صدفه حبنا
بقلم منار مجدي
الفصل الثالث
مايان:كريم.
كريم:اممم.
مايان:انا خايفه.
كريم:انتى لسه بتحبيه
مايان:الحب مش بإيدينا يا كريم فاهمنى يعنى انا معرفش أجبر قلبى فى يوم وليله أنه يكرهه فاهم بس انا هدوس على قلبى جامد عشان يكرهه عارف انا ليه رايحه وانا ممكن عادى أقوله مش هاجى عشان مش فاضيه رايحه عشان اثبت لقلبى أنه خلاص مش هو ده إلى يستحق انى احبه.
كريم:مش هتتوجعى .
مايان:مش عارفه بس اه اكيد هتوجع بس يمكن الوجع ده هو الحل عشان أكرهه.
كريم:عارفه ممكن لو حبيتى حد تانى يقدر يخفف عنك وجعك
مايان رفعت أيديها وهى مبتسمه لنسمات الهوا:يمكن بس هو فين
كريم:يمكن قدامك ومش شايفاه
مايان:مش يمكن مستقليه نفسى عليه.
كريم:متستقليش من نفسك يا مايان انتى اى حد يتمناكى.
مايان ضحكت:طبعا طبعا.
كريم:مش بتريق على فكره.
مايان:اه اكيد عارفه بتجامل على العموم احنا وصلنا يالا.
كريم:يالا
نزلو مايان وكريم
وقفت مايان تبص على القاعه من بره بتوتر مسكت فى فستانها جامد وبلعت ريقها.
كريم شافها متوتره راح جمبها ومسك ايديها:خليكى معايا انا معرفش حد ومتوتر اوى يا مايان.
مايان بابتسامه:متخافش انا معاك ماشى هنشجع بعض تعال(بصوت واطى) ربنا يستر مسمعش كلام يضايقنى.
كريم:بتقولى ايه.
مايان:وله حاجه يالا.
شديته مايان ودخلو سوا الكل بص عليهم مش عشان مايان جميله هى بالنسبالهم تخينه حتى لو ملامحها ملامح ملاك بس احنا فى مجتمع بيبص على المظاهر الخارجية اكتر من الداخليه مش بيهمهم قد ايه هى كيوت قد ايه هى لطيفه وطيبه مش بيبصو على المعدن ابدا لكن هما استغربوا أن مايان داخله بشب وسيم ماسك ايديها الكل كان بيحسدها ومنهم إلى بيقول خساره فيها ومنهم بيقول ازاى ياخد ديه مش من مستواه ابدا رغم أن معظمهم من اهلها لكن دايما الخذلان مش بيجى غير من اقرب الناس لينا .
نوسه: مايان ايه اخرك ومين الاستاذ.
مايان:ده زميلى فى الشغل يا خالتو إلى انتى عزمتيه
نوسه:اه يقطعنى ازيك يا استاذ عامل ايه.
كريم: الحمدلله مبروك.
نوسه:الله يبارك فيك يا حبيبى عقبالك.
مايان:ماما فين
نوسه:هناك أهى مع رامز.
مايان شديت كريم:تعال اعرفك على ماما.
كريم:لحظه انا هستناكى هنا.
مايان:بس بس
كريم بابتسامه:روحى متقلقيش مش همشى.
مايان:مش هتأخر ثانيه واحده.
راحت بسرعه وطلعت لمامتها إلى كانت مع ندى ورامز
مايان:مبروك يا رامز مبروك يا ندى ماما تعالى عايزاكى.
رامز:استنى نرد طيب مستعجله كده ليه.
ندى:وبعدين ازاى تتأخرى كده مش اخت العريس المفروض تبقى اول واحده هنا اصلا.
مايان بابتسامه:اول حاجه انا مش أخته انا بنت خالته وعادة أتأخر شويه .
ندى:على العموم الله يبارك فيكى عقبالك يا حبيبتى
مايان:أن شاء الله تعالى يا ماما عم أذنكم
اخدت مامتها ورامز متابعها بعينيه.
مايان:ماما كريم كريم ماما.
نوال:تشرفنا يا استاذ.
كريم بابتسامه:انا ابقى زميل مايان فى الشغل
نوال:اه انا بقول الاتراك دول بيعملوا ايه اكيد مش ظن العيله يعنى
كريم ابتسم:بس انا مش تركى انا مصرى عادى.
