رواية فرعون الجزء الثاني2
الفصل الرابع والعشرون
بقلم ريناد يوسف
قاسم جرى على غريب وحضنه وشويه شويه غريب ابتدت حالته تتحسن ويفك والكل عمال يسأل جراله كده ليه ومن ايه ؟
قاسم :اقولكم انا ليه ...اصله بيحب ليل وطلب من جواهر تفاتحها وليل رفضته وقالت انها عمرها مافكرت فيه كزوج واننا نقفل الموضوع دا ومحدش يفتحه معاها مره تانيه ..
وهنا ردت سميه الرد اللى صدم الكل :نااااااااااعاااام هى مين دى اللى متفكرش فغريب كزوج ..هى تطول اصلا تتجوز واحد زى ابنى غريب ، البت دى اتجننت ولا ايه ؟
قاسم رفع حواجبه وابتسم باستغراب :الله سميه هانم السلحدار بقت شلق وبتردح ...وعشان مين ؟ غريب! ..آمنت بالله
ماهر بص لجميله باستغراب وجميله هربت بعنيها منه وركزت على غريب وحالته الصعبه وعرفت اد ايه هو بيحب ليل ..والكل بلا استثناء مستغرب وحاسين ان فيه حاجه غلط فالموضوع لان حب ليل وغريب لبعض واضح وضوح الشمس ..
ناديه :متزعلش نفسك ياابيه انا هروح اكلمها بنفسى واخليها توافق تتجوزك بالعافيه .
غريب ابتسم رغم حالته على ناديه اللى وافقت على ليل بمجرد ما شافته تعبان .
قاسم :متحاولوش دى مش راضيه بتاتا ...
جميله :قاسم كفايه كده غريب هيموت انا هاقول....وقبل ماتكمل جرها قاسم معاه بعيد ..
جميله :لا بجد كده كتير ياقاسم انتا مش شايف حالة غريب عامله ازاى انتا عاوزه يموت !
قاسم :ولا هيموت ولا حاجه دا شديد وزى القرد ودلوقتى يقوم ولا كان حاجه حصلت ..اسكتى والنبى خليه يتعذب شويه ...مهو اصل يعنى ايه يحبها ويخطبها ويتجوزها وكل دا من غير اى مشاكل ..فين الاثاره ..فين المتعه ..فين الاكشن فالموضوع ؟
جميله :ياقاسم هتموته وتقول اكشن
قاسم :مش هيموت والله متخافيش عليه دا فرعون ميغركش حالته دى دا كان موقف الداخليه كلها على رجل .وبعدين هو النهارده بس وبكره هنقولهم هو وليل
جميله : لهو انتو حتى ليل عملتو فيها كده
قاسم بفرحه :آه وزمانها بتموت دلوقتى😂 ..
جميله : وفرحان ؟!ياحبايبى ياولادى
ربنا يستر عليهم لغاية بكره من جنانك ومن جنان مراتك اللى طاوعتك دى
قاسم :تقدر متطاوعنيش ..احبسهالك والله .
الاتنين بصو لقو نادر جاى بيجرى من بره الفيلاوقعد تحت رجلين ابوه وهو بينهج ومش قادر ياخد نفسه وحتى ملاحظش لمتهم كلهم حوالين غريب وزعق :
بابا الحقنى الشركه اتعرضت لعملية نصب كبيره وخسرنا كل حاجه وبقينا على الحديده ...
ماهر وقف وبص لنادر :انتا بتقول ايه ؟
نادر :هفهمك كل حاجه لازم تتصرف بسرعه يابابا الشركه هتضيع .
ماهر :افهم ايه انتا عملت ايه من ورايه الله يخرب بيتك ؟
قاسم بص لجميله :اهو الاكشن اللى بجد اهو ، مش تقوليلى مش عارف ايه ...تعالى تعالى شكلكم هتفلسو وتبقو عالحديده .
نادر فضل يشرح لابوه من البدايه هو عمل ايه وقاله على الارض اللى اشتراها عشان يعملها قريه سياحيه وطلعت ارض حكوميه واتنصب عليه وانه دفع فيها تقريبا كل راسمال الشركه وحتى انه اخد قرض كبير عشان يبنيها ودلوقتى البنك بيطالبه بسداد القرض دا يأمه يحجز على الشركه وعلى كل املاكهم ...
قعد ماهر على حيله وهو حاسس ان الهوا مش داخل لصدره وهو بيتخيل ان تعبه وتعب ابوه قبل منه كله ضيعه نادر بغبائه وتهوره فغمضة عين .
انقلبت الدفه وبدال ماماهر كان بيهدى فغريب غريب والكل بقو يهدو فماهر اللى واضح جدا انه على وشك جلطه جديده والاسعاف اللى كانو هيطلبوها لغريب طلبوها لماهر .
************
اما ليل فبتلف فالشقه زى المجنونه وجواهر تهدى فيها
ليل :والله عيحبنى انى عارفه زين ...انى عشوف فكلامه وفتصرفاته وفكل حاجه بيعملهالى ولا بيقولهالى انا سمعتها منه من غير مايقولها ...
قولو انه محدش رضى انه ياخد وحده زيي بس متقولوش انه معيحبنيش ..دى واعره على قلبي قوى والله .
جواهر صعبت عليها حالة ليل جدا وكانت على وشك انها تقولها كل حاجه وترحم عذابها ...بس افتكرت كلام قاسم انها مهما شافت حالتها متاخدهاش بيها اى شفقه او رحمه وهى ساعات هيتعذبو فيها وبعدها يفرحو طول العمر ويحسو بطعم الفرحه اكتر ...
جواهر لما مستحملتش اللى بيحصل فليل دخلت اوضتها وقفلت على نفسها عشان متشوفش ليل قدامها بالمنظر دا وتضعف وتتكلم .
ليل كل تفكيرها فانه هيكون تعاملها ازاى مع غريب من هنا ورايح ..اكيد لازم تحط لمشاعرها حد، وتبتدى تهد اى امل بنته فيوم من الايام على غريب، لحد هنا وخلاص عشان مينفعش تتمادى فحبه اكتر من كده .
*********
غريب وقاسم ونادر وجميله وناديه مع ماهر فالمستشفى والحمد لله كانت بداية جلطه ولحقوها فوقتها قبل ماتأثر على اى حاجه ..
الدكاتره قالولهم انه لازم يفضل يومين تحت الملاحظه وبعدها يقدر يخرج معاهم عادى .
قاسم اخد غريب وروحو ونادر اخد ناديه وراحو على الفيلا مفضلش فالمستشفى غير جميله اللى رفضت تروح وتخلى اى حد تانى يقعد بدالها مع ماهر .
قاسم فى الطريق هو وغريب وملاحظ حالة غريب اللى بتتدهور كل مايقربو من الشقه ..
غريب :فاضل كتير ونوصل ؟
قاسم :تقريبا كل ثانيه بتسألنى السؤال ده ...خلاص ياسيدى وصلنا .
غريب :لف وارجع بيا على الفيلا تانى ياقاسم
قاسم :نعم ياخويا ..هى حاورينى ياكيكه ولا ايه ...انا مصدقت وصلت مقولتش ليه من الاول انك عاوز تغور الفيلا ؟
غريب :اصلى خايف اوى من معاملة ليل ليا من النهارده ..وخايف اى كلمه منى بعد كده تفهمها غلط وتتدايق وتمشى .
قاسم :لا هى فعلا هتدايق وتمشى لما انتا متطلعش الشقه دلوقتى وتتعامل عادى ...عارف ساعتها هتقول عليك عشان مرضيتش بيه مش طايق يفضل معايا فمكان واحد وساعتها هترجع متلاقيهاش .
غريب :لأ ملاقيهاش دا ايه ..انزل انزل طلعنى حاسس ان رجليا مش شايلانى اسندنى .
قاسم :تعالا منا كده كده طالع آخد مراتى من عندكم ...
وطلعو وقاسم رن الجرس وحس بأرتعاشة ايد غريب فأيده والباب بيتفتح وكانت جواهر .
قاسم غمزلها :عامله ايه ياجوجو
جواهر بصت لغريب واتألمت وهزت دماغها برفض لحالته :انا كويسه ..عامل ايه ياغريب
غريب بضعف :الحمد لله ياجواهر ...دخلنى جوا ياقاسم
...دخله قاسم ولاول مره يغيب عن ليل المده دى وميلاقيهاش مستنياه بلهفه على الباب ..ميحسش انها كانت بتعدى الوقت بالعافيه عشان يرجعلها ...ورجع افتكر ان كل دى كانت اوهام فدماغه هو وبس ...
ليل سمعت جرس الباب وكانت هتجرى تفتحله وهى متاكده انه هو اللى على الباب لكنها رجعت وقعدت مكانها ..خافت من رد فعله لما يشوفها ..خافت انه يكون فكر ان اهتمامها بيه ماهو الا وسيله عشان تجبره يحبها ويتعلق بيها ...
وكل شكوكها ومخاوفها اتأكدت لما دخل ومسألش عليها ...ولا نده اسمها ...اهو قاعد بقاله خمس دقايق بره مع قاسم وجواهر بيتكلمو ولاول مره متكونش فاستقباله بعد غيابه عنها اليوم كله .
شويه وسمعت باب الشقه اتفتح واتقفل وعرفت ان جواهر وقاسم روحو ..
حطت ايدها على قلبها وبلعت ريقها واستجمعت قواها وخرجت ناحية غريب بخطوات بطيئه .
اول ماخرجت من باب الاوضه كان غريب حاطط دماغه بين ايديه بتعب ..ومع صوت الخلخال اللى بيقرب منه رفع دماغه ناحية ليل واتنهد بألم وحاسس ان دقات قلبه اتوحدت مع رنات خلخالها .
ليل وقفت قدامه وبلعت ريقها قبل ماتتكلم بحذر...مالك ياسى غريب ..انتا تعبان ولا ايه ؟
غريب :اوى ياليل ...تعبان فوق مااتخيلى .
ليل قعدت قصاده على ركبها على الارض واتكلمت بنبره كلها حنيه وخوف :بعد الشر عليك من التعب ياسى غريب ...قولى ايه اللى واجعك
غريب :قلبى هو اللى واجعنى ياليل
ليل :سلامة قلبك من كل وجع وهم ياسى غريب ..تروح لداكتور ؟
غريب :مش هيعرف يعالجنى الدكتور ياليل ..عشان لسه ملقوش علاج لحالتى ...انا قلبى واجعنى من الزعل ...
كان نفسه يقولها قلبي واجعنى منك انتى ...كان نفسه يقولها انتى وجعى وانتى لوحدك دوايا وطبيبي ...لكن مقدرش ينزل من كرامته قدامها اكتر من كده
وبدال ماسمع رفضها ليه بطريق غير مباشر يسمعه المرادى بودانه من بين شفايفها وتقضى على كل ذكرى حلوه جواه ليها .
ليل :مفيش حاجه تستاهل ان غريب بيه يزعل عشانها ..انتا سيد الناس ياسى غريب والدنيا كلها متسواش انك تتكدر عشانها .
غريب :بس فيه ناس بالدنيا كلها عندنا ياليل ولما نحس اننا هنخسرهم، فمجرد الاحساس لوحده بيموتنا ..
ليل بحيره :انى مفهماشى انتا عتتحدت عن ايه ياسى غريب ؟
غريب :بتكلم عن ظلم الدنيا ياليل ..لما تدينا حاجه حلوه اوى وتفرحنا بيها وتروح بعدها خطفاها مننا وتقولنا الحاجه دى مش بتاعتكم طب لما هى مش بتاعتنا ومش لينا من الاول بتتحط فطريقنا ليه ؟ بندوق حلاوتها ليه ؟
ليل بصوت مكتوم من البكا :سى غريب انتا قلقتنى عليك قوى ..قولى بس مالك وايه اللى وصلك لكده ..
غريب :نادر ضيع الشركه ياليل وخَسَرها وبابا تعب اوى ونقلناه المستشفى ...
ليل خبطت على صدرها :وه ..ياعينى عليك ياعمى ماهر بيه ..دا لساته طالع من دوش عيا مليح، ويادوبك هيفرح بشفاه ... كسِرو عليه وقولوله
فداه كل حاجه اهم حاجه صحته ..
ودينى ليه وحياتك ياسى غريب اطمن عليه الا عمى ماهر بيه ابوك ديه راجل كومل وجمايله مغرقانى ...
دا كفايه فتحلى بيته وسترنى من مرمطة الشوارع .
غريب :اطمنى هو بخير وهيقوم منها بأذن الله وهروحله بكره واخدك معايا .
ليل :ربنا يشفيه بحق جاه المصطفى واهل بيته يارب ..
غريب :آمين ياليل اما اقوم انام انا تعبت النهارده اوى .
