رواية فرعون الجزء الثاني2
الفصل الثلاثون
بقلم ريناد يوسف
فى يوم جمعه والكل متجمع ففيلا ماهر كالعاده ..بس الجمعه دى زاد عليهم شخصين جداد ...مريم واميره
ماهر :مش هيهديكى ربنا بقا انتى وراضى وتوافقو على جواز العيال دى يامريم
او حتى على شبكه وكتب كتاب وتبطلو تتحججو بموضوع تخلص تعليمها ده ؟
مهى قدامك جواهر اهى اتجوزت وبتكمل ومفيش اى مشكله ،ايه اللى هيجرى يعنى لو اميره عملت زيها كده، وانا متاكد ان نادر هيهيألها كل سبل الراحه ؟
مريم : اهى كل المشكله فسبل الراحه دى اللى هيهيأهالها نادر ...وعلى فكره اميره مش زى جواهر .. عشان سبل الراحه اللى بتتكلم عليها دى هى اكتر سبب هيخلى اميره متكملش وتضيع مستقبلها على آخر سنه فضلالها ؟
ماهر :ازاى بقا !
مريم :بنتى بروطه وملهاش فالتعب ولا عندها اى طموح فالدنيا ولو لقت الراحه مع نادر هتأنتخ وتقول هعمل ايه بالشهاده وهتنام فالخط انا عارفه .
اميره :ايوه ايوه شردى فيا كمان شردى قدام الناس .
مريم :اسكتى انتى مفيش حد غريب ...هاه كنا بنقول ايه
قاسم بسرعه :وقفتى عند حتة ان اميره لا عندها طموح ولا دم كملى كملى
اميره برقت عنيها وهى بتبص لقاسم وبتشاور على نفسها
قاسم :مش امك اللى بتقول عليكى انا جبت حاجه من عندى ...كملى ياطنط مريم كملى احنا بنسمعك
كملت مريم كلامها ونادر ضرب قاسم بضهر ايده على صدره لما حس انه ميبتديش يرخم على اميرته وهو مبيستحملش فيها
مريم :فاعلى هذا الاساس نادر ابنى حبيبى يستحمل الشهرين دول والسنه اللى فاضلالها دى بالطول وبالعرض ،وبأذن الله الايام هتجرى بسرعه بسرعه واذ فجأتاً نبص نلاقيكم فالكوشه قدامنا .
قاسم :وتعيشو فتبات ونبات وتخلفو صبيان وبنات وتوته توته مفيش اسهل من كده اهو .
نادر :انتا تخرس خالص وبص لمريم بترجى ...بس ياطنط افهمينى بس انا كنت عا.....
مريم قاطعته :يانادر الفرمان اللى بيصدر مفيش فيه رجوع تانى خالص عشان تبقا فاهم بس .
قاسم :...خلاص يانادر حماتك المستقلبه الملكه الام اصدرت الفرمان ..وبعدين مستعجل على ايه انتا هاه ؟...سيب البنت تشوف مستقبلها يااخى حرام عليك .
سقوط سموات على راس حظرتكم
مريم :اهو قالك قاسم اهو حرام عليك يانادر
نادر بص لقاسم والشرار بيطلع من عنيه ونفسه يقوم يخنقه لانه بيهزر ومش وقت هزاره خالص وبرخامته دى هيضيع اخر فرصه لنادر انه يقنع مريم توافق على جوازه بأميره.
اما فوسط القعده واللمه الحلوه دى كان قاعد غريب وليل قاعده جمبه وأيدها فايده طول الوقت وبيتوشوشو ومش واخدين بالهم ولا مركزين مع حد وفدنيا لوحدهم خالص
قاسم :اسكتو بس وتعالو نشوف عصافير الحب دول اللى واخدينلهم جمب وعمالين يزقزقزو مع بعض ولا كأن حد قاعد معاهم ...
ايه مفيش احساس؟ احساس مفيش !مش نختلط مع الناس كده ونخلى عندنا دم ؟
غريب :ليل انا حاسس ان البنى آدم دا يقصدنا احنا ، صح كده ولا ايه
ليل :ايوه صوح وبيبص علينا وهو مبرق عنيه وشكله هياجى يضروبنا
غريب :ميعرفش يقعد ساكت انا عارفه بينكش عالمشاكل هادم اللذات ومفرق الجماعات ده .
قاسم :سممممعتتتتك طب حيث كده بقا يلا يابنات خدو بعضكم وادخلو جوه هنقعد قعدة شباب مع بعض يلا
الكل بصله ومقامش ...قاسم زعق :قولت يلا ..وخدو ليل اول وحده معاكم ..شدوها اوى كده من غريب و لو مقدرتوش قولو عشان نجيب سكينة التورته نفصلهم بيها اللى طول الوقت لازقين لبعض عاملين زى التؤام الملتصق دول ..
غريب تبت فايد ليل ولف ايده التانيه حوالين كتافها وضمها جامد وهو بيبرطم على قاسم وبيشتم فيه
ليل ضحكت وهى شايفه البنات قامو وجم عليها بجد وناديه واميره وجواهر هجمو عليها بيشدو فيها وغريب ماسك ايدها مش راضى يسيبها، لغاية ماقاسم مسك غريب وشده وهما شدو ليل ونجحو انهم يخلصوها من غريب ..
غريب :انتا غبى ياقاسم ورزل على فكره
قاسم :ايوه عارف ،اقعد معايا شويه بقا وسيب ليل مش كده، فيه ناس تانيه عايشه معاك على ضهر الكوكب غيرها يبنى .
غريب :انا مش عارف انتا حاطط ليل فدماغك ليه ؟
قاسم :حراميه، سرقت منى صاحبى وبقيت بشوفه واكلمه بالقطاره .ايه مبتزهقوش من بعض طول النهار والليل بوزكم فبوز بعض !
غريب :يبنى متخليك مع مراتك مش معاك وحده ست ؟ ولا الظاهر انك مش بتحبها زى انا مبحب ليل لانك لو كنت بتحبها مكنتش تطيق انها تبعد عنك ثانيه وحده .
وهنا جواهر بعد ماسمعت الكلام دا سابت ليل وبصت لقاسم ومثلت الحزن ولسه هتتكلم وتأيد نظرية غريب لقت قاسم قام شادد ليل من ايدها وحدفها على غريب .
قاسم :خد يعم مراتك واسكت بتحرض مراتى عشان تعمل عليا انقلاب؟ حااااضر ياغريب بسيطه ..طب لعلمك بقا انتا متحبش مراتك ربع حبى لمراتى .
غريب :حبها زى منتا عاوز وحل عنى انتا بس وسيبنى مع ليل.. وانا اوعدك مستعملش اسلوب التحريض دا معاك تانى .
قاسم :خلاص روحو انتو يابنات خدو راحتكم ولو عاوزين ليل معاكم فقعده نسائيه اعملو حسابكم هتيجى هى وغريب هههههع
ليل :انى اصلا مهروحش فاى موطرح واسيب غريبى لحاله ..
قاسم :ياتى كميله ياتى ...جوز كلاب ياخواتى بيحبو فبعض اللى يقرب لواحد فيهم التانى يهبره ...غورو تكم وجع فمعاميعكم ....يلا يلا يانادر نخرج احنا فالجنينه نتمشى شويه
نادر وهو باصص لاميره ومتنح :لأ انا قاعد هنا مش هخرج
قاسم :لئه تلوئك انتا كمان ...ايه ياخواتى العيله الملزقه دى ؟
وبص لماهر اللى هو كمان متنح لموده اخته ومبتسم وهى كمان مبتسمه وضرب كف بكف وهو بيهز دماغه وخرج لوحده للجنينه وقعد على المرجيحه وطلع تليفونه وعمل شوية اتصالات خاصه بشغله والقضايا بتاعته .
اثناء ماهو قاعد بص لقى ماهر جاى عليه من بعيد وهو مبتسم
قاسم فسره :عارفها الابتسامه دى انا ...والله ووقعت فحجرى ياعمى ماهر وههشتكك براحتى ...
ماهر :ايه ياقاسم ياحبيبي قاعد لوحدك ليه ؟
قاسم :بفكر فحاجه كده
ماهر :هى ايه ممكن اعرفها على سبيل الدردشه ولا حاجه سريه بخصوص شغلك ؟
قاسم :لا هى حاجه بخصوص شغلى بس مش سريه ولا حاجه ...بص ياعمى ..انا بفكر فأنك ازاى قدرت ترجع تشغل الشركه بتاعتك بعد ماكانت على وشك تعلن افلاسها وفى وقت قياسى رجعت بقت معاك فلوس زى الاول ؟
لذلك من حقى ومن حق الدوله تعرف من اين لك هذا .
وهنا ماهر اللى كان قاعد على المرجيحه جمب قاسم قام مره وحده و نط على قاسم ومسكه من هدومه وبيهز فيه وبيتكلم بعصبيه وهو جازز على سنانه :
على فكره بقا ياحيوان انتا ...انا شاكك انك انتا السبب الوحيد ورا خسارت شركتى وفلوسى ...
من ساعة ماتعينت وانتا بتنق عليا وعلى الفلوس لغاية ماخليتنى على الحديده ...وحتى الحديده لولا ستر ربنا كان زمانى بعتها هى كمان .
قاسم بيحاول يتخلص من ايدين ماهر بخوف.:
ايه ياعمى اهدا شويه انا بهزر معاك وبعدين الزعل مش حلو عشانك ..وكمان لما بتزعل بتقلب محمود المليجى وبخاف منك والله ..
ماهر مسابهوش ولسه ماسكه جامد
قاسم :ياعمى سيبنى فرهدتنى بأديك اللى عاملين زى ايدين مازنجر دول ...طب اقولك سيبنى وانا هعوضك عن خسارتك دى ..هجوزك اختى موده ايه رايك
وهنا ايدين ماهر اترخو ووقف وهو بيعدل هدومه بتوتر وقاسم باصصله ومبتسم ابتسامه خفيفه ....
هاه قولت ايه ...والله موده اختى هى الوحيده فالدنيا دى اللى عندها القدره انها تنضف جروحك الداخليه وتعقمها عشان تخف بسرعه .
ماهر ابتسم : احمم وانا مش هكسفك وموافق اتجوزها ..يلا كلملى عمى عبد السلام وخد رأيه ورد عليا فأقرب وقت
قاسم :ايه هو دا ...حضرتك صدقت ولا ايه ؟ انا بهزر على فكره ..
ماهر ملامحه اتغيرت وبلع ريقه وهو بيبص لقاسم وقعد جمبه على المرجيحه وابتدا يتكلم بجديه :
قاسم على فكره انا عاوز اتجوز اختك موده بجد
قاسم حط رجل على رجل ...يعنى افهم من كده انك عندك رغبه انك تناسبنا .
ماهر :ايوه بالظبط كده وهكون سعيد جدا بده
قاسم مد ايده طبطب على رجل ماهر ...والله ياماهر يبنى انتا غالى علينا كلنا واوعدك هكلم بابا وآخد رأى موده وهرد عليك فاقرب وقت يعنى فخلال ست شهور سنه كده بالكتير مش هطول عليك .
ماهر بصله وبرق عنيه ولسه هيتكلم
قاسم :لأ مهو انتا متصربعنيش فالموضوع دا احنا لسه هنسأل عليك ونطمن دا نسب مش لعب عيال .
ماهر قام مشى من جمب قاسم وهو بيهز دماغه بغلب ودخل الفيلا .
قاسم :والله لالوعك زى مالوعتنى على جواهر واخليك تدوق اللى دوقتهونى ياماهر يامراهق .
دخل ماهر الفيلا وموده مراقباه وهو جاى عليهم ومبتسمه وهى شايفاه زى القمر فى الترنج البيتى واللون الاسود لايق عليه جدا ولايق على جسمه الرياضى.. اللى برغم سنه الا انه محافظ عليه بشكل ممتاز ،وعدلت نضارتها بتوتر وهى شايفه عيونه عليها منزلوش لغاية ماقرب وقعد قصادها وبتتلفت حواليها خايفه حد من اهلها يلاحظ .
مريم متابعه الموقف ومبتسمه على ماهر اللى لسه بيوقع فالحب بعد السن دا وشكله عامل زى المراهق وهو بيتلفت حواليه قبل ما يسرق نظره لموده .
قاسم دخل الفيلا ورجع قعد فمكانه قصاد ماهر وطول الوقت مراقبه وعينه منزلتش من عليه و بيبصله نظرات خلت ماهر مرتبك
خلص اليوم والكل روح على بيته ومريم اخدت اميره وسافرت ..
قاسم دخل اوضة موده بعد ماخبط على الباب وسمحتله بالدخول لمنطقتها الامنه اللى من شهور لو كان وقف على شعر راسه مكنتش سمحتله يدخلها ابدااا ...دخل وقعد جمبها على السرير وهى بصتله وعدلت نضارتها وهى بتبصله ومديقه عنيها بتساؤل لسبب زيارته دى وعارفه انه فيه سبب
قاسم :موده
موده :اتكلم علطول يأمه تقوم تمشى
قاسم :بس سيبي مجلة ميكى اللى فايدك دى الاول ياموده ياحبيبتى واكبري واسمعيني
موده :وادى المجله اهى ...ورزعتها على الكوميدينو ...اتكلم وقول عاوز ايه عشان انا بزهق بسرعه
قاسم :موده متروحيش الشغل الاسبوع دا
موده :ليه
قاسم :اهو كده ...انتى مش بتثقى فيا
موده :لأ طبعا بثق فيك دا ايه ؟
قاسم :متشكر متشكر ...طيب ممكن تثقى فيا المرادى ..
موده :مش قبل ماافهم السبب ورا طلبك الغريب العجيب المريب ده
قاسم :بصراحه عاوز ماهر يتلحلح كده وياخد خطوه بدال ماهو مبلط فالخط ومش متحرك ...عاوزك تبعدي عنه اسبوع عشان توحشيه ويحس ببعدك ويتعذب شويه وييجى زى الشاطر يخطبك ونفرح بيكم
موده ابتسمت بخجل وعدلت نضارتها بارتباك ....تفتكر لما ابعد هيعمل كده
قاسم :فووورااا ..بس ايه ..عاوز بعد بعد ..وتتقلى عليه تقل محدش تقله على حد قبل كده ...يعنى لا يتصل بيكى تردى عليه ولا تتصلى بيه وتقفلى تليفونك وتقطعى عليه كل سبل الاتصال ببكى والتواصل معاكى
موده :ايوه بس الشغل مش هينفع اسيبه فالوقت دا ..
قاسم :ثقى فيااا بقولك واسمعى كلامى ومتفكريش فاى حاجه انتى
موده هزتله دماغها بموافقه
قاسم :شاطره حبيبة اخوها ...يلا بقا اقفلى تليفونك دا ونامى ..
*********
عند سميه
سميه :سيلين راسلتى الدكتور اللى كلمتينى عنه ؟
سيلين :ايوه ياعمتو كلمته وطلب منى اخر اشاعات للحاله هتعرفى تجيبيهم نبعتهمله .
