رواية فرعون الجزء الثالث3
الفصل الاول والثاني والثالث
بقلم ريناد يوسف
داخل شقه صغيره فى عماره قديمه فى منطقه شعبيه الى حد ما ...
الست فريال :يبنتى ارحمى نفسك واقعدى ريحى رجلك شويه حرام عليكى دانتى بنى آدم ولبدنك عليك حق
ليل :يعنى هعمل ايه ياخاله الدنيا معوزاشى اللى يقعد ..الدنيا كيف حلبة السبق والناس لازمن تكون فيها كيف الخيل وتجرى بكل سرعتها وحيلها عشان تعرف تعيش فيها .
فريال:بس الخيل بين كل مسابقه ومسابقه بتاخد راحه ووقت ترجعلها فيه صحتها وعافيتها عشان تقدر ترجع تسابق تانى ...وانتى اديلك اكتر من ٣ سنين علطول فسبق مابين شغلك وتعليمك وبنتك ارحمى نفسك ..وفوق كل دول نار قلبك اللى عماله تاكل فيكى من جوه لما اتسليتى وروحك دابت ...
ليل اتنهدت وبصت بعيد على الفراغ من شباك المطبخ واخدت نفس عميق وطلعته على فترات خارج من جواها محمل بلهيب من النار اللى لسه بتوصف فيها الست فريال ...
فريال :ليل ...ياليل ...وزعقت :ياليل حوشى الاكل هيتحرق روحتى فين ..يقطعنى فكرتك بالهم حقك عليا .
انتبهت ليل للاكل اللى بتعمله والحمد لله لحقته على آخر لحظه ،والا كانت بقت كارثه وردت على فريال بعد مارجعت انتبهت للى بتعمله :
فكرتينى ايه بس ياخاله هو انى كنت نسيت لحظه وحده عشان افتكر ! الا هى نجمه مصحيتش ليه لحد دلوك متعوداش تنام النوم ديه كله تتحسد فرقع لوز النهارده ..
فريال :اسكتى يجعل كلامك خفيف عليها خليها نايمه نوم الظالم عباده دى قطمت ضهرى من الجرى وراها تقوليش شغاله ببطريات مبتتعبش .
بس لو اعرف هى طالعه لمين شقيه كده !دانتى هاديه زى النسمه وابوها علطول تقولى انه زيك كده واهدى منك كمان البت دى طالعه متعفرته على مين ؟ بس هى مفيش غيرها انا عارفه ...مهى شاربه فحوضها ولاقطه منها الجنان
ليل ابتسمت :ايوه والله اللى يشوفهم يقول هى اللى امها مش انى من كتر مالبت واخده منيها ..بس تصدقى شقاوتها دى هى اللى محليه الدنيا فعينى وملياها عليا وهى الوحيده اللى مصبرانى على همى ..
فريال :الله يرحم لما جيتى هنا فأول ايامك ومرضيتيش تعرفينى حتى انك حامل وكنتى عاوزه تنزليها لولا ستر ربنا واللى يشوفك وقتها ميشوفكيش دلوقتى وروحك فيها .
ليل :متفكرنيش ياخاله وحياتك الا كل ماابص لنجمه وافتكر انى كان زمانى محرومه منها دلوكيت لولا ستر ربنا ووقفتك جارى جسمى كله بيقشعر ويكش وعكره حالى والله .
سكتو الاتنين وهما شايفين حاجه جايه عليهم زى الاعصار من اوضة النوم الصغيره وشعرها الاسود الطويل بيتحرك بحريه ورا ضهرها ومره وحده دخلت فرجلين ليل
فريال :سلاما قولا من رب رحيم صحيت عفركوشه، منا لسه بقول يجعل كلامنا خفيف عليكى ...
ليل ضحكت وشالت نجمه وباستها وشالتها على وسطها ورجعت تقلب فالاكل .
نجمه :ملوخيه بحبهااااا هاتى اشرب .
فريال :وكله كوم ولا شرب الملوخيه شرب دا كمان كوم لوحده ...انا عمرى ماشفت حد بيعمل كده ؟
ليل ابتسمت وهى بتفتكر غريب وهو بيعمل نفس الحركه ولازم يشرب اللى يفضل من الملوخيه فالطبق بعد مايخلص اكل وقالت لنفسها : بس انى شفت .
نزلت ليل نجمه على كرسى وغرفتلها طبق ملوخيه وطبق رز وحطتهم قدامها على الطربيزه وفريال جات توكلها رفضت كالعاده وابتدت تاكل لوحدها وتعمل مهرجان بالاكل ..
ليل جابت ورق سلوفان وابتدت تسلفن الاكل بعد ماغرفته فسرافيس المونيوم .. خاله الوكل جاهز اهه نص ساعه وهياجى اللى يستلمه وسبتلك من كل حاجه طبق عشان لو اللى هياجى حب يدوق الوكل ميفوكش التغليف..
وكلى سبتلك وكل فالبوتجاز اوعى اعاود الاقى الوكل على حاله ازعل منك والله ...
وكمانى فيه طورطايه فالتلاجه هتاجى صحبتها تاخدها حاسبيها هى عارفه السعر متفقين عليه هى زبونتى يعنى اللى تدهولك خديه ومتدققيش معاها ...وصاحب الاوردر ديه تاخدى منيه ٨٠٠ جنيه ماشى .
فريال :حاضر ياحبيبتى .
ليل :يحضرلك الخير يارب ...يلا انى يدوبك الحق اروح آخد الدرس عشان السنادى تانيه اعدادى وعاوزه انجح عشان اروح تالته عاد .
خدى بالك من نجمه ..وانتى يانونه متتعبيش ستك وراحت عليها باستها
فريال :روحى ياحبيبتى ربنا معاكى ويديكى تعبك يارب ...وتوصينيش على نجمه دى روحى وجوا عيونى متخافيش عليها .
نزلت ليل على درسها وهى حاضنه كتابها ومزكرتها وبتفكر انها كان زمانها اسعد وحده فالدنيا بكل خطوه بتخطيها فطريق حلم عاشت عمرها كله تحلمه ودلوقتى فطريقها لتحقيقه ...حلم التعليم... لكن للاسف بقت مطفيه من جوه ومبقتش اى حاجه فالدنيا بتقدر تفرحها
اتنفست بقوه وهى بتفتكر حالتها فاول ايام صدمتها فغريب...
وازاى كانت حاسه انها خلاص بتلفظ آخر انفاسها ومسألة موتها هى مسألة وقت مش اكتر ..
لكن بفضل ربنا والست فريال بعد ربنا قدرت تعيش وتكمل وتقوى نفسها وجاتلها نجمتها الغاليه اللى زادت من قوتها ورغبتها فالحياه وخلقتلها هدف جديد تعيش بيه وعشانه ..
بصت ليل على جوانب الطريق بتتأكد من بُعد العربيات عشان تعدى الشارع للناحيه التانيه ولفت انتباهها اتنين ماشيين واحد ووحده اديهم حاضنه بعض وعيونهم بتحكى لبعضها من غير كلام والحب واضح اوى عليهم ..
اتنهدت وهى بتحاول تفتكر ذكرياتها الحلوه مع غريب لكن كل ذكرى كانت بتيجى فخيالها كانت بتتبخر فثانيه وهى بتفتكر آخر منظر شافته فيه وآخر كلام سمعته ..
غمضت عنيها وضغطت عليهم جامد وكأنها بتحاول تمسح صورته من قدام عنيها بجفونها ...
وصلت ليل السنتر بعد معاناه مع عقلها وعدة محاولات عشان تفكر فأى حاجه تانيه غير غريب واللى حصل منه، لكن كالعاده مقدرتش وتفكيرها فغريب استنزف كل طاقتها وكل ذرة تحمل جواها ...
خلصت درسها بالعافيه ورجعت على البيت بسرعه عشان تخلص الاوردر اللى مطلوب منها فمعاده ..
دخلت من الباب ونجمه جريت عليها كالعاده بمجرد ماسمعت قفل الباب بيتفتح وليل اخدتها فحضنها وباستها وشمتها وضمتها على قلبها كأنها ضامه الدنيا كلها ...
دخلت بيها وقعدت على الكنبه وقعدتها جمبها بعد ماسلمت على الست فريال وقلعت هدومها بتاعت الخروج وقامت على المطبخ تخلص شغلها .
********
واقف فالشباك وبينفخ دخان سجارته بعنف كأنه بيحاول ينفخ معاها همومه ...بعد كل نفس ياخده منها يحطها قدام وشه ويفضل باصصلها وبيتأمل فيها ..وهو على حاله دا سمع صوت بيكلمه :
ايوب - مش عارف ليه يافندم كل ماادخل عليك واشوفك ماسك السجاره كده وباصصلها بيتهيألى انك بتكلمها وهى بترد عليك !
غريب :انا فعلا بكلمها بس ياريت كانت تقدر ترد عليا ....وبصله نظره جانبيه بعد مااخد نفس ونفخه فالهوا ..جهز القوه هنطلع تمشيط .
العسكرى ايوب :يافندم احنا لسه عاملين تمشيط للصحرا كلها اول امبارح وملقيناش حاجه لزمته ايه تمشيط النهارده واحنا عارفين انه مفيش حاجه ؟
غريب :عشان هما اكيد بيفكرو زى تفكيرك الغبى دا دلوقتى... وطمنو نفسهم ان مفيش حاجه هتعترض طريقهم عالاقل لاسبوع او اتنين لقدام... وزمان الفيران خارجه من جحورها وبتتنطط بحريه وهى مطمنه ...واتحولت نبرة كلامه للعنف وهو بيكمل :وبعدين مش هنبه عليك تانى بأنى لما اديلك امر يتنفذ من غير جدال .
ايوب :العفو يافندم انا مش بجادل انا بس بستفسر من سيادتك مش اكتر.
غريب :واديك استفسرت وفهمت يلا بقا روح ادى أمر للقوه تجهز مفيش وقت ....
العسكرى ايوب ادى التمام لغريب وخرج بلغ القوه تستعد وغريب رجع لسجارته اللى كانت خلاص قربت تخلص وطلع وحده تانيه ولعها منها ..
خلص سجارته وخرج شاف القوه مستعده امر العسكرى يجيبله علبة سجايره من على المكتب بتاعه وهو ابتدا يلبس فالبياده والبدله الواقيه من الرصاص قدام عيون العساكر اللى هيموتو من مرمطة غريب ليهم ليل نهار وسحلهم معاه فأى وقت بدون مراعاة اوقات راحتهم ....
عسكرى ميل على اللى جمبه :انا نفسي اعرف الباشا بتاعنا دا ملوش اهل يسألو عليه ؟ ملوش حد يروحله اجازه كل كام شهر حتى ؟ ياراجل دا له اكتر من سنه منزلش القاهره اجازه !
زميله :ياخى مهو لو قاعد وساكت مالنا بيه يروح ولا ييجى ..المشكله دا مبيعرفش حاجه اسمها راحه ولا تعب ...والمصيبه انه عامل الناس كلها زيه ...بس الحق يتقال سينا نضفت من يوم مااتنقل غريب بيه هنا .
العسكرى :فرعون على حق يبنى امال ايه ...بس خلى بالك مش هيقعد كتير ..وحياتك الناس اللى مديق عليهم انفاسهم دول هينشوه ...طب تصدق انا بتشاهد ليا وليه واحنا طالعين اى مهمه او مداهمه .
زميله :العمر واحد ياصاحبى ربك هو الحارس ..
غريب بصوت عالى :مستعدين يارجاله ؟
الكل :مستعدين يافندم
غريب :طيب يلا بينا على بركة الله ...اخد غريب قوته وخرجو فى ٣ عربيات هامر على الصحرا وهما على اتم استعداد ...
اتفاجئو بالاوكار اللى لقوها مفتوحه لدرجة انهم مكانوش مصدقين ان الاماكن دى كانت موجوده من الاول ومقدروش يشوفوها اول امبارح واتعجبو من دقة افراد العصابات فى التخفى واخفاء اوكارهم بمنتهى الذكاء والاحترافيه
وكالعاده غريب طلع عنده حق فتوقعه ...وقدرو يقبضو على المهربين بنجاح وغنيمتهم المرادى كانت اكبر من كل مره بكمية الاسلحه والمتفجرات والقنابل والمخدرات وحتى تماثيل الاثار اللى ضبطوها ..
وغير كده المجرمين نفسهم اللى تم القبض عليهم ...
مهمه تانيه ناجحه لغريب من الااف المهمات الناجحه اتضافت لسجل انجازاته وبطولاته وترقيه جديده لاحت فالافق عشان ترفعه درجه كمان ...
مباركات وتهنئات من كل اللى حواليه وفرحة جهاز مكافحة الجريمه كله فجنوب سينا مكنتش تتوصف ...
لكن كل دا مكنش له اى قيمه عند غريب ولا بيهز منه شعره وحده ..مع ان اى حد غيره كان هيبقى فمنتهى السعاده ..
لكن غريب من يوم ماليل اختفت من حياته اختفت معاها كل احاسيسه ومشاعره وضحكته وفرحته وحبه للحياه ..بمعنى اصح ليل اخدت روح غريب معاها وسابته انسان فاضى من جوه من غير حياه جسد بلا روح ..
راح على مكتبه واتمدد على الكنبه وفتح الفيس بوك وزى كل يوم عمل بث مباشر وابتدا يحكى عن تفاصيل يومه وهو متأكد انها بتسمعه زى ماكانت بتسمعه كل يوم وهى نايمه على صدره وبيحكيلها تفاصيل يومه ...وبعد ماخلص مد ايده فجيبه وطلع الخلخال ورفعه قدام وشه وابتدا يقول ابيات من الشعر والغزل وهو باصصله كأن ليل هى اللى قدامه وكل دا فالبث المباشر ...
*********
ماهر :موده ...موداااااه
موده بصت من المطبخ ...ايوه ياماهر ثوانى وجايه .
ماهر :تعالى للعيال دى ياستى مش عارف اسكتهم انا وناديه
موده :حاضر خلاص بعملهم الاكل وخلاص هخلص اهو .
ماهر :سيبي جميله تكمله وتعالى سكتيهم
جميله من جوا المطبخ :منتا عارف كله الا اكل الولاد مش بتأمن غير لما تعمله بأيدها ياماهر .
ماهر :مش كنا بطلنا الخوف والشك دا ونسينا الوساوس ياموده ؟!
موده :مش وساوس والله بس الاكل لازم كل العناصر اللى فيه تكون متوازنه وبكميات محدوده ومدروسه عشان دول اطفال ياحبيبي ومحتاجين اكل صحى عشان نموهم يكون سليم ..مش عارفه هقعد اشرح كل مره انا الكلام دا يعنى ؟
ماهر :طيب خلصى بس بسرعه وتعالى ...وانتى ياجميله خلصى الغدا عصافير بطنى بتصوصو ولسه عايز انزل ورايه مقابله مع عملا بعد ساعه من دلوقتى
جميله :انا خلاص خلصت وهغرف اهو
ماهر :بسرعه ياعين اخوكى الا انا من ساعة ماخلفت العيال دى فرهدونى واستنزفو كل طاقتى وبقيت بجوع علطول لدرجة انى بفكر اخد رغيف عيش احطه فجيبى وانا ماشى .
قاسم كان داخل وشايل ابنه اركان وجواهر وراه ببطنها الكبيره :
ليه ياعمى هو حضرتك بترضعهم ولا ايه ؟ انا اسمع الام اللى بترضع هى اللى بتبقا عامله كده 😂
الكل ضحك
ماهر :اهو جه النطع اللى لسانه عاوز القطع اهو ...انا مش عارف انتا مرحتش مع صاحبك وريحتنى منك ومن غتاتك ليه يااخى !
قاسم :واسيبك تبرطع فالفيلا الطويله العريضه دى لوحدك؟وبص للاكل اللى ابتدت جميله تحطه عالسفره ..وتاكل كل الاكل دا لوحدك ؟ لا طبعا انا قلبي ميطاوعنيش اعمل فيك كده .