ليل بصتله بعتب عشان مفكراه بيهرب من القعاد معاها وقامت من طريقه وسابته يروح على اوضته لوحده محبتش تدايقه بقربها منه اللى الظاهر مبقاش مستحمله من دلوقتى ...
راح غريب على اوضته لوحده ..من غير ماليل تمسك ايده وتوديه وعرف انها من النهارده سابت ايده ولازم يتعود يعيش من غير مساعدتها ..
دخل وقفل الباب عليه وقعد على السرير حاطط وشه بين اديه
ليل قامت هى كمان ودخلت اوضتها لكنها سابت الباب مفتوح ...اتمددت على السرير وحاولت تهدا وتنام شويه لكن معرفتش ...قامت وفضلت رايحه جايه فالاوضه بحيره ...
ليل لنفسها :اطلع واروحله دلوكيت اوضته واقوله انى طول عمرى هفضل اخدمك واقعد تحت رجلك بس متعاملنيش اكده وارجع معاى كيف لاول ؟ ...اقوله متموتنيش بالطريقه الصعبه دى ...اقوله انا عندى ارمى حالى من البلكونه ارحملى من تجاهله ليا ...اعمل ايه بس ياربي دلنى انى عمووت ..اخس عليكى ياجواهر وعلى فكرتك ..منى كنت قاعده ومرتاحه معاه وفقربه وقلتلك بلاااش ...
ايوه بس لقيتها ..انا هاقوله ان جواهر وقاسم هما اللى فكرو فالفكره بتاعت جوازنا دى وانى مليش صالح وانه فنظرى اخ وبس ...ايوه وبكده هيرجع من تانى يتعامل معاى كيف ماكان .
خرجت ووصلت قدام باب اوضته ووقفت
غريب كان هيتجنن وهو سامع صوت خلخالها مبطلش رن ..معناها انها بتتمشى ومحتاره ...ياترى بتفكرى فأيه ياليل ..بتفكرى تمشى وتسيبينى ؟..قلبه دقاته بقت زى قنابل صغيره جوا صدره وهو سامع صوت الخلخال بيقرب ووقف قدام اوضته ..
بلع ريقه وقام اتمشى لحد الباب ووقف مقدرش يفتح لانه عارف ان الباب دا لو فتحه هيبقى فتح على قلبه ابواب الجحيم ..فسلم امره لله ووقف مستنى لحظة دخول ليل عليه وحضر نفسه لاى كلام هتقوله .
**********
قاسم رجع لبيتهم بجواهر وقبل مايطلع شقتهم عدى على باباه عشان يبلغه باللى حصل لعمه ماهر عشان يحضرو نفسهم يروحوله كلهم المستشفى بكره .
فتحت موده الباب كالعاده وهى ماسكه المعقم بتاعها ...قاسم اول ماشافها سكت ومبقاش عارف يقولها ازاى وهو عارف انها بتحبه واكيد خبر زى دا مش هيكون سهل عليها .
جواهر لما لقت قاسم مش بيتكلم تولت هى المهمه واتكلمت بداله
جواهر :موده بلغى عمى وماما ماجده ان خالو تعب ونقلوه المستشفى عشان بكره يجهزو على الساعه ١١ ويروحو معانا نزوره .
موده اول ماسمعت الخبر حست كأن حد خبطها على دماغها ..قزازة المعقم وقعت من ايدها ، رفعت ايدها تعدل نضارتها وهى بتبلع ريقها بصعوبه ..وواقفه فمكانها بدون اى حركه ...
قاسم ميل وشال قزازة المعقم من الارض واداها لموده وطبطب على خدها بحنان وهو بيقولها :
ابقى طمنيهم وقوليلهم انه هو كويس وحالته مش خطر ولا حاجه شوية ارهاق وهيخرج بكره، بس لازم نروح نعمل الواجب .
موده فهمت ان قاسم بيطمنها هى عليه لانه الوحيد اللى عارف بمشاعرها من نحية ماهر ..بصتله ونزلت عنيها للارض بخجل من نظرات اخوها ليها .
قاسم ابتسملها بحب ..يلا ادخلى انتى والمعقم بتاعك احنا هنطلع لشقتنا عشان تعبانين .
جواهر استغربت من تصرف قاسم ناحية اخته وازاى خاف عليها من الصدمه واتعامل معاها بكل حنيه ..ولسه ممرمط صحبتها وابن خالها ودايس على قلبهم بجزمه قديمه
دخلو شقتهم وجواهر لفت عليه وضربته بقفا ايدها على صدره بقوه خلته يتألم ويمسك مكان الضربه
قاسم :اه ..تك ضربه فنفوخك ..ليه يبت المنشت الغبى دا ؟
جواهر :عند اختك تطبطب طبطبه ..لكن عند ليل تقولى متاخدكيش بيها شفقه ولا رحمه مش كده ؟! انتا بتكيل بمكيالين يلا ياقاسم على فكره
قاسم :مهو اصل انتى مش فاهمه
..تعالى هفهمك انا، واخدها تحت دراعه و داخل بيها للاوضه بتاعتهم وهو بيتكلم..
اصل موده دى اول مره تحب ياقلبي واول يوم تتهنى ..اوم اييه لوقلبها اتكسر مش هنعرف نلمه تانى ..اوم اييه نتعامل معاها بحرص اوى الا قلبها دا لو اتكسر القزاز بتاعه هيملا الدنيا ويدخل فرجلنا وساعتها هنتوجع ونقول اي ونعاااايييط ...فهمتى؟ ..اكيد فهمتى .
جواهر بتكشيره :لا ياشيخ؟.
قاسم :لا ياشيييخ ..ومن شويه اتقالى يلا ...لاااا بقا أنى ارى ان بوقك دا اخد عليا اوى ولازمله عقاب اوقفه بيه عند حده ..
جواهر :وهتوقف بوقى عند حده ازاى بقا ياسى قاسم
قاسم :كده اهو ...واخد شفايفها بين شفايفه فعقاب مفعم بالاحاسيس وهى استسلمت واعلنت خضوعها لاجمل عقاب فالدنيا .
جواهر :ثبتتنى وبلفتنى انتا كده صح ؟
قاسم :ياشيخه هو انا قادر اسبتك ولا عارفلك طريق دخله ابلفك منها ..دنا حطيت صوابعى العشره فالشق منك ..
جواهر :كده ؟ طيب اعمل حسابك هتنام لوحدك فالصاله النهارده ..
قاسم :لا ياجواهر احيات عيالك ياشيخه متعملى فيا كده مقدرش انام بعيد عنك انا .
جواهر :لا هتنام لوحدك عشان تحس بفتفوته من احساس غريب وليل اللى حاسين بيه النهارده وهيفضلو حاسين بيه لغاية ماتحن عليهم بكره .
وجريت ودخلت الاوضه وقفلت الباب عليه ..
قاسم جرى وراها عشان يلحق الباب قبل ماجواهر تقفله لكنه ملحقش والباب اتقفل
قاسم :جوجو ..حبيبي ..افتحى ياروحى بلاش هزار البوابين ده ..جواهر افتحى متستعبطيش
...جواهر
لكن قاسم ملقاش اى رد من جواهر
قاسم :ياجواهر افتحى طيب عشان العلاج بتاع الدكتوره النفسيه اللى قالت عليه ...يبت العلاج لازم يتاخد فمعاده عشان يجيب مفعول ...يبت افتحى العلاج هيبوظ فالصاله من الحر ياعبيطه .....
طب اعملى حسابك بقا بكره فيه جرعه مضاعفه يابروح امك
جواهر طول الوقت كاتمه ضحكتها وحاطه ايدها على بوقها ...
قاسم قال اخر جمله باحباط قبل مايروح ينام فالصاله عالكنبه :روحى ياكش ابو رجل مسلوخه يطلعلك من تحت السرير ياكلك...
جواهر حاولت تنام لوحدها من غير قاسم لكن معرفتش وفضلتت تتقلب وفالاخر استسلمت وقامت فتحت باب الاوضه وطلعت دماغها وبمجرد ماشاورت لقاسم بصباعها قام يجرى عليها ...
قاسم :عرفتك هتخافى من ابو رجل مسلوخه ياجبانه
جواهر :لا وانتا الصادق معرفتش انام بعيد عن حضنك ...قاسم ضحك ونام على السرير وفرد ايديه لجوهرته وهى دخلت فحضنه ودلوقتى بس حست انها ارتاحت وقدرت تنام بسهوله .
**********
اما موده بعد ماقاسم مشى دخلت وقفلت الباب وقبل ماتبلغ اى حد راحت على تليفونها وبعتت لماهر رساله على الماسنجر :
الف بعد الشر عليك ياماهر ..يارب تكون بخير ...قلبي عندك ..لو تقدر ترد طمنى عليك .
سابت التليفون و قعدت جمبه شويه ولما ملقتش اى رد ولا حتى ماهر فتح القلق اتملك منها وفكرت انه ممكن يكون تعبان اوى وقاسم قالها كده بس عشان يطمنها .. رنت عليه رن وبرضو مفيش رد ...
بعدها راحت على اوضة باباها ومامتها وخبطت ودخلت وحكتلهم على اللى قالهولها قاسم .
الاتنين اتاثرو جدا لتعب ماهر واتمنوله ان ربنا يقومه بالسلامه ..
موده بتفرك فايدها بقلق وتردد ، بصتلها ماجده وديقت عنيها ...عاوزه تقولى حاجه ياموده ؟
موده :آاا بصراحه كنت عاوزه اقترح على بابا يتصل بغريب ويطمن منه على ماهر بيه اصل انتى عارفه قاسم بيتفه الامور ومش معنى قال انه كويس يبقى كويس .
عبد السلام :فعلا والله عندك حق ..وطلع التليفون ورن على غريب اللى طمنه على ماهر وقالهم انهم سابوه فالمستشفى كلهم ورجعو مقعدتش غير عمته جميله بس معاه .
اطمنت موده شويه ورجعت اوضتها بس كانت بتتمنى لو تسمع صوته فاللحظه دى عشان هى دى الحاجه الوحيده اللى هتطمنها انه بخير بجد .
فكرت كتير واترددت قبل ماتمسك تليفونها وتطلع رقم جميله ام جواهر وتتصل عليها ..
جميله :ايوه ياموده ياحبيبتى
موده :ايوه ياخالتو الف سلامه على ماهر بيه ...ياترى هو عامل ايه دلوقتى .
جميله :الله يسلمك ياموده ياحبيبتى ..هو بخير الحمد لله ازمه وعدت ..
ماهر من اول المكالمه وعرف ان موده هى اللى على التليفون صحصح وركز مع كل كلمه بتقولها جميله وهو مبتسم ..
جميله :لأ والله مافيه حاجه وانا هخبى عليكى ليه ياحبيبتى ...لأ طمنى ماما وبابا وقوليلهم انه تمام .
هنا ماهر شاور لجميله تديله التليفون لما حس بقلق موده عليه وعرف انها مش هتطمن غير لما يسمعها صوته وفعلا جميله ادتله التليفون .
ماهر :ايوه ياموده .
موده سمعت صوت ماهر وكان حجر انزاح من على قلبها لما اطمنت انه كويس واتنهدت تنهيدة ارتياح ماهر سمعها بقلبه مش بودنه وابتسم براحه وهو شايف قلقها عليه ...وفاللحظه دى بالذات اتأكد انه قدر يخترق شرنقة موده ويتسلل لقلبها ..
قفل السكه معاها بعد مااطمنت عليه وهو مكالمتها دى فرقت معاه كتير اوى ...وحس انه بقى اقوى بكتير وانه هيقدر يعدى الازمه دى بنجاح بس لازم الاول يجبر موده انها تكون جمبه ومعاه عشان يتقوى بيها
*********
اما عند غريب وليل
غريب واقف مستنى ليل تخبط وتدخل عليه وتقوله انها خلاص هتسيبه وتبعد ...
لكن اللى حصل انه استنى شويه كتار فمكانه قبل مايسمع صوت خلخال ليل وهو بيبعد من قدام اوضته وغمض عنيه وبص لفوق واخد نفس قوى وخرجه بقوه ورجع قعد على سريره من تانى ..
ليل وقفت قدام باب اوضة غريب ورفعت ايدها عشان تخبط عليه لكنها اتراجعت فآخر لحظه وفضلت انها تقوله كل الكلام دا لو شافت ان معاملته ليها استمرت بالجفاء دا .
********
ناديه قاعده فأوضتها بالليل وسرحانه فاللى حصل لباباها وبتحمد ربنا انه عدى منها بخير ...
