رواية فرعون الجزء الثاني2
الفصل الثانى والعشرون
بقلم ريناد يوسف
جواهر وقاسم ركبو العربيه وفطريقهم لمصر وقاسم ملامحه متتفسرش من الغضب بسبب ابو جواهر واللى قاله لجواهر وليه ،
اما جواهر فبلعكس ابتسمت ومدت ايدها اخدت علبة عصير وشربتها وبعدها فتحت الاكل وابتدت تاكل بشراهه قاسم اول مره يشوفها تاكل بيها، كأنها ليها سنين مأكلتش ، والغريبه انها كل ماتفتكر منظر محروس ابتسامتها تكبر وشهيتها تزيد وقاسم وشه ابتسم لا اراديا على ابتسامتها اللى بددت غضبه لراحه ونارقلبه لبرد وسلام .
خلصت اكل وبرضو لسه ابتسامتها الجميله منوره وشها وفرحانه عشان حقها اللى رجعلها اخيرا، وكمان محروس اللى مات مفضوح والكل هيعرف عمايله القذره ...
لكن ابتسامتها اختفت لما فكرت فالبنت الصغيره والعار اللى هيطولها لما الناس هتعرف ابوها عمل معاها ايه ...اكيد مجتمعنا الظالم مش هيسيبها من غير مايوصمها بالعار حتى وان كانت ضحيه ..
جواهر رجعت لتكشيرتها من تانى ووشها اتعقد ...ثوانى و رجعت افتكرت منظر محروس وابتسمت مره تانيه ..
قاسم مراقب تغيرات وشها وعض على شفته التحتانيه وهو بيكلم نفسه بأسى..مره تعيطى ومره تضحكى ومره تكشرى ومره تبتسمى مجنونه وجننتينى معاكى وعندك فصام مفيش فيه كلام ..ياحظك الاسود ياقاسم يبن ماجده .
وصلو مصر اخيرا وجواهر لاحظت ان قاسم رايح بيها على شقتهم ..
جواهر :قاسم انتا رايح فين ؟
قاسم :فين ازاى !على بيتنا طبعا .
جواهر :لأ رجعنى عند غريب وليل لو سمحت .
قاسم :خلاص ياجواهر بقا انسى كل حاجه حصلت وتعالى نبدأ من اول وجديد ...حياتنا باظت وعايزين نلحق نصلحها قبل ماتبوظ اكتر .
جواهر :قاسم ارجوك رجعنى ...انا على فكره لسه مجروحه منك اوى ..ايوه بحبك مش هنكر دا ولسه بحبك بنفس الدرجه لكنك ارتبطت عندى باللى عملته ..صورتك مش بتيجى فخيالى الا بمنظرك وانتا بتهجم عليا وبتقطع فجسمى بمنتهى الوحشيه ...نسخة محروس اللى شفتها فيك مش راضيه تروح من بالى .
قاسم :ادينى فرصه انى اغير الصوره دى طيب ..اسمحيلى انى اوريكى معامله تانيه تنسيكى الوحشيه اللى شوفتيها منى دى فلحظة غباء هفضل ندمان عليها طول عمرى، وتاكدى انك حتى لوانتى سامحتينى عليها انا والله عمرى مهنسى ولا هسامح نفسى ..
جواهر انا كل يوم بلوم نفسى الف مره واسألها انا ازاى عملت فيكى كده ...اوعى تفتكرى ان عذابى يقل عن عذابك ...وصدقينى انا اتصدمت فنفسى اكتر مانتى اتصدمتى فيا .
جواهر :معلش الايام لوحدها كفيله انها تخفف صدمتنا احنا الاتنين وتنسينا عذابنا ..رجعنى ياقاسم
قاسم :مصممه ؟
جواهر هزت دماغها بإصرار وقاسم اتنهد ولف العربيه ورجع جواهر عند غريب وليل وطلعت لكنه مرضيش يطلع معاها وراح على مكتبه .
جواهر رنت الجرس ولحظات واتفتح الباب وكانت ليل فوشها ..
ليل بلهفه وغضب :يعنى انتى صاحيه ولا مخبله قوليلى ...فيه وحده تنزل وتسيب محمولها فالبيت ؟ يعنى هما مخترعينه ليه واد المحروق ديه!
جواهر :نسيته والله ياليل ...انا مكنش فيا دماغ لحاجه اصلا ...ليل اخدتها فحضنها .. موتت من الخوف عليكى يابت الايه ..
غريب وصل عندهم واتكلم بلهفه وقلق:طيب دى معلهاش عتب ونعذر حالتها ...انما الحمار اللى معاها مكانش بيرد على تليفونه ليه ؟ وهو فين اصلا مش سامع صوته ...قاسم انتا فين ...
جواهر : قاسم مش معايا وبعدين هو اكيد كان عامل تلفونه صامت لاننا والله طول الطريق مسمعنا ولا رنه .
غريب :طيب هو فين ؟ مجاش معاكى ليه ؟
جواهر :نزلنى وراح لشغله
غريب :طب ادخلى ادخلى بقيتى تسدديله ..هاه عملتو ايه ؟
جواهر ردت بسعاده واضحه فصوتها وهى بتتمشى لجوا وهما وراها
:محروس مات خلاص وخلصت منه .
ليل ضربت على صدرها بخضه :موته قاسم وودى روحه فداهيه برضك ..
غريب بصدمه :برضو عمل اللى فدماغه المعفنه وموته ...اه يااغبى الاغبياء ياقاسم ..قولتلك بالقانون ياحمار .
جواهر :لا قاسم معملهوش حاجه ..اقعدو بس وانا هحكيلكم كل حاجه ...
قعد غريب وليل وابتدت جواهر تحكيلهم وهما فرحو للمصير اللى لقاه محروس لكنهم زعلو على البنت الصغيره وامها جدا .
ليل :يابووى يعنى حسنيه راحت فداهيه على اكده؟
جواهر :لأ الظابط اللى ماسك القضيه طمنا وقاسم اخد رقمه وهيتواصل معاه ومش هيسيبها هو قال كده .
ليل :عامل زى الكلب المسعور معاتقش حد الا وغارز نيابه فجسمه ،حتى بته ماسلمتش منيه ياولداه ..
غريب :المفروض اللى زى دا يتعدم فميدان عام عشان يكون عبره لمن لا يعتبر ..
جواهر :طب عن اذنكم انا هدخل اريح شويه عشان المشوار صعب اوى صد رد بصراحه ومنمتش طول الليل ..
قامت ودخلت وغريب لف على ناحية جواهر :هى مرجعتش مع جوزها شقتهم ليه ؟
ليل :معرفاشى والله ..الا انتا عاوز تمشيها بفارغ الصبر اكده ليه ..اما اقوم اسألها عليه راح فين وارغى معاها شويه قبل ماتنعس ..
غريب :وتسألنى قال انتا عاوز تمشيها ليه ..روحى ياليل ..روحى عند جواهر اجرى ..ومد ايده زقها من جمبه ومسك عصايته وقام راح على اوضته وهو بيبرطم مع نفسه وليل بتضحك فسرها عليه وهى متابعاه لغاية مادخل وقفل الباب ، قامت هى وراه وراحت اوضتها هى وجواهر .
فضلت تتكلم مع جواهر شويه لغاية ماجواهر نامت وهى بتتكلم معاها من التعب ، وهى كمان عنيها هتغفى وخصوصا انها طول الليل امبارح منامتش وابتسمت وهى بتفتكر اللى حصل .
فلااااش باااك
ليل فأوضتها ومولعه النور كالعاده لما بتكون نايمه لوحدها من غير جواهر او حد معاها فالاوضه بسبب رعبها من الضلمه وفجأه نور الشقه كله قطع وبقت الدنيا ضلمه كحل ..
ليل طلعت منها صرخه بخوف ومفيش ثوانى وسمعت غريب خرج من اوضته وجايلها يتخبط فكل حاجه قدامه من خوفه عليها وسرعته لما سمع صرختها اللى وقعت قلبه
غريب :ليل مالك ..ليل صرختى ليه .. ليل انتى فين ..ليل ردى عليا فيكى ايه ..
ليل بصت على مصدر صوت غريب :ادينى ياسى غريب اهنه .
قرب غريب منها ومادد اديه الاتنين يدور عليها لغاية ماخبطو فيها شدها من غير وعى ولا ادراك لحضنه بخوف وهى تبتت فيه من شدة الرعب اللى حاسه بيه ..
غريب سامع صوت انفاسها العاليه المرعوبه :مالك ياليل حصلك ايه ..
ليل :النور قطع ..
غريب مستنى ليل تكمل ..هاه وبعدين .
ليل :بعدين ايه عقولك النور قطع ..
غريب :ايوه منا واخد بالى ..وبعد مالنور قطع حصلك ايه خلاكى صرختى كده ..شفتى حاجه ، اتهيأتلك حاجه مثلا ..سمعتى صوت حاجه وقعت ؟
ليل :له ولا حاجه بس انى عخاف من الضلمه قوى .
غريب :ياشيخه وقعتى قلبي والله العظيم ..
غريب هنا جسمه انتفض بعد ماوعى على نفسه لانه كل دا ومش مدرك ان ليل فحضنه ..ولما انتبه حبس انفاسه وهو حاسس بكهربا بتسري فكل جسمه وايده اللى كانت محاوطه ليل ابتدت تترعش بوضوح خلى ليل هى كمان تنتبه انها فحضن غريب وتبعد بسرعه ..
غريب بتوتر :احمم طيب فين تليفونك .
ليل :على الشاحن بره .
غريب :طيب استنى ثوانى هروح اجيبه وانورلك الكشاف .
ليل مسكت فدراعه ..له متسيبنيش لحالى .
غريب بصوت حنون :متخافيش ياليل انا عمرى ماهسيبك وخصوصا وانتى خايفه وفالحاله دى .
خرج يجيب التليفون لكن ليل مسابتهوش وفضلت متبته فدراعه وخرجت معاه ...بس المرادى مش هى اللى كانت بتوريه الطريق هو اللى كان بيدلها ..
غريب :حاسبى هنا الطربيزه ..حاسبى هنا الكنبه ويبعدها ..الفيشه اللى فيها الشاحن على بعد خطوتين ...ووصل الشاحن واخد التليفون واداه لليل تفتحه عشان هو تليفونه كل حاجه بيشغلها بالصوت .
