضيع كده !! 


قالى بنفاذ صبر : 


بالنسبه للمشروع ماتقلقش أنا عندى ليك مفاجأه هقولك عليها , بس لما تبقى ساحر مخضرم زى جدك !! 


قولتله بفضول : 


مفاجأه أيه !!؟ 


قالى : 


لما تبقى ساحر مخضرم زى جدك !!!!!! 


ضيقت عينى وقولتله : 


أوعى يانصه تكون بتخدعنى !! 


ورحمة جدك أبدا , بس أبوس أيدك , أنجز وأتعلم بسرعه علشان نلحق قبل الدنيا ماتخرب . 


حاضر يانصه , بس الموضوع صعب عليا جدا انا بقرأ بس مش فاهم حاجات كتير ولسه هحتاج وقت . 


سكت شويه و قعد يفكر وقالى : 


بس!!!  يبقى هنلجأ للتمرس !! 


قولتله  : 


تمرس !!! مش فاهم ؟!! 


قالى : 


لازم تمارس السحر كتير علشان تبقى ساحر قوى بسرعه , فعلشان كده هنزود اوردرات الشغل , فكك بقى من شغل أوردرين فى الاسبوع , أنت لازم تعملك على الاقل يجى خمسين أو ستين أوردر فى الاسبوع  !! 


قولتله : 


نعم !!! , ودول هجيبهم منين !!!؟ 


لا دول كتير اوى  و مبيخلصوش ،أحنا هنعمل خيمه فوق التبه اللى قدام الكهف ، ونعرف أهل القريه أنك هتستقبل الحالات الملبوسه والمسحوره وهتعالجها ببلاش،  وأنت هتلاقى الناس بتجيلك لوحدها ، وبكده هقدر أشرحلك عملى , أحسن ما أنت تايه فى الكتب . 


بالفعل عملنا الخيمه , وبعت سندس تعرف الستات اللى فى القريه أنى فاتح الخيمه طول اليوم لحد الساعه 12 بالليل  وبعالج من السحر واللبس ببلاش . 


معداش نص اليوم وفوجأت بناس كتير جايه على  الخيمه !!! 


وكلهم بيهتفوا : 


مدد ياسيدى ناير مدد!!! 


يالهوى كل دى ناس ملبوسه !! 


سندس نظمتهم فى طوابير ، ودخلت أنا الخيمه ولبست لبس جدى ومسكت سبحته  ,ومسكت ورقه وقلم علشان أكتب اللى نصير هيقولهولى , كمذاكرة عملى  !! 


نصير كان معايا فى الخيمه و شجعنى وقالى : 


لو ظبطت الدنيا هنا , الناس هتجيلك من كل القرى اللى حوالينا وهيذيع سيطك , وأى حد هيخاف منك لا أراديا , فاهم !! 


فاهم يانصه !!! 


أنا هبقى قاعد قدامك فى الخيمه فى الحته دى !! 


قالى : 


وشاور على ركن فى الخيمه وكمل كلامه وقال : 


أكتب  الحاله وتشخصيها وعلاجها . 


تمام يانصه !! 


وحضرت نفسى ومسكت الورقه والقلم وناديت على سندس علشان تدخل أول حاله. 


ودخلت أول حاله !! 


كان راجل فى متوسط العمر , أول مادخل الخيمه حاول يبوس أيدى , سحبت ايدى  وقولتله : 


أحكى مشكلتك من غير بوس أيادى ,  الطاعه لله فقط  . 


قعد على الكرسى اللى قدامى  وقال : 


أنا بقالى فتره مش مظبوط ياشيخنا , مبنامش تقريبا و لما بنام  بيجليلى كوابيس , وجسمى بيهمد وبيتعب أوى كل يوم حد وخميس !! وباقى الاسبوع ببقى مهمد برده ،بس مش زى يوم الحد والخميس ببقى مش قادر أتحرك من فوق السرير !! 


التجاره بتاعتى خسرت , وغالبية المواشى والدواجن اللى بربيها ماتت من غير سبب  , وبقيت مديون !! , ارجوك ياسيدنا توجدلى حل!! أصلى لفيت كتير ومحدش لاقيلى حل !!! 


قولت لنصير : 


أيه يانصه , الكلام على أيه !! 


قالى وهو فرحان : 


ثانيه  يانينو وأجيبلك قراره . 


أختفى نصير شويه  ورجع تانى بسرعه وقالى : 


معلهوش جن ومش ملبوس , ومحدش عامله عمل !!! 


قولتله : 


أمال ماله , اللى بيحصله ده من أيه !!؟ 


شبشبه !!!! 


قولته  بأستغراب : 


شبشبه  !!! يعنى أيه ؟!! 


ده سحر بدائى ومن أقدم وأسرع و أخطر أنواع السحر , علشان  مالوش حل ومحدش بيقدر يبطله غير اللى عمله !! 


قولتله وانا بكتب وراه : 


عباره عن أيه الشبشبه دى !!؟ 


بص ياسيدى ... الشبشبه دى  حاجه كانوا بيعملوها الستات زمان فى العصور القديمه , بيقعدوا وهما كاشفين شعرهم  ويمسكوا الشبشب ويقعدوا يخبطوا بيه بأيقاع زى الموسيقى وهما بيدعو على الغريم أو العدو  بكلام مسجوع زى الاغانى , و بيخاطبوا فى الاغانى بتاعتهم  نجم معين أو كوكب !!

زى مثلا  نجمه العشاء ونجمه الصباح والشمس والقمر , وفيه اللى بيخاطب الايام زى الحاله اللى قدامك دى . 