لكن اللى مش قادره تتخطاه فعلا ولا بيغيب من قدام عنيها هو منظر غريب النهارده وحالته اللى وصلها بمجرد ماليل رفضته وهو ليه فرصه تانيه ممكن يحاول فيها معاها ...انما كان هيجراله ايه لو كانت قدرت تمشيها من الفيلا وتبعدها عنه للابد ..قلبها اتقبض لانها حست ان غريب فحركه زى دى كان ممكن يروح فيها
حمدت ربها ان دا محصلش ..وعرفت اد ايه كانت انانيه مع غريب اللى طول عمرها مشافتش منه غير كل حب وحنان .. وفضلت تسأل نفسها ازاى طاوعها قلبها انها تستكتر عليه السعاده ؟
رن تليفونها برقم زاهر بصتله وكنسلت عليه ...رن تانى برضو كنسلت رن تالت حطته على قائمة الحظر ..
مستنتش كتير ولقت رقم غريب بيرن عليها مش متسجل عندها ..
رفعت التليفون وردت واتفاجأت بزاهر هو اللى بيكلمها من نمره تانيه
زاهر :بقا انا تحطينى على الحظر ياواطيه يبنت الكلب .
ناديه :ايه دا احترم نفسك ياحيوان انتا ، انتا ازاى تشتمنى وازاى اصلا تكلمنى بالاسلوب دا ؟ انتا مين انتا
زاهر :انا كابوسك اللى مش هتصحى منه باقى عمرك يازباله ..تنزلى تقابلينى بكره فالمعاد والمكان اللى هقولك عليه ورجلك فوق رقابتك ..والاا مش هيحصلك طيب
ناديه :خفت انا كده ...انا اقابلك انتا ياحشرة الفيس يازباله ، وكمان رجلى فوق رقابتى ؟ لا دا الظاهر انا اديتك حجم اكبر من حجمك خلاك تشوف نفسك عليا ...اقفل يازاهر وياريت متتصلش بيا تانى احسنلك .
زاهر :استنى بس قبل ماتهددى وتتأمرى افتحى الماسنجر وشوفى الهديه اللى بعتهالك دى الاول وبعدين نتكلم ....سلام ياأوته ....
قفل السكه وناديه بسرعه راحت للماسنجر وشافته باعتلها صورها بس مش هى اللى فالصوره ..الكلب واخد دماغها وحاططها على صور بنات عريانه والمصيبه انه مظبط الصور زى ماتكون صورها بجد ومحدش يقدر يفرقها عن الصور الحقيقيه ...
وتحت الصور كاتبلها ..يأمه تسمعى كلامى ..او من بكره تلاقى الصور دى منشوره على صفحات اخواتك الاتنين وابوكى واصدقائهم واصدقاء الاصدقاء .
ناديه حطت ايدها على بوقها ودموعها ابتدت تنزل وحست بخوف اول مره تحس بيه ..او بالاصح حست باحساس اول تحسه فحياتها مهما اتكلمت مش هتقدر توصفه
فرعون 2
البارت الخامس والعشرون 25
ناديه حطت ايدها على بوقها وحست بخوف عمرها محست بيه قبل كده ....بقت تتخبط مش عارفه تعمل ايه او تروح فين ..
مهى مش هتقدر تسيبه يفضحها ..ولا هتقدر تعمل اللى هو عاوزه
..مستحيل طبعا تحط دماغ ابوها واخواتها فالارض وهى متأكده هو عاوز منها ايه كويس اووى .
فكرت تكلم مين ..غريب لايمكن تقدر تقوله حاجه زى دى، وخصوصا بعد الحاله اللى كان فيها النهارده، واصلا مش هتقدر تقضى على آخر شوية ثقه واحترام باقيالها عنده بعد اللى عملته فليل واللى زعله منها كل المده دى ويادوب ماصدقت انه يصالحها ..
نادر اول ماتقوله مش بعيد يقتلها وهى واقفه قدامه لانه كله عنده ولا ان حد يمس سمعته وسمعة العيله ..امها سميه؟ ..اول ماهتقولها هتفضل تديها مواعظ وحكم وتعمل نفسها ام على آخر الزمن ...
عمتها جميله من آخر صدام مابينهم وهما الاتنين بيتجنبو بعض ..
ايوه ..هى مفيش غيرها ..
جواهر ..هى الوحيده الفاهمه وعاقله وهتعرف تحللها المشكله دى .ايوه هى جواهر مفيش غيرها
اتصلت ناديه على جواهر واتكلمت بصوت مخنوق من البكا اول ماسمعت جواهر ردت على التليفون ..
ناديه :جواهر ..الحقينى انا روحت فداهيه .
جواهر قامت من حضن قاسم مخضوضه واتعدلت فقعدتها وفتحت النور واتكلمت بقلق وهى باصه على قاسم اللى قام هو كمان وقعد جمبها على السرير، ومركز على ملامحها وهى بتتكلم بخوف وعاقد حواجبه .
جواهر :ناديه اهدى بس وفهمينى بالراحه فيه ايه ..
ناديه :فيه واحد كلمته من الفيس واتعرفت عليه وبعتله صورى ودلوقتى مركبها على صور عريانه وبيهددنى بيها يأمه اروحله واعمل اللى يطلبه منى يأمه ينشر صورى على الفيس وفكل مكان .
جواهر ضربت على خدها وبصت لقاسم اللى شاورلها تفتح السماعه الخارجيه وهى عملت كده .
جواهر : يخرب بيتك ياناديه ايه اللى عملتيه دا ؟ دانتى طول عمرك ست العاقلين !
ناديه :ارجوكى ياجواهر مش وقت لوم دلوقتى انا قدامى سعات قليله وهضيع .
جواهر :طيب وايه العمل دلوقتى هتعملى ايه ؟
ناديه :وهو انا كلمتك ليه مش عشان تقوليلى انتى اعمل ايه ؟ انا خايفه اوى ياجواهر ..خايفه اتفضح والصور المتفبركه دى تتنشر فكل مكان وساعتها الكلب دا يبقى دمر العيله كلها وانا على راسهم .
جواهر :طيب قولى لنادر او لغريب وهما يتصرفو .
ناديه :لا ياجواهر مقدرش ..مقدرش استحمل كلمة لوم او عتاب من اى واحد فيهم ..وخصوصا غريب اللى دايما كان يقولى انا اختى فوق مستوى الاخطاء ...اجى دلوقتى اقوله اختك وقعت فاكبر خطأ فى الدنيا ؟ مقدرش اشوف نظرة انكسار فعيونهم بسببي .
قاسم مسك اجنده صغيره وقلم من على الكوميدينو بسرعه وكتب فيها
اسأليها على اسمه وخليها تبعتلك صورة حسابه ...
جواهر :طيب ياناديه اهدى وابعتيلى رقمه و اسمه وصورة بروفايله وانا هشوف هقدر اعمل ايه .
ناديه :فكرى وشوفيلى حل قبل بكره ارجوكى ياجواهر ...انا مقداميش غير ساعات قليله .
قاسم كتب لجواهر ...اوعى تروحيله تحت اى ظرف
جواهر قالتلها كده
ناديه :وتهديده
جواهر :انا هتصرف خلاص ...اقفلى انتى وابعتى اللى قولتلك عليه
وفعلا ناديه بعتت الرقم والاسم والصوره
قاسم :انا مش قادر استوعب ..ناديه ام عقل يوزن بلد تعمل كده ؟ تآمن لحد من على الفيس! وكمان تبعتله صور ! انا مصدوم بصراحه
جواهر :امال لما انتا مصدوم بالشكل دا ..امال غريب اللى مربيها على ايده هيعمل ايه لو عرف ؟ ولا خالى ولا نادر
قاسم :لا غريب مين اللى يعرف دا كان يروح فيها ..محدش هيعرف اى حاجه بأذن الله ...انا هخلص الموضوع هاتى بس التليفون اشوف اسمه ايه بلوة بنت خالك ده واشوف هعمل ايه
قاسم سجل الرقم وكلم حد بعتله صورة الحساب يخترقه ولبس ونزل ..
قاسم قدر يعرف عنوان زاهر والمكان اللى قاعد فيه بالظبط بعد ماتتبع الخط بتاعه وخلى حد متخصص يهكر تليفونه وطلع متخصص فابتزاز البنات من على الفيس ...
قاسم اخد البوكس واخد اتنين عساكر وراحو على بيت زاهر وقبض عليه واخده على القسم .
قاسم :عارف انا مين يازاهر .
زاهر :لأ ياباشا معرفش وعاوز اعرف تهمتى هنا ايه بالظبط
قاسم :انا ابن عم ناديه .
زاهر ابتسم :نااااديه ..بس ناديه معندهاش عم ..وعندها خال واحد عايش فالامارات ومتعرفهوش ولا عمرها شافته ..وعندها عمه وحده عايشه معاهم فالفيلا ..وعمتها دى مخلفه بنت اسمها جواهر متجوزه ظابط ..ونظرا لان حضرتك ظابط ..فتخمينى ان حضرتك تبقى جوز بنت عمتها مظبوط كده .
قاسم رفع حاجبه وديق عنيه وهو باصص للولد دا واللى اتضح انه مش سهل خالص وانه جاب ادق معلومه عن ناديه وانه بيلعب بخبره وأحترافيه
قاسم : اله ...دانتا معدى مرحلة الصياعه العاديه وعامل دكتوراه بقا
زاهر :اعجبك ياباشا
قاسم :اسمع يبنى انتا ..انا عرفت ان عندك اختين وام وابوك متوفى ..
وهما ملهومش غيرك ولو رحت فستين داهيه تاخدك هيضيعو
فأيه رأيك ...تمسح الصور اللى عندك دى وتنساها خالص وتخرج لاخواتك وامك وتعيش حياتك وتبطل اللى بتعمله دا وتنتبه لمستقبلك ...ولا ارميك فالسجن والفئلك اى تهمه واخليك تعفن باقى عمرك ورا اربع حيطان ؟
زاهر :حضرتك متقدرش تعمل حاجه زى دى ..اولا لانى لو جرتلى اى حاجه بعد ساعه الصور دى هتكون منشوره فكل مكان ...ثانيا بقا اللى مخليك تنزل فنصاص الليالى عشان تلحق موضوع الصور دا قبل النشر والفضيحه فدا بيدل على ان موضوع الصور دا بيمثلك تهديد ليك انتا كمان ..مهى مهما كان اللى هتتفضح دى بنت خال مراتك وسمعتها من سمعة مراتك ..ولا ايه
قاسم :يعنى انتا عاوز توصل لايه بالظبط .
زاهر :بص بقا ياباشا هكلمك بصراحه ..انا كنت ناوى آخد ناديه بكره واروح بيها اى مكان واتصور معاها شوية صور كده من اللى يخلو الدماغ فالطين وش ..بس يعلم ربنا مكنتش هقرب منها ولا من شرفها ...وكنت هاخد الصور دى واطلع على ابوها او حد من اخواتها واطلع منه بقرشين حلوين تمن الصور ...
فبدال اللفه الطويله دى حضرتك ممكن تجيبلى القرشين منهم وامسح اللى عندى وابعد عن ناديه ويادار مدخلك شر
قاسم :يبنى انتا مش فوعيك ولا ايه ؟ انتا واخد بالك انتا بتعمل ايه ؟ انتا بتبتز ظابط ..وبتساومه ..انتا مش واخد بالك انا ممكن اعمل فيك ايه ...واحد مكانك المفروض كان زمانه واقف بيترعش من الخوف قدامى دلوقتى .
زاهر :دا كان زمان ياباشا لما كانت الحكومه هى السلطه الاولى فالبلد ..دلوقتى السلطه الاولى للسوشيال ميديا ووسائل الاعلام ..يعنى حضرتك لو عملت فيا حاجه دلوقتى او رميتنى فالسجن زى مابتقول من غير تهمه ..مفيش ساعات وتلاقى قضيتى بقت قضية رأى عام بمنشور على الفيس وشوية مشاركات ودى لعبتى ..وتبص تلاقى نفسك متجرد من وظيفتك ومنصبك اللى مقووين قلبك دول .
قاسم بص للولد وابتسم وملس على شنبه نزولا لدقنه وامر العسكرى ياخده للحجز ..
وبعدها خلى ظابط صاحبه بعتله اتنين ستات من اللى شغالين فسجن النسا واخدهم معاه وراحو على بيت زاهر ..
وهناك خلى الاتنين دول اخدو اخت زاهر الكبيره وصوروها بالعافيه وتحت تهديد السلاح ..وبعدها طلعو من البيت وسابو الكل فحالة رعب .
قاسم اخد الصور اللى كانت على تليفونه وراح على مكتبه وبعت جاب زاهر من الحجز ..
دخل زاهر بشموخ ووقف قدام قاسم .