نوال:بس فيك شبه من الممثلين الاتراك اوى.
مايان:ايه يا ماما عماله تعاكسى فى الراجل لحد ما كسفتيه.
نوال:انا اسفه بس اول مره اشوف حد بالحلاوه ديه
كريم بغمزه:اقدر اديكى رقمى عادى على فكره.
نوال بضحك:لا مش للدرجه دى.
مايان اتكسفت لمامتها لكن مامتها اخدتها عادى لانه قد ابنها وكده
نوال:انا هروح اشوف بقيت الضيوف خدو راحتكم
مشيت وسابتهم.
كريم بابتسامه:مامتك طيبه اوى على فكره.
مايان بضحك:طبعا عشان عاكستك.
كريم:تصدقى اول مره حد يعاكسنى دائما انا إلى بعاكس.
مايان:يالا ياعم عد الجمايل.
الدى چى:بطلب من العريس والعروسه يتفضلو على المسرح واى كابلز كمان عشان يرقصو سلو
الكل راح وطبعا رامز وندى فى النص.
مايان:هو مش المفروض ده فى الفرح بس.
كريم:لا عادى فى ناس بتعمله فى الخطوبه كمان.
الاغنيه بدأت وبقو يرقصو ومايان بتبص عليهم من بعيد وبتتمايل مع الالحان.
كريم:تحبى نرقص.
مايان:بس انا مش بعرف ارقص.
كريم:مش مشكله انا هعلمك تعالى.
راحو على المسرح ومايان بتبص عليهم بتوتر
مايان:ما بلاش يا كريم انا مش هعرف.
كريم مسك أيديها وقربها وبقو يرقصو براحه ومايان بقيت بتبص على رجلهم وبتحاول تقلده لحد ما عرفت وفرحت اوى وبصيتله
كريم بضحك:اول مره الاحظ أن فى فرق طول كبير اوى بينا كده
مايان بابتسامه:عشان عمرنا ما قربنا كده من بعض.
كريم:بس عارفه شعور حلو واحنا قريبين من بعض.
مايان اتكسفت وبصيت فى الارض.
كان رامز بيبص عليها وهو مضايق جدا ومتنرفز لدرجه رجع تانى وبطل رقص.
ندى كانت ملاحظاه مضايقه جدا
بعد ما خلصت رقص بعدو وسقفو لنفسهم ومايان كانت بتضحك
مايان:كانت رقصه حلوه اوى اول مره ارقص سلو اصلا .
كريم:بس مش هتبقا اخر مره
مايان:اكيد طبعا أنا هدخل التواليت وراجعه خليك هنا ماشى.
كريم:هاروح فين يعنى هستناكى.
مايان بابتسامه:ماشى مش هتأخر
مشيت مايان.
كريم:هستناكى ولو لاخر عمرى هفضل استناكى
مايان دخلت الحمام وكانت بتغسل ايديها.
ندى:ضحكتى عليه ازاى.
مايان: افندم.
ندى:لا متستعبطش عليا انتى فاهمه انا بتكلم عن ايه.
مايان:لا مش فاهمه عن أذنك
جت تخرج مسكتها ندى جامد من دراعها.
ندى:اوعى تكونى فاكره أنه بيحبك.
مايان:هو مين ده اوعى ايديكى انتى اتجننتى.
ندى:ايوه اتجننت لو فاكره انك هتغظينى وتكيدينى بالزميلك فى الشغل ده تبقى غلطانه.
مايان:انا مش بحاول اعمل حاجه.
ندى:اسمعى يا بت انتى انا مش عبيطه وفاهمه انتى بتعملى ايه بس احب ابلغك أن مستحيل اى حد يبص فى خلقتك وله رامز هبيصلك وله حتى زميلك ده انتى مش بتبصى فى المرايا ابدا.
مسكتها جامد ولفتها خليتها تبص على نفسها فى المرايا.
ندى:بصى كويس على نفسك انتى هتفضلى كده طول عمرك تخينه ومقرفه اوعى تكونى فاكره أن الفستان إلى مدارس بطنك ده خلاكى حلوه لا انتى عامله زى دب الباندا شويه المكياج إلى مخبيه بيها دهون وشك ده مش دايم على طول مسيرك تشيلى كل ده وتبانى على حقيقتك المقرفه انتى هتفضلى كده طول عمرك وحيده ومحدش هيبص فى خلقتك.