نصير سكت شويه وقال : 


الراجل دا أفترى على واحده بتربى يتامى وخد منها الجاموسه بتاعتها , فالست شبشبت عليه ، ودعت أنه ماينامش الليل ويعيا فى أيام الحد والخميس وتخسر تجارته وتنفجر مرارته ،

ومحدش هيقدر يشفيه أو يفك لعنته غير الست اللى ظلمها !! لازم الست تشبشب تانى بس علشان يخف ,  بس المره دى تشبشب بعكس الكلام وتسامحه , هى شبشبت عليه وقالت : 


أخدت لباسى وهمى وكاسى وحططتهم تحت رأسى 


لاترتاح ولاتغييب ولا يجيلك نوم  يا سامح يا أبن سعاد 


و كمل نصير باقى سجع الشبشبه ... وكتبته وراه 


قولت للراجل على كل اللى قالهولى نصير , وأعترف أنه أفترى على الست فقولتله يروحلها ويراضيها ويخليها تشبشب بعكس الكلام علشان تبطل السحر اللى عليه , واديته ورقه فيها كلام الشبشه اللى قالته الست، وقلتله لو مارحش بسرعة مرارته هتنفجر !! 


خرج من الخيمة جرى وهو بيقول : 


الله يباركلك ياشيخنا .. مدد ياسيدى ناير مدد !! 


دخلت بعده كام حاله كانوا كويسين ومفهمش حاجه , مرضى عاديين نصحتهم يروحوا للدكتور 


لحد مادخل علينا راجل أربعينى ,  من أول مادخل الخيمه  وعرفت انه مسحور ...من ريحته الوحشه !! 


حاول يبوس أيدى زى الباقيين بس أنا رفضت وقولتله زى ماقولت للى قبله.. "الطاعه لله وحده" 


قعد قدامى وقال : 


انا مش من بلدكم ياشيخ ناير أنا من قريه جمبكم وكنت بالصدفه هنا وعرفت أنك بتعالج و.... 


قولتله بنفاذ صبر  : 


أنجز الخيمه مقفوله والريحه هتموتنى !!! 


لامؤاخذه ياشيخنا ,أدي أنت شامم ريحتى عامله أزاى !! ده غير أنى مبنمش وبحلم أنى باكل لا مؤاخذه روث الحيوانات , المشكله أنى نفسى رايحه ليها على أنها أكل !!! 


قولت فى بالى : 


الله يقرفك !! 


بصيت على نصير اللى قاعد فى الركن , فلاقيته أختفى من غير ما أسئله  ورجع تانى  . 


مراته عملاله سحر جلب !!! 


قولتله وأنا بحضر القلم والكراسه  : 


وضح يانصه !! عملاله سحر أزاى !!؟ 


قالى : 


كانت بتأكله لما يرجع من الشغل وبعد مايخلص أكل , بتجيبله يغسل ايديه وبوقه , والميه اللى غسل بيها  كانت بتخبيها  وتجيب جير من اللى بيبيضوا بيه الحيطان وتكب عليه الميه 


وهى بتقول : 


أطفيت يدك وفمك  مثل ما طفى هذا الجير!! 


وبعدين خدت حبه صغيره  من الجير  على أد قبضة أيديها وبيضت بيه جدار في البيت  . 


هى كان قصدها تخليه يبطل يضربها و تعلقه بيها ، بس اللى متعرفوش الهانم أنها نسيت حبة حاجات , فجوزها أتلمس واتلبس , أنا خلصت من عندى ,  بس قوله على حبة النصايح دى . 


قولت للراجل زى ماقالى نصير , بس ماقولتلوش أن مراته هى اللى عملاله العمل , ممكن يروح يقتلها... 


نصحته يعامل مراته كويس ،و قولتله يجى الاسبوع اللى جاى ومعاه مراته , علشان أقولها بينى وبينها ماتعملش كده تانى , و أهددها انى هقول لجوزها المره اللى جايه  لو الحركه دى أتكررت , شكرنى ووعدنى يجى الاسبوع اللى جاى ومعاه مراته وطبعا عمل هوليله وهو طالع من الخيمه , وفضل يدعيلى لحد ماخرج بره البلد . 


وفضلت على كده كام يوم أستقبل الناس فى الخيمه. 


أغلبية الحالات كانت كويسه ومفيهاش حاجه ،حالات قليله للى بيبقوا مسحورين أو ملبوسين . 


نصير علمنى فى فتره صغيره , أزاى افك المربوط وأعالج الملبوس  , وأحضر التركيبات العلاجيه ,و الاعشاب الطبيعيه  , وبأمر الله قدرنا نشفى كل الى دخل الخيمه وكان عنده عله ... 


لحد مادخل عليا الخيمه شخص غريب , لابس  اسود  فى أسود و مخبى رأسه بزعبوط 


أول مادخل الخيمه ,نصير قالى : 


مش هتصدق مين فى الخيمه ؟!!!


سمعت صوتها وهى بتضحك و بتقول : 


سيربريس ( مفاجأه) !!!!! 


نيللى !!!!!!!!!! 


أتمسمرت فى مكانى وفضلت متنح فيها وقولت لنفسى : 


نيللى !!! رجعت أزاى !! ؟ 


بصت على منظرى وانا مصدوم وفضلت تضحك عليا !!!


سمعت صوت نصير بيقولى : 


الموضوع مريب يانور , ماتخليهاش تستفزك , خليك هادى , وأقفل بوقك علشان ناسيه مفتوح من أول ما شوفتها 


نيللى ضحكت وقالت : 


أيه كنت مفكرنى هفضل قرده طول عمرى ؟!!! 


قولتلها وانا مبتسم : 


نيللى القرده !! حمد الله على السلامه . 


وشها قلب وقالت : 


أنا جيتلك مخصوص علشان أعرفك أنى رجعت, وانى مش ناسيه تارى , من الاخر أنا جايه أقولك أذا كنت ساحر قوى فيه اللى أقوى منك وبكتير أوى , أنا هسحقك يانور , هدوس على رأسك برجلى زى الصرصار !! 


ضحكت وقولتلها : 


أنتى ناسيه يانيللى أنى معلم عليكى مرتين !! وانى ممكن أسخطك قرد تانى ودلوقتى حالا.. 


