الفصل الثامن عشر
بقلم ريناد يوسف
جواهر
ياليل بتكلم بجد قوليلى اعمل ايه
ليل :مفهاش اعمل ايه تتلمى ورا مانمشو وتدى لجوزك حقوقه، وتموتى جواه اى شك وتلحقى حياتك اللى هتخرب واوعى تقولى قادره ومقادراش اغصبى على نفسك .
جواهر حطت ايدها على وشها :والله حاولت حاولت ومقدرتش ..
ليل :امسحى كل حاجه حصلت معاكى زمان وكت ما يقرب قاسم منك وفتحى عنيكى ومتشوفيش غير قاسم قدامك ...
جواهر مسحت دموعها :ليل الظاهر مفيش فايده وانتى مش فاهمانى ولا مصدقه انى حاولت وعملت كل اللى بتقولى عليه دا ..
ليل :يبقى مفيش غير حل واحد ..تقولى لقاسم وهو اللى هيعرف يعمل ايه ويتصرف كيف .
جواهر انتفضت :لأ ياليل لا كله الا دا ، انا مش ممكن اقول لقاسم حاجه زى دى ..انا عندى اموت ولا قاسم يعرف ، قاسم بيغير عليا لو ضل راجل جه على ضلى واحنا ماشيين بيعدينى من الناحيه التانيه، اجى انا اقوله حد غيرك كان بيلمسنى لسنين وشاف كل شبر فجسمى واتمتع بيه والمصيبه ان الحد دا عمى اخو ابويه دا قاسم كان يروح فيها ياليل ..
ليل :انى غلب حمارى معاكى ياجواهر ياريتنى ماجيتك شيلتينى حمل كسر ضهرى كسر وعولتينى همك التقيل ..
جواهر :امال انا اعمل ايه بس ياليل .
ليل قربت منها واخدتها فحضنها وطبطبت على ضهرها بحنان :العمل عمل ربنا عاد هو اللى يحلها من حداه ..قومى اغسلى وشك وحطيلك هبابة كحل يدارو حمار عنيكى دول وتعالى نطلعو نقعدو وسطهم الا يقولو خبر ايه ...روح يامحروس الهى يحرق روحك ويرميك فنار جهنم اللى تدوبك دويب ...بقا شايله كل ديه فقلبك لحالك ومتحمله وساكته اديلك سنين ياحبة عينى ..ياقهرة قلبي عليكى ياختى
جواهر بعدت عن ليل ومسحت دموعها وراحت غسلت وشها فحمام اوضتها وظبطت نفسها وخرجت قعدت معاهم بره هى وليل ..
قاسم فضل هو غريب بعد ماعبد السلام نزل ياخد علاجه اللى قبل الغدا ونادر دخل البلكونه يتكلم فالتليفون
غريب :مالك ياقاسم حاسك مش تمام .
قاسم :لا ابدا ياحبيبي سلامتك شوية مشاكل كده فالشغل وخلونى قطعت اجازتى، وانا كله الا اجازتى تنقطع فتلاقينى كده مؤقت على الانفجار فأى وقت ..
غريب :معلش ابقا عوضها بعدين الاجازه دى ،وهدى نفسك مع ان الموضوع مش داخل دماغى بس هعديهالك واصدقك..
قاسم :فكك منى انا ...بقولك ، معاشك طلع يبن المحظوظه مشتغلتش غير كام يوم وطلعتلك مكافأه اد كده وهتقبض انتا ومرتاح فالبيت الواحد بيفكر يشوف حد يخزقله عنيه ويقعد فالبيت ويقبض وهو مرتاح وميت فل واربعطاشر ..
غريب :حتى العمى حاسدنى عليه يافقر انتا ! .
قاسم :محظوظ محظوظ مفيش كلام .
نادر جالهم من البلكونه وسمع اخر كلام قاسم :مين المحظوظ دا اللى بتنق عليه يانيله ..
قاسم :فيه غير اخوك اللى عنده حظ ولا حظ العوالم ..
نادر :متاكد بتتكلم عن غريب! ...قولى بقا محظوظ بأيه المسكين المتكحرت كحرته دا ؟.
قاسم :اشتغل كام يوم وطلعله معاش وتعويض وفلوس بالهبل
نادر :يبن المحظوظه ياغريب !
قاسم :مش بقولك حظ عوالم.
غريب:والله ولا كنوز الدنيا تساوى متعة يوم شغل فالوظيفه اللى بحبها وبستمتع وانا فيها ..
قاسم :ناس تنكش على الشقا بملقاط ..افقع عنيا بأيه واقبض وانا قاعد افقعهم بأيه ...
نادر مدله مفتاح العربيه ...خد دبه فعينك هتتفقع متحتارش كتير ..
قاسم :خلاص خليها شويه لقدام هتوجعنى وانا لسه محتاج عنيا فحاجه مهمه .
نادر وغريب مع بعض :ايه هى
قاسم :لا دى حاجه كده متشغلوش بالكم انتو .
ماجده وجميله وموده حطو الاكل والكل قام على السفره واتغدو ...
بعد ماخلصو اكل جواهر وقاسم فتحو الهدايا اللى ادوهالهم اهل جواهر
وماهر خالها كان باعتلها مع جميله امها ظرف فيه عشرين الف جنيه هديه والهدايا عجبتهم اوى وخصوصا الاسوره اللى ادتهالها ليل .
قاسم :فيه حد يهادى بعشرين الف جنيه ...ان ماوقعت تحت ايدى ياماهر وسألتك رسمى من اين لك هذا مش هرتاح ابدا .
نادر :ابعد عن بابا ياقاسم احس هو اليومين دول مخنوق وهايج عليه الحنين لحبيبته المرحومه ام غريب وراحلها شقتهم من امبارح ولو طلعت قدامه اليومين دول هيشلوحك ...
موده قلبها نغزها اول مانادر قال راح لحبيبته الكلمه دى حسستها بديقه فظيعه ..
موده قامت على المطبخ ووقفت تعمل عصير برتقال فريش على العصاره اليدويه وهى بتقول لنفسها :طب وانا مدايقه ليه ميروح لحبيبته هو حر وانا مالى ؟
وافتكرت محادثتهم الصبح ونار شبت بين ضلوعها .
فلاش بااااك
موده :انتا فين مكلمتنيش النهارده ؟ ياترى ايه اللى شاغلك عن شرنقه !
جاتلها رسالته :محتاجلك .
الكلمه دى كان وقعها على موده كبير اوى ....ماهر محتاجلى انا !ياترى ايه اللى حاصل معاه ؟
موده :انا معاك فاى وقت
ماهر :الحنين بيقتل ياموده ..بيموت بالبطئ ، وخصوصا لما يكون حنيننا لحد مش حاسس بينا ولا قادر يبادلنا نفس الحنين .
موده كتبتله والابتسامه شاقه وشها :بس القلوب بتحس ببعضها والروح بترفرف فسما المحب طول الوقت ..
ماهر :يعنى تفتكرى حبنا وحنينا وكل مشاعر قلبنا بتوصل لاصحابها وحاسين بيها ومتاكدين ان مكانهم محفوظ فقلبنا ..
موده :دا اكيد ..
ماهر :مش بقولك انتى الوحيده دونا عن الناس كلها اللى كلامك بيريحنى اوى .
موده :انا وكلامى فخدمة جناب ماهر بيه ..
ماهر :هههه بكاشه كبيره ...طيب يلا روحى افطرى ياشرنقه .
موده :تعالا افطر معايا
ماهر :لا النهارده بالزات هفطر لوحدى ..انا وحبى وحنينى وشوقى وروح حبيبتى معايا ..
موده بهيام :طيب مع السلامه ..وكل كويس
ماهر :حاضر ...
باااااااك
كانت فاكره ان كلامه كله كان ليها وعليها ...مكنتش تعرف ان كلامه كان على مراته الميته ، ام غريب ...
موده وهى بتعصر البرتقان بعنف اتكلمت من غير ماتحس بصوت مسموع :
غبيه ياموده غبيه ، ودايما بتفهمى بالمقلوب ، ودلوقتى زعلانه !طب من ايه هو عشمك بحاجه ولا قالك كلمه تشعبطك فيه للدرجه دى ، الغلط كله منك انتى ، انتى الغبيه اللى حبتيه .
سمعت صوت رجالى بيهمس من وراها :هو مين اللى حبتيه دا ياموده؟
موده من غير ماتنتبه :ماهر ..هيكون مين غيره يعنى ...
موده رفعت دماغها وبلعت ريقها بخوف وتوتر بعد ماانتبهت هى قالت ايه ولفت دماغها بالراحه تشوف مين اللى انفضحت قدامه ده .
************
ماهر قاعد فالشقه مع نفسه، تليفونه رن بص فيه لقاها مريم .
ماهر :ايوه يامريم عاملين ايه .