وبعدين اروح سينا اعمل ايه انا مع ابنك المجنون الانتحارى دا ؟
ماهر اتنهد بألم :غريب عمره ماكان مجنون بس مش عارف ايه سبب اللى عمله فنفسه وفكل اللى حواليه دا؟ غريب ضاع منى خلاص ياقاسم
قاسم بص لجواهر وسكت والكل سكت لان كل ماتيجى سيرة غريب علامة استفهام كبيره بتترسم جوا الكل ومحدش بيلاقيلها اى اجابه .
جميله راحت على جواهر باستها وقعدتها على اقرب كرسى وشالت اركان من قاسم والكل قعد على السفره عشان ياكل وموده شالت ابنها دياب وماجده فضلت ناديه شيلاها وابتدت تاكل وتاكل فيها ..
الكل ابتدا ياكل وزى كل مره الكلام عن غريب اتقفل وقاسم وماهر ابتدو يتكلمو فمواضيع جانبيه عن الشغل وعن الولاد
قاسم كان بيتقصد انه يجى لماهر ويقعد معاه اطول وقت ممكن من ساعة مالكل بعد عنه ...دياب اللى مات ونادر اللى طفش وهج بعد اللى حصل وغريب اللى رمى نفسه فحضن الموت عشان يهرب من كل الدنيا والناس وينسى ليل وبعدها عنه .
اينعم ولاده الصغيرين شغلو كل وقته لكن برضو قاسم بيشوف فعنيه حسره كل مره بيقعد فيها على السفره ويتفقد مكان اولاده يلاقيه فاضى ..
اما غريب قاسم عمل المستحيل عشان يرجعه من سينا ويساعده يخرج من حالة الكآبه اللى بقاله سنين عايش فيها دى مقدرش ....هما مرتين تلاته اللى رجع فيهم من سينا وكان بيقضى كل اجازته يلف فالشوارع لعل وعسى يقابلها وسط الوشوش وبعد ماتعب ومل من اللف ويأس فضل فسينا ومجاش تانى بقاله اكتر من سنه ...
موده :يلا دوبى حبيب ماما شبع وهيقعد عاقل قدام TVويسيب ماما تاكل عشان تلاقى طاقه تجرى وراه وورا ميجو باقى اليوم ..
وراحت قعدته فالارض على السجاده وحطتله لعبه وفتحتله التلفزيون على قناة الكارتون ...
شويه وماجده حصلته ونامت على بطنها جمبه وحطت وشها بين ايديها وشعرها الكيرلى الجميل نزل على وشها وابتدت تتفرج معاه ...
واركان كمان شبع وحصلهم وقف فوق دماغهم شويه وبعدها مره وحده ركب على ضهر ماجده حصان ومسك شعرها والبنت صرخت اول ماعمل كده ..دياب قام وبقا يزق فأركان مش قادر وماجده تصرخ من تقل اركان ...
قام ماهر وموده يجرو على بنتهم عشان يخلصوها من براثن الكائن المتوحش اللى اسمه اركان زى كل مره ..
ماهر شاله من على بنته وموده بتسلك شعرها من ايديه بصعوبه ...
ماهر :عيل غتيت زى ابوك والله العظيم ...هذا الشبل من ذاك التور ..كل يوم لازم تعلم عالعيال كده وتبكيهم متعرفش تلعب زى البنى آدمين خالص ؟ وبص لقاسم وجواهر اللى عمالين ياكلو ولا على بالهم
ماهر :يابرودكم ياخواتى ...ابنكم هيكسر رقبة البنت وانتو ولا اى احساس
قاسم رد عليه وهو مستمر فالاكل :متخافش ماهو كل مره بيعمل فيها كده ومبتجرالهاش حاجه ...وبعدين سيب الولد ياعمى يتعلم السيطره ويبقى واد شديد وجارح كده .
ماهر :يتعلم السيطره فولادى ؟! لكن هقول ايه وبتكلم مع مين انا ...تعالو ياعيالى انا هفضل قاعد جمبكم ومش هخرج لغاية مالبارد دا هو وابوه يمشو ...وحتى مقابلة الشغل مانيش رايحها ...لما اشوف اخرتها مع قاسم وابنه سى اركان بيه .
قاسم بص لابنه وعمله علامة النصر ...ايوه كده ياقلب ابوك عايزك شخصيه كده كل الناس تخاف منك ويعطلو مصالحهم من الخوف ..
ماهر بعصبيه :خلص اكل يلا وخد مراتك وابنك وهوينا يله ..
قاسم :لهو انا مقولتلكش ؟...صح دنا مقولتلكش ...مش جواهر خلاص هتولد الشهر دا وانا جبتها هنا وهسيبها لغاية ماتولد ...يعنى مش مروحين من هنا تانى .
ماهر :سيب جواهر تقعد زى ماهى عايزه انشاله سنه ...بس اهم حاجه وانتا مروح تاخد العيل الرزل دا معاك ..وبص لاركان اللى كان بيشد اللعبه من ايد دياب وبيضرب فيه برجله عشان يقدر ياخدها منه وجرى عليه خلص ابنه منه وحضنه ورماله اللعبه .
قاسم :لا ابنى هيقعد مع امه مكان ماهى قاعده ولو مدايقين من وجوده شوفولكم حته اقعدو فيها انتا وعيالك لغاية ماجواهر تولد واخدها وابقو ارجعو بعد كده .
ماهر بص لموده :متقوليلى اخوكى دا كنتو بتتعاملو معاه ازاى ؟ خلى امك تدور عالكتالوج بتاعه وتجيبهولى عشان اعرف اتعامل معاه .
موده :لا متتعبش نفسك عشان قاسم دا ملوش كتالوج ولو عالمعامله مكناش بنتعامل معاه اصلا ...يعنى ماهو على يدك كان قاعد عندكم علطول وطفشان مننا عشان مكناش بنطيقه ...
قاسم :اقعدى انتى زيفى فالحقايق وشقلبيها ...انا كنت طفشان عشان مكنتوش بتطيقونى ولا طفشت من عمايلك السوده وتعقيمك فيا هاه؟ ..
عموما يلا مش هاخد عليكم انتى وجوزك اصلكم معذورين ابنى حبيبي اسد ابوه ضاغطكم ياعينى ..
جميله :متبس ياقاسم هتخلى ماهر يرمينا كلنا بره الفيلا بعمايلك دى استر علينا يابنى .
جواهر :بس بقا ياقاسم ..
وانتا يااركان عيب ياماما متزعلش ميجو مره تانيه اوكى .
اركان بص لماماته :اوكى ياماما وابتسملها ...وبعدها بثوانى راح على دياب قعد فوقيه وعملة حركة تثبيت من رقابته والولد صرخ
ماهر بزعيق :اوعى قوم ياولد انتا هتموتلى الولد ...متقومى ياجميله تمسكى الولد دا ، وبص لجواهر وقلدها ..هزعل منك يااركان ..اوكى ياماما ...دا بياخدك على اد عقلك ياماما دا ...
قامت جميله وشالت اركان ورجعت بيه على السفره تكمل اكلها ...
قاسم برضو بياكل ولا مهتم
ماهر بصله واتنهد وهز دماغه بقلة حيله وهو بيكلم نفسه بس بصوت عالى :يعنى اعمل ايه يارببي فالمصيبه دى وفالولد اللى معذب العيال دا يعنى اعينلهم بادي جارد يحميهم منه ولا اتصرف ازاى ..
بس... مفيش غير حل واحد ..انا هقدم لولادى فنادى يتعلمو الضرب عشان يطحنوه...
قاسم :على فكره ..يبقى حفيدك اللى بتخطط انك تطحنه انتا وعيالك دا متنساش ها ...
ماهر شوحله بأيده
قاسم :طب قولى كنت رايح فين من شويه وغيرت رأيك ؟
ماهر مردش عليه ولا عبره
قاسم :مبتردش عليا ليه ؟ هترد ولا اسيب عليكم اركان ...ولما ملقاش رد بص لجميله ...سيبيه ياطنط عليهم الناس دى مش عاوزه غير كده ...اركان كاتش ...
*****************
اللواء عز الدين الانصارى :يا غريب مش ممكن اللى بتعمله دا ..انتا العنف وصل عندك لاقصى الحدود ..يعنى ايه كل مداهمه او عمليه تصفيلك ٥ او ٦ من افراد العصابه عالاقل ؟
انتا مكنتش كده زمان ...انا على ماافتكر انتا الوحيداللى كنت بتستخدم مكرك ودهائك قبل سلاحك ...جرالك ايه ؟
غريب :يافندم دول مجرمين وبيحاولو الهرب وانا بتعامل مع الاهداف زى مابتحتم عليا اللحظه ..وبعد اذن سيادتك انا بس اللى اقدر وقتها احكم واحدد الناس دى هينفع تتجاب بالدهاء ولا بالعنف والسلاح والزخيره الحيه .
اللوا اتنهد :بص انا مقدرش طبعا آخد ضدك اى اجراء تأديبى فظل نجاحك المنقطع النظير دا، واللى الكل بيشيد بيه واولهم انا طبعا ...ولا دا هيمنع مكافأتك وترقيتك بس انا بكلمك لمصلحتك ...انتا مش شايف نفسك بقيت ازاى ؟ انتا بقيت غول ..بقيت فرعون بحق وحقيق اسم على مسمى ...حتى لو كنت فرعون فالحق ... دا ميديكش عذر انك تتحول لآله للقتل .
غريب :خلصت كلامك سيادتك ؟
اللوا :خلصت ياغريب
غريب :بعد اذنك لو اسلوبى وتعاملى مش نافع مع سيادتك او مش قادر تتقبله انا بطلب نقلى من هنا .
اللوا :انتا بتقول ايه ياغريب ..لا طبعا متوصلش لكده ولا انا ولا الجهاز ولا المنطقه نقدر تستغنى عنك ..عموما انا قدمتلك مجرد نصيحه وانتا حر فقبولها او رفضها ..واتنهد
خلاص ياغريب اتصرف زى ماتحب مش هعترض على طريقة شغلك تانى طالما اعتراضى دا وصلك لطلب نقلك ...اتفضل على مكتبك وشوف شغلك ياسيادة العقيد .
غريب ادى التحيه العسكريه ولف ومشى من غير اى كلمه وراح قعد على مكتبه ومسك علبة سجايره وابتدت المحرقه فالاشتعال جوا صدره وهو بيولع سجاره من التانيه قبل ماتخلص، وباصص على اللاب توب على الملامح البريئه اللى قدامه واللى بقت الحاجه الوحيده فالدنيا اللى عندها القدرة تدخل السرور لقلبه وتحسسه بشوية سكينه وراحه فوسط ساقية عذاب الضمير والقلب اللى عمال يدور فيها ليل نهار ....
ابتسم بمراره وهو بيمشى ايده على ملامحها الجميله وبيهمس :
تاخدى اد ايه من عمرى وتسمحيلى المسك واخدك فحضنى ...انا عن نفسى مستعد ادفع عمرى كله تمن اللحظه دى ياحته من روحى .
**********
فى القاهره
العسكرى ادى التحيه لقاسم :تمام ياباشا الكل متجمع فالقاعه الكبيره وفانتظار سيادتك ..
قاسم شاورله بعنيه عشان ينصرف وفعلا العسكرى عمل كده
قاسم اخد مفاتيحه وفلاشه من درج مكتبه واتوجه على قاعة الاجتماعات ..الكل وقف وادى التحيه لسيادة العقيد قاسم وبعدها قاسم سمحلهم يقعدو وابتدا يشرح فآخر المستجدات فى عالم تجارة المخدرات وشغل الفلاشه وابتدت تعرض صور لناس أوكد بعد التحريات انهم من اكبر موزعى ومروجى المخدرات فالبلد ...
وابتدا يشرح لكل الظباط الاجراء اللى هيُتبع فى العمليه الجايه هيكون ازاى ويسمع لآرائهم ومقترحاتهم حوالين المهمه وبعد الاتفاق وزع عليهم المهمات واكد عليهم وجوب السرعه والدقه والكتمان التام ..
مع انه مكنش محتاج ياكد عليهم الكلام دا وهو عارف مستوى شغلهم كويس ومختارهم واحد واحد بعنايه فائقه من بين المئات عشان يكون بيهم فرقه من اقوى واشجع الفرق فى جهاز مكافحة المخدرات ودا خلى اسمه اشهر من نار على علم وسط كل القادات واتعرف باسمه الحركى برق ودا نظرا لسرعته وعدم توقع اى حد لحركته القادمه واصابته للهدف بسرعة البرق ..
الكل خرج من قاعة الاجتماعات وفضل بس ظابط واحد مع العقيد قاسم .
الظابط يمان :ياسيادة العقيد سيادتك نسيت ان فيه حد لازم ينسق مع سلاح المخدرات اللى فسينا ونحاول نراقب ونعرف النفق اللى بيدخلو من خلاله المخدرات للبلد عن طريق سينا !
قاسم :ومن امتا تعرف عن العقيد قاسم انه بينسى حاجه ياحضرة الظابط ؟
الظابط يمان :ولا مره حصلت حضرتك بس يعنى انا شفت حضرتك مكلفتش حد بمهمة السفر لسينا فاعتقدت ان سيادتك نسيت .
قاسم :لأ منستش ومكلفتش حد عشان انا بنفسى اللى هسافر سينا وانسق ...
الظابط يمان :ياخبر يافندم بنفسك ؟ بس يعنى مكنش فيه داعى لتعب سيادتك فالسفريه المتعبه دى .
قاسم :لا فيه داعى وانا حابب اسافر بنفسى واتفضل ياحضرة الظابط حصل زمايلك وباشر مهمتك فالقضيه ومتنسوش تبلغونى المستجدات اول بأول ...انا طيارتى النهارده بالليل وهما يومين بالكتير وراجع وتكونو جمعتو فيهم كل خيوط القضيه وغطيتو كل الثغرات اللى قلتلكم عليها ..
الظابط يمان :اطمن يافندم هنرفع راس سيادتك كالعاده
قاسم ابتسم :انا واثق من كده ...يلا يابطل حصل زمايلك .
الظابط ادى التحيه وخرج وبمجرد خروجه قاسم طلع تليفونه وطلع رقم غريب ورن عليه وبعد رنتين جاله صوت غريب ..
غريب:ايوه ياقاسم عاوز ايه
قاسم :هعوز ايه منك يعنى ياقرد الصحراء وكلب بحر قناة السويس انتا ...وحشتنى قولت اكلمك ..بذمتك فيه حد يرد على صاحبه وحبيبه كده ! موحشتكش ؟
غريب :لأ
قاسم :والله وانتا كمان وحشتنى اوى اوى ..اوى عموما انا جايلك وطيارتى بالليل ...هتكون فاستقبالى فالمطار صح ؟
غريب :لأ
قاسم :لئه تلوئك امال هجيلك ازاى ؟ طيب ابعتلى حد من عندك بالعربيه ياخدنى .
غريب :محدش فاضيلك اتصرف وتعالا لوحدك ..
قاسم :ياغريب متقساش عليا كده دنا قاسم حبيبك
غريب :مبقاش عندى حبايب انا .
قاسم اتنهد وغمض عنيه ونفخ بقوه بعد ماسمع صوت نهاية الاتصال مع غريب ...
قاسم :وبعدهالك ياغريب ..هتفضل عالحال دا لحد امته ..بس لو اعرف ايه اللى حصل لدا كله وسببه ايه ...انا هتجنن كل ماافكر فالموضوع ..
*********
اميره فشقة غريب وليل واللى بقت شقتها من بعد الحادثه واللى حصل ..
رن تليفونها شالته وفتحت على مامتها .
مريم :ايوه يااميره اخبارك عامله ايه
اميره بتنهيده :هعمل ايه يعنى ياماما ادينى عايشه .
مريم :لو بس اعرف ايه سر اصرارك وتمسكك انك تفضلى على ذمة واحد مش طايقك ولا عايز حتى يبص فوشك ؟ بتعاندى نفسك وبتضيعى اجمل سنين عمرك بعندك دا ليه يااميره ...كليه وخلصتى ...