قالتلى بتحدى : 


طيب جرب كده تسخطنى تانى .. جرب !! 


قولتلها : 


لالا مش هسخطك , عارفه ليه !!؟ علشان شكلك وأنتى قرده كان أحلى !! 


قالت بغيظ : 


طيب كويس أنك بتحب القرود علشان المره اللى جايه , أنا اللى هسخطك أنت والبتاعه مراتك قرود 

لآ لآ لآ ... أنا هسخطك قرد وأسخطها حربايه علشان ماتخلفوش من بعض !! 


دخلت فى هستيرية ضحك وقولتلها : 


ياااه ده أنتى خيالك واسع أوى يانيللى !!! 







قالتلى وهى بتدينى ضهرها وبتمشى من الخيمه : 


هتشوف يانور ... هتشوف !!! 


وخرجت بره الخيمه ... 


طلعت بصيت عليها لاقيتها أختفت !!! 


دخلت الخيمه وقولت لنصير وانا مذهول : 


أيه اللى حصل يانصير ؟!وأزاى نيللى رجعت لشكلها تانى  من غير القميص؟!! 


قالى وهو قلقان : 


مش عارف يانينو ، تقريبا سحر أسود  و من النوع الخطير جدا  ومش أى حد يقدر يعمله , واللى  عمله أكيد ساحر قوى !! 


قولتله : 


هى ناقصه !! ... مين دا كمان ؟!! ورجعها أزاى بالضبط ؟!! 


قالى : 


لسه معرفتش بس الموضوع مقلقنى أكتر منك ,  أقفل الخيمه النهارده  وانا هلف لفه علشان أعرف أيه اللى حصل , وهبقى أرجعلك أخر النهار على الكهف. 


طلعت بره الخيمه وقولت للناس اللى واقفه طوابير : 


أنا أسف ياجماعه , بس النهارده مفيش كشف علشان ظروف طارئه , تعالوا بكره أن شاء الله تكون فرجت . 


أنفضوا من قدام الخيمه ومشيوا وهما بيبرطموا وزعلانين .. 


خدت سندس ورجعنا الكهف .. 


سندس سألتنى : 


أيه ياسيدى اللى حصل !!؟ مشيت الناس ليه ؟!! 


مفيش ياسندس صدعت شويه .. 


بصتلى بمكر وقالت : 


صدعت !! هو الراجل  اللى كان مغطى وشه ضايقك ولا حاجه ؟!! 


قولتلها بعصبيه : 


فكك منى ياسندس , أنا مش فايقلك , أسكتى خالص النهارده ماسمعش صوتك . 


حطت أيدها على بوقها وهزت راسها !! 


وصلنا  الكهف , سندس دخلت وقعدت على الكنبه وشغلت التليفزيون  ،سيبتها وروحت مددت على السرير , وقعدت أفكر فى اللى حصل وفى نيللى .. 


ياترى رجعت أزاى من غير القميص!!!؟  


دماغى كانت هتتفرتك من كتر التفكير ونصير أتأخر أوى , قالى أنه هيرجع أخر النهار وأحنا دلوقتى داخلين على نص الليل , بصيت على سندس اللى نايمه على الكنبه وسايبه التفزيون مفتوح ! 


شيلتها بالراحه  ونيمتها على السرير وغطيتها . 


ورجعت تانى علشان أقفل التلفزيون  ... 


سمعت صوت نصير بيقول فى ودنى  : 


بيعجبنى فيك حنيتك !!! 


قولتله وانا ملهوف : 


نصير !!! أيه اللى أخرك كده !! 


ظهر وهو قاعد على الكنبه قدام التليفزيون  ومد أيده ومسك الريموت ،قالى  من غير مايبصلى : 


أتسحلت لحد ماعرفت أجيب قرارهم !! 


قولتله بفضول   : 


ها عرفت أيه !!؟ 


بص ياسيدى ....ماتيجى نشوف أحسن !!؟ 


مديت أيدى وغمضت عينى وقولتله : 


يله هات أيدك , وأنقلنى بالاعصار زى المره اللى فاتت ! 


قالى وهو بيقلب فى قنوات التليفزيون  : 


لا لا , مش ناقصه عفره , تعالا أقعد جنبى على الكنبه!! 


روحت قعدت جنبه على الكنبه  , فضل يقلب فى قنوات التليفزيون ,وقالى وهو مبتسم : 


متعرفش  تردد قناة الجن اليوم على النايل سات؟ !!! 


بصتله بأستغراب فقالى من غير ما يبصلى : 


بص يانينو على التلفزيون ,وركز !! 


ركزت فى الشاشه !! 


نصير كان  بيقلب فى القنوات بسرعه جدا لحد ماوقف!! 


  فضلت مركز فى الشاشه , فشوفت نفسى أنا وسندس فى  اليوم اللى هجموا فيه على الكهف , شوفت فى التلفزيون  كل اللى حصل . 


لحد لما ظهر معتز باشا والبلطجيه والسحره جريوا , وفضلت نيللى القرد وأبوها وجثة أبو طارق . 


بعدها هجمت العاصفه الترابيه وغطت الكهف وأختفت نيللى وأبوها وجثة عمها !! 


شوفت العاصفه الترابيه وهيا بتنقلهم بره القريه وبترميهم  فى حته فى الصحرا. 


كانوا مندهشين من اللى حصل , وبيتلفتوا حواليهم , لحد ماظهر قدامهم  الساحر اللى نقلهم .... 


شهاب خزاعى  !!!!!!!!!! 


أول ماظهر ، نيللى القرد أتشعلقت فوق كتف أبوها وقالتله وهى مرعوبه : 


أنت مين !!؟ وعايز مننا أيه !!؟ 


ضحك وقال : 


المفروض تشكرينى الاول , لولا أنى تدخلت كان زمانكم تحت رحمة  نور . 