مريم :احنا بخير طمنى عليك انتا وغريب عاملين ايه البقيه فحياتكم انا والله زعلت جدا لما اميره بلغتنى الخبر وقلقت جدا على حبيبي غريب .
ماهر :فحياتك الباقيه ومتقلقيش غريب بخير الحمد لله ، غريب قوى ومر بالاصعب وتخطاه متخافيش عليه .
مريم :هو ليه تليفونه علطول مغلق ؟
ماهر :اكيد قاعد فمكان مفهوش شبكه حاولى تكلميه فوقت تانى .
مريم :لأ اكلمه ايه انا جاياله بنفسى قريب عشان اشوفه واطمن عليه بنفسى .
ماهر :متتعبيش نفسك يامريم مشوار عليكى من بلدك لهنا ملوش داعى ..
مريم :لا منا كده كده جايه عشان هنقل اميره جامعة القاهره واحجزلها فسكن الطالبات .
ماهر :وليه كده ؟
مريم :مش عارفه ايه اللى طلع فدماغها فجأه ان جامعتها مش عاجباها والدكاتره بتوعها فاشلين ولو فضلت فيها مستقبلها هيضيع وقررت هى وبنتين زميلاتها انهم يحولو جامعة القاهره..
ماهر :سيبيها تدرس مكان ماترتاح .وبالنسبه لسكن الطالبات دا تنسيه أميره هتيجى تسكن فالفيلا هنا مع ناديه ...مش عيب ابقا انا موجود وبنت اختى تعيش فسكن طالبات ؟
مريم:ربنا يخليك ياماهر ادها وادود بس مش هينفع أميره بالزات تعيش فبيتك .
ماهر :فهمتك ..عموما هنتكلم لما تيجى .
مريم :ماشى مع السلامه
ماهر :سلميلى على راض ى والولاد .
مريم :يوصل سلام .
مريم قفلت السكه مع ماهر وحكت لراضى على عرضه وهو رفض العرض رفض قاطع وحذرها انها توافق بحاجه زى دى تحت اى ضغط من ماهر او اى حد ..
***********
نادر وصل ليل وغريب للشقه ورجع بعمته للفيلا
غريب :ليل هى جواهر مقالتلكيش حاجه ؟
ليل اتكلمت بلعثمه :ححاجه زى ايه يعنى
غريب :يعنى حاجه مدايقاها متخانقه هى وقاسم اكيد بحكم الصداقه والقرب اللى بينكم هتحكيلك اى حاجه مدايقاها ..
ليل فمحاوله ناجحه منها للمراوغه :ليه عتقول اكده قاسم قالك حاجه ؟
غريب :لا مقاليش بس انا حسيت ان فيه حاجه مدايقاه جدا ومرضيش يقولى عليها .
ليل :طيب بما انو انتا وقاسم بالقرب اللى يخليه يقولك على اى حاجه ومقالكش، وانى جواهر برضو مقالتليش يبقى مش عاوزين حد يعرف حاجه عن حياتهم ..يبقا هما حرين ووكت مايحبو يتكلمو هيلاقونا عنسمعو .
غريب :فعلا معاكى حق ..هتتعشى ؟
ليل :تؤ مش جعانه ..انتا جعان اكيد عشان مكلتش زين على الغدا .
غريب :بصراحه اه عشان مبقتش بعرف آكل الا من ايديكى انتى ولا بقيت بحس بطعم اكل حد غيرك عامله .
ليل دخلت المطبخ بسرعه بعد ماسمعت كلام غريب وهى حاسه بفرحه على سعاده على توتر وبتسأل نفسها :
ياترى ياسي غريب كلامك ديه قاصده صوح ولا عتقوله جبر خواطر وخلاص؟ ...اكيد جبر خواطر مهو لسانه حلو مع الكل وطول الوكت ...
له بس صوح هو مكلش زين النهارده علون ام قاسم كانت عامله وكل زين ...له ياليل اوعاكى تصدقى اللى انتى حاسه بيه دلوكيت....
غريب اخرك معاه تعمليله وكل وتخدميه وتقعدى تتفرجى عليه من بعيد لبعيد ..
ولو كان عيشوف حتى البصه عليه كانت اتحرمت عليكى ...غريب بالنسبه ليكى حلم مينفعشى تحلميه .
ليل حضرت العشا وقعدت قصاد غريب تأكله بأيدها وعنيها بتمشى على كل ملامحه ومستمتعه بكل حركه بتصدر منه ،
غريب :الحمد لله شبعت ياليل ...
قومى انتى ارتاحيلك شويه فأوضتك.
ليل :له متعبناش هقعد شويه اتفرج على التلفزيون لو مش هدايقك .
غريب :لا ابدا تدايقينى ليه ...بالعكس حتى انا اتسلى شويه قدام التلفزيون مع انى مش من محبينه ...انا كنت بقضى وقت فراغى فقراية كتاب او مقال كنت بحس بأستفاده اكتر .
ليل :وانى كمان كنت عقضى كل وكتى فالقرايه وكنت عحبها قوى قوى وكنت عحس انى كل اما اقرا فكتاب مخى يكبر شويه وافهم حجات اكتر واكتر .
غريب :وعلى كده بتعرفى تقرى كويس ولا مكسر
ليل :له دانى لبلب فالقرايه احسن من بتوع المدارس والله .
غريب :برافو عليكى ، طيب اطفى التلفزيون دا وتعالى معايا كده ...
ليل :على فين ؟
غريب :تعالى بس.. ومسك ايدها وجرها على اوضته ..
غريب مد ايده واتلمس مرايه متثبته على الحيطه ولفها بطريقه معينه ولفت الناحيه التانيه وظهر فضهرها مكتبه بطولها فيها ييجى ١٠٠ كتاب ..
ليل وهى بتبصلهم وبتلمسهم بفرحه :واه واه واه كل ديه كتب قريتها !
غريب :لأ مش كلها الصفوف اللى تحت اللى فيها الكتب صفحاتها لبره هى اللى قريتها اما اللى صفحاتها لجوه دى لسه مقريتهاش ...
ممكن تقريهالى انتى ونستفيد احنا الاتنين ؟
ليل بسعاده :طبعا ممكن ...يابوووى تعرف انى احساسى عامل كيف دلوك ؟
غريب بضحكه :عامل كيف .
ليل :كنى لقيت مغارة على بابا بس بدال الدهب لقيت الكتب بس الفرحه هى هى والله .
غريب :طيب ومين اللى قالك ان الكتب دى مش كنز واغلى كنز كمان بس كنز بيغنى الدماغ مش بيغنى الجيب ،وغنى الدماغ اهم بكتير من غنى الجيب .
ليل :معاك حق فكل كلمه ...انى هاخد اول كتاب بعد اللى قريتهم وهبتدى اقراه ..
غريب :طيب هاتيه ويلا على الصاله ..
ليل :طيب روح انتا وانى دقايق وجايه وراك .
ليل اخدت بيجامه قطن خفيفه من بتوع جواهر القدام اللى سابتهملها لما اتجوزت ودخلت اخدت شاور على السريع وخرجت وهى فارده شعرها المبلول وراحت على الصاله وقعدت على الكنبه اللى قصاد كرسى غريب بأرتياح وابتدت تقرا ..
غريب اتعجب على قرايتها السلسه المتقنه وطلعت فعلا بتعرف تقرا احسن من بتوع المدارس، وعرف انها بتملك العزيمه والاصرار اللى وصلوها لكده من غير ماتروح مدارس .
ليل اثناء القرايه كانت فيه حجات بتوقف عندها مبتفهمهاش وغريب كان بيشرحهالها ..
فضلت ليل تقرا وغريب يسمع والاتنين مستمتعين لغاية ماليل ابتدت تتاوب اثناء القرايه وغريب ابتسم عليها ووحده وحده صوتها ابتدا يوطى لغاية مابقت تتكلم بهمس وبعدها بقت كل مسافه تقرا كلمه لغاية ماسكتت خالص ..
غريب بهمس :ليل ..ليل انتى نمتى ..ليل ...
مقدرش يقاوم فضوله وقام وراح ناحيتها قعد قدام الكنبه على ركبه ومد ايده بتردد جات على الكتاب، شاله وحطه على جنب ورفع ايده نفسه يلمس ملامحها ، نفسه يقدر يرسملها صوره فخياله ،
لكنه رجع ايده تانى لان دا حرام ومش من حقه ..
سند ايده على الارض عشان يقوم لكن ايده جات على كتلة الحرير اللى كانت واصله للارض ،
حاول لكنه مقدرش يمنع نفسه من انه يمسك خصله من شعرها ويقربها من وشه وهو بيتلمسها، ويشم اجمل عطر مر عليه طول عمره، لكنه فاق واستغفر ربه وساب شعرها وقام بسرعه ومن شدة توتره خبط فالطربيزه وقع الفازه اللى عليها وليل قامت مخضوضه .