ماجستير ودكتوراه وعملتى ..مستنيه ايه عشان تعيشى حياتك زى اى بنت فالدنيا مع شخص بيحبك ؟
مش معقوله يبقا غريب هو اللى غلط وانتى تدفعى تمن غلطته دى من سنين عمرك يابنتى .
اتنهدت اميره بقلة حيله :مش هتبطلى كلام فالموضوع دا انتى ؟
مريم:عمرى ...لحد ماعقلك يرجع فراسك وتعرفى الصح والغلط وتشوفى حياتك ومستقبلك ..
اميره :طيب للمره المليون ياماما هقولك ان حياتى ومستقبلى مع غريب .
مريم :هو فين غريب دا يااميره ؟
اميره :هيرجع ياماما ..هيتعب من البعد وهيرجع ومش هيلاقى ساعتها صدر حنين غير صدرى ولا حضن غير حضنى يترمى فيه ..
مريم:دا عشم ابليس فالجنه دا يابنتى ...شوفى ليكى كام سنه بتصبري نفسك وتمنيها بالكلام دا ؟ ومبتشوفيش من غريب غير بعد كل مادا بيزيد ...
بطلى عشم فغريب لانك بالنسباله مش اكتر من غلطه غلطها بدون وعى وخسر بسببها حبيبته وبيته وحياته ...وطول ماهو شايفك مش بيشوف فيكى غير خسارته عشان كده قرر انه يبعد عنك نهائي ..
وهقولهالك لتانى مره.. انا منكرش انى فيوم من الايام اتمنيت غريب يكون من نصيبك ويكون صاحب بيتك وابو عيالك بس مش بالطريقه دى ابدا ..
انسحبى ياأميره من حياة غريب واتحررى من سجن ذكرى ليله قضاها معاكى مغيب ...وآمنى ان اللى كان معاكى دا مكنش غريب .
اميره بلعت ريقها ودموعها نزلو بقهر وهى بتسمع كلام امها وعارفه ومتأكده انها عندها حق فكل حرف بتقوله ...لكن امها متعرفش ان بنتها لو كانت عندها القوه والشجاعه انها تعمل كده وتسيب غريب كانت بعدت عنه وسابته من زمان ...لكن للاسف غريب بقا بالنسبه لأميره هوس عايشه بيه وليه .
**********
ليل :خدى ياخاله فريال مدى يدك اتلافى منى .
فريال :ايه دا ياليل مكفايه اللى اخدته منك امبارح ياحبيبتى .
ليل :فلوس امبارح كانو رزق امبارح اما فلوس انهارده رزق انهارده ...خدى ياخاله ومتتعبيش قلبي بالله عليكى حتى عشان رحاب جايه الجمعه وتلاقى حداكى قرشين تاخدهم معاها فسكن الطالبات ينفعوها ومتحسش انها اقل من صحباتها ..
فريال :ربنا يزيدك من نعم الله ويبارك فرزقك ويعلى مقامك ويسترك زى ماساتره اليتيمه ورافعه راسها قدام البنات
ليل :ربنا يخليكى ياخاله بس مش انى اللى ساتره ربنا اللى عيستر عباده وهو اللى خلانى سبب يبعتلكم عن طريقى رزقكم ..وبعدين دا كله من تعبك وشقاكى معاى ليل نهار ...دا كفايه مجاهدتك مع نجمه وحملها التقيل وغير اكده وقفتك جارى اللى عمرى مهنساها وكل مال الدنيا ميسدش دين يوم واحد من اللى ليكى فرقبتى ياست الكل .
فريال :والله يابنتى ربنا وحده اللى يعلم انا من اول مره شوفتك فيها وربنا زرع محبتك فقلبي ولما عاشرتك معزتك زادت وغلاوتك بقت من غلاوة رحاب بنتى بالظبط ...واما نجمه فدى اعز الولد حفيدتى اللى جاتنى ونورت حياتى من بنتى اللى مخلفتهاش ..
ليل :ربنا يديم المحبه والود اللى بينا ويقدرنى واكونلك البت اللى كل ام عتتمناها ..وقربت منها وباست دماغها بكل حب ...
وليه متعملش كده مع الست اللى لولا وقفتها جمبها كان زمانها خسرت بنتها الوحيده ويمكن كانت خسرت حياتها كمان معاها ..الست اللى قدرت رغم بساطتها وجهلها ترجعلها ثقتها بنفسها وتقنعها ان الحياه لسه فيها كتير لازم يتعاش بعد ماكانت حاسه ان حياتها انتهت بخيانة غريب ليها وصدمتها فيه ..
*******
فى شركه كبيره قاعد نادر على مكتبه غرقان فوسط اوراق كتيره بيراجع فيها بمنتهى الاهتمام .
سمع خبط على الباب رد من غير انتباه :ادخل
دخلت واتقدمت منه بخطوات بطيئه ووقفت قدامه بتتأمله كالعاده، وهو حتى ملاحظش انها بقالها مسافه واقفه قدامه ...لحظات تأملها ليه فغفله منه كل يوم هى الوقود اللى بيديها القوه اللى تكمل بيها باقى يومها ...
من اول يوم شافته فيه تقريبا من ٤سنين وهو محتل كل تفكيرها ...
برغم قلة كلامه وسكوته الدائم وردوده المختصره وانعزاله الدائم الا انها طول الوقت واثقه ان دى مش شخصيته الحقيقيه وان اللى شايفاه قدامها دا ماهو الا قشره خارجيه صلبه اتكونت نتيجة ظروف قاسيه نادر رافض انه يتكلم فيها نهائي ...
وعشان هى عنيده وعارفه هى عايزه ايه بالظبط وبتثق فقلبها واختياره ...قررت انها هتفضل تحاول تكسر القشره اللى مغلفه حياة نادر وتخترقها باى شكل من الاشكال مهما كلفها دا من وقت وجهد ...
نادر رفع عنيه عليها ورجع تانى بص للاوراق واتكلم بدون اهتمام :فيه حاجه ياانسه
فاقت من شرودها بمجرد سماعها لصوته وردت بعد مااتنحنحت : اه يامستر نادر فيه اوراق مهمه لازم حضرتك تمضيها فورا عشان الحق ابعتها بالفاكس .
نادر :حطي الاوراق على المكتب واتفضلى على مكتبك هخلص اللى فأيدى واراجعهم وامضيهم .
هى :بس انا قلت لحضرتك الاوراق مستعجله ولاز...وقبل ماتكمل جملتها رد عليها نادر بحزم .
جرا ايه ياانسه هو انا من امتا بمضى على ورق غميضى من غير مااراجعه وادرسه الاول بدقه وعنايه ؟
المفروض تكونى خلاص حفظتى نظامى ونظام شغلى ...على فكره انا ابتديت ادايق من اسلوبك...وقولتهالك وهقولهالك مليون مره ...مش معنى ان ابوكى صاحب الشركه دا هيديكى عندى اى صلاحيات زياده عن اى وحده تانيه كانت هتكون مكانك ...ودلوقتى اتفضلى على مكتبك ...
مشيت من قدامه زى كل مره وهى مقسومه نصين بين حبها وتمنيها ليه وبين كرامتها اللى طول الوقت بيهينها بتجاهله المستمر وصده ليها ..
الحلقة الثانية
.
.
رواية / فرعون - ج3
علقوا هنا ب 10 ملصقات
الجزء الثالث دة كان هينزل بعد 3 ايام
لكن لو لقيت 100 كومنت - هبدأ انزل الحلقات ع طول و بانتظام - يلا تفاعل بلاش كسل بقي
🔴🔴🔴🔴🔴🔴🔴🔴🔴🔴🔴🔴🔴🔴🔵
.
.
.
قاسم اخد الطياره وطار على سينا واول ماوصل المطار اتلفت حواليه فكل حته لعل وعسى يلاقى غريب مستنيه ،او باعتله حد ياخده بعربيه لكنه اتنهد بحسره لما ملقاش حد واخد تاكسى وراح بيه عند غريب ..
دخل القسم واول ماالعسكرى ايوب شافه وقف وضرب تعظيم سلام
قاسم :الباشا جوا يبنى
ايوب :لا الباشا قاعد فمكانه الخصوصى ...ومشى قدام قاسم وهو بيدله ووقف وشاورله على غريب ورجع تانى مكملش معاه .
قاسم اتقدم من غريب اللى كان قاعد متكى على كرسى ومادد رجليه ومربع ايديه وحاطط الكاب بتاعه على وشه .
غريب :اهلا بالبرق
قاسم :طب وربنا بتعشقنى ..دانتا بتشم ريحتى ياجدع
غريب :وانتا الصادق بشم ريحة غبائك من على بعد ١٠٠كيلو ...انا مش قايلك قبل كده ان المكان دا محدش يقدر يقربله طول منا قاعد فيه ...لكن اقول ايه ..منتا لو مش غبى متبقاش قاسم .
قاسم :تعرف ان مفيش حد بيغلط فيا وانا فمنصبى دا ومكانتى دى غيرك انتا ...وبرغم كده بستحملك ومش بزعل منك ...بحبك مش بأيدى
غريب :عارف انك بتتنيل بتحبنى و اى حاجه بتعملها بتكون من منطلق حبك ليا وعشان كده انا سايبك عايش وبتشم الهوا لحد النهارده .
قاسم :اخ لو اعرف بس انا عملتلك ايه خلاك شايل منى فقلبك كل دا ومتغير عليا سنين ؟!
والله براجع نفسى كل يوم عشان الاقى غلطه غلطتها فحقك مش بلاقى نفسى عامل اى حاجه .
غريب : تعرف انتا عامل زى ايه ياقاسم ...انتا عامل زى الدبه اللى قتلت صاحبها من كتر حبها فيه وخوفها عليه ....عموما سيبك من الكلام دا وتعالا اطفحلك لقمه بالسم الهارى تلاقيك جعان .
قاسم :ياعم اكل ايه وبتاع ايه انا نفسى تاخدنى فحضنك زى زمان واحس انك غريب حبيبي بتاع المدرسه العسكريه والكليه وايام الشغل والكحرته ..
غريب رفع الطقيه بأيده وبص لقاسم بنص عين وبعدها اتعدل وقاسم اول ماشاف كده ابتسم ابتسامه واسعه وفرد ايديه لكنه كشر تانى وهو شايف غريب بيتخطاه وبيمشى من جمبه
قاسم نزل ايديه وبص حواليه بأحراج واتنحنح وهو بيعدل الكرافات بتاعته ومشى ورا غريب .
قاسم :ياتري بقا غريب حبيبي جايبلى اكل ايه ...اكيد حاجه ٥ نجوم طبعا ..
غريب :اكيد ...انتا عارف انا فالكرم ومعاك انتا بالذات مبستخسرش ...
عموما ياسيدى وارضاءا لفضولك انا شاويلك حتة تعبان يستاهل بوقك ...لسه ماسكينه العساكر النهارده الصبح طازه من ورا المبنى ..
قاسم :يااااه ..شوف يااخى الواحد لما بيكون رايح لمكان فيه حد معرفه المقابله والترحيب بيبقو غير برضو ..تحس انك برنس فقلب المكان كده ..
غريب :امال ايه ياراجل دانتا حبيبي ...على فكره نوع التعبان من ابو جرس كمان عشان لو حكيت لحد عالعزومه تتفشخر بالنوع .
قاسم :وهو انا هلحق احكى ولا اتكلم ...طب حيث كدا بقا اوعى تكون رميت الجرس عشان بعد ماآكل هعلقه فرقابتى وارجع بيه لجواهر عشان تفرح بيا
غريب كمل الطريق وهو ساكت ومردش على قاسم ...
دخل غريب المكتب وقعد على مكتبه ونادى على العسكرى ايوب وقله يجيب الاكل وايوب غاب شويه ورجع بصينيه فيها فراخ وكباب وكفته شوى وسلطات وحطها على الطربيزه وادى التحيه وخرج .
غريب طفى السجاره اللى كان مولعها وقام قعد قدام قاسم وابتدا ياكل وقاسم باصص عليه وهو بياكل ولا منتبهله ..
غريب :ايه مستنى اعزم عليك ولا ايه ..متاكل مش متعود منك الادب دا انا ..
قاسم هز ايديه ومسك صابع كوفته واكله وابتدا ياكل ومفيش ثوانى وغريب قال الحمد لله وقام قعد على مكتبه وفتح منديل مبلل ومسح ايديه وولع سجاره وفتح اللاب توب وابتسم كالعاده وهو شايفها وبيمشى ايده على صورتها .
قاسم :لسه برضو محتفظ بالصوره ياغريب ؟
غريب :وهفضل محتفظ بيها عمرى كله لحد مالاقيها هى وامها .
قاسم :اعقل ياغريب وانسى عشان اللى راح مش بيرجع تانى وخصوصا لو عدى على غيابه سنين ...
امسح صورة بت الناس اللى حاطها قدامك دى ليل نهار ومتنح قدامها وعيش حياتك ...
ارجع لمراتك اللى راميها دى وخلفلك حتة عيل من لحم ودم تلعب معاه مش صوره مفهاش روح ..
غريب لف اللاب على قاسم بعنف وشاورله على صورة البنت :بصلها ياقاسم ..بصلها كويس وحط عينك فعينى وانكر الشبه اللى بينى وبينها ..وزعق بكل صوته ...قولى دى مش بنتك ياغريب ..مش حته منك .
قاسم بلع ريقه وهو شايف غريب فاللحظه دى ممكن يقتل اى حد يحاول انه ينفى ابوته للبنت اللى فالصوره دى وسكت وهو بيراقب غريب اللى اتحول لبركان غضب .
غريب قعد وهو بينهج ولف اللاب عليه وحالته اتغيرت من النقيض للنقيض فثوانى وهو بيبص للصوره
لو مش بنتى زى مابتقول ..تقدر تقولى ليه قلبي بيرفرف فكل مره ابص فيها لصورتها ..
تفسر بأيه احساسى باللهفه والشوق ليها لما افضل ساعات بره المكتب من غير مااشوفها ولا ابصلها ... الشبه ..
لون العنين اللى نفس لون عنيا ...
شعر ليل الاسود الطويل ...
سمارها ..
دى بنتى ياقاسم ..والله بنتى نجمتى ..طب الاسم هو كمان صدفه ؟ ..الاسم دا انا اللى مختاره وقلت لليل انى لو خلفت بنت هسميها نجمه ...مهما كانت الصدف متتراكمش كده مره وحده .
بلااااش كل ده ...ليه لما واجهتها انى عرفتها قفلت حسابها علطوا وحتى الرقم اللى كان عليها اتقفل فساعتها ؟
قاسم :الخوف ..خافت ياحبيبي..مستنى ايه من وحده قاعده على صفحتها فأمان الله ومره وحده تلاقى عقيد دخلها خاص وبيقولها انتى ليل ...ايش عرفها ليل دى مين وعامله مصيبة ايه والشرطه بتدور عليها ؟ وان كان عالشبه يخلق من الشبه اربعين ..مهو اصل ياغريب ياحبيبي دى لو بنتك زى مابتقول ليه ليل مختفيه بيها ...ليه سابتك ؟
ليه طيب هتهرب ببنتها وهى مكانش ليها مكان غير حضنك وبيتك ؟ اقتنع بقا ياغريب ان ليل دلوقتى ممكن تكون....
وسكت وهو شايف الغضب اترسم على ملامح غريب بشده ..
غريب :ليل بخير ياقاسم محصلهاش حاجه .ليل ضاعت وانا اللى ضيعتها ...لكن هى عايشه وبخير انا متأكد...وكمل بعد ماغمض عنيه
ياترى حبيبتى عامله ايه دلوقتى ؟عايشه ازاى ؟ معيشه بنتى ازاى ..
ياترى الدنيا عملت فيها ايه طول السنين اللى فاتت دى ...اااااه ياليل الغريب من يوم مارحتى راحت معاكى كل حاجه حلوه .
قاسم اتنهد بغلب : الظاهر انك هتفضل كده لباقى عمرك ..خلاص مبقاش الكلام ينفع معاك ...