أبوها قاله : 







أيوه  أنت مين يعنى !!؟ وجبتنا هنا أزاى !!؟ 


قاله : 


أعرفك بنفسى ياباشا  أنا شهاب خزاعى  ،ساحر  ، وعدوى اللدود هو عدوكم , نور ناير . 


وزى ما بيقولوا عدو عدوى  ..صديقى .. 


أبو نيللى قاله : 


وأيه يضمنلى انك عدوه ؟!! مش ممكن تكون حد تبعه أو تكون هو وبتتلاعب بينا !! 


شهاب قالهم : 


براحتكم لو مش عايزين تصدقونى ... انا عملت معاكم حركة جدعنه علشان بكره سلسال أهله كلهم , جده قتل جدى , يعنى فيه تار بينى وبينه ،وهاخده فى يوم من الايام , على العموم أنتوا فى الصحرا الغربيه , وفيه قريه على بعد 20 كيلو متر مشى فى الصحرا , أستأذن انا بقى !!! 


أبو نيللى قاله بلهفه : 


أستنى يا... 


رجع وقاله : 


شهاب ياسعادة الباشا . 


أبو نيللى بص بغيظ  وحزن على جثة أخوه  وقال  لشهاب : 


تقدر تنقلنا كلنا  الفيلا بتاعتى !! 


انا أقدر أعمل حاجات كتير , أقدر أشفى بنتك وأقدر أنتقم من نور وأجيبلك رأسه على عصايا خشب, بس كله بحسابه . 


نيللى بصت لباباها ولشهاب وهى مش مصدقه وبتنطط من الفرحه ونسيت عمها الميت . 


أبو نيللى عاتبها بعينه , فبطلت تتنطط  , ووطت رأسها  بخضوع فى الارض . 


و بص لشهاب وقاله : 


رجعنى بيتى الاول وخلينى  أدفن أخويا , وكل اللى هتطلبه هيجيلك !!

شهاب قالهم.. 

غمضوا عينيكم !!! 


جات عاصفه رمليه وخدتهم على فيلا ابو نيللى , 


وصلوا الفيلا و هدومهم كلها رمل  ومعاهم جثة أبو طارق . 


أم نيللى أندهشت لما  فجأه ظهروا قدامها فى الفيلا ، 


و صوتت أول ماعنيها وقعت على جثة أبو طارق !!! 


بعدها أشتغل الصويت فى الفيلا كلها ... 


عملوا العزاء وحضره معاهم شهاب . 


بعد مالعزاء خلص أتجمعوا  كلهم فى أوضه واحده 

أبو نيللى و القرد وأمها , ومعاهم شهاب 


شهاب قالهم : 


أنا أقدر أرجع بنتكم , بس بشروط .. 


شروط أيه ؟!! 


شهاب قاله : 


شروط للجن اللى هيفك اللعنه ودول هيبقوا قبل فك اللعنه ، وشروط ليا أنا ودول هقولهم بس بعد ماتتفك اللعنه وبنتك ترجع  بنى أدمه تانى . 


نيللى القرد قالتله بلهفه : 


أى شروط أحنا موافقين عليها  أهم حاجه أرجع بنى أدمه تانى !! 


شهاب ضحك وقال : 


أهدى بس يانيللى هانم الموضوع مش سهل وهياخد وقت , والجن اللى هيفك اللعنه جن قوى  وطلباته صعبه حبتين !!  


قالتله بفضول : 


أيه الطلبات !!؟  قول ؟!! 


قال : 


الطلب الاول حاجه من أطر نور , شراب مثلا أو فوطه أستخدمها  وفيها عرقه , أن شا لله حتى غباره (تراب على هدومه او جزمته). 


نيللى فضلت تلف فى الاوضه وهى  بتفكر ... 


شويه و أتنططت من الفرحه وهى بتقول : 


أنا عندى حاجه من أطره !! 








وطلعت جرى على أوضتها ورجعت بعلبه مجوهرات  صغيره و فتحت العلبه وهى بتقول لشهاب : 


ده خاتم الماظ كان جايبهولى الكلب ،  ايام ماكان بيموت فى التراب اللى بمشى عليه !!! ينفع ده !!؟ 


بص على الخاتم وقالها : 


ينفع يا ست الكل . 


حط  الخاتم فى جيبه وقال ثانى طلب  هيبقى علي أنا ، هو هيبقى أصعب طلب ، بس مش مشكله ، هقوم بيه لوحدى 


بس هاتوا انتوا الطلب التالت والاخير !! 


لسه نيللى هتسأله على الطلب الاخير أبوها سبقها وقال لشهاب : 


وأيه الطلب الأخير!!؟ 


أضحيه !!؟ 


خروف أو عجل يعنى .. مفيش مشكله .. 


ضحك شهاب بصوت عالى وقاله : 


خرووف !! .. بقولك ياباشا جن قوى , هيطلب خروف ولا عجل!!! 


الاضحيه بنت ماتكونش بلغت الحلم , سنها مايعديش ال12 سنه !!!! 


الصمت عم المكان وكلهم فضلوا متنحين وبيبصوا لبعض ... 


نيللى القرد بصت على أبوها وامها وقالتلهم : 


أيه !!! ساكتين ليه !!؟  هتسيبونى قرده ؟ !!! 


أم نيللى مردتش عليها وفضلت تعيط !! 


أبو نيللى كان مصدوم والكلمات تاهت منه ..

شهاب قالهم : 


خلاص ياجماعه , لو مش عايزين ... 


نيللى قطعت كلامه وقالتله : 


بكره هيكون عندك الاضحيه !!! 


أبو نيللى قالها بأستغراب : 


أيه يانيللى !!؟ هتجيبى عيله صغيره منين !!؟ وبعدين هتدبحى عيله صغيره يانيللى !!! 


قالتله بعصبيه : 


أها هدبح عيله صغيره , ولو طلب منى أبيع روحى للشيطان هعملها !! 

