الفصل السادس عشر .
بقلم ريناد يوسف
قاسم فضل لاذان الفجر مش جايله نوم ومسنود على دراعه وبيتأمل فجواهر وهى نايمه وفجأه لاحظ حركه غريبه من عنيها وجبينها اتملى بحبات العرق ،
وفضلت تهز فدماغها برفض وهى بتتكلم بلغه صعيدى قاسم اول مره يسمعها تتكلم بيها ..
بعد عنى ...اكفايه حرام عليك ...انى تعبت ..فينك يابوى تعالا حوش عنى محروس معدتش متحمله .. وبعدها جسمها انتفض بطريقه غريبه خلت قاسم اتجنن وهو شايفها بالمنظر دا
جواهر صحيت وشافت قاسم وهو باصصلها وانفاسه عاليه وعنيه بتطق شرار اتكلمت بهمس وتردد :صباح الخير ياقاسم .
قاسم :مين محروس ياجواهر ؟
فلحظه قشعريره سرت فجسم جواهر وحست ان الهوا اختفى من رئتينها وبتحاول تاخد نفسها او تبلع ريقها مش قادره ...
جواهر بعد فترة سكوت اتكلمت بلعثمه :ععرفت محمحروس منين ياقاسم ، ممين اللى قلك ععليه !
قاسم :عرفته منك ياجواهر ..طول الليل وانتى بتحلمى بيه وبتخترفى بأسمه وتطلبي منه انه يبعد عنك عشان مبقتيش مستحمله وفضلتى تنادى على ابوكى وجسمك بيتهز لغاية مااخدتك فحضنى وطمنتك لولا ماسكتى ....هاه مين بقا محروس دا ؟
جواهر بلعت ريقها وردت عليه وعنيها فالارض :محروس دا يبقى عمى اخو ابويا .
قاسم :طب وليه خايفه منه كده لدرجة انه بيطاردك حتى فأحلامك ؟
جواهر عنيها دمعت ولقطات من اللى كان عمها محروس بيعمله معاها بتتعاد قدام عنيها خلتها غمضت عنيها بقوه وحطت اديها على دماغها وهى بتهز فيها فمحاوله منها انها تنفض صورته من قدام عنيها ومن خيالها ...
قاسم حط ايده على ضهرها بحنان وفضل يمسد عليه ...جواهر مالك قوليلى فيكى ايه انا قاسم حبيبك ، انا نصك التانى اللى لازم تشاركيه كل تفاصيل حياتك وتقسمى معاه فرحك وزعلك وحتى خوفك من اى حاجه لازم تعرفيهانى عشان نواجهها سوا .
جواهر دخلت فنوبة عياط قويه وعايزه تتكلم ، محتاجه تفضفض ، نفسها تصرخ بأسم محروس وتسب وتلعن فيه بعلو صوتها وتتهمه على الملأ بأنه كان سبب فتدمير طفولتها وهو السبب دلوقتى فحرمانها من السعاده الزوجيه اللى اى بنت بتتمنى تعيشها مع حبيبها ، لكن للاسف متقدرش تعمل كده ،
متعرفش ان كان دا جبن منها ، ولا اى حد فمكانها برضو هيرفض انه يحكى حاجه مؤلمه ومخجله زى دى حتى لاقرب حد ليه كل اللى حاسه بيه دلوقتى ان بين ضلوعها صرخه مكتومه طابقه على انفاسها .
جواهر دفنت دماغها فحضن قاسم وهى بتشهق واخيرا نطقت بصوت ضعيف :
كان بيضربنى ياقاسم ...كان بيخوفنى ويسخنلى المعلقه على النار ويقولى هلسعك بيها لو مقعدتيش ساكته وبقيتى هاديه ومؤدبه وسمعتى الكلام .
قاسم :يااااه للدرجادى ؟
جواهر :واكتر ياقاسم .دا كان بشع بشع
قاسم :لأ قصدى للدرجادى كنتى قليلة ادب وانتى صغيره لدرجة انهم استنزفو معاكى كل الاساليب واضطرو يلجأو للكوى والترهيب اخر مافاض بيهم ؟! يامصيبتك السوده ياقاسم ..
جواهر عضت قاسم فكتفه بغيظ لانها دلوقتى فقمة انهيارها العصبى وهو فوادى تانى خالص ..
قاسم :اااخ ..ايه السعار اشتغل عندك عالصبح ولا ايه ؟! كده ! شوفى طلعتى بحتتة لحم من كتفى ازاى ؟ اهو انا دلوقتى بقا اللى من حقى اقول عليكى اكلت لحم كتافى ومطمرش فيها ...يامسعوره .
جواهر ابتسمت من بين دموعها
قاسم:ايوه كده اضحكى ياشيخه خلى الشمس تنور الدنيا، صباح الخير
متجيبى بوسه فاتح شهيه عالريق كده .
جواهر:ياقاسم بطل بقا وراعى انى فقمة معاناتى .
قاسم :مدى ايدك كده ...جواهر مدت ايدها وقاسم سلم عليها ...طب وشبكة العشره دول محد بيعانى فالدنيا دى ادى انا فاللحظه دى ، وان كان حد المفروض يراعى التانى فينا فالحد دا انتى ...راعينى ابوس اديكى ...ياجواهر راعينى ولا تغدينى على رأي المثل ..
جواهر بصت لقاسم وهزت دماغها بأحباط ..
قاسم :طب بس فهمينى حاجه بس ..يعنى هى حالة الصرع اللى بتجيلك دى سببها عمك وضربه ليكى ؟ يعنى هو عملك عقده من صنف الرجاله كلهم الفقري ده !
طيب بووووصييييي انا عندى فكره ... فالكليه علمونا حاجه اسمها واجه مخاوفك يعنى اى حد بيخاف من اى حاجه لازم يواجهها ويتغلب عليها وبكده يكون واجه مخاوفه وانتصر عليها ...ايه رأيك انا هجيبلك عمك مقروص دا واكتفهولك واناولك زوئله عفيه وتنزلى فيه ضرب لغاية مايبانله صاحب ....وكمان هسخنلك معلقه وتلسعيه بيها فكل حته وتفضلى تعذبي فيه لغاية ماتخفى ..
جواهر :للأسف مش هينفع لانه مات .
قاسم :اوبااا يعنى مش هتخفى خالص وهتفضلى معقده كده طول العمر صح ؟! انا عارفه حظى وعمايله السوده .
طب بصى بصى حل تانى ...احنا نروح القبر بتاعه ونحفر عليه ونطلع العضم بتاعه ونرصه على الارض واركبك عربيه وروحى وتعالى عليه كذا مره لغاية ماتطحنى عضمه وبعد كده ناخد العضم المطحون دا ونرميه فأقرب بلاعه زى الهنود مابيعملو كده ...اظن دا احسن انتقام وهيفك العقده بعون الله صح ؟!
جواهر قامت وراحت على الحمام ومتجاهله قاسم اللى عمال يكلمها :
هاه قولتى ايه ...ايه رأيك فالعلاج ..يبت ردى عليا انا تعبت من التفكير فحلول ...
قاسم :الله يجحمك يامحروس مكان منتا مدفون عقدت البت ومت ، كنت تسيبهالى مش متربيه ارحم !
****************
سميه صحيت الصبح وهى متأكده ان غريب مش هيجيلها النهارده زى كل يوم بعد ماعرفت من زينب بموت سميره ولانها عارفه سميره كانت ايه بالنسبه لغريب وحست لأول مره فحياتها انها حزينه لحزنه وقلبها واجعها على وجع قلبه اللى ياما كانت هى سبب فوجعه ...
سميه قامت اتسندت وخرجت برغم الم رجلها وراحت على اوضة غريب فتحت الباب بشويش وبصت على غريب اللى كان نايم ورايح فالنوم دخلت ووصلت عند سريره وقعدت جمبه ،ومدت ايدها لاول مره من غير تردد على شعره ونزلتها على دقنه بحنان واتأملت ملامح وشه اللى باين عليها التعب وميلت وطبعت على خده بوسه لأول مره فحياتها وحياته.
غريب وهو لسه مغمض عنيه اخد نفس وبعدها اتكلم :صباح الخير ياامى ..
سميه :عامل ايه ياغريبى .
غريب ابتسم :غريبك !الاسم دا خاص ببابا هو بس اللى بيقولى غريبى ..
سميه :على فكره بقا انا اللى مسمياك الاسم دا ومحدش له حق يقولك غريبى الا انا ..فاهم
غريب اتعدل وقعد على السرير وهو بيفرك دماغه :هى الساعه كام دلوقتى حاسس انها كتير ..
سميه :الساعه عشره وربع .
غريب :ياااه ايه دا دنا نمت كتير اوى فعلا ...خساره فوت فنجان القهوه معاكى ..
سميه :ومين قالك انى شربت قهوتى ...انا قهوتى الصباحيه بقت مرتبطه بيك ياغريب ..بقيت انتا مذاقها المتميز وطعمها الجميل اللى من غيره فنجان قهوتى مايتشربش .