قاسم :اقعد يازاهر ..قعد زاهر قدام
قاسم وقاسم فتح تليفونه وجاب على صور اخت زاهر ولف التليفون عليه وهو مبتسم ابتسامه خفيفه
زاهر بص للتليفون ورفع حاجبه ومفيش ثوانى وكان استوعب الشكل اللى فالصوره وشاف انها اخته ووقف مره وحده وفضل باصص على التليفون وقاسم بيمشى الصور قدامه بصباعه وشافها متصورة فاوضاع شنيعه وبدون اى ملابس .
زاهر بص لقاسم بغضب .
قاسم :هاه ايه رأيك ..اظن صور اختك دى لو اتنشرت هتولع الدنيا دول الرجاله طول مابيصوروها كانو هياكلوها بعنيهم دى صورها هتاخد ترند ياعم ..احنا برضو بنعرف نلاعب ونلعب عالشناكل لما نحب زى امثالك بالظبط ....بتهددنى بالنت ..اجيلك انت من ناحية النت مفيش مشاكل
زاهر قعد واتكلم بكسره: همسح صور ناديه وتمسح صور اختى وخالصين كده .
قاسم :لا مش دا اللى هيحصل على فكره ..اللى هيحصل انى هاخد صور اختك دول ..واعملها ملف اداب اد دماغك الكبيره دى ..وهحتفظ بيه فدرج مكتبى ...هتعمل اى حركه وسخه من حركاتك ولا هترجع تكلم اى بنت على الفيس او غيره ..الملف يتفعل وتبص تلاقى اختك بقالها قضية دعاره معتبره ...هتمشى عدل وتسيب بنات الناس فحالها الملف هيفضل فمكانه فالحفظ والصون ..
ولعلمك صور اختك حقيقيه مش متفبركه زى صور ناديه ..يعنى دليل قاطع عليها ..
زاهر هز دماغه بقلة حيله وطلب تليفونه من قاسم اللى اخده منه اول ماجابه على القسم ..اخد تليفونه وكلم حد ودا كان الولد اللى بيركبله الصور وقاله يحزف كل الصور من عنده ..
وهو كمان حزف من على تليفونه ..
قاسم:بس خلى بالك انتا اتحطيت هنا ...وشاور على دماغه واللى يدخل هنا مبيطلعش بسهوله ..خليك فاكر دا كويس ..واكيد هنتقابل مره تانيه ..
طلعه بعد مااطمن ان موضوع ناديه خلاص اتحل واتقفل واتنهد براحه ...ومع انه مكانش مقتنع بالطريقه اللى نهى بيها الموضوع الاانه كان متأكد ان زاهر دا مش هينفع معاه اى اجراء كان ممكن يتاخد مع غيره لانه عارف نوعه ايه
.اكتر حد مبيخافش من اى سلطه الانسان اللى عارف حقوقه كويس وعارف ازاى ياخدها ..وفى ظل وسائل التواصل الاجتماعى الصوت بيوصل للمسئولين فأسرع وقت ...وفيه ناس بتستغل الميزه دى اسواء استغلال وزاهر كان واحد من الناس دول ...وقاسم كمان مكانش مستهين بدور الانترنت ووسائل التواصل اللى بقت بأستطاعتها انها تعزل رئيس من منصبه بقوة الراى العام .
رجع قاسم على البيت وحكى لجواهر هو عمل ايه، وفهمها تقول لناديه ان الموضوع انتهى خلاص بس من غير ماتجيب سيرته عشان ناديه متحسش انها نزلت من عنيه ..
وقلها لو قالتلك حليتى الموضوع ازاى، قوليلها انك كلمتى الولد وهددتيه بجوزك الظابط وهو خاف وقالك انه هيحزف الصور وخلاص ..
جواهر فعلا اتصلت بناديه اللى كانت طول الوقت دا قاعده على نار وقلبها هيقف من كتر الخوف ..
جواهر طمنتها ان الموضوع خلص خلاص وفهمتها زى ماقاسم قالها ..وطلبت منها تحزف ارقامه ورسايله وكل حاجه تخصه من على تليفونها وتنساه خالص ..
ناديه فعلا حزفت رسايله وارقامه ودخلت عشان تحظره من الفيس لكنها اتفاجأة لما ملقتش وجود لحسابه نهائى ...الظاهر قفل الحساب ..
ومن الحته دى ناديه اطمنت اكتر وحست انها خلصت من كارثه كبيره بمعجزه الاهيه ...
قعدت مع نفسها تفكر ..لو مفيش حد من قرايبها عنده سلطه وزاهر خاف منه ،كان ممكن يحصلها ايه ..اكيد لو كانت بنت عاديه ملهاش ضهر كان واحد زى زاهر دا داسها برجله زى حشره وكانت خسرت حياتها كلها بسببه ...فضلت تستغفر ربها وتشكره كتييير اووى على ستره ليها وانه ساعدها تحافظ على مكانتها فعيون اهلها .
*********
خلصت الليله دى بكل مصايبها على الكل وطلع نهار جديد محدش عارف شايل فطياته ايه ..
قاسم لبس وجواهر جهزت هى كمان ورن على غريب عشان يجهز هو وليل واخدهم وراحو لماهر المستشفى ..طول الطريق وغريب وليل ساكتين خالص ..غريب مغمض عنيه اللى باين عليهم تعب السهر وليل طول الوقت بصاله وناسيه اى حد وكل حاجه حواليها .
اما جواهر فاطول الطريق بتفرك فمكانها وهى شايفه حالتهم دى وكل ماتيجى تتكلم قاسم يقرصها يخليها تسكت ..لغاية ماوصلو ونزلو من العربيه ...
قاسم جرى على غريب ومسك دراعه ..تعالا ياحبيبي انا هطلعك اتسند عليا ربنا مايحوجك لحد ..تعالا ياخويا لقاسم حبيبك ...
وشد غريب اللى اتنهد بغلب ومشى مع قاسم وهو بيقول لنفسه حتى مسكة ايدك لايدى استكترتيها عليا ياليل ؟
اما ليل فواقفه مذهوله ووقفت تراقب غريب لحظات وهو بيمشى قدامها وبتسأل نفسها ...للدرجادى ياغريب حتى لمستى ليك مبقتش مستحملها ولا بقيت عاوزها؟
طلعو كلهم لماهر اللى لقوه بحمد الله صحته احسن ،ونادر وصل بعد وصولهم بدقايق هو وناديه اللى جريت واترمت فحضن ابوها اول مادخلت وهو حضنها وطمنها عليه
نادر وقف قدام ابوه وهو حاطط دماغه فالارض .
ماهر بعد ناديه عن حضنه وبص لنادر :ارفع دماغك يبنى احنا اللى بنعمل الفلوس مش هى اللى بتعملنا ..
تعالا اقعد قدامى هنا واحكيلى كل حاجه حصلت بالتفصيل ومين الناس اللى اتعاملت معاهم دول وكلمهم فالشركه يحضرولى كل الاوراق اللى كانت بينكم فالنصبايه دى ...
غريب :يابابا اصبر على نفسك لما تخف كويس وتقدر تستحمل حرب الاعصاب اللى هتدخلها دى .
قاسم :وبعدين اوراق ايه ياعمى اللى حضرتك عاوزه يحضرهالك ..الراجل نصب وطار والقانون لايحمى المغفلين .
ماهر :احنا فعالم البزنس مبيكونش اعتمادنا الكلى على القانون ياقاسم .. احنا كرجال اعمال بنعتمد على بعض وبنقف جمب بعض، وكل واحد بيساعد التانى فازمته وهو عارف كويس ان ممكن الدور يجى عليه ويحتاج مساعده فبيقدم السبت ...وانا قدمت كتير اوى واكيد دا انسب وقت ان اللى قدمته يتردلى .
قاسم :لا استنى فهمنى بتعملو ايه فالحالات دى .
ماهر :بنعتمد اسلوب ..وداونى باللتى هى الداءٍ.
قاسم :مش فاهم
ماهر :يعنى نجمع كل المعلومات عن الشخص اللى نصب على شركتى ده ويقوم واحد من اصحابنا رجال الاعمال يرميله طعم ويخليه يبلعه على عمليه كبيره ومضمونه وطبعا بطريق غير مباشر ،واحنا لينا اساليبنا وطرقنا ...ولان النصاب طماع فزغللة عنيه سهله اوى ..يتعمله البحر طحينه ونجر رجله بتخطيط جماعى ونخليه يدفع المبلغ اللى اخده فالنصبايه دى وعليه ارباحه كمان ..بس الموضوع دا بياخد وقت طويل اوى ...وفالعاده اى رجل اعمال ناصح مبيكونش حاطط اللى وراه واللى قدامه فجهه وحده وبيكون عنده اللى يقدر يمشى بيه شركته فالوقت دا ويرجعها تقف على رجلها من تانى ...
اما فحالة خيبتنا التقيله فاحنا ممعناش اى حاجه نبتدى بيها من تانى ..زياده على ده قسط البنك اللى لو متسددش فميعاده هنتشرد فعلا وغير دا ودا الاخ اللى ماضى على كمبيالات وشيكات ممكن تسجنه دا
غريب :كله يهون ياحبيبي وهتتعدل بأذن الله .
قاسم حط ايده على كتف نادر :وان كان على نادر متخافش عليه حتى لو اتسجن انا هوصى عليه يتعامل معاملة خمس نجوم فالسجن .
نادر زاح ايده من على كتفه بديق ..وجواهر دكمت قاسم ..دا وقته بتهرج والناس فمصيبه .
قاسم :اله مش بعرض مساعدتى وبقدم اللى اقدر عليه؟
ماهر :انتا بالذات تسكت خالص مسمعش نفسك عشان كل اللى احنا فيه دلوقتى دا من نقك ونبرك ..
قاسم :طب والله انتو ظالمينى ..وبصو كلهم على الباب لما خبط وجميله اذنت للى بيخبط بالدخول والباب اتفتح وكانو اهل قاسم ..محمود واحمد وماجده وعبد السلام ..
كانو بيدخلو من الباب واحد واحد وعيون ماهر لسه متعلقه على الباب ومرتاحوش الا وهما شايفين موده بتدخل من الباب ..
ابتسم ماهر بارتياح وهى كمان ابتسمت لابتسامته وفرحت لما لقت صحته تمام ...
دخلو واتحمدولله على سلامته وقعدو ..
ماهر :اظن ياموده سمعتى باللى حصل واظن انى مش ههون عليكى تسيبينى فوضع زى دا وانا والشركه محتاجينلك ؟
موده بصت لباباها ورجعت بصت لماهر ...انا موافقه اشتغل معاك ياماهر بيه ...اتنهد ماهر بارتياح وهو بيبصلها وبيشكرها بعنيه الف شكر مش على شغلها معاه لكن على قربها منه فالوقت ده واللى هو محتاجه اوى ..
موده بصت للارض بخجل وعدلت نضارتها وكل دا وقاسم متابع اللى بيحصل وكل شويه عمال يهز دماغه ويبتسم على اخته موده اللى اول مره يشوفها مكسوفه ومرتبكه بالشكل دا ،وعلى ماهر اللى يشوفه ويشوف نظراته يقول عليه شاب لسه ففترة المراهقه .
اما غريب وليل فكانو متخذين الوضع الصامت طول الوقت .
قاسم قام وقف :احممم طيب ياجماعه بما اننا كلنا متجمعين فحابب اقولكم على حاجه مهمه وخبر هيفرحنا جميعا ...
طبعا كلنا عارفين ليل وكلنا حبيناها عشان مشوفناش من البنت دى طول فترة قعادها معانا غير كل خير ...
ليل بصت لقاسم باستغراب وهى بتسمعه والكل زيها ...
قاسم كمل :وطبعا كلنا عارفين ان ليل ملهاش حد ،وانا لو مكانش دا يدايقها اعتبرت نفسى مسئول عنها وفمقام اخوها ،واتصرفت على هذا الاساس ولما واحد ابن حلال طلب ايدها منى فانا وافقت عليه بعد ما شفت انه مناسب ليها وهيسعدها ...
ليل وغريب وقفو الاتنين فى وقت واحد بعد ماسمعو الكلام ده ،وليل بتبص حواليها على كل الوشوش المستغربه بس مش اد استغرابها وصدمتها ،وبصت لجواهر بتترجاها بعنيها تفهمها ايه اللى بيحصل،
لكن الغريبه انها شافت جواهر بتضحك وضامه اديها قدام صدرها وفرحانه وجميله امها رد فعلها ميختلفش عن رد فعل جواهر ..
اما غريب فاللحظه دى حس ان حد غرز سكين فقلبه ومع كل كلمه من قاسم السكين بتتغرز اكتر وتوصل مسافه اعمق لما قسمت قلبه نصين ورفع ايده على قلبه وفضل يدلك فيه .