أهم حاجه أرجع بنى أدمه تانى , ومتقلقش أذا كان على العيله الصغيره فهى موجوده وهنا فى الفيلا !! 


أبوها وامها بصولها بأستغراب وسكتوا و هما بيفكروا شويه  

و أمها قالت وهى بتلطم على وشها : 


أوعى يكون قصدك زينة بنت الخدامه ؟!! 


قالتلها  : 


أها , زينة بنت الخدامه !! 


أبوها قالها : 


حرام عليكى يانيللى , البنت وحيدة أمها  !! 


شهاب الساحر قال : 


عز الطلب , أنا كنت لسه هقولكم لازم تبقى وحيده أمها وأبوها ومالهاش أخوات . 






نيللى قالتلهم : 


شوفتوا !! ده قدرها أنها تبقى أضحيه ليا , وبعدين مش زينة دى أتربت فى الفيلا بتاعتنا وكلت وكبرت من أكلنا !!! , أعتبروها خروف !!! وأبقوا عوضوا أمها بحبة فلوس !!!! 


أم نيللى قالتلها : 


أزاى يعنى يانيللى!!! هنقولها هاتى بنتك ندبحها وخدى بدالها فلوس؟ !!! 


قالت : 


لا طبعا أحنا هنخطف البت و نبين أنها تاهت , ونبقى نعوض أمها  كاحسان أو كأنها صعبت علينا فعوضناها . 


لازم تقفوا معايا وتساعدونى أرجع بنى أدمه تانى ... 


ولا هتختاروا بنت الخدامه وتسيبوا بنتكم ملعونه اللى باقى من عمرها !!! 


أبوها وامها سكتوا وماردوش عليها .. 


فشهاب قال : 


طيب أنا هعتبر السكوت علامة الرضا والموافقه , وهروح أتصرف فى الطلب التانى على ما تخطفوا البنت و تأخدوها على حته مقطوعه علشان نفك فيها اللعنه , حته فى وسط الصحرا مثلا ومايكونش جمبها عمار ..... 


المشهد فى التلفزيون اتغير وظهر شهاب خزاعى فى الكهف بتاعى  وحط أيده على كتفى وانا مختفى بالقميص وكان عايز يسلم عليا بس انا  رفضت !!! 


بعدها المشهد أتغير تانى , وشوفت أبو نيللى والقرد وشهاب وهما متجمعين فى  مكان مهجور , تقريبا مخزن !! 


شوفت أبو نيللى  ماسك بطانيه وواقف على أطراف دايره مرسومه على الارض ومرسوم جواها نجمة . 


وشوفت نيللى ( القرد)  قاعده جوه الدايره . 


قدام نيللى بالضبط  وفى نفس الدايره ,زينة  بنت الخدامه واللى نايمه على الارض متكتفه بالحبال و بوقها متكمم , بتحاول تصرخ ودموعها كانت مغطيه عينيها . 


قرب شهاب وفى أيده سكينه و طبق نحاس منقوش عليه من جوا باللغه السيريانيه  ... 


حط الطبق النحاس تحت رقبة زينه وطلع السكينه وتمتم بكلمات مش مفهمومه وهو بيشد رأس زينه  لورا و بيعدى السكينه على رقبتها وبيدبحها !! 


بعدت وشى عن شاشة التلفزيون علشان ماشوفش المنظر المفجع ده !!! 


شويه ورجعت بصيت على الشاشه تانى , لاقيته مسيح الخاتم و بيحط السائل بتاعه فى الطبق النحاس اللى فيه دم زينه ، 


وحط حاجه كمان مكانتش واضحه !!!!!!! 


شال الطبق , و فضل يتمتم بكلمات مش مفهومه

..

بصيت لنصير وقولته : 


هو حط أيه فى الآخر  ؟!! 


فتله خيط من القميص  !!! 


قولته : 


أزاى !!؟ 


نصير قالى : 


حط أيده على كتفك أول مادخل الكهف !!! لما كنت مختفى وبتقرأ فى الكتب ونتش فتله خيط من القميص 


الواد دا مش سهل , وركز بقى علشان التقيل لسه مجاش . 


بصيت على شاشة التلفزيون تانى . 


لاقيته لسه شايل  الطبق  وبيتمم بكلمات مش مفهومه , وقرب على نيللى القرد اللى فى الدايره ،وكب على جسمها الخليط اللى فى الطبق النحاس !!! 


فجأه حصلت هزه فى المكان اللى كانوا فيه , 

وشوفت نيللى القرد وهيا بتصرخ وبتتلوى على الارض , 


عضمها كان  بيطلع صوت طقطقه كانه  بيتكسر ووشها بدأ  يرجع ليه ملامح البنى أدمين واحده واحده , جسمها فضل يكبر لحد مابقت فى جسم البنى أدم بس كانت متغطيه كلها بشعر القرد . 


شويه وبدأ شعر القرد يقع وملامح نيللى تبان .. 


كانت عريانه و متكومه على الارض  وبتترعش , أبوها جرى عليها وغطاها بالبطانيه وهو بيشكر شهاب وبيقوله :

أنا هكافئك مكافئه كبيره أوى !! 


شهاب ضحك بصوت عالى وقاله : 


لا ياباشا , زى ماقولتلك انا ليا شروط زى الجن  !!! هما شرطين؟! 


قاله : 


أيه الشرطين ؟ 


شهاب قاله : 


الشرط الاول أنك تاخد تارك !!؟ 


أبونيللى بصله بأستغراب وقاله : 


مش فاهم !!؟ 


قاله : 


تقتل معتز باشا !! 


أبونيللى قال : 


معتز باشا مين ؟!! 


قاله شهاب : 


الراجل اللى هددكم فى الميكرفون فى اليوم  اللى هجمتوا فيه على الكهف وعلم عليكم  وقتل أخوك , ولا مش هتاخد بتار أخوك؟ !! 