غريب :تعرفى لو كنت سمعت الكلام دا فأى يوم تانى غير دا كنتى ممكن تلاقينى قمت رقصت من الفرحه وعرفت الدنيا كلها انى اسعد بنى آدم على وش الارض ..
سميه :وانا يمكن فأى يوم تانى غير دا مكنتش قولتلك الكلام دا ...انا قولتلك الكلام دا مخصوص النهارده عشان ابدل ملامحك الجميله دى من الحزن للسعاده عشان فعلا مش لايق عليك الحزن ياغريبى ..
غريب اتنهد برضى ومد ايده مسك ايد سميه باسها ..
سميه :البقيه فحياتك ياحبيبي ربنا يجعلها آخر الاحزان لقلبك
غريب :يارب ياأمى ونعم بالله ياحبيبتى ..
سميه :طيب نشرب القهوه بقا انا دماغى هتتفرتك من الصداع وانا مستنياك من الصبح ..
غريب :نشرب القهوه ياست الكل ، بس هننزل نشربها تحت بعد اذنك ...هتقدرى تنزلى ولا انادى لنادر يشيلك وينزلك ؟
سميه بزعل من كلام نادر معاها امبارح :لأ متناديش لحد هنزل لوحدى وحده وحده اصلى لازم اعتمد على نفسى زى ماقلي الدكتور وكمان عشان رجلى تخف بسرعه .
غريب :طيب ثوانى هدخل اتشطف واغير واجيلك عشان ننزل سوا متسندين على بعض .
سميه ضحكت ضحكه خفيفه : ماشى هروح اوضتى استناك هناك .
خلص غريب واخد سميه ونزلو وحده وحده وماهر وجميله كانو قاعدين جمب بعض وناديه قاعده بعيد عنهم بتكلم صحباتها ماسنجر .
ماهر :ياصباح الخير ياحبيبي طمنى عليك عامل ايه دلوقتى .
غريب :الحمد لله يابابا ربنا بيرمى الصبر ..والبركه فالحبايب اللى بتخفف عن الواحد وتصبره وطبطب على ايد سميه اللى حاضنه ايده .
جميله :صباح الرضى ياحبيب عمتك يارب تكون بخير ياحبيبي .
غريب : صباح الخير ياعمتو الحمد لله احسن كتير
سميه قعدت وقعدت غريب جمبها وغريب طلب من عمته قهوة الصبح
جميله قامت تعمل القهوه من سكات ليه ولسميه اللى لو تطول كانت حطتلها فقهوتها مع البن سم فار بس عشان غريب مستحمله ..
ليل هى اللى جابت القهوه وصبحت على غريب وسميه وحطت القهوه جمب سميه ولفت عشان تمشى سمعت ناديه بتنادى عليها ..
ناديه بصيغة امر :ليل تعالى خدى الكبايه الفاضيه دى وديها على المطبخ وهاتيلى طبق فاكهه وانتى جايه .
ليل راحت اخدت الكبايه من سكات ودخلتها المطبخ وغريب عقد حواجبه واتنهد بغيظ واعتراض على اسلوب ناديه المستفز مع ليل .
ليل جابت طبق فاكهه وحطته قدام ناديه وبرضو اتحركت من سكات ولسه هتدخل المطبخ ناديه اتكلمت :
ليل لو سمحتى ادخلى نضفي اوضتى انا وعمتو عشان محتاجه تتنضف وياريت بسرعه ...
هنا بقا ماهر كان رده عليها اسرع من رد غريب اللى قام وقف اول ماسمع كلام ناديه ..
ماهر :ناديه ؟ هو فيه ايه مالك ايه حصلك ! مش شايفه انك زودتيها اوى ولا ايه ؟
ناديه :ليه يابابا انا كنت عملت ايه غلط يعنى مش هى دى شغلتها فالبيت هنا ..(خدامه ) هو انا لما اطلب منها حاجه فى نطاق شغلها ابقا زودتها ؟
ماهر :ليل مش خدامه ياناديه ...ليل صاحبة بيت وهى هنا زيها زى جواهر بالظبط وهى امانة جواهر فالبيت دا ولازم كلنا نحافظ عليها ..
جميله بنبره صارمه :ليل روحى اقعدى ارتاحى انتى دلوقتى ...وانتى ياناديه تعالى معايا عايزاكى فكلمتين لوحدنا جوه ..
*********
قاسم
مهو ياجواهر مش هينفع كده بجد انا مبقتش عارف اعملك ايه يعنى اجيلك بالراحه برضو زى منتى اقولك تعالى اوديكى لدكتور نفسى مش راضيه ،اقولك نقول لمامتك وهى تلاقي حل للى بيحصلك دا مش راضيه، اعمل ايه انا تعبت حسى بيا هنفضل كده لامتا يعنى ؟
جواهر :غصب عنى ياقاسم والله انا تعبانه اكتر منك من اللى بيحصل معايا ده لكن مش عايزه ابدأ حياتى بمساعده من اى حد عايزه اتخطى كل عقبه هتقابلنى بنفسى .
قاسم :دا كلام فارغ لايودى ولا يجيب وحجج واهيه ، جواهر لأخر مره هقولك صارحينى وانا مستعد نفسيا لاى حاجه هتقوليها ...جواهر انتى فيه حد قرب منك قبلى ؟
جواهر انتفضت ووقفت :انتا بتقول ايه ياقاسم ؟!
قاسم :مش قصدى انك تكونى انتى سلمتيله نفسك على فكره قصدى حادثه اتعرضتيلها او اعتداء فى طفولتك اى حاجه من دى ، حصل معاكى كده ياجواهر ؟
جواهر بلعت ريقها بخوف ودا خلى قاسم ديق عنيه بشك :
جواهر انتى مش فيرجن وخايفه اكتشف دا صح ؟
جواهر من وسط دموعها :قاس م ارجوك كفايه تجريح لحد كده حرام عليك ارحمنى
قاسم بقلة حيله :كفايه انتى وارحمينى بقا وقوليلى مشكلتك ايه انا دماغى عماله بتفكر وتستنتج استنتاجات دمرتنى ياجواهر .
جواهر :قاسم طلقنى ...هى الظاهر خلاص خلصت على كده .
قاسم بصدمه : اطلقك!؟...حاضر ياجواهر هطلقك ...هى فعلا الظاهر خلصت لحد هنا ....لمى هدومك هنرجع مصر ...وقام لبس هدومه بمنتهى العصبيه تحت انظار جواهر ودموعها اللى بتنزل من غير توقف ونزل بعد مااداها نظرة عتاب اخيره حطمت ذرات الثبات القليله اللى كانت فاضله عندها ...
جواهر ابتدت تراجع نفسها ...هى ازاى تطلب من قاسم الطلاق بالسهوله دى ؟ والاغرب هو برضو ازاى يوافق بالسهوله دى ؟ لكنها ادت لنفسها عذر انه هوازاى يطعن فشرفها بالشكل دا ؟
جواهر حضرت الشنطه بتاعتهم وشويه وقاسم جه واخدها ورجعو على القاهره .
وصلو لاول طريق بيت قاسم وجواهر بصتله :
لو سمحت ودينى الفيلا ياقاسم .
قاسم :جواهر لو سمعت منك ربع كلمه تانى اقسم بالله هديكى بوكس فوشك اغير ملامحه فاتهدى عشان حسابك معايا ميتقلش اكتر من كده...بقا عايزه تطلقى ياست هانم ؟
جواهر :منتا اللى طعنت فشرفى واخلاقى واتهمتنى بتهمه شنيعه مفيش وحده تستحملها على كرامتها .
قاسم رد عليها بنرفزه وهو بيجز على سنانه:السواق عرف الحكايه كلها ، علي صوتك كمان خلى مصر كلها تسمع ، ولا اقولك طلعى دماغك من الشباك وزعقى ...الاتنين سكتو لكن جواهر من جواها فرحت عشان قاسم مفرطش فيها بالسهوله اللى كانت فاكراها .
رجعو شقتهم بعد ماقاسم خبط على شقة اهله الخبطه المعتاده الخاصه بيه هو وبعدها طلع قبل ماحد يفتح .
ماجده بأستغراب :دى خبطة قاسم ! غريبه !ايه رجعهم بعد يومين بس من سفرهم ؟ خرجت ماجده من المطبخ على الباب بسرعه عشان تفتح لكن وقفتها صرخه موده فيها انهم ملوثين وجايين من سفر ولازم يتعقمو الاول وبسرعه دخلت الحمام وجابت الكحول وخرجت تفتحلهم لكنها ملقتش حد !
موده :ماما مفيش حد بره .
ماجده :تلاقيهم طلعو شقتهم يرتاحو ، تعالى معايا نكمل الغدا عشان نطلعلهم بالغدا ونتغدى معاهم كلنا .
موده :هنعمل عليهم باراشوت ليه دول عرسان ياماما حرام .
ماجده فسرها :تصرفاتهم مش تصرفات عرسان خالص ربنا يستر يارب ..ورجعت تكمل الغدا .
ماجده :ياأيه ياأمنيه تعالو اعملو السلطات حتى .
أيه :ياماما انا مش قادره اتحرك النهارده خالص وحاسه انى هولد النهارده .