غريب :سيبك منى بس انتا وقولى جاى ليه .
قاسم :ميمشيش معاك وحشتنى ؟
غريب هز دماغه برفض وهو بينفخ دخان سجارته
قاسم :طيب حيث كدا بقا انا جاى عشان فيه انفجار مخدرات حصل فالبلد وبعد رصد مداخل ومخارج البلد كلها واى منفذ ممكن تدخل منه البضاعه لشهور واحنا مش لاقيين حاجه...
اليومين دول اتأكدنا ان البضاعه بتدخل البلد من سينا نظرا لانها اول مكان بيظهر فيها الانواع الجديده من المخدرات ...يعنى العصابه اكيد ليهم نفق هنا بيقدرو يطلعو ويدخلو منه من البلد ويدخلو من خلاله البضاعه فى سريه تامه .
غريب هزله دماغه برفض وهو بيطفى سجارته بعد ماولع منها وحده تانيه :لا مفيش انفاق انا فجرتهم كلهم ...
قاسم :معلش هنعمل تمشيط انا وانتا للمنطقه وهتخلى العناصر اللى عندك ورجالتك تفتح عنيها وتنسق مع الجيش كمان يمشطو الصحرا شبر شبر ..
غريب :ماشى ...بس مش هتلاقى حاجه انا بقولك من دلوقتى متتعبش نفسك وصب تركيزك فأى حته تانيه غير هنا عشان مفيش حاجه هنا .
قاسم : وانا مصمم ان البضاعه بتدخل البلد من هنا .
غريب :طيب يلا قوم روح ناملك شويه عشان خلاص انا مش طايق اشوفك قدامى هنا .
قاسم بص لغريب وكشر وقام وراح على الباب ولف لغريب قبل مايخرج ...
شكرا على الاكل... التعبان كان سمين ودسم ورمى لحمه كتير بصراحه
غريب بصله نظره خاطفه ورجع تانى يبص للاب ومردش وقاسم هز ايديه بقلة حيله وخرج وايوب اول ماشافه ضربله التحيه ومشى معاه لغاية اوضة غريب وفتحهاله ودخله
قاسم :هاتلى الشنطه الصغيره اللى بره فالمدخل يبنى
ايوب :تمام يافندم ..وخرج بسرعه جاب شنطة قاسم الصغيرة الحجم وادهاله وقفل الباب ورجع قعد مكانه على باب مكتب غريب..
قاسم اول مادخل الاوضه طلع الغيار اللى جايبه ودخل الحمام الملحق فالاوضه واخد حمام وغير وخرج قعد على السرير وطلع تليفونه ورن على جواهر .
قاسم اول ماسمع صوت جواهر :ايوه ياجوجو عامله ايه ياروح قاسم واركان حبيب بابا عامل ايه ..والنونه اللى فبطنك عامله ايه
جواهر :احنا كويسين وزى الفل ياحبيبي طمنى على نفسك انتا كويس .
قاسم :انا تمام ..بقولك ايه اوعى تسيبى اركان لوحده فحته وحده مع خالك احسن يعمل للواد حاجه اصله بيغل منه اوى اكمنه صاقر عياله ومعلم عليهم ..دا ممكن ياخده يسربه بره من وراكى ويقول مشفتوش ..ماهر جبار ويعملها انا عارف .
جواهر :حرام عليك دا خالو بيحب اركان اوى وبيعامله زى ولاده ..مع ان بصراحه الراجل لو طردنا من بيته يبقاله كل الحق بعد عمايل ابنك الشنيعه دى فأولاده ...بصراحه انتا بوظت الولد دا ياقاسم وخليته عدوانى جدا ودا مش كويس .
قاسم :بس اسكتى انتى ايش عرفك ..انا بربي ظابط ياامى ..لازم يطلع شديد من صغره وله هيبته وسط الكل .
جواهر :منطق معفن
قاسم :شكرا الله يكرمك ..غورى نامى ياجواهر ومتكتفيش الواد ولا تعاقبيه وتخليه يخاف منك او من اى حد ...انا عايز ابنى يطلع اسد زى ابوه ومد ايده ملس على شنبه ..
جواهر ضحكت وقفلت الكلام مع قاسم لانها عارفه انها لو فضلت تسمعله هيفضل يرغى معاها للصبح مش هيزهق وهى تعبانه ومش مستحمله ...
طيب تصبح على خير وناملك شويه .
قاسم :مسألتيش عليه يعنى .
جواهر :ولا هسأل ...دا بنى آدم خاين ..مصدق مراته تختفى ومفيش شهرين وكان متجوز عليها ..ومين ؟ خطيبة اخوه ...لعلمك بقا انا هفضل عند رأيي ان غريب هو السبب ورا اختفاء ليل ...اكيد هو واميره قتلوها لما اكتشفت ان فيه مابينهم حاجه فقالو نتخلص منها قبل ماتفضحنا ...واكيد غريب اتخلص من الجثه بطريقه محترفه مهو ظابط بقا ومش هيغلب ..
قاسم :والله بأذن الله لما اوصل عندك اول حاجه هعملها هحزفلك قناة
زى الوان اللى بوظت دماغك دى وخلتك تحللى تحليل هندى خالص ..
روحى ياجواهر اتخمدى .
جواهر :طب تقدر تقولى انتا ايه اللى حصل ؟
قاسم :لا مقدرش ومتكلمنيش فالموضوع المعقرب دا تانى ولا تسألينى على اى حاجه بخصوصه..
بقولك ايه انتى هتنامى ولا صاحيه ندردش شويتين تلاته اربعه مع بعض .
جواهر :لا لا لا هنام سلام ..وقفلت السكه .
قاسم :ايوه كده ناس تخاف متختشيش ..
وقفل السكه ونام وشبك ايديه تحت دماغه وبص للشباك وهو بيفكر فحالة غريب وبيرسم
خطته للقبض على العصابه ونام بعد ماتعب من التفكير
***********
نادر رجع البيت بعد يوم شغل طويل وفتح باب الشقه بمفتاحه ودخل وزى كل يوم لقى امه فأنتظاره بابتسامتها الحنونه ...بادلها الابتسامه وراح عليها باس دماغها واترمى جمبها على الكنبه بأرهاق ..
سميه :علفكره انتا مش بتجهد نفسك فالشغل وبس لأ دانتا اللى بتعمله دا اسمه انتحار يانادر ..خاف على نفسك شويه ياحبيبي ..
نادر بتنهيده : الله على كلمة الراحه دى ياامى اد ايه واحشانى وواحشنى احساسها اوى ...بقالى كتير اوى مشفتش ولا حسيت براحه لدرجة انى نسيت حتى الكلمه ..
سميه :لسه نار قلبك مبردتش ياقلب امك ؟
نادر :ولا هتبرد ...بالعكس كل يوم بتزيد لغاية ماحرقت كل حاجه جوايا وحولتها لرماد ..اتمدد على الكنبه وحط دماغه على رجل امه وربع ايديه وبص للسقف واستسلم للمستها الحنونه وتمسيدها لفروة راسه واتكلم بهمس ..
نفسى ارجع عيل صغير تانى ياامى ...نفسى ارجع نادر اللى قلبه فاضى ومرتاح وضارب الدنيا صرمه
سميه :ياحبيبي الراحه كتير بتكون قدامنا بس لانها دايما قدام عنينا مبناخدش بالنا منها .
نادر :تقصدى ايه
سميه :اقصد سيليا يانادر بنت خالك اللى لو لفيت الدنيا كلها مش هتلاقى ضفرها ...جمال وادب واخلاق وتعليم ووظيفه وفلوس وبصراحه بنت اى واحد فالدنيا يتمناها .
نادر ضحك بخفه وحط ايده بين عنيه :لا يمكن دا يحصل ابدا
سميه :ليه بقا ؟
نادر :انتى بتحبي بنت اخوكى دى اد ايه ياماما ؟
سميه :بحبها جدا وبعتبرها بنتى اللى مخلفتهاش هى وسيلين اختها .
نادر :لو بتحبيها فعلا متحاوليش تخلينى ارتبط بيها او تديها مجال انها تفكر فيا لانك بكده هتبقى بتأذيها اكبر اذي فالدنيا وهتخليها تتحمل غلطات ناس تانيه هى ملهاش ذنب فيها ..وهحاسبها على ذنب مرتكبتوش
سميه :لحد امتا يانادر
نادر :لحد مااموت ياماما
سميه بشهقه :بعد الشر عليك من عمرى على عمرك ...قوم قوم خدلك شاور لحد مااحضرلك الغدا ..
نادر اتعدل ولسه هيقوم سمعو صوت جرس الباب وخبط على الباب هما متعودين عليه وعارفينه كويس .
نادر :استلمى المجنونه بنت اخوكى جت اهى ...وقام ودخل اوضته وقفل الباب عليه .
سميه فتحت الباب وسيليا دخلت وهى بتتلفت شمال ويمين وميلت على عمتها ووشوشتها ...امال فين المحروس ابنك الرجل الغامض بسلامته ..
سميه بضحكه :بس يالمضه ليسمعك ويخرج يعلقك من شعرك فالمروحه ..
سيليا :بس يعلقنى ولا يبدى اى رد فعل اعرف منه انه بنى آدم زينا كده وبيتفاعل وبيتأثر ...دنا طول النهار معاه فالشغل عملاله اراجوز انه يفك ولا يتكلم اااابداااا .
سميه :معلش اصله بيمر بظروف صعبه واعصابه تعبانه اعذريه ومتضغطيش عليه ومتاكده انه هيفك دلوقتى وهتكتشفى نادر الفرفوش اللى هتحلفى ان مفيش بنى آدم فالدنيا فجماله ولا خفة دمه
سيليا : يااااا عمتو ارحمينى دانتى بقالك ٤ سنين بتقولى الكلام دا ..معقوله لسه بيمر بنفس الظروف طول ال ٤ سنين ؟هى الظروف دى زى العمل السفلى المتجدد كده كل ماتيجى تخلص بتتجدد من اول وجديد ؟
سميه :بس يالمضه اسكتى وتعالى حضرى معايا الغدا ويلا عشان تتغدى معانا .
سيليا :مانا جايه عشان كده اصل مفيش حد فشقتنا خالص قلت اتغدا مع عمتو بقا بدال ماكل لوحدى .
سميه :احسن حاجه عملتيها ..تعالى .
سيليا :مش هتحكيلى الظروف اللى بيمر بيها ابنك وتشركونى معاكم فى سر نهاية العالم اللى شايلينه لوحدكم دا .
سميه :لا
سيليا :طب ظرف واحد حتا .
سميه :سيليا بطلى رغى ...وبعدين تعالى هنا قوليلى انتى مش قولتى انك خارجه مع سيلين النهارده بعد الشغل تشترو حاجات وعلى اساس كده مرحتش الشقه عندكم ولا طبخت وقلت عامر هو كمان هيتغدى بره بالمره واقضيها انا ونادر باى حاجه ...رجعتى ليه قوليلى ..
سيليا :سيلين مرضيتش تاخدنى معاها وقالتلى هروح لوحدى وانتى ابقى روحى لوحدك...محدش فيهم بيحبنى ...
سميه :مهو من عمايلك ولسانك الطويل ..انجرى قدامى عالمطبخ يابلوه على رأى واحد اعرفه .
سيليا برطمت ودخلت قدام عمتها المطبخ وابتدت عمتها تغرف الاكل اللى اتعلمت تطبخه بمهاره من ساعة ماجت للامارات وحست انها مسئوله عن عيله ولازم تقوم بكل واجباتها ..
بس الغريب انها بقت طباخه بريمو وحتى هى مكنتش مصدقه نفسها ولا كانت تتخيل انها ممكن تعمل سفره كامله لوحدها وهى عمرها ماناولت لنفسها كباية ميه ولا دخلت المطبخ غير لاعطاء الاوامر ..
سيليا :الله ...منتى طابخه اهو ! بتضحكى عليا ؟
سميه :منا غيرت رأيي فآخر لحظه وطبخت يالمضه ..امسكى ودى على السفره .
خرج نادر من اوضته بعد ماخلص حمامه بالتزامن مع اخر طبقين كانو شايلينهم سيليا وسميه وقعد على السفره وابتدا ياكل بدون انتباه للى قاعده قصاده وعنيها مطلعه قلوب وهى بتتأمله وبتتأمل كل حركاته .
*********
اما عند ليل ...
الباب خبط وليل وفريال قاعدين مع بعض فشقة ليل وبصو لبعض وابتسمو لما عرفو مين عالباب من خبطتها اللى زى الطبله .
فريال :بنتى حبيبتى رحوبه وهتقوم عشان تفتح لكن ليل سبقتها وقامت وراحت على الباب ..خليكى ياخاله انى هفتحلها المشتوته دى ...وفعلا فتحت الباب وكالعاده لقت رحاب دخلت فحضنها من غير احم ولا دستور ..
رحاب :ليلو وحشتينى اوووى ...
وجريت على امها لما شافتها على الكنبه وقدامها كوم بسله وبتفصص ...
ماااماااتو حبيبة قلبى فريال خانوم وحضنتها..
فريال ضربتها ضربه خفيفه على كتفها ...قولتلك ١٠٠ مره متشبهنيش بالوليه المفتريه دى .
رحاب :مفتريه بس قمر زيك كده ياجمل ..
فريال ابتسمت على شقاوة بنتها وضمتها لحضنها جامد وهى بتقولها ..وحشتينى ياقلب امك ..ربنا يقرب البعيد وتخلصى وتقعدى معايا بقا يارب
رحاب بزعيق :لا يارب اوعى تسمع منها انا هخلص واتجوز مش هقعد معاها ...ارزقنى بابن الحلال اللى بتمناه يارب ...
فريال زقتها من حضنها :مسروعه عالجواز كده ليه ..اخدو ايه اللى اتجوزو ياموكوسه
رحاب :اخدو حجات كتير اوى ياست الكل متحرميش بنتك منها بدعواتك الجميله دى ..
وقامت مره وحده وسقفت ونطت :فين نجمتى
ليل :نايمه جوا
رحاب :لا نايمه ايه تصحى فورا دى وحشانى اووووى ..وجريت على الاوضه وهى بتنادى على نجمه بعلو صوتها .
ليل بصت لفريال اللى مراقبه بنتها بابتسامة حب وقالت :بتك مجنونه ياحجه
فريال بضحكه :عارفه من زمان ..بس الحاله كل مادا وتزيد ربنا يسترر وتقف على اد كده .
مفيش ثوانى وسمعو صوت نجمه ورحاب وهما بيضحكو مع بعض وبيصرخو بأسامى بعض .
ليل بصت لفريال :بتك المجنونه جننت بتى ياحجه .
**********
اما عند ماهر فالفيلا ...
قاعد فأوضة اولاده على السرير بتاع بنته وايده بتتخلل خصلات شعرها وباصص لبعيد وسرحان .
موده :لااااه دانتا فعالم ماوراء البحار خالص .
ماهر انتبه لموده :هاه ..كنتى بتقولى حاجه يامودتى ؟
موده :صحى النوم دنا قلت وقلت وقلت وبقالى ساعه برغى مع نفسى .
ماهر اتنهد وهو بيمدلها ايده :اعذرينى ياروحى مخدتش بالى والله .
موده قربت منه وحطت ايدها فايده وقعدت جمبه :ممكن اعرف حبيبي بيفكر فأيه مخليه مش فالدنيا خالص كده ؟
ماهر :زعلان على المرحله اللى وصلولها اولادى اوى ياموده ...
الاتنين بعدو عنى وسابونى وانا فعز احتياجى ليهم ...وغير كده الاتنين مقاطعينى ومحدش بيسأل عليا غير كل فين وفين ومقاطعين بعض خالص ...نفسى اعرف حصل ايه مابينهم وصلهم لكده ؟
وايه اللى خلى الاتنين كل واحد فيهم طفش على بلد ولبد فيها ومش عايز يسيبها ولا يرجع ...وانا تعبت ..تعبت اوى من الشغل ومن التفكير ودماغى تعبت ونفسى ارتاح ...بعد ماسلمت كل حاجه لنادر وبقا بزنس مان شاطر جدا وفرحت بيه وقلت هيريحنى وارتاح طفش وساب البلد كلها زى ماتكون ندهته النداهه .