سميه :هعرف بأذن الله ...لازم اعرف
اتصلت سميه بناديه بعد ماخلصت كلامها مع سيلين بنت اخوها الكبيره
ناديه :ايوه ياماما عامله ايه ياحبيبتى
سميه:انا بخير ياناديه ...بقولك اسمعينى كويس ...فيه دكتور شاطر اوى فالمانيا يعتبر من اكبر واشطر دكاترة العيون فالعالم ...تواصلت معاه سيلين بنت خالك عن طريق صفحته على الفيس وحكتله على حالة غريب وهو طلب الاشاعات بتاعت الحاله ....
عاوزه منك تبعتيلى صور الاشعات بتاعت غريب على الواتس بسرعه ...بس ياناديه الموضوع دا يبقا سر بينى وبينك مفيش مخلوق يعرفه ...مش عايزه غريب يتولد جواه امل قبل مانشوف حالته هتنفع معاه العمليه ولا لا .
ناديه وهى بتتحرك على اوضة غريب وبتدور فالادراج زى المجنونه ودموعها نازله على خدها بمجرد ماسمعت كلام امها وحست ان فيه امل غريبووو يرجع يشوف من تانى
سميه :ناديه رحتى فين مبترديش ليه ؟
ناديه :بدور على الاشاعات ياماما ..ومدت ايدها على اخر درج فتحته ...اهم لقيتهم ..اقفلى ياماما هبعتهملك بسرعه ...وفعلا سميه قفلت وناديه صورت الاشاعات والتشخيصات وبعتتهم لسميه واتس وسميه خلت سيلين فورا بعتتهم للدكتور .
*********
جواهر قاعده فشقتها و حست بمغص خفيف، ولانها عارفه انها ممكن تكون حامل وخصوصا انها حاسه باعراض بقالها كذا يوم ومستنيه تتأكد، قلقت من المغص دا، وبالذات انه مش من عوايدها تتعب فى الوقت دا من الشهر خالص .
حاولت تتصل بقاسم لكنه اداها رفض كذا مره ودا معناه انه معاه شغل مهم ومينفعش تقاطعه ...لبست ونزلت لحماتها ماجده وقالتلها عاللى حاسه بيه، وماجده لبست ونزلت بيها اخدتها على اقرب دكتورة نسا ...
بعد الكشف الدكتوره بلغت جواهر انها حامل وان الحمل مهدد بالاسقاط وخصوصا انها ضعيفه وواضح انها مش بتهتم بأكلها كويس .
كتبتلها مقويات ونصحتها بالراحه التامه والنوم على ضهرها لمدة شهر لغاية مالجنين يثبت .
رجعت جواهر للبيت وهى طايره من الفرحه وماجده متقلش عنها سعاده، وطول الوقت توصى فيها انها من النهارده ترتاح خالص ،ومتعملش اى حاجه ولا حتى تقوم من السرير، وشغل البيت والاكل من دلوقتى هى اللى هتكون مسئوله عنهم ...
جواهر روحت واخدت علاجها ونامت على السرير زى مالدكتوره وصتها، وفضلت مستنيه قاسم بفارغ الصبر عشان تقوله على خبر حملها ويشاركها سعادتها ...
طول الوقت جواهر حاطه ايدها على بطنها ومبتسمه لمجرد احساس ان جواها حته منها ومن قاسم وكلها كام شهر وييجى للدنيا ويكمل فرحتهم ...
قطع شرودها وتفكيرها صوت جرس التليفون وهو بيعلن عن اتصال من قاسم
جواهر ردت بلهفه وفرحه واضحه فصوتها :ايوه ياقاسم
قاسم :الشريان التاجى بتاعى ..واحشانى ياجوهرتى ..
جواهر :وانتا اكتر ياقلب جواهر
قاسم :حاسك عاوزه تقولى حاجه ..ياترى احساسى صح ولا
جواهر :فعلا احساسك مظبوط ..
قاسم : عاوزه تقولى ايه ياست البنات
جواهر :عاوزه اقولك انى بحبك اوى اوى اوى
قاسم :كمان واحده اوى كده
جواهر :اووووى
قاسم :يالهوووى عالاوى اللى بتبهدلنى دى ...طيب سلام هخلص الشغل اللى فايدى واجيلك طيران عشان وحشتينى اوى اوى اوى
جواهر :وانا مستنياك على احر من الجمر
قفلت جواهر مع قاسم وفضلت تعد الوقت بالثانيه وهى مستنيه قاسم يرجع وتقوله وتشوف رد فعله ايه لما يعرف الخبر .
عدت ساعه بالظبط وجواهر سمعت صوت قفل الباب
وبمجرد سماع للباب وهو بيتفتح قلبها عليت دقاته من التوتر .
قاسم :جوجو ...جوهرتى ...وابتدا يصفر وهو بيدور عليها فكل مكان وفالاخر فتح اوضة النوم لقاها نايمه على السرير .
قاسم جرى عليها بلهفه وقلق لانه اول مره يرجع من الشغل وميلاقيهاش مستنياه وكمان نايمه فالسرير :
جوهرتى مالك سلامتك ياحبى انتى تعبانه ولا ايه ؟
جواهر مسكت ايده وقعدته جمبها على السرير:انا تعبت فعلا النهارده ورحت للدكتوره انا وماما ماجده وقالتلى هتفضلى شهر نايمه فالسرير مش هتتحركى .
قاسم زعق بخضه :يامصيبتى اتشليتى ؟
جواهر ضربته على ايده بزعل :بعد الشر عليا ...قالتلى نامى عشان ابن العبيط اللى فبطنك دا يثبت ومينزلش .
قاسم :مين ابن العبيط دا ؟ وفبطنك ازا.....وبرق مره وحده وبص لبطنها ورجع بصلها بتساؤل وهى هزتله دماغها بتأكيد .
قاسم :حامل ؟
جواهر :ايون
قاسم :حامل حامل ؟
جواهر هزتله دماغها بأبتسامه ...
قاسم ضحك بفرحه وهو بيميل على بطن جواهر ويبوسها كذا مره ورا بعض وهو مش مصدق انه هيبقى اب
جواهر :قولى بقا عايز ولد ولا بنت ؟
قاسم :اللى يجيبه ربنا ياجوجو سواء ولد او بنت هعشقه عشق عشان منك
جواهر :ياقلبى انا ...طيب وهتسميه ايه لو ولد ولو بنت نفسك تسميها ايه
قاسم :بصى بقا انا ناوى اجيب ولدين وبنت ...اسمى ولد ياقوت ..والتانى مرجان ..والبنت دهب ...
عشان اول ماادخل من باب الشقه اقول ...دهب ..ياقوت ...مرجان ...
جوااااهر ...تيجو تجرو عليا اخدكم فحضنى واقول احمدك يااااارب ..
جواهر ضحكت على كلامه وهى بتهز دماغها ...انتا مجنون ياقاسم
قاسم :مجنون بس لذيذ اوعى تنكرى ....المهم شدى حيلك بقا وهاتى مرجان بسرعه نفسى اشوفه واحضنه والعب معاه .
جواهر :هانت كلها تمن شهور الا شويه ويشرف ولى العهد ...مقولتليش بقا عاوزه يطلع ايه ...محنا لازم نبتدى نخطط لمستقبله من دلوقتى .
قاسم :هطلعه دكتور ...وتبقى انتى اول هبله تجيب دكتور 😂
جواهر ضربته بضهر ايدها وهو نام جمبها وحضنها جامد وهى دفنت نفسها فحضنه وهما الاتنين طايرين من السعاده .
بعد شويه ماجده طلعتلهم باكل كتير وكله اكل مغذى ومفيد للحمل واكلت جواهر بنفسها وطول الوقت توصى فيها بالراحه وتوصى فقاسم ياخد باله منها وميتعبهاش .
نزلت ماجده وجواهر اتصلت بامها وبلغتها بالخبر اللى خلاها طارت من الفرحه لانها هتكون تيته
ولما عرفت ان حملها مش مستقر طلبت منها انها تجيلها الفيلا عشان تقدر تاخد بالها منها وتكون قدام عينها طول الوقت ...لكن جواهر طمنتها وقالتلها ان ام قاسم ماجده واخده بالها منها زى امها واكتر ...وكمان هى متقدرش يعدى يوم عليها متشوفش فيه قاسم
جميله استسلمت قدام اصرار جواهر انها تفضل فشقتها لكن اللى مطمنها انها وسط ناس طيبين بيخافو عليها ويعاملوها كانها بنتهم ، وكمان واثقه ان قاسم مش هيقصر فرعايتها والاهتمام بيها
وبعد كده اتصلت بليل اللى فرحتها بالخبر مكانتش تقل عن فرحة جميله بيه واتمنتلها من كل قلبها ان ربنا يكملها على خير ..
غريب بابتسامه وفرحه بعد ماسمع المكالمه بين ليل وجواهر :
قاسم هيبقى اب ! دانا لغاية دلوقتى بحسه عيل طايش ومستنيه يكبر ويعقل والله .
ليل :اهو هياجيله اللى يعقله ويكبره مره وحده
غريب :بصراحه انا بتمنى اللحظه اللى تفرحينى بيها بخبر زى دا ياليل وتقوليلى هتبقا اب ياغريب ...مع انى مش هقدر اشوف ابنى ولا بنتى ..بس احساس ان حته منك عايشه وبتتنفس وتمشى على الارض احساس جميل اوى نفسى اجربه .
ليل :ربنا كريم ياغريب ...قالت جملتها دى وشردت فاللى كان غايب عن تفكيرها طول المده دى ...هل لو خلفت المرادى ابنها او بنتها هيبجى شبهها ؟ مهى مش كل مره هتسلم الجره ،ومش معنى ان سند جه حلو يبقا خلفتها كلها هتكون بنفس الشكل ..اكيد الطفل هياخد من شكلها ولو حاجه وحده وهى مفيش اى حاجه عدله فيها تنفع تتاخد ...
ليل اتنهدت وهى بتمد ايدها تحضن غريب وتنام على صدره
غريب :ليه التنهديده دى ياليل ؟
ليل :اصلى اتفكرت سند وايام حبلى فيه ..ربنا يرحمه ويجمعنى بيه فالجنه هو وسته وسيده
غريب :آمين ياحبيبتى ...فضل حاضنها شويه وانفاسه انتظمت ونام لكن ليل مجالهاش نوم فاليوم دا بعد ماغريب نبهها لحاجه مهمه اوى كانت نسياها خالص ممكن تحصل فأى وقت وهى انها تحمل وترجع تعيش فدوامة القلق والخوف من المجهول مره تانيه ...
هى لو عليها مكتفيه بغريب ومش عاوزه من الدنيا اى حد غيره حتى لو كان طفل ...لكن حرام عليها تحرمه من الاحساس اللى بيتمناه ومستنيه بفارغ الصبر ...اينعم هو مهما كان شكل ابنه مش هيفرق معاه عشان مش هيقدر يشوفه ، لكن الطفل نفسه هو اللى هيتعذب لو ورث سواد امه ويضطر يواجه نفس مصيرها ...
نامت ليل اخيرا بعد مافوضت امرها لله وهى على يقين ان ربنا هيسخرلها من الاقدار اجملها ..
*********
تانى يوم العصر
ناديه فاوضتها بتتنطط وبتصرخ من الفرحه وهى قدام التليفون والكاميرا مفتوحه :عااااااااا بجد ياماما يعنى غريبو هيرجع يشوف من تانى ...انا مش مصدقاااااااه
سميه بفرحه اكبر من فرحة ناديه بكتير :بجد يانودى بجد ...غريب هيرجعله نور عنيه من تانى ...اخوكى هيرجع يشوف الدنيا والوانها مره تانيه ياناديه ...اخيرا مش هنام كل يوم بالليل وانا حاسه بالندم وتأنيب الضمير بياكلو فروحى ...
ادينى ماهر بسرررعه عشان فيه اجرآت لازم تتعمل الوقت مش فصالح غريب والعمليه لازم متتاخرش اكتر من كده .
ناديه نزلت جرى بالتليفون على ماهر اللى كان قاعد فأوضته على سريره وبيقرا فدوسيه ودخلت عليه مره وحده خضته ولفت التليفون عليه وهى بتقول لمامتها سميه ...اهو معاكى بابا قوليله انتى وبشريه ..
ماهر بص للتليفون باستغراب وقلع نضارة القرايه وهو بيتمعن الفرحه اللى فوش سميه وبص لناديه :هو فيه ايه ؟
سميه بصوت باكى :غريب هيرجع يشوف من تانى ياماهر
ماهر خطف التليفون من ناديه وقربه منه ودقات قلبه كل مادا بتزيد واتكلم بصوت بيترعش :انتى بتقولى ايه ياسميه ؟
سميه :حالة غريب شافها اكبر دكتور عيون فالعالم وقال انه ممكن يرجع يشوف وبنسبه كبيره من خلال عمليه دقيقه هو بنفسه هيعملهاله ...بس الموضوع هيتكلف فلوس كتير اوى
ماهر بفرحه :انا ومالى وعمرى وحياتى وكل مااملك ادفعه بس ابنى يرجعله نور عنيه من تانى
سميه :يبقى حضر نص مليون دولار واحجز لغريب فأول طياره على المانيا عشان الدكتور قال لازم يفضل تحت الملاحظه والعلاج التمهيدى للعمليه شهر على الاقل ...
ماهر بفرحه :من بكره ..لا لا من النهارده ...لا انا هقوم اقوله دلوقتى وافرحه ...رمى التليفون على السرير وبيلف حوالين نفسه بلخمه ...رجع مسك التليفون تانى ...سميه انتى متأكده من الكلام ده كويس
سميه بدموع :زى مامتاكده انى بكلم ماهر دلوقتى .
ماهر من غير مايحس حضن التليفون على صدره واتنهد تنهيده طلعت مع دمعه من عينه فنفس الوقت ...بعد التليفون عنه وبص لسميه ...انا هقوله متقوليلهوش انتى اى حاجه
سميه :موافقه بس بشرط
ماهر :ايه هو ؟
سميه :انا اللى هسافر معاه وانا اول وحده هشوفه بعد مايفتح واخده فحضنى .
ماهر :دا بعدك ده ...هتسافرى معاه اه، لكن اول وحده تاخديه فحضنك بعد مايفتح دى تطير فيها رقاب دى ياماما .
ورمى التليفون لناديه وبقى يتخبط حوالين نفسه يمين وشمال مش عارف يركز فاى حاجه وراح على الدولاب واخد اول غيار يجى تحت ايده وجرى على الحمام يغير .
سميه ضحكت والدموع ماليه وشها وحطت ايدها على بوقها وهى شايفه توتر ماهر وحالته وفرحته اللى برجلت دماغه وحتى ناديه مبطلتش تنطيط ثانيه وحده
غير ماهر هدومه وخرج وجرى على الباب وناديه جريت وراه ولف تانى بسرعه
وزق ناديه واخد مفاتيحه وخرج وناديه وراه ...
جميله شافت حالة ماهر وكانت قاعده بتتفرج على التلفزيون قامت وقفت ...فيه ايه ياماهر ؟
ماهر جرى عليها ومسكها من دراعاتها وفضل يلف بيها ...غريب هيرجع يشوف ياجميله ..غريب ابنى هيعمل عمليه ويفتح تانى
جميله :اهدى بس واستنى وقولى جبت الكلام دا منين ..