احمد كان قاعد جمب عبد السلام اللى بيقرا فالجورنال مسكه من ابوه :ثوانى كده يابابا بعد اذنك ...ولف الجورنال اصطوانه وفضل يضرب فدرعات مراته ايه وعلى رجليها :
كل يوم تقولى هولد النهارده ومبتولديش بقالك شهر مدخلانى فحالة انذار وبرضو مفيش ولاده ...
بصى عايزك تقومى تتشقلبى فالمطبخ جوا ، عايزك تعملى اكروبات طول الوقت قدامى زى بتوع السيرك ..أيه بتدلك فمكان ضرب احمد وقامت تجرى على المطبخ بعد مابقتش قادره تستحمل ضرب تانى ..
محمود مد ايده اخد الجورنال من احمد وبص على أمنيه اللى شاورتله بأيدها يعنى لأ انا هقوم لوحدى ..وجريت على المطبخ ورا أيه اختها وهى حاطه ايدها على ضهرها وبتمشى زى البطريق ..
محمود بصوت عالى :بصى عايزك تعملى نفس الاكروبات اللى هتعملها ايه سامعه ..
خلصو الاكل وموده طلعت قبلهم شقة قاسم عقمتهم وسلمت عليهم وادتهم خبر انهم هيتغدو معاهم النهارده فشقتهم ..
قاسم بعد شويه سمع صوت مامته اللى كانت طالعه اول وحده وشايله صينية اك ل ووراها كل واحد شايل حاجه ودخلوها على السفره واخر حاجه طلعو ايه وامنيه كل وحده شايله طبق سلطه وطالعين على السلم قصاد بعض وبيمشو قصاد بعض وحده وحده بالعافيه ..
قاسم :الله على جوز البطاريق الحلوين دول ، والله مناقصكم غير شوية تلج وتتزحلقو .
ايه بنهجان :عقبال مراتك ماتتبطرق زينا يارب وانتا تعانى زى اخواتك ..وسع خلينى اشوف اقرب كرسى اقعد عليه اوعااااااه ..ورمت نفسها على اقرب كنبه .
امنيه :مش عارفه انا ماجده دى عليها حجات ...مكونتو نزلتو انتو اتغديتو معانا تحت اخف نطلع احنا ليه ؟
قاسم :دى حاجه اسمها تدشين الشقه الجديده ياعبيطه انتى متعرفيش حاجه ...
بعد السلام والكلام والغدا والكل قاعد فجو اسري قاسم وجواهر نسيو فيه مشكلتهم واندمجو وقاسم واخواته وهزارهم مع بعض فضلو عالحال ده لغاية بعد العشا ...
أيه :آه احمد الحقنى باينى بولد .
الكل بص عليها بصه سريعه وكل واحد رجع يتكلم مع اللى جمبه تانى .
أيه :آه والله المرادى شكلى هولد بجد .
جواهر بقلق وخوف :ياجماعه بتقولكو بتولد وشكلها متوجع !
احمد ومحمود وقاسم فنفس واحد :سيبك منها اصلها متعاااااوده جداااا .
ماجده :متقلقيش ياجواهر هى كل يوم تقول هولد كده ومبتولدش اصلها بكريه وخوافه ومش عارفه حاجه .
الكل رجع للكلام وجواهر شايفه ايه بتفرك وبتتوجع وعماله تحط ايدها على ضهرها بألم وهى كمان مبقتش قاعده مرتاحه ..
شويه وملامح ايه اتغيرت وبقت تصرخ ووقفت مره وحده هجمت على احمد تضرب فيه بأى حاجه تقابلها :بولد بقولك بولد الحقنييي آااااه .
محمود :يلا دى اول مره تجيلها الحاله دى يمكن بتولد بجد المرادى .
أيه سابت احمد ومسكت فمحمود من هدومه وبتهز فيه وتضرب :مش يمكن مش يمكن دا اكيد اكيد اكيد .
محمود مسك اديها خلعهم من هدومه بعنف :وانا مالى مالى مالى بتضربي فيا انا ليه جوزك اهو اهو اهو وزقها على احمد مسكته من هدومه وصرخت فوشه صرخه خلته وقع لورا على الكرسى وقام بسرعه هو وقاسم مسكوها كل واحد من دراع ونزلوها والكل نزل وراهم وركبو العربيه كلهم هما ال٧ وبقو سلطه مفيش غير موده بس اللى رفضت تروح ...
قاسم :عارفه بعد الفرهده دى لو مطلعتيش بتولدى بجد فالاخر لاربطك فالعربيه من ورا بحبل واجيبك جر لغاية مالعيل ينط من بطنك لوحده .
احمد :وربنا ياايه لو مكنتى بتولدى ...
ايه :اخرساااااوووو كلمولى مامااااا عايزه ماما بسرررعه ...
وصلو المستشفى وأيه فعلا كانت فحالة ولاده واتصلو بمامتها وجاتلها هى وابوها وبعد ساعه من العذاب والزعيق والصراخ ولدت أيه وجابت ولد زى القمر ..
خرجوها للأوضه والولد اخدوه يطمنو عليه وبعد شويه جابوهولهم الاوضه وشاله احمد اول واحد والفرحه مش سايعاه ولا سايعه الكل وخصوصا ماجده وعبد السلام بأول حفيد ليهم ...
بعدها بقا حصل جدال على الاسم كل واحد عايز يسميه اسم ومصمم عليه
قاسم :بااااااس الطلعه دى بتاعتى انا ...الولد دا مفيش حد غيري هيسميه ودا قرار وصدر ومفيش فيه رجعه ...
عبد السلام :طب ايه رأيك محد مسميه غيرك يلا قول الاسم بقا ..
قاسم :هنسميه رياله ، عشان لما ننادى لاحمد نقوله تعالا يابو رياله روح يابو رياله وايه تبقا ام رياله 😂 هاه ايه رأيكم اسم حلو وجديد ومختلف ..
الكل ضحك واحمد شد الولد من ايد قاسم :لا ياحبيبي خلى الاسم دا لابنك او لبنتك بأذن الله اما ابنى فهسميه عُدى وقفلنا الترند على كده .
ماجده شيلت الولد لجواهر وقاسم قرب من جواهر :نفسكيش فنونو زى دا يقولك ياماما ويقولى بابا ونسميه رياله ..
جواهر ابتسمت وهى باصه للولد ومدت صباعها خلته بين صوابع الولد وهمست :احلى حاجه فالدنيا دى الاطفال وجمالهم وبرائتهم .
قاسم :يعنى اشطه اتفقنا
جواهر :على ايه ؟
قاسم :على ايه ازاى ! نجيب رياله يام رياله .
********
فالفيلا
طول اليوم الجو مشحون ومتكهرب بسبب عمايل ناديه مع ليل وخصوصا بعد كلامها مع عمتها جميله
جميله :ناديه لو سمحتى عايزاكى فكلمتين على انفراد ..
اخدتها ودخلو اوضتهم وجميله قفلت الباب وراها :هاه بقا ياست ناديه قوليلى ايه حكايتك مع ليل ؟
ناديه :مين ليل دى ياعمتو اللى مدينها الحجم دا كله ؟
جميله :ليل ضيفه هنا ياناديه .
ناديه :لحد امته ؟
جميله :تقصدى ايه ؟
ناديه :يعنى الضيف بيفضل فتره فالبيت ويمشى ليل هتمشى امتا بقا وفترة ضيافتها دى مفتوحه طول العمر ولا ايه بالظبط !
جميله :ممكن اعرف وجود ليل مدايقك فأيه ؟
ناديه :وجودها مش مدايقنى، بس اللى بتعمله واللى بتحاول توصله هو اللى مدايقنى .
جميله :وايه بقا اللى بتحاول توصله ؟
ناديه :غريب .
جميله :غريب اللى هو ازاى يعنى ؟
ناديه :عماله تتدحلب لغاية ماعلقته بيها ومستغله عماه واحتياجه انه يعرف انه لسه محبوب ومرغوب ودخلاله من الحته دى وهو مرحب اوى ومش واخد باله انها لافمقامه ولا فمستواه .
جميله : اهااا ...انا دلوقتى بس فهمتك وفهمت انتى بتعملى كده مع ليل ليه .ولعلمك بقا اى وحده تانيه كانت هتدخل حياة غريب كنتى هتعملى معاها كده برضو ...وحتى لو غريب لسه بيشوف برضو كان هيبقى دا موقفك مع اى وحده هتدخل حياته عارفه ليه !
ناديه بصت لعمتها ومردتش لكن عمتها كملت :
عشان انتى بتغيرى على غريب ياناديه ، عشان حبك ليه واصل لدرجة التملك ، حاسه انه بتاعك لوحدك ومش متقبله فكرة ان وحده تانيه تدخل حياته وتاخد مكانك فيها او فقلبه .
ناديه بعنف :لأ طبعا مش صحيح .
جميله :لأ بقا صحيح والايام الجايه هتثبتلك دا ...وعلى فكره انا ملاحظه ان فيه استلطاف من ناحية غريب لليل ولعلمك انا لو هتمنى لابن اخويا زوجه مش هتمناله غير ليل ..