موده قربت منه واخدته فحضنها لما حست بتعب روحه :معلش والله هيرجعو وتبص تلاقيهم حواليك من تانى وماليين عليك الدنيا هما واحفادك ....انا متأكده من ده بس هى مسألة وقت مش اكتر ...
ماهر :وقت اد ايه ياموده وهما ليهم ٣ سنين على الوضع دا .
موده :قريب اوى والله بس انتا ادعيلهم بالهدايه .
ماهر :والله بدعيلهم فكل صلاه بالهدايه وانهم يرجعو لحضنى من تانى ....وبص لاولاده دياب وماجده : حتى عالاقل كانو شالو معايا حمل تربية اخواتهم والعيال اتعلقو بيهم وكانو هيعوضوهم عن غيابى لو موت ولا جرالى حاجه ..
موده شهقت واتكلمت بفزع :اوعى تقول كده ..اوعى تجيب سيرة الموت تانى سامع ..ربنا يحفظك لينا ويديك الصحه وطولت العمر لغاية ماتجوزهم وتشوف عيال عيالهم كمان ..
ماهر بصلهم واتكلم بضحكه حزينه :يااااه ..عيال عيالهم ...يامين عالم ياموده العمر نهايته فين وامتا .
موده :ماهر هزعل منك والله ...انتا عارف مبحبش سيرة الموت والفراق دى وقلبي بيتقبض منها اوى ...
وحطت ايدها على قلبها بخوف من مجرد التفكير فان ماهر ممكن ييجى يوم ومتلاقيهوش حواليها ..وقالت لنفسها ..دانا كنت اموت معاه والله ...
فضلو شويه يتكلمو مع بعض وغيرو الموضوع وبعدها ماهر طلب من موده تجيبله الظرف اللى فاوضتهم وفعلا موده عملت كده وقامت جابتله الظرف اللى طلبه وهو اخده منها وخرج راح على جميله اللى كانت قاعده فالهول هى وجواهر بنتها ومنيمه اركان فحضنها وبيتفرجو على التلفزيون ..
ماهر قعد جمب جميله اللى ابتسمتله ابتسامه حنونه اول ماشافته جاى عليها ...
ماهر مدلها الظرف :خدى ياجميلتى ...
جميله مدت ايدها ومسكت الظرف باستغراب :ايه دا ياحبيبي ؟
ماهر :دا نصيبك من ارباح السنادى .
جميله فتحت الظرف وبصت لماهر وبرقت عنيها :بس دا كتير اوى ياماهر ؟
ماهر :مش كتير ولا حاجه دا حقك بحلال ربنا ونصيبك من الارباح بالمليم ...
جميله :ياحبيبي انا والله مش عايزه ولا فلوس ولا ارباح ولا حاجه ...هعمل ايه بالفلوس منا عايشه فخيرك اهو ومش منقص عليا حاجه ..يبقا لزمتها ايه الفلوس دى .
ماهر :دا حقك ياحبيت اخوكى وحق بنتك وبعدين خيرى ايه اللى عايشه فيه ياعبيطه انتى ...دانتى لو جيتى للحق احنا كلنا اللى عايشين فخيرك ...انتى ناسيه ان فلوسك دى هى اللى خلتنى قدرت اقف على رجلى من تانى من بعد ماكنت على شفا الافلاس ولا ايه ؟
جميله :ياحبيبي انا وانتا واحد مفيش اى فرق بينا ...وحقيقى مش عارفه هعمل ايه بالفلوس دى كلها انا ...
ماهر بص لجواهر :احممم ...انا عندى فكره لو مش عارفه تصرفى فلوسك فأيه ...انا بقول تشتري بيت وحتتة ارض فجزر المالديف وتديها لبنتك وتخليها تاخد ابنها وجوزها وتروح تسكن هناك ويريحو اعصابهم علطول وانا ارتاح من قاسم وابنه باقى عمرى .
جواهر ضحكت على كلام خالها :ياه ياخالو للدرجادى ...والله قاسم طيب اوى و بيحبك .
ماهر ابتسم : انا عارف والله انتى هتعرفينى قاسم ...انا بهزر ، طب انتى تعرفى ان وجود قاسم حواليا هو اللى مخفف عنى غياب ولاد خالك ومحسسنى ان واحد من ولادى لسه موجود جمبي .....بس دا ميمنعش انه عيل رزل ... وبص لاركان ..ومخلف عيل ارزل منه بمراحل ...ومد ايده على اركان ونعكش شعره بضحكه وهو بيقله :هذا الشامبنزى من ذاك القرد ... وجميله وجواهر بصو لبعض وضحكو على كلام ماهر ...
ناديه طالعه من المطبخ بطبق فاكهه وماسكه تفاحه وبتاكل فيها وبصت شافتهم بيضحكو ابتسمت وقربت قعدت جمب ابوها وحطت الطبق على الطربيزه وقربت منه وحضنت دراعه وحطت دماغها على كتفه ....افضل اضحك والعب مع العيال الكتير اللى ملت البيت دى ودلع فيهم وخليك ناسى نودى حبيبتك ...
ماهر رفع دراعه وحضن ناديه وباس جبينها :ياخبر ..وهو انا اقدر انسى حبية قلبي والقمر بتاع البيت ...دانتى اكبر فرحه عدت على قلبي يانودى اوعى تنسى دا ....
جواهر :معلش اعذر غيرتها ياخالو ..وخد بالك وانتا بتلعب مع ميجو ودوبي عشان بتبقا بتبصلكم وهى شايطه من الغيره .
ماهر ضحك :لا ياجواهر ماقوليش على نودى كده دى كبيره وعاقله وكلها مش عارف اد ايه وتتجوز وتبقا اشطر ست بيت وام اد الدنيا وهتعرف ان الولاد كلهم نفس المعزه والغلاوه ...
ناديه اتنهدت بغلب : امتا بقا
ماهر بصدمه :بنت ...؟! اختشى عيب
ضحكت ناديه وضحكو جميله وجواهر عليها وعلى ماهر وهى دفنت دماغها فحضن ابوها اكتر وهى بتقوله : متخفش مش هتجوز واسيبك قاعدالك هنا ...وبعدين انا عايزه واحد يكون زيك انتا وغريبو بالظبط فحنيتكم وطيبة قلبكم ..واظن دا انسان نادر الوجود دلوقتى ...واتنهدت لما افتكرت غريب ...وحشنى اوووى غريبووو يابابا .
ماهر :ومين سمعك ياناديه يابنتى ..دا طول ماهو بعيد عنى واخد حته من قلبي وروحى معاه ...
جميله :ربنا يهديه ويرجعهولنا بالسلامه ويرده ليك ردا جميلا ياحبيبي هو ونادر يارب ...
ماهر :آمين يارب العالمين ..
***********
اما عند غريب .
غريب قام من على مكتبه واتمدد على الكنبه وفضل يدخن وهو باصص للسما من شباك المكتب وابتسم وهو شايف نجمه وحيده سايبه كل اخواتها ونايمه فحضن القمر وافتكر اليوم اللى شافها فيه لاول مره مع ليل وهما نايمين فاوضتهم بعد ماسمعو خبر حمل جواهر ...
ليل :نن عينى سرحان وعيفكر فأيه ؟
غريب :بفكر فاليوم اللى هتبلغينى فيه انك حامل ...متتصوريش فرحتى وقتها هتكون عامله ازاى .
ليل بتوتر :رربنا يسهل .
غريب مد ايده على بطن ليل بيتلمسها ...متتخيليش انا منتظر اليوم دا بفارغ الصبر ازاى ...بصى ياليل كده ...وشاورلها على السما ...شايفه النجمه المميزه اللى سايبه اخواتها ونايمه فحضن القمر دى ...
ليل بصت للسما على النجمه وابتسمت :ايوه شفتها ..شكلها حلو قوى وليها لمعه مختلفه عن باقى النجوم ...
غريب : هى فعلا مختلفه عن الباقيين ...انا لو ربنا كرمنى وخلفت بنت هسميها نجمه ...واتمنى تطلع زى النجمه دى ...متمرده وجريئه وليها مكانه خاصه دونا عن غيرها ...عشان يبقا معايا الليل ونجمته ...
ليل قربت منه وحطت دماغها على صدره وابتسمت :وانتا هتبقا القمر اللى حاضن النجمه ومنور عتمة الليل ...
غريب باسها وخلل ايده فشعرها كالعاده واخد خصله منه وشمها ...
غريب فضل مبتسم ومستسلم للذكرى ومفاقش منها غير وهو بيحس بلسعة السجاره اللى خلصت بين صوابعه وهو مش منتبه ...رماها وقام على مكتبه وفتح الدرج وطلع علبه حطها قدامه وفتحها وطلع منها ضفيرة ليل وشمها وغمض عنيه واتنهد بحسره والم ...
بعد الضفيره عنه وحطها مكانها وطلع تليفونه وعمل اتصال وهو باصصلها وجاله الصوت على الخط التانى بعد اول رنه ...
غريب :ايوه يافتحى ...ايه الاخبار ..لسه مظهرتش عندك ..
فتحى :له يابيه لسه مخطتش البلد ولا عتبت ...وانى الله وكيلك ليل نهار عينى على بيتها وقاعد على المصطبه قدامه ومرتى عينها على القرافه معنغفلوش ...
غريب اتنهد :طيب خلى بالك يافتحى وفتح عنيك كويس اوى ..ومتقلقش شهريتك هتوصلك فمعادها ..ولو جبتلى خبر رجوعها البلد ليك عندى مكافأه كبيره اوى اوى ..ومتنساش محدش من اهل البلد يعرف اللى بينى وبينك ابدا ...
فتحى :متخافش يابيه محدش عارف ايوتها حاجه ...وربنا يسوقها لمنا ويعترنى فيها عشان آخد المكافآه يارب هيهيهيهيه ...
غريب قفل مع فتحى وربع ايديه على المكتب ودفن دماغه وسطهم بتعب وهو بيسأل نفسه نفس السؤال اللى بيسألهولها كل ثانيه...ياترى انتى فين ياليل ....
*********
اما عند ليل ..
يبتى اقعدى انتى جايه من مدرستك ترتاحيلك يومين هتشقى فيهم ليه ؟
رحاب :وهو الشغل شقا ياليل؟...
وبعدين انا بحب الطبخ اوى ونفسى اتعلم اطبخ وابقا شاطره ونفسى حلو فالاكل زيك كده بالظبط .
ليل : له اطمنى طول منتى حابه الحاجه هتتعلميها وتبقى فيها بريمو كمان .
رحاب :بس انا اسمع ان الطبخ نفس قبل اى حاجه ياليل .
ليل :له يارحاب الوكل حب مش نفس ....يعنى مثلا انتى لو هتعملى الوكل لحد عتحبيه ونفسك تبسطيه هتعمليله الوكل بنفس مفتوحه وهيطلع من تحت يدك احلى وكل لو حتى كنتى طابخاه بميه وملح بس .
انما لو عامله الوكل لحد عتكرهيه هيطلع من تحت يدك زى السم وميتبلعش لو حاطه فيه كل توابل وبهارات الدنيا وطابخاه على مرقة عجل بحاله ...
رحاب :طيب منتى بتطبخى لناس متعرفيهمش ولا بتحبيهم والاكل بيطلع تحفه !
ليل :بس عحب شغلى واللى ععمله ..عحب وكل عيشى وعطبخ من قلبي .
رحاب :تعرفى ان كل مادا بتعلم منك حاجه جديده ياليل محدش بيعلمها فالمدارس ولا موجوده فالكتب..برغم انك متعلمتيش فمدارس قبل كده وطول عمرك معتمده على نفسك ومجهودك ...
ليل :العلام مش فالكتب بس يارحاب ..العلام فالدنيا اللى حوالينا ..فكل موطرح ومع كل حاجه عنمرو بيها فيها علام والجدع اللى يزاكر الدرس اللى الدنيا علمتهوله ويحفظه زين قوى ...
ليل لفت تقلب فالاكل وملامحها اتغيرت للحزن ورحاب لاحظت دا وادايقت لانها متأكده ان ليل فاللحظه دى افتكرت غريب واللى عمله معاه ولما بيحصل دا بتفضل طول اليوم قافله ومكتئبه وحالتها سيئه جداا ...
رحاب فمحاوله منها انها تغير مود ليل قبل ماتتغلغل فحالة الاكتئاب سألتها ...هاه قوليلى عامله ايه فدروسك ومزاكرتك .
ليل :ولا حاجه كله ساهل وحافظاه وعارفاه مفيش غير الانجليزى بس هو اللى واقف فزورى ومش راضى ينزلى من زورى الا بالعافيه وبالدروس .
رحاب :معلش هو الانجليزى رخم بس انتى شطوره وقدها وقدود
ليل :ايوه ايوه ادينى من مقويات العزيمه ودوافع لاستمرار ديه اكتر ..قوينى .
رحاب :انتى مش محتاجه حد يقويكى ياليل ...اللى مرت باللى مريتى بيه ولسه معافره وواقفه على رجلها دى تبقا اقوى ست فالعالم ...
تبقا المرآه الحديديه .
هما الاتنين انتبهو لما سمعو صوت نجمه وراهم ..رحاب انا خلصت ..
رحاب مدت ايدها مسكت منها الكراسه وشافتها كاتبه الحرفين اللى علمتهوملها صح وسقفتلها وشالتها وباستها :براااافوووو نجمتى الجميله الشطوره ...وعشان الخط الجميل دا انا هاخدك وننزل نتفسح انا وانتى ونروح الموووول ..
نجمه بفرحه :يس..يس...يس.. احلا رحاب .
رحاب فضلت تتنطط وهى شايله نجمه ونجمه تضحك وفرحانه واثناء ماهما كده دخلت عليهم فريال ..
فريال :يبت اهمدى وبطلى تنطيط هتوقعى السقف وتهدى البيت على دماغ اللى فيه وهو قديم ودايخ لوحده ..
رحاب :ياماما هو انتى شايفانى فيل ؟ دنا كل وزنى ٦٠ كيلو عمى
فريال :وهما ٦٠ كيلو شويه لما يتشالو ويتهبدو عالارض ؟
رحاب بطلت تنطيط وبصت لنجمه : تفتكرى احنا ممكن نوقع البيت فعلا ؟
نجمه هزت دماغها لرحاب وهى بتضحك ..
رحاب قربت منها ووشوشتها :طب تعالى ندخل اوضتك ونقفل الباب علينا ونتنطط من غير ماحد يشوفنا ونوقع البيت من هناك ..
نجمه بضحكه :يلااااا
ورحاب نزلتها وجريت على الاوضه قدامها ونجمه جريت وراها ...
فريال بصتلها وهزت دماغها :مخبوله البت دى اوى .
ليل : سيبيها تتنطط وتفرح وتتبسط ياخاله متديقيش عليها دى رحاب زى السكر وبت حلال مصفى ..
فريال :خايفه عليها وعلى عقلها الطيب اللى عامل زى عقل العيال الصغيره عايزاها ترسى وتعقل عشان تعرف تعيش فالدنيا دى ياليل .
ليل :تخافيش على رحاب دى عقلها يوزن بلد بس هى عتتجلع عليكى شويتين ...سيبيها تتجلع قبل ماتشيل هم بيت وعيال ومسئوليه وتقول ياريتنى عشت حياتى بالطول وبالعرض قبل الجواز وورطته...
رجعت ليل تطبخ وفريال تساعدها وشويتين شافو رحاب ونجمه خارجين من الاوضه ومغيرين ومتشيكين على سنجة عشره ..
ليل : اهم لبسو المشاتيت وطالعين ...عقولكم ايه متعوقوش بره هما ساعتين وتعاودو ..
رحاب :ساعتين كتير اووى ياليل ..هى ساعه وحده حلوه اوى ..مش كده يانونه ؟
نجمه هزت دماغها لرحاب بالموافقه .