جواهر فتحت الكشاف وغريب قعد على الكنبه وقعدها جمبه ..اقعدى هقعد معاكى لغاية مالنور ييجى .
ليل :بس انتا كنت مصدع وعاوز تنام، خش نام انتا وانى نور الكشاف نورلى البيت شويه اهو ..وبصت حواليها على اركان الشقه المضلمه بخوف وبلعت ريقها !
غريب ابتسم على رعبها من الضلمه الواضح جدا ومحاولاتها فالتظاهر بعدم الخوف ..لأ ياليل خلاص الصداع راح وهقعد معاكى مش هسيبك لغاية مالنور يرجع ..
اتنهدت ليل بأرتياح لانها قالتله يدخل ينام وكل ذره فيها بتقول يارب مايسيبنى ..
فضل غريب قاعد جمب ليل وهما مستنيين النور وكل شويه ليل تتصل على جواهر جرس ومتردش وترجع تتصل بقاسم برضو جرس وميردش والقلق عليهم هما الاتنين اكل قلبها وقلب غريب اكل ..
غريب النوم كبس عليه بس فضل يقاوم وهو قاعد جمب ليل اللى وهى باصاله افتكرت نفس الموقف بتاع قطعة الكهربا دا لكنه حصل معاها وهى مع مؤمن ..
ليل بعد مامؤمن اتجوز وامها ماتت بقت تبيت فأوضتها لوحدها ..ودايما كانت الكهربا بتقطع بس هى كانت مخليه فالاوضه شمع فكل مكان وكبريت ولمبة جاز بحيث لو النور قطع تنور الاوضه بسرعه ..
فيوم النور قطع ومدت ايدها تدور على شموعها ولا الكبريت ملقتش ..لفت فالاوضه زى المجنونه من الرعب لكنها برضو ملقتش حاجه ..حتى اللمبه اتحسست مكانها ملقتهاش .
خرجت بمنتهى الخوف وبسرعه راحت خبطت على اوضة مؤمن ..
مؤمن :ايوه يابومه مالك عترزعى فالباب اكده فنصاص الليالى ليه ..
قام وفتح الباب وبدريه مراته واقفه وراه ..
مؤمن :مالك ؟
ليل برعشه وبتتلفت حواليها :النور قطع وانى مش لاقيه اى شمعه ولا كبريته ولا حتى اللمبه لاقياها .
مؤمن :ايوه وانى اعملك ايه يعنى ..اولعلك فنفسى دلوقيت عشان الدنيا تنورلك ولا ايه ؟
بدريه :يامؤمن وانتا هيخيل عليك لؤم النسوان ديه ! برضك وحده تخبط على راجل فنص الليل عشان النور قطع وخايفه ؟ تلاقيها مغلوبه وقالت اجيبه يبات حداى ويونسنى شويه بحجة الضلمه ..حريم مقلبه ..
مؤمن :ولا اونسها ولا تونسنى ...روحى اتخمدى ياليل وخلى ليلتك تفوت ..
ليل مسكت دراعه :له يامؤمن ورحمة سند متسيبنى انى عخاف قوى من الضلمه ...طب خلونى اقعد معاكم فالاوضه لغاية لما النور ياجى ..
بدريه :تقعدى معانا فين ياعنيا ؟ فالاوضضضه ..لأ ياحبيبتى عيب ..روحى ياشاطره على اوضتك يلا .
ليل :طيب فين الشمعات بتوعى واللمضه ..قولولى على بكانهم وانى ههملكم وامشى ..
بدريه :واحنا هنعرفوهم منين شمعاتك ولمضاتك دول يختى ...اوعى اكده بطلى عمايلك دى وسيبي الراجل مسكتى فيه زى القراده ..وشدت ايدها من مؤمن ودخلته لجوه وقفلت الباب فوش ليل
ليل قعدت مكانها قدام باب اوضتهم برعب وهى بتتلفت على كل ركن فالبيت برعب والوقت معداش غير لما غمضت عنيها واتخيلت يوم من ايام زمان فيه طاهر وجنه وولدها سند وهما قاعدين حواليها وهى بتلعب مع سند وافتكرت كل احداث اليوم دا وهى مغمضه ومبتسمه لغاية مالنور جه وقامت دخلت اوضتها واتمددت على السرير بتعب واتغطت من البرد اللى دخل فعضمها لان اليوم دا كان فشهر واحد فعز السقعه والبرد .
ليل بصت لغريب اللى ابتدت عنيه تقفل من النوم لكنه كل شويه يهز دماغه ويتكلم مع ليل كلمه يطمنها انه لسه صاحى ..لكن فالاخر النوم اتغلب عليه وسند دماغه على الكنبه لورا ونام .
قربت منه بهدوء وقعدت جمبه وهى بتتأمل فيه بمنتهى الحب ومنتهى الحسره مع بعض ...ابتدت تكلم نفسها وتسألها ...يعنى كان هيجرا ايه لو كنت حلوه .، ولا حتى شكلى كان مقبول ..مش كانت هتبقالى حتى فرصه صغيره معاه ...كان ميزان الكون هيختل يعنى ؟ ولا كانت الدنيا هتخرب لو ليل كانت زى باقى الخلق!
ورجعت بسرعه استغفرت وحمدت ربها على كل حال ،وشويه والنور رجع والشقه كلها نورت لانها لما مبيكونش حد بايت جمبها بتنور كل الانوار وحتى اوضتها نورها بيفضل مولع للصبح ....صحت غريب بحنيه وساعدته يقوم ويرجع اوضته وهو اطمن عليها لما لقى خوفها راح ..
باااااااك
واخيرررا ليل راحت فالنوم جمب جواهر وعلى وشها اجمل ابتسامه وجوا قلبها اغلى امنيه اتمنت من ربنا يحققهالها ..انه ميبعدهاش عن غريبها طول العمر ..مهما كانت الصفه اللى هتبقى معاه بيها .
************
اما نادر فكان مشغول مع مريم واميره واخد موضوع نقلها فجامعة القاهرة ومساعدتها على الاستقرار مهمه قوميه وفرغلها نفسه خالص وهو اللى بيعمل كل خطواتها بفرحه وسعاده ...
بعد مانادر ومريم واميره رجعو من بره سميه طلبت انها تتكلم مع نادر على انفراد ..
نادر :ايوه ياماما حضرتك محتاجه حاجه ؟
سميه :ايوه محتجالك يانادر ...محتاجه تاخد بالك من ناديه شويه ..البنت تصرفاتها مبقتش عاجبانى خالص ...من يوم ماغريب ساب الفيلا ومشى وهو زعلان منها وهى اتحولت ١٨٠ درجه ...ضحكتها اللى كانت علطول ملازمه وشها اختفت ....مبقتش تقعد مع حد خالص ودايما لوحدها ...والتليفون اللى ليل نهار مبينزلش من على ودنها ..
تصور اختك بقت تهرب من باباها هروب وهى خارجه ...وغير كده لما بتخرج مبتقولش لحد ولما حد يسألها تقوله انا سائله التانى !
الحق اختك يانادر واقعد اتكلم معاها البنت فسن خطر وانا مش قريبه منها القرب اللى يسمحلى بالكلام معاها او انها تسمع منى نصيحه .
وكمان بعدت عن جميله عمتها خالص وبقت تعاملها بعدائيه من ساعة ما وقفت قصادها فموضوع خروج ليل من الفيلا.
نادر :متقلقيش انا هتكلم معاها وقريب اوى هاخدها واصالحها هى وغريب على بعض بس يومين كده لغاية مااكون خلصت موضوع كلية اميره .
سميه :ماشى يانادر بس اوعى تنسى ..غريب مكانش ممكن هيسمح باللى ناديه بتعمله دا ابدا .
نادر :ولا انا هسمح بده ..
لكن اللى حصل ان نادر بمجرد خروجه من اوضة امه وشاف اميرته قدامه بتبتسمله نسى كل الكلام ودماغه فضيت من كل حاجه الا اميره وابتسامتها .
**********
مريم وماهر واميره وجميله وحتى سميه قاعدين كلهم فالفيلا تحت وحتى نادر اللى ساب الشركه ومرحلهاش خالص من يومين ومشغول باميره وبس .
مريم :نادر ممكن تودينى بكره لغريب ، هموت واشوفه وبقالى يومين هنا ولسه مشفتهوش لغاية دلوقتى .
جميله :انا هاخدك ونروحله عشان وحشنى انا كمان اوى ..وكمان هخليه ييجى هو وليل يقضو اليوم معانا بكره ونتلم كلنا مع بعض .
سميه ابتسمت وكان نفسها تقولهم خدونى معاكم لغريب اللى هى اكتر وحده هتموت وتشوفه وتاخده فحضنها ..لكنها سكتت عشان عارفه ان محدش بيطيقها ولا حد هيرضى انها تروح معاه .لكنها فرحت لما سمعت جميله بتقول هتجيبه يقضى اليوم معاهم ...واخيرا هتقعد وتتكلم معاه ويتكلم معاها ويفضل يحكيلها حكياته اللى مش بتمل منها ابدا .
جميله :انا هتصل عليه واديله خبر اننا رايحنله .
مريم :متقوليلهوش انى معاكى قوليله انك رايحه لوحدك .
وفعلا جميله اتصلت بغريب وقالتله انها هتروحله وهو فرح بيها جدا ..
غريب :ليل ..ياليل
خرجتله ليل من جمب جواهر .
غريب :عمتو جميله جايه هنا دلوقتى ويمكن تقضى النهار معانا ...فيه اكل ولا ابعت اجيب اكل من بره عشان متتعبيش .
ليل :تعب ايه اللى عتتحدت عليه دا ياسى غريب هو الطبيخ بيتعب ..وبعدين كل حاجه كتيره والخير كتير ..بس الاهم من ديه كله ومن الوكل ، لما خالتى جميله تشوف جواهر حدانه وهى مفكراها مسافره .
غريب :اخ ..راحت عن بالى خالص دى ..طب وايه العمل ، مش هنقدر نخبى جواهر فاوضه لغاية ماعمتى تمشى لانها بتفتح كل اوضه وتبص فكل ركن فالشقه ..
ليل :مفيش غير حل واحد :نكلم قاسم ياجى ياخدها ويطلعو لغاية ماخالتى جميله تمشى ..واهى كانت عتقول انها عاوزه تروح للكليه بتاعتها تعمل تأجيل السنادى عشان مش هتقدر تكمل السنه بحالتها النفسيه الزفت دى .