ليل :فيه ايه حصلك حاجه كنت عاوز حاجه ...معلهش نومت محستش بحالى ..
غريب :بس بالراحه اهدى ياليل اهدى محصلش حاجه كنت داخل انام خبطت فالطربيزه من غير قصد الحاجه اللى عليها وقعت .
ليل :معلهش خدت الشر وراحت فداك ..تعالا اوصلك لاوضتك ..عاوز حاجه قبل ماتنام ..
غريب :لأ مش عاوز حاجه ياليل معلش خضيتك ...
ليل :له مفيش حاجه ..وصلته لاوضته وراحت هى لاوضتها ونامت على السرير وغمضت عنيها وهى مبتسمه وراحت فالنوم ...
اما غريب فاتمدد على السرير واتنهد وهو حاسس انه لسه شامم ريحة شعر ليل وهز دماغه وهو مبتسم وبيقول لنفسه :ايه حرب الاعصاب اللى انا دخلت نفسى فيها دى ، شكلى هتعب اوى فالايام اللى جايه ، ومد ايده على قلبه يدلكه بعد ماحس فيه بنغزه بس المرادى الالم مكانش من زعل كان بسبب كمية السعاده اللى حاسس بيها وقلبه مش قادر يستحملها.. واستغرب على قلبه اللى بيتأثر نفس التاثر بالزعل وبالفرح.
*********
قاسم وجواهر فشقتهم وجواهر لاحظت شرود قاسم وافتكرت ان موضوعهم هو السبب لكن فالواقع شروده كان بسبب حاجه تانيه خالص .
فلااااش باك
قاسم :ودا مين اللى بتحبيه دا ياموده ؟
موده :ماهر هيكون مين غيره يعنى ...ولفتله وهى مبرقه عنيها وبتبلع فريقها ومصدومه من الكلمه اللى طلعت منها بدون شعور .
قاسم :يعنى يوم ماربنا يكرمنا ويكرمك وتحبى تحبى ماهر؟
يعنى مالك لو اتنيلتى وحبيتى اى حد فالدنيا كنت جبتهولك متكتف،
لكن عشان من واحنا صغيرين كنا بنتولد بحظ ملتهب وكانو بيعملولنا عمليه استئصال حظ لازم يحصل معانا كده ...عيله منحوسه ....
بصى نصيحه اخويه منى ياموده يختى ..عقمى قلبك وطهريه من حب ماهر عشان لاسنه ولا سنك ولا حتى قلبه فيه مكان ليكى او لاى وحده تانيه ..
ماهر عايش بين اطلال حكايه ماتت بطلتها من سنين طويله قلبه محبوس جوا زنزانة حب قديمه ومش هيتحرر منها للابد .
موده مردتش على قاسم ولا نطقت لكنها عدلت نضارتها ولفت وكملت عصر فالبرتقان بمنتهى العصبيه والعنف ..
قاسم :ايوه طلعى غلبك فالبرتقان واسكتى ...وبرطم وهو ماشى :عمى ماهر ياموده ؟ ملقتيش فالدنيا دى غير ماهر !
بااااااك
قاسم اتنهد وهو بيردد جواه للمره الالف من ساعتها :عمى ماهر ياموده ؟!
*************
سميه بالليل بعد ماقضت النهار كله لوحدها ومفتقده غريب جدا وحاسه ان حاجه كبيره غايبه منها نزلت لتحت وحده وحده لقت ناديه قاعده لوحدها فالصاله وماسكه تليفونها كالعاده ..
سميه اترددت لكنها سمعت نصيحة غريب وقربت من ناديه وحطت ايدها على شعرها مسدت عليه بحنان .
ناديه لفت لسميه بصتلها باستغراب لكن متكلمتش ورجعت بصت فتليفونها مره تانيه ..
سميه :ممكن اعرف بنتى حبيبتى زعلانه ومكشره كده ليه ؟
ناديه بصت لمامتها وابتسمت ابتسامه جانبيه بتهكم ورجعت لتليفونها تانى ومردتش
سميه :انا اعرف ان اللى بيحب حد بيتمنى سعادته وانا عارفه انك اكتر حد فالدنيا دى بيحب غريب يبقى بتعملى معاه كدا ليه بقا ؟
ناديه اتنهدت ومردتش .
سميه :سيبيه يحب ويتحب ويعيش ياناديه ...لعلمك رفضك او قبولك بوجود ليل فحياته مش هيغير من الواقع حاجه، واديكى شايفه انه مستحملش معاملتك القاسيه ليها واخدها وبعد خالص ، وهيفضل معاها وتفضل معاه فليه انتى تزعليه والوحيده اللى هتطلع من حياته هى انتى ..
ناديه :مين اللى بتتكلم دى ؟ سميه هانم ولا وحده تانيه !
سميه :لأ اللى بتتكلم دلوقتى هى امك ياناديه اللى بتحبك وخايفه عليكى تخسرى احن اخ فالدنيا بسبب غيرتك عليه .
ناديه رفعت حواجبها بأستغراب :غيرتى عليه !هو انتى فاكره ان رفضى لليل غيره على غريب ؟
سميه :والله دا اللى واضح وضوح الشمس للكل مش ليا انا بس وإلا تقدرى تقوليلى انتى رافضه وجود ليل فحياة غريب ليه ؟
ناديه :بجد بتسألى ليه !انتى مش شايفه ليل دى ايه ؟ هو انتو كلكم مش شايفين ليل عامله ازاى ؟ دى وحده آخرها نعطف عليها او حتى نشغله ا عندنا لكن مستحيل تكون دى اللى يتجوزها ملازم اول غريب الدمنهورى وتشيل اسمه !
طب بذمتك لو نادر مكان غريب كنتى هتوافقى ولا ترضى بحاجه زى دى ؟
سميه :اه ..لو نادر فنفس ظروف غريب كنت هوافق ..
ناديه :وانا شايفه ان رغم الظروف اللى هو فيها الا انه يستاهل احسن حاجه فالدنيا ، غريب مش شويه عشان تيجى وحده زى دى تاخده وهو الممنون كمان ....
ولعلمك بقا انا لو كنت مقتنعه ان ليل متنفعش لغريب بنسبة ٨٠ %بعد كلامك دا انا اقتنعت بوجهة نظرى مليون فالميه ..عارفه ليه عشان انتى مبتحبيش الخير لغريب ، مش بتحبيله الا الشر ،
وبما انك حابه ومشجعه قربه من ليل يبقا ليل مش هييجى من وراها لغريب الا كل شر .
*********
ماهر بالليل بيتقلب مش جايله نوم ومسك تليفونه وبعت رساله لموده
شرنقه فينك !
موده كانت قاعده بتفكر فكلام قاسم ومحتاره بين انها تسمع كلام قاسم ولا تسمع كلام قلبها اللى عامل دربكه بين ضلوعها وبيقاتل عشان احساس الحب الجميل اللى اول مره يحس بيه ورافض انه يتخلى عنه ويقتنع بأى كلام ..
تليفونها اعلن عن وصول رساله شافتها وقرتها فالاشعارات من فوق لكن مفتحتهاش وقررت انها مش هترد عليه مره تانيه ومش هتشجع جواها احساس ملوش اى فرصة فالاستمرار .
************
قاسم بعد يومين رجع لشغله وقطع اجازته بعد ماحس انه مش طايق يقعد فالشقه بسبب رفض جواهر المستمر له، وحالتها اللى حيرته،
رمى كل حيله فالشغل لدرجة انه بقى بيفضل يشتغل ساعات كتير مايعرفش عددها ،ويروح بعدها تعبان ياخد دوش ويدخل ينام ومتجاهل جواهر خالص،
مفيش غير رده عليها بكلمات بسيطه ومختصره لو سألته على حاجه، وحتى الاكل بياكل عند امه تحت اغلب الاوقات، وتجاهله وتصرفاته دى مخليه جواهر بتنصهر كل يوم من الحزن ومش قادره تتكلم،
وهو مبيسمعش غير صوت شهقاتها كل يوم بالليل وهى جمبه وهو مديها ضهره وبيمثل انه نايم .
********
*مر اكتر من شهر وقاسم مستمر فتجاهله لجواهر وبقى عصبى جدا لدرجة الجنون وبيزعق على اى حاجه واتفه الاسباب وهى ملتمساله كل الاعذار وحاسه بعذابه وبتتعذب اكتر منه ..
*غريب بيقضى مع ليل اجمل ايام فعمره مستمتع بقربها واكلها وصوتها وهى بتقراله كل ليله،
وبقا حاسس معاها انه رجع طفل صغير بيتدلع على امه ويطلب مساعدتها فأقل حاجه .