أبونيللى قاله بغضب : 


لا طبعا هاخد بتار أخويا , بس ده هقتله أزاى !! باين عليه واصل أوى , وانت عارف الناس اللى زى دى لما بتتقتل الدنيا بتتقلب على اللى قتله !! 


وسكت شويه وقال : 


وبعدين مش شايفها حاجه غريبه , أن يكون شرطك أنى أخد بتارى ؟!! 


شهاب ضحك وقال : 


زى ماقولتلك عدو عدوى صديقى . 


ومعتز باشا عقبه كبيره جدا قدامى , وانت شوفته بنفسك بيحمى نور أزاى !! 


على فكره انا كنت حاضر من قبل الحرب ماتبدأ. 


الجن بتوعى رصدوا الجيش الخايب اللى كنتوا جايبينه وهو رايح على الكهف,  وشوفت كل اللى حصل , وعرفت ان نور معاه جن قوى جدا بس هو ساحر ضعيف جدا , معملش حتى تعزيمة حمايه على الجن بتوعه فى الحرب. 


أنا أقدر أسحق نور بس مشكلتى فى اللى قتل أخوك وبيحميه , معتز باشا . 


أبو نيللى قاله : 


طيب ماتعمل أنت أى سحر وتقتله !! 


شهاب رد وقال : 


انا أقدر أقتله بالسحر بس لازم أقرب منه وألمسه ، ومعتز عارفنى كويس وعارف تاريخ عيلتى ومستحيل هيخلينى أقرب منه ولو شافنى قدامه هيسجنى من غير تهمه. 


أنا بس محتاج منك تشوفلنا حد يكون قريب منه , ومعتز بيثق فيه وبيسلم عليه , وانا هموته موته يبان أنها قضاء وقدر , شوفت سهله أزاى !!؟ 


طيب بذمتك فى أسهل من شروطى , لا وكمان فيها مصلحه ليك !! 


وأنا هجيب الحد دا  منين !! 

شهاب قاله بنفاذ صبر وعصبيه : 


أتصرف أنت بقى , شوف أى حد شغال معاه , وأديله مبلغ كبير فى مقابل أنه يسلم عليه او يلمسه !! 


أبو نيللى خاف ورجع لورا لما شاف شهاب وهو متعصب , فى نفس الوقت اللى كانت بتفوق فيه نيللى المتغطيه بالبطانيه جمبهم. 


أبونيللى جرى عليها وحضنها وقالها : 


نيللى !! أنتى كويسه ؟!! 


قالتله بصوت ضعيف : 


أها أنا كويسه , أنا رجعت بنى أدمه تانى صح !!؟ 


أبوها عيط وقالها : 


أيوه يانيللى رجعتى بنى أدمه تانى !! 


بصت على شهاب وقالتله : 


أنا مش عارفه أقولك أيه , أنت أنقذتنى وانا عمرى ماهنسالك اللى عملته معايا . 


وبصت لابوها وقالتله : 


أديله يابابا كل الفلوس اللى عايزها . 


شهاب قالها : 


لا ياهانم انا زى نور فى الحته دى مابخدش فلوس فى الخير !!! , حضرى نفسك للفرح ياعروسه علشان فرحتنا تكمل . 


أبو نيللى قاله : 


فرح !!!

شهاب قاله : 


أها ماهو الشرط التانى أنى أتجوز صاحبة  الصون والعفاف بنتك نيللى. 


قبل ما أبوها يتصدم , نيللى قالت بحماس : 


موافقه !!! 


أبو نيللى بصلها بأستغراب فقالتله : 


أيوه يابابا , أنت ناسى أنى مطلوبه فى جريمة قتل , وغير الكلب نور اللى لو عرف أنى رجعت مش هيسكت , مين هيحمينى من كل ده . 


وبصت لشهاب وقالتله : 


أنا موافقه ومقتنعه انى مش هحس بالامان غير معاك . 


وأبتسمت وهى بتقول : 


أنت منقذى ياشهاب !!! 


شهاب بعت بوسه فى الهوا لنيللى !!!, وبص لأبو نيللى و فتح دراعاته اللى متعاصه بدم زينه وقاله : 


يبقى نقرأ الفاتحه ياباشا على الكلمتين الحلوين اللى قالتهم نيللى حبيبتى .. 


البث وقف والتليفزيون رجع تانى على قناة أخبار , قولت لنصير : 


وقفت ليه يانصير , عايز أعرف باقى اللى حصل . 


قالى : 


ده اللى قدرت أعرفه و أجيبه , زى ماقولتلك الواد ده مش سهل وبيعذب قرينه ودى المعلومات اللى عرفت اجيبها من قرينه . 


قولتله وانا ملهوف : 


الكلام ده حصل من امتى يانصير !!؟ 


قالى : 


فى نفس اليوم اللى جالك فيه فى الكهف قبل مانبدأ شغل فى الخيمه !! 


قولتله : 


يعنى من حوالى شهرين !! 


قومت من مكانى وجريت على باب الكهف 

نصير قالى : 


رايح فين يانينو ؟! 


قولتله: 


رايح لمعتز باشا ,لازم احذره.


أهدى يانينو , مش عايزين نبقى متسرعين , لازم نقعد نفكر !! 


قولتله : 


نفكر فى أيه يانصير !! معتز باشا لازم يعرف كل اللى حصل !! 


نصير قالى : 


مينفعش يا نينو لو حذرته وخذ احتياطاته احتمال كبير اوى شهاب يعرف اننا عرفنا خطته !!! 


قولتله بعصبيه : 


انت بتقول ايه يا نصير عايزنى اسيبهم يموتوا الراجل، دا جزاته انه وقف فى ظهرى وحمانى، لا طبعا لازم احذره !! 


وكملت طريقى ناحية فيلا معتز باشا. 