ماهر :سميه قالتهولى
جميله :وانتا هتصدق سميه ياماهر ؟!
ناديه :لأ ياعمتو ماما بتتكلم بجد وانا بنفسى اللى بعتالها التقارير والاشعات وهى بعتتهم للدكتور وهو رد عليها وبعتتلى الرد كمان ...اهو على التليفون انا ترجمته من الالماني للعربى ...
ابتدت تقرا محتوى الرساله المحوله ..
عزيزتى ..احب ان اخبرك ان الحالة ليست مستحيله ...واننى قمت بالعديد من العمليات الناجحه لحالات مشابهه ونجحت نجاح باهر ...لكن كل عقبات العمليه تكمن فى ارتفاع تكلفتها وغير ذلك فلا توجد اية صعوبه ...ان اخذتم الخطوه وقررتم القدوم لاجراء العمليه ارجو اخبارى بموعد وصولكم حتى اتمكن من حجز موعد العمليه لكم ...وكلما كان قدومكم اسرع كان ذلك افضل للمريض ...
تكاليف العمليه بتكلفة العلاج السابق لها مع الاقامه بالمستشفى طوال تلك المده تقريبا تقدر بنصف مليون دولار
مع تمنياتنا لسيادتكم بالشفاء العاجل
دكتور( .....)
جميله بفرحه :ياما انتا كريم يارب ..انا طول عمرى واثقه ان ربنا هيقف مع غريب عشان قلبه طيب ونضيف ..
ماهر :انا رايح ابلغه وافرحه واخليه يجهز للسفر
ناديه :رجلى على رجلك عاوزه اكون موجوده وانتا بتبلغ غريبووو بالخبر الجميل دا
جميله :وانا والله لاروح معاكم انا كمان
ماهر :طب يلا بسرعه واللى هتقولى هغير هدومى هسيبها وامشى
جميله :لا انا لابسه
ناديه :وانا البجامه دى طالعه موضه وبلوزتها واصله للركبه اهى يلا بينا
خرجو وناديه حطت طرحتها على شعرها وهى خارجه وكملت لف الطرحه فالعربيه وانطلقو على غريب والتلاته قلوبهم بترقص من الفرحه .
وصلو للشقه وماهر رن الجرس بقلبه قبل ايده .
ليل فتحت الباب واتفاجأت لما شافتهم كلهم واقفين وخصوصا من منظر ناديه اللى جايه بهدوم البيت ودى اول مره تحصل ...
ليل بقلق :وه حوصل حاجه ولا ايه ..فيه ايه ياعمى! ..فيه ايه ياخاله ؟
ماهر تخطى ليل ودخل لما شاف غريب قاعد فالصاله وجرى عليه بفرحه وجميله وناديه وراه
ماهر قعد على ركبه قدام غريب ومسك اديه الاتنين وباسهم وحده وحده
غريب باستغراب وهو شامم ريحة باباه :بابا ! مالك يابابا فيه ايه ؟
ماهر بصوت باكى :فيه انى فرحان اوى ياحبيبى ...فيه ان النهارده اسعد يوم فحياتى ...عارف ليه ياغريبى ..عشان النهارده عرفت انك هترجع تشوف من تانى .
غريب بلع ريقه بتوتر وعدم تصديق :بابا انتا بتقول ايه ؟
ناديه :بيقولك انك خلاص هتعمل عمليه وترجع تشوف الدنيا من تانى ياغريبووو .
غريب :لا ياجماعه وحياتكم ماتعملو فيا كده ، دى مش طريقة هزار على فكره .
جميله بحب :والله مش هزار ياقلب عمتك ، وحياتك ياحبيبى هترجع تشوف من تانى .
غريب حس بضربات قلبه بتزيد وتعلى ومد ايده على قلبه يدلكه .
وهنا الكل بصو فاتجاه واحد بعد ماسمعو خبطه وشافو ليل واقعه على الارض مغمى عليها لا بتحرك ايد ولا رجل .
الكل فصوت واحد :ليل !!!
فرعون 2
البارت الواحد والثلاثون 31
ليل كانت بتسمع كلامهم مع غريب وحاسه ان الهوا ابتدا يختفى من حواليها مع كل كلمه ،والدنيا اسودت مره وحده وبقت تسمع صوتهم بعيد اوى ..
مدت ايدها على الباب بضعف تتسند عليه لكنه خلي بيها واتقفل ،وقعت على الارض وهى شايفه ايام سعادتها بتنتهى وكل احلامها بتتبخر قدام عنيها قبل مايغمى عليها .
الكل جرى على ليل بعد ماسمعو الخبطه وبصو شافوها واقعه
جميله قعدت على الارض وشالت دماغ ليل حطتها على رجلها وفضلت تخبط على خدها وهى بتنادى بأسمها لكن مفيش فايده وليل مش بتفوق ...
صرخت فناديه ..اجرى هاتى برفان ولا اى حاجه بسرعه ..
جريت ناديه وماهر بيسأل كل شويه حصلها ايه وجميله تقوله معرفش
اما غريب فمنطقش بأى كلمه لكنه قعد جمب ليل ومد ايديه عليهاوهما بيترعشو وفضل يهز فيها وهو مش قادر حتى ينطق من الخوف ....
ماهر :متخافش عليها ياغريب دلوقتى هتفوق وتقوم وتبقا زى الفل هى اكيد حصلها كده من فرحتها بالخبر اللى سمعته ومشتحملتش الفرحه دى .
لكن غريب مكانش سامع اى حد ولا اى حاجه ومستمر يهز فليل واخيرا قدر يهمس بأسمها
جميله لاحظت ارتعاش جسم غريب وشفايفه وسنانه اللى ابتدو يخبطو فبعض
جميله :غريب متخافش كده ليل كويسه وهتفوق دلوقتى اهدى ياحبيبي
غريب بصوت بيترعش :ههى مبتقومش ليه ياعمتو ...ليل حصلها ايه
جميله مردتش عليه لان ناديه كانت وصلت بالبرفان واخدته منها وابتدت ترش منه على ايدها وتشمم ليل لكن برضو ليل مبتصحاش
ناديه :هو فيه ايه مبتفوقش ليه ؟
لاول مره غريب يحس الاحساس دا ...احساس بالعجز مسيطر على كل كيانه ...خايف على ليل لدرجة الرعب ..اول مره يحس ان عماه مكتفه وهو قاعد ومش عارف يعمل لحبيبته اى حاجه ولا قادر يشوف حالتها ..
جميله ابتدت تهز فيها بقوه اكبر وناديه قربت منها وابتدت تفرك صداغها الاتنين ومفيش ثوانى وليل كانت بتفتح عنيها بصعوبه .
الكل حمد ربنا وليل عنيها راحت بضعف تدور عليه وسط الوشوش لغاية مااستقرو عليه
حست بايدها بين ايديه وارتعاشة ايديه بتسرى فكل جسمها لغاية ماوصلت لقلبها ...ابتسمت بحزن والم على احساس الحب والخوف اللى شايفاهم و حساهم من غريب دلوقتى وهى متاكده انها مسألة وقت وهتشتاق للاحاسيس دى وهتدور عليها مش هتلاقيها ...
غريب اتنهد براحه وهى بتشد على اديه وهمست تطمنه عليها : متخافش ياغريب انى زينه ..
قوموها وقعدوها على الكرسى وطول الوقت غريب مش سايب ايدها ...
جميله دخلت وعملتلها عصير وجابتهولها وغريب جبرها تشربه كله
غريب :طمنينى عليكى ياليل ، ليه حصلك كده ؟
ليل مدت ايدها على خد غريب بحب وابتسامه عكس الالم اللى جواها وهى بتجاوبه :من فرحتى باللى سمعته ياحبة قلب ليل ..مستحملتش من فرحتى وانى عسمع انك هترجع تشوف من تانى ..
غريب ابتسم وضمها ليه بحب : كنت هموت من الخوف عليكى
ليل :بعد الشر عنك ياكل اهلى وناسى ..
قالت الكلمه دى ونزلت دمعه من عينها نزلت غصب عنها مقدرتش تمنعها ...
ناديه :خلاص بقا متكبروش الموضوع بقا ..ليل اهى زى الفل وغريب هيعمل العمليه ويرجع يشوف والدنيا حلوه وخلونا نفرح ..
جميله :ربنا يجعل اللى جاى ليهم كله فرح يارب
الكل :آمين يارب
ماهر :يلا قومى ياليل هاتى اوراقك واوراق غريب خلينى اجهزلكم للسفر فاسرع وقت
ليل :قامت بضعف وشدت ايدها من ايد غريب ودخلت الاوضه جابت جواز غريب ومدت ايدها على بطاقتها لكنها سابتها تانى .
طلعت ومدت ايدها لماهر بالباسبور بتاع غريب ...ماهر اخده منها وقلبه وعدله وهو مستغرب ...فين بطاقتك انتى عشان اطلعلك جوازك ؟
ليل :له انى مهسافرشى الكل بصلها باستغراب لكن الكلمه دى وقعت على قلب غريب زى ماتكون قنبله بعترت اجزائه .
غريب :انتى بتقولى ايه ياليل ؟
ليل :قولت انى مهسافرشى يا غريب
خد ناديه ولا خالتى جميله معاك .
ماهر باستغراب اكتر من موقف ليل :لا مفيش داعى لناديه او لجميله لان سميه هتسافر معانا انا وهو ...
عموما براحتك مادام دى رغبتك ...
هقوم انا انزل عشان الحق اخد التأشيره على الباسبورات ...
وبص لناديه :ناديه اكدى الحجز عند الدكتور او بلغى سميه تأكده ...
وخطى خطوتين ورجع تانى ...اه صحيح تعالا معايا ياغريب عشان هنعدى على البنك نسحب فلوس العمليه من رصيدك ..
غريب شارد ومسمعش ابوه وهو بيكلمه وكل تفكيره ازاى ليل ترفض تسافر معاه !
ماهر :غريب بكلمك ...
غريب :هاه ياحبيبى
ماهر :بقولك تعالا انزل معايا عشان هنعدى على البنك انا وانتا ...لو سمحتى ياليل ادخلى هاتى بطاقة غريب ...
قامت ليل ودخلت جابت بطاقة غريب من جوه وادتها لعمها ماهر
و اخدت غريب من ايده على الاوضه عشان تغيرله هدومه .
ليل بتغير لغريب هدومه وطول الوقت دموعها موقفتش وهى بتتأمل كل ذره فيه ..ملامحه ، شعره ، طوله ، جسمه ، كل الحجات دى قريب اوى مش هتبقا من حقها ولا هتقدر حتى تبص عليها لما تشوف نظرات الاشمئزاز فعيون غريب ...
خلصت لبسه وحضنته مره وحده بكل قوتها ودفنت دماغها فصدره ..
غريب برغم زعله وبرغم جرحه منها الا انه رفع ايده وضمها عليه ولا اراديا مسك خصله من شعرها قربها منه شمها وبعدها دفن دماغه فرقابتها ...
غريب بهمس جمب ودن ليل :فيه حاجه بتحصل انا مش فاهمها ..هنزل دلوقتى لكن اوعدك لما هرجع مش هسيبك غير لما اعرفها ...
واوعى تفتكرى انى هخطى خطوه من غيرك ..اتفضلى هاتى بطاقتك عشان بابا يطلعلك الباسبور ...
ليل بعدت عن حضنه مره وحده وهى بتتخيل رد فعله لما يفتح ويشوف شكلها هيكون ايه ...
ردت وهى بتمسح دموعها :له ياسى غريب انى قولت ممسافراشى ..سافر مع ابوك ومرت ابوك وانى هفضل مستنياك اهنه وصدقنى مش هتعدى لحظه مش هدعيلك فيها ان ربنا يردلك بصرك من تانى ..
غريب اتنهد بزعل وجواه بركان بيفور من تصرف ليل :براحتك ياليل ..براحتك خالص ...وخرج من الاوضه وراح على مكان عصايته اخدها وفتحها بعصبيه...يلا بينا يابابا ...
ماهر طول الطريق شايف غريب وشه ميقصهوش السيف من العصبيه اللى مرسومه على ملامحه ...واستعجب لانه المفروض فالوقت دا يكون اسعد واحد فالدنيا ..وطبعا فاهم ان سبب زعله دا موقف ليل ورفضها انها تسافر معاه .
قضو مشوار الباسبورات وماهر اداهم لواحد يخلصله الموضوع وبعد كده اخد غريب وراح بيه على البنك ...
غريب استغرب من المبلغ اللى سحبه ابوه من حسابه
غريب :ايه المبلغ دا ..هو انا حسابى امتا بقا فيه الفلوس دى كلها ؟
ماهر :من زمان وانا كل ماتجينى فرصه احطلك مبلغ فالبنك لغاية ماحطيت باسمك اللى يخلينى مطمن عليك لو جرتلى اى حاجه ،
وخصوصا وانا شايف طول الوقت سميه وجبروتها وظلمها ومتاكد انها مش هتطولك ولا مليم بعد موتى .
غريب :انا طول الوقت فاكر ان حسابى مفهوش غير تمن العربيه اللى حضرتك حطيتهولى وانا فالكليه !
ماهر :لا ياحبيبي تمن العربيه دى حاجه كده بسيطه انتا اللى عندك اكتر من كده بكتيير ...
طب تعرف ان اكتر حاجه طمنتنى لما نادر خسرنى كل فلوسى وشقى عمرى هى الفلوس اللى باسمك دى وانى مأمن مستقبلك انتا بالذات .
غريب :ربنا يخليك ليا ياحبيبي ويطولى فعمرك ...طيب ماخدتش الفلوس دى ليه وانتا فعز زنقتك وفعز احتياجك ليهم بدال ماتاخد من ناس غرب ؟
ماهر:عشان الفلوس دى انا حالف ان محدش يقربلها غيرك انتا ولا تتصرف غير عليك .. المهم يلا بينا نتغدى مع بعض عشان انا جوعت من الفرحه اوى
غريب :يلا يااحسن اب فالدنيا
اما عند ليل ،فبعد ماخرج غريب وماهر قعدت وسط ناديه وجميله وهى شارده وبتحاول تتخيل شكل ايامها اللى جايه من غير غريب هتكون عامله ازاى ومقدرتش تتخيل حتى مجرد التخيل ...
جميله حاولت تغير مود ليل اتصلتلها بجواهر وفتحت الاسبيكر وفضلو يتكلمو كلهم معاها لغاية ماجه الوقت اللى بلغوها بعملية غريب .
جواهر سكتت شويه لما فهمت دلوقتى سبب الديقه اللى حاساها فصوت ليل من اول المكالمه وعرفت احساسها فالوقت دا
جواهر :ليل
ليل :ايوه ياجواهر
جواهر :اللى بيلاقى حاجه دهب ويتاكد من معدنها وغلاوتها..بعد كده مهما الحاجه دى اتغير شكلها الخارجى بيفضل دايما صاحبها عارف ان الحاجه دى قلبها دهب لانه هو الوحيد اللى عارفها كويس ...