ليل :معشان تجيبكم ساعه ولا تنين ولا تلاته انتو ...روحو واخلصو وانتو عاملين كيف العصابه اكده متفقين على كل البلاوى سوا ...هو انى هقدر عليكم طول ماجتمعتو يعنى ؟
رحاب رمت بوسه لليل فالهوا ونجمه عملت زيها ومسكو ادين بعض وخرجو وفطريقهم باسو فريال ورحاب اخدت منها اللى فيه النصيب ونزلت وهى مبسوطه ومزغططه ..
ليل خرجت من المطبخ راحت لفريال اللى كانت بتقور كوسه وبيتنجان :
انى خلصت آخر طلبيه خلاص ياخاله ..صاحب الاوردر هياجى وياخده ويعطيكى ٣٠٠ جنيه ...انى داخله اريحلى هبابه ..
فريده :ادخلى يابنتى افردى طولك بتتعبي ياحبيبتى طول النهار .
دخلت ليل واتمددت وراحت فالنوم ومعداش وقت كتير وابتدت تهز دماغها برفض للكابوس اللى بتشوفه كل يوم فنومها وتصحى بعد ماتحس انها بتموت وروحها بتتسحب منها وهى شايفه ابشع منظر مر عليها فحياتها ...
شايفه اميره فحضن غريب وهى بتصرخ عليه عشان يبعد عنها وهو مش سامعها ولا راضى يرد عليها ...
قعدت على السرير ودفنت وشها بين ايديها وهى بتنهج وخصلات شعرها اللى طول وتقريبا رجع زى ماكان نزلت عشان تغطى وشها ...رفعت بعدها دماغها للسقف وهى بتنفخ لعل النار اللى جواها تطلع مع نفختها دى وصدرها يبرد ...
قامت راحت على الشباك ووقفت قصاده وربعت ايديها على صدرها ورجعت بذاكرتها لابشع يوم عاشته فحياتها من ٣ سنين واللى لسه لحد النهارده حاسه انها محبوسه جواه ومش عارفه ولا قادره تطلع منه .
فلااااااش بااااك
ليل :
راجعه على شقتى ومكان راحتى ولحضن غريبى وكلى شوق ولهفه ...لكن معارفاشى ليه كل مااقرب على الشقه احس بقبضه فقلبي بتزيد مع كل سلمه اطلعها ..
وقلبي بقا كيف الطبل وانى عفتح الباب وادخل بالراحه ومن غير صوت وبتسحب عشان افاجأ حبيبي ...بس قلبي وقف وانى سامعه صوت غريب جاى من اوضتنا وكأنه عيتكلم مع حد ..قلت جايز عيتحدت فالتليفون ...قربت بالراحه
وحسيت الهوا خلص من حوالي ومنيش عارفه اتنفس وانى شايفه اميره صحبتى واختى قاعده على فرشتى وفسريري ...واللى قضى عليا عالاخير وحسيت بحد ماسك سكينه وعيدبحنى بيها وانى عسمع كلامها اللى عتقوله لغريب وهو عيسمع وساكت ....
رواية فرعون الجزء الثالث3
الفصل الثالث 3
بقلم ريناد يوسف
ليل :صفير فودانى ..عنيا غوشت ..الدنيا ابتدت تضلم وانى سامعاها عتقوله ...ليه عملت كده ياغريب ليه ..مفكرتش فنادر اخوك؟..
مفكرتش فليل ؟ مفكرتش فماما مريم ؟ مفكرتش فيا انا قبل ماتعمل عملتك دى ؟
ذنبى ايه انا اذا كنت مش طايق ليل ومستحمل وجودها فحياتك بالعافيه زى ماطول الليل بتقول ...
كنت بتفكر فأيه لما حبيتنى وكنت طول الوقت بتتمنانى وانا خطيبة اخوك وامانة مريم عندك ؟ ...ذنبى ايه انا ادفع تمن ضعفك وغبائك ...
مبتحبهاش ومش طايقها للدرجادى سايبها معاك وعلى ذمتك ليه متطلقها
وتشوفلك وحده غيرها طالما قرفان منها بالدرجه اللى كنت حاساها فكلامك امبارح
غريب بزعيق :اسكتااااااى انتى بتقولى ايه
اميره :لا مش هسكت ياغريب وهتكلم وهفضحك واخلى كل الناس تعرفك على حقيتك ..تعرف انك بميت وش والف مله ...تعرف انك شيطان لابس قناع حمل
غريب قام وجرى عليها ورفع ايده عشان يضربها لكنه شاف اميره بتبص على الباب وهى بتحمى وشها منه وهو هنا لف بسرعه وكل قواه بادت وهو شايف ليل قدامه اقل مايقال عن حالتها انها بتموت وهى حاطه ايدها على بوقها ودموعها نازله على وشها مغرقاه ...
ليل :جه جرى عليا وهو بيهمس بأسمى وباين عليه التفاجؤ من وجودى ...ولاول مره من يوم ماعرفته مبقاش عايزه اترمى فحضنه ولا اشم ريحته اللى اكيد ريحة اميره غطت عليها ...
مش عايزه ايده اللى لمس بيها اميره تتحط عليا وتلمسنى ...جريت من قدامه ...جريت بكل سرعتى وفتحت الباب وهو بيجري ورايا بالبنطلون بس من غير حاجه فوقه ...نزلت تحت واستخبيت تحت السلم وهو نزل جرى على الشارع ...
شايفاه وهو عيروح ويرجع من اول الشارع لآخره وبعدها وقف وسند على العربيه بتاعته بتعب ...بص لفوق وزعق بعلو صوته وضرب العربيه برجله وطلع على فوق جرى ..
انى شفته طلع فوق ودخلت على اوضة ام مصطفى مرت البواب بسرعه حتى من غير استئذان والحمد لله جوزها وولدها مكانوش قاعدين وكانت هى بس .
قعدت على الارض وقرفصت ودفنت وشى وسط رجليا وكل شهقه تطلع من روحى تشق صدرى شق .
ام مصطفى :ست ليل ..اسم الله عليكى يابنتى جرالك ايه بعد الشر ؟
اضرعت المره وقامت بسرعه جابتلى كباية ميه شربتنى وفضلت ترش على وشى وتغسلهولى وتهدى فيا وتطبطب عليا عشان بس اقدر آخد نفسى وانى مفيش ..
فالاخر قامت من قصادى ووقفت :انا هندهلك غريب بيه يجى يشوف فيكى ايه ...انا هنا قمت منتوره اول ماسمعت اسمه ومسكت فدراعها وزعقت :له متندهيهوش ولا تقوليله حاجه ...انى هديت خلاص وماشيه ...بس عايزه منيكى طلب قبل ماامشى ..
ام مصطفى:عينى يابنتى أؤمرينى امر .
ليل :عايزه مقص وكيس بلاستك ..
ام مصطفى :غالى والطلب رخيص
جابت المقص والكيس وانا نزلت طرحتى ومسكت ضفيرة شعرى ومن غير تردد قصيتها من عند رقبتى ..تحت شهقة ام مصطفى ومحاولات منعها ليا الفاشله انى اقصه .
ام مصطفى مسكت الجديله فايدها وهى بتتحسر عليها :ليه يابنتى كده ..فيه وحده برضو يبقا شعرها كده وتقصه ؟
ليل :مبقتش طايقاه ولا هستحمل اشوفه علي ..اخدته من ايدها وحطيته فالكيس ومدتهولها ..الله يخليكى تبقى تطلعى تدى الكيس دا لغريب بيه ومتقوليلهوش اى حاجه غير انى اديتلك الكيس توصليهوله وخلاص ..
:هو انتو اتخانقتو يابنتى ؟!...معلش حتى لو كده البيوت ياما فيها والوحده لازم تصبر ..طب والله انتو اتحسدتو ..وانتى بالذات عشان كل ستات العماره غايرانين منك وحاسدينك على غريب بيه وحبه ليكى ...
ليل :اتحسدنا متحسدناشى نصيبنا وخدناه عاد ..محدش عياخد اكتر من نصيبه ..وقامت وقفت وهى بتلف طرحتها ..
ام مصطفى :طيب انتى رايحه على فين دلوقتى ؟
ليل :فأرض الله الواسعه ..وميلت عليها حضنتها وباستها ..هتوحشك قوى ياطيبه ..وطلعت وسابت ام مصطفى عنيها مرغرغه بالدموع ..
مشيت ليل بسرعه بعد مابصت وشافت ان عربية غريب مش فمكانها واتاكدت انه اكيد اخد العربيه يدور عليها قبل ماتروح لحد من اهله وتفضحه هو واميره وسطهم .
فضلت تجرى فالشوارع بكل سرعتها ومش عارفه هى رايحه فين ولا لمين بس اللى عارفاه ومتأكده منه انها مش هترجع لغريب مره تانيه ولا هتكون فحياته بعد ماسمعت انه عايش معاها غصب عنه ...
فضلت تجرى شويه وتبطأ شويه لغاية ماحست انها بعدت المسافه الكافيه وقعدت على الرصيف من كتر التعب والقهر ومسحت دموعها وهى بتبص حواليها وشايفه الناس بتروح وتيجى وهى وحيده مبقاش ليها اى حد فالدنيا ...دفنت وشها بين ايديها وجسمها بيتهز من البكا وفالاثناء دى سمعت اصوات حواليها...
شالت ايديها ومسحت وشها بطرف طرحتها وهى بتبص للناس بخوف ..اللى بيسألها مالك ...واللى يسألها ضاعت منك حاجه ...طب حد عملك حاجه ..طب تايهه ...وهى بس تهز فدماغها برفض ...
شافت وحده ست تطلع فالخمسينات بتوسع فالناس اللى حواليها ودخلالها بكباية ميه وشربتها وقعدت جمبها تطبطب عليها ...
الست :خلاص ياجماعه خلاص كل واحد يروح لحاله دى قريبتى جايه من البلد وكانت تايهه وبالعافيه عرفت تلاقينى ...متخافيش ياحبيبتى وصلتى ...
الناس فعلا ابتدت تمشى وليل بصت للست بنظرة تساؤل هى ليه قالت كده ؟
الست :متخافيش مشيتلك الناس عشان حساكى خايفه منهم ...انا اسمى فريال ..ام رحاب ..فرشتى اللى هناك دى ببيع خضار ...تعالى نقعد جمب الفرشه فالضله وخدى نفسك وقوليلى مالك ...
الست فريال قامت ومدت ايدها لليل وليل شافت ايدها ممدوده مسكتها بتردد وقامت وراحت معاها ..
قعدو الاتنين ...
فريال :هاه بقا قوليلى بتجرى من ايه وحكايتك ايه ؟ ....ليل ابتدت تحكى للست فريال حكايتها وكالعاده وثقت فوحده اول مره تشوفها وحكتلها قصة حياتها من الالف للياء بس مقالتلهاش انها حامل ....
فريال :الخيانه وحشه اوى ...اوسخ احساس فالدنيا احساس الخيانه دا انا حاسه بيكى ...المهم هتعملى ايه دلوقتى ولا هتروحى فين ؟
ليل :معارفاشى ..
فريال :هترجعى بلدكم ؟
ليل :هياجينى اهناك ويعرف طريقى وانى مش عايزاه يعرف طريقى ولا يشوفنى ولا عاوزه اشوفه حتى ..
فريال :ياحول الله يارب ...طيب بقولك ايه ..انتى تيجى عندى انا وبنتى لغاية ماتشوفى هتعملى ايه ورزقى ورزقك على الله ..
ليل :كتر خيرك ياخاله تشكرى ..انى هشوفلى اى موطرح اقعد فيه .
فريال :تشوفى ايه بس وانتى فحالتك دى وباين عليكى غلبانه وولاد الحرام كتير ...تعالى معايا انا عندى وليه ومرضلهاش تتحط مكانك ولو سبتك مشيتى مش هسامح نفسى خالص ...بس يلا ايدك معايا نغطى الفرشه بالخيش ....
وفعلا ليل غطت الفرشه مع الست فريال وطلعت معاها على شقتها المتواضعه اللى كانت عباره عن اوضه وصاله ومطبخ وحمام ..
فريال :رحاب ..بيبو تعالى فيه معايا ضيفه .
خرجت بنوته جميله من الاوضه وهى بتلف طرحتها على شعرها ..
فريال :تعالى تعالى مفيش حد غريب ..دى ليل ..هتقعد معانا كام يوم كده لغاية ماربنا ييسرلها امورها ...
رحاب بصت لامها باستغراب وردت على ليل بتحفظ :اهلا وسهلا ..تنورنا طبعا ...بس انتى تعرفيها منين ياماما ..معرفه قديمه مثلا ولا بنت وحده صحبتك اصلى اول مره اشوفها ..
فريال :لادا ولاادا ...ليل انا لسه مقابلاها من شويه وحكتلى حكايتها ولقيتها غلبانه اوى وصعبت عليا وقلبي ماطاوعنيش اسيبها فالشوارع تتلطم ...
رحاب بتهكم :لا اصيله يام رحاب ...عموما انا داخله اكمل مزاكرتى عايزه منى حاجه ...
فريال بصت لليل باحراج ورجعت بصت لرحاب :لا مش عايزه حاجه ...سابتهم رحاب ودخلت الاوضه ..
ليل: معلهش ياخاله انى همشى معاوزاشى مشاكل وزعل مابينكم الظاهر بتك مش راضيه عن وجودى معاكم ..
فريال :لا والله دى رحاب دى اطيب من الطيبه نفسها وبكره تشوفى ..هى بس بتستغرب ومش بتاخد على الناس بسرعه ، عشان كده تحسيها مدايقه ... خشى اتشطفى واغسلى وشك وانا هحضرلك لقمه تاكليها وشك اصفر وحالتك حاله ..
ليل هزت دماغها واتلفتت حواليها ..
فريال :الحمام من هنا ..وشاورتلها على الحمام ...
دخلت ليل الحمام وغسلت وشها وفتحت شنطتها وطلعت تليفونها اللى كانت عاملاه صامت طول الليل وهى مع جواهر عشان ميزعجهاش هى والبيبي ويصحيهم لما يرن وفتحته لقت غريب حارقه اتصالات وحتى جواهر رانه ..
بسرعه عملت نسخ لكل الارقام على العده وطلعت الخط وكسرته ورمته فى التواليت وشدت السيفون عشان عارفه ان غريب سهل جدا يوصلها عن طريق الخط دا وقفلت حساب الفيس .
فالاثناء دى فريال دخلت لبنتها الاوضه وقفلت الباب وراها واتكلمت بزعل :ايه يارحاب اللى عملتيه قدام البنيه دا يبنتى ...كده برضو تكسفيها وتكسفينى قدامها ؟
رحاب سابت القلم وبصت لمامتها :يعنى ياماما انتى شايفه ان اللى عملتيه دا صح ؟ تجيبى وحده من الشارع لانعرف اصلها ولافصلها ولا نعرف ايه حكايتها وتدخليها بيتنا وحياتنا ؟
فريال :هى حكتلى حكايتها وعرفتنى كل حاجه .
رحاب :ومين قالك وايش عرفك انها مش بتكذب عليكى بقا ياست فوفا ؟
مش يمكن تكون تبع عصابه ودى الطريقه الجديده اللى اخترعوها عشان يقدرو يدخلو البيوت وبعد ماتتأكد ان الناس نامت تخدرهم وتكلم ناس تيجى تدبحهم وتاخد اعضائهم بمنتهى السهوله واليسر ؟ ايه ياماما مش خايفه على اعضائك خافى على اعضائى انا ياستى.
فريال :بطلى هبل يابت انتى وقومى ساعدينى نحضر لقمه للمسكينه اللى بره دى ..وبعدين انا قلبي بيقولى انها مبتكدبش ومصدقاها ...وهتقلى ادبك معاها هعلقك فالمروحه ...يلا اتفضلى قدامى ..دى الدنيا لسه بخير يابنتى
رحاب قامت وهى بتتأفف :قومنا اهو ياستى لما نشوف قلبك دا هيعمل فينا ايه ...