سابتها ومشيت بعد ما طلعت غلها كله فيها
مايان بقيت تبص على نفسها بقرف وهى بتعيط خرجت وهى مقرره أنها ماشيه.
خرجت مايان وهى منهاره من القاعه كلها بس كريم لاحظها وراح وراها.
كريم:مايان خرجتى ليه على العموم انا كنت عايز اقولك حاجه مهمه
كريم كان متوتر وبيبص للأرض ومأخدش باله أن مايان بتعيط لأنها كانت كاتمه صوت عياطها ومدياله ضهرها
كريم:هو انا لو قولتلك انى بحبك هتصدقينى.
مايان مسحت دموعها وهى بتسأله:بتحبنى بتحبنى على ايه انا فيا ايه يتحب اصلا انا واحده مقرفه انت تستاهل واحده اجمل واحسن منى
كريم عرف من صوتها أنها بتعيط مسك أيديها ولفها.
كريم:انتى بتعيطى ليه انا ضايقتك
مايان هزيت راسها وهى بتمسح دموعها بضهر ايديها زى الاطفال:انت عمرك ما ضايقتنى انا إلى وحشه مش انت
كريم مسك وشها ورفعه وبص فى عينيها:بصى فى عينيا عشان تعرفى لا بكدب انا فى حياتى كلها مشوفتش بنت اجمل واحسن منك يا مايان .
مايان:بس تخينه.
كريم:وماله تخينه على فكره الجمال مش جمال جسمك وله وشك لأن كل ده مش دايم لاننا لما بنكبر فى السن كلنا بنبقا شكل بعض مش كده الحلو مش حلو على طول لكن قلبك بيفضل زى ما هو جمالك الداخلى بيفضل وبعيش جواكى وبتفضلى جميله طول عمرك فهمتينى
مايان هزيت راسها بابتسامه:فهمت.
كريم:بس انا زعلان منك اوى
مايان:زعلان منى ليه.
كريم:عشان عيطتى وبوظتى المكياج إلى تعبت فيه اعيط انا دلوقتي
مايان ضحكت
كريم:يالا مش مشكله انا طيب وهسامحك.
مايان بصيت ليه بابتسامه: شكرا عشان انت موجود جمبى.
كريم بابتسامه:انا إلى محظوظ انى جمبك يا بنتى انتى عمله نادره.
مايان ضحكت:بس مش تأفور.
كريم:حقيقى مش بهزر هو انا بحبك من شويه
مايان احمرت وهى بتبصله:احم انا هكلم ماما اقولها اننا هنمشى.
كريم:تمام.
مايان مسكت التليفون وبعدت عشان تكلم مامتها.
كريم:عارف انك بتتهربى من الاجابه بس انا هستناها طول عمرى
مايان خلصت وراحت عند كريم:هنمشى.
ركبت مع كريم وانا حاسه اني مكسوفه اوى منكرش انى كنت بدأت أعجب بيه وبحنيته بس هو خضنى اه جيه فى وقته المناسب لانى كنت خلاص فقدت ثقتى فى نفسى وهو جيه زى الملاك رجعلى ثقتى وضحكتى إلى كنت بمثلها بقيت حقيقه انا بقيت بضحك معاه من قلبى هل كريم هو عوض ربنا ليا بس انا مش استحقه بس هو بيحبنى انا عوضآ عن كل البنات إلى حواليه
هل انا استاهل هو عوض ربنا حلو اوى كده اكيد طبعا حلو حلو اوى كمان .
كريم:ايه هتفضل. تبصيلى وانتى ساكته كده.
مايان:عايزنى اقول ايه
كريم:عايز ايه ممكن جواب ليا أو ممكن اى موضوع عادى لو الجواب مش جاهز دلوقتى.
مايان:امممم تحب نتكلم عن ايه.
كريم:اممم يبقا مش جاهز طيب نتكلم عن ايه عن ايه نتكلم عن حياتنا الشخصيه.
مايان:بجد هتحكيلى قولى طيب حياتك زمان كانت ازاى يعنى مثلا ايه اكتر ماده كنت بتحبها فى المدرسه او لونك المفضل.
كريم:ايه الاسئله الكتير ديه كلها طيب استنى واحده واحده اول حاجه مادتى المفضله كانت الرياضه .