غريب :فكره هايله واهى فرصه يقربو من بعض يمكن ربنا يهديهم ويرجعو لبعض بقا الا انا زهقت .
ليل ابتسمت على كلامه :طيب هدخل انا اقول لجواهر عشان تلحق تلبس .
غريب :وانا هكلم قاسم ...
وفعلا كلم قاسم اللى ماصدق يلاقى الفرصه اللى هيقضى فيها النهار مع جواهر وجه طاير واخدها ونزلو .
الاول راحو على الكليه عملو تاجيل وطول الوقت بيكلمها وهى كلامها معاه قليل جدا...وبعدين قاسم اخدها على عماره ..
جواهر :انتا مودينى على فين ؟
قاسم :هتعرفى لما نطلع ..تعالى بس ومسك ايدها وطلع بيها الدور التالت ووقف بيها قدام شقه عليها يافطه
انها عيادته طب نفسى لدكتوره معروفه جدا
جواهر بصت لقاسم ورفعت حاجبها ولسه هتتكلم
قاسم :عشانك مش عشانى والله ..انا كل اللى عاوزه وبتمناه انك تخفى وتعيشى حياه طبيعيه والكوابيس تختفى من حياتك خالص ..
جواهر غمضت عنيها واتنهدت ودخلت معاه وهى بتتمنى ان الدكتوره دى تقدر تخلصها فعلا من كوابيسها وترجعها تعيش حياه طبيعيه زى كل الناس .
دخلو وقابلو الدكتوره وسمحت لقاسم يقعد معاهم لما عرفت انه عارف مشكلتها وجواهر قالتلها ان مفيش اسرار عندها مخبياها عليه وانه عارف كل التفاصيل .
الدكتوره عرفت ان جواهر حالتها صعبه واى وحده مكانها كان زمانها منهاره او دخلت فحالة اكتئاب شديده بعد كل اللى مرت بيه لكنها بتملك شخصيه قويه واراده خلتها متماسكه لحد دلوقتى ...
الدكتوره :طب بصو بقا ...بالنسبه للى حصلها من عمها فبموته ورؤيتها ليه وهو قدامها العقده بتاعته اتفكت بنسبة ٩٠ %ومش محتاجه غير خطوات بسيطه بس وتتخلص حتى من ملامحه من خيالها ...
اما الاصعب هنا واللى فعلا هياخد وقت فالعلاج هو اللى عملته معاها انتا ياقاسم ...
تعرف ان صدمتها فيك انتا اكبر واعمق من صدمتها فعمها ...عارف ليه ..لانك كنت بالنسبالها اكبر مصدر امان فالدنيا ، وفجأه المصدر دا اتحول لمصدر خوف وتهديد ..
الثقه لما تتهد صعب جدا تتبنى من اول وجديد ...لكن مش مستحيل ..هتتعب وتستنى وتصبر كتير وهتخلى بالك طويل اوى معاها .
ودلوقتى عاوزه اقعد مع كل واحد فيكم لوحده لو سمحتو .
خرج قاسم وقعدت مع جواهر .
الدكتوره :بصى ياجواهر ..محروس انتهى خلاص ..مباقش على وش الدنيا ..عارفه ايه اللى فاضل منه ..زكرياته اللى جواكى ..اللى مرتبطه بسنين عمرك اللى عيشتيها معاه ...عاوزين نتخلص من السنين دى بكل اللى حصل فيها ..وعشان دا يحصل هنعمل حاجه بسيطه اوى ..
جواهر بصالها باهتمام والدكتوره كملت ....هنجيب بالونات ..ايوه متستغربيش ..بالونات ..هتنفخى كل يوم بالونه ..وتكتبى عليها سنه من عمرك ..تكتبى كل ذكرى وحشه ليكى مع محروس فالسنه دى على البالونه ..وبعدين تطيريها ..وتتخيلى ان السنه دى طارت من عمرك ومبقاش ليها وجود وخدت معاها كل الامها وعذابها ...
وتانى يوم تطيري سنه تانيه من السنين دى على بالونه تانيه ...وهكذا لغاية ماتخلصى كل السنين اللى قضيتيها مع عمك محروس .
وهتفضل بعد كده مشكلة قاسم ...ودى هنحلها ازاى بقا ...خدى بالك فالحته دى.... لاااازم ترجعى تعيشى معاه فبيتكم ، وكل يوم هتسمحيله يقرب منك شويه وتطلبى منه يبعد فورا اول ماتحسى انك فمرحله مش متقبله اللى بيعمله فيها ..وهو هيبعد فورا وانا هفهمه دا ..لغاية ماتحسى انك انتى المتحكمه فالعلاقه بأكملها وانتى المسيطره على قربه وبعده منك ومبقاش يمثلك اى مصدر تهديد بأنه ممكن يعمل حاجه ضد ارادتك او بدون رغبتك ...
مش عاوزاكى تغصبى على نفسك تكملى معاه مهما شفتى حالته... مش عاوزاه يصعب عليكى ولا تشفقى عليه ..عشان لو عملتى كده هتعيشى طول عمرك تديه حقوقه وانتى فاكره ان دا واجب عليكى وبس ومش هتحسى باى متعه ...
عاوزاكى توصلى لمرحلة انك تكونى مستسلمه ليه وحابه اللى بيعمله ولهفتك ليه متقلش عن لهفته ليكى .. وقتها بس تسمحيله بدا ...فهمانى ياجواهر ؟
جواهر هزت دماغها بايجاب ..
ودلوقتى انا مش هكتبلك اى حاجه طالما معندكيش مشكله فالنوم وبتنامى بشكل طبيعى .
اخرجى انتى دلوقتى وابعتيلى قاسم ..
خرجت جواهر وقاسم دخل للدكتوره :بص ياقاسم..علاج جواهر فأيدك انتا لوحدك وبس ...
اسمعنى كويس اوى ...اولا هتنزل من هنا تجيبلها دستة بلالين وتديهالها ..
ثانيا كل يوم جواهر هتسمحلك تقرب منها شويه ...بمعنى ..اول يوم تمسك ايديها ومسموح بحضن وتنيمها على صدرك ..تانى يوم تبوسها ...تالت يوم تعمل حاجه تانيه ...يعنى كل اللى بيحصل قبل العلاقه من تقرب ومداعبات فليله انا عايزاه يحصل فأيام وممكن شهور ..ولحظة ماتقولك بس كفايه تبعد عنها فوراااا ..سامع فورا مهما كنت تعبان .عشان لو معملتش كده هتزيد من احساس جواهر بالنفور من نحيتك ..
هتاخدها وترجعو تعيشو فشقتكم وتتصرف معاها عادى خالص وتحاول توصلها على اد ماتقدر ان موضوع العلاقه دا ولا فارق معاك ..خرجها ، فسحها ، دلعها ..عاملها على انها بنتك مش مراتك ....فهمتنى ؟
قاسم :فهمتك يادكتوره ..
الدكتوره :دا تليفونى وعايزاك تتواصل معايا كل يوم وتقولى وصلتو لحد فين ..ولعلمك انا مش هحددلك مده معينه لاكتمال زواجكم ..دا هيرجع لسرعة تقبل جواهر ليك من تانى ...اصبر عليها ياقاسم ..
قاسم هز دماغه بموافقه واخد الرقم من الدكتوره وشكرها وخرج ...اخد جواهر ونزلو اشترالها بلالين وقلم الوان وقرروا انهم يروحو مكان هادى زى جنينه مثلا ولا نادى ويقضو باقى اليوم كله فيه .
***********
فالوقت دا جميله ومريم واميره وحتى نادر اللى شبط فيهم وصلو لشقة غريب ورنو الجرس وفتحت ليل واخدت جميله بالحضن ..واتفاجات لما شافت مريم اللى سلمت عليها و شاورتلها انها متتكلمش وجريت على غريب اخدته فحضن جامد ..
غريب عقد حواجبه عشان الحضن دا مش حضن عمتو جميله لكن لما عرفها من ريحتها ابتسم ...مرررريم ماما مريم حبيبتى ..ايه المفاجأه الحلوه دى ؟!
مريم مسكت وشه بين ايديها وباسته فخدوده الاتنين ...وحشت امك اوى ياقلب امك ونن عينها ..
غريب :وانتى اكتر والله ياماما ...عامله ايه والبنات وحسام وعم راضى كلكم عاملين ايه .
مريم :كلنا بخير ياحبيبي ..سيبك مننا انتا عامل ايه ...مع انى مش محتاجه اسأل بسم الله ماشاء الله وشك مورد وباين عليك الراحه ..
غريب :الحمد لله ياماما بصراحه مرتاح جدا ..
مريم :يارب يكتبلك الراحه دنيا وآخره ياحبيبي ..
جميله :احم احم ..ادونا مجال نسلم احنا كمان ويكونلنا نصيب من الاحضان والحب والحنان دا كله .
غريب بعد عن مريم وفرد اديه لعمته ...احلى حضن لاحلى عمتو فالدنيا ..ودخلت جميله فحضنه وسلمت عليه وبعدها سلمت عليه اميره ونادر ..
دخلو وقضو اليوم مع بعض وليل كانت طبخالهم كل الاكل اللى بيحبوه وطلع الاكل تحفه كالعاده ..
نادر :ليل عاوزك تمسكى اميره تديها كورسات فالطبيخ عاوزها تعرف تطبخ زيك بالظبط ..
اميره :ومين بقا قال لحضرتك انى مبعرفش اطبخ ولا محتاجه اتعلم ؟ طيب دنا لما بقف فالمطبخ وربنا يهدينى بعمل اكل كل المنطقه بتعرف ان اميره النهارده بتطبخ ..
نادر :ياسلاااام
مريم :اه والله زى مابتقولك كده كل المنطقه بتعرف وكلهم بيقفو تحت البيت ويزعقو بعلو صوتهم وفيه منهم بيجيب ميكروفونات :طلعو اميره من المطبخ بسرررعاااه ..احنا مش مستحملين الريحه من جمالها هيغمى عليناااا
نادر :أاااخ ...بس خلاص فهمت ..
الكل ضحكو وحتى اميره كمان ضحكت معاهم، وكملو اكل وقضو باقى اليوم وهما مبسوطين واكدو على غريب هو وليل انهم هيقضو اليوم معاهم بكره ...