بعكس اى حد تانى ممكن يشوفها لاول مره يفتكر انها ملهاش اى لزمه وميعرفش ولا يقدر قيمتها ...فهمانى ياليل ؟
ليل بتنهيده :النفوس عتتغير ياجواهر والعين عشاقه
جواهر :بس عشق القلب بيعمى العين ويلغيها
ليل سكتت متكلمتش وجميله فهمت القصد من كلامهم ورفعت ايدها طبطت على ضهر ليل بحنيه فمحاوله منها انها تطمنها ..
لكنها فنفس الوقت اتسلل القلق لقلبها وهى بتفكر ياترى فعلا غريب لما يرجع يشوف هل هيتقبل ليل ولا ؟؟
*********
بعد اسبوع
غريب فالمطار والكل حواليه بيودعه وعلى راسهم ليل ..
غريب اتنهد وهو بيسلم على ليل اخر وحده :انا مش عارف اقولك ايه ياليل ..
بس تأكدى ان تصرفك وإصرارك انك تسيبينى لوحدى فاكتر وقت محتاجلك فيه ..صدقينى طفى جوايا حتى فرحتى برجوع نور عنيا ...
انا لو مش حاسس كل دقيقه بحبك ولهفتك كنت قولت انى مش مهم عندك ولا افرق معاكى ...عموما بسيطه ياليل ...
كلها ايام وهرجع اشوف من تانى واول حاجه هعملها لما ارجع هبص فعنيكى وانا بسألك عملتى كده ليه، وانا متأكد انك حتى لو كدبتى عليا عيونك لايمكن هيكدبو ...خلى بالك على قلبى وروحى اللى سايبهم امانه معاكى .سامعانى
ليل هزت دماغها وهى فحضنه وشددت على حضنه واتنفست بعمق وهى بتشم ريحته لآخر مره وعارفه ان دا آخر حضن ليهم ... بعد عنها بصعوبه واد ايه اتمنى انه يقدر يشم ريحة شعرها لآخر مره وتكون هى آخر حاجه ياخدها معاه من مصر .
طلع غريب طيارته والطياره طارت
وليل بصالها وشايفه غريب وهو بيبعد عنها ومن جواها متاكده ان البعد دا مفيش من بعده رجوع تانى وحطت ايدها على قلبها وهى حاسه انه اخد دقاته معاه ..
ركبت مع خالتها جميله عربية قاسم، ونادر وناديه ركبو فعربية نادر
جميله :خدنى على جواهر ياقاسم طول الفتره اللى فاتت وانا قلبي زى النار عليها و مشغوله مع غريب وماهر وملخومه بسفرهم ومش قادره اجيلها
قاسم :اطمنى جواهر زى الفل وماما مش مقصره معاها فحاجه والله
جميله :عارفه والله ياحبيبى ان ماجده مامتك ست اصيله ،ومفيش منها ربنا يحفظها ويباركلكم فيها يارب ..اهو انا بقا مش محرجه غير منها هى، وحاسه انها تعبت اوى طول الفتره اللى فاتت دى ..وعشان كده انا هريحها واقعد مع جواهر يومين تلاته .
قاسم :ياخبر دانتى تنورينا والله ياطنط
جميله :ياحبيبى ربنا يخليك
ليل طول الوقت شارده لغاية ماقاسم وصل بيها قدام العماره بتعاتها ووقف وهى برضو على نفس شرودها
جميله :ايه ياليل مش هتنزلى ياحبيبتى ؟ اطلعى ياروحى ارتاحيلك شويه وشك بقا اصفر زى الكركم فالاسبوع دا
ليل فتحت الباب ونزلت رجلها وبصت لفوق على بلكونة شقتهم ولما فكرت انها هتطلع مش هتلاقى غريب فالشقه رجعت رجلها تانى جوا العربيه ودخلت فنوبة بكا ...خدونى معاكم حدا جواهر انى مهقدرشى اقعد لحالى دلوكيت ..
قاسم :طيب اهدى طيب ..حاضر هاخدك لجواهر بطلى عياط، والا والله اقول لغريب لما يتصل هو موصينى عليكى وقالى اوعا حد يدايقها وانا مش موجود دى امانه عندك .
كلام قاسم خلاها زادت فالبكا اكتر وقاسم وجميله طول الوقت مش عارفين يسكتوها ازاى لغاية ماوصلو ..
طلعو الشقه واول ماليل دخلت جريت على جواهر اللى كانت نايمه فالصاله وقعدت قدامها واترمت فحضنها وكل شهقه وشهقه تطلع منها تشق قلب جواهر .
جواهر طبطت عل ضهر ليل وهى حاسه بالنار اللى جواها واللى مهما حاولت طول الاسبوع اللى فات دا تهديها بكل اشكال الكلام لكن كل مادا والنار بتزيد وتاكل فقلبها وروحها اكل
قاسم :لا ياليل بقولك ايه جواهر بتتوحم اوعى تعيطى جمبها احسن العيل يجى كئيب ويفضل يعيطلنا طول الوقت ارميه هو وامه من البلكونه انا بقولك اهو ...
ليل بعدت عن جواهر ومسحت دموعها وقامت وهى حاسه ان كلام قاسم سكين انغرزت فقلبها ..
ليل وهى بتبعد لورا :معلهش سامحونى والله نسيت ..والله العظيم نسيت انها عتتوحم ومينفعش تبص علي...
لفت ونزلت على تحت جرى لما افتكرت ستات البلد الحوامل وهما بيدارو وشهم منها لماتعدى من قدامهم وهما فشهور الوحم ،ويخافوا احسن يبصو عليها يجى العيل شبهها
قاسم جرى وراها وجميله وجواهر الاتنين بينادو باسمها لكن ليل مش بترد ..
قاسم اخيرا قدر يحصلها ومسكها من دراعها لفها عليه بقوه ووقفها قدامه وهو بينهج :
يعنى الوشك بقلم على وشك دلوقتى اكسر صف سنانك ...انتى ازاى تفكرى انه ييجى فدماغى حاجه زى كده ؟ مالك ياليل بس ...والله غريب هيخف وهيرجعلك وهو زى الفل متعمليش فنفسك كده
والله والله انا مقصدت حاجه من اللى انتى فهمتيها دى خالص .
ليل هزت دماغها بموافقه وهى باصه للارض وهى بتقول لنفسها :اكيد قاسم مكنشى يقصد بس هى مش عارفه ليه بقت حساسه من اقل كلمه وحاسه انها بقت زى البلونه هتفرقع من اقل حاجه ..
اخدها قاسم ووصلها شقتها بعد مارفضت ترجع معاه عند جواهر ، وبعد مافضلت تحلفله انها مش زعلانه وانها هتيجى لجواهر مره تانيه .
قاسم سابها على راحتها لما شاف انها منهاره ومش حمل اى مجادله وبالفعل وصلها لباب الشقه وممشيش الا لما دخلت وقفلت الباب ..
اول ماليل دخلت الشقه راحت على تليفونها اللى كان بيرن برقم جواهر وشافت عدد الاتصالات من جواهر
ردت عليها مع انها مكانتش قادره تتكلم نص كلمه، بس خافت احسن جواهر تزعل او تتدايق ودا يأثر على حالتها النفسيه وعلى حملها
ردت عليها وهى بتحاول تكون طبيعيه على اد ماتقدر ،وقدرت فعلا تقنع جواهر انها مش زعلانه من قاسم وانها هى اللى مكنتش مستحمله اى كلام من اى نوع واكيد هى عارفه السبب وعاذراها ...
ليل قفلت مع جواهر ودخلت اوضتها هى وغريب وقعدت على السرير ومسكت آخر تيشرت كان لابسه واللى لسه ريحته فيه ودفنت وشها فيه وفضلت تبكى بكل حرقه لغاية ماتعبت ونامت وهى لسه حاضنه التيشرت .
*********
قاسم وصل لشقته واول مادخل شاف جواهر بتبصله وهى رافعه حاجبها ومستعده للهجوم .
قاسم :ورحمة ابوكى ياشيخه منتى متكلمه ...انا عارف هتقولى ايه وعندك حق فكل كلمه ...اسكتى بقا الا صحبتك نشفت ريقى من كتر الاسف والاعتذار ...واكيد انتى متاكده انى مكنتش اقصد المعنى اللى وصلها ده خالص .
جواهر اتنهدت واتكلمت بعصبيه :عارفه ومتاكده بس برضو مدايقه على ليل ..
قاسم قعد جمبها ومسك ايدها :والله حتى انا مدايق عليها وعلى حالتها دى، وكمان مدايق على غريب اللى رفض ليل السفر معاه مخلى نفسيته تحت الصفر ،ومستغرب على مصدوم على مش مصدق على كل حاجه
جواهر : معلش ربنا هو العالم باللى فالقلوب وهو اللى بيصبر وبيطمن .
***********
وصل غريب لالمانيا هو وباباه وفضلو فالمطار تلات ساعات لغاية ماوصلت طيارة سميه ..
سميه ماشيه وبتتلفت على غريب واول ماشافته بقت تمشى بسرعه فاتجاهه وقلبها بيرفرف من الفرحه
وصلت عنده وهمست بحب :غريب حبيبي
غريب وقف وفتح اديه لامه اللى واحشاه بدرجه رهيبه وهى اترمت فحضنه وشوقها ليه ميقلش عن شوقه ليها ..
بعد السلام والاحضان سميه بعدت عن حضن غريب وسلمت على ماهر
واخدو شنطهم وطيران على الفندق حطو شنطهم فاوضهم وعلى المستشفى علطول
الدكتور استقبلهم بنفسه بناء على الميعاد اللى محددهولهم واخد غريب لاوضة الاشعه وابتدا معاه فورا وطلعله علاج وطلب منه يبتدى فالقطرات والعلاج لغاية مايوصل النتيجه المطلوبه ويحدد بعدها ميعاد العمليه كل التعليمات دى كانت بتترجمهالهم ممرضه لبنانيه استعانو بيها كانت شغاله فالمستشفى .
نظام المستشفى كان ان مفيش مرافقين تفضل مع المريض وكل متطلباته هيقوم بيها طاقم المستشفى التمريضى حتى الاكل واللبس والعلاج وكل حاجه لانها كانت اكبر مستشفى خاصه بالمانيا ...
رجع ماهر وسميه الفندق لكن قبل مايرجع غريب طلب منه انه يشتريله خط عشان يعرف يتكلم مع ليل وبمجرد مااشتراله خط الممرضه اللبنانيه واللى كان اسمها ريام شغلتهوله ودخلتله رقم شبكة المستشفى .
**********
اما عند قاسم اهله كلهم طلعو لشقته لما عرفو ان جميله ام جواهر موجوده ورحبو بيها جدا .وقضو معاها وقت جميل وهى مستمتعه بوجودها وسطهم وشايفه فرحتهم بحمل بنتها
جميله وماجده يومها حضرو الاكل وطبخو مع بعض واتغدو كلهم سوا وبعدها نزلو على شقتهم
قاسم نزل ورا اهله على شقتهم تحت وساب جواهر مع مامتها :
استغل تجمعهم وشاف انه يفاتحهم دلوقتى فموضوع طلب عمه ماهر عشان لما يرجع هو وغريب يرد عليه وكفايه عليه الشعوطه اللى شعوطهاله طول الايام اللى فاتت دى
قاسم :ياجماعه عاوز اقولكم حاجه مهمه ...ماهر من يجى اسبوع او عشر ايام طلب ايد موده منى وانا قولتله هاخد رأيهم وارد عليك .
موده وقفت وزعقت مره وحده :من عشر تيام وساكت ياحيوان ؟
هنا موده تداركت نفسها وقعدت وهى بتعدل فنضارتها باحراج من الموقف :أااا اقصد يعنى أاااا
قاسم :متوأوئيش كتير وتحاولى تصلحى اهدى واقعدى واتبطى شويه
عبد السلام بص لموده اللى قاعده مرتبكه وبعدها بص لماجده اللى برضو بتبص لموده وشايفه رد فعل من بنتها وخجل اول مره تشوفه .
قاسم :انا عن نفسى موافق وشايف ان ماهر انسان ميتعيبش واحب ابلغكم ان موده كمان موافقه
ماجده :طيب وفرق السن ياقاسم
قاسم :ياامى بنتك داخله على ٣٢ ومش صغيره اللى قدها بيفنشو وبيقولو يلا مسك الختام
ماجده :ولد متقولش على اختك كده دى لسه فعز شبابها
قاسم :طب عز بيسلم عليكي وبيقولك جوزيها لماهر ابوس ايدك
عبد السلام :على فكره انا كمان رأيي من رأى امك ياقاسم ، فرق السن كبير فعلا .
وهنا كان دور موده فالكلام وهى بتعدل نضارتها وبتتكلم بعصبيه :على فكره فرق السن مش مقياس لاى حاجه ..اهم حاجه التفاهم والاتصال الفكرى بين اى اتنين ودا هو اللى بيلغى اى فروق لو كان موجود ..ودا موجود بينى وبين ماهر .
قاسم :شفتو ..اهو دا اللى انا كنت خايف منه ..اهى بنتكم طلع ليها اتصال فكرى معاه ..بالكم انتو الاتصال الفكرى دا اصعب من اتصال التليفونات ...ياعم جوزوهم بدال ميفضحونا ويحطو راسنا وراس فكرى فالطين .
عبد السلام بص لموده شويه وهو ساكت وبعدها اتكلم :
بصى يابنتى انا عمرى ماغصبتك ولا غصبت اى حد فيكم على حاجه ضد ارادته فيوم من الايام ، وكل مره كنتى بترفضى فيها عريس بيتقدملك مهما كانت مواصفاته او مميزاته مكنتش بعترض ..عشان بقول اكيد مش نصيبها ومش هو ابو عيالها ..ودلوقتى واناشايف اصرارك على ماهر دا مقداميش الا انى اوافق على اختيارك ..لانى اظن ان دا ابو عيالك اللى ربنا كاتبلك تكونى على اسمه من يوم مااتولدتى .
قاسم بفرحه :اشطا بابا وافق ...وبص لامه :وانتى ياماجده دنيتك ايه ؟
ماجده اتنهدت :والله اللى تشوفوه ...اهم حاجه موده تكون سعيده ومرتاحه ...انا هتمنى ايه من الدنيا اكتر من سعادتها .
قاسم بص لاحمد ومحمود :وانتو ياجوز الخيل رأيكم ايه
احمد :انا موافق جدا
محمود :وانا شرحه موافق جدا جدا
قاسم :على خيرة الله نقرا الفاتحه
عبد السلام بزعيق :يبنى فاتحة ايه اللى هنقراها من غير العريس دي ..
قاسم :اه صحيح نسيت دا العريس لازم يكون موجود ...اخ الفرحه بتنسى والله ...مبروك ياموده ياحبيبتى ...وقال فنفسه بالشفا ياماهر.
موده قاعده وسطهم ومش مصدقه انهم وافقو على ماهر ،واللى مش مصدقاه اكتر ان ماهر اتقدملها فعلا وطلب ايدها ....بس لحظه! داقاسم قال انه طلب ايدها من عشر تيام؟! ..
يعنى من يوم ماجالها قاسم وقلها ابعدى عنه ...وبصت لقاسم وديقت عنيها وبصتله من فوق النضاره بعد مافهمت لعبته المعفنه اللى عملها فغريب وليل قبل كده ..