الكل عنيه تلقائيا راحت على غريب وجواهر نادت باسم قاسم عشان يكمل بسرعه قبل ما غريب تجراله حاجه وفعلا قاسم كمل ..
طبعا كلكم هيقتلكم الفضول عشان تعرفو الشخص دا مين ...الشخص دا يبقى .....غرييييب ...وبسؤال العروسه اللى هى ليل ابدت موافقتها ..وبعد اذن عمى ماهر انا وافقت على خطوبتهم ...واحب انوه انى انا وجواهر عملنا فالاتنين مقلب امبارح هيفضلو يفتكروه طول العمر ..والسلام عليكم ورحمة الله وبركاته ...سقفولى
غريب اتشاهد وهو حاسس انه خلاص قلبه هيقف من احساسين متناقضين اقوى من بعض مروا عليه فوقت واحد ...اشد درجات الزعل والخوف ..واشد درجات السعاده والفرحه .
الكل سقف وفرح وليل بتنقل عنيها على الكل بدون تصديق ..بصت لجواهر وهى بتبلع ريقها والدمعه فعينها وجواهر شاورتلها بدماغها زى ماتكون بتقولها: ايوه ..صدقى ..افرحى ...غريب هيبقا ملكك وليكى انتى وبس ..ربنا استجاب لدعاكى ياليل اللى الحيتى عليه فكل سجده .
نطق ماهر اول واحد وهو بيقول لغريب :الف مبروك ياغريبى ..ربنا يكتبلك السعاده ياحبيب ابوك ..
وانهالت بعدها المباركات على غريب وليل اللى واقفين مبيردوش ولسه فحالة صدمه وعدم تصديق والاتنين بيتمنو انهم ميكونوش فحلم ويصحو منه .
واخيرا غريب غمض عنيه واخد نفس وهو بيقول لقاسم ..
حبيبي ياقاسم ...تعالا فحضنى على الفرحه اللى فرحتهانى النهارده دى ..وراحله قاسم بسرعه وهو بيضحك وفارد اديه زى الاهبل واخد غريب فحضنه وغريب اول مااتملك فقاسم مد اديه على رقابته ولفه وخلى ضهره على السرير ووقعه عليه وابتد يخنق فيه بكل قوته وسط هلع الكل وشويه وسابه وبقى يضرب فيه فكل مكان بكل قوته من غير مايعرف هو بيضرب فين ، وهو حاسس ان كل الضرب دا ميساويش لحظه وحده من الاحساس اللى بيحس بيه غريب من امبارح نتيجة مقلبه مش السخيف مقلبه المميت بالنسبه لغريب .
قاسم خلص نفسه من بين ايدين غريب بالعافيه بمساعدة جواهر وماجده وموده وراح اترمى على الكنبه وهو بينهج ،وبصلهم بعينه اللى ورمت من اثر ضربه جات فيها وبصلهم وابتسم وهو بيقولهم :
معلش دا من شدة الفرحه اللى هو حاسس بيها حصلت عنده لخبطه فردود الفعل ..اسلاك مخه لمست ياولداه ...
اما ليل اللى واقفه تراقب كل حاجه بتحصل حواليها وشايفه غريب وهو بينهج بعد مااتعصب على قاسم وهى كمان غيظها من جواهر ميقلش عن غيظه من قاسم بسبب اللى عملته فيها ...
بصت لجواهر وابتسمتلها وجواهر ردتلها الابتسامه
ليل مدت ايدها لجواهر بحب وجواهر راحت لليل لما حست انها محتاجه دلوقتى لحضن يقويها ويحسسها انها مش لوحدها واول ماجواهر خلاص قربت و هتاخدها فحضنها ليل طبقت فدراع جواهر عضتها عضه خلت جواهر تصرخ وتتشال وتتخبط على الارض ..
قاسم شاف جواهر كده وضحك عليها جامد والكل مستغرب من اللى غريب وليل بيعملوه الاجميله اللى كانت عارفه هما بيعملو فيهم كده ليه وحمدت ربنا ان غريب وليل ميعرفوش انها كانت عارفه والا كان طالها من الحب جانب .
جواهر راحت قعدت جمب قاسم وهى بتفرك فدراعها وعلى شويه وهتبكى، وقاسم عمال يضحك عليها .
جواهر :بتضحك على ايه بذمتك ماكلو منك ومن افكارك السوده ..
قاسم :بس ايه رأيك فالمقلب حلو صح ..بصى ..وشاورلها على عينه ..شوفتينى وانا بتضرب ومقلتش اي ...شوفتينى صح ...
جواهر :اسكت والنبى ياقاسم الا انا حاسه ان سنان ليل وصلو العضم فدراعى ..
قاسم :حبهم عينيف اوى العيال دى
بعد ماخلصت الزياره وخلاص الكل هيروح بعد ماطمنو على ماهر ..
ليل وغريب استعدو عشان يروحو وليل جريت على غريب عشان تمسك ايده لكن وقفتها كلمة ناديه : اقفى عندك
رايحه على فين سيادتك ؟ من النهارده مفيش مرواح على الشقه عند غريبوو ...انتى هتفضلى فالفيلا لحد يوم فرحكم وانا هروح اقعد مع غريب اليومين دول ...اولا عشان توحشو بعض ، ثانيا عشان فال وحش ان العريس يقابل عروسته قبل الفرح بايام ،
ثالثا عشان عمتى جميله تجهزك لفرحك ..
قالت جملتها وابتسمت لليل وهى بتقولها من قلبها ...مبروك عليكى غريبوو ..خلى بالك منه عشان انتى هتتجوزى احسن راجل فالدنيا ..
ليل ردت على ابتسامتها بابتسامه خجوله وهزت دماغها بعد مابصت للارض بكسوف وهى لسه بتسال نفسها ...ياترى دا حلم ولا حقيقه ..
اماغريب فاتنهد بغلب من قرار ناديه المفاجئ بانها تبعد ليل عنه وتيجى هى معاه بدالها ،وحس بان ناديه بتقطع عنه الهوا وبتقوله عيش من غير ماتتنفس لمدة اسبوع، وهو المهله اللى قررها ابوه عشان يعملو الشبكه وكتب الكتاب والفرح مع بعض كله فيوم واحد والعجيب ان كله وافقها على كلامها
غريب لف على ناديه :طيب معلش ممكن اتكلم مع ليل كلمه لوحدنا قبل الحظر والعزل بتاع جنابك مايبدا ؟
ناديه :لا مش مسموح عشان العزل ابتدا من ساعة مااتحدد اليوم بتاع كتب الكتاب مسموحلكم بس تتكلمو مع بعض بالتليفون طول فترة العزل .
غريب :كتر خيرك والله دا كرم منك
*********
ماهر خرج من المستشفى وطول الاسبوع دا وهو طول اليوم جايب نادر قدامه واوراق الشركه كلها وقافلين على نقسهم الباب ونادر يقوله هو عمل ايه وهبب ايه وماهر يدرس ويفكر فاللى هيقدر يعمله ..
اثناء ماهما قاعدين خبطت جميله على الباب خبطتين ودخلت وهى شايله كبايتين عصير فرش ..بصت لماهر اللى قلع نضارته ورماها على السرير بين رجليه وبيفرك فعنيه بتعب ..
جميله حطت العصير وقعدت جمبه وحطت ايدها على ايده ...هونها تهون ياحبيبي .
ماهر :مش هينه ابدا ياجميله ...الخساره كبيره اوى والوقعه شديده والوقوف بعدها مستحيل ..
جميله :مفيش حاجه مستحيل ..انا من بكره هسحبلك كل فلوسى اللى فالبنك وتبتدى بيهم من تانى .
ماهر :وفلوسك هتعمل ايه بس ياحبيبتى دى مليارات ..
جميله :نوايه بتسند الزير ياماهر ..انتا شاطر وانا واثقه انك هتعرف ترجع كل حاجه زى الاول واحسن
*********
اليوم اللى عدد ساعاته ٢٤ شهر مش ساعه هو اليوم اللى بيمر على غريب وليل من ساعة ماكل واحد منهم بقا فمكان بعيد عن التانى .
لكن اللى مصبر الاتنين هو ان ورا البعد دا قرب مفيش بعده فراق لاخر العمر .
غريب طول الوقت مبتسم ومهما تكلم فيه ناديه ميردش عليها غير فين وفين بكلمه ..وكل الوقت كلام ليل وصوت خلخالها بيرنو فودنه باجمل نغمه .
اما ليل فكل الوقت بتقضيه مع جميله وجواهر وكل يوم جواهر تاخدها ويخرجو يشترو كل حاجه محتاجالها ليل ..
جواهر مكنتش بتشترى لليل غير الهدوم الحرير، اللى ملمسها ناعم مهما كانت قصتها ، لانها عارفه ان غريب طول الوقت هيعتمد على حاسة اللمس مش النظر ..
وكمان اشترتلها اغلى انواع العطور والكريمات اللى تحسن ملمس بشرتها دا غير الحمامات المغربيه وتنظيفات البشره اللى كانت بتعملهالها فالكوافير كل يوم طول الاسبوع ..
اما سميه فكل يوم كانت تكلم غريب وتفضل تحكى معاه وهى سامعه صوته مليان سعاده وفرحه وفرحانه لفرحته يمكن اكتر منه كمان، لانه هيتجوز ويعيش الاحساس اللى كان مفكر انه عمره ماهيعيشه بسبب عماه .
واخيرا عدى الاسبوع ومش فاضل فالبعد غير بس يوم ....وبكره الغريب هيجتمع مع ليله .
ليل قررت انها مش هتلبس فستان فرح ولما اعترضو قالتلهم اصل هلبسه ليه وغريب مش هيقدر يشوفه ...
و غريب قرر انه بعد كتب الكتاب هياخد ليل ويروحو على شقتهم علطول من غير فرح وليل ايدت قراره دا بشده
ليل بالليل حاطه دماغها على المخده وفرحانه وخلاص هى ساعات بتفصلها عن السعاده ...لكنها قامت منتوره من فرشتها لما افتكرت الحاجه اللى هتوقف الجوازه والفرح كله ...
جريت لتحت على اوضة جميله وخبطت الباب بعنف خلى جميله تفتح بسرعه وهى مرعوبه ولقت ليل فوشها بتقولها بعيون مدمعه ...
انى لسا مااطلقتش من مؤمن ياخاله
جميله برقت عنيها وقالتلها باستغراب ..نعممممم !؟
*************
قاسم اتصل على غريب زى كل يوم
قاسم :ايوه ياعم مين ادك ..بعد بكره زى دلوقتى هتكون فحضن ليل والفرحه مش سايعاك وراكب السحاب وطاير ومدلدل رجليك كمان .
غريب :قل اعوذو برب الفلق ..مالك بتقولها بغل وقهر كده ليه ..منتا بتطير فوق السحاب انتا كمان كان حد نق عليك ولا كلمك ولا جه ناحيتك ؟
قاسم :اسكت وحياة ابوك ياشيخ متفكرنى ...الا انا اغمض عنيا واجى اطلع على السحابه من دول عشان اطير ...واول مالسحابه تاخد سرعتها ...تقوم بنت عمتك زقانى من عليها ومخليانى اقع على جدور رقابتى .
غريب :طيب اقفل ياقاسم وروح نق على حد غيرى انا مش ناقصك دلوقتى وبقول يارب عدى اليوم دا على خير وبعدين انتا بالزات بعد عملتك معايا المفروض مسمعش نفسك .
قاسم :ياعم روح ادينى هقفل ..قال بنق عليه قال ..دنا فرحانلك ياعبيط وبحسد فيك من كل قلبي والله
غريب قفل السكه فوش قاسم اللى قعد يضحك على خوف غريب من ان فرحته متكملش
بعد ساعات غريب قاعد مع ناديه قدام التلفزيون ناديه بتتفرج وتحكى لغريب وهو مش معاها خالص تليفونه رن وكانت ليل
غريب رد عليها بلهفه وشوق ووقف على حيله لما سمع صوت شهقاتها بين كل كلمه والتانيه وهى بتقوله ...سى غريب ..احنا مش هينفع نتجوزو بكره
غريب بلع ريقه بخوف :انتى بتقولى ايه ياليل ؟
ليل :اللى سمعته ياسى غريب ..انى لسه مطلقتش من مؤمن رسمى ..هو رمى عليا اليمين بخشمه وبس .
غريب اتنهد :طيب اهدى وكل حاجه هتتحل ...بسيطه متزعليش نفسك ..حضرى نفسك عشان نروح البلد انا وانتى ونادر عشان نخلص الموضوع دا
ليل :ميته ياسى غريب ؟
غريب :الساعه ٦ الصبح هكون عندك ...او نادر يجيبك ويجيلى بالعربيه ياخدنى ونطلع على البلد ..