خرجت رحاب مع امها على المطبخ وشافت ليل خارجه من الحمام ومن باب الزوق والمجامله ابتسمت فوشها وليل ابتسمت ابتسامه خفيفه وراحت قعدت فالصاله وحطت ايدها على دماغها وهى بتفكر ياترى الدنيا هتعمل فيها ايه اكتر من كده ...كل مره تقنع نفسها بعد كل وقعه ان مفيش وقعه اشد منها لكن الدنيا كل مره بتفاجأها بانها عندها اكبر واشد واقوى واصعب ...
شويه وخرجت رحاب من المطبخ شايله صينية اكل وامها خرجت وراها بكباية ميه وحطو الاكل بالصينيه على الارض ..
فريال :هتعرفى تقعدى على الارض ولا احط الاكل على طربيزه قدامك يابنتى ؟
ليل :له متتعبيش حالك ياخاله انى عاكل عالارض عادى ...وقعدت معاهم على الصينيه من باب الزوق لكنى حاسه بسدة نفس وحاسه انى مش طايقه اكل ولا اشرب وفضلت انقش فالطبق قدامى نقش وعامله نفسى عاكل وحاسه روحى بتطلع ...
فريال :كلى ياحبيبتى وارمى حمولك على الله وهو هيعدلك المايله .
ليل : ونعم بالله ياخالتى ...
عدى شهر وليل قاعده وسطهم واكتشفت ان رحاب طيبه جدا عكس الانطباع الاول اللى اخدته عنها ..
والست فريال دى بدون مبالغه اطيب خلق الله ولا يوم وحده فيهم حسستها انها ضيفه تقيله ولا وجودها وسطهم مدايقهم بعد ماعرفو ليل كويس واتاكدو اد ايه هى جميلة الروح وقلبها طيب والدنيا جت عليها كتير اوى ..
لكن مع ليل وعزة نفسها صعب عليها روحها وهى قاعده عاله عليهم فاقترحت على الست فريال اقتراح .
فريال :ياليل يابنتى تعالى اقعدى وارتاحى البيت زى الفل بتعملى ايه بس ؟
ليل :بغسل الطبقين اللى فالحوض دول وجايه اهه ...شويه وطلعت ليل من المطبخ شايله كباية شاى وبتمسح ايدها فهدومها وقعدت جمب فريال وادتلها كباية الشاى ..
فريال :ربنا يديكى الصحه والعافيه ويريح قلبك زى ماريحتينى وشلتى عنى تعب البيت ..
ليل :دانى لو اطول اشيلك جوا عيونى وفوق دماغى عاللى عميلتيهولى وعلى فتحت بيتك ليا وعلى طيب اصلك معاى ..وهيوبقى برضو شويه عليكى والله ياخاله
فريال :متقوليش كده ياليل دانتى بقيتى فمعزة رحاب بنتى وربنا العالم ...والله وماليكى عليا حلفان انا حبيتك من ساعة ماشفتك ودخلتى قلبي من غير احم ولا دستور ..
ليل :ربنا يعزك يارب ويخليكى ليا يااحن خاله فريال فالدنيا ....
المهم انى عايزه اقولك على فكره اكده ممكن تجيبلنا قرشين زياده واقدر اعملها وانى قاعده فالبيت بعد مااخلص اللى وراي ...
فريال :اخص عليكى ياليل وهو انا قصرت معاكى فحاجه يابنتى ...هى اه الحاله على ادها بس اهى مستوره ولقمه هنيه تكفى ميه واديها بتعدى .
ليل :اسمعى بس انتى فكرتى هتعجبك انا متوكده .
فريال : وايه هى بقا الفكره دى ياليل ؟
ليل :بصى ياخاله الستات اللى عتاجى تاخد منك الخضار تقوليلهم انك ممكن تجهزيهولهم عالطبخ وياجو ياخدوه جاهز ...
يعنى نقرطف الملوخيه ونجهزها عالطبخ ..نقمع الباميه ..نفصص البسله ونقطع الجزر ..نقور الكوسه والبيتنجان ..نفصص التوم ونحطه فبرطمان وياخدوه جاهز عالطبخ ..اكده يعنى ...وكمان ممكن نجيبو رقم وتكتبيه على يافطه صغيره وتعلقيه عالفرشه وتكتبى اللى عاوز خضار جاهز يتصل يحجز ويقول طلبه على الرقم ديه ؟
فريال مسكت كباية الشاى واخدت منها شفطه وسكتت ...
ليل :سكتى يعنى ياخاله ومقولتليش رأيك ايه ؟
فريال : تصدقى هى فكره حلوه يابت ياليل ...بس فيها تعب عليكى يابنتى وانا شايفه صحتك كل يوم فالنازل مش عارفه ليه ؟
ليل :معلهش ياخاله بس انى محتاجه اشتغل اى حاجه و مش هقدر اطلع اليومين دول ولا انزل الشارع انتى عارفه معداش غير شهر على غيابى عنهم وزمانهم لسه قالبين الدنيا علي ...
يوبقى مقداميش غير الحل ديه اطلع منه قرشين زياده ...وخصوصى ان فيه حاجه عايزه اقولك عليها ...انى حبله وهحتاج مصاريف فالفتره اللى جايه .
فريال شرقت فالشاى وبخت اللى فبقها قدامها وبصت لليل بخضه وذهول من الصدمه وضربت على صدرها وهى بتقولها بعلو صوتها :يلهوى حامل ؟ ازاى ...وليه مش قايله ..وحامل فكام شهر ؟
ليل : اقولك الصراحه ياخاله انى كنت ناويه انى انزله ...لكن بعد اللى حصل قولت اجيبه للدنيا واعيش ليه ورزقى ورزقه عالله ودلوك ادينى فالرابع وقرب يخلص .
فريال..تنزليه دا ايه دا كمان ..داكفر يابنتى بنعمة ربنا ولو كنتى عملتى كدا كان حسابك بقا عسير عند ربنا ..وبعدين تعالى هنا قوليلى وحده زيك جوزها مرتاح واموره تمام تموت ضناها ليه ...خايفه عليه من الفقر ولا خايفه عليه يتلطم فالدنيا ؟ دا حتى لو كان كده ربك هو اللى بيرزق ...
ليل :الحكايه مش اكده ياخاله ..الحكايه انى خايفه اخلف عيل ويطلع شبهى والناس متبطلش معايره فيه بوحاشته .
فريال:وماله شكلك بقا انشاء الله ؟ طب انتى تعرفى ان شكلك اللى مش عاجبك دا ربنا مميزك بيه عن غيرك عشان غايه ميعرفهاش غيره ؟
هاه قوليلى بقا انتى فالشهر الكام ؟
ليل :فالرابع.
فريال استغربت و بصت على بطن ليل بصدمه :رابع ايه يابنتى دى بطنك بطن وحده شبعانه ولافيكى بطن ولا باين عليكى حمل ؟
ليل :انى معتطلعليش بطن فالحبل ..امى كانت تقولى العيل بيسكن جنابك ومعتطلعلكيش بطن .
فريال :وكل المده دى ومتقوليليش ولا تعرفينى ؟ اخص عليكى ياليل ..وشايله شغل البيت كله على دماغك ولا متكلمه ...ربنا يسامحك .
ليل :هو فين الشغل اللى عتتحدتى عنيه دا بس ياخاله دول كام طبق عغسلهم كل يوم وهبابة طبيخ وهدمتينى انى وانتى ، ورحاب فمدرستها الداخليه معتجيش غير خميس وجمعه وكل ديه معياخدش معاى ساعتين وباقى النهار عقعد فاضيه .
فريال بصت بعيد بتفكير
ليل :عتفكرى فايه متفكرى بصوت عالى وتسمعينى ياخاله .
فريال :انا موافقه على فكرة تجهيز الخضار ..بس من هنا ورايح ملكيش دعوه بشغل البيت خالص ...هما بس حبة الطبيخ بتوعك اللى مش هعرف آكل غير من تحت ايدك بعد ماتعودت على اكلك وطعامته وغير كده لا ..فاهمه ؟
ليل :ربنا يسهل ..بس اهم حاجه من بكره تعرفى النسوان بحكاية تجهيز الخضار ديه .
فريال :متخافيش دى الستات اغلبها يتشتغل وموظفه فالمنطقه بتاعتنا وماهيصدقو يلاقو حاجه زى دى ..
وبالفعل من تانى يوم الست فريال اشترت خط لليل وابتدت تعرف الستات بفكرة ليل وابتدا يجيلها طلبات كتير تجهيز خضار...
وبقى يجيلها مبلغ مش بطال من الشغلانه دى وحست انها مبقتش عاله وبتقدر تساهم فمصروف البيت حتنها ارتاحت ...
شويه شويه ليل اتعرفت وكام مطعم من القريبين عليها بقو يكلفوها تجهزلهم خضار الشغل وشافو ان دا ارخص من انهم يجيبو عامل مخصوص لتجهيز الخضار وياخد مبلغ وقدره آخر الشهر ..
ابتدت الايام تمر وشهر ورا شهر ليل بطنها تعلى وخوفها يكبر وحتى كشف على نوع الجنين مكشفتش وسلمت امرها بأيد ربنا ورمت حمولها على الله ...الفلوس اللى بتكسبها كانت بتقسمها بالنص ..
نص ليها ونص تديه للست فريال بعد منازعات ورفض من فريال بس فالاخر ليل تهددها انها لو مأخدتش منها الفلوس هتسيبلها البيت وتمشى وفريال تخاف احسن ليل تعملها وتمشى وهى فحالتها دى وملهاش حد وتاخد منها الفلوس على مضض ..
طول الفتره دى ليل كانت بتمثل القوه والثبات وهى من جواها اضعف بنى آدمه على وش الارض ...بتتحامل طول النهار على نفسها بس اول ماييجى اليل وتدخل اوضتها تخلع توب القوه ويظهر ضعفها وتفضل تبكى وتون طول الليل بألم وهى باصه لصورة غريب اللى فتليفونها وبتعاتبه على اللى عمله فيها وعلى كسرته ليها اللى مابعدها كسره ..
كانت تنام بعد ماتتعب من كتر البكا لكن صورته وصوته وجرحه ليها مكانش بيسيبها وكان بيطاردها حتى فاحلامها... وساعات نومها تتحول لكوابيس مع الوقت ابتدت تسلم ليها وتتعود عليها ...
فكرت كتير تكلم جواهر لكنها عارفه ان جواهر لو عرفت اى حاجه عنها هتقول لقاسم وقاسم اكيد مش هيخبى عن غريب .. استحملت بعدها عن جواهر وداست على قلبها وسابت نفسها لالم الفراق يطحن فى روحها ..
برغم زعلها منه وجرحه ليها اللى لسه بينزف الا انها مقدرتش تمنع روحها انها تطمن عليه كل يوم عن طريق صفحته عالفيس من حسابها الجديد اللى عملته .
تتابع منشواراته حالاته الحزينه وكلامه اللى لو حد سمعه يقول عليه مجروح مش جارح..
طول الوقت كانت جواها حاجه بتقولها ان حب غريب ليها مكنش وهم وكل كلامه ليها كان بيبقا طالع من قلبه ...لكن يرجع منظر اميره وكلامها واللى عمله يقضو على كل حاجه حلوه كانت بينها وبينه فيوم من الايام ...خلاص غريب اصبح بالنسبالها اسم على مسمى ..غريب .
كانت كمان متابعه صفحة جواهر وحاسه بوجعها من بُعدها عنها من خلال منشوراتها ..
وكل مره تضعف وتدخل خاص وتكتبلها لكن تتراجع فآخر لحظه وتمسح كل الكلام وتقفل حسابها وتليفونها ..
فضولها غصب عنها خلاها تدخل صفحة اميره هى كمان وتراقبها ...اد ايه اتجرحت وبكت واتألمت فاليوم اللى اميره اعلنت جوازها من غريب وعملتله اشاره على صفحته والناس كلها بقت تباركلهم ...يومها ليل ضغطها رفع ودخلت المستشفى ومطلعتش منها غير تانى يوم وهى حاسه ان آخر ذرة تحمل وقوه فقلبها اختفت ..
دخلت الاوضه وحطت ايدها على بطنها وحلفت انها مش هتستنى حاجه من الدنيا غير اللى فبطنها وهتعيش بيه وليه مهما كان شكله او لونه المهم انه هيكون حته منها ولايمكن هيخونها اويتخلى عنها ويروح لغيرها فيوم من الايام ..
عدت الشهور وخلاص ليل دخلت فشهرها ومتوقعه الولاده فأى لحظه ومش فبالها خالص انها هتقابل اكبر مشكله مفكرتش فيها وهى انها ازاى هتكتب ابنها باسم ابوه ولازم اللى يكتبه الاب نفسه او الجد
واول ماالست فريال نبهتها للنقطه دى..ليل انهارت تماما بعد ماحست انها واقفه عاجزه قدام اختيارين كل واحد فيهم اصعب من التانى اولهم انها عشان تكتب المولود باسم ابوه لازم تلجأ لابوه ...
وتانيهم ان ابنها يفضل كده من غير اسم ولا اسم عيله ويتقال عليه ساقط قيد وغير كده ممكن يتقال عليه فالحاله دى ابن حرام ..
النوم جافاها والقلق والخوف مسكها وقررت انها هتطلب مساعدة جواهر فالحكايه دى واللى يحصل يحصل بقا ...
نزلت فيوم بعد ماقالت للست فريال عاللى هتعمله وفريال ايدتها وشجعتها عشان مصلحة ابنها او بنتها ..نزلت ليل واخدت تاكسى وقالتله على عنوان عمارة جواهر وبعد ماوصلت تقريبا فجأه زعقت فالسواق ...وقف عندك ياسطى .
وادتله عنوان شقة غريب ...
لف السواق ومشى بيها على العنوان وكل مايقرب قلبها يدق بعنف كأنه هينفجر فصدرها من التوتر ...
طلبت منه يقف على اول الشارع ولما اتأكدت ان عربيته مش موجود طلبت من السواق يتقدم ومدت ايدها على شنطتها واتأكدت لآخر مره ان مفتاح الشقه موجود قبل ما تنزل وتدخل بسرعه على اوضة البواب وهى لافه طرف طرحتها على وشها ...
خبطت خبطتين وفتحت الباب ودخلت بسرعه قبل ماتسمع اى رد وام مصطفى اللى كانت نايمه قامت مخضوضه وبتزعق ..انتى مين ..وداخله عليا كده ازاى ؟
ليل شالت الطرحه من على وشها ..انى ليل ياخاله متخافيش .
:ست ليل ؟ عاش من شافك يابنتى ...تعالى قربي اقعدى .
ليل :انى مجاياشى اقعد ياخاله انى جايه واقعه فعرضك ومروتك ...انى حبله وعلى وش ولاده خلاص وغريب مراضيشى يكتب العيل باسمه ومعارفاشى اعمل ايه ...
:غريب بيه يعمل كده ازاى!
ليل :يرضيكى ياخاله ولدى ولا بتى يطلع للدنيا يقولوله واد حرام وهو ابوه عايش وكد الدنيا ؟
ام مصطفى :لا يابنتى طبعا لايرضينى ولايرضى مخلوق ولا يرضى ربنا حتى .. بس انا فأيدى ايه اعملهولك ياحبيبتى
ليل :فيدك ياخاله ...فيدك متخليش المسكين ديه يتولد يتيم وابوه على وش الدنيا ...مش طالبه منك غير طلب واحد ...غريب فشغله دلوكيتى ...عايزاكى تساعدينى انى اطلع الشقه وانى معاى مفتاح ..اجيب صورة بطاقته وقسيمتى وامشى طوالى من غير ماحد يحس ولا يعرف ..
ام مصطفى بخوف :لا لا ياست ليل كله الا كده دى مسئوليه ولو اخدتى اى حاجه من الشقه محدش هيلبسها غيري انا وجوزى وابنى ..وانتى عارفه غريب بيه ممكن يودينا فداهيه .
ليل :والله ماهتغيب ايوتها حاجه ولا هاخد حاجه غير بس اللى قولتلك عليهم ...وعشان تتوكدى تعالى اطلعى معاى وشوفى كل حاجه بعينك .