************
اما فالاثناء دى ماهر لقى نفسه فاضى ولوحده كلم شرنقته وهو بيتمنى انها ترد عليه المرادى ..ويااافرحة قلبه لما ردت على رسايله ..
ماهر :فكرتى
شرنقه :فأيه
ماهر :فالشغل
شرنقه :فكرت بس ماقررتش لسه ..
ماهر :على فكره انتى تفكيرك وقراراتك بطيئه جدا ودا غلط ...العمر مفهوش كل الوقت اللى بنضيعه دا .
موده :اصل الموضوع صعب انتا مش فاهم .
ماهر :لا فاهم كويس اوى ومتاكد انه صعب عليكى ...عشان الامر دا بيشبه الولاده، والخروج لعالم جديد بيشبه خروج الفراشه من الشرنقه بتاعتها وتبتدى تكتشف العالم وتستمتع بالوان الزهور وتشم عبيرها ..وكمان تسمح للناس يتمتعو بجمالها اللى كان مستخبى جوا شرنقه طول الوقت ..
موده :هتعب والله انا عارفه .
ماهر :هفضل جمبك والله ولو تعبتى وشفتك مش قادره تكملى هرجعك بنفسى للشرنقه بتاعتك من تانى ..
هاه ..قولى ايوه وخلصينى .
موده :هفكر
ماهر :ييييييه ...سلام ياموده ..اكلمك بعد عشر سنين تكونى فكرتى كويس
موده :😄😄
ماهر :😏😏
***************
فاخر اليوم غريب اتصل بقاسم وبلغه ان حماته مشيت والشقه فضيت لو هيرجع هو وجواهر ، لكن قاسم قاله انهم هيروحو على شقتهم وغريب فرح لدرجة انه حس شويه وهيرقص من شدة السعاده ...واخيرررراااا ليل هتكون ليه هو وبسسسس .
************
قاسم وجواهر روحو بيتهم واخدو شاور ونزلو سلمو على اهل قاسم وماجده ارتاحت لما حست انهم مرتاحين هما الاتنين وبيضحكو على غير عادتهم ،وحست ان فيه حاجه اتغيرت فيهم بعد السفر ودا ريح قلبها .
اما موده ففرحت بجواهر ورجوعها اوى لانها افتقدتها طول الفتره اللى فاتت دى واستحوزت عليها واخدتها من الكل ودخلت بيها اوضتها ،وابتدت تحكيلها عن عرض خالها ماهر لشغلها معاه وجواهر لاحظت نبرة فكلام موده عن خالها ماهر مش غريبه عليها ..نبرة الحب اللى بقت بتلقطها وهى طايره ...
ابتسمت جواهر واتمنت فعلا موده لخالها وانها تعوضه عن كل سنين الالم والحرمان اللى عاشها بعد مراته اميره .
جواهر اتصلت بمامتها وعرفتها انهم وصلو وجميله فرحت وعزمتها هى وقاسم والعيله كلها عندهم بكره فالفيلا وقررت انها هتعمل عزومة لم شمل لكل الحبايب مره وحده ..
***********
قاسم تانى يوم لبس هو وجواهر وقالو انهم هيعدو على غريب وليل ياخدوهم فطريقهم وموده ركبت معاهم وانطلقو ...
اخدو غريب وراحو على الفيلاوسميه كانت فأنتظار غريبها على احر من الجمر ، وماصدقت شافته وجربت اخدته فحضنها بشوق وهو كمان الفرحه مكانتش سايعاه بحضن سميه ولهفتها عليه وحتى ماهر ابتسم للمنظر اللى شافه قدامه دا .
غريب سألها على ناديه وقالتله فاوضتها وطلب من جواهر تروح تنادى عليها عشان تنزل تسلم عليهم ..
لكن برغم ان ناديه كان قلبها بيرفرف على شوفة غريب الا ان زعلها منه كان اكبر من اشتياقها ليه، وانها مش مستوعبه وحتة انه طول الفتره اللى فاتت دى مسألش ولا مره وحده على نانا حبيبته خلتها رفضت تنزل تسلم عليه رفض قاطع، وفضلت فاوضتها منزلتش رغم استغراب الكل وسؤالهم عليها ..
غريب لما بلغته جواهر انها مرضيتش تنزل قالها خلاص انا عارف انها زعلانه وهتعمل كده وانا هبقى اطلعلها بنفسى واصالحها .
الكل اتجمع وسلمو على بعض وخصوصا جميله وجواهر اللى حضنو بعض كانهم غايبين عن بعض بقالهم سنين ،
وماهر كمان مسك غريب مسابهوش يتحرك من جمبه من كتر ماهو واحشه وغريب كان بيفرك ونفسه ينادى على ليل ويخليها تقعد جمبه بعد ماسحبوها عمته ومريم منه وهو متعودش على فراقها كل دا .
اما سميه فكانت قاعده جمب غريب على شماله وماهر على يمينه ...صحيح مش بتتكلم معاهم لكن طول الوقت ماسكه ايد غريب ومستنيه الفرصه اللى يخلص ماهر فيها كلامه وتنفرد هى بغريب اللى واحشها اوى .
ماهر صحيح كان بيتكلم مع غريب بلسانه بس عنيه وعقله مع موده اللى كانت قاعده زى عادتها فركن بعيد عن الناس وبتراقب الكل فصمت لكن اكتر حد كانت مراقبه كله حركه وكلمه وهمسه منه هو ماهر ..
قاسم كان واخد باله منهم جدا وابتسم لما حس ان ماهر بيبادل موده نفس المشاعر، واتمنى لو الحكايه دى تكمل من غير عقبات، يمكن تكون دى آخر فرصه لموده اللى كملت ٣١ سنه انها تتجوز وتكون اسره ومش مهم فرق السن ولا اى حاجه تانيه، مهى كمان مبقش صغيره وفرصها فالجواز تكاد تكون انعدمت . وخصوصا وهو شايف ان سميه ملهاش اى علاقه بماهر ولا ماهر له علاقه بيها ولا كأنهم كانو متجوزين فيوم من الايام ولا فيه بينهم اولاد ..وسميه بتبصله وهو بيبص لموده وعادى خالص ولا هاممها فقال لنفسه ...طب هيكون ليه لا مادام كده ؟
نادر طول الوقت قاعد جمب اميره ومش راضى يتحرك من جمبها وكل ماحد يكلمه او ينادى عليه بيعمل نفسه مش سامع ...
اما احمد ومحمود فاخدو ستاتهم اللى سابو الاولاد مع ماجده جدتهم وخرجو كلهم للجنينه وراحو لشجرة التوت واحمد طلع على الشجره وفضل يحدفلهم وهما ياكلو ومبسوطين .
اما مهمة الطبيخ كانت من نصيب ليل وجميله ومريم واللى طلع من تحت ايدهم اكل جنن كل اللى داقوه من حلاوته .
الكل اتغدو وناديه برضو رفضت تنزل تاكل معاهم وفضلت فاوضتها ..
بعد الاكل غريب خلاص هيقوم يطلع لناديه لكنه افتكر موضوع الاجهزه اللى سبق وكلم عليه قاسم ورفض يروح معاه ..
كلم نادر يروح معاه ونادر مطلعش اقل نداله من قاسم ورفض يروح وفضل انه يقعد الوقت اللى هيضيعه دا جمب اميرته وخصوصا انهم ماشيين بكره ...
ماهر لما سمع غريب قرر ان هو اللى هيروح معاه عشان هو كمان نفسه يعمل حاجه لداده سميره ويشتريلها حاجه من حسابه الخاص صدقه جاريه ...
عبد السلام كمان اتبرع يروح معاهم طالما عمل انسانى وقرر يروح معاهم وفعلا اخدو بعضهم وخرجو هما التلاته وماهر عينه على موده ومكنش نفسه يسيبها ويمشى وخصوصا انه ملقاش اى فرصه انه يتكلم معاها لوحدهم لكن هيعمل ايه الظروف جت كده .
خرج ماهر وغريب وعبد السلام وركبو العربيه وطلع بيهم عم طه تحت انظار ناديه اللى كانت واقفه فبلكونة اوضتها على نار ومستنيه حبيبها غريب يطلعلها وياخدها فحضنه زى زمان، لكن خيبة املها كانت كبيره وهى شايفاه بيخرج من الفيلا وحتى معبرهاش ولا كانها اخته حبيبته اللى متربيه فحضنه ولا كأن وجودها فحياته بقا له لزمه ..
كل اللى بقا فحياة غريب مهم هى ليل وبس ..واكتفى بيها عن العالم كله ..نزلو دموعها ومسحتهم بايدها بعنف وبسرعه راحت على التليفون و فتحت ماسنجر وبعتت رساله :فينك
ايوه ياندنوده ...هاه مش هتحنى عليا بقا وتخلينى اشوفك ؟
ناديه :قولى الاول بتحبنى اد ايه .
#:بحبك اد الدنيا دى كلها ...بحبك اد حب الناس كلها لبعضها .
ناديه :مين اغلى حد فحياتك ؟
#:ناديه حبيبة قلبى وكتكوتى الجميله ..
مدت ناديه ايدها على الكاميرا ورنت عليه فيديو لأول مره بأيد بتترعش وهو فتح عليها فورا واول ماشافها فتح بوقه بذهول وقال كلمه وحده :
اوبببااااااه
فرعون 2
البارت الثالت والعشرون 23
بقلم /رينوو ❤
مدت ناديه ايدها على الكاميرا ورنت عليه فيديو بأيد بتترعش وهو فتح عليها فورا واول ماشافها فتح بوقه بذهول وقال كلمه وحده :
اوببببااااه .
ناديه :عجبتك
زاهر :قولى سحرتينى ..هبلتينى ...جننتينى ..الا عجبتينى ..يبنتى دنتى صاااارووخ
بس انا زعلان اوى منك ياناديه ...بقا تخبى عليا كل الجمال دا ؟ شهرين بحالهم وانا اتحايل عليكى عشان اشوفك وانتى تقلانه عليا لغاية ما شعوطتينى شعوطه ...بس بصراحه تستاهلى ، ومش خساره فيكى كل الصبر اللى صبرته عليكى .
ناديه :قولى كلام حلو يازاهر ...قولى انى اهم حد فحياتك ، قولى انك بتحبنى انا وبس ومابتحبش حد ادى ..قولى انك مستعد تبيع الدنيا كلها وتشترينى انا ....