*ليل ماتقلش عنه سعاده وسعادتها دى بتكمن فطلبه لمساعدتها له فكل حاجه مهما كانت صغيره حتى لو بيقدر يعملها لوحده لدرجة انها بقت حاسه ان غريب بقا ابنها الصغير اللى مش بتغفل عن اى تفصيله تخصه ،
*غريب كان بيبدأ صباحه بأتصال بسميه ويقفل منها يتصل بعمته جميله ويتصل بابوه ويطمن على الكل لولا مايرتاح ويقدر يبتدى يومه
*جواهر كانت بتنزل تقعد تحت مع اهل قاسم طول فترة غياب قاسم فالشغل وقربت من موده وبقو اصحاب جدا ووقتهم كله سوا .
*ماجده كانت حاسه ان جواهر هى سبب الحاله اللى وصلها قاسم مؤخرا... ابنها اللى كانت الضحكه مبتفارقش وشه، علطول بقى مبوز ومكشر ومش طايق اى حد ولا بيتكلم مع حد ودايما ساكت مهما هى وابوه او اخواته حاولو انهم يخرجوه من الحاله دى ويعرفو ماله ...
وفكل مره تسأله فيها مالك يرد عليها مفيش، ...وتيجى تسأل جواهر تقولها برضو مفيش ، ودا خلاها طول الوقت حاسه بديقه عليهم ومش عارفه تساعدهم ازاى وهما مش راضيين يتكلمو وشافت احسن حل انها تبعد وتسيبهم يحلو اللى بينهم لوحدهم وتقف تتفرج من بعيد .
*موده طول الوقت دا مبتردش على ماهر ...ومهما بعت رسايل مش بتفتحها ومهما رن على تليفونها مش بترد عليه ودا مجننه .....
ومره فقعده ليها هى وجواهر خلت جواهر حكتلها قصة حب ماهر واميره كلها زى ماسمعتها من امها جميله ..لكن الغريبه انها بعد ماسمعتها احترمت جدا اخلاصه لحبيبته الميته كل السنين دى وسماعها للقصه مازادها الا تعلق بماهر وحست انها مفتقداه جدا ..لكن برضو مش هترد عليه ولا تكلمه ولا تبنى لنفسها قصر من الحب حيطانه من ورق مع اول هبة ريح يطير وياخد قلبها معاه .
*نادر طول الشهر دا بيتكلم مع أميره بعلم امها وقالتله انها هتنقل جامعه القاهره وانهم كانو جايين بس حصلت ظروف ومقدروش .
*مريم لما مقدرتش تسافر لغريب كلمته فالتليفون وعزته فداده سميره ووعدته انها قريب اوى هتجيله وتقعد معاه يومين تلاته كمان .
*سميه طول الفتره دى بتحاول تتقرب من ناديه ونادر بكل طريقه ممكنه، وفاى فرصه زى ماغريب نصحها ودايما بيأكد عليها ،
حست فعلا ان نادر ابتدا يلين ويتجاوب معاها شويه صغيرين، لكن ناديه قافله منها قفله صعبه ومهما حاولت معاها مبتلاقيش منها الا الصد والرفض لكنها برضو مستمره فالمحاوله ..
*زوزو من ساعة ماعرفت اللى عرفته وكل يوم تحاول انها تلاقى طريقه تعرف بيها حسنيه لكن حسنيه مش مدياها فرصه انها تتكلم معاها كلمه وحده ...زوزو بقت تخاف جدا من اى حد فالبيت دا، وحست ان اللى فيه كلهم مش بشر لدرجة انها دخلت اوضتها مره لقت جوزها محمد بيغير لابنه شدته منه بعنف وزعقت وهى بتساله :بتعمل ايه فالولد .
محمد :بل روحه عغيرله هكون ععمله ايه الواد يامخبله انتى !
زوزو :اوعى تمد ايدك عليه ولا تغيرله مره تانيه ولو بل نفسه تندهلى وانا اغيرله فاهم .
محمد :اتنجمتى ياوليه ولا ايه ؟ مالك اليومين دول حتى الواد مش عتخليه يقعد معاى واصل ودايما على باطك وعتلفى بيه وانتى شايلاه طول الوكت !
زوزو :ايوه اتنجمت واتجننت واتخبلت وكل حاجه.. وابنى مش هسيبه من حضنى ...اصلا اللى يقعد فالبيت دا يقعد فيه عقل ..المهم بقا عملت ايه فاللى قولتلك عليه ؟
محمد.:عملت ايه فأيه انى مش هروح فأى مكان ولا هسيب بيتى ولا ارضى ولا ناسي ..عاوزه الناس تقول عليا ايه ساب ارضه وجرى ورا مرته وخدته بلدها !
زوزوو:بص هما كلمتين مخلصين بعضهم يامه تيجى معايا ونعيش فالمنصوره جمب اهلى، يأمه هاخد ابنى وامشى من هنا ومتحلمش انى ارجعلك فيوم من الايام .
محمد :اللى عايزه تعمليه اعمليه وروحى منين ماتروحى، بس ليكيش حداى عيال هتطلعى تطلعى بطولك بالهدمه اللى عليكى اكده والباب يفوت عشر جمال .
زوزو :بئا كده !
محمد وهو بيقلدها :ايوه بئاكده وابو كده .
زوزو :بسيطه يامحمد هنشوف .
**********
قاسم فضل مستحمل ومستنى وصابر على جواهر طول المده دى وهو على يقين انها هتتخطى خوفها فيوم من الايام، وحبها ليه يتغلب وتيجى بنفسها لحد عنده وتديله كل حقوقه من نفسها، برغم ان الانتظار كان اطول من الطبيعى لكنه كان على استعداد يستنى العمر ك له على الامل دا ولا انه يسمع من جواهر الكلام اللى حطم رجولته وقضى على آخر زرة عقل عنده وخلاه عمل فجواهر اللى قطع آخر فرصه ليه معاها كزوج
فرعون 2
البارت التاسع عشر 19.
قاسم قاعد على السرير جمب جواهر وحاطط وشه بين ايديه بندم وجواهر ساكته خالص ومفيش غير دموعها بتنزل، وبعدها جسمها ابتدا يترعش بطريقه غريبه وقويه اكتر من كل مره حصلت قبل كده ..
قاسم حاول بخوف يثبت جسمها لكنه فشل لدرجه انه حضنها ورمى عليها تقل جسمه كله، لكنه برضو مقدرش، ومره وحده شاف اطرافها اتخشبت وبعدها جسمها سكن خالص ...
قاسم بيهز فيها بخوف شديد وحس ان اطرافه اتجمدت وبروده سرت فكل جسمه وهو شايف جواهر قدامه زى الجثه ...
حاول مره بعد مره بعد مره انه يفوقها لكنها مبتفوقش ...حاول يشيلها يوديها الحمام فآخر محاوله منه انه يفوقها لكنه بمجرد مارفع الغطا من عليها شاف تحت منها بركه من الدم ودا خلى قاسم كان هيغمى عليه هو كمان وفضل يهزها ويصرخ بعلو صوته :
جواهر قومى ..هو انا عملت ايه ياربي ..
عملت فيكى ايه ياجوهرة قاسم وحب عمره .
قاسم مش عارف يتصرف ازاى ولا يطلب مساعدة مين..غريب ومش هيقدر ولا هيعرف يوصله ...امها هتموت فيها لو بلغها بحاجه زى دى ..واهله هيقولهم ايه لو عرفو ان النهارده بس كانت دخلته على جواهر وتمت بالوحشيه دى ...
مسك تليفونه وهمس لنفسه :هو نادر مفيش غيره ..
قاسم اتصل على نادر اللى رد عليه بنوم ...ايوه يازفت حد يتصل على حد الساعادى عاوز ايه ؟
قاسم :انزل وتعالالى عالبيت حالا بعربيتك واوعى حد يحس بأى حاجه بسرعه جواهر هتروح منى وقفل ونهى الاتصال .
نادر قام بسرعه اول ماسمع كده واخد مفاتيحه ومحفظته ونزل بهدوم النوم وطلع على قاسم باقصى سرعه .
قاسم فالوقت دا كان غير لجواهر وهى لسه مغمى عليها وبعد ماغيرلها بص شاف هدومها غرقت دم من تانى ملقاش حل غير انه يلفها بكوفرته وينزل بيها بسرعه وخصوصا ونادر بيرن على تليفونه بيعرفه انه وصل ..
قاسم نزل بسرعه وركب بيها عربية نادر ونادر طلع بسرعه وهو شايف حالة جواهر دى ومسألش ايه اللى حصل غير فنص الطريق تقريبا
نادر :مالها جواهر ياقاسم حصلها ايه ايه اللى عمل فيها كده ؟
قاسم :انا الحيوان اللى عمل فيها كده يانادر ..انا بغبائى هضيع جواهر من ايدى وارتفع صوته بالبكا وهو بيضم جواهر لصدره بقوة والمنظر دا خلى نادر يدوس بنزين اكتر لدرجة ان العربيه كانت هتطير من على الارض لغاية ماوصلو اقرب مستشفى
قاسم دخل المشتشفى شايل جواهر وبيجرى ونادر معاه والممرضين والدكاتره اخدوها منه وحطوها على ترولى ودخلوها الاستقبال وهو واقف وشايفهم بيبعدو بيها وقلبه انقبض زى مايكون روحه هى اللى اخدوها منه .