ناديه :مهو طبعا ، مش مجايبك ومجايب بنتك ، اكيد طبعا اول وحده هتأيد وتوافق تكونى انتى .
جميله :بنت انتى ازاى تتكلمى معايا بالطريقه دى ! انتى للدرجادى مبقتيش تعملى حساب لمشاعر حد خالص ؟ للدرجادى مفيش عندك احترام حتى لعمتك !
ناديه :حقك عليا ياعمتو وحضرتك مقامك كبير اوى عندى بس ليل متفضلش فالفيلا هنا .
جميله :طيب مادام بقت كدا بقا ياناديه، الفيلا دى انا ليا ورث فيها وليل قاعده فنصيبى انا من الفيلا .
ناديه :يبقى تستحمل وتسكت بقا ..وخرجت وقفلت الباب وراها بعنف .
جميله :هو فيه ايه البنت اتجننت خالص
*************
فالفيلا والكل متجمع على الغدا اللى طبخته ليل وطالع يجنن كالعاده والكل بياكل ..
نادر :احم ...بابا انا عايز اخطب اميره بنت عم راضى وطنط مريم .
الكل انتبه وبالزات سميه اللى اسم اميره نزل على مسامعها زى الصاعقه عشان دا اكتر اسم بتكرهه فالدنيا وكمان صحبته تبقى بنت صحبة ضرتها ...ولانها متملكش دلوقتى مع اولادها حق الاعتراض او حتى الموافقه او ابداء الرأى سكتت ..
ماهر بعد دقايق سكوت والكل مترقب هيقول ايه اخيرا نطق ..
تصدق يانادر انا عمرى كله مشفت جوز جلنفات وبنفس المستوى ونفس الطينه غيرك انتا وقاسم صاحبك ...
حقيقى المرء على دين خليله فعلا ...وانا شايف انه باهت عليك فالبرود وعدم الاحساس سبحان الله فالحته دى اللى يشوفكم يقول تؤام ..
نادر :فيه ايه يابابا !
ماهر :تك بو ...بقا يابارد داده سميره لسه حتى قبرها منشفش وعاوز تخطب ؟!
نادر :يابابا انا بديك خبر بس لكن اكيد طبعا مفيش خطوبه ولا رسميات دلوقتى هو هيبقى كلام وبس ،وبعدين انا فاتحت طنط مريم وقالتلى انهم مش هيوافقو على الجواز غير بعد ماتكمل تعليم وهى فاضلها سنتين بس عايز احجزها بس .
ماهر :وكلمت مريم، واتفقت، وحددتو هتتجوزو بعد سنتييين ،وراس الفجل اللى اسمه ابوك آخر من يعلم صح ؟
نادر :والله مكلمت طنط مريم دنا رنيت على اميره وهى ادتنى امها على غفله دبستنى ..
ماهر :عشان بنت ناس ومتربيه ومبتعملش حاجه من ورا اهلها .
نادر :طول ماشكرت فيها تبقا وفقت عليها ...اشطا اتفقنا هتكلملى ابوها امته ؟
ماهر :قوم يلا من قدامى بدال مااهفك بطبق الزتون دا فنفوخك .
نادر :هفنى واخطبهالى يعنى بص اخبطنى واخطبلى انا موافق ودماغى اهى ..وميل دماغه على باباه وماهر ضربه على دماغه ضربه خفيفه بمعلقه وبعدها ابتسم :
كبرت يانادر وهتتجوز؟ ...على فكره اليوم دا انا بتمناه ويوم المنى يوم مااخطبلك بس المشكله عندى فالتوقيت ...يوم المنا بتاعك جاى فيوم مش مناسب خالص ...عموما شويه كده لقدام هتكلم مع راضى واحجزهالك من عنيا حاضر ..
نادر بفرحه :طب والله انتا اجدع واجمل واروع اب فالدنيا ..وانا بحبك اوى اوى اوى .
غريب :بركاتك ياست اميره شقلبتى احوال الولد .يبختك ياعم قلبك دا قطر سكه حديد مبيوقفش محطات .
نادر :بس اسكت انتا وحياة ابوك ماتنبر فيها خلى الموضوع يمشى، حاكم عارف النبر انا اخرته وحشه .
غريب :طب استنى شوف النبر اللى بجد بقا لما اقول لقاسم
نادر :لأ قاسم لأ مش دلوقتى ابوس ايدك اصلا عين قاسم هى اللى مبوظه حياتى .
جميله :ولدددد ملكش دعوه بجوز بنتى اتكلم عليه عدل قاسم دا اصلا سكره .
ماهر :ومين هيشهد للعروسه يعنى ..
غريب :ليل لو سمحتى حطيلى سلطه كمان .
ناديه بسرعه :لأ اقعدى انتى مكانك انا هجيبله ...وجابت سلطه حطتها لغريب قدامه وهو قام ومرضيش يحط لقمه فبوقه بعد كده وفضلت ناديه تبص لليل بلوم زى ماتكون عايزه تحرقها لغاية ماليل سابت السفره وقامت وطلعت مباشرة لفوق على اوضتها وهى حاسه انها خلاص ملهاش مكان فالبيت دا بعد كده
فرعون 2
البارت السابع عشر 17.
ليل طلعت على اوضتها وجميله قامت هى كمان وطلعت وراها واول مافتحت الباب لقت لي ل بتلم فحاجتها وهدومها اللى اشترتهالها جواهر قبل ماتتجوز وتحطهم فشنطه صغيره ومديه ضهرها للباب ..
جميله :بتعملى ايه ياليل ؟
ليل :علم خلجاتى ياخاله عشان خلاص انى من دلوك ورايح مليش عيش ولا عيشه اهنه .
جميله :طيب رجعى بس الهدوم مكانها وبطلى عبط ..هتاخدى على عمايل عيله صغيره طايشه مش عارفه هى بتعمل ايه ولا بتقول ايه !
ليل :له ياخاله ناديه لاهى عيله ولا معرفاش عتقول ايه ...ناديه قالتهالى بكل طريقه بكلامها وبعنيها وبملامح وشها ..قالتلى امشى مش عاوزاكى فبيتنا .
جميله :اولا البيت دا انا ليا فيه ورث، يعنى انتى قاعده فورثى، يعنى قاعده فملك جواهر ومحدش يقدر يخرجك منه طول منا عايشه ..ثانيا بقا تقدرى تقوليلى هتمشى تروحى فين وهتعملى ايه ؟ هو انتى تعرفى حد هنا ، على فكره مصر مش زى البلد ياليل ، هنا عالم مختلف ودنيا تانيه خالص ، وبعدين تعالى هنا مفكرتيش فجواهر وانتى بتاخدى قرارك دا بأنك تسيبي الفيلا وتمشى ؟ دى لو عرفت ان حاجه زى دى حصلت هتتجنن ومش بعيد تروح فيها ، جواهر روحها فيكى ياليل ارجوكى متأذيهاش .
ليل :بعد الشر عنها ياخاله ربنا يبعد عنها كل اذيه يارب ..بس صدقينى جواهر بزات نفسها مترضاليش بالذله وكسرت النفس من اى حد واصل ، وناديه معارفاش ليه قاصده انها تزلنى وتكسر نفسى طول الوكت .
جميله :قولتلك متاخديش عليها وحسابها معايا لو عملت ولا قالت حاجه تدايقك مره تانيه .
ليل :الله يخليكى ياخاله سيبينى على راحتى انى اكده اكده عارفه ومتوكده انه هياجى يوم من ليام وهسيب اهنه واروح فحته تانيه، فخلى اليوم ديه النهارده وخلينى اطلع من البيت بشوية كرامه بدل ماطلع بعد اكده من غير كرامه واصل وساعتها الموت هيبقى اهون علي .
جميله :طيب عشان خاطرى اقعدى دلوقتى لغاية ماتهدى وبعدين هنتكلم ..انا هسيبك دلوقتى شويه وبكره كنت عملالك مفاجأه بس هقولهالك دلوقتى عشان افرحك .
بكره هاخدك ونروح لجواهر رجعت من شرم عشان قاسم طلبوه فشغل مفاجئ ...هاه ايه رأيك بقا اظن جواهر هى الوحيده اللى هتعرف تلين دماغك الناشفه دى وتقدر تخليكى تتراجعى عن قرارك .
ليل :ربنا يسهل ياخاله وحمدالله على سلامتهم ربنا يسعدهم دايما ..
جميله :عقبالك انتى كمان مع النصيب اللى ربنا مختارهولك اللى انا واثقه انه هيكون مفيش احسن منه .
ليل ابتسمت على كلام جميله وهزت دماغها وقعدت على السرير وجميله سابتهة وخرجت .
اما تحت فالكل بدون استثناء محدش فيهم رضى عن تصرف ناديه مع ليل
والكل هزقها واتهمها بأنها عديمة زوق حتى امها سميه بصتلها بصات عتاب لكنها اتجاهلت كل دا،
ومحدش كلامه همها ولا اثر فيها ..
وكل شويه عينها تيجى على غريب اللى قاعد طول الوقت ساكت وحاطط اديه الاتنين تحت دقنه وساندهم على عصايته ..