وبالفعل زاهر سمعها كل الكلام اللى محتاجه تسمعه فحالة الضياع اللى هى فيها ...
قدملها الاحتواء والامان المزيف فوقت حاسه فيه انها ضايعه وفقدت مصدر امانها واحتوائها الوحيد ...
**********
غريب رجع الفيلا هو وباباه وعبد السلام فوقت متاخر جدا بعد لف كتير ودوخه ،مكانوش عارفين ان شرا الاجهزه بالصعوبه دى وانهم لازم يسألو الاول على افضل مكان متخصص فبيع الاجهزه الطبيه، وكمان يدورو على افضل اسعار واخيرا يشرفو بنفسهم على وصولهم المستشفى .
التلاته رجعو هلكانين واول ماوصلو عبد السلام اخد عيلته وروح وقاسم وجواهر معاهم ...وغريب اخد ليل بعد ماشاف ان الوقت اتأخر وقال لنفسه اكيد ناديه نامت دلوقتى ويبقى يجيلها يوم تانى يقضيه كله معاها او يخلى نادر يجيبهاله للشقه، ركبو مع عم طه ووصلهم لشقتهم ..ورجع تانى على الفيلا .
ماهر قعد مع مريم على رواقه بعد مالكل مشى ...لسه برضو مصممه ان اميره تسكن فسكن طالبات ومتقعدش فالفيلا ؟
مريم :مش هينفع ياماهر صدقنى .لا المجتمع ولا راضى ولا حتى انا هنوافق ان وحده تفضل فبيت خطيبها .
ماهر :اولا محدش يعرف ان هو خطيبها لسا يعنى محدش هيتكلم .
مريم :ماده انيل ..لما تفضل فبيته فتره وبعدها يخطبها يأمه الناس هتقول بلفته واغرته لغاية لما وقعته ..يامه هيقولو غلط معاها وبيصلح غلطته ...بص ياماهر فكل الحالات مش هينفع ..وخصوصا انه مفيش صلة قرابه مابينا .
ماهر هز دماغه بتفهم لمريم وكمل :طيب اظن مسموحلها بالزياره من وقت للتانى طالما مفيش اقامه ولا اييه ؟
مريم هزت دماغها بموافقه :اكيد مسموحلها ...بس الزياره تكون طول ماانتا او جميله فالفيلا غير كده لأ
ماهر :ماشى .
مريم :هاه قولى بقا وصلت لفين مع مدام نظيفه وغمزتله .
ماهر :ولااااا اى حاجه بحاول اقرب منها ومش قادر ولا عارف .
مريم :طبعا مش هتعرف ولا تقدر عشان خلاص انتا عجزت والظاهر انك فقدت جاذبيتك وتأثيرك على الجنس اللطيف زى زمان .
ماهر :فشررر دنا لسه فتى الشاشه الاول ونجم شباك ياامى .
مريم بضحكه :اثبتلى دا ووقع موده واتجوزها وساعتها هبصملك بالعشره انك لسا فتى الشاشه الاول .
ماهر :متسخنينيش عشان متهورش واروح اعترفلها وتقولى يلا ياراجل ياعجوز مناخيرك اد الكوز وارجع قفايا يقمر عيش .
مريم :متخفش من الحته دى مش هتحصل عشان هى كمان عينها كانت هتطلع عليك طول الوقت من تحت النضاره ..
ماهر :بيتهيألك
مريم :مش انا يابابا ..مريم لما تقول حاجه خدها ثقه وامشى وراها علطول .
ماهر :مش عارف يامريم بس حاسس انه مش هينفع ...او لسه محتاجين شوية وقت ان كان انا ولا موده نعرف فيها مشاعرنا ونتأكد منها كويس قبل اى خطوه
مريم :الوقت الطويل لاهو فصالحك ولا فصالحها ياماهر ..
انتو يدوبك تلحقو تعيشو اللى فاضل مع بعض.
ماهر :خايف حتى لو اتجوزتها اظلمها معايا يامريم واكون بكده بحرمها من متعة الحياة مع شاب من سنها .
مريم :اممممم تحرممممها ...اذا كان كده يبقى لأ سيبها لشاب من سنها فعلا ..
ماهر بص على مريم ورفع حواجبه بصدمه بعد مافهم هى فهمت ايه من كلامه :اخررررسى ..انتى فهمتى ايه يام دماغ ادب سز انتى ...على فكره انا لسه فعز شبابى ..من الناحيه اللى فهمتيها يعنى ..
مريم بضحكه :امال خايف من ايه ؟
ماهر :بقولك ايه قومى نامى عشان انتى مش بتفهمى وحماره ودماغك دى متركبه بالمقلوب ...قومى عشان بكره وراكى سفر وابقى سلميلى على راضى الله يعينه على بلوته ..
مريم :ايه دا انتا مش هتسلم عليا قبل ماامشى ؟
ماهر :لأ
مريم:لا اصيل والله .
ماهر شاور بايده لمريم وهو ماشى يعنى غورى وهى ضحكت وبعدها ضحكتها اتحولت لابتسامه وهى مراقباه وهو بيمشى وحركته اتحسنت كتير عن الاول وبتقول لنفسها ...
ياترى كان حصل ايه لو فضلت اميره عايشه واتمتعت بماهر وهو كمان اتمتع باالحب اللى هما الاتنين اتحرمو منه واتعذبو بسببه ..واستغفرت ربهاعلى اعتراضها على حكمه واتنهدت لما افتكرت اميره وايامهم سوا اللى منسيتش منهم ولا يوم واحد رغم كل السنين دى ولااا اى تفصيله لاميره مهما كانت صغيره.
********
جواهر دخلت شقتها ورا قاسم اللى فتح الباب بالمفتاح وفضل فاتح الباب وماسكه وفردلها ايده بحركة ادخلى يامولاتى ...دخلت الشقه وهى عا رفه ان النهارده هيبدأو اول يوم فالعلاج ومتوتره وخايفه وحاسه بأحاسيس كتير اوى ملخبطه تفكيرها
قاسم حس بيها ومد ايده مسك ايدها وباسها :متخافيش ..وحده وحده ولو مش عايزانى اقرب منك خالص بلاش ..وبالنسبه للنهارده مسكت ايدك دى وبوستها كفايه اوى النهارده عليا ...
جواهر ابتسمت لقاسم وقربت منه بتردد وحاوطت رقابته بأديها ورفعت نفسها وطبعت على شفايفه بوسه خفيفه ...
غمض عنيه وكان نفسه يروى عطشه ويعوض حرمانه منها طول الايام اللى فاتت دى لكنه مسك نفسه واكتفى بألى هى ادتهوله برضاها، وباس جبينها بحب واخدها وراحو على البلكونه ونفخو اول بالونه وكتبت عليها جواهر ومسكتها ورفعتها لفوق وسابتها وهى مراقباها بتبعد وتطير لغاية مااختفت من قدام عنيها وابتسمت جواهر وهى حاسه فعلا براحه من مجرد ماعملت الحركه الهبله دى فنظرها ...
فى الليله دى جواهر نامت فحضن قاسم ولاول مره تنام بعمق كده لدرجة انها محلمتش بأى احلام وهى حاسه ان دراعات قاسم اللى محاوطاها هما درع امانها اللى بيحميها حتى من الكوابيس
*********
اما غريب فرجعتله ليل ورجعت تقضى معاه كل وقتها ...
غريب :ليل تعرفى تعملى حساب على الفيس ؟
ليل :له معرفش .
غريب :طيب انا هعلمك تعملى واحد ..بس الاول خدى التليفون بتاعى دا وهمليكى رقم وكلمة سر وتفتحى حسابى وتشوفيلى ايه اللى مكتوب فيه ونشوف مع بعض ايه اللى بيحصل فالدنيا .
وبالفعل ليل فتحت حساب غريب واللى كل الناس كانت كاتباله على صفحته اد ايه هما زعلو عليه وقت الحادثه وشافت كم المنشورات والدعوات ليه وبقت تقراله وهو مبتسم ..
طلب منها تكتبله بوست انه بخير ويشكر فيه كل اللى سألو عليه ودعوله بالشفاء وعلمها ازاى تنشره وبمجرد مالمنشور نزل نزلت التعليقات عليه زى المطر وليل تقرا وهو يقولها ترد تقول ايه وهى تكتب ..
فضلو على الحال دا لساعات متواصله ومره تقراله منشورات اصحابه وتشوفله الصفحات اللى متابعها كاتبه ايه ، ومره ترجع ترد على كومنتات اصحابه والقاده بتوعه واى حد يعرفه على الفيس ..
.الحته دى فرحت غريب جدا وخلته يرجع يفتكر ايام المدرسه العسكريه والكليه والتدريبات وحس بالحنين للايام دى ..وافتكر اول مهمه ليه يطلعها ونجاحه فيها وفرحته واتنهد لما افتكر الحادثه اللى حصلتله فنفس اليوم دا ومخلتهوش يلحق يفرح بنجاحه ...
غريب :يلا ياليل كفايه كده سهرتك اوى النهارده وتعبتك ادخلى نامى ..
ليل :له بالعكس ولا تعبت ولا حاجه ، دا الفيس بوك ديه طلع حاجه حلوه قوى قوى .
غريب :مش فكل الاحيان حلوه قوى قوى ...احيانا بيبقى وحش اوى اوى ..على حسب استخدام الانسان ليه ...
السوشيال مديا عموما سلاح زو حدين ضرره اد نفعه والواحد اللى بيقرر هو هيستخدمه فالضرر ولا فالنفع ...عموما بكره انا هعلمك تعملى حساب لنفسك وتشتركى فصفحات مفيده وانا متأكد انك بعدها مش هتفضى تردى عليا حتى لو ندهتلك .
ليل :واه ياسى غريب ، أنى مردش عليك لو ندهتلى ..دانى اسيب الدنيا بحالها تنادم عليا ومردش غير عليك انتا ..
غريب ابتسم على كلام ليل وقام راح على اوضته ونام وغمض عنيه وزى عادته مبيعرفش يغفى غير لما يفتكر ملمس شعر ليل وريحته اللى لسه تأثيرها عليه مستمر لحد النهارده .
***********
النهار طلع ومريم اخدت اميره واخدهم نادر بعد ماسلمو على الكل وراحو وصلو اميره سكن الطالبات واطمنو عليها ،وبعدها نادر وصل مريم لمحطة القطر وفضل مستنى لغاية مالقطر سحب وودعها وراح على الشركه اللى سايبها بقاله يومين بسبب اميره .