ليل ..
ليل :ايوه ياسى غريب
غريب :انا بحبك اوى ..
ليل بكسوف :شاله تحبك العافيه يارب .
غريب :نفسى اسمعها منك حرام عليكى طول الاسبوع دا قلتهالك مليون مره وانتى مقولتيهاش ولا مره !
ليل :وهو يعنى انى محتاجه اقولها ياسى غريب ؟ مهى عتتحس لحالها .
غريب :ياليل اللى مش محتاج يسمعها دا بيشوفها فعنين حبيبه ...وعشان انا محروم من المتعه دى بطلب منك انك تعوضيلى عدم شوفى ليها بعنيه بانك تسمعيهانى.
ليل :انى مهقدرشى انطوقها من خشمى ياسى غريب ..بس انى متأكده انك شايفها وحاسسها بقلبك ..ومتأكده انك عارف زين غلاوتك فقلبي ..مش محتاجه اقولك انك ساكن فقلبي وعقلى وروحى ..
ولا محتاجه اقولك انك حداى بالدنيا كلها، وان الدنيا كلها قصادك متسواش فعينى ذرة تراب ..ومش محتاجه اقولك كمان انى معشتش ولا اتحسبت على الدنيا بنى آدمه غير لما حبيتك واعرفت انك انتا كمان عتحبنى ...عرفت ساعتها ربنا خد منى كل حاجه ليه ..عشان يدينى اغلى حاجه على وش الارض
غريب ابتسم وقالها بنبره حنونه :روحى نامى ياليل واطمنى ...والله مهخلى اى حاجه تبكى عيونك طول منا عايش على وش الارض ..
ليل ابتسمت وقفلت مع غريب وحضنت التليفون ونامت باطمئنان .
غريب قفل مع ليل ومسك التليفون وغمض عنيه :الله يحرقك ياقاسم زى ماعينك مبوظالى حياتى ..
غريب اتصل على نادر عشان يروح معاه هو وليل البلد ،ونادر وافق واستعد عشان يروح وبلغ باباه انه مش هيقدر يروح الشركه بكره وماهر قرر انه هيروح هو بداله فاليوم دا مع انه حاسس انه لسه مخفش كويس .
اماليل فاطول الوقت عينها مزارهاش نوم وهى بتفكر فسند وابوها وامها وفرحتهم بزيارتها ليهم وفرحتها هى عشان هتزورهم بعد المده الطويله دى ...لكن قلقها وخوفها من تعطيل الجوازه كان اكبر من فرحتها بكتير
النهار طلع وليل كانت لابسه من الفجر ومستنيه على احر من الجمر اولا عشان هتشوف غريبها بعد غياب اسبوع بحاله ثانيا عشان هتزور اهلها وبلدها ..
ركبت العربيه هى ونادر ،وفى الطريق نادر رن على غريب عشان يجهز ولقاه جاهز من بدري وعدو عليه اخدوه وطلع العربيه وقعد جمب ليل وهو مش مصدق انها معاه فمكان واحد بعد المده دى كلها
وكان نفسه ياخدها فحضنه ويضمها لغاية مايدخلها بين ضلوعه لكنه ميملكش الحق دا ولا السلطه انه يعمل كده قبل كتب الكتاب ..
وليل اشتياقها ليه ولهفتها عليه مكانتش تقل عنه بالعكس كانت اكتر واكبر .
كل ماكانت العربيه تقرب من البلد احاسيس وزكريات كانت بتصحى جوا ليل ... بحركه لا اراديه وهما على مشارف البلد مسكت ايد غريب وكانها خايفه انها ترجع تعيش الاحاسيس دى من تانى ...وكأنها بتقول للبلد اللى عاشت فيها اسواء طفوله واقسى مراهقه ...بصى لما خرجت منك لقيت ايه ..
غريب حس بارتعاش نفس ليل وعرف انها بتبكى واللى اكدله دا نادر وهو بيقولها:متخافيش ياليل هتطلقى منه بسهوله ومش هيقدر يعمل حاجه هو رامى اليمين خلاص .
ليل :انى مخايفاش ياسى نادر ...انى بس افتكرت اهلى وولدى وسنين عمرى اللى ضاعو منى تحت تراب البلد دى .
غريب شدد على ايدها :انسى كل حاجه وحشه حصلتلك ياليل ..
وابتدى احسبى حياتك من اليوم اللى هنتجوز فيه ..اعتبريه ميلاد جديد ليكى زى منا هعتبره يوم ميلادى انا كمان .
ليل هزت دماغها وردت على نادر اللى سألها على الطريق لبيتهم وهى وصفتله ..
وصلت ليل قدام البيت اللى شهد على طفولتها وشبابها ..على فرحها وجرحها ..البيت اللى حيطانه كانت مبنيه من حب جنه واخلاص طاهر،
ركنو العربيه قريب من البيت وليل نزلت من العربيه ونادر نزل معاها ورفض ان غريب ينزل وطلب منه يفضل فالعربيه اتقدمت كام خطوه فاتجاه البيت وصوت دقات قلبها متهيالها ان نادر وغريب سامعينه من قوته
رفعت ايدها وخبطت على الباب وهى حاسه ان قلبها هو اللى بيخبط مش ايدها ...
ابتسمت وهى بتتخيل ان جنه هى اللى هتفتحلها الباب وتاخدها فحضنها ..
وتبعد عنها تلاقى دراعات طاهر مفتوحينلها عشان تترمى وسطهم ..
وتبص تلاقى سند بيشد طرف جلابيتها عشان تشيله على كتفها زى ماكان بيحب ..
لكن كل امنياتها واحلامها تلاشت وهى شايفه بدريه بتفتح الباب وشايله بنت صغيره على دراعها وبصتلها ورفعت حواجبها وهى بتنطق اسمها باستغراب ..ليل !
فرعون 2
البارت السادس والعشرون
بدريه باستغراب :ليل !
ايه اللى جابك ؟ وايه النضافه والعز اللى بانو عليكى دول ؟! طلعلك خدود ياملكومه كنك عتاكلى مع العمى .
وهنا ليل بصت لنادر اللى بان على وشه اقصى درجات الغضب وسألها بحده :مؤمن هنا ؟
بدريه :ودا مين دا كمان اللى جايباهولنا معاكى ...والله زمن اللى خلاكى تمشى مع ناس نضيفه اكده ياليل ؟
ليل :مؤمن قاعد يابدريه ولا له انطوقى وخلصينا محناش فاضينلك..
بدريه :وه ...مالك كلتينى بقشرى اكده ..متهودى هبابه واهدى عليا ياحبيبتى ؟ مؤمن نايم جوه بسلامته عاوزه منه ايه مؤمن يادالعادى
نادر :طيب ادخلى صحيهولنا لو سمحتى
بدريه :مش قبل ماتقولولى عاوزينه فأيه حتنى ادخل واصحيه .
نادر اتنهد بقلة صبر :ياااصبر ايوب ، عاوزينه عشان نشوفه طلق ليل رسمى ولا لا عشان لو مكانش طلقها رسمى يطلقها عشان هتتجوز ولازم ورقة طلاقها .
بدريه بضحكه :ابااااى هتتجوز حته وحده ؟ هتتجوزى قال ياليل ! وياترى مين الحزين اللى امه داعيه عليه وهيتصبح ويتمسى كل يوم بوشك ديه ؟
ليل :مليكيش صالح انتى ..انتى تدخلى تنادمى جوزك وتخلصينا .
نادر بحده :متدخلى تصحى جوزك ياست انتى وبطلى لت وعجن كتير ؟
بدريه بشك :ومالك محموق عليها قوى انتا التانى ليه ؟ اوعا تكون انتا اللى هتتجوزها ياخيي !...اباى دانتى تبقى عملتى العمل عند واحد من المغاربه ياوكلاهم ...
نادر :بصى كده ...وشاورلها على غريب اللى قاعد فالعربيه :دا خطيب ليل وعريسها اللى بيتمنالها الرضى ترضى ...ممكن بقا تناديلنا مؤمن دا اللى كانت متجوزاه قبل اخويا نشوف شكله عامل ازاى ؟
بدريه ردت بشرود وبقها مفتوح وشفايفها مدلدله من ساعة مابصت لغريب :جمب اخوك ديه ..مؤمن غراب بين منحول ريشه .
ليل بعدم صبر ندهت بعلو صوتها :مؤمن ..يامؤمن ...انتا ياللى اسمك مؤمن .
مؤمن طلع من اوضته يجرى بهدومه الداخليه ..
ايوه مين ...بص للى واقفين على الباب :ليل ؟ ايه اللى جابك ياليل ؟
ليل :اتوحشت طلتك البهيه قلت اما اجى اشوق عليك .
بدريه :متتحشمى يبت انتى اتوحشتيه دا ايه وحش يلهفك .
نادر :اسمع يااخ مؤمن ..احنا جايين نسألك طلقت ليل رسمى ولا لا عشان هتتجوز ولازم ورقة الطلاق عشان الجواز يتم ..
مؤمن باستغراب :وه هتتجواز ...ليل هتتجواز ؟ ومين ديه انشاء الله اللى هيتجوزها ...حداكى ايه ياليل حد يتجوزك عشانه دانتى عالحديده !
نادر :عريسها فعربيته اهو هناك ..شايفه ولا تحب تقرب منه عشان تشوفه كويس
مؤمن بصدمه :وه وه وه ...كيف ديه !
ليل :طلقتنى رسمى يامؤمن ولا مطلقتنيش خلصنى ...
بدريه :له طلقك رسمى يانن عينى وورقتك تروحى تاخديها من حدا مأذون الناحيه ...لهو انتى كنتى عاوزاه يفضل رامى يمين عليكى بالكلام اكده وخلاص، عشان لو مات ولا جرتله حاجه تاجى تورثى فيه ؟
ليل بصت لنادر بفرحه وبعدها بصت لبدريه :والنبى اتنيلى بلا اورث فيه هو حيلته حاجه المقشف ديه ...عموما متشكرين ياستى على المعروف اللى عميلتيه فيا ديه وخلتيه يطلقنى رسمى واللى مش هنسهولك طول العمر والله ...
نادر بصلها وشاورلها بدماغه عشان يتحركو لكن ليل رجعت عينها تبص على البيت من بره بحنين ...وبلعت ريقها قبل ماتقول لمؤمن بترجى ..
ينفع ادخل ابص بصه على البيت من جوه يامؤمن
مؤمن بص لبدريه زى ما يكون مستنى منها الاذن او بيطلب منها هى اللى ترد
بدريه :له مينفعش ...ويلا خدى بعضك وخدى الناس دى واتكلى من اهنه .
نادر بعصبيه :ياستى دى بتقولك هتبص بصه للبيت من جوه واحشها ونفسها تشوفه .
ليل :وحياتك يامؤمن ، ورحمة سند ياشيخ لتخلينى ادخل دقيقه وحده بس .
مؤمن بص للارض وبدريه برضو كملت كلامها :البيت مهوش بيت مؤمن عشان يدخل ويطلع فالناس بمزاجه ياحبيبتى ...
البيت بيتى وانى اللى اقول مين يدخل ومين ميدخلش ..
يلا يامؤمن خش جوه ..وزقته وقفلت الباب فوش نادر وليل اللى دموعها نزلو بقهر وهى بتاكل حيطان البيت من بره بعنيها ..
نادر شدها من ايدها بشويش عشان تمشى معاه، لكن ليل شدت ايدها منه وراحت جرى على مكان الساقيه وهى بتبكى ونادر بينده عليها ويجرى وراها لحد ماوصلت عند الساقيه ووقعت على رجليها قدام الحته اللى مات فيها سند ..
نادر وصل عندها وهو بينهج ووقف لما لقاها قعدت ...ايه ياليل بس اللى بتعمليه دا ..بالراحه على نفسك شويه ..
ليل بصت لنادر وهى بتشاور على الساقيه :اهنه غرق ومات ياسى نادر ..فالموطرح ديه ..كنى لسه شايفاه لحد دلوك ..
نادر :هو مين دا ياليل ؟
ليل :ولدى سند ..لبسته خلجاته الجداد فاول يوم يروح فيه المدرسه وكان فرحان وطاير من الفرحه باللبس الجديد والشنطه ...وديته مع ابوه عشان يوصله لكنه كان سكران ومطين وساب الواد من يده ونام بره البيت .
سند كان كل مايلقى فرصه ياجى طاير على الساقيه اهنه ..من صغره الف مره اجيبه من حداها ..زى مايكون حاجه كانت بتشده للمكان ديه ولا قلبه كان حاسس انه هيموت وروحه هتطلع فيه..