بعد الكشف عليها دخلوها اوضة عمليات عشان يخيطولها الجرح اللى سببلها النزيف دا كله .
الدكتوره المعالجه كانت هتاخد ضد قاسم اجراء قانونى وتتهمه بالاعتداء على مراته وممارسه العنف والساديه معاها مما ادى الى اضرار جسديه واكيد نفسيه فيما بعد،
لكنها قصاد ترجى قاسم ليها واقناعه ليها انها كانت حادثه من غير قصد مش اكتر سكتت ،لكنها اصرت انها هتسأل المريضه وتكمل الاجراء بدون خوف منه او من سلطته لو كانت دى رغبة المريضه وقاسم وافق ..
نقلو جواهر فاوضه وابتدت تهلوس من المخدر ولحسن الحظ نادر مرضيش يدخل وقاسم بس اللى كان فالاوضه ..
جواهر :له يامحروس حرام عليك ..له بعد عنى انتا عمى ...ليه ياقاسم تعمل كيف محروس دانى حبيبتك ...كلكم كلاب كيف بعضكم ..كلكم عاوزين تنهشو فجسمى ...انى عكرهكم كلكم ...انى هموتك يامحروس ...انى جواهر حبيبتك ياقاسم ..
قاسم كلام جواهر دا قضى على كل ثباته وخلاه مش عارف يعمل ايه لكن اللى مجننه ازاى بعد الكلام اللى قالته لليل تطلع فالاخر بنت!.. ازاى؟ ...
صداع هيفرتك دماغه اول مره يحس بيه فحياته ..
تشتت وضياع وندم وقلق وخوف كل دى احاسيس متلخبطه جوا قاسم خلته على حافة الجنون .
حط دماغه بين ايديه وهو جمب جواهر وبيسمع خترفتها وعتابها اللى بيقطع قلبه وافتكر كل اللى حصل من اول اليوم لغاية اللحظه دى .
فلااااش باااك
قاسم رن على غريب فميعاد نزوله للشغل ....
غريب :ايوه ياقاسم .
قاسم :حضر نفسك هعدى عليك اخدك تقبض اول معاش ليك واخلصلك كل المعاملات .
غريب :بجد !طيب اعتبرنى جاهز هتعدى عليا امتا .
قاسم :مسافة الطريق .
غريب :ينفع ناخد ليل معانا ؟
قاسم :لأ طبعا مينفعش وبعدين احنا مش هنغيب هنرجع بسرعه لست ليل بتاعتك يابتاع ليل انتا .
غريب :قصدك ايه ؟
قاسم :قصدى هقولهولك لما اشوفك سلام .
غريب طلب من ليل تجهزله هدومه وساعدته يغير ورشتله من عطره ووقفت قدامه بعد ماخلص لبس تتأمله وتملى عنيها من الجمال اللى قدامها دا وبتتمنى لو تقدر تخبيه عن عيون الناس كلها ويفضل ليها لوحدها وعنيها هى بس اللى تتمتع بجماله ده ... شويه وقاسم وصل ورن على غريب وليل نزلت غريب وركب مع قاسم وطلعو .
وليل مراقبه العربيه وهى بتبعد بغريب ونفسها تجرى وراها وترجعه تانى .
قاسم :هاه
غريب :هاه ايه
قاسم :حلو الحب ؟
غريب :حب مين ؟
قاسم :حب امى ...الحب اللى سيادتك غرقان فيه لشوشتك مع ست ليل ...واوعى تنكر احسن افتح باب العربيه واحدفك منه .
غريب :هو باين عليا اوى كده !
قاسم :العبيط يعرف لو بصلك وانتا قاعد جمبها وبتسمعها وهى بتتكلم وبوقك واصل لودانك زى الاهبل
غريب اتنهد :وايه فايدة الاحساس ولا الحب فحالتى دى ياقاسم ؟
قاسم :اللى هو ازاى يعنى ؟
قاسم :يعنى ايه الفايده من حبى وانا وهى مستحيل نكون لبعض
قاسم :امممم مكنتش اتوقع ان دى تكون طريقه تفكيرك على فكره ، مع انى شايف ان البنت زى الفل ومفيش اى حاجه تعيبها وان كان على الفرق الاجتماعى متنساش ان ليل مش خدامه اصلا بس هى الظروف اللى حكمت عليها بكده .
غريب : انا طول عمرى اقول عليك حمار بس انا خايف اكون بظلم الحمار والله ...
يبنى فرق ايه اللى انا احطه فدماغى ولا افكر فيه ؟ دنا سبت الفيلا كلها بسبب تفكير ناديه بالطريقه دى ومدايقتها لليل ..
انا ياجحش مستحيل ارتبط بليل عشانها هى مش عشانى ، مينفعش ارتبط بليل واظلمها معايا باقى عمرها ..
قاسم :ياسيدى صارحها انتا بس وشوف رأيها يمكن توافق وسيب القرار ليها هى .
غريب :لو صارحتها فالوقت دا فعز ضياعها وتشتتها واحساسها بعدم الاستقرار اكيد هتوافق ...
بس هتوافق مضطره لانه مش هيكون قدامها حل تانى ...
وفنفس الوقت اخاف اقولها متوافقش وتسيبنى وتمشى وابقا خسرتها للابد .
انا مش هقدر اعيش من غيرها وراضى انها تفضل فحياتى بأى صفه لكن المهم انها تفضل ...
قاسم اتنهد وقال فسره :دانتا حالتك صعبه انتا كمان اكتر من حلاتى الظاهر زى اللى بيجاور السعيد بيسعد اللى بيجاور المنحوس بيتنحس والظاهر ان نحسى بهت عليك ياغلبان ولا نحسك انتا اللى بهت عليا ولا ايه فسنينا الحلوه دى ؟ .
قاسم وغريب وصلو وقبض غريب الفلوس وهما فطريقهم للرجوع ...
قاسم :هاه قولى هتعمل ايه بالفلوس دى كلها يامريش انتا ..
غريب :اول حاجه هعمل منهم صدقه جاريه على روح داده سميره ...
تانى حاجه عاوز اجيب هديه حلوه لليل نظير تعبها معايا، لانى خايف اديها فلوس احسسها انها فعلا بتشتغل عندى وتتدايق وتشيل فنفسها ...
وكمان نفسى اجازى تعبها معايا بأى حاجه ..
قاسم :لأ خليك فالهديه اضمن بس يعنى هيكون ايه نوع الهديه دى ؟
غريب :نزلنى عند محل دهب .
قاسم :والله وهتتسيغى ياليل .
نزل نادر وغريب ودخلو المحل وغريب طلب خلخال دهب بأجراس صغيره لكنه ملقاش طلبه فالمحل
مشى هو ونادر وفضلو يلفو على كذا محل لغاية مالقى طلبه اخيرا ..
قاسم :اما انتا عليك حاجات ياجدع ...قال ايه خلخال ولازم بجرس !
نشفت ريقى م اللف الهى ينشف ريقك .هاه نروح بقا بخلخالنا دا ولا عاوز حاجه تانيه ؟
غريب :ايوه لسه عاوز تليفون حديث وحلو وخط وقبل مانروح نشترى ورد وشيكولاته ...
قاسم :ايييييه يبنى ايه كل دا تكونش رايح تخطبها وانا معرفش !
غريب :ليه يعنى دى حجات عاديه جدا على فكره، وكل البنات بتحبها اوى وبتفرح بيها .
قاسم :لا دحنا اطورنا جدا وبقينا نعرف البنات بتحب ايه وبتفرح بأيه ..اه ياخلبوصه انتى ..ومد ايده قرص خد غريب وغريب زاح ايده من وشه بعصبيه ...
اخدو بالفعل تليفون وورد وشيكولاته وقاسم وصل غريب ورجع هو على شغله .
*********
فى نهاية اليوم دا ليل نايمه على سريرها وحاضنه تليفونها وكل شويه تبص فيه وترجع تحضنه تانى بعد ماتملى عينها بالصوره اللى فيه ...مش هتكون بتبالغ لو قالت انها فاليوم دا السعاده اللى حست بيها لو اتوزعت على سكان الارض كلهم هتكفيهم .
اتنهدت وغمضت وهى بتستعيد زكريات اليوم الجميل ده .
غريب خرج النهارده مع قاسم عشان يقبض معاشه ولأول مره من اكتر من شهر يبعد عنها ...فضلت طول الوقت تلف فالشقه من بعد مانزل كأنها بتدور على حاجه غايبه منها ، مهما حاولت تهدى وتقعد مبتقدرش ، عينها طول الوقت متعلقه على الساعه اللى على الحيطه ونفسها تمد ايدها تقدم عقاربها عشان الوقت يجرى وغريبها يرجعلها .