نصير قالى : 


افهم يانينو متبقاش متهور ,انت الحظ ماشى فى صفك لحد دلوقتى احنا مكناش هنعرف اى حاجة لولا الحركة الغبيه اللى عملتها نيللى , لما جاتلك الخيمه عشان تغيظك , أهدى وبلاش غباوه وتهور !!! 


تهور !! أفهم أنت يانصير , أنا مش هسيب الراجل ده يموت ولو هفديه بروحى . 


وصلت عند فيلا معتز باشا وحكيتله على كل حاجه وحذرته من انه يسلم على أى حد الفتره اللى جايه مهما كان هو مين !! حتى لو أنا !! 


معتز قالى : 


وعلى أيه اللفه دى كلها !! 


ورفع سماعة التليفون وكلم حد أسمه أبراهيم  وقاله على أساميهم , شهاب ونيللى وأبوها , وقاله : 


ساعه واحده يابراهيم والعيال دى تبقى فى الحجز . 


وبصلى وأبتسم وقال : 


ماتقلقش عليا يا نور , مش شوية عيال زى دى هى اللى هتهتنى على أخر الزمن , يانور أنا أتعاملت مع عصابات ومافيا أجنبيه، مش عيل ساحر و قرده وابوها . 


عدت أقل من ساعه وانا قاعد مع معتز باشا فى الفيلا لحد التليفون ما رن . رفع سماعة التليفون ووشه أتغير , قفل سماعة التليفون وقالى : 


بعت قوه علشان تقبض عليهم , كانوا كلهم فى فيلا أبو نيللى وأختفوا من وسطهم !! 


سمعت صوت نصير بيقولى : 


ألبس !!! , ضيعت علينا فرصه عمرنا ,أهم دلوقتى عرفوا أنك عرفت خطتهم !! 


شهاب ونيللى وأبوها وأمها أختفوا  تماما و البوليس ماقدرش يوصلهم !!! 


الدنيا هديت كام يوم , ورجعت أشتغل تانى فى الخيمه ،بس رجعت أشتغل أكتر  و كل يوم  بعد ماأخلص شغل فى الخيمه كنت أرجع الكهف و أقرا فى كتب السحر بتاعة جدى 


نصير كان معايا بيدينى كورس مكثف وعرفنى أزاى أحميهم وقت الحروب بالتعزيمات , وأزاى أساعدهم فى الحرب , وأعزم على الاسلحه بتاعتهم , علشان تبقى أقوى 


عرفنى على الاحجار الروحانية وطاقة كل حجر وقدراته ، و أزاى بيستغلها السحره فى السحر ! 


غير الناس العاديه اللى بتشتريها بمبالغ كبيرة عشان طاقتها الروحانيه ،بيستخدموها بغرض الحمايه والشفاء من الأمراض  وجلب الرزق !! 


زي حجر عين النمر واللي بيقوي العظام وينشط الجسم والعقل . 


وحجر الياقوت الاصفر اللي بيطرد الكوابيس ويعتبر علاج للناس اللي بيمشوا وهما نايمين !!! 


وحجر القمر اللي بيصرف الوسواس و بيحمى الست فى فترة الحمل والولادة ، والاميتسيت و خرزة الحيه وغيره ...

ومن أهم الاحجار دى.. 


حجر عرق السواحل !! 


الحجر دا  بيصنع هيبه للى شايله وبيخلى أى حد  ينصاع ليه    وينفذ كل طلباته، ولما بيتعمل عليه تعزيمات معينه بيدى قدرات خارقه للى شايله!!!! 


ودا الحجر  اللى أستخدمه شهاب علشان يعرف يدخل الكهف بتاعى وينفد من الباب وهو مقفول !! 


لازم يكون معاك حجر زى ده يانينو , الحجر ده مهم جدا!! 


وده بيتجاب منين !!؟ 


هو المفروض تستخرجه بنفسك , بس الكلام ده هياخد وقت , فهقولك على حد تروح تشتريه منه مؤقتا  , بس لازم يكون عندك الحيوان اللى بنستخرجه منه وتربيه فى الكهف . 


قولتله : 


حيوان أيه !!؟ 


قالى :

حيوان أسمه أم قرفه أو بنغول!!! 


قولتله بأستغراب : 


أم قرفه أزاى  ؟ !! 


حيوان شبه القنفد , فيه ناس بتسميه قنفد مائى !! أزاى متعرفهوش ؟!!! ده  من أكتر الحيوانات اللى بيتم تهريبها و الاتجار بيها  على مستوى العالم !! 


وده هربيه أزاى لامؤاخذه !!؟ 


قالى : 


لا ده تربيته سهله خالص , أهدى من القطط وحجمه صغير وبياكل النمل والحشرات , يعنى هينضفلك الكهف كمان . 


وهستخرج منه العرق ازاى!!؟ 


أحنا هنجيب ذكر وأنثى , ونستنى فترة الربيع , دى فترة التزاوج بتاعتهم. 


بعد ما أنثى الحيوان بتولد , الذكر بيقفل عليها العش بحجر , علشان يحميها ويحمى عياله   وبيروح يجيب أكل... 


ولما بيرجع عند العش تانى  بيطلع حاجه من بوقه ويرميها  على الحجر اللى سد بيه العش, فالحجر بيتكسر ويتفتت !! , الحاجه اللى رماها من بوقه  دى بقى هى عرق السواحل!!! 


بعد مابيكسر بيه الحجر بيتبول الحيوان على العرق ,علشان يبطل المفعول !! 


المفروض نلقط العرق قبل الحيوان مايتبول عليه 

بعدها نختبر فعاليه العرق , وهل شغال ولا لآ.. 


بنغلي الميه وعند الغليان بنمرر عرق السواحل من فوق الميه المغليه ، من غير ما العرق يلمس الميه , علشان لو لمسها هيفسد ويموت !!! 