نادر بصلها بحزن على القهر اللى الدنيا دوقتهولها وهى فالسن الصغير دا ومسك ايدها عشان يقومها حاولت لكنها مقدرتش ...
الاتنين انتبهو لما جالهم صوت غريب وهو بيتخبط وسط الزرع وبينده على نادر وليل وبيلف فدايره مش عارف وجهته ...
وهنا ليل اللى مكانتش قادره تقوم وقفت فثوانى وكانت اسرع من نادر فالوصول لغريب وسندته ومسكت دراعه ...
غريب بلهفه :صرختى وجريتى ليه ياليل ...ايه اللى حصل ..
ليل مسحت دموعها بكف ايدها :ولا حاجه ياسى غريب متشغلش بالك..مؤمن طلع مطلقنى رسمى وورقتى حدا المأذون
غريب بفرحه :بجد ياليل ...الف حمد وشكر ليك يارب
ليل : ..يلا بينا ياسى غريب .
نادر حصلهم وركبو العربيه وراحو لماذون البلد واخدو ورقة طلاق ليل وقبل مايطلعو ليل طلبت منهم يودوها القرافه تزور اهلها وتقرالهم الفاتحه وفعلا وصلوها ..
جت تنزل غريب اصر انه ينزل يزور اهلها معاها ...اخدته ودخلت القرافه والاتنين قروا الفاتحه وليل دموع الحنين مبطلتش نزول من ساعة مادخلت ...
غريب :عمى طاهر ..عمتى جنه ..انا النهارده جاى اطلب منكم ايد بنتكم ليل ..ومش هقولكم هحطها فعنيا ..لا هحطها فقلبي ومش هخلى اى حاجه وحشه تمسها من هنا ورايح ..
ارتاحو واطمنو ليل بقت معايا وفحمايتى وانتا ياسند اوعدك انى هخلى ماما اسعد وحده فالدنيا ...
وهخليها تيجى تزوركم علطول ...
وهنا ليل دموعها زادت وهى بتسمع غريب وحاسه ان ابوها وامها وحتى سند سامعينه وفرحانينلها ...
بعدها طلعو هما الاتنين على العربيه وخرجو من البلد وليل حاسه بسعادة الدنيا مغلفه قلبها وروحها .
غريب اتصل على ابوه وعمته جميله وطلب منهم كل حاجه تمشى زى ماهى وطمنهم انهم جابو ورقة طلاق ليل ...قفل منهم وكلم سميه واطمن عليها وفرحتله اوى لما عرفت انه جوازه هيتم فميعاده واتمنتله كل السعاده والفرحه ...
سميه قفلت معاه السكه ونزلت دموعها على كل السنين اللى ضيعتها من غير ماغريب يكون فحياتها
واكتشفت انه محدش خسر فالحرب اللى بينها وبينه دى غيرها هى ..وانها هى اللى كانت محتجاله طول الوقت مش هو اللى كان محتاجلها ...
حقيقى حياتها مبقلهاش طعم غير من يوم مابقى غريب جزء منها ، حنيته عليها واهتمامه بيها عوضها عن اى حاجه شافتها فيوم من ابوه ..
**********
بدريه :
يلا يامؤمن الوكل هيبرد
مؤمن قاعد سرحان فغريب وشكله ولبسه وعربيته ودماغه هتنفجر ازاى واحد زى ده يرضى يتجوز ليل اللى هو مكانش يطيق يبص فوشها ...شاف فيها ايه هو مقدرش يشوفه وغفل عنه ؟
مؤمن قام ونزل قعد على الطبليه بتوهان
بدريه :متاكل يامؤمن مالك عمال تتصفن فالسقف اكده ليه ؟ تكونش حنيت لبوز القرد لما شفتها ؟
مؤمن مسك العيش وقطعه وابتدا ياكل وهو ساكت .
بدريه :يوه !دا الراجل مش معبرنى ولا راضى يرد عليا ...فيه ايه يامؤمن ..والله لو ليل كانت زينه كنت قولت زعل لما شافها وافتكر اللذى مضى ؟
بس تعرف يامؤمن انى من ساعة ماليل غارت وانى عضروب نفسى مية صرمه قديمه ...ياريتنا كنا قلنا لسه مطلقتهاش وكنا طلبنا قرشين ملاح فالاول واكيد اللى معاها كانو هيدفعو طوالى ..يلا ملناش نصيب ،
مترد عليا يامؤمن وتحدتنى كيف مابحدتك اكده ...اللى يشوفك يقول زعلان على حاجه زينه ؟
مؤمن :ايوه ليل مش زينه ومش حلوه ...بس عالاقل كان وكلها حلو ..مكنتش عتعمل وكل الكلب لو داقه يزوعه ...وقلب الطبليه باللى عليها وقام دخل الاوضه ورزع الباب تحت نظرات بدريه اللى هتحرقه وصدمتها من اللى مؤمن عمله ده .
***********
طريق الرجوع ليل محستش بيه كانه مخدش غير دقايق مع سعادتها وراحة قلبها عكس هما ورايحين كانت حاسه ان المسافه مش عاوزه تخلص من خوفها وقلقها .
واخيرا وصلو ..وليل دخلت الفيلا وهى ماسكه دراع غريب بأيد والايد التانيه حاضنه بيها ورقة طلاقها كأنها وثيقة عفو من الدنيا بتدى بيها حق ليل فانها تعيش .
اول مادخلت استقبلتها جميله واخدتها وطلعو على فوق ..
اما نادر وغريب قعدو شويه وجالهم قاسم ساب جواهر فالفيلا واخد غريب ونادر وراحو على شقة غريب عشان يباتو كلهم مع بعض لآخر مره زى ايام زمان ..
وكمان جواهر طلبت تبات مع ليل عشان تشوفها لو محتاجه حاجه قبل الفرح ..
*********
النهارده الشمس طلعت بس مش زى كل يوم ..النهارده الشمس جايه بتضحك وهى بتفرد شعرها الدهبى بفرحه على كل الدنيا وخصوصا على ليل وغريب .
لو هنتكلم عن العدل والانصاف هنتكلم عن كمية الفرحه اللى بتعادل حزن كل السنين اللى فاتت ...هنتكلم عن رضاهم دلوقتى وهما حاسين ان الدنيا كانت بتحوشلهم السعاده عشان تديهالهم مره وحده فاليوم دا .
عدى الوقت وليل لبست فستان بسيط من الحرير وطرحه من نفس اللون والكل متجمع فالفيلا عشان يفرح بفرحة غريب ..
قاسم وجواهر وموده واحمد ومحمود وستاتهم واولادهم وعبد السلام وماجده ...واميره اللى لما سمعت من نادر استأذنت من مامتها وراحت هى كمان ..ناديه وماهروجميله
اما سميه فقاعده جمب غريب وواخده دور ام العريس طول الوقت ...وجميله قاعده جمب ليل وواخده دور ام العروسه ..
المأذون وصل وابتدا يعقدلهم ..ليل رددى ورايا
زوجتك نفسى ..على سنة الله ورسوله ..وعلى الصداق المسمى بيننا ..عاجله وآجله ..
غريب ردد ورايا :وانا قبلت زواجك ..رددها غريب ٣ مرات وفكل مره كانت براعم سعاده ملهاش عدد بتتفتح فقلب ليل .
المأذون :الان اصبحتما زوجا وزوجه بارك الله لكما وبارك عليكما وجمع بينكم فى خير ...
بالكلمه دى غريب حس انه ملك الدنيا كلها بين ايديه ...نادر جرى وخطف المنديل من فوق ايديهم والكل ابتدا يباركلهم وسميه طايره وهى شايفه غريب مش عارف حتى يتكلم من الفرحه....
ناديه قربت منهم هما الاتنين ...مبروك ياغريبوو .مبروك ياليل ..واسفه على كل حاجه حصلت منى وعلى كل كلمه خرجت منى وجرحتك فيوم ..
انا مكنتش اعرف انك بتحبى غريبوو اوى كده، ولا كنت عارفه انه بيتنفسك مع الهوا اللى بيتنفسه ..ربنا يسعدكم يارب ...
بس فيه حاجه هقولك عليها من دلوقتى ..غريبوو فاى وقت هيوحشنى هاجى واخطفه منك ويقعد معايا براحتى لغاية لما افرج عنه بمزاجى واقوله روحلها ...
ليل :ايوه امال ايه مش اخوكى وليكى حق فيه اكبر واكتر منى ...ربنا يخليكم لبعض ومايحرمكم من بعضكم واصل .
ناديه ابتسمت برضى :آمين يارب ياحبيبتى ...ايه رأيكم اخليكم تغنو زى قاسم وجواهر ...الاتنين فنفس واحد ..لا اوعى ..ضحكت وسابتهم ومشيت راحت قعدت جمب باباها وحضنته وباسته وهى شايفه فعنيه حزن وهو باصص لغريب برغم الابتسامه اللى على وشه ...
موده قربت وقعدت جمب ماهر :
ايه مالك شكلك عاوز تعيط بس محرج من الناس .
ماهر :بتفهمينى اوى انتى ..انا فعلا حاسس انى عاوز اعيط على ابنى وحبيبى اللى بيتجوز وهو محروم من نور عنيه ...يعنى اليوم اللى بيتمناه كل شاب وبيفضل من صغره يحلم بيه يعيشه ابنى وهو فالحاله دى ؟
موده :بص على فرحته وانتا هتعرف انه مش ناقصه اى حاجه ...بالعكس دا احسن من شباب كتير بيتجوزو من غير حب، ولا بيقدرو يحسو بربع السعاده اللى حاسس بيها غريب دى ...
كل حاجه بتحصلنا بتحصل لحكمه ربنا لوحده هو اللى يعرفها ...خليك واثق فان ربنا بيختار الافضل لعباده دايما ..
ماهر :ونعم بالله ...بقولك ايه متيجى نخرج نتمشى فالجنينه شويه حاسس ان رجلى نملت .
موده :يلا بينا ...وخرجو هما الاتنين على الجنينه واتمشو شويه وهما بيتكلمو عن الشغل وماهر فالاخر اصر على انهم يقعدو على النجيله ...موده رفضت بشده لكن ماهر اصر عليها واجبرها على القعاد فالارض ...
موده بقت تبص حواليها برعب وخايفه تلمس بأيدها اى حاجه .
ماهر :على فكره مش هتجرالك حاجه ارخى اعصابك واستمتعى ياموده
...غمضى عنيكى وقوليلى حاسه بأيه .. ارجوكى ثقى فيا ..غمضت موده عينيها وماهر
مسك ايدها برغم مقاومتها ومشاها على النجيله اللى فالارض ..موده فالاول قاومت لكنها استسلمت ورخت ايدها وهى حاسه بملمس الزرع ...مسك ايدها وفردها وحط فيها حاجه ناعمه وقفل ايدها عليها ...
موده ديقت حواجبها ..ايه دا ..ماهر شوفيه وحسيه واعرفيه لوحدك ..
موده فركت الحاجه اللى فايدها ورمتها مره وحده على الارض ..وفتحت عنيها وهى بتنفض ايدها وطلعت منديل بتمسح بيه فايدها ...دا تراب ..انتا عارف كام واحد دايس عليه بجزمته ...طيب عارف الجزمه دى دايسه على ايه كان على الارض ..تقوم انتا تمسكه وتحطه فأيدى ياماهر !
ماهر ابتسم وهو شايف عصبيتها وهى بتنضف ايدها وفضل مراقبها
موده رفعت عنيها ونزلتهم بسرعه ورفعتهم تانى لما شافت الطريقه اللى بيبصلها بيها ماهر وابتسامته اللى على وشه .
موده :ممكن اعرف مبتسم وسعيد اوى كده ليه ؟
ماهر :عشان دى اول مره اسمعك فيها بتقولى اسمى من غير اى القاب ..وبصراحه طالع جميل اوى من بين شفايفك ..
موده بلعت ريقها وكملت مسح ايدها بخجل من كلام ماهر وبرغم تل الجراسيم اللى بقت حاسه انها اتكومت عليها الا انها كانت مبسوطه بالقعده وقربها من ماهر ..
ماهر :كفايه يبنتى هتقطعى ايدك ..وبحركه سريعه مسك ايدها وغمسها فحفره صغيره كانت فيها طين وموده صرخت وهى بتطلع ايدها متعاصه طين وقامت جريت على الفيلا وماهر فضل يضحك على منظرها من قلبه
موده دخلت على الحمام علطول وهى مبعده ايدها بعيد عنها بخوف وقرف ..
عبد السلام :يادى المصيبه السوده بصى لبنتك واللى حصلها باينها وقعت فالطين وهتطلع عينى فالفتره اللى جايه، كل شويه تحاليل عشان تشوف انهى جرسومه دخلت فجسمها من الطين ...اه يافلوسك ياعبده .