رن جرس الباب اخيرا بعد اكتر من تلات ساعات انتظار ، جريت على الباب وفتحت بلهفه وكان نفسها فاللحظه دى لو تقدر تاخده فحضنها وتقوله اد ايه وحشها فالساعات دى
مسكت ايده ودخلته ومن لهفتها منتبهتش على الحاجه اللى فأيده مكنتش شايفه اى حاجه فالدنيا غيره
قعدته على الكنبه وجريت جابتله كباية ميه ساقعه وشربتهه ونزلت تقلعه جزمته والشراب ولسه بتحاول تقوم لقت غريب مد ايده بعشوائيه ومسك ايدها ..
غريب :سيبي كل حاجه واقعدى ياليل ..
ليل قعدت جمبه بهدوء وهو مدلها الورد الاول ..الورد دا عشانك ياليل
ليل :بأستغراب ممزوج بفرحه :عشانى انى !حلو قوى قوى بس ليه تكلف نفسك ياسى غريب ؟
غريب مدلها الشيكولاته وهو ماسكها بأديه الاتنين :ودى كمان عشانك ياليل ..
ليل مدت ايدها واخدت منه العلبه :وه ياسى غريب كل ديه عشانى ؟
غريب مد ايده فجيبه وطلع علبة دهب صغيره وفتحها وطلع منها الخلخال ..
ياريت ياليل تقبلى منى الهديه البسيطه دى ..
ليل بزعل :ايه ديه ياسى غريب ..ايه اللى انتا جايبه ديه ...هو انى قولتلك عايزه حاجه ، وكمان دهب ؟
غريب :ليه زعلتى كده ياليل انا فرحت بأول قبض ليا وقلت لازم افرحك معايا ولو بحاجه بسيطه .
ليل :انى كل فرحتى فأنى اشوفك مرتاح ياسى غريب ..وكان كفايه الورد والشكولاته وحتى دول كتير عليا والله ..دول عندى اغلى من كنوز الدنيا كلها..كفايه انك افتكرتنى وجيت على بالك ..
غريب :انتى طول الوقت على بالى ياليل ...
سكتت ليل ومردتش وهى بتتأمل ملامح غريب بشوق وحب وكلامه نزل على قلبها كانه بلسم ..
غريب :هفضل مادد ايدى كتير كده ؟ خدى ياليل هديتك وعندى طلب لو تقدرى تنفذيه هكون اسعد واحد فالدنيا ...
ليل : طلباتك اوامر ياسى غريب ايه هو الطلب .
غريب : تلبسى الخلخال دا ومتقلعيهوش من رجلك ، عالاقل طول مانتى فالشقه هنا ..
ليل ابتسمت ومدت ايدها اخدت منه الخلخال ولبسته فرجلها وهى بتتأمله وتمشى ايدها عليه بحب ..وبصت لغريب وقالتله :
شاله يخليك ليا ياسى غريب ويجبر بخاطرك زى مادايما جابر بخاطرى .
غريب :متقوليش كده ياليل انا لو اطول اجيبلك نجوم السما هجيبهملك ..انتى متعرفيش انتى ايه عندى ...خدى بقا دى اخر حاجه ..
مد ايده طلع علبه مربعه من جيب الجاكيت وفتحها قدام ليل ظهر فيها تليفون ..
ليل :ايه ديه كمان ؟
غريب :دا تليفون تخليه معاكى دايما عشان لو خرجت بره زى النهارده كده ارن اطمن عليكى ، وكمان عشان تكلمى جواهر وقت ماتحبى ، وفيه العاب تتسلى بيها وكمان هعرفك تعملى حساب على الفيس بوك وتشوفى وتتعلمى حجات جديده وتقدرى تلفى العالم كله وانتى قاعده مكانك بالتليفون ده ..
ليل :طب والله العظيم انى معارفه اقولك ايه ، انى مستحيه منك على كل الحجات الغاليه اللى جايبهالى دى
غريب :الغالى للغالى ياليل ..يلا قومى بقا اعمليلى كباية عصير من ايديكى الحلوين دول ...وتعالى عشان تقرى الكتالوج بتاع التليفون وتعرفى تشغليه ..
ليل :من عيونى ...وقامت ليل وراحت على المطبخ والخلخال فرجلها بيرن بصوت ناعم وجميل وغريب سامع الصوت ومبتسم وهو بيلف وراها بدماغه فكل اتجاه ليل تمشى فيه ...
ايوه هو دا السبب الحقيقى ورا شرا غريب للخلخال ...انه يقدر يسمع خطوات رجليها فكل وقت ويعرف قربها او بعدها عنه ..يقدر يعرف هى فين من غير ماينادى عليها كل دقيقه ويسألها ليل انتى فين ..
ليل رجعت بالعصير وادته لغريب فأيده ومسكت التليفون بحماس وابتدت تتعرف ازاى تستخدمه واول حاجه عملتها انها اخدت كام صوره لغريب واحتفظت بيها واخدت كمان صوره ليهم هما الاتنين وهى مقربه وشها منه وكل دا من غير مايحس .
ليل كانت فرحتها بكلام غري ب اكبر من فرحتها بكل الهدايا ..فرحتها بأنها تحس انها مهمه فحياة حد بالشكل دا اقصى حلم حلمته فيوم من الايام وخصوصا لو كان الحد دا غريب حلم اى بنت فالدنيا .
ليل للمره اللى متعرفش عددها كام برضو بترجع تبص على الصوره وتحضنها، خرجت بعدها تتسحب زى كل ليله وفتحت باب اوضة غريب اللى كان موارب ودخلت بشويش وقعدت على ركبها قدام سريره وهى بتتأمله زى كل يوم وهو فاجمل حالاته ونايم زى الملاك من غير مايحس لكنها غفلت النهارده عن حاجه مهمه جدا ...
الخلخال اللى مهما حاولت متطلعش صوت غصب عنها طلع منه صوت خفيف وصل لودن غريب اللى ابتسم لماسمعه وحس بقربها ومثل انه نايم وسابها تتأمله وهو طاير من قربها منه بالشكل دا ...
رجعت ليل لاوضتها بعد ما تعبت من القعده وحاولت تنام لكن مجالهاش نوم مسكت تليفونها وبتردد اتصلت على رقم جواهر اللى اخدته من تليفون غريب وبعد كام رنه جالها صوت جواهر النعسان ..
جواهر :الووو مين !
ليل بفرحه وضحكه ظاهره فصوتها :انى ليل ياجواهر عحدتك من تلفونى الجديد ..
جواهر ابتسمت وكملت :امممم تليفونك الجديييد ..وياترى بقا مين جابهولك تليفونك الجديد دا يالولو ؟
ليل :هو قاسم مقالكيش ولا ايه ؟
جواهر :لأ مقاليش قاسم يقولى ايه ؟
ليل :قالكيش ان سى غريب اشترالى التلفون ديه وحجات تانيه حلوه قوى ، مهو كان معاه وهو اللى اشتراهمله اكيد ...انى قولت قالك .
جواهر اتنهدت :لأ ياستى قاسم مقاليش حاجه واصلا قاسم مبيكلمنيش ولا بيوجهلى اى كلام الا فحدود معينه منتى عارفه.
ليل :ولحد ميته ياجواهر هتفضلو عالحال ديه ؟
جواهر بصت لقاسم النايم جمبها ومديها ضهره وقامت من جمبه بشويش وخرجت للصاله بالتليفون واول ماخرجت قاسم فتح عنيه لأنه كان صاحى وسامع كل حاجه وقام وقف ورا باب الاوضه وكان صوت جواهر واصله بوضوح شديد مع انها بتتكلم بصوت واطى ..
جواهر :مش عارفه والله ياليل انا عن نفسى زهقت من الوضع دا ومش عارفه اخرته ايه .
ليل :يابتى قولتلك قولى لقاسم وريحى نفسك وهو هيفهم ويعذرك، قاسم عيحبك وهيساعدك لما يعرف الحقيقه ، قوليله على علتك وخليه يعرف يداويهالك .
جواهر :انتى اتجننتى ياليل عايزانى اقوله فيه راجل لمسنى قبلك وشاف جسمى وبسببه بيحصلى كده واستنى منه انه يفهم ويعذرنى مين عاقل يقول كده ياليل .
ليل لسه هتتكلم لقت الخط اتقفل مره وحده وكانت هترن تانى على جواهر لكن افتكرت ان جواهر بقفلة السكه مش عايزه تتكلم فالموضوع دا وليل سكتت ودخلت اوضتها واستسلمت للنوم اخيرا .