قاسم لاحظ بصتها دى وعرف انها فهمت وقام بسرعه وجرى على بره وموده قامت وجريت وراه وهى بتزعقله :خد يله هنا ...والله ياقاسم مهعديهالك ..
قاسم رمالها بوسه فالهوا وهو على باب الشقه قبل ماياخد شبشبه ويقفل باب الشقه ويطلع جرى على شقته .
*********
اما عند ليل
صحيت من النوم وفضلت قاعده على السرير ولسه حاضنه تيشيرت غريب وساكته وباصه للفراغ وهى بتفتكر الاسبوع اللى فات كله وهى بتحاول متفوتش لحظه بعيد عن حضن غريب ...
كانت تأكله وتشربه وتحميه وتسرحله وحتى النوم مكانتش تخليه ينام غير على صدرها وتفضل حاضنه دماغه ...كانت تسهر طول الليل تتأمل فيه وتبوس فيه بلهفه ودموعها تغرق كل وشه .
كتير كان غريب يستغرب من تصرفاتها دى ويقولها وهو بيضحك ...مش عارف ليه حاسك بتودعينى ..
ترد عليه ليل : انى عحبك قوى ياغريب ..كانت تقولهاله الف مره فاليوم ...كانها بتأكدهاله وتقوله هموت لو سبتنى .
فضلت على حالها دا كتير مقطعش شرودها غير رنة التليفون ..مسكته بلهفه وكان رقم غريب عرفت انه غريب.. فتحت السكه ومع اول كلمه منه ومع نطقه لاسمها انهارت وفضلت تبكى بكل قهر .
غريب بخوف :ليل ...ليل اهدى وردى عليا مالك ..ليل ارجوكى كلمينى ..وكل اللى سامعه منها صوت شهقاتها المتواصله وبس
غريب اتنهد بقلة حيله وهو بيسمعها اخيرا بتنطق وتقوله :انى عحبك قوى ياغريب ...واتوحشتك قوى ..من ساعات اتوحشتك ..هعمل ايه فاللى جاى كله ..قالت الكلمه دى وغصت واتخنقت بدموعها
غريب فاكر انها بتتكلم عن مدة علاجه : ياليل اهدى بس ..طيب يابنت الناس منتى اللى مرضيتيش تيجى معايا ..وانا مرضيتش اضغط عليكى ولا اغصبك مع انى بموت من غيرك وتعبان اضعاف تعبك ...
ولا رضيت الزمك بوعدك اللى وعدتيهونى اول مارجعتى من البلد ..فاكره قولتيلى ايه ياليل يومها ..قولتيلى انك عمرك ماهتبعدى عنى ولا تسيبينى لوحدى تانى ابدا ...واديكى سيبتينى ..
ليل :لو عرفت اسبابي هتعذرنى
غريب:اهى اكتر حاجه مزعلانى منك ياليل هى دى ..انك عندك اسباب وحجات مخبياها عنى ..المهم قوليلى قاعده فين دلوقتى ؟
ليل :فبيتنا
غريب :طيب ليه ياليل كده ..انا مش قولتلك تروحى الفيلا تقعدى معاهم ومتقعديش لوحدك ؟
ليل :انى مقاعداش لحالى انى قاعده معاك ..انتا حوالي فكل حته ..ومش هسيب اهنه واروح لاى موطرح ..خلينى اتنفس من الهوا اللى كنت عتتنفس منه ..
غريب :طيب اكلتى
ليل :شبعانه ياحبة القلب والعين
غريب :ياليل متعذبنيش ارجوكى ..ياليل انا كده قلقي عليكى ممكن يموتنى
ليل :بعد الشر عنك ياقلب ليل
غريب :طيب سلام دلوقتى ياليل هكلمك كمان شويه عشان ميعاد العلاج ..
قفل غريب وهو سامع صوت خطوات الممرضه بتقرب منه ..
ريام :هلو غريب كيفك هلا
غريب :الحمد لله تمام
ريام :معلش فيك تتمدد لاحطلك القطرات بعيونك بليز
غريب سمع كلامها ونام وهى قربت منه وحطتله القطره فعنيه وهى بتتأمل جمال عنيه وصفاء لونهم وشكل رموشه الطويله ..
ريام بدون قصد :ياالله شو حلوات
غريب :هما ايه
ريام باحراج بعد ماانتبهت لكلامها ...هههه عيونك كتير حلوات ربى يردلهم النضر ويرجعو يشوفو الضو من جديد
غريب :امين يارب ...متشكر اوى يااا
ريام :اسمى ريام
غريب :اهلا وسهلا ياريام ..اسمك جميل
ريام :هلا فيك ..هاد من زوئك ..راح امشى هلا بدك شي ..
غريب:لا متشكر جدا .
ريام :مافى داعى للشكر هاد شغلى
خرجت ريام وهو رجع مسك تليفونه وطلع اسم عمته جميله واتصل بيها وعرف انها عند جواهر ...اتصل بناديه وبنادر ووصى الكل على ليل وانهم يسألو عليها دايما ويحاولو ياخدوهت الفيلا ومحدش يسيبها لوحدها .
بعد ماخلص اتصل بمريم اللى نسى يكلمها ولا يقولها بعمليته واكيد هتزعل منه اوى لما تعرف انه سافر من غير مايقولها ...
قال اسمها والتليفون اتصل عليها وجرس وبعدها جاله ردها ..
مريم واقفه فالمحل وبتتعامل مع زبونه وبتوريها انواع الماكياج وردت وهى مشغوله حتى مبصتش فالرقم
مريم :ايوه
غريب :ازيك ياماما مريم عامله ايه
مريم :غريب حبيبي ..اخبارك ايه ياقلب مريم ..
غريب :الحمد لله تمام
مريم :واخبار اللى عندك كلهم
غريب :انا مفيش عندى غير بابا وماما سميه بس ..هما عندك انتى دلوقتى .
مريم ديقت حواجبها باستغراب ..ازاى عندى يعنى ؟
غريب :يعنى انا مش فمصر ..انا فألمانيا دلوقتى
مريم شالت التليفون وبصت للرقم شافته رقم خارجى فعلا :فى المانيا ؟ بتعمل ايه عندك ..وسافرت امته
غريب :سافرت امته ..النهارده ...
بعمل ايه ..هعمل عمليه عشان ارجع اشوف مره تانيه .
مريم كانت ماسكه عليه فيها اقلام روج وقعت من ايدها اول ماقال كده وصرخت فالتليفون :بتتكلم بجد ياغريب
غريب بضحكه :وبعد ماأخلص عملية عنيا هعمل عمليه لطبلة ودنى اللى اتخرمت من الصريخ دا
مريم دموعها نزلو وحطت ايدها على دماغها وغمضت عينها ومش عارفه تتكلم من كتر الفرحه تنطق حرف وتسكت ..
غريب : ايه ياماما رحتى فين
مريم :معاك ياقلب امك ..الف مبروك ياحبيبي ...ربنا يتمم شفاك على خير يارب ياروحى ..والله دا احلى خبر سمعته يمكن طول حياتى كلها ..
وهنا كانت الست لمت المكياج اللى وقع من ايد مريم وماداهولها ..
مريم :اخترتى ايه
الست :هاخد ده ..بكام ..
مريم :ببلاش ..وخدى ده ..وده كمان ..وده عليهم ..انتى وشك حلو اوى عليا وسمعت على وشك احلى خبر فالدنيا .
الست بفرحه :ربنا يسعدك دايما يارب وتفضلى تسمعى اخبار حلوه كده طول عمرك ..
مريم :طب خدى قلم الكحل دا كمان .
غريب بضحكه:ايه دا كله هتفلسى كده .
مريم :ياحبيبي فداك كل فلوس الدنيا بحالها...والله لو ربنا ردلك نور عنيك لاوزع رز بلبن على المنطقه كلها .
غريب اتنهد :ربنا يخليكى ليا يارب .
مريم:مالك ياغريب حاساك مش فرحان .
غريب :ليل ياماما مش مخليانى عارف افرح
مريم :ليه كده
غريب :احوالها مش عاجبانى خالص ..طول الوقت مخنوقه وتبكى بسبب ومن غير سبب ..حتى قعاد فالفيلا رفضت تقعد ومصممه انها تقعد فالشقه لوحدها وانا خايف عليها من القعده لوحدها وهى فحالتها دى ممكن تتجنن ..
مريم باستغراب :هى مسافرتش معاك ؟
غريب :رفضت ..ومعرفش ايه السبب ..انا مبقتش فاهم اى حاجه ياماما بخصوص ليل ..طول الفتره اللى سبقت سفرى كانت بتتصرف تصرفات غريبه ملهاش اى تفسير .
مريم :طيب بص بخصوص ليل انا عندى حل ...اميره ، هخليها تروح تقعد معاها طول فترة سفرك وتسيب سكن الطالبات وبكده مش هتقعد لوحدها لاليل ولا نهار ...
وعايزه اقولك حاجه ياغريب ...ليل بتعشق التراب اللى بتمشى عليه واى تصرفات بتتصرفها اتاكد انها نابعه من حبها ليك ..
غريب بتنهيده :المشكله انى عارف كده ومتأكد منه كمان ...المهم هتقولى لاميره تروح لليل امته ؟
مريم :هقفل منك واكلمها واخليها من بكره تكون عندها .
غريب :ريحتينى اوى ياامى ربنا يخليكى ليا .
مريم :ويحفظك ليا ياقلب امك ..يلا سلام هكلم اميره واطير على راضى اقوله الخبر الجميل دا ..دا هيفرح اووى ..
قفلت مريم مع غريب واتصلت فورا بأميره اللى طلب امها جه على هواها عشان هتعرف تشوف نادر هناك اكيد فكل مره هيزور فيها ليل وتقدر تقضى معاه اطول وقت ممكن .
.وزى ماتكون كانت مستنيه المكالمه دى وبعد ماخلصتها قامت تلم فحاجتها زى المجنونه .
اما مريم فبعد المكالمه قفلت المحل وطارت لفت لراضى فالسوبر ماركت وبلغته الخبر وهو كمان فرح لغريب اوى .
*********
عند ماهر فالفندق ..
وهو بيشترى خط لغريب اشترى ليه هو كمان خط وشغله ..
واول رقم يرن عليه هو رقم موده اللى زعلان منها جدا من ساعة ماسابت الشغل فجأه وخلت قاسم يبلغه بقرارها دا ومن بعدها قفلت تليفونها وحتى حسابها بتاع الفيس مبقتش تفتحه واختفت مره وحده ..
ولولا انشغاله فتحضيره لسفره هو وغريب كان هيكونله تصرف تانى خالص معاها ..رن رنتين وفالتالته سمع صوتها اللى واحشه لدرجة الجنون
موده :الووو
ماهر :الو فعينك ياموده
موده بصت فالتليفون ورجعته على ودنها مره تانيه وردت بهيام :ماهر
ماهر :ايوه زفت ..ايه بقا حكايتك وايه التصرفات دى ياست هانم .
موده بدلع :تصرفات ايه
ماهر :موده متجننيش وتنرفزينى اكتر منا متنرفز عشان مخرجلكيش من السماعه دلوقتى اخنقك وارجع تانى ..
موده بضحكه :طيب اهدى بس وانا هفهمك كل حاجه .
ماهر :هتفهمينى ايه بس ياموده
موده :اسمعنى بس ...وابتدت تحكيله على اللى قالهولها قاسم وهو كل ماتتكلم يشتم فقاسم ويتحلفله فسره ...
موده :وبس كده
ماهر :انتى هبله ياموده على فكره عارفه ده .
موده :اه قاسم دايما يقولى الكلمه دى
ماهر بضحكه :ايه الاعتراف السهل دا
موده :وهنكر ليه طيب مالحقيقه مسيرها بتبان .
ماهر :طيب بحبك ياهبله انتى
موده : لا ياماهر عيب الكلام دا دلوقتى ..خليه ورا الجواز انا مش متعوده على كده ..
ماهر :عيب الكلام دا !..وخليه بعد الجواز ؟ يبنتى دنا قولتلك بحبك ؟!
موده :ايوه منا واخده بالى وبرضو عيب .
ماهر :لا هبله هبله يعنى مفيش هزار .
**************
غريب اتصل بقاسم
قاسم بنوم :الووو
غريب :ايوه ياقاسم
قاسم :غريب ؟ وبص فالساعه لقاها اتنين بعد نص الليل .
انتا متصل بيا دلوقتى متعرفش انك لو عندك نهار عندنا ليل يابنى آدم انتا .مش تراعى فرق التوقيت
غريب بضحكه :فرق توقيت ايه ياعبيط انتا...مفيش فرق توقيت بين مصر والمانيا .
قاسم :يعنى انتا عندك الساعه اتنين برضو وبتتصل ..يااخى انتا احيانا بتبقى عليك حجات تخلى الواحد يخرج عن شعوره ويشتم غصب عنه مهما حاول يتوب عن الشتيمه بترجعه ليها تانى ..
بتتصل ليه دلوقتى وتقلق منامى وانا بكره ورايا شغل وشحططه يازفت .
غريب :مجاينيش نوم قلت اكلمك اتسلى معاك شويه .
قاسم :لا والله ..دا على اساس انى مراتك يعنى ولا ايه ..متروح تكلم مراتك ياعم
غريب :لا ليل كل مااكلمها بتعيط وتقطع قلبي عليها .
قاسم : يااعمرى ..وطبعا سبت النكديه وجايلى عشان افرفشك انا ..وقام واتعدل وقعد على السرير بغلب ...ارغى يلا قول هتقول ايه وخلصنى .
غريب بيضحك على حالة صاحبه :معرفش اقول ايه معنديش كلام اتكلم انتا ..
قاسم :استغفر الله العظيم ياربي على بلاوي الليل واخره دى ...
وبعدها غير صوته وقلد صوت ست وهو بيقوله :
ايوه ياغروبه ياحبيبي عاوزنى اقولك ايه ياقلبي ..اكيد عاوز تعرف انا لابس ايه دلوقتى صح ...بص ياسيدى انا لابس فنله قوطونيل بحمالات لكن ايه واااااو ...
ولابسه شورط اسود مرسوم عليه ورق شجر بس ايييه نار نار نار ...تحب افتحلك كاميرا ياروحى تشوف بنفسك وانزلك حماله الفانيلا واوريلك سمانة الكتف .
غريب مبقاش ماسك نفسه من الضحك : انتا نسيت انى مابشوفش ولا ايه !مش قولت انا ..هو مفيش غيرك اللى هيمشى الزهق ..
قاسم :انا تحت امرك ياروحى فاى وقت ، لو حسيت بشوية زهق صغنونين اد كده اهو، تتصل بيا علطول وميهمكش ..الصبح ..
الضهر ..المغرب ..الساعه اتنين بعد نص الليل ..هتلاقينى متلقح هنا ومستني اتصال جنابك ...يلا بقا سلام عشان جاتنى مكالمه تانيه ..واه متنساش تحولى كارت ابو ميه بعد المكالمه ..سلام ياعمرى ..
امووواه ..وقفل السكه فوش غريب ..