مايان:وانا كمان كان اكتر مادتين بحبهم الرياضه والعلوم
كريم:بجد طيب ولونك المفضل
مايان:لون السما بيبى بلو.
كريم:ده لونى المفضل برضو
مايان:يظهر اننا بنحب نفس الحاجه
كريم:احنا شبه بعض فى حاجات كتير بس انتى مش واخده بالك.
مايان:شكلى كده فعلا ايه ده وصلنا.
كريم:للأسف
مايان:طب ايه رأيك تطلع تتعشا معانا اكيد بابا لسه مش اتعشى.
كريم بابتسامه:مره تانيه الوقت أتأخر.
مايان:متأكد
كريم:ايوه متأكد
مايان:طيب خلى بالك من نفسك ومن الطريق.
كريم:حاضر مايان.
مايان:نعم
كريم:متسمحيش لحد يفقدك ثقتك في نفسك.
مايان بابتسامه:هحاول سلام
كريم:سلام
بقيت مبسوطه اوى عرفت أنى بحبه بس لازم اتغير عشانه لازم اتغير بس يا ترى هقدر.
عدى شهرين ومايان هى مايان زى ما هى بس الفرق انها بقيت انسانه سعيده وكل ده بفضل كريم الى لسه مستنى جواب مايان عليه اه هو عارف انها بتحبه من غير ما تقول بس محتاج يتأكد منها.
مايان: صباح الخير يا استاذه غاده.
غاده: صباح النور يا مايان .
مايان:كريم فين مشوفتوش خالص انهارده ومش بيرد على التليفون
غاده:كريم تعبان اوى من امبارح والله يا مايان مخلنيش انام من قلقى عليه.
مايان بخوف:ليه ماله.
غاده:حرارته مرتفعه طول الليل وبيخترف ومهمد كده.
مايان:طب مكلمتنيش ليه
غاده:والله محبتش اقلقك.
مايان:طيب هو انا ينفع اخد بقيت اليوم اجازه.
غاده:ينفع طبعا ومعاش يا مايان روحى لكريم وطمنينى عليه عشان انهارده عندى اجتماعات كتير اوى.
مايان:اصلا كنت هروحله متقلقيش ماشى لو فى حاجه هكلمك.
غاده:تمام.
مايان نزلت بسرعه وقفت تاكسى وراحت لكريم بعد ما عرفت باباها .
نزلت وهى بتكلم غاده فى التليفون عشان تعرفها انها وصلت
مايان:ايوه يا غاده انا وصلت فين المفتاح بقا اه خلاص لقيته طيب خلاص متقلقيش لو فى حاجه انا هتصرف طيب سلام
دخلت مايان البيت كان دوبلكس ومنور كله
مايان:المفروض اعمل ايه دلوقتى انادى طيب لا هو تعبان اكيد مش هيرد طب اكلم غاده اسألها فين أوضته ايوه هكلمها.
كريم بتعب:مايان
مايان صرخت ووقعت التليفون فى الارض.
كريم بضحك وهو بيكح:مالك ده انا.
مايان بنبضات قلب سريعه:خضتنى يا كريم فى حد يعمل كده.
كريم:معلش يا ستى(الكحه زادت)
مايان بصيت وراه لقيت مايه راحت جابتها وقعدته وشربته بإيديها.
مايان بحنيه:بقيت احسن.
كريم بابتسامه:بكتير
مايان:ليه مش رديت عليا.
كريم:مكنتش عايز اقلقك عشان كده صوتى متغير.
مايان:مش هعرف انا كده مثلا انت قلقتنى زياده اصلا
كريم مسك أيديها الى على ضهره:بجد قلقتى عليا.
مايان:اكيد هقلق عليك لو مقلقتش عليك انت هقلق على مين يعنى.
كريم ابتسم بحب ليها وبعدين كح جامد
مايان بقيت بطبطب على ضهره براحه:انت ايه قومك اصلا من اوضتك.
كريم:صح كنت قايم اعمل يانسون عشان زورى وجعنى
مايان:يانسون لا بص انا هعملك جنزبيل كويس جدا عشان الزور لما بتعب بابا كان بيعمله.
كريم:لا مش بحبه.
مايان:هيعجبك على فكره انا بعمل احلى جنزبيل فى الدنيا
كريم بضحك:بجد
مايان:مش مصدق هوريك.