ماجده :دا غير الادويه والمضاضات الحيويه اللى هتبلع فيها من غير حساب لغاية لما تخلص خالص .
*********
قاسم شد جواهر من جمب اميره وبعد بيها :
جواهر :ايييه مش واقفه بتكلم مع ناس انا
قاسم :بت انتى وحشتينى اوى من امبارح للنهارده ...ايه موحشتكيش ..مفيش نظره ولا ابتسامه لجوزك حبيبك ...غمزه طيب ..بوسه فالهوا اى حاجه اثبتيلى بيها ان انتى مشتاقالى ..اضحكى عليا شويه ...
جواهر :ومين بقا قالك انك موحشتنيش انتا كمان من امبارح للنهارده ...طب دانتا واحشنى اوحش من اى حاجه وحشتنى فحياتى .
قاسم :واحشنى اوحش ! ...طيب غورى ياجواهر شوفى كنتى واقفه مع مين دانتى مشاعرك معوقه ...وسابها ومشى قعد وسط غريب وليل على الكنبه بتاعتهم عشان يرزل عليهم وجواهر متابعاه ومبتسمه بحب على جنانه اللى عمال يوزعه على كل اللى حواليه ...
قاسم :ايييه يبختك ياغ....
وقبل مايكمل كان غريب ناطط عليه وسادد بوقه بأيد والتانيه ورا دماغه ..
غريب :ابوس رجلك متكمل ..ارجوك مكالمتك بتعت بالليل امبارح بعتتنى للصعيد صد رد مفياش حيل وحياة ابوك اروح فأى حته ..
قاسم :خلاص ياعم خلاص ...مهو من حقكم ...
ليل وغريب الاتنين سدو ودانهم عشان ميسمعوش لكنه كمل على كل حال ...مهو من حقكم تخافو على الفرحه اللى بتبظ من عنيكم دى احسن حد يحسدها ....هييه دنيااا وسابهم وقام .
نادر قدر اخيرا ينفرد باميره فزاويه لوحدهم بعد ماجواهر اخدها قاسم من جمبها .
اميره :اييه
نادر :ايه اللى ايه ...طول الوقت لازقه فجواهر وعمال اشاورلك اشاورلك والبعيده عميه وطرشه وغبيه ...
اميره :اله ..ايه غبيه دى كمان ...
عموما ادينا بقينا لوحدنا قول يلا كنت عاوز ايه.
نادر :كنت عاوز اقولك انى بحبك ..
اميره :قديمه .
نادر :سخيفه
اميره :شكرا ...بعد اذنك يلا هروح اسلم على العرسان عشان الحق ارجع السكن .
نادر :ايه هو ده ...باتى هنا
اميره :مممنوووع منعا باتاً ...هتيجى توصلنى ولا اخلى عم طه يوصلنى
نادر :مش بقول غبيه ..يعنى انا مبصدق الاقى فرصه تجمعنى بيكى اقوم اديها لعم طه ؟ يلا اتفضلى قدامى عشان تسلمى واروح اوصلك ..بس قبلها هنتعشى سوا بره
اميره :مش هقدر هتأخر والمديره مش هترضى تدخلنى .
نادر : انا هخليها تدخلك ملكيش دعوه انتى .
وفعلا سلمت واخدها وخرجو ..
اما غريب فأخيرا سمحوله انه ياخد ليل ويروح وقاسم وجواهر اخدوهم بعربيتهم عشان يوصلوهم ..
وصلو ونزلو العروسه والعريس ...ليل متاجو تطلعو معانا ..
قاسم :ايوه ادينا جايين اهو يلا ياجواهر نطلع معاهم
غريب :قااااسم لم نفسك بدال مانخسر بعض ...خد مراتك واتكل على الله على شقتكم يلا ..
قاسم :بس متزعقش اوى ليطقلك عرق ادينا ماشيين ، يلا ياجواهر ياحبيبتى بينا ...هو فاكرنا مشردين وملناش شقه تلمنا ولا ايه .
غريب :ايوه كده شاطر
قاسم :على فكره انتا بقيت آسى اوى معايا ياغريب ...أوى .
غريب :يلا ياليل بينا الولد دا مش هيمشى فليلته دى .
جواهر :خدى جوزك واطلعى ياليل ..انا جبتلك كل حاجه ورتبتهالك فالدولاب فاوضة غريب ..
ليل :تسلميلى ياحبيبتى ...واخدت غريبها وطلعت على شقتهم ..
ليل فتحت الباب ودخلت غريب
ودخلت غيرت هدومها ولبست روب حرير وفكت شعرها وغريب كمان غير هدومه لهدوم بيت خفيفه ....
بعدها اتعشو هما الاتنين سوا وسط جو مشحون بكل احاسيس السعاده
خلصو العشا وغريب مسك ايد ليل ودخلو اوضته ...
غريب قرب منها ومد ايده عشان يلمس حِلمه اللى ياما حلم بيه ويتأكد انه بقا حقيقه قدامه ...
ايده جات على شعرها وغاصت وسط شلال الحرير واخد منه خصله وميل عليها شمها بشوق ولهفه لعطرها اللى لسه مطبوع فذاكرته ...
ساب شعرها ومد ايده على وشها يلمس ملامحها بلهفه ..وبعدها ضمها عليه بشوق وحنان والتوتر واضح فرعشة اديه
ليل كانت متوتره اكتر من غريب ومرتبكه كأنها اول مره ليها هى كمان برغم انها كانت متجوزه لكن مؤمن ولا مره حست معاه الاحساس دا ..ولا مره حست بالدفى اللى حاسه بيه فحضن غريب دلوقتى
ومهما اتكلمت وشرحت هى حاسه بأيه احساس فاللحظات دى مافيش اى كلام يقدر يوصفه ...
غريب اتجرا اكتر وهو حاسس ان ليل دابت بين ايديه وبتبادله بنفس اللهفه ..
اخدها من ايدها ودخلها فعالم جديد من المتعه اول مره فحياتهم يدخلوه هما الاتنين ...
احساسها بلهفته عليها ..اللهفه اللى عمرها ماشافتها من مؤمن ابدا ولا حست بيها فيوم .
انفاسه وهمساته اللى خلت روحها تدوب فحضنه ...واخيرا بعد عنها بعد ماطبع صك ملكيته على كل شبر فيها
غريب حاضن ليل وفارد شعرها على صدره ومتغطى بيه زى ماحلم ايام طويله ...شدد على حضنها وهو حاسس انه حاضن الدنيا كلها بين ايديه بعدها لمها فحضنه اكتر وغفى على ريحة شعرها
اما ليل فاطول الليل فضلت صاحيه وباصه للحلم اللى مكنتش تجرؤ انها تحلمه وهو بين ايديها وقلبها بيرقص على صوت دقات قلبه .
**********
جواهر كانت اول وحده تتصل بليل الصبح وتباركلها ليل اخدت التليفون اللى بيرن هزاز وخرجت من جمب غريب تتسحب عشان متصحيهوش .
ليل بهمس :صباح الخير ياجوجو
جواهر :ياصباح العسل والسكر ...اممم السعاده واضحه فصوتك فمش هقولك طمنينى عشان صوتك لوحده طمنى ..مبسوطه ياليل
ليل : كلمة مبسوطه دى قليله قوى قدام اللى حاسه بيه ياجواهر ..انى من ليلة امبارح وانى عايشه فقصه من قصص الف ليله وليله
لأول مره فحياتى ياجواهر احس الاحساس ديه ...وانا بين اديه حسيت انى اكبر امنياته اللى ربنا حققهاله ...
حسيت بآدميتى ...لمسات ه الحنينه الدافيه خلت كل ذره فيا تدوب فى بحر من السعاده ....احساسى بأنوثتى اللى ماتت مع مؤمن رجعت للحياه من تانى على ادين غريب ....
الحب مهما يتوصف مش زى مابيتحس ياجواهر ...
الفرحه لما تشوفيها فعيون الناس مش زى ماتكون جواكى وحاضنه روحك ...
انى لو فضلت طول عمرى ساجده لربنا ،برضو مش هيكون كفايه عشان اشكره انه خلى راجل زى دا فحياتى ...
حقيقى عوض ربنا كبير قوى ...
جواهر :ربنا يسعدكم ياحبيبتى ويملا ايامكم كلها فرحه
ليل :عقبالك انتى كمان ياجواهر متقدرى تحسى انتى وقاسم باللى انى حسيته مع غريب ...
حاولى بكل جهدك ياجواهر وقربى من قاسم ومتعيه بيكى واتمتعى بيه ...
قرب الحبيب حلو قوى وهتندمى على كل يوم ضاع منيكى وانتو بعاد عن بعض صدقينى ..
جواهر :بحاول ياليل ..بحاول والله
ليل :حاولى تانى وتالت ورابع وعاشر حاولى مليون مره قاسم يستحق المحاوله عشانه وكمان عشان نفسك .
جواهر :حاضر ياليل ..اوعدك انى هحاول اخف اسرع من كده ..
قفلت جواهر مع ليل وبصت على باب الحمام اللى كان خارج منه قاسم وهو لافف فوطه على جسمه وبينشف شعره بفوطه تانيه ودخل على الاوضه عشان يلبس وينزل شغله ..
جواهر غمضت عنيها واخدت نفس وقررت انها من النهارده مش هتضيع لحظة قرب وحده بينها وبين قاسم وهتسمع كلام ليل وتاخد نصيبها من السعاده وتدى لقاسم نصيبه اللى صبر عليه كتير اووى ..
دخلت جواهر الاوضه وقفلت الباب واتسندت عليه وقاسم بصلها بصه سريعه ورجع بص للدولاب عشان يطلع غيار ، لكنه رجع بص لجواهر تانى بعد ما شاف فعنيها نظره رغبه ليه اول مره يشوفها ...
ساب الهدوم اللى فأيده وقعت على الارض وهو شايف جواهر بتقرب منه وحده وحده وعنيها بتتجول عليه كانها اول مره تشوفه لغاية ماوصلتله وهو مش مصدق اللى شايفاه عنيه وبلع ريقه بصعوبه وهو بيتمنى ان اللى شايفه وبيفكر فيه دلوقتى يتحقق
جواهر وقفت على طراطيف صوابعها وحضنت قاسم فدعوه صريحه منها ليه بأنه ياخد اللى فضل كتير محروم منه ...
وبسرعة البرق قاسم كان ملبي الدعوه دى واخد جواهر بين ايديه بلهفه وهو بيدعى ربنا انها المرادى متطلبش منه يبعد ،واطمن لما شافها دايبه لاول مره للدرجه دى و مش متخشبه ولاحس بارتعاشة الخوف على جسمها زى كل مره ...
فجأه تليفون قاسم رن لكنه مردش ولا اهتم ...بس فالاخر رد بعد اصرار المتصل بشكل مستفذ ..
قاسم مسك التليفون وحطه على ودنه من غير مايعرف مين اللى بيتصل ...دا وقتك ياعديم الذوق والاحساس ؟انتا مين وعاوز ايه انطق بسرعه ..
*انا اللوا بهاءالدين ياحضرة الظابط .
قاسم بلع ريقه بخوف : لو كنت عاوز النغمه دى دوس نجمه ..وقبل مايقفل عمل ...تووووووووت
جواهر :مين ؟
قاسم :لا محدش دا لوا كده عندنا فالقسم وشكله هيفصلنى النهارده
جواهر :ياخبر طيب قوم روح شغلك بسرعه
قاسم :شغل مين دلوقتى والله لو جانى رئيس الجمهوريه منا سايبك ..تعالى قبل مفعول حبوب الشجاعه اللى انتى واخداها عالصبح دا يخلص ...
واخيرا جواهر سمحت لقاسم بمنتهى الحب انه ياخدها من الدنيا لعالم تانى مفهوش غير هى وهو ومش سامعين غير انفاسهم العاليه ولا حاسين غير بلهفتهم لبعض ... وختم قاسم هو كمان صك ملكيته لجواهر بس المرادى برغبتها وبكامل رضاها .
جواهر غمضت عنيها وهى فحضن قاسم وقررت انها من بعد النهارده مش هتضيع لحظة قرب واحده بينها وبين قاسم، بعد ماسمعت كلام ليل عن الحب والسعادة اللي اكتشفت انها كانت حارمه نفسها منها فعلا ، ومحرماها على احب انسان ليها، حست اد ايه هي عذبت قاسم معاها، ولازم تعوضه عن الحرمان اللى شافه بسببها واتعهدت بينها وبين نفسها انها من اللحظه دى هتملا كل ايامه فرحه وقرب و سعاده ..
لقراءة باقي الفصول الجزء الثاني من هنا
لقراءة الجزء الاول جميع الفصول كاملة من هنا