غريب ميت من الضحك على قاسم وكلامه وبعد ماقفل قاسم السكه فوشه .حط التليفون تحت المخده ونام وهو حاطط ايديه تحت دماغه وبيحلم باليوم اللى هيرجع يفتح فيه واول واكتر حاجه بيتمنى يشوفها قدامه بعد مايرجع يشوف هى( ليل)اللى حرمته من الامنيه دى
قاسم قفل السكه فوش غريب ورمى التليفون وهيرجع ينام بص لقى جواهر صاحيه وسانده دماغها على دراعها وبصاله ومديقه عنيها وشبح ابتسامه مرسوم على وشها .
جواهر بتمثيل : ايا خاين يارخيص مسكتك بالجرم المشهود بتخونى الساعه اتنين بعد نص اليل! وجمبى، وعلى سريري ومع مين ..مع ابن خالى ..
طب كنت خونى مع حد غيره مش اقرب حد ليا ...وعملت ايدها مسدس ووجهته على قاسم
قاسم :لا ياجواهر لا متموتنيش ابوس ايديكى ..اقولك خدى الكارت ابو ميه مش عاوزه بس سيبينى اعيش ...
جواهر :متحاولش ..لايسلم الشرف الرفيع من الاذي حتى يراق على جوانبه الدمُ وضربت قاسم بايدها وهي بتعمل بيو بيو بيو
قاسم مسك قلبه:ااااه كده قتلتينى يامجرمه وخليتى الدم طرطش على الفانله والشورت ووسخ ورق الشجر ..بوظتى الطقم اللى باكل منه عيش ليه كده لييه..
جواهر ضحكت وضربت قاسم ومسكت المخده وحطتها على دماغه بعد مانام وبيمثل انه ميت ...نام بقا كفايه ارتاحلك شويه وراك شغل ..
قاسم :وهو ابن خالك اللى يعرفه يرتاح برضو ..قال ايه بيتصل بيا الساعه اتنين بالليل زهقان البيه وعاوزنى اسليه ..عيله ضاربه اقسم بالله .... واتكلم بهمس بقولك هى امك نايمه فين ؟
جواهر بهمس زيه :فالاوضه التانيه ..ليه
قاسم بنفس الهمس :لا ولا حاجه بطمن عليها بس ..
جواهر :لا اطمن هى زى الفل .
قاسم :خليكى انتى زى الفل ..وامك زى الفل ..والناس كلها زى الفل ..وانا الوحيد اللى زى الزفت ...طب والله بس تيجى يامرجان الكلب لاطلع الحرمان اللى انا فيه دا على جتتك ..
إن ماذنبتك كل يوم ١٢ ساعه واوقفك على الحيطه وانتا رافع ايديك وواقف على رجل وحده مبقاش انا قاسم
ومسك المخده وحطها على دماغه وربع ايديه ونام وجواهر مش مبطله ضحك عليه وعلى حالته ...
فرعون 2
البارت الثانى والثلاثون 32
ليل قامت بعد ماسمعت الجرس بيرن والغريبه ان الساعه كانت يادوب ٨ الصبح ...راحت تفتح وهى بتسأل نفسها ياترى مين اللى بيخبط عليها فالوقت دا ..
واتفاجأت على الباب بأميره واقفه وماسكه شنطه كبيره فايدها .
اميره :مفاجأاااااه ...
ليل :اميره ؟! خشى ياحبيبتى تعالى .. وسألتها وعينها على الشنطه اللى فايدها :حوصول حاجه معاكى ولا ايه ؟
اميره :متخافيش محصلش حاجه ..جايه اقعد معاكى بقرار جمهورى من ماما وغريب لغاية ماغريب يرجع ..وعندى اوامر مشدده انى مسبكيش لوحدك ابدا .
ليل بفرحه :صوح! ..طب والله العظيم ديه احلى خبر ..انى فعلا كنت محتاجه لاى حد معاى اليومين دول الا عقلى قرب يشت منى ...
تعالى تعالى دانتى جيتينى نجده من السما والله ..ومسكت الشنطه منها ودخلتها واميره دخلت وقفلت الباب وراها .
ليل دخلت شنطة اميره فالاوضه اللى كانت بتبات فيها الاول واللى كانت اوضة نادر سابقا ...
ليل :هتنامى اهنه يااميره ..حلوه الاوضه ولا تنقلى فالاوضه اللى جمبها .
اميره :لا دى كده فله اوى هو انا كنت طايله ..داحنا فالسكن كنا خمس طالبات فاوضه وحده عاملين زى السردين ..
طب دى الاوضه دى على كده قصر بالنسبالى
ليل :خدى راحتك ياحبيبتى وغيرى خلجاتك عبال مااحضر الفطور .
اميره :لا ارتاحى انتى باين عليكى تعبانه ومرهقه انا هغير واحضر الفطار ...
ليل هزت دماغها لاميره بالموافقه لانها مكنش ليها طاقه لاى جدال فالوقت دا حتى ولو بسيط ،وخرجت راحت على اوضتها وقفلت الباب ونامت على السرير وهى ماسكه تليفونها وجايبه على صورة غريب وبتتأمل فيها ...
طلعت من الاستوديو بعد ماشافت اشعار جالها على ايميل غريب المفتوح عندها من حد من اصحابه بيعلقله على البوست اللى كتبتهوله ليل من يومين ..واللى كان بيطلب فيه من الناس انهم يدعوله واللى كان كالاتى (احتاج جدا للدعوات فى هذه الايام من كل من يعرفنى ..لعل احدكم اقرب الى الله منى ويرد الله لى بصري بفضل دعوته )
البوست عدى ال٨٠٠ تعليق وكل تعليق بدعوه طالعه من القلب ولسه الناس مستمره تدعيله لحد اللحظه دى ...
دخلت ليل على التعليق وردت على صاحبه بنفس اسلوب غريب اللى علمها ترد بيه على الناس ...بعدها خرجت من الحساب ..
حطت التليفون تحت دقنها وهى بتفكر فكلام غريب اللى كان بيقولهولها دايما ، انها تعمل صفحه لنفسها على الفيس خاصه بيها ،وهى مكانتش راضيه ودايما تقوله اعمل بيها ايه منا فاتحه صفحتك اهى وبتفرج على كل حاجه منها ...
قررت انها تعمل صفحه زى ماعلمها غريب وفعلا ابتدت تتبع الخطوات لغاية ماجات للاسم ..
احتارت تكتب اسمها الحقيقى ولا تكتب اسم مستعار ...وقفت شويه قدام خانة الاسم وبعدها قررت انها هتسميه ..
(هدوء الليل ) زى ماغريب كان دايما يقولها .انتى بتشبهى الليل فهدوءه
عملت الايميل واول حاجه بعتت لغريب طلب صداقه ودخلت صفحته وقبلت الطلب وحزفت كل الاشعارات زى مامتعوده عشان الحساب يفضل نضيف ...ابتسمت وهى بتعمل كده لما افتكرت غريب وضحكه عليها لما يسألها بتعملى ايه تقوله بنضف الحساب من الاشعارات .
ابتدت تشترك فكل الصفحات النسائيه وكمان تتابع كل الصفحات اللى غريب متابعها على حسابه واللى ابتدت تظهرلها فى صفحات قد تعجبك .
اثناء ماليل قاعده ومشغوله بالحساب الجديد خبطت عليها اميره ..
ليل :تعالى يااميره ...
اميره :افتحى انتى انا مش هقدر افتح شايله صنية الاكل .
قامت ليل وفتحتلها الباب واميره دخلت بصنية الاكل :يلا بقا هتفطرى النهارده احلى فطار عمايل ايديا وحياة عنيا ...يلا بقا دوقى وقوليلى رأيك ايه فطبيخى واكلى .
ليل قعدت على السرير جمب اميره : طبيخ ايه وعمايل اديكى ايه انتى هتظيطى ..دول شوية جبنه وزتون ومربي !
اميره :ايوه مهم صنع ايدى برضو ..مش انا اللى حطيتهم فالطباق وتعبت وانا بدلقهم كده من علبهم .
ليل :له تعبتى صوح ياحبيبتى ..يا عينى يا ولداه عليك يانادر ياولد عمى ماهر .
ابتدت اميره تفتح مع ليل مواضيع وكلام وليل شويه شويه اتجاوبت معاها وفكت وحتى انها ابتدت تضحك على كلام اميره ودمها الخفيف ومرجعتش افتكرت غير لما رن تليفونها باسم غريب ...
ليل اخدت التليفون وردت عليه بلهفه ونسيت ان اميره قاعده جمبها خالص،
غريب بعد مااطمن عليها واطمن ان اميره معاها، ابتدا يسمعها كل الكلام الحلو اللى متعود يقولهولها ..
وعشان سماعة التليفون عاليه اميره كانت سامعه كل كلامهم وطول الوقت مبتسمه وعامله مش واخده بالها ...
خلصت ليل المكالمه مع غريب وقفلت السكه وحضنت السماعه واتنهدت بحزن .
اميره :هو مش تدخل منى ولا حاجه بس يعنى هو سؤال بسيط ...مالك مدايقه ليه ياليل ؟ اى وحده غيرك كان زمان الدنيا مش سايعاها من الفرحه ..اولا بجوزها اللى هيفتح ويرجع يشوف مره تانيه ..ثانيا بحبه ليها وكلامه وغزله اللى تحسيه طالع من فيلم ابيض واسود كده برومانسيته المنقرضه دى ...عاوزه ايه اكتر من كده عشان تكونى اسعد وحده فالدنيا .
ليل :اسباب السعاده من وجهه نظرك هما نفس اسباب تعاستى يااميره
اميره : عجيبه ..فزوره دى ياليل ؟
ليل :اذاعُرف السبب بَطُل العجب ...
اميره :طب عرفينى السبب عشان يبطل العجب .
اتنهدت ليل وابتدت تحكى لاميره كل مخاوفها وسبب عذابها واميره بتستمع لها بكل تركيز ..
اميره معرفتش ترد تقول ايه بعد ماليل خلصت كلامها ..مهو اصل من حقها تخاف لو غريب متقبلهاش بعد مايرجع يشوف، هتعمل ايه وهتروح فين .
ليل :سَكتى خالص يعنى ؟ متقولى ايه العمل فاللى انى فيه ديه ..
طمنينى حتى بكلمه وقوليلى ان غريب بعد مايفتح هيفضل يحبك نفس الحب ...قوليلى انه هيحب قربك منيه فكل لحظه ومش هيطيق فراقك كيف ماكان الاول .
اميره :محدش يقدر يطمنك فالحاله دى غير قلبك ياليل ...قلبك هو اللى اكيد حافظ غريب وحاسس هو هيعمل كده ولا لأ.
ليل :صدقينى حتى قلبي محتار معاى ومعارفش يخمن ولا يتطمن حتى ..
اميره :بصراحه ياليل موقفك وحالتك لا تحسدى عليهم ..
ليل :طيب قومى شيلى طبيخك ديه من جارى هناملى هبابه حاسه مخى هيطرشق من كتر الفكر .
اميره بحنان :نامى ياحبيبتى وريحى قلبك وعقلك واللى فيه الخير يقدمه ربنا .
ليل حضنت تيشرت غريب وراحت فالنوم بمجرد ماحطت دماغها على المخده كأنها بتهرب من الواقع بتاعها فالنوم .
فضلت نايمه متعرفش اد ايه مصحهاش غير التليفون وهو بيرن وكانت جواهر ...
ليل ردت عليها بتعب ..ايوه ياجواهر
جواهر :عامله ايه دلوقتى ياليل
ليل :زى الزفت والحمد لله
جواهر :ياليل بالراحه على نفسك ياحبيبتى ..
ليل :بلاش انتى تصبريني عشان انتى الانسانه الوحيده دوناً عن كل الخلق اللى عقول انك اكتر وحده حاسه بيا وباللى جواى ..بلاش تخلينى اغير فكرتى عنيكى ياجواهر واحس انك بعيده عنى ومفهمانيشى .
جواهر :ليل قوليلى الصراحه انتى مش عايزه غريب يرجع يشوف مره تانيه ..
ليل :هكون اكبر انانيه فالدنيا فنظرك لو قلتلك اكده صوح ؟..وهتقولى علي انى قلبي اسود ومعحبلهوش الخير مش اكده ؟ ..
لكن الحقيقه انى من جواى عتمنى ديه ياجواهر ..وعشان انتى اقربلى من نفسى قولتلك اللى عتوسوسلى بيه نفسى ..
ايوه انى الانانيه اللى مش عاوزه جوزها يرجع يشوف من تانى ..ايوه انى الطماعه اللى نفسى غريب يبقا ليا لحالى طول الوقت ومفيش فحياته ولا قلبه غيرى ...
جواهر اتنهدت :مش هقدر الومك وانتى بتتمنى حقك من الدنيا ياليل ..انا الوحيده اللى عارفه ان غريب دا حقك وتعويضك اللى اخدتيه من الدنيا بعد مرمطتها ليكى ..
وكل صاحب حق لازم يحمى حقه ويحافظ عليه بكافة الوسائل ..
وفحالتك انتى معندكيش وسيله غير التمنى ..وعشان الامنيات من حقنا ومش هتأذي حد ..يبقا امنياتنا لازم تكون على حسب راحتنا احنا ...
ليل :يعنى انتى معتقوليش علي عفشه دلوكيت بعد ماسمعتى الكلام ديه منى ؟
جواهر :لا ياحبيبتى انتى مش وحشه ابدا ..انتى خايفه على حبك وحياتك وجوزك ونفسك تحافظى عليهم .
بس برضو برغم دا كله هقولك للمره المليون بالراحه على نفسك ياليل
ليل :سيبك منى وقوليلى عامله ايه انتى واللى فبطنك .
جواهر :انا بخير ياحبيبتى
ليل :دايما يارب
جواهر :مش هتيجى تقعديلك معايا كام يوم ..ماما هترجع الفيلا بعد بكره وانا هقعد لوحدى طول النهار .
ليل :مهينفعش عشان اميره بت خاله مريم جات وقاعده معاى فالشقه ..
بس هبقى اجيبها وناجولك نقضو معاكى يوم من اول النهار .
جواهر :هستنى اليوم دا من دلوقتى انا ياليل ياريت متطوليش عليا.
ليل :ربنا يسهل ياحبيبتى ..يلا مع السلامه
جواهر :مع السلامه ياتاعبه قلبي.
بعد ماقفلت مع جواهر جالها اتصال من ناديه اللى مبطلتش اتصال عليها هى ونادر طول الوقت ونادر بيترجى فيها يجيلها ياخدها الفيلا تقعد معاهم وهى رافضه بتاتا ...حتى جميله وناديه الحو عليها كتير وهى برضو قابلت الحاحهم دا بالرفض ..
نادر طار من الفرحه لما عرف ان اميره عند ليل ..
نادر :انا جايلكم النهارده عايزين حاجه اجيبهالكم معايا وانا جايلكم .
ليل :له معاوزينشى ومتجيش متشكرين لجنابك .
نادر :ايه دا ياليل انتى بترفضى زيارتى ليكى ؟
ليل :ايوه عشان عارفه السبب اللى ورا الزياره دى ومش ليل اللى تتأمن على امانه وتخونها .