جميله نزلت من فوق وقعدت على كنبة الانتريه جمب غريب وبعدها قام ماهر قعد جمبهم
ماهر :هاه طيبتى خاطرها ياجميله
جميله :راكبه دماغها ولمت هدومها ومصممه انها تمشى من الفيلا ياماهر
غريب قلبه انتفض لما سمع الكلمه دى وحس بأرتعاشه بتسري فكل جسمه
كملت جميله :
مش عارفه هتروح لمين ولا فين ؟ البنت دى لو خرجت من البيت ياماهر كلاب الشوارع هتنهش فلحمها وهتنداس تحت الرجلين .
ماهر :مفيش الكلام دا ليل مش هتخرج من هنا ولا هتروح لأى حته .
جميله :مأظنش هتستحمل معاملة ناديه دى كتير ..ليل عندها كرامتها فوق اى حاجه تانيه ..
غريب اتكلم بنبره هاديه عكس النار اللى جواه :
بابا بعد اذنك انا هروح الشقه اقعد فيها شويه .
ماهر :شقة ايه ياغريب اللى تروح تقعد فيها؟!
غريب :بابا لو سمحت انا محتاج اقعد مع نفسى شويه .
جميله بصت لماهر وغمزتله بأشاره هو فهما وبعدها اتكلمت :بس ياغريب انا مقدرش اسيب ابوك ولا الفيلا عشان اجى معاك وانتا محتاج حد يخدمك هناك .
اتكلم ماهر بنبره خبيثه :ياخد ناديه معاه .
رد غريب بسرعه :لأ ناديه لأ
جميله :يبقى مفيش غيرها بقا هى الوحيده اللى ينفع تروح معاك .
وش غريب ابتسم ومستنى عمته تنطق الاسم لكنه اتفاجا بيها بتقول .
طبعا سميه حبيبة قلبك .
غريب بلع ريقه وغمض عنيه قبل مايرد على عمته :
ماما سميه لسه رجلها مخفتش كويس ومش هتقدر تتحرك بسهوله ولسه هى كمان محتاجه رعايه .
الكل سكت وغريب اتكلم بتردد :ايه رأيكم لو أخد ليل معايا اهو منها تساعدنى ومنها تبعد عن ناديه ومشاكلها ومنها منصحاش يوم منلاقيهاش فالفيلا ومنعرفلهاش طريق بعد كده والبنت طيبه وبريئه ويتخاف عليها ..وغير دا ودا دى امانه عندنا .
جميله بصت لماهر وابتسمت واتكلمت :والله فكره مش بطاله ...وفعلا حل لمشكلة ليل وناديه ...انا هكلمها فالموضوع دا واشوف رأيها ايه وارد عليك .
غريب بفرحه :طيب انا خارج هقعد شويه فالجنينه اشم شوية هوا بعد اذنكم ...
خرج غريب وماهر اتكلم :
كان عندك حق وفعلا انا صدقتك دلوقتى ..فعلا غريب ابتدى يتعلق بليل ..
جميله :مش قولتلك .
ماهر :بس برضو انا مش راضى عن الموضوع دا ياجميله تمام الرضى .
جميله :ليه ياماهر دى ليل دى هديه من السما لغريب فالوقت دا .
ماهر :بس شكلها ياجميله ،
جميله :اظن شكلها مش هيفرق مع غريب فحاجه وهو فحالته دى ياماهر
ماهر :وكمان لو حصل واتجوزو تخيلى لو خلفت هتجيب ولاد شكلهم ايه !...لا لا صعبه والله صعبه .
جميله :متسبقش الاحداث وسبحان الله اكيد له حكمه فأنه يقرب ليل من غريب فالوقت دا بالذات وكل واحد عنده مشكله بالنسبه للتانى ميزه تخليهم انسب اتنين لبعض ..ومتنساش غريب مفيش وحده هترضى تعيش معاه وهو اعمى ياماهر ومفيش اى امل انه يرجع يشوف فيوم من الايام .
ماهر اتنهد :اه ياوجع قلبي عليك ياغريب يبنى ، والله كل ماابصله قلبي بيتعصر عليه عصر ...بقولك ياجميله عايزك تودينى شقتى النهارده محتاج اشوف اميره واتكلم معاها شويه ...وصلينى وسيبينى هفضل هناك يوم ولا يومين ..
جميله :حاضر ياحبيبي هقوم احضرلك حاجتك وعلاجك واوصلك .بس اياك تسيب تمريناتك ..اوعى تقول انا بقيت كويس وخلاص كده ...لسه قدامك كتير ياماهر اوعى تهمل فصحتك سامع .
اما غريب فأخد سميه وخرج بيها للجنينه ساندها وهى بتدله على الطريق ..
غريب :اقولك على حاجه ..انا هسيب الفيلا شويه .
سميه بخضه :هتروح فين ؟
غريب :هروح اقعد فشقتى محتاج اقعد لوحدى شويه بعيد عن كل حاجه .
سميه بأبتسامه خفيفه :متأكد لوحدك خالص ولا هتاخد حد معاك .
غريب : زى مين يعنى .
سميه :زى اى حد .
غريب : متوضحى كلامك ياماما !
سميه مش عارفه ليه حاسه انك عايز تاخد حد معين وتهرب بيه من هنا .
غريب بتوتر :قصدك ايه ومين الحد دا اللى عايز ابعد بيه ؟
سميه :ليل مثلا .
غريب ابتسم بتوتر :ايه ياماما
بتلمحى لأيه !
سميه :مش بلمح لاى حاجه ياحبيبي ، خدها وروح وعيش وامشى ورا قلبك ، اوعى تفكر انى مش حاسه بيك ولا برفرفة قلبك وهى جمبك ولا سعادتك بكلمه منها ، لأ امك واخده بالها من كل حاجه .
غريب :على فكره انا لسه مش عارف انا احساسى ايه بالظبط من ناحيتها لكن هو مجرد ارتياح بس .
سميه :طب مهو بيبدا بارتياح وبس وبعد الارتياح بتيجى كل حاجه .
غريب :تفتكرى ؟
سميه :جدااا ...مع انى اتعودت عليك وادمنت وجودك معايا ومش هعرف اعيش من بعد ماتمشى وهرجع لوحدتى مره تانيه .
غريب :هى فتره بسيطه بس اتأكد فيها من مشاعرى والاهم من كده اعرف مشاعرها هى كمان وهل ياترى هتقبل تقضى باقى حياتها مع واحد اعمى مش هيقدر يشوفها ..
سميه :لأ متقلقش من الحته دى من ناحية هتقبل فهى هتقبل هى هتلاقى احسن من ابنى حبيبي فين يعنى ...طب دنتا اى بنت فالدنيا تتمناك تيجى ليل وترفضك ؟وبعدين هى كمان كشكل ملهاش فرص كتير فالجواز
غريب:للدرجادى !
سميه بضحكه:اه للدرجادى .
غريب :عموما مش هتفرق معايا فحاجه .
سميه :منا عشان كده بأكدلك موافقتها من دلوقتى .
غريب :عموما الكلام دا سابق لاوانه اوى ...المهم عايزك تحاولى على اد ماتقدرى تقربى من نادر وناديه فغيابى ، قربيهم منك ، اطلبي دايما منهم مساعده حتى لو كنتى مش محتاجالها ، خليهم يحسو انك مسئوله منهم وواجبهم ياخدو بالهم منك ، اقعدى معاهم فكل فرصه تسمحلك بده ، اتكلمى معاهم حتى لو مردوش عليكى مره هيردو المره التانيه ...صدقينى وحده وحده هتبقى جزء من يومهم ميقدروش يستغنو عنه ..افرضى حبك على حبايبك .
سميه :امممم استخدم نفس سياستك يعنى .
غريب :صدقينى بتجيب مفعول .
سميه :واكبر مفعول انتا هتقولى ، بصتله واتنهدت واخدت وشه بين ايديها :هتوحشنى ياغريبي .
غريب :وانتى كمان هتوحشينى اوى ..بس انا هكون معاكى كل يوم بالتليفون واطمن على صحتك اول باول .
غريب بعد ساعه تقريبا ساب سميه فالجنينه ودخل وهو ملهوف يعرف عمته جميله كلمت ليل ولا لسه ورأي ليل ايه .
***********
اما جميله فطلعت لليل .ليل عايزه منك خدمه .
ليل :اؤمرى ياخاله
جميله :غريب نفسيته تعبانه ومحتاج يقعد لوحده فشقته كام يوم وانا مش هينفع اسيب الفيلا واروح معاه اخد بالى منه فعايزه منك تروحى انتى معاه بدالى تاخدى بالك منه الكام يوم دول .
ليل :وه ياخاله جميله !عايزانى اقعد مع راجل لحالى فشقه مقفوله علينا ؟ ديه عيب وحرام وميصوحش دى الناس تاكل وشى !
جميله :ياليل الناس هنا غير ناس البلد، هنا الناس كل واحد فحاله محدش له دعوه بحياة حد ..
ليل :سيبك من الناس انى كيف هقعد معاه فشقه لحالنا انى وهو وبس!