*********
تانى يوم قاسم خلص شغله بدرى وقرر انه يروح لغريب ويقعد معاه شويه ...
طلع قاسم وخبط على الباب وليل فتحتله ودخل لغريب .
غريب اول ماسمع صوته :اهلا ياآثم نورت .
قاسم :يااااه دنا كنت نسيت الاسم دا ، انتا لسه فاكره ياجدع ؟
غريب :وطول عمرى هفضل فاكره عشان انتا طول عمرك هتفضل فعينى آثم .
قاسم ضحك على كلام غريب وقضو وقت جميل مع بعض وغريب لاحظ ان قاسم نفسيته اتغيرت من امبارح وفرحله اوى واتمنى ان جواهر هى كمان تكون نفسيتها اتحسنت زيه .
قاسم ملاحظ تركيز غريب مع خطوات ليل وابتسامته بتوسع مع رنة خلخالها .
قاسم :متتلحلح ياغريب وتاخدلك خطوه بدال منتا عمال بتتحنس من بعيد لبعيد كده وعمال تتابع صوت رجليها مكان ماتروح لما هتركبك غزاله من كتر اللف برقابتك وراها .
غريب :اتلحلح اعمل ايه يعنى ياقاسم منا حكيتلك ووضحتلك كل مخاوفى وافتكرتك فهمتنى .
قاسم :طيب ايه رأيك هخلى جواهر هى اللى تكلمها او تحاول تعرف مشاعرها نحيتك و رأيها بطريقه غير مباشره. هاه قولت ايه ؟
غريب لا بلاش ليل لماحه وهتفهم بسرعه ...الله يخليك بلاش ياقاسم .
قاسم :خلاص براحتك انا كل غرضى انى اريحك من وجع القلب اللى انتا فيه دا .
غريب :سيبك بس انتا منى انا وبطل كلام فالموضوع دا متبقاش زى الدبور اللى زن على خراب عشى .
قولى عرفت حاجه عن قضية مرات محروس ؟
قاسم :فكرتنى صحيح والله غابت عن بالى خالص ..وطلع تليفونه واتصل على الظابط اللى ماسك القضيه ..
الظابط :اهلا ياحضرة الملازم ..كنت لسه هتصل بيك واقولك الاخبار .
قاسم :اخبارك ياباشا يارب تكون بخير ، والاخبار اللى عندك تكون اخبار كويسه .
الظابط :لأ اخبار عال العال ..تقرير الطبيب الشرعى اثبت ان البنت متعرضه لتحرش جنسى فعلا ..وقام بتحليل الماده اللى فى القزازه اللى كانت بحوزة القتيل وثبت انها مخدر من نوع خاص بيعمل شلل فالجسم كله ماعدا العنين والمخ ...وبعمل التحليل اللازم للطفله اتضح انها فعلا بتاخد من المخدر دا وعاملها مضاعفات كتير فجسمها ..
وبالبحث والتحقيق عرفنا ان القتيل حصل عليه من ممرض فالمستشفى اللى كان بيتعالج فيها ،
والممرض دا له تهمه سابقه انه بيقوم بسرقة ادويه مخدره من صيدلية المستشفى لكن لم يتم اثبات شيئ عليه فالمرات السابقه دى ، لكن لما حققنا المرادى واحد زميل ليه فالشغل بيعزه شويتين اعترف عليه ومش بس كدا دا طلع مصوره وهو بيسرق ادويه مخدره من صيدلية المستشفى وبيبتذه بيها وقدمها فالتحقيق ...ولما جبنا الموظف دا بشوية شده اعترف انه هو فعلا اللى ادا المخدر لمحروس .
قاسم :عظيم اوى دا ..وطبعا عند سيادتك كل الاوراق اللى تثبت ان حسنيه لسه تحت السن القانونى اللى يسمح بأنها يتحكم عليها ...وبكده تتحول للاحداث دا لو القاضى مدهاش برائه ...وحتى لو مخدتش براءه انا هحول قضيتها لقضية رأي عام واخليها ترج الدنيا رج .
الظابط :بلاش نسبق الاحداث خلينا ماشيين وحده وحده وفأسواء الاحتمالات حسنيه حتى لو اخدت حكم خفيف هيكون مع ايقاف التنفيذ ..
قاسم :انا متشكر لتعبك دا معايا جدا ياحضرة الظابط .
الظابط :دا شغلى ياحضرة الملازم ..
قاسم ؛مع الف سلامه يافندم وهتصل عليك اعرف القضيه وصلت لفين .
الظابط :تحت امرك فأى وقت .
قاسم قفل مع الظابط وفضل هو وغريب يتكلمو عن قضية حسنيه وانهم ممكن يستغلو الفيس بوك فتحويلها لقضية راى عام لو الحكم مكانش فصالحها .
بعدها قاسم روح وكلم جواهر وقالها ان غريب بيحب ليل وخايف انه يتكلم تروح منه ..
جواهر ضحكت بجنون وفرحه من اللى سمعته وعرفت ان ربنا استجاب لدعوتها وكتب لليل اجمل نصيب .
قاسم كمان فرح لما عرف من جواهر ان ليل بتبادل غريب نفس الشعور وان اخيرا صاحبه المنحوس هيفرح بحاجه اتمناها فحياته .
قاسم :طب ايه هنخليهم يتجوزو ويرتاحو بسهوله كده ؟
جواهر :امال ايه!
قاسم :لازم نشعوطهم شويه قبلها عشان يعرفو بعد كده قيمة بعض .
جواهر :لأ والنبى ياقاسم هما ناقصين شعوطه دول اكتر اتنين فالعالم الدنيا شعوطتهم .
قاسم :بصى ...انا اتمرمطت شهرين معاكى بعد الجواز ..وبما ان غريب حبيبي واتمناله يعيش اى حاجه بعيشها همرمطه نفس المده بالظبط .
جواهر :ناوى على ايه ياقاااااسم ؟
قاسم :بصلها وابتسم ابتسامه سمجه ومتكلمش وجواهر فهمت بعد الابتسامه دى انه ناوى على مصيبه لغريب وليل ..
*************
اما فى بلد اهل جواهر
بعد ماتقرير الطبيب الجنائى طلع اهل البلد كلهم مبقاش لهم سيره غير محروس واللى عمله فبنته ، وكل الناس بقت تتجنب حتى الكلام مع العيله دى ..
محمد لما عرف سبب قتل حسنيه لمحروس افتكر كلام جواهر ،
وفهم ساعتها ان اخوه محروس كان بيعمل ايه فبنته طول فترة غيابه ...نار وشبت بين ضلوعه ..ازاى اخوه يعمل فلحمه كده ...راح لقبر محروس ولعن فيه وشتم عليه بكل الشتايم اللى يستاهلها واتمنى لو انه قدامه دلوقتى ويشرب من دمه بنفسه ...
قعد على حيله جمب القبر يبكى وهو بيفكر فأنتقام ربنا منه فبنته ..
بنته اللى كان خايف احسن يتردله فيها عمايله اللى عملها فبنات الناس، فحبسها هى ومراته فالبيت، وحرم عليهم حتى الخروج وشوفة الناس ..
وكان فاكر انه بكده منع انتقام ربنا منه ..ولكن عشان ربنا قادر على كل شيئ خلى القصاص منه اضعاف، بأن اخوه هو اللى ينتهك عرضه ويلوث شرف بنته .
ندم وقتها على كل الامان اللى كان مديه لمحروس واتكاله عليه فأنه يحافظ على مراته وبنته ...مراته؟ وياترى ياجميله محروس عمل معاكى ايه انتى كمان ؟
مهو اللى نفسه هتتدنى لبنته وبنت اخوه مش هتتدنى لمرات اخوه !
يعنى هو طول الوقت بيتسرمح بره ومطمن على عرضه وعرضه مهتوك ؟
جاله اخوه وقومه من المدافن بعد مالاحظ غيابه ودور عليه ملقاهوش ..
اهل البلد اكلت وشهم ومبقاش لهم عين يبصو فوش حد ،فقرروا انهم يبيعو البيت والارض وكل اللى ليهم فالبلد ويمشو منها يروحو مكان تانى وبلد تانيه محدش يعرفهم فيه .
اما مبروكه فكان ليها النصيب الاكبر من العار من اللى عمله ابنها فبنته
...لكن لما محمد واجهها باللى قالتهوله بنته شاف دفاعها المستميت عن ابنها ونفى التهمه دى عنه وكأنه لايمكن يعمل حاجه زى دى حتى بعد كل الاثباتات والحقيقه الواضحه وضوح الشمس...
قالتله وحتى لو الكلام صوح ومحروس عمل اكده هو معلهوش عيب والعيب على البحراويه الفاجر وبتها اللى طلعت لامها فاجر زيها ...هما اللى كانو عيتلطعو فولدى محروس غصب عنه وهما اللى علموه قلة الادب ...
مهى مرتك التانيه اهى عمرها مشافت منه حاجه وحشه ، عشان هى محترمه ومحترمه حالها والعيبه عمرها متطلع منها ...
مفكرتش مبروكه ان اللى بتقوله فى المحصنات ربنا مش هيعديهولها بسهوله ابدااا.
وعشان الارض والبيت كل حاجه كانت بأسم محمد قدرو انهم يبيعوها بسهوله وسابو البلد كلها وراحو على المنصوره عند بلد اهل زوزو وقررو ياخدو شقتين وحده لمحمد ووحده لاخوه ومرات اخوه وعياله ومبروكه تبقا بين هنا وهنا ..
مؤمن رجع البيت بعد ماشاف زفة اهل جواهر وهما خارجين من البلد والعيال الصغيره بتزف فيهم
مؤمن :لاحول ولا قوة الا بالله ...بقا الناس الكومل دوله يحصول فيهم اكده ؟
بدريه :كُمل فين ياشيخ ..انتا ماواعيش محروس عيمل فبت اخوه ايه ...
مؤمن :اوشاعات ..اهل البلد دى مورهاش غير تطلع الاوشاعات .
بدريه :بس شوفت انتا ربنا كرمك كيف لما طلقت بت طاهر وطلعت العار من بيتك !