قاسم فاللحظه اللى سمع كلام جواهر حس بسكين انغرز فقلبه ،خرج بره الاوضه ووقف قدام جواهر اللى قفلت السكه فوش ليل من الخضه وبلعت ريقها بتوتر وهى شايفه قاسم وصل لمرحله من الغضب خلت كل ملامحه تتغير وتشوفه فصوره اول مره تشوفه فيها من يوم ماعرفته ..
جواهر :ققاسم أانتا ههنا من اامته .
قاسم وهو بيتكلم من بين سنانه:من وقت ماكنتى بتقولى انك مستحيل تقوليلى ان فيه راجل لمسك قبل منى .
جواهر :قاسم انتا فهمت ايه استنا انا هفهمك كل حاجه .
قاسم :الوقت كان كله قدامك وطلبت منك مليون مره انك تفهمينى وانتى معملتيش ، ودلوقتى مفيش حاجه تتحكى ياجواهر ...اللى خايفه منه خلاص عرفته وهتأكد بالفعل كمان انى سمعت صح ..
ومن غير مقدمات كان جارر جواهر من شعرها لاوضة النوم وهجم عليها زى اسد مسعور ،قطع هدومها واخد حقوقه منها بمنتهى الوحشيه ومرحمش توسل جواهر ولا رأف بحالتها وهى زى ماتكون بتصارع الموت بين ايديه ،وكل همه انه يتأكد من خيانتها ليه لكن الضربه القاضيه اللى شلت حركته وتفكيره انه شاف دليل برائتها وعفتها قدامه ...ايوه جواهر طلعت بنت ..امال ايه الكلام اللى سمعه من لسانها دا من شويه ؟!...
*************
قاسم عنيه متعلقه بجواهر اللى مبطلتش هلوسه طول الوقت واخيرا ابتدت تفتح عنيها بضعف وعنيها جت عليه واول كلمه نطقتها ...ليل ..هاتلى ليل .
قاسم قرب منها بلهفه وندم وهمس جمب ودنها :آسف ياجوهرتى ..وقرب عشان يبوسها لكنها لفت وشها للناحيه التانيه بسرعه وغمضت عنيها وهى بتفتكر اللى عمله معاها ورجعها لنفس عذاب عمها محروس ورجعت عاشت يوم من اسواء ايام حياتها اللى طول السنين اللى فاتت دى بتحاول تنساها ... نفس القسوة ..نفس الوحشيه ..نفس الاستباحه لجسمها بدون رحمه ..
فجأه قاسم اتحول قدامها لنسخه تانيه من محروس ..
ولا هو كان طول الوقت جواه محروس وهى اللى مكانتش عارفه .؟
خلاص جواهر ايقنت دلوقتى ان الرجاله كلهم كل اللى عاوزينه من الوحده جسمها وبس ،مهما كانت مسمياتهم واساليبهم لكن لازم فالاخر تقودهم لنفس الهدف الحيوانى ..
فالوقت دا نور الصبح كان ابتدا ينور وقاسم مسك تليفونه واتصل بغريب اللى رد عليه بعد كام رنه ..
قاسم :غريب قول لليل تجهز لو سمحت عشان هاجى آخدها لجواهر المستشفى .
غريب اتعدل فنومته ورد بنبرة قلق :
مالها جواهر ياقاسم ؟
قاسم رد عليه بتعب :تعبت شويه بالليل وجبتها المستشفى بعدين لما اشوفك هنتكلم ...خلى ليل تجهز بسرعه جواهر محتاجالها ..سلام .
غريب قام وراح على اوضة ليل بسرعه وهو بيخبط فكل حاجه تقابله لانه مش بيحسب خطواته زى كل مره ..
ليل كانت صلت الفجر وقاعده تقرا قرآن زى عادتها وسمعت صوت خبطة غريب قامت بخضه وفتحت الباب بسرعه ولقت غريب قدامها اتقدمت منه بارتباك وسندته من دراعه وسألته بخوف :سى غريب مالك فيك ايه انتا تعبان ؟!
غريب :البسى بسرعه ياليل جواهر فالمستشفى تعبانه ومحتجالك جمبها ..
ليل خبطت على صدرها وصرخت بفزع :ياحزنى ياحبيبتى ...مالها جواهر جرالها ايه دى كانت معاى عالتلفون فالليل وكانت كيف الورد .
غريب :البسى بس وانا هلبس وهنعرف كل حاجه لما نروحلها ...ليل جريت على اوضتها لكنها رجعت تانى لغريب سندته ودخلته اوضته وطلعتله لبس هو الاول وسابته يلبس، وبعدها جريت على اوضتها لبست وبمجرد ماخلصت تليفون غريب رن بأسم قاسم ،ليل مسكت ايد غريب ونزلو بعد ماليل قفلت باب الشقه ..
غريب وليل ركبو عربية قاسم واول ماليل ركبت العربيه سألت قاسم بلهفه جواهر جرالها ايه .
قاسم سكت والاتنين غريب وليل كانو منتظرين منه اى كلمه تطمنهم وبعدها اتكلم وهو باصص لليل فالمرايه ..
ليل ايه معنى المكالمه اللى دارت بينك وبين جواهر امبارح بالليل ..
ليل بلعت ريقها بخوف وبتهرب بعنيها منه بتوتر ومش عارفه ترد عليه تقول ايه .
قاسم كمل كلامه :انا سمعت كل حاجه ياليل وعايز اعرف مين الراجل اللى جواهر كانت بتتكلم عليه .
ليل بخوف :انتا فهمت ايه وكملت بصوت عالى نسبيا ..انتا عميلت فجواهر ايه ؟ اوعاك تكون ظلمتها ياقاسم اوعاك ..
قاسم :انا معذور فأى حاجه عملتها ، لما اسمع مراتى وحب عمرى تتكلم عن راجل تانى لمسها قبلى ومانعه نفسها عنى واحنا لينا اكتر من شهر متجوزين عاوزانى اعمل ايه ياليل ؟
اى حد فمكانى كان هيعمل ايه ..كنت محتاج لاثبات انى منضحكش عليا واتخدعت من حبيبتى ومراتى ..
ليل :قومت دبحتها ..، اخدت اثباتك بابشع طريقه ووصلت جواهر انها تسكن المستشفى مش اكده ؟
قولى تفرق ايه انتا دلوكيت عن عمها محروس فنظرها ؟ !
قاسم :عمها محروس !
ليل :ايوه عمها محروس ، اخو ابوها اللى المفروض يكون امانها وحمايتها وياخدها فحضنه ويطبطب عليها ويحميها من كل مكروه ...
كان ياخدها فحضنه بس عشان يشبع بيها رغبته كل ليله...
كان يطبطب عليها بس بغرض ان ايده تلمس جسمها وتدنسه ...
عمها اخو ابوها هو الراجل اللى كانت عتتحدت عنه امبارح وانتا سمعتها ياقاسم
غريب بيسمع الكلام دا منهم وهو مش مصدق اللى بيسمعه وحاسس انه فحلم ...لا وكل دا وقاسم مش قايله اى حاجه ..للدرجه دى قاسم بقا بعيد عنه ؟
غريب اتكلم اخيرا بعد ما حس بارتعاشة نفس ليل وعصبيتها وهى بتتكلم :بس ياليل اهدى طيب ..
ليل :له مش بس ياسى غريب ، مش هسكت زيها واسيبها تنظلم زى ماطول عمرها مظلومه وشايله همها لحالها وساكته ...
لاام ولا اب ولااخ ولا اخت وحتى انى معرفتش غير بعد ماتجوزت ..
جواهر داقت المر على يد اقرب الناس ليها من وهى عيله صغيره متعرفش فالدنيا حاجه ...
ولما ربنا رادلها تبعد عن العذاب اللى كانت عايشه فيه ولقت حبيب ينسيها ويهون عليها بدال مايعمل اكده مسك كاس المر اللى كانت ابتدت تنسى طعمه وسقاها منه تانى ..نفس الكاس بنفس الطعم ونفس العذاب ...
اخ ياقهرت قلبي عليكى ياجواهر اااخ
قاسم بصوته كله وعروق رقابته نفرت من كتر العصبيه :مقالتليش ليييه ،تخبى حاجه زى دى عنى ليه ، ياما سألتها كانت بتسكت ليه .افترضت ليه انى مكنتش هتفهم موقفها واقف جمبها واحتويها ..ليه متكلمتش وقالتلى كل حاجه ليه ؟
ليل :مقالتش لحد خالص ..كانت عامله حالها اتخطت كل حاجه ..كانت خايفه على كل اللى حواليها لو عرفو .
كانت خايفه امها تحمل نفسها الذنب، وكانت خايفه عليك لو قالتلك تتجرح رجولتك ،وتتكسر نفسك ، واهى برضك هى اللى دفعت تمن خوفها لحالها ..دفعته من شكك فيها وقلة ثقتك وعدم صبرك .
قاسم بيضرب بأيده على الدريكسيون بعنف وهو بيتكلم وكل كلمه بضربه .