وهنا كان الدور على غريب فالرد اللى كان وصل قدام باب الاوضه وسمع كلامهم وفتح الباب بعد ماخبط .
غريب :على فكره بقا ياليل مسألة انك ازاى تقعدى مع راجل لوحدكم دى اظن مسأله المفروض انها متمثلش اى قلق بالنسبالك اصلا... اولا عشان الراجل دا مبيشوفش فأظن انك هتكونى فأمان تام منه وكمان مش هيبقى فيه منى اى نظره ليكى تخلى وجودك معايا عيب او حرام .
ليل :انى مقصدتش والله ياسى غريب انى كان قصدى ..
غريب قاطعها بضحكه خفيفه :الا لو كنتى خايفه عليا انا منك فدى معاكى حق فيها واظن المفروض انا اللى اخاف وانا لاحول لى ولا قوه .
ليل ابتسمت على كلامه وجميله ضحكت ...خلاص بقا ياليل روحى معاه واثبتيله حسن نواياكى .. وحتى كمان عشان تبعديلك يومين من هنا انتى كمان وانتى فاهمه قصدى .
ليل هزت دماغها بموافقه وفكرت فانها لو سابت الفيلا وخرجت دورت على شغل بره وحد زى غريب وفى ظروفه طلب منها تشتغل عنده وتراعيه اكيد مش هترفض ..واى وحده مكانها مش هترفض ..فيبقى ليه لأ ..هتعتبر نفسها خدامه عنده بلقمتها وخلاص ..
وبصت لغريب وهى بتتخيل انها هتفضل معاه طول الوقت وتقدر تبصله براحتها من غير خوف ان حد يشوفها ولا هتجاهد وهى بتخبى ابتسامتها اللى بتترسم على شفايفها تلقائى وهى بتتأمل ابتسامته ..
جميله :يلا كملى لم حاجتك دى وخدى كله هتحتاجى كل حاجه هناك يلاعشان اوصلكم على المغرب وبالمره اوصل ماهر لشقته الاول واشتريلكم خزين للشقه ...
ليل بلهفه :طيب ومشوار جواهر ؟
جميله :متخافيش هعدى عليكى بكره ونروحلها .
غريب :وانا كمان هروح معاكم عشان قاسم كلمنى وقالى جايلك اروحله انا وخلاص واوفر عليه المشوار طول ماكده كده رايحين ..
جميله :تمام اتفقنا .
غريب :عايزك تشترى هديتين غاليين على زوقك ياعمتو هديه لقاسم وهديه لجواهر عشان نقدمهملهم بكره .
جميله :متقلقش انا عامله حسابى وعامله زياره محترمه ..
غريب بإصرار :معلش بس هديتى ملهاش دعوه بزيارتك ..خدى فلوس من الدولاب بتاعى واشترى حاجه قيمه .
جميله عشان متزعلهوش :حاضر ياغريب ، يلا تعالا معايا عشان اشوف هحطلك ايه فشنطتك تاخده معاك الشقه .
غريب :متتعبيش نفسك كل حاجتى هناك اصلا انا هنا معنديش غير حاجات قليله استبن يعنى .
جميله :خلاص زى بعضو ..اسيبكم انا وانزل اشوف ماهر .
غريب هو كمان خرج راح لاوضته وساب ليل تكمل لم حاجتها ..
باب اوضته خبط ...غريب :ادخل .
نادر :ايه اللى سمعته دا صحيح رايح الشقه !
غريب :ايوه
نادر :ليه ؟ ...غريب :اعصابى تعبانه ومحتاج اريحها شويه .
تادر :هروح معاك
غريب بسرعه :لأ ...خليك هنا يمكن بابا وماما وعمتو يحتاجو حاجه ، ايه هتشبط !وبعدين متنساش انتا محتاج تفضل قريب من بابا عشان الشركه والشغل ويكون معاك اول بأول ..
نادر عدل هدومه بثقه :لا منا خلاص مبقتش بحتاج رأى بابا فحاجه والشركه بقيت ممشيها زى الساعه ودخلت فأكبر مشروع فتاريخ الشركه اشتريت حتتة ارض كبيره جدا وهعملها قريه سياحيه وابيعها ومكسبها هينقل الشركه نقله كبيره ودى هتكون اكبر مفاجأه لبابا تفرحه وتبسطه ويعرف ان ابنه بقا اكبر بزنس مان فالشرق الاوسط ودول الخليج .
غريب :اشتريت وعملت وقررت من غير ماترجع لبابا؟!
نادر :انتا مش بتفهم بقولك عاملهاله مفاجأه افرحه بيا لو قلتله تبقا مفاجأه ازاى يااذكى اخواتك انتا !
غريب :عموما ربنا معاك ويوفقك ..بقولك بكره رايحين لقاسم شقته نباركله ، معانا ؟
نادر :هو الواطى رجع من شرم !وميقوليش ؟ طيب ياقاسم ان ماوريتك ..معاكم طبعا وقبلكم كمان .
غريب :ابقا اشترى هديه تبيض وش بنت عمتك قدام جوزها تاخدهالها معاك وانتا رايح مش تدخل ايد ورا وايد قدام كده .
نادر :متقلقش اخوك صاحب واجب وبيفهم فالاصول ..احلى اتنين كيلو يستافندى فيكى يامصر بكره هاخدهم معايا .
غريب :قوم يانادر من قدامى مش ناقصك قوم ...
نادر وغريب سمعو صوت رجلين حد بتقرب من الاوضه بخطوات بطيئه ووقفت بره الاوضه ..
نادر :مين اللى بره ؟
جالهم صوت ناديه بترد بتردد :انا ناديه ..
نادر بص لغريب اللى دور وشه الناحيه التانيه ورد عليها ...تعالى ياناديه ادخلى ..
ناديه دخلت ووقفت قدام غريب واتكلمت وهى مبرطمه شفايفها:انتا صحيح هتمشى وتروح الشقه ياغريبوو ؟
غريب رد ببرود :ايوه فيه حاجه ؟
ناديه :وصحيح هتاخد اللى اسمها ليل دى معاك !
غريب اتنهد ومسح على وشه بضيق :ايوه فيه اعتراض من حضرتك ياست ناديه هانم ؟
ناديه :ياغريبو انتا ليه بتعمل كده !والله ليل دى متستاهلش كل اللى بتعمله معايا دا عشانها ..دانتا هتسيب البيت كله وتمشى وتسيبنى بسببها
غريب :بسببها اللى هو ازاى يعنى مش فاهم ؟
ناديه :اكيد هى اللى طلبت منك ده ، مهى طبعا ملهاش ملجأ تروحله غير هنا واستغلت طيبة قلبك وحاولت تأثر عليك عشان متسيبهاش واهى نجحت واثرت فعلا ..
غريب :نادر خد اختك وخد الباب فأيدك واتفضل عايز انام شويه مصدع ...واه ياريت تقول لعمتى تبعتلى طبق فاكهه عشان متغدتش كويس نفسى اتسدت على الغدا ودلوقتى جوعت ...
نادر قام ومسك ناديه من ايدها وبيشدها لبره وهى مبرطمه ودموعها نزلت :غريبو متمشيش ، غريبو متسبنيش وتمشى مع ليل ، غريبو ليل مش بتحبك اد منا بحبك ، اصلا مفيش حد بيحبك زيي ..وهمست لاخر مره قبل مانادر يخرجها ويقفل الباب ..غريبووووو.
*************
قبل المغرب بساعه غريب وليل وماهر وجميله كانو جاهزين عشان يمشو وغريب سلم على سميه وودعها ومشيو للعربيه وقبل مايركب سمع صوت ناديه ..
غريبو مش هتسلم عليا !
غريب من غير مايلف :مع السلامه ياناديه وخلى بالك من نفسك، ويارب تراجعى نفسك وتعقلى ،وتشيلى طبع اذية الناس دا من جواكى لانى بجد بكره صاحبه اوى، متوصلنيش للنقطه دى معاكى وانتى عارفه انتى ايه بالنسبالى ..
انتى بنتى مش اختى فالمفروض لما احذرك من حاجه وانبهك ليها تبطليها فورا ومن غير تفكير ...مع السلامه واتمنى لما اشوفك المره الجايه تكونى اتغيرتى
وسابها وركب العربيه واتحركو وهى دموعها نزلت وهى شايفه ليل اخدت غريبو منها ومشيت بيه او هو دا تفكيرها .
جميله وصلت غريب وليل الاول بعد ما اتسوقت للشقة كل حاجه وادتها لليل والبواب طلع الحاجه معاها وسابتهم وبعدها وصلت ماهر لشقته ودخلت نضفتها على السريع وبعتت البواب جابله اكل وشوية حجات وسابتهمله وروحت مع طه للفيلا ...