مؤمن :ايه جاب بت طاهر فحديتنا دلوك ؟
بدريه :ليه ياسبعى ..لهو انتا متعرفش انها كانت هى وبت محمد اخو محروس راسين فطاقيه، وكانت عايشه معاهم وسعات تبات حداهم كمان ..واللى نفسه تدنى لبته مهتدناش للغريبه ؟
مؤمن :ياشيخه اتنيلى هى ليل فيه راجل فالدنيا نفسه تدنى عليها ؟ دانى جوزها وبحلال ربنا ونفسى عمرها ماادنت عليها ...وبعدين البت انى لقيتها بشرفها يعنى مترطيش فالكلام ديه كتير وطلعى ليل من دماغك زى ماطلعتيها من بيتها .
بدريه :امال عتدافع عنها ليه قوى اكده يامؤمن ؟ اللى يشوفك يقول كنت عتحبها وطلقتها غصب عنك ؟
مؤمن :ولا عحبها ولا عحب اشوف زوالها حتى ...بس يعنى عالاقل ...كانت علطول تحضرلى لقمه حلوه ، هدمه نضيفه ، والبيت مروق تكبى عليه العسل وتلحسيه ، كانت تتلقانى بالهلا والمرحب لو طلعت بره البيت شويه ورجعت تانى .، والاهم من ديه كانت مخلفالى واد ، ومش اى واد عاد ، سند وهو سند ، مالها لو كانت قعدت تخدمنى وتخدمك بدال مالبيت ظايط ورايط اكده ؟
بدريه :عقولك ايه ..انى معاى بت صغيره ومش مخليانى عارفه اعمل ايوتها حاجه.
مؤمن :هى كمان كان حداها واد اصغير وكانت عتعمل كل حاجه .
بدريه بغضب وبصوتها كله :
يعنى عاوز تقول ايه انتا دلوك ...عاوز تقول ان ليل وش القرد كانت احسن منى وانضف منى ؟
ومع احساس مؤمن بان فيه اعصار على وشك الحدوث من بدريه وهو مش كد بدريه قال اتجنبه احسن ..
وابتدا يراضى فيها ويقولها مش قصدى وليل متجيش ضافر من اللى بتطيريه كل يوم ...مهو اصلها لو زعلت ممكن تقوله اطلع بره ومتورنيش وشك ..مهو القراط والبيت وكل حاجه خلته كتبها بأسمها ومن يومها وبقت هى الآمر الناهى .
************
جواهر وقاسم مستمرين فالعلاج بتاعهم وكل يوم بيتقدمو عن اللى قبله وقاسم ماشى على كلام الدكتوره بحزافيره وبيبعد عن جواهر فورا اول ماتطلب او يحس بتوترها وخوفها منه ودا دمر اعصابه وطول الوقت يلعن فحظه اللى عامل فيه كدا دونا عن البشر كلهم ..
جواهر فيوم اتصلت على امها .
جميله :ايوه ياجوجو عامله ايه ياحبيبتى .. وحكتلها على كلامها مع قاسم بخصوص غريب وليل
جميله :والله ؟
جميله :طيب دا خبر حلو اوى ده ...لأ لأ حرام عليه قاسم دا قاسى اوى ...لأ بالله عليكم غريب هيزعل اوى وقلبه هيتعب ...اه بصراحه ليل هى احسن وانسب وحده فالدنيا لغريب ...لأ مش هقول لحد اى حاجه ....ياعم اعملو اللى عاوزينه بس والله لو لقيت ابن اخويه بيتعذب لاقوله على كل حاجه وغير كده هقول لماهر وماهر هيقتلكم.....انتو احرار انا قولتلكم وخلاص ..
نهت المكالمه وكملت شغلها فالمطبخ ومكانتش واخده بالها ان فيه اللى واقفه بره المطبخ وسمعت كل المكالمه ونار شبت بين ضلوعها ...عشان احسن واحد فالدنيا عندها هياخد اسواء واوحش وحده فالدنيا من وجهه نظرها ..
وغير كده خلاص يعتبر خسرته للابد ...
طلعت اوضتها بسرعه ومسكت تليفونها وكلمت زاهر وفضلت تتصور وتبعتله بدون وعى وفكل الاوضاع بناء على طلبه لكن الصور كانت بهدوم عاديه بتاعة بيت .
***********
قاسم جاى من الشغل وفتح ودخل بيبص ملقاش جواهر نده عليها بكل صوته :جوااااهااااررر اكيد عند الزفته تحت والله انا خايف احسن تتعدى منها .
نزل جرى لشقة اهله ورن الجرس لان ممنوع حد يبقى معاه المفتاح ويخرج بره ويدخل البيت لوحده وبجراسيمه بأمر من موده .
موده :وحياتك ياجواهر خدى المعقم وافتحى الباب وعقمى اللى هيدخل عشان ايدى مش فاضيه .
قامت جواهر واخدت المعقم وفتحت الباب وقاسم بص لقاها ماسكه القزازه وواقفه زى وقفة موده ..
قاسم برق عنيه وخبط على دماغه :الللعب اهو هو ده اللى انا كنت خايف منه ...
بتعملى ايه ياحبيبتى ؟
جواهر :هعقمك ياحبيبي ..امال عاوز تدخل بجراسيمك يعنى !
قاسم :اهلا مدام نظيفه اوس اتنين ..
بت انتى بقولك ايه ، ورحمة ابويا شوفى ورحمة ابويا ملقاكى واقفالى الوقفه دى بقزازتك لاخدك مكلبشك فالبوكس وابيتك اسبوع فحبس انفرادى ..انتى واللى علمتك ..
جواهر بضحكه :ياقاسم انتا متعصب ليه هو فيه حد يكره النضافه والتعقيم ؟
قاسم :انا ..انا معفن وبكره النضافه والتعقيم ومش داخل هنا واتفضلى قدامى على شقتنا يلا .
دخلت جواهر المعقم وطلعت مع قاسم على شقتهم فوق .
قاسم فتح الباب ومسك ايدها وشدها منها واخدها جرى على جوه .
جواهر :حاسب دراعى يطلع فأيدك ..مستعجل كده على ايه ؟
قاسم :النهارده هبعت غريب الفيلا بحجة انه رايح يصالح ناديه واهقوله انك هتروحى تجسيله نبض ليل ..
بصى بقا انتى هتقولى لليل ان غريب مبيحبهاش وانى سألته وقلى لا مبفكرش فالجواز وخصوصا من ليل
وانا بعد مايرجع غريب اقوله انك سألتى ليل وقالت مش موافقه ونطلب من الاتنين ميجيبوش سيره لبعض ويتعاملو عادى عشان الطرف التانى ميلاحظش فرق فالمعامله ..
وهز اديه قدام وشه بحماس وهو بيتكلم :يآااااه دول هيتعذبو عذااااب هما الاتنيين يلهوووى وبص لجواهر اللى بتهز دماغها بعدم رضا ..
انتا طلعت شرير اوى على فكره ياقاسم .
قاسم :يوووه دانتى متعرفنيش فالشر دنا اشرشر شرير فالدنيا ..ودلوقتى تعالى بقا هاتى بوسه تشجيعا لجوزك حبيبك على الخطط الجهنميه بتاعته .
**********
وبالفعل قاسم لبس هو وجواهر وطبو على شقة غريب تانى يوم من الصبح بدرى وقاسم فهم غريب على كل حاجه وانه يفضى الشقه لجواهر وليل عشان يتكلمو براحتهم وتاخد رأيها ..
غريب فالاول رفض رفض قاطع لكن مع زن قاسم استسلم وسلم امره لله وبلغ ليل انه هيروح يقضى اليوم فالفيلا ويصالح ناديه وهى تفضل مع جواهر .
وجواهر فهمت ليل ان قاسم هياخد رأى غريب ويعرض عليه انه يخطبك وتتجوزو ..
قاسم اخد غريب ووداه الفيلا وجواهر فضلت مع ليل،
والاتنين ان كان غريب ولا ليل طول الوقت قلوبهم عامله زى الطبل
وزى مايكون كل واحد مستنى حكم هيتحكم عليه يأمه بالموت ببعده عن حبيبه او بالحياه بموافقة حبيبه بيه بكل عيوبه ..
غريب وصل الفيلا وسلم على الكل وطلع الاول قعد مع سميه شويه وفضل يسمعلها وهى تحكيله عن كل حاجه وفضلت تتكلم طول الوقت لكنها لاحظت سكوت غريب وشروده وانه مش معاها خالص .
سميه :هيييه رحت فين
غريب :معاكى ياامى
سميه :محصلش ..ومن اول القعده وانتا مش معايا خالص ..قولى بقا عقلك مين واخده ومتهنى بيه ؟
غريب :عقلى قاعد مكانه محدش واخده ولا حد متهنى بيه .
سميه :مش على ماما سميه ياغريبى ..
ولعلمك بقا انا عارفه عقلك مع مين ..وبصراحه المفروض تاخد خطوه فالموضوع دا .
غريب اتنهد :اخدت الخطوه النهارده ويارب مندمش انى اخدتها .
سميه :ليل باين عليها بنت حلال ومش هتندم على ارتباطك بيها صدقنى .
غريب :لا فهمتينى غلط ..انا عمرى مااندم على ارتباطى بليل ..انا خايف تبعد عنى بعد ماتعرف مشاعرى واندم انى قولتلها حاجه زى دى .
سميه :لا متخافش هتبعد تروح فين يعنى ؟ ملهاش مكان ولا حد غيرك ..
غريب :وهو دا اكبر مخاوفى ...انها لو وافقت عليا توافق من قلة حيلتها ياامى .
سميه :غريب على فكره انتا مش شويه وانتا اللى كتير عليها اساسا وفظروف تانيه مكانتش تحلم انك تتكلم معاها مجرد كلام مش ترتبط بيها .
غريب سكت شويه ومردش على امه وعقله وفكره وقلبه كلهم مع ليل ..
فضل قاعد شويه وبعدها استأذن من سميه عشان يروح لناديه يصالحها ويشوفها ياترى الفتره اللى فاتت دى غيرت تفكيرها واسلوبها وعرفت غلطها ولا لسه زى ماهى .
غريب خبط على اوضة ناديه وجاله صوتها :ادخل
غريب فتح الباب ودخل وناديه كانت ماسكه تليفونها وبتراسل فزاهر واول مارفعت دماغها وشافت غريب ابتسمت بفرحه ووقفت وكانت هتجرى تترمى فحضنه ..