لو  الميه وقفت غليان لحظة مرور العرق فوقها كده يبقى العرق شغال , وينفع نعمل عليه التعزيمات اللى تحميك  وما تخليش أى ساحر يقدر يسحرك , حاجه تحميك شخصيا من السحر  !!؟ 


نصير عرفنى أجيب العرق مؤقتا منين , وفجأنى وجابلى هو الحيوانين وسميت واحد اللى هو الذكر أبو قرفه والانثى أم قرفه عادى !!! 


بقى معايا حاجه تحمينى فى حالة لو شهاب  خزاعى حاول يسحرنى. 


قطعت شوط كبير فى السحر فى فترة صغيره جدا ونصير بدأ ينبهر بيا وقالى : 


حاسس أنى شايف ناير جديد !!

لحد ماجه اليوم اللى أتقلبت فيه الدنيا كلها , ومبقتش عارف ألاحقها منين ولا منين !! 


كنت كالعاده فى الخيمه  وكنا في أخر اليوم، دخلت عليا ست شايله بنت صغيرة فى ايديها  و دخلت معاها سندس وقالتلى: 


دى اخر واحده يا سيدى.. 


الست حاولت تبوس أيدى بعدتها وقلتلها تقول علتها.. 


قالتلى: 


جوزى مات  ياسيدى وانا حامل فى بنتى اللى شايلاها على أيدى دى. 


بعد ما مات مكنش عندى اى دخل أصرف منه ولا فلوس أدفع إيجار البيت. 


ولاد الحلال دلونى على قريه  اسمها  " السماحة" 


القرية دى الحكومة مخصصاها للستات الأرامل والمطلقات اللى بيعيلوا أطفال  و ممنوع اى راجل يدخلها... 


  بيدوا كل ست بيت وخمس فدادين ارض عشان يزرعوها ويربوا فيها بهايم وفراخ ويبقى ليهم مصدر رزق !! 


قلتلها بأستغراب : 


معقول فيه حاجة كدا!! 


قالتلى: 


اها يا سيدى  والله ,  ولو واحدة من الستات اللي عايشين فى القريه اتجوزت الحكومة بتمشيها وتاخد منها البيت والأرض بيعتبروا ان خلاص بقى ليها دخل تانى اللى هو جوزها. 


قلتلها : 


طب والست اللي عندها ولاد كبار بيعملوا معاهم ايه!!؟ 


الست قالتلى: 


مفيش ولاد كبار , الاولاد لما بتكبر بتخرج بره القريه والبنات بيفضلوا لحد مايتجوزوا وأول مايتجوزوا بيطلعوهم بره القريه !!! 


قولتلها : 


المهم , كملى , ماقولتيش علتك لحد دلوقتى ! 


الست قالتلى: 


لامواخذه ياسيدى لو طولت عليك !! 


قولتلها :

كملى شكلك رغايه !! 


قالت : 


من ساعة ما رحت البيت اللي فى القريه وابنى البكرى بتحصله حاجات غريبه. 


كان فى الاول مسهم وعلى طول سرحان, قولت يمكن علشان غيرنا المكان ولا حاجه , لحد ماصحيت فى يوم على صراخه فى نص الليل , جريت على أوضته لاقيته واقع من على السرير وماسك ضهره وبيتلوى من الالم , حاولت أقومه وأقعده على السرير ,  ماقدرش يقف على رجله ومن ساعتها و هو على كرسى متحرك. 


خدته ولفيت بيه على الدكاتره , عملوا عليه أشاعه و كلهم قالولى أنه كويس مفيهوش حاجه !! 


الموضوع كبر أكتر ياشيخنا , والواد مابقاش فاكر أسمه وكل أما أناديله بأسمه يقولى : 


أنا أسمى وفاء وعايزه اللعبه بتاعتى !!! 


وكل مانحاول نخرجه من البيت علشان يلعب مع العيال الصغيره يمكن يرجع لطبيعته , يصرخ بصوت عالى ويقول انا وفاء وعايز اللعبة بتاعتى !!  ومبقناش عارفين نخرجه بره البيت 


همست لنصير وقلتله : 


ايه رايك  فى الكلام !!؟ 


قالي : 


مش هقدر أشخص الا لما يبقى قدامى. 


قلتلها:

  

أن شاء الله خير , انا هاجى معاكى اشوفه... هى القريه قريبه من هنا ؟!!

قالت.. 

هناخد فلوكه او معديه تعدينا البر التاني وبعد كدا مواصلتين لحد القريه

بس هتيجى ازاى يا سيدنا والرجالة ممنوع يدخلوا!!! 


قولتلها : 


متقلقيش محدش هيشوفنى وانا داخل . 


ناديت على سندس وقولتها : 


خليكى معاها هنا هروح اجيب حاجة من الكهف ,و نرجع أروح مع الست مشوار. 


سندس قالتى : 


ماشى ياسيدى , بس هاجى معاك !! 


قولتلها : 


ماشى ياسندش مفيش مشكله . 


روحت الكهف ولبست القميص من غير ما ازرر اخر زرار. 


وأجرنا مركب مخصوص  ومشينا بيه فى النيل ,  و ركبنا فيه انا والست وبنتها وسندس. 


واحنا فى النيل , شوفت مركب بتقرب علينا , وسمعت صوت نصير وهو بيقولى : 


جهز نفسك يانينو فيه هجوم علينا !!

هجوم من مين !!؟ 


مردتش عليا بصيت على المركب اللى جايه علينا فشوفت نيللى وشهاب راكبين فوقيه !!! 


حاولت أستدعى نصير , مردش عليا برده 


فعرفت انه أتحجب عنى !!! 


بعدها فوجئت بتماسيح  ضخمه بتهجم على المركب  بتاعتنا

                    الفصل  السادس من هنا

القراة باقي الفصول الجزء الثانى من هنا

لقراة باقي الفصول الجزء الاول اضغط هنا



تعليقات



حجم الخط
+
16
-
تباعد السطور
+
2
-