************
ماهر دخل ووقف قدام صورة اميره ومسح على ملامحها وبصلها بعيون مكسوره :اكيد زعلانه منى صح ؟ اكيد بتقولى انى السبب وانى محافظتش على ابنك وحميته ..والله انا كنت محافظ عليه بعمرى كله بس القاصد غالب ياحبيبتى ؟
عارفك زعلانه منى عشان بتكلم مع وحده غيرك بس صدقينى عمر مأى وحده تانيه هتقدر تاخد مكانك فقلبى ، انا بفضفض معاها شويه لما الدنيا بتضيق بيا ، لكن قلبي محدش هياخد مكانك فيه لغاية مااموت واجيلك قريب بأذن الله ، هطلبك من ربنا تكونى مراتى للابد ونعيش اللى مقدرناش نعيشه على الدنيا ...
راح قعد على الكنبه قصاد صورتها واتمدد وغفى وهو باصص لصورتها وبيتمعن فملامحها اللى اكتشف انها واحشاه حد الجنون ..
ماهر :انتى بتعملى ايه ياأميره بتغمى عنيا ليه؟ كده مش هعرف امشى والطريق كله حفر ومطبات ..
اميره :متقلقش انا همسك ايدك وهبعدك عن كل حفره بس امشى معايا ومتخافش ..
ماهر مشى وهو ماسك ايد اميره وفعلا كانت بتبعده عن كل حفره ومشيت بيه شويه وبعدها سابت ايده وايد تانيه مسكتها ...
ماهر شال الربطه من على عنيه وبص لقى موده هى اللى ماسكه ايده بصلها بأستغراب وبص لأميره اللى بتبعد عنهم وبترجع لورا ..
ماهر :أميره انتى رايحه فين وسبتى ايدى ليه ؟
اميره :خلاص انا اخرى لحد هنا ، موده هتمسك ايدك وتكمل الطريق ، الطريق لسه طويل وانا تعبت ومش هقدر اكمل ومتخفش هى برضو هتقدر توصلك .
بصيت لأميره لقيتها بتختفى شويه بشويه لغاية مااختفت خالص ورجعت بصيت لايدى اللى فايد موده وبصتلها لقتها بتبصلى بفرحه وسعاده ومدت ايدها رجعت الربطه على عنيا وسحبتنى من ايدى وفضلت تمشى بيا الطريق وتخلينى اتفادى الحفر وفضلنا ماشيين لحد ماوقفت وشالت ايدها من ايدى واحطت فأيدى حجرين صغيرين بيض شكلهم بيلمع و كل واحد احلى من التانى
ماهر :ايه دول ؟
موده :دول بتوعك ادتهمنى اميره وطلبت منى اديهملك وبتقولك حافظ عليهم دول غاليين اوى ...
فضلت اتأملهم باعجاب ومش عاوز اشيل عينى من عليهم من حلاوتهم
ماهر :فتحت عينى من الحلم الغريب دا وعينى جت على صورة أميره، اللى اتحولت ملامحها للحظات لملامح موده ودى حاجه جننتنى، ولمت نفسى على تفكيرى فموده اللى وصلنى انى اشوف ملامحها حتى فملامح حبيبتى ، تليفونى اعلن فاللحظه دى عن وصول رساله وطلعته لقيتها من موده ودى آخر حاجه كنت محتاجها تحصل دلوقتى بعد البرجله اللى انا فيها دى وبعد
الحلم العجيب دا ومع احساسى بالذنب قدام اميره .
مردتش على موده ولا فتحت رسالتها وقفلت التليفون خالص ورميته جمبى بأهمال وقمت دخلت الاوضه وطلعت هدوم أميره واخدتها فحضنى وفضلت اشم فيهم عشان اشم ريحتها لكن معرفش ليه المرادى الريحه اختفت منهم تماما! ...
ياترى من زمان ريحتها اختفت من الهدوم وانا اللى كنت بتخيلها وبتخيل نفسى لسه شاممها بعد السنين دى كلها ، ولا من زعلها منى حتى ريحتها اللى فهدومها خلتها اختفت ؟!
فالاخر حضنت الهدوم ونمت للصبح من غير عشا ولا حتى غيرت هدومى اللى جيت بيهم من الفيلا والغريبه انى حلمت نفس الحلم مره تانيه بكل تفاصيله والمرادى صحيت قبل اذان الفجر بدقايق ..يعنى كان رؤيه مش مجرد حلم بس ياترى تفسيره ايه !
صحيت وانا دماغى هتتفرتك وحاسس بخنقه رحت الحمام اخدت حمام دافى ورحت على التليفون فتحته وشفت رسالة موده اللى بتقول فيها ...
سمعت الخبر البقيه فحياتك ..قلبي عندك عامل ايه دلوقتى ، ربنا يصبرك .
رديت عليها بكلمه وحده بس :
محتاجلك .
وبعدها سبت التليفون وصليت الفجر اللى اذن واستنيت شويه سمعت صوت رسايل كتير ورا بعض وعرفت انها هى اصل محدش هيكلمنى فالوقت دا غيرها ..
*************
غريب وليل فضلو لوحدهم فالشقه بعد ماجميله مشيت وليل لقت الشقه محتاجه تنضيف ودخلت علطول لبست هدوم مريحه وابتدت تنفض وتنضف ..
غريب :ليل متتعبيش نفسك مره وحده، النهارده اعملى الاوض اللى هننام فيها وبكره ابقى كملى الدنيا مش هتطير .
ليل :انى موراييش حاجه ياسى غريب وادينى عتسلى والخدمه بالصحه حلوه .
غريب :ربنا يديم عليكى نعمة الصحه ياليل .
ليل :انى وانتا يارب ..هتدخل فأوضتك انى نضفتها وبقت فله .
غريب :لأ هفضل هنا جمبك لو مكانش دا يدايقك يعنى .
ليل :له ويدايقنى ليه ، انى كان غرضى تفرد جسمك و ترتاحلك شويه .
غريب :لا انا مرتاح هنا .
ليل لنفسها :مانى مش هخلص فسنتى وانتا قبال منى اكده ومحكماش على عينى متروحش عليك كل هبابه وياريتها عتشبع من شوفتك ...ااااخ ياليل بطلى تبصى فالعالى هتوقعى على جدور رقابتك ورقبتك وقلبك وكل حاجه هتتكسر فيكى فالاخر وتتدشدش على الف حته ياحزينه..
كملت ليل شغلها بالعافيه والحاجه اللى تخلص فنص ساعه خلصتها فساعه وهى بتدعى ربها فقلبها ان يعينها ويصبر قلبها على اللى جاى .
غريب :بجد كفايه بقا تعبتى النهارده اوى ياليل .
ليل :ياسى غريب وهو شغل البيوت اهنه ياجى ايه جار شغل بيوتنا فالخلا !
غريب ابتسم ابتسامه واسعه .
ليل :وه عتضحك على ايه ممصدقنيش ياك ؟ طب دا العجين لحاله كل صبح هدت حيل ، ولا نقيل العيش وقليبه وعديله ، ولا حمية فرن الطين يااابويا الوحده لما تخلص بتتشاهد والله، وخصوصا فالصيف فعز الحر والدنيا توبقى موجره والوحده تبقا حاضنه الفرن واللهب يكب فوشها ...
الله يرحمك يام ليل عاشت طول عمرها وسط الفرون تخبز للبلد كلها لايوم اشتكت ولا قالت تعبت ....
ولا لا مؤاخزه الغنم وتنضيف مكانه ربنا يكرم اصلك يابيه دا مرار طافح تانى ..واتكلمت بنبره هاديه ..بس كل ديه بيبقى زى العسل على قلب الوحده مننا لما تعمله لحبايبها .
غريب بنفس الابتسامه رد عليها :كلامك حلو اوى ياليل ، بيدخل القلب كده واللهجه الصعيدى طالعه من بوقك تجنن .
ليل ابتسمت بخجل :ربنا يجبر بخاطرك ياسى غريب دا بس عشان انتا طيب ونفسك حلوه شايف كل حاجه حلوه ..
غريب :طيب مجوعتيش انا عصافير بطنى بتتخانق من الجوع .
ليل :يقطعنى الوكت خدنى واتلهيت فالبيت ونسيتك خالص ..حالا هعملك احلى عشا .
دخلت ليل حضرت العشا لغريب وطلب منها تقعد تاكل و تأكله ، مع انه بياكل لوحده كويس اوى بس الاكل من ايد ليل متعه تانيه مستحيل غريب يفوتها ..
غريب :تسلم ايدك ياليل بجد الاكل تحفه .
ليل :بالهنا والشفا ياسى غريب موطرح مايسرى يمرى اعملك شاى تحبس ؟
غريب :لأ مبشربش شاى بالليل وروحى انتى خديلك شاور دافى وادخلى نامى تعبتى النهارده اوى..
ليل شالت الصينيه واتحركت بيها بخطوات هاديه ودخلتها المطبخ، وبعدها غريب قام دخل اوضته عشان يديها مساحه اكبر من الحريه خاف انه برغم انه مبيشوفش يكون برضو وجوده مدايقها ومقيد حركتها ..
غريب حط دماغه على المخده ونام مبتسم ومرتاح وحاسس ان بكره هيكون احلى لما يصحى على صوت ليل .
************
تانى يوم الصبح جميله صحيت بنشاط وفرحه هتروح تزور بنتها النهارده ..