قامت مايان ودخلت المطبخ وحطيت الكاتيل وعملت الكوبايا.
كريم راح وقعد على كرسى إلى فى المطبخ وبقا بيتفرج عليها.
مايان:ايه قومك تانى
كريم: بشوفك
مايان:طيب قولى انت اكلت.
كريم:لا مليش نفس.
مايان:هتخف ازاى بقا مينفعش كده بص هعملك لسان عصفور حاجه بسيطه وخفيفه مش هتتعبك تمام انا اصلا مش بسألك انا بعرفك اقعد ساكت.
كريم بقا مبسوط وهو شايفها بتخلى بالها منه كان كل لما يكح تروحله وتطبطب على ضهره وتشربه مايه لحد ما خلصت الاكل والجنزبيل وقعدت قدامه وأكلته بإيديها
مايان: دلوقتى كله تمام فين اوضتك بقا.
كريم:ليه اوضتى.
مايان:عشان تنام الواحد لما بيبقا تعبان بيبقا محتاج راحه اول حاجه.
كريم:بس انا مش عايز انام عايز افضل معاكى.
مايان ابتسمت:انا مش همشى على طول لسه هعمل شويه حاجات وامشى
كريم:خلينى قاعد معاكى لحد ما تيجى تمشى.
مايان:عنيد جدا
كريم بضحك: ايوه انا عنيد.
مايان ضحكت:خلاص خليك بس متعملش صوت ماشى
كريم :وله كلمه وله حرف
مايان ضحكت:طيب .
مسكت تليفونها وشغلت أغانى ومسكت اسكرف ولما بيه شعرها وبدأت تروق
كريم:مايان بتعملى ايه فى واحده بتيجى تعمل كل ده.
مايان:شششش سيبنى اركز .
كريم ضحك:طيب هساعدك.
مايان بسرعه راحت وقعدته:وانا ايه لزمتى انا جيت عشان انت ترتاح وبروق عشان تبقا قاعد فى مكان نضيف مش اكتر ممكن تساعدنى وتقعد بس وله ادخلك تنام.
كريم:لا خلاص خلاص هقعد ساكت.
مايان اديته الجنزبيل:وخلص ده لو سمحت.
كريم:حاضر.
مايان بدأت تروق لحد ما وصلت لأوضته فتحت الستايرعشان تهوى الاوضه ولفت تروقها لحد ما خلصت بس وهى خارجه لاحظت صور كريم وهو صغير ومن ضمنهم صوره بتجمعها معاه وهما صغيرين فى المدرسه.
كريم:اتأخرتى كده ليه
مايان:ده انا.
كريم:ايه ده بجد.
مايان:هتستعبط مانت شوفتنى فى الصور فى البيت عندى
كريم:ايه ده بجد ما اخدتش بالى خالص
مايان ضحكت:احنا كنا زمايل فى الابتدأئى زمان لسه صورتنا زى ماهى وكأنها لسه متصوره امبارح
كريم:عشان الصوره ديه عزيزه عليا فأهتميت بيها كويس اوى
مايان:انت كنت شبهى.
كريم:وانتى كنتى شبهى .
مايان:ازاى خسيت.
كريم:بس بقولك احنا شبه بعض اوى انا لسه متغير من كام سنه بس انا كنت تخين أوى.
مايان:زي كده.
كريم:اضعافك.
مايان:بجد وازاى بقيت كده.
كريم:اتكسرت.
مايان:مين كسرك.
كريم:واحده كنت فاكرها بتحبنى بس طلعت شفقانه عليا عشان مكنش عندى صحاب حبيتها وهى كسرتنى وورتنى انا ابقى ايه.
مايان قعدت جمبه وحطيت إيديها على كتفه.
كريم:بس انا مسمحتش ليها تضايقنى اكتر من كده بعدت فتره عن الكل حتى عن اختى ومرجعتش غير وانا كده طبعا اخدت علاج نفسى عشان يرجعلى ثقتى فى نفسى .
مايان مسكت أيديه:انا معاك يا حبيبى مش عايزاك تضايق نفسك
كريم بفرحه كبيره:انتى انتى قولتى ايه .
مايان ضحكت:يعنى مسمعتش .
كريم:اه ياريت تقوليها تانى عشان اتأكد.