نادر :قصدك ايه ؟
ليل :قصدى ان خاله مريم كلمتنى ووصتنى ان طول مااميره اهنه انتا متعتبش الشقه وااااصل
نادر :لييه ليييه امها تقول كده ليه وانتى تسمعى كلامها ليه ؟
نادر:عشان دى الاصول وانى محبش حد يقول عليا متعرفشى فالاصول ..ودلوك سلام وخلى ناديه وخالتى جميله ياجو يقضو معايا يوم .
نادر :ولا ساعه وحده ولا هخلى حد يخطى عندك ...وحشوكى تيجى تزوريهم هنا وتجيبى اميره معاكى غير كده لا ...وسلام بقا عشان حرقتى دم اهلى ...وقفل السكه وهى ابتسمت وهى بتبعد التليفون عن ودنها وبصت لقت اميره واقفه وراها مبرطمه وزى ماتكون هتبكى
ليل :مالك مأرنبه ودانك اكده ومبوزه زى اللى مكبوب طحينها
اميره:متدايقه من الحصار اللى معمول عليا انا ونادر دا ..خايفه الولد من كتر البعد يطفش ويشوفله وحده تدلعه وينسانى .
ليل :له مهيحصلش اطمنى ...امك مريم على حق وبتغليكى حداه وعتعملك قيمه عشان نادر يعرف غلاوتك ويحطك فعنيه ...صدقينى اللى ناسها عيرخصوها عتقعد رخيصه فعين جوزها طول الوكت اسألينى انى .
**********
اما عند غريب
ريام :صباحو كيفو الحلو كيف اصبح اليوم
غريب:صباح الخير ياريام ..الحمد لله تمام
ريام :يلا اتسطح لتاخد علاجك مشان فيه ناس بدهن يدخلولك ..
غريب :اكيد بابا وماما
ريام :ايه البابا والماما تبعك ربى يحفظهملك
غريب :امين يارب ..
ريام قطرت لغريب وادتله علاجه وبعدها خرجت وسمحت لماهر وسميه بالدخول ..
سميه :غريبى عامل ايه
ماهر :لأ غريبي انا لو سمحتى..عامل ايه
غريب بابتسامه :غريبكم انتو الاتنين كويس تعالو بس ادخلو من غير مشاكل .
دخلو الاتنين وسلمو عليه وباسوه .
غريب :بابا هو الدكتور مقالكش على ميعاد العمليه امته
ماهر :يبنى هو انتا لحقت دول يومين ..وبعدين مستعجل على ايه خلي العلاج ياخد وقته عشان نسبة نجاح العمليه تعلى
سميه بخبث :انا عارفه غريب مستعجل على ايه ونفسه يعمل العمليه باى طريقه عشان مين ...
ماهر :طيب ماللى مستعجل عشانها هى اللى رفضت تيجى معاه
سميه :فعلا موقفها غريب.
غريب بديقه :خلاص اقفلو الكلام فالموضوع ده .
الاتنين فعلا متكلموش تانى بعد ماحسو بديقة غريب وتحسسه من رفض ليل انها تيجى معاه،
وقضو باقى الوقت كلام عادى على شغل ماهر والشركه وسميه حكتلهم شويه عن اخوها وبناته وامها واد ايه هى مرتاحه ومبسوطه معاهم .
مع انها مكنتش محتاجه انها تقول حاجه والراحه باينه على ملامح وشها ..وغير دا تليفونها اللى مبطلش رن من ساعة ماقعدت من اخوها وامها وبناته الاتنين سيلين وسيليا ..
غريب :يعنى مرتاحه وسطهم ياامى
سميه :معندكش فكره لاى درجه مرتاحه ياغريب ..
البنات اتعلقو بيا جدا كانى امهم ..ولا امى اللى بتحمد ربنا كل يوم انى رحتلها فالوقت دا وهى تعبانه وملهاش حد يشيلها وكل واحد فدنيته ...
ولا اخويا اللى من ساعة مارحتله وهو بيقول ياريت جوزك كان طلقك من زمان وكنتى شلتى معايا هم البنات دول من بعد امهم .
ماهر :يعنى سعادتك بتكمن فاحتياجهم ليكى ياسميه ؟
غريب :لا يابابا سعادتها بتكمن فقيمتها واهميتها عندهم ...
سميه :فعلا ياغريب ..كون انك تحس انك محور حياة حد دى فحد ذاتها سعاده .
ماهر :ياستى ربنا يديم عليكى السعاده .
غريب :امين يارب .
سميه :ربنا يديم السعاده على كل الناس يارب .
قضو ساعات الزياره مع غريب وفى طريقهم للفندق هما الاتنين وسابو غريب اللى بمجرد خروجهم اتصل بليل وفضل يتكلم معاها زى عادته.
ماهر فالطريق بص لسميه اللى كانت بتبص باعجاب على حديقه مليانه بكل انواع الزهور وكانت مزروعه بطريقه رائعه باينه كأنها لوحه مرسومه بأيد فنان ...وقفت ثوانى تتأمل جمال الطبيعه الخلابه بأستمتاع .
ماهر :تيجى ندخل نقعد جوا شويه شكل المنظر عجبك اوى
سميه:فعلا المنظر بديع ..
ماهر :طيب يلا تعالى ..واخدها ودخلو قعدو على اقرب كرسى رخامى فالجنينه ...
ماهر بص لسميه شاف عنيها بتتنقل بين اشكال وانواع الورود باعجاب شديد ...
طول عمرك بتعشقى الورود وبالذات الورود الحمرا
سميه بصتله وسألته بإستغراب :
عرفت المعلومه دى منين ؟ انا ولا مره افصحت عن عشقى للورود لاي حد !
ماهر :على فكره انا كنت جوزك يعنى، واظن حاجه بسيطه زى دى مش هيكون صعب عليا ملاحظتها وخصوصا لما كنتى بتقعدى فالجنينه تراقبي الورود وتندمجى وتتأملى اشكالها بالساعات ...
سميه :غريبه !
ماهر :ايه الغريب فكلامى ؟
سميه :اصل عمرى ماتخيلت مجرد خيال انى ممكن آخد حيز من تفكيرك او تكون عارف اى تفصيله تخصنى سواء كانت كبيره اوصغيره .
ماهر :عشان انا عمرى اصلا ماشغلت خيالك فيوم من الايام ..طول عمرى نكره فحياتك ..مجرد حاجه من ضمن حجاتك الغاليه ..كنت طول الوقت بالنسبالك زى شنطتك ..زى عقدك الالماظ ..او حتى زى فستانك ...مكنتش اكتر من قطعه بتكمل شكلك الاجتماعى قدام الناس وبس ..
سميه اتنهدت :مش شايف ان وقت الكلام دا عدى وفات من زمان ياماهر ومبقاش يقدم ولا يأخر دلوقتى ...جايز لو الحديث دا اتقال من سنين كتير عدت كان هيبقاله فايده ...حتى تفصيلة حبى للورد اللى طلعت عارفها عنى دى لو قلتهالى بدرى عن كده صدقنى كنت هبقى اسعد انسانه فالدنيا باهتمامك بتفاصيله زى دى ...
تعرف احنا مشكلتنا كانت فين ياماهر ..مشكلتنا احنا الاتنين اننا بخلنا على بعض بالمحاوله ، كل واحد كان شايف انه مش ضرورى هو اللى ياخد الخطوه ناحية التانى ويتقدم منه ..كل واحد كان مستنى من التانى اللى هو مش قادر يديهوله ..
ماهر هز دماغه بتفهم :فعلا كلامك صحيح ، احنا عملنا زى اتنين عندهم بيت والبيت دا كل يوم تقع منه حته وهما سايبينه وكل واحد مستنى التانى هو اللى يتحرك ويرمم البيت لغاية مالبيت كله وقع مره وحده على دماغهم وكل واحد منهم بقا يرمى اللوم عالتانى فوقوعه
بدال مايحاسبو نفسهم ويقولو لو حطينا ايدنا فايد بعض وحاولنا نصلحه اول باول مش كان زمانه دلوقتى اجمد واقوى ولسه واقف على رجليه ..
المهم سيبك من اللى فات وقوليلى وفهمينى وردى على السؤال اللى حيرنى كتير اوى وملقتلوش اى اجابه مهما حاولت ..ايه اللى غيرك مع غريب كده ...وجه منين كل الحب اللى بشوفه فعنيكى دا وانتي بتبصيله ؟
سميه ابتسمت :من عند ربنا
ماهر :ونعم بالله انا عارف طبعا انه قادر على كل شيئ وهو مؤلف القلوب بس يعنى اشمعنا دلوقتى ...اشمعنا بعد السنين دى كلها وهو طول الوقت بيحبك بنفس الدرجه ؟
سميه :الظروف والتوقيت ياماهر ...غريب ساندنى ومتخلاش عنى فوقت كل الدنيا اتخلت فيه عنى ، قربلى فالوقت اللى كله بعد عنى وبعدنى عن حياته ، مسابنيش فعز احتياجى زى منا عملت معاه زمان وكنت بستمتع بحرمانه من الحنان والاحتواء وهو فعز احتياجه ليه من غير ماتاخدنى بيه شفقه ولا رحمه ...
غريب خلانى صغيره قدام نفسي اوى ياماهر وانا بقارن بين تصرفاته معايا وتصرفاتى معاه ...غريب الوحيد اللى خلى الندم يعرف طريقه لقلبي وخلانى اعيد حساباتى لكل حاجه فحياتى
ماهر :هو فعلا الندم اول درجات التوبه ...وطالما ندمتى يبقى كان لازم هتتغيري من نفسك لكن طبعا كان لازملك سنده قويه من حد قريب منك والحد دا كان غريب ..
سميه :وصدقنى اللى بنتسند عليه فضعفنا لما بنقوى بيكون اكبر ركيزه لحياتنا كلها ومبنقدرش نستغنى عنه بعد كده ابدا ...
ماهر :مرتاحه ياسميه ؟
سميه :لاول مره فحياتى احس بالاستقرار والراحه اللى حاسه بيهم الفتره دى ...وخصوصا ان علاقتى بأولادى ابتدت تتحسن وابتدينا نخطى اول خطواتنا انا وهما ناحية علاقه سويه زى اى ام واولادها ..
ماهر :ربنا يقربكم من بعض ويسعد قلوبكم ..صدقينى ياسميه سعادتكم كلكم هى اكبر امنياتى ...
ابتسمت سميه ورجعت تتامل الورود مره تانيه بعد مااتنهدت بارتياح للسلام الداخلى والراحه النفسيه اللى بقت حاسه بيها اخيرا
وماهر كمان ابتسم وهو شايف تأثير حب غريب لسميه اللى قدر يعمل المعجزه ويغير سميه ١٨٠ درجه بالصبر والمثابره من غريب..وافتكر لماسأل غريب فيوم من الايام ...انتا بجد فاكر انك هتقدر تغير سميه ياغريب وتمحى الغل والكره اللى ليه سنين طويله بيتشعب جوا روحها وقلبها؟
وكان رد غريب عليه وقتها ان كل انسان جواه حتة خير وطيبه لو اكتشفها هيقاتل عشان يحافظ عليها ويكبرها ويتمسك بشعاع النور اللى هيتسلل منها ويتغلغل فكيانه ويبدد عتمة قلبه ، وانا مش هبطل محاوله لغاية مااخلى الشعاع دا يتسلل جوا ماما سميه ...واوعدك انى هقدر ...
وهمس ماهر لنفسه :وقدرت فعلا ياغريبي .
**********
عدو اسبوعين على سفر غريب والاتنين انتهو من الم البعد ان كان ليل او غريب ..
غريب كانت متعته الوحيده هو التليفون ومكالمته لليل اللى زى النسمه بتعدى على قلبه تصبره على نار البعد
اما ليل من كتر الفراغ والضياع اللى حاسه بيهم من بعد سفر غريب، ملقتش حاجه تصبرها غير كلامها وفضفضتها مع اميره، اللى بقت اقرب ليها من نفسها خلال الفتره دى ..
ليل بقت تحكيلها كل حاجه عن غريب وكأنها بتصبر نفسها على بعده بالكلام عنه ..
بيحب ايه ، بيكره ايه، كلامه معاها ازاى وبيقولها ايه ..نوع برفانه المفضل ...ومرات كتير مع سكوت اميره كانت ليل بتنطلق فالكلام لدرجة انها بتحكيلها ادق تفاصيل حياتها هى وغريب ..
اى حاجه كانت بتفتكرهاله او بتيجى فخيالها كانت بتقولها علطول ..
همساته ..نظراته ..لمساته ..حتى لحظاتهم الحميميه كانت بتحكيها وهى مش منتبهه وكأنها بتتكلم مع نفسها ...
وكأن اميره دى اصبحت عقلها الباطن واللى مساعدها عدم تعقيب اميره على اى كلام تقوله ليل مهما كان حساسيته ...
اميره بعد كلام ليل المستمر عن غريب حست انها بقت حافظاه ..تعرفه اوى وعارفه عنه كل حاجه ...لقت نفسها غصب عنها بتسرح فتفاصيله ....
قررت تقول لليل ان اللى بتعمله مش صح ...وكلامها عن غريب بالطريقه دى قدامها او قدام اى حد اكبر غلط وحرام ...
ايوه هى ممكن تكون بترتاح لما بتتكلم عنه ...لكنها متعرفش ان كلامها دا خلق جوا اميره شغف واعجاب بالشخصيه اللى بتوصفهالها ليل بطريقه خياليه ..
ليل :تعرفى غريب قالى ايه امبارح فالتلفون يااميره ..
اميره بنتره :لأ معرفش ومش عايزه اعرف ..وبعدين انتى مفيش معاكى غير الكلام عن غريب ياليل ..غريب غريب... بالليل غريب،.. وبالنهار غريب ..
غريب عمل غريب سوا غريب قال ...
متخليش غريب هو محور الحياه بالنسبالك ياليل ..هو دا اللى تاعبك صدقينى ..فكرى فاى حاجه تانيه ...اتكلمى عن اى حاجه غيره ارجوكى ..
ليل :طيب وهو انى حداى ايه فحياتى غير غريب اتحدت عنيه ؟ كيف مخلهوش محور حياتى وهو كل حياتى وكل دنيتى ...وبعدين انتى زعلانه وعتتنشكى عليا اكده ليه يااميره ...زهقتى منى ومن كلامى ؟
اميره :والله ابدا، انا بس مشفقه على حالتك وعاوزه يكونلك كيانك الخاص، ومش كل حاجه فحياتك تبقا غريب وبس، ...
ليل هزت دماغها لأميره بالموافقه وقررت انها مش هتتكلم معاها عن غريب تانى طالما كلامها عنه بيدايق اميره بالشكل دا ...
لكن اللى حصل انهم معدوش غير يومين بس اللى ليل بطلت تتكلم فيهم عن غريب مع اميره، واميره بقت زى ماتكون ناقصها حاجه ...
اكتشفت ان كلام ليل عنه ووصفها ليه وسماع صوته وهو بيتكلم مع ليل وهى جمبها وسامعه كل كلمه وكل حرف بيقوله بقا ادمان عندها .