حضرت كل حاجه هتاخدهالها معاها من بدرى وفضلت مستنيه على نار لحد الساعه ماجات عشره واخدت نادر وراحو عشان ياخدو فطريقهم ليل وغريب ويروحو لجواهر
وفطريقها اخدت ساعه وعلبة بارفان غاليين اوى لقاسم واخدت اسوره دهب غاليه وحلوه لجواهر وغلفت كل هديه لوحدها ونادر اخد لجواهر سلسله دهب ناعمه وجميله وخاتم رجالى فضه بحجر كريم لقاسم .
اول مانادر كلم غريب نزلو هو وليل علطول كأنهم كانو مستنيين بفارغ الصبر هما كمان زى جميله وركبو العربيه ليل جمب جميله وغريب قدام جمب نادر بعد ماصبحو وسلمو وانطلقو على جواهر وقاسم ..
جميله :فطرتو ؟
غريب :اسكتى ياعمتو دى ليل عملتلى النهارده شوية فول وبيض اوملت روعه اكلت اكل لما مش قادر آخد نفسى ..
جميله :بالهنا والشفا ياحبيبي ، انا مطمنه عليك طول ماليل معاك ومتأكده مش هتنقصك حاجه .
نادر :بس على فكره قمة الانانيه انك تاخد ليل مننا وتنفرد بطبيخها واكلها لوحدك وانا شايف ان من العدل انى اجى اتغدا واتعشا معاكم كل يوم .
غريب :لأ عمتو جميله بتعمل اكل حلو برضو انتا خد عمتو وانا اخدت ليل خالصين خلاص ..
نادر :زنقتنى انتا كده ها ..زنقة معلم والله ...بس لعلمك برضو هبرطش وقت ماحب وغصب عنك ..
غريب :بارد عارفك ...
نادر :فالاكل ونفس ليل انا لوح تلج مش بارد وبس ..
غريب:طب بص قدامك يالوح احسن نلبس فاللى قدامنا ونموت بسبب الطفاسه ...
جميله :خد ياغريب دى هديه قاسم ودى هدية جواهر ..
غريب :تسلم ايدك ياعمتو الفلوس اللى ادتهالك كفت ؟
جميله :كفت وزادت ياحبيبي يتردلك يوم فرحك يارب .
غريب :هاتى هدية قاسم اديهالو انا وهدية جواهر اديها لليل تديهالها .
ليل بأحراج :له ياسى غريب هديتك لبت عمتك اديهالها لحالك .
غريب :ليل اسمعى الكلام من غير مناقشه لو سمحتى وياريت متقوليلهاش ان الهديه دى منى انا قوليلها انها منك انتى ..
ليل :ويعنى هى هتصدق مهى عارفه انى محلتيش اجيب هدايا .
غريب :معلش اسمعى الكلام بس انتى وملكيش دعوه ..
ليل بصت لجميله اللى ادتلها الهديه واتكت لها على عنيها وليل اخدتها وابتسمت على تصرف غريب اللى هى فهمته كويس وفهمت انه مش عايز يقل منها وهما بيقدمو الهدايا بتاعتهم وهى قاعده وسطهم محرجه حب يرفع راسها قدام الناس ودى حاجه اول مره حد يعملها معاها، واول مره حد يراعى مشاعرها بالطريقه دى ..
بصتله وطولت فنظرتها ليه وهى بتسأل نفسها ازاى واحد زى ده هتقدر تمنع نفسها انها متحبهوش وتتعلق بيه فكل دقيقه وكل ثانيه اكتر من اللى قبلها .
وصلو عند بيت قاسم ونزلو ونزلو الحاجه بمساعدة البواب وطلعو لقاسم وجواهر اللى كانو مستنيينهم وعيلة قاسم كلها كانت فأستقبالهم وسلمو وباركو ..
جواهر فرحت اوى بليل واخدتها واخدت مامتها ودخلو جوا الاوضه بناء على طلب ماجده اللى قالت ربما يعوزو يحكو كلمه مابينهم ولا حاجه
وغريب ونادر قعدو مع قاسم وعبد السلام ، وماجده وموده دخلو المطبخ يكملو الاكل عشان يغدو اهل جواهر ...
جميله :عامله ايه ياجوجو .
جواهر بابتسامه كدابه :زى الفل ياماما الحمد لله ..
جميله :يارب دايما ياحبيبتى
لكن ليل مكانتش شايفه جواهر زى الفل وبمجرد مابصت فعنيها عرفت ان فيه حاجه عندها .
قعدو شويه وليل عينها على جواهر اللى لاحظت ان ليل شكت فحاجه وبقت تهرب من عنيها ..
ليل بعد شويه :متقومى ياخاله تشوفى ام قاسم واخته بيعملو ايه تساعديهم احسن يقولو علينا قللات زوق ومفيش وحده مدت يدها معانا ساعدتنا وانى معرفهومش قوى وعستحى منهم وبعدين مش اى حد عيحب انى احط ايدى فوكله ولا شربه انتى عارفه ..
جميله :متقوليش كده ياليل دانتى ست البنات كلهم ...وعلى رأيك اقوم اشوفهم عيب احسن الناس يستعجبو فعلا .
بمجرد ماجميله خرجت و قفلت الباب وراها ليل لفت لجواهر وقعدت قصادها ومسكت اديها :فيكى ايه يابت جميله انطوقى واوعاكى تدسى عنى حاجه ادب صوابعى فعنيكى اطلع بيهم ..
جواهر بعد لحظات سكوت ..
انا لسه فرجن ياليل قاسم مدخلش عليا ...
ليل خبطت على صدرها :نهار اسوخ..
واللى يشوفه يوم الفرح كانش ناقص غير ياخدك ورا الفيلا ولا فأى خرابه من كتر ماكان مستعجل ومش صابر !
يطلع فالاخر ريش على مفيش ؟!
ياخسارة الرجاله ..
جواهر :لا هو زى الفل العيب فيا انا ياليل ، انا مش مخلياه يعمل حاجه .
ليل :ليه ياحظى امال متجوزاه تبصى عليه ويبص عليكى من بعيد لبعيد ولا ايه ؟ مالك يافقريه اتعملك عمل ولا ايه ؟
جواهر :ياليل عمل ايه بس ...انا تعبانه والموضوع دا مأثر عليا فعلا ومهما حاولت ادوس على نفسي واسلمه نفسي مبقدرش .
ليل :طب وديه من ايه ؟!
جواهر بصت على الباب بخوف ورجعت بصت لليل وفمحاوله ناجحه منها انها تستجمع كل شجاعتها المرادى وتحكى لليل.. نجحت المرادى وحكت كل حاجه لاقرب وحده ليها فالدنيا مهى مبقتش قادره تكتم فقلبها اكتر من كده ومحتاجه مساعده ومش عارفه تطلبها من مين .
ليل بعد ماجواهر كملت كلامها ووصلت لحد يوم حادثة محروس ابتدت تربط خوف جواهر من محروس ومحاولاتها الدايمه انها تبعدها عن بيتهم وعن حياتها وخوفها عليها منه ووقفت وغضب الدنيا اترسم على وشها وحست ان قلبها هينفجر من كتر قهرته على جواهر ومسكت جواهر من دراعاتها قومتها وبتهز فيها بعنف وبتكلمها من بين سنانها ..
ومتكلمتيش ليه ؟ مقولتيش لامك ليه ؟ محكتيليش انى ليه وانى وانتى كنا روح وحده وكتها .
مش محروس اللى دمرك ياجواهر انتى اللى دمرتى نفسك بسكوتك وجبنك واستسلامك ..
جواهر :كنت عيله وضعيفه وخوافه .
ليل :طب ولما كبرتى مقولتيش لامك ليه مدورتيش على مساعده لحالتك ليه ؟
جواهر :كنت فاكره انى تخطيت كل اللى حصلى ومحبتش اخلى امى تعيش باقى عمرها بأحساس الندم على حاجه ملهاش ذنب فيها ، كل ذنبها انها اتعاملت مع اللى حواليها بالمنطق والعادى ، عاملتهم معاملة البشر وهما حتى الوحوش متعملش عمايلهم ، خفت على امى تتدمر ياليل
ليل اتنهدت واخدت جواهر فحضنها بعد ماحست انها خلاص هتنهار وتقع من طولها :ربنا يجحمك يامحروس يابعيد ، بس ارجع واقول لو اتحدتى ياجواهر مكنتيش وصلتى لاكده .
جواهر رفعت دماغها من حضن ليل وبصتلها بعيون زايغه مليانه دموع :ياليل ماينفعش نحكم على غلطات الماضى بوعى النهارده ..انتى جايز كان عندك الادراك الكافى انك تعرفى تتصرفى لو كنتى فمكان ى بس انا لا ...انا دلوقتى حكيتلك وعايزاكى تشوفى معايا حل .
ليل :الحل الوحيد اللى فيدى دلوك انى اخبطك على نفوخك اوقعك قتيله على النار اللى شبت فضلوعى دى من اللى حكيتيهولى
لقراءة باقي الفصول الجزء الثاني من هنا
لقراءة الجزء الاول جميع الفصول كاملة من هنا