عدم صبر ايه ياليل ؟ كل دا وتقولى عدم صبر ..حطو نفسكم مكانى ..اسمع مراتى بودنى بتقول مقدرش اقول لجوزى ان حد تانى لمسنى قبله ...عاوزين يفضل فيا عقل ازاى ...عايزينى اعمل ايه ساعتها ،
وفلحظة ضعف منه ونسى ان ليل موجوده وابتدا يبكى بصوت عالى ودموعه اللى منزلتش غير قدام غريب تنزل فوجود ليل وتشوفه فأضعف حالاته ..
غريب مش عارف يسكت قاسم ويهديه، ولا يسكت ليل اللى مش سامع غير شهقاتها ،واخر ماغلب سابهم هما الاتنين كل واحد يطلع اللى فقلبه بكا، وكمل الطريق وهو ساكت لحد ماوصلو المستشفى .
راحو على اوضتها وكان نادر قاعد جمبها على الكرسى وباصصلها بكل شفقه على الحاله اللى هى فيها من الم نفسى واضح من دموعها اللى فشل انه يسكتهم ...
دخلو التلاته وليل جريت على جواهر بلهفه رمت نفسها فوقها وفضلت تبوس فيها وجواهر تبتت فيها باديها الاتنين ودفنت وشها فحضن ليل وهى بتبكى بقهر ..
ليل :غلطك اللى مستمره فيه من صغرك هو اللى عميل فيكى اكده ، خوفك سواء من الناس او عليهم هو اللى دمرك ، خايفه ومرعوبه وعتدسدسى حاجه ملكيش يد فيها وعتوهربى منها وتخبى نفسك فكتمانك لغاية مابصى وصلتى حالك لفين ..
جواهر :اسكتى ياليل انتى ...
ليل :انى مش عارفه حاجه ،وحطى نفسك مكانى، وكل ماحد يتكلم يقول حطى نفسك مكانى ،ومحدش معترف بغلطه واصل ،
واصلا احب اقولكم انتو التنين انى لو حطيت نفسى مكانكم كنت اول حاجه هدافع عن حالى بروحى، وهتكلم واطلب المساعده من كل اللى حوالي، او عالاقل كنت هصارح جوزى بكل حاجه من اول يوم عشان نبتدو حياتنا بصفحه بيضه مفهاش ولا نقطه سوده ، دا لو انى كنت مكانك ياجواهر ..،
وكمان كنت حكمت قلبي قبل عقلى وراجعت نفسى واديت للى قدامى فرصه يتحدت واسمع منه ولو مصدقتهوش وكلامه مدخلش عقلى وقلبي ابقا ساعتها اتصرف بهمجيه ويبقا ليا حق اقول حطو نفسكم مكانى ،دا لو انى مكانك ياقاسم ..
قاسم وجواهر الاتنين بصو للارض وكل واحد منهم جواه بركان نار من ناحية التانى .
غريب واقف ومتكلمش لكنه منبهر بكلام ليل ونقدها لتصرفات الاتنين من وجهه نظرها هى واد ايه وجهه نظرها صح وكلامها عين العقل .
جواهر :خدينى معاكى ياليل انتى وغريب .
قاسم :لأ ياجواهر انتى هترجعى على شقتك وهترجعيلى .
جواهر :خلاص ياقاسم مبقتش حاسه انها شقتى ولا ليا رجعه لحياتك ...ارجوك كفايه لحد هنا .
قاسم هيتكلم لكن غريب قاطعه :سيبها براحتها ترتاحلها يومين تلاته وبعدها يبقى فيه كلام تانى .
استسلم قاسم وبص لجواهر لاخر مره بيترجاها بعنيه انها متسيبهوش وقرب منها وقعد جمبها ومسك ايدها وهمس :انا آسف ياجواهر ، انا آسف بجد .
جواهر بصوت ضعيف :مش عارفه مين فينا مفروض يتاسف لمين ياقاسم ..بس اللى متأكده منه اننا متساويين فالذنب .
قاسم هز دماغه وميل على جواهر طبع بوسه على جبينها بكل حنيه ورفع وشه بصلها ،ومسح دموعها بأيده ،
وسابهم وخرج للدكتوره اطمن على حالة جواهر وخلاها كتبتلها خروج والدكتوره معملتش كده غير لما راحت لجواهر وسألتها لو هتتخذ اجراء قانونى ضد جوزها وجواهر رفضت ، واخدها وراحو بيها على شقة غريب.
نادر اخد جواهر وليل فعربيته وقاسم وغريب ركبو عربية قاسم ووصلو شقة غريب واطمن على جواهر
نادر :طيب اسيبكم انا يدوبك اروح اغير واروح الشركه ..
ليل خرجت من الاوضه بع د ماريحت جواهر :له خليك هعملكم فطور افطرو كلكم سوا والبس اهنه واطلع على شغلك طوالى ...مش حداك غيارات اهنه برضيك .؟
نادر :والله فكره تصدقى ..صحيح انا ايه اللى هيودينى الفيلا لسه واروح واجى !طب بسرعه ياليل على مااكون اخدت شاور ولبست .
ليل :عنيا حاضر .
نادر لبس وليل حضرت الفطار وقعدو الشباب عشان ياكلو ،لكن غريب مكانش عارف ياكل من غير ليل ، وقاسم مش قادر ياكل بعد كل اللى حصل ، مفيش غير نادر اللى نزل على الفطار بكل حيله ..
ليل عملت فطار ليها ولجواهر ودخلت بيه عليها الاوضه ...
ليل :قومى يلا ياجوجه عشان تتقوتى وتصلبي طولك بدال معامله كيف اللى عدى عليها لورى فرمها اكده .
جواهر :مش قادره والله ياليل حاسه جسمى كله متدغدغ .
ليل :واخده بالى ياحبيبتى ..بنى آدم ديه ولا بابور ظلط بيفرم الناس ؟
سماعتيش كلام الدكتوره ليه واشتكيتى عليه ودخلتيه السجن وكان هناك هيلاقى الاقوى منه ويعمل فيه كيف معيمل فيكى اكده بالظبط وكنا فرحنا فيه ؟
جواهر :ياخبر ياليل ..انا اشتكى على قاسم !؟ قاسم دا لو جرتله اى حاجه وحشه انا اموت فيها .
ليل :ايه هو ديه !خدينى حداكم ياليل ، مراجعاش معاك شقتك تانى ، لو جرتله حاجه وحشه اموت ، مترسيلك على بر يابت انتى
جواهر :بحبه اوى وموجوعه منه اوى اوى ياليل .
ليل :يبقا نستنو لما تبقى موجوعه اوى وحده بس، عشان تبقى عتحبيه اوى ومجروحه اوى ونطيرو الاوى مع الاوى وتفضل موجب عحبه مع سالب موجوعه تدينا (عحبه ) وساعتها ترجعيله وتتلمى وتلمى روحك عاد كفايه جلع ...قومى يله كولى خليكى تعوضى الدم اللى نزفتيه بقيتى محداكيش دم يافقريه .
جواهر ابتسمت على كلام ليل واتعدلت بصعوبه ،وابتدت تاكل من ايد ليل غصب عنها تحت اصرار ليل،
اما ليل فبالها كله مع غريبها وياترى بياكل من ايد مين غيرها دلوقتى ..
نادر خلص فطار ونزل، وقاسم اطمن ان جواهر اكلت ونزل هو كمان راح لشغله ،وليل سابت جواهر ترتاح وخرجت تعمل شغل البيت، وغريب متابع كل حركه من حركاتها من رنة الخلخال وهو مبتسم ...
ليل خلصت شغل البيت وابتدت تجهز فالغدا وعملت عصير موز بلبن وصبت كبايه ليها وكبايه لغريب وراحت بيهم عنده فالصاله .
غريب كل ماتقرب منه ليل ابتسامته تزيد اكتر وليل تدوب فجمالها اكتر واكتر ...
************
سميه لاحظت ان نادر مكانش موجود على الفطار واتصلت عليه .
سميه : ايوه يانادر صباح الخير ياحبيبي
نادر :صباح النور
سميه :خرجت بدرى ليه من غير فطار .
نادر :انا من امبارح بالليل بره البيت اصلا .
سميه :ليه ياحبيبي اخر حاجه شفتك طلعت اوضتك متأخر خرجت تانى ليه وقضيت الليل فين ؟ !
نادر :عند غريب .
سميه بخضه :ليه غريب جرتله حاجه ولا ايه يانادر اتكلم ..
نادر ابتسم وهو حاسس بلهفة امه على غريب اللى لايمكن تكون تمثيل واتأكد وصدق وقتها ان امه سميه فعلا بدأت تتغير وتحب غريب وتخاف عليه .
لقراءة باقي الفصول الجزء الثاني من هنا
لقراءة الجزء الاول جميع الفصول كاملة من هنا