بس افتكرت بعده عنها طول الفتره اللى فاتت دى وانه جه الفيلا ومشى من غير مايطلعلها ولا يصالحه وقعدت مكانها تانى ..
غريب لما ملقيش رد فعل من ناديه :ياااه للدرجادى ياناديه ؟
ناديه :ازيك ياابيه عامل ايه ...اكيد كويس
غريب :ومالك بتقوليها وكأنك مش عاوزانى اكون كويس !
ناديه :لا ازاى ده ..اكيد طبعا اتمنى انك تكون كويس دايما .
غريب :سيبك منى انا وقوليلى انتى كويسه ؟
ناديه :يهمك ؟
غريب:اكتر من اى حاجه فالدنيا .
ناديه ابتسمت بتهكم وردت عليه :اطمن ياابيه انا كويسه وزى الفل ومش ناقصنى اى حاجه ولا اى حد .
غريب اتنهد وقرب من السرير وقعد ومسك ايدين ناديه ..
ناديه بصت لاديها اللى بين ايديه بحنين للمسته ليها وحنانه عليها اللى وحشها جدا ورفعت حواجبها وبرطمت وعنيها اتملت دموع .
غريب:ناديه انا مش عاوز يبقا عندك ادنى شك فأنك حرفياً اغلى حد عندى ...والله والله ياناديه انتى فمكان فقلبى محدش غيرك يقدر ياخده ولا يحتله ..
ناديه بصوت معاتب :حتى ليل ؟
غريب ضحك :يااااربى على ليل اللى حطاها فدماغك دى مش عارف ليه يابنتى ليل دى اطيب مخلوقه على وش الارض والله ومتستاهلش ان حد حتى ياخد منها الموقف اللى انتى واخداه منها ده .
ناديه :طيب ارجع الفيلا تانى وانا اوعدك مش هتكلم معاها ومش هدايقها تانى ...بس انا اللى ااكلك واشربك وانا اللى اعملك كل حاجه وهى خليها فالبيت براحتها بس بعيد عنك .
غريب :نونا ..انا بحب ليل وهتجوزها ..دا لو وافقت يعنى.
ناديه قامت وقفت على حيلها
منتوره : لأ مش ممكن ..يعنى هتاخدك منى رسمى ومش هيبقى ليا اى حق فيك مش كده ؟
غريب ابتسم : بصى انا هفهمك حاجه مهمه اوى .. تعالى اقعدى ..ومسك ايدها قعدها جمبه مره تانيه
يانونا حب الاخت غير حب الام غير حب الزوجه ..
كل وحده فيهم بيبقا ليها نوع خاص من الحب ..مينفعش يتقارنو مع بعض نهائى ، ولا مينفعش وحده تيجى تقول بتحبنى انا اكتر ولا دى اكتر؟ ...التلاته بيبقا ليهم نفس الغلاوه وبنفس القدر بس لكل حب شكل مختلف.
اديكى مثال ...الاكل ..الشرب ..
الهوا ..التلاته دول مهمين جدا لكل انسان ، لكن فيه حاجه فيهم ينفع تاخد مكان التانيه والانسان يعيش من غيرها ؟
ناديه :لأ
غريب :بالظبط كده .
ناديه :بس طبعا ليل هى الهوا فحياتك اللى متقدرش تستغنى عنه لحظه وحده ...وانا لو هكون وحده من الاتنين الباقيين هبقا الاكل اللى ممكن الانسان يقعد ايام من غيره ميموتش ..يعنى عادى يستغنى عنه .
غريب :لا بقا انتى الهوا
ناديه :لأ انا الاكل بدليل انك داخل على شهرين اهو وانتا مستغنى عنى وزى ماكون مليش اى اهميه فحياتك .
غريب :كنت سايبك تعرفى غلطك وتتعلمى منه وترجعى لعقلك
ناديه :كنت عاقبتنى اى عقاب تانى بس تفضل جمبى .
غريب :لو فضلت جمبك مكونتيش هتبطلى مدايقه فليل وذل فيها ياناديه لغاية ماتطفشيها انا عارف .
ناديه:لا مكنتش .
غريب :لا كنتى .
ناديه باستسلام :طيب انا موافقه تتجوزها خلاص ..هاه هترجع الفيلا تانى امته ؟
غريب :هاتى حضن الاول واقولك
جريت ناديه على بيتها ومصدر الحنان الاكبر ليها اللى كانت مفتقداه جدا ...حضن غريبوووو
فضلت حضناه مده طويله اوى وكل مايحاول يبعد عنها ترجع تتبت فيه اكتر وكأنها بنت كانت تايهه واخيرا لقت ابوها .
غريب بضحكه :واحشك اوى كده !
ناديه هزت دماغها وهى فحضنه بالموافقه وهو ضحك وطبع بوسه على جبينها .
تليفون ناديه رن وهى فحضن غريب بأسم زاهر مدت ايدها اخدت التليفون ...كنسلت عليه وطفت التليفون ورمته ولاول مره قلبها يتقبض وهى شايفه اسمه على شاشة التليفون وتحس انها عامله حاجه غلط ...
محستش الاحساس دا غير وهى فحضن غريبووو وخلاص هى من بعد النهارده حست انها مش محتاجه زاهر فحاجه وقررت مش هتكلمه تانى ..لكنها مكانتش تعرف ان الموضوع مش بالسهوله اللى هى فاكراها دى .
قاسم مستناش لاخر اليوم واتصل على غريب من شغلهو وبلغه ان جواهر اتكلمت مع ليل وانها رفضت حبه ورفضت الارتباط بيه ...وكانت هتمشى بس جواهر طلبت منها تفضل وانك هتشيل الموضوع دا من دماغك وتتعامل معاها عادى زى الاول .
غريب بعد ماسمع الكلام دا حس ان قلبه اتكسر زى لوح قزاز وقع على الارض من ارتفاع امتار ...
غريب :طيب ممكن تيجى تاخدنى ياقاسم تخرجنى اشم هوا حاسس انى مش قادر اتنفس .
قاسم :ولا فيك ايه اوعا تموت يخرب بيتك ....وقبل مايكمل غريب كان قفل السكه ..
قاسم اتصل على جواهر وكانت جمب ليل اللى قاعده بتفرك كانها قاعده على جمرة نار من بعد ماغريب خرج مع قاسم لحد دلوقتى ..واول ماجواهر ردت وقالت اسم قاسم ليل انتفضت ووقفت ..
قاسم :جواهر قولت لغريب ليل رفضتك وكانت هتمشى وجواهر مسكت فيها وشكله هيموت منى انا فالطريق اهو رايح الحقه 😂
جواهر :يخرب عقلك ومستعجل ليه ؟
قاسم :مقدرتش اصبر مقدرتش ...يلا قولى للى عندك بقا ان غريب مطلعش بيحبها خليها هى كمان تموت ...اقولك افتحى السكه اقولها انا بنفسى وافرح برد فعلها ..احيات عيالك ياشيخه متحرمينى من اللحظه دى ...اقولك افتحى وانا اعمل نفسى بقولك انتى ومعرفش انها سامعه
جواهر ..ايه ..بتقول ايه ياقاسم مش سامعه كويس ...ثوانى هقتح الاسبيكر .
قاسم بنبره جاده :ياجواهر بقولك انا كلمت غريب فموضوع ارتباطه بليل وقالى ان ليل زى اخته ناديه ومش بيفكر فيها بالطريقه دى خالص ..
ليل خرجت من الاوضه بعد مالكلام وقع على قلبها زى صخره وقعت عليه من اعلى قمة جبل ..
قاسم :الووو جواهر انتى سامعانى
جواهر قفلت السماعه وهمستله ...البنت خرجت جرى شكلها هتنتحر الله يخرب بيتك ياقاسم
قاسم :اشطاا حلو ده .
جواهر :مش شفت رد فعلهم ووقعت قلبهم ..خلاص بقا هات غريب على هنا ونقولهم دا مقلب ونفرحهم بموافقتهم ببعض حرام عليك .
قاسم :على جثتتتى يعرفو النهارده ..والله ميعرفو الا بكره آخر النهار ودا رأفتاً منى كمان والا كنت ناوى اسيبهم كده شهر ولا اتنين ..بس اعمل ايه فقلبيى الروهنف ..
**********
فالفيلا غريب قاعد فالصاله بعد مكالمة قاسم له كمن على رأسه الطير ووشه مش متفسر من الزعل وكل شويه يرفع ايده يحطها على قلبه ويدلك عليه .
سميه لما شافت منظره دا جريت عليه وقعدت قدامه ومدت ايدها فضلت تدلكله فقلبه بخوف : غريب مالك ..انتا تعبان ..اطلبلك اسعاف ياحبيبي ؟ ..
غريب هزلها دماغه برفض واتكلم كلمات متقطعه .. شويه الم وهيروحو بعد شويه متقلقيش ياامى .
سميه :لا قلقانه عشان دى اول مره حالتك توصل لكده ..انا هناديلك ماهر ..
وراحت على اوضة ماهر وفتحت الباب عليه لأول مره وكان قاعد على الكرسى بيصلى وسلم وبصلها باستغراب :سميه ؟
سميه :الحق غريب تعبان اوى ياماهر
ماهر قام منتور وخرج باقصى سرعه عنده ونظرا لانه لسه مخفش كليا ولسه حركته بطيئه اتسند على سميه بلا وعى عشان تساعده انه يوصل لغريب بسرعه
اما ليل فاللحظات دى طلعت جواهر تدور عليها لقتها واقفه قدام التلاجه وفتحاها وماسكه فكل ايد قزازة ميه ساقعه وعماله تشرب من كل وحده مره وبتشرب بطريقه فظيعه معتقده ان الميه ممكن تطفى النار اللى جواها
جميله خرجت من المطبخ وجريت على غريب بخوف لما شافت حالته دى وهى بتنده باسمه ..
ناديه كمان نزلت جرى لغريب اول ماسمعت امها جميله بتنادى باسمه بخوف
الكل حواليه وبينادو باسمه وغريب حالته اتاذمت لدرجة انه مبقاش قادر يتنفس فعلا ...
فاللحظه دى قاسم داخل من باب الفيلا ومبتسم ابتسامه بلهاء اختفت لما شاف حالة غريب وحل مكانها رعب وخوف ..
لقراءة باقي الفصول الجزء الثاني من هنا
لقراءة الجزء الاول جميع الفصول كاملة من هنا