اتصلت بنادر وفضلت تتكلم معاه كتير اوى ..كانت طول الوقت بتدور فكلامه على نبرة صوت غريب وعلى كلام غريب واحساسه ...طول المكالمه وغصب عنها عقلها بيعمل مقارنه مابين نادر وغريب ..وقفلت وهى حاسه ان نادر شخصيته مختلفه وبعيده كل البعد عن شخصية غريب اللى بقت مجنونه بيها ودا خلى حسره اتولدت فقلبها .
تالت يوم أميره مستحملتش وراحت لليل وسألتها عن غريب صحيح فالاول ليل استغربت من سؤال اميره ..مش هى دى برضو اللى زعقت وزعلت عشان طول الوقت مش بتتكلم غير عن غريب! .. هى اللى جايه تسأل عنه وعايزاها ترجع اتكلم عنه من تانى ؟ بس اعتبرت ان سؤال اميره من باب المواساه وانها بتحاول تخفف عنها وتسليها
وبناء عليه انطلقت فالكلام عنه برغم استغرابها زى مايكون الكلام كان مسجون جواها وافرجت عنه .
فضلت اميره تسمع لليل بشغف وكل ماليل تحكى اكتر اعجاب اميره بغريب وشخصيته يكبر اكتر واكتر ...واحتل غريب كل تفكيرها لدرجة انه احتل حتى احلامها.
*********
عدو اسبوعين كمان وخلاص بكره ميعاد العمليه .
غريب هيموت من الفرحه لانه خلاص كلها ساعات وهيقدر يشوف ..
ليل هتموت من الخوف لانه ا كلها ساعات ومتأكده انها مش هيكونلها وجود فحياة غريب
جواهر قاعده بتتفرج على التلفزيون وسمعت جرس التليفون ...بصت فيه ولقت ليل اللى بتتصل .
جواهر :ايوه ياليل ...مسمعتش منها غير بس صوت شهقات ورا بعضها طالعه من قلبها ..
جواهر :ليل ..اهدى ياليل وقوليلى مالك ..ليل فيه ايه اتكلمى ..
ليل بصوت مخنوق :خلاص ..خلاص ياجواهر ..كلها ساعات وهينتهى كل اللى بينى وبين غريب ..هيشوفنى ياجواهر ..هيشوف شكلى ولونى ...هيقرف منى ويرمينى ...هعمل ايه ...هروح لمين ..وهعيش عشان ايه بعد اكده
جواهر : كل دى اوهام فدماغك انتى وبس ومش هتحصل اى حاجه من دى ...ياليل غريب طيب اوى وبيحبك وانا متأكده انك مش هتهونى عليه ولا هيفرط فيكى بعد ماعرفك كويس وعاشرك ولا هيفرق معاه شكلك ولا لونك .
ليل: ديه كلام اضحكى بيه على نفسك ياجواهر مش عليا ..انى هروح البلد من دلوك ..مش هستنى لما يعاود ويمشينى هو .
جواهر :بلد ايه يامجنونه انتى ..ليل بقولك ايه اوعى تتحركى من عندك ولو خرجتى تيجى على هنا سامعه .
ليل قفلت السكه مع جواهر واخدت كام غيار وتليفونها وفلوس وخرجت من الشقه ومهما اميره حاولت توقفها مقدرتش ابدا ..
نزلت على اول الشارع وشاورت لتكسى وطلبت منه يوصلها محطة القطر ومن هناك ركبت اول قطر على بلدهم وهى فاكره انها بكده بتهرب من المواجهه ...
ليل قاعده على الكرسى اللى جمب الشباك وسانده دماغها عليه وباصه على الطريق ،والبيوت والنخل وكل حاجه بتختفى لورا طول مالقطر ماشى، وهى بتتخيل ان اللى بيعدى دا ويختفى هى ايامها الحلوه اللى قضتها مع غريب، واهى سيباها وراجعه لمكانها الطبيعى ومكانتها الاصليه وسط الناس ..وحيده ..
مكروهه ..منبوذه ..حزينه ...
اثناء شرودها رن تليفونها برقم غريبها من وسط ميات الرنات من جواهر واميره ومريم وجميله مردتش ولا على حد فيهم ، هو بس اللى ردت عليه بقلبها قبل لسانها ..
ردت وهى بتحاول تكون طبيعيه عشان متأثرش على نفسيته :
ايوه ياحبة القلب والروح .
غريب :ايوه ياليِلى ..اخبارك ياحبيبي ..ايه صوت القطر دا ياليل ؟
ليل : دا فالتلفازيون ياحبيبي
غريب : بس زى مايكون بجد والله ..حتى دوشة الناس زي متكون حقيقيه!
ليل :عشان انى قاعده قريبه من التلفزيون .
غريب بعد مسافة سكوت منه ومنها اتكلم اخيرا بهمس :
ليل انا هشوف ياليل..سعات قليله والضلمه اللى عايش فيها دى هتتلون واشوف الدنيا بالالوان من تانى ...
هرجع لشغلى ولاصحابي ولحياتى ..وليكى...هشوفك اخيرا ياليل ..هرجع اعيش من تانى ..
ليل :غمضت عنيها بألم وندم على كل لحظه اتمنت فيها ان غريب ميفتحش وهى حاسه دلوقتى فكلامه اد ايه كان متعذب وهو مسجون جوا ضلمه طول الفتره اللى فاتت بس مكنش بيبين ديقته وعذابه وكان كاتم فنفسه ومستحمل عشان ميزعلش اللى حواليه ..
غريب :ساكته ليه ياليل ؟ اتكلمى معايا خلى الكام ساعه الفاضلين دول يعدو عليا بسرعه ...ليل رُحتى فين ؟
ليل :معاك يانور عينى
غريب :ايوه خليكى معايا علطول ...انا بتقوى بيكى ياليل ..انتى مصدر قوتى، وسعادتى وفرحتى، وانتى كل حاجه حلوه فحياتى ...
انتى الليل اللى لما جالى ارتحت فيه من تعب العمر كله .
ليل :اكفايه ياغريبي ...اكفايه من كلامك الحلو ديه ...اتعودت عليه وهلاقيه فين من اهنه ورايح الكلام ديه انى ؟
غريب : وانا رحت فين ..انا جوايا مصنع الكلام الحلو كله وانتى الماده الخام بتاعته ...اللى من غيرها المصنع عمره ما يقدر يطلع اى انتاج ..
ليل ابتسمت على التشبيه ..طيب قولى انى انهى ماده من المواد الخام فنظرك
غريب :انتى السكر اللى بتطلع منه كل حاجه حلوه ..
ليل :......
غريب :سكوتك دا مجننى ياليل ..اه لو اعرف بس فيكى ايه ، وايه اللى مغيرك كده ومخليكى دايما حزينه وواجعه قلبي عليكى !
ليل :سلامة قلبك من الوجع ياحبيب ليل ....مع السلامه ياغريب الا انى صدعت وعاوزه انام شويه ..
غريب :خليكى معايا ياليل عشان خاطرى هونى عليا الوقت
ليل :معلهش ياغريب هكلمك لما ابقى اصحى ....خلصت جملتها وقفلت السكه بسرعه وهى شايفه الكمسرى بيسأل الناس اللى قبلها بصفين على تذاكرهم، وخلاص قرب يوصلها وخافت احسن غريب يسمعه ...
قفلت وطلعت التذكره ورتها للكمسرى وعلم عليها ومشى وهى رجعت لحالة الشرود مره تانيه بعد ما قفلت تليفونها خالص ...
اخيرا ليل وصلت البلد ونزلت على المحطه اخدت عربيه ووصفت للسواق طريق البلد ووصلها لحد باب بيتها ...
نزلت وفتحت البيت ودخلت ورمت نفسها على اقرب دكه ونامت عليها من غير حتى ماتنفضها وبمجرد ما حطت دماغها نامت علطول وهى مقرفصه نفسها وواخده وضع الجنين ...
*********
اما عند غريب ..
ريام :وهلا آخر مره بناخد فيها العلاج وبكره راح يكون يوم مميز كتيير بحياتك وماراح تقدر تنساه ، راح يكون يوم ميلاد جديد لألك ..هابى بيرث داى تو يو مقدما مسيو غريب .
غريب :فعلا ياريام عندك حق ، بكره فعلا هيكون اهم يوم فحياتى ...او بكره اليوم اللى هيحدد مصير حياتى ..
ريام :مصير حياتك ومصير العمليه متحدد من هلا ونجاحها مضمون ميه بالميه ماتعتل هم من هالناحيه .
غريب :طمنتينى كتير بكلامك دا ياريام متشكر ليكى جدا
ريام :العفو حياتى ولو ...كام غريب متل القمر عندنا يدلل الحلو ...ماتفكر انى عم عاكس وتفهمنى صح بليز هههههه
غريب : عارفه لو ليل مراتى كانت هنا دلوقتى كان زمانك بيترحمو عليكى دلوقتى.
ريام :ياالله لهادرجه شرسه زوجتك ؟ بس والله مابلومها لانى لو معى زوج هيل بحطه بعيونى ومابخلى حدا يقربله ...يابختها بيك هالليل .
غريب :والله مش عارف ارد على الكلام الحلو دا اقول ايه انا ...عموما متشكر ياستى على انك بترفعى من معنوياتى بالشكل دا ..
ريام : طيب بدال ماتضل تتشكرنى هالأد، شو رأيك انا خلصت الشفت تبعي وفاضيه هلا وشايفه انك ضايج كتير ..فاشو رأيك تحكي معى لتضيع الوقت ؟
غريب :احكى اقول ايه يعنى
ريام :ايا شى ..احكيلى عن ليل زوجتك مثلا ..كيف اتعرفت عليها ، كيف حبيتها ..كيف اتزوجتها .هيكى يعنى ..تعرف انا عندى فضول قاتل من ناحية قصص الحب بحب اسمعها كتير كتير.
غريب اتنهد وابتدا يحكى لريام عن ليل وعن حبه ليها وحتى عشان يضيع الوقت اللى بيمر بالبطيئ فاليوم دا مش عارف ليه والكلام اخده وحكى لريام حكاية ليل وحكايته معاها و كل حاجه من يوم ماعرفها لحد النهارده ...
ريام :يااالله شو هالظلم هاد يلى اتعرضتله هالمسكينه ليل ...بس كون انها بالاخير تتزوج واحد متلك هاى تسوه الدنيا كلها والله ..هاى متل مكافأة نهاية الخدمه متل مابيقولو هنيالها فيك عمى .
غريب :بس برضو اللى مش قادر افهمه هى ليه رفضت تيجى معايا وسابتنى وفضلت فمصر ؟
ريام :معئول من كل عقلات ك عم تحكى ! بابا هاى خايفه ..لا مو خايفه مرعوبِه كمان ...
يعنى معقول ماتكون وصلتك فكرة انها خايفه من ردة فعلك لما تشوفها لاول مره وتشوف شكلها ؟
هى كل اعتقادها هلا انك بمجرد ماترجع تقشع راح تتخلى عنها وتتركها متل زوجها الاول ..
غريب :مش معقول ليل تشك فحبى ليها وتفكر بالطريقه دى . ليه يعنى هى متعرفش غريب ايه وهى ايه عند غريب
ريام :الظاهر انو انتا يلى مابتعرف كيف ليل مرتك عم تفكر ..بابا واضحه الشغله متل الشمس ..والله هاد تفكيرها ومستعده احلف انها عم تموت بهالحظه والرعب راح يوقف قلبها ...
غريب :لو كان دا تفكيرها بجد تبقى هبله فعلا
ريام :حياتى هى مانها هبله هيا عاشقه ...عموما كلها ساعات وترجع تشوف وتثبتلها عكس ماهى متصوره ...
ريام وقفت على حيلها مره وحده ... ياالله الوقت سرقنا فالحكى ،وهلا راح اتركك لتنام وترتاح خلاص ماضل شي وراح يطلع الضو وتصير عمليتك ...
غريب هز دماغه بالموافقه
ريام :تصبح عكل خير غريب
غريب :وانتى من اهل الخير ياريام ...معلش صدعتك بحكايتى
ريام :بالعكس تسليت كتير ...
*********
اما عند ليل
ليل فضلت نايمه ساعات كتير متعرفش اد ايه ...فتحت عنيها بتعب وبصت حواليها مقدرتش تشوف اى حاجه من شدة الضلمه اللى محاوطاها ...كل اللى عملته انها اتعدلت فقعدتها وقرفصت رجليها وحضنتهم وسندت دماغها عليهم ولاول مره متبقاش حاسه بخوف من الضلمه ...لان فالوقت دا جواها خوف اكبر واقوى مسيطر عليها وبدد اى احساس بالخوف من اى حاجه تانيه ..
وكل تفكيرها فالوقت دا فغريب وبتدعيله من كل قلبها ان عمليته تنجح وهى متأكده انها بتحكم على نفسها بالموت بالدعوه دى ..
وللحكايه بقيه .......
**************
بالمناسبه عايزه اقول كلمتين مهمين كل زوجه لازم تاخد بالها منهم كويس اوي ....
جوزك :مهما كنتى بتحبيه ، فخوره بيه ، فيه حجات كتير حلوه ...ارجوكى متشاركيش الحجات دى حتى مع اقرب وحده ليكي ..صحبتك ..جارتك ..او حتى اختك ..ايوه متستغربيش ..انتى متعرفيش انك وانتى بتتكلمى عنه بتخلى اللى بتسمعك دى تتخيل التفاصيل اللى بتحكيها ...بتخليها تتعلق ببطل قصتك ..تعجب بيه ..وفالغالب هتتمناه لنفسها ..صدقينى هتتمنى تكون مكانك مهما كنتى بالنسبالها ...
طيب انتى وانتى بتقري روايه مش بتحبي البطل وبتتخيلى نفسك مكان البطله ؟ مش بتبتسمى لما يقولها كلمه حلوه كأنه قالها ليكى انتى ...مش بتتمنى يكون فيه واحد زيه ونسخه منه معاكي وملكك انتى ؟مش بتتمنى تكونى مكانها
متجيش بقا تستغربي وقت ماتكتشفى ان جوزك حب واتجوز اعز صحبه ليكى من وراكى ...متجيش تلومى حد منهم هما الاتنين وانتى اللى بنفسك قربتيهم من بعض بكلامك عنه قدامها وكلامك عنها قدامه ...
مش ضروري صحبتك تعرف اد ايه جوزك متحضر ومتفهم وكيوت وحنين ورومانسي ...
ولا ضرورى جوزك يعرف ان صحبتك شاطره وحلوه ودمها خفيف وبميت راجل وتستاهل تكون صحبتك عن جداره ولازم يحبها زى مانتى بتحبيها
ارجوكى احتفظى بتفاصيل كل حاجه حواليكى لنفسك ...دى حياتك متخليش حد يشاركك فيها حتى لو بخياله ...
ديننا لما نهانا اننا نتكلم عن علاقتنا بازواجنا اكيد ربنا عارف ايه الاضرار اللى بتترتب على فضفضتنا وكشف ستر شريك حياتنا واحنا بنعريه قدام حد غريب ...دينا عمره ماقال حاجه عبس ...
ولذلك ...احذرو وابتعدو عما نهيتم عنه تسلمو ...
حافظى على بطل قصة حياتك ليكى انتى وبس ..عشان تفضلى انتى كمان بطله قصته الوحيده