ردت عليهابحيره :طيب بس حتى لو هو مش موجود مهى مراته موجوده فوق ؟
ليل اول ماسمعت كلمة مراته دى مستحملتش وقع الكلمه على ودانها وقعدت على الكنبه بضعف ...هو امسكنها اهنه فالشقه ...
:امال هيسكنها فين يعنى يابنتى ...بس تعرفى فرق السما والارض بينك وبينها والله .
ليل بابتسامة تهكم :عارفه انها احلى منى بكتير قوى .
: حلاوة ايه يابنتى الحلاوة حلاوة الروح واللسان وست اميره دى واخدها كبر النفس اوى.
ليل باحباط : معلهش بس لايقين على بعض هى وهو ...المهم دلوك يعنى ايه مش هعرف اطلع الشقه منها ؟ قاعده ليل نهار معتنزلشى واصل ؟
:لا بتنزل كل كام يوم تجيب طلبات وبقالها كذا يوم منزلتش يمكن تنزل بكره ولا بعده ..بصى انتى تروحى دلوقتى وتدينى رقمك وانا اول ماتنزل علطول هرن عليكى...
ولو مسافتك مش بعيده عن هنا تيجى بسرعه تاخدى اللى انتى عاوزاه وتمشى ...هى بتغيب ساعه ولا ساعه ونص كده ...بس والله ياست ليل لولا مانتى طيبه وبنت حلال وانا عارفاكى كويس ماكنت ساعدتك ولا ورطت نفسى معاكى ...
ليل :ربنا يخليكى ليا ياخاله ..وانى والله ماهنسى جميلك دا طول عمرى .
مخلصوش كلام والاتنين سمعو صوت اميره بتنادى على ام مصطفى من مدخل العماره ...الاتنين بصو لبعض وارتبكو ...ام مصطفى شاورت لليل عشان تهدى لما شافت الخوف سيطر عليها وطلعت لاميره اتكلمت معاها كلمتين ودخلت تانى عند ليل بسرعه واول ماشافت ليل ابتسمت ..
مش بقول انك بت حلال مصفى ..
اهى نازله تجيب طلباتها اهى وهتاخدنى معاها عشان اعينلها الاكياس ...
اطلعى يابنتى وخدى طلبك واللى يحصل يحصل ...بس متطلعيش فالاسانسير فيه كاميرات وكمان دارى وشك وانتى طالعه قدام شقة استاذ وجيه اللى فالدور التانى عشان حاطط قدامها كاميرا برضو .
ليل هزتلها دماغها بالموافقه وبمجرد ماتأكدت انهم مشيو طلعت وهى مغطيه وشها على الشقه بسرعه وفتحت الباب بارتباك ودخلت بسرعه وقفلت الباب وراها ...غمضت عنيها وفتحتهم تانى وعنيها راحو على كل ركن فالشقه ...كل حاجه متغير مكانها ..كل زاويه ليها فيها زكرى حلوه مع غريب اتبدلت...حست بحنين على الم على خنقه احاسيس كتير خلتها مش قادره تتنفس ...
مسحت دموعها اللى ملت وشها ودخلت بسرعه على اوضة النوم وغمضت اول ماعينها جات على السرير فالمكان اللى كانت قاعده فيه اميره ..راحت على الدولاب وفتحته وراحت على الخزنه وضربت الرقم وابتسمت وهى شايفه الرقم متغيرش والخزنه فتحت بنفس تاريخ جوازهم ..
دورت فالاوراق لغاية مالقت القسيمه بتاعت جوازهم ودورت تانى ولقت صورة بطاقه لغريب واخدتهم ورجعت الورق مكانه بسرعه وقفلت الخزنه وخرجت من الاوضه ...كانت هتخرج من الشقه لكنها رجعت تانى ...رجعت تبص على السرير على حاجه من هدومه فيها ريحته لكنها ملقتش ..راحت على الحمام واستغربت وهى شايفه سلة الغسيل مليانه بهدوم غريب الوسخه وباين انها لها مده طويله اوى فالسله..
غريبه! ..مش هى دى هدوم غريب اللى اميره مكنتش بتسيبها الا وهى غاسلاها وكاوياها ؟ سايبه الهدوم دى كلها من غير غسيل ليه ...هزت كتافها باستغراب وقربت من السله ومدت ايدها اخدت تيشرت من بتوعه وقربته من وشها واخدت نفس عميق كان عامل زى قبلة الحياه بالظبط بالنسبالها ...خلى قلبها يرجع يدق من تانى ويتنطط بين ضلوعها لزكريات الريحه دى وتأثيرها عليها ...حطت التيشرت جوا شنطتها وطلعت جرى وغطت وشها ونزلت ودى كانت اول وآخر مره تدخل فيها شقتها هى وغريب من بعد اللى حصل ...
رجعت وهى حاسه بفرحه بانتصارها الصغير بس فنفس الوقت محمله باطنان من القهر وخيبة الامل وكسرة النفس ...اصعب حاجه لما تبص تلاقى نفسك غريب فمكان كان مملكتك وكل دنيتك ...وغريب بالنسبه لاشخاص كانو هما ملاذك الوحيد وسكنك وسكينتك وراحتك النفسيه ...
فضلت يومها جوا اوضتها قافله على نفسها الباب مستسلمه لدموعها وحاسه بالوجع بيغزو كل جسمها بسبب جروحها اللى اتفتحت كلها من تانى وكأن اللى حصل واللى شافته لسه حاصل من سعات قليله ...
فضلت فاوضتها لتانى يوم من غير اكل ولا شرب مهما حاولت معاها الست فريال كانت ترفض تخرج تاكل او حتى تفتح الباب ...بس تانى يوم الضهر فتحت الباب وكانت بالعافيه قادره تقف وسانده على الباب بأيد والايد التانيه حطاها على بطنها
فريال قاعده فالصاله واول ماشافت حالة ليل قامت مخضوضه وجريت عليها :
ليل ..الحقينى ياخاله باينى عولد ..قالت جملتها دى وبعدها صرخت من الالم ..
فريال: هتولدى ازاى دلوقتى وتجيبى حيل منين وانتى بقالك يومين مدوقتيش الزاد هاه ...اه يامين يلايمنى على دماغك الناشفه دى وانا ادغدغهالك ..
ليل بصرخه :مش وكته ياخاله همووووت..
فريال اخدت ليل وجريت بيها على المستشفى ومعداش وقت كتير ودخلوها كشك الولاده ..
الخوف سيطر عليها ومع كل طلقه كانت بتدعى ربنا يجبر بخاطرها واللى هتجيبه ميطلعش شبهها ...فلحظه حست بان روحها بتطلع ومع الاحساس دا سمعت صوت صغنن بيبكى ...ابتسمت بضعف وغمضت عنيها وقلبها رفرف وفتحت عنيها لما حست بتقل على صدرها وشافت الدكتوره حطت المولود فحضنها ..
الدكتوره :بنت زى القمر ..
ليل ابتسمت وهى بتحط ايدها عليها وهى مغمضه عنيها من التعب وحست بسعادة الدنيا وهى حاضنه حتة منها ومن غريب ..
اخدوها منها عشان يلبسوها ولحد دلوقتى مبصتش فوشها ولا شافت شكلها وقررت انه مهما يكون شكلها هتحبها وهتحسسها انها احلى بنت فالدنيا دى كلها ...
البنت مبطلتش صراخ من الجوع بسبب ان ليل كان ليها يومين مأكلتش وخرجوها لفريال اللى مكانتش عارفه تعملها ايه لكنها اتصرفت وخلت وحده اشترتلها اعشاب من الصيدليه وببرونه وادتهم لعامله من العاملات تعمل للبنت رضعه على ماتطلع مامتها من كشك الولاده لولا مالبنت سكتت ونامت ..
شويه وطلعو ليل من كشك الولاده ودخلوها الاوضه اللى فيها الست فريال والبنت الصغيره ونيموها على السرير ..
فريال :الف حمداله على سلامتك ياست البنات ...اللى جابلك يخليلك ..
ليل مدت ايديها لفريال بضعف بعد مااتعدلت نص عدله واتكت على السرير :هاتيها ياخاله ..
قامت فريال بالبنت وادتهالها ...سمى يا حبيبتى
ليل سمت باسم الله وشالت البنت وابتسمت وهى بتشوف ملامحها ...صحيح سمره بس ملامحها جميله اوى ..نفس ملامح ابوها بالظبط ..نفس الغمازات لما حركت بوقها ..مدت ليل ايدها وفتحت عينها وضحكت بفرحه وهى شايفه نفس لون عين غريب ...ضمتها ليها وفضلت تضحك وتحمد ربنا بسعاده انه مخذلهاش وحققلها امنيتها وجبر بخاطرها وخاطر بنتها ...
فريال :انا هنزل اجيبلك فرخه ترم عضمك ..هتقدرى تخلى بالك من البنت ولا اندهلك وحده تقعد معاكى لحد مارجع ..
ليل:له ياخاله معاوزاشى وكل ولا حاجه ...خليكى قاعده .
فريال :كلام ايه دا ياليل يابنتى ...انتى نفسه ولازم تاكلى عشان تحنى لبن لبنتك وتغذيها ...يلا حطيها على صدرك تاخد السرسروب عبال مااجيلك ..مش هغيب عليكى متقلقيش ...
وفعلا ليل حطت بنتها على صدرها وابتدت ترضعها وفريال مغابتش كتير ودخلت عليها ...عوقت عليكى
ليل :له ياخاله معوقتيش ولا حاجه ..
فريال فتحت الاكل لليل وسمت على البنت اخدتها منها وليل ابتدت تاكل ...
فريال :هتسميها ايه ياليل ؟
ليل ابتسمت :هسميها نجمه ياخاله .
فريال :الله اسم حلو وجديد محدش كتير مسميه .
ليل: تانى يوم خرجت من المستشفى واخدت الاوراق اللازمه وخالتها فريال واخدت نجمه معايا ورحت سجلتها بمساعدة واحد ابن حلال معرفه شغال فالوحده الصحيه
وساعتها بس قلبي ارتاح لما اتكتبت باسم ابوها .
رجعنا للبيت ومن يومها ونجمه نورت حياتى وكانت شعاع النور اللى بدد ظلام الليل ..
بصراحه الكل كان فرحان بنجمه ..خالتى فريال ورحاب اللى كانت عاملاها زى اللعبه الخاصه بيها كل ماتيجى من المدرسه بتاعتها خميس وجمعه تاخد نجمه ومتسبهاش من حضنها غير لما نجمه تعوز تاكل وبعدها تاخدها تانى، الكل اتعلق بيها وملت علينا الدنيا
وانا وسط الناس دى حسيت انى وسط اهلى بجد ..بصراحه خالتى فريال كانتلى نعم الام واحتوتنى واحتوت بتى بحنانها وطيبة قلبها ..
ومن يوم ماعرفتها واتأكدت ان دعوة امى اللى كانت دايما تدعيهالى اتقبلت ..روحى يابنتى ربنا يوقفلك دايما ولاد الحلال ..
رحاب كمان بقت بالنسبالى اخت ..زى جواهر بالظبط ..برغم من انها اصغر منى بسنتين وشويه ...الا انى بحس ان عقلها كبير وفاهمه كل حاجه ...هى فسنه تالته ثانوى ازهرى وقاعده فداخليه مع البنات عشان مدرستها بعيده
بتيجى خميس وجمعه يومين بس فالاسبوع بس بتملا علينا البيت فيهم بهزارها وخفة دمها وعفرتتها ...هى ونجمه اتعلقو ببعض جدا لدرجة انى حاسه نجمه لو خيروها بينى وبين رحاب هتختار رحاب ههههههههه
نجمه كان عندها سنه ونص تقريبا فالوقت اللى حياتى اخدت منعطف جديد ..
حسيت ان الفلوس اللى بقت تجينى من تجهيز الخضار مبقتش بتكفى ..او كانت يادوب تكفى مصاريف نجمه لوحدها بعد ماادى نصهم لخاله فريال ..
قررت انى اشوفلى شغلانه تانيه جمب شغلى ده ...بس كانت الحيره هشتغل ايه وهسيب نجمه ازاى وانزل شغل وخالتى فريال يادوب على قد شغلها ووقفتها على فرشة الخضار ..لغاية مافيوم نزلت العصريه انى ونجمه نقعد جمب خالة فريال جار الفرشه وجه واحد لخاله فريال :
الراجل : وحياتك ياخاله لو سمحتى متعرفيش المطعم دا بيفتح امته ؟
فريال :معرفش يبنى والله بس دا قافل بقاله يجى اسبوع ومش عارفه اذا كان هيفتح تانى ولا اتقفل خالص واصحابه فتحوه فمكان تانى .
الراجل :خساره دا اكله كان حلو اوى دنا بجيله من آخر الدنيا ...يلا عموما متشكر اوى ..
فريال :الشكر لله يبنى على ايه ..
وساعتها جاتنى فكره خطيره وانا باصه للمطعم الى لما كان فاتح كانت الناس بتبقى عليه طوابير اللى يدخل ياكل واللى ياخد سفرى ...
طب ليه له وانى وكلى حلو وكل اللى داقه يشكر فيه ؟ مخمخت الموضوع فدماغى وشورت على خالتى فريال ونفذت بسرعه عشان التأخير مش فصالحى .
كتبت يافطه بان المطعم بقا دليفرى بس اكل بيتى على حسب الطلب وحطيت رقم تلفونى عليها بدال رقم تلفون المطعم اللى كان على واجهة المطعم ...
سألت على الاسعار بره وعرفت كل حاجه ومع شهرة المطعم ابتدت الحجوزات تجينى من تانى يوم بصراحه مكانش حداى سيوله تكفى انى انزل اجيب ديك رومى وعشر تجواز حمام وخمسه كيلو لحمه واطبخهم مره وحده ...
حسيت بعجز لكن بصيت لقيت الست فريال جايبالى فلوس وبتحطهم فأيدى ..
ليل :ايه دول ياخاله؟
فريال :دى الفلوس اللى بتديهانى من ساعة ماجيتى ..كنت باخدك على اد عقلك واخدهم منك لكن كنت بعينهملك للزمن
ليل :وليه عميلتى اكده ياخاله الفلوس دى كنت عديهالك عشان تتوسعى بيها وتجيبى لرحاب اى حاجه ناقصاها ..
فريال :اول هام رحاب مش ناقصها حاجه ومتعوده تعيش على اد ظروفنا من ساعة ماابوها ربنا افتكره ...تانى هام انا كنت بزعل منك بس مكنتش ببين عشان مدايقكيش ..عشان انا من يوم مادخلتك بيتى وانا اعتبرتك زى رحاب بنتى بالظبط واعتبرت نفسى خلفت بنتين مش بنت وحده ..ويعلم ربنا بنتك نجمه فغلاوة ولد الولد عندى، وبعتبر نفسى ستها ام امها ...
وكل مره كنتى بتدينى فيها فلوس كنت بحس انك مش بتعتبرينى امك زى منا بعتبرك بنتى .
ليل :ياخبر ياخاله ...والله والله انتى غلاوتك عندى ماليها حدود ويعلم ربنا ععتبرك كيف جنه وانى حكيالك وعارفه جنه تبقالى ايه وغلاوتها فقلبي عامله كيف وانتى عارفانى معكدبشى ..
فريال :طب وحياة جنه لانتى واخده الفلوس دى وبادئه بيهم شغلك الجديد وربنا يجعله فاتحة خير وباب رزق جديد ليكى ويطعمك منه الشهد انتى وبنتك يارب .
ليل حضنتها وباستها وشكرتها على كل حاجه عملتها معاها مع ان كل كلام الشكر اللى فالدنيا ميوفيش الست دى حقها .
بدأت الشغل ومن يومها وربنا فتحها عليا من وسع ..
وكلى كل اللى ياخد منه مره لازمن عيرجع تانى ...الوكل اللى اعرفه عطبخه واللى معرفهوشى كنت عجيبه من عالنت واعمله ويطلع من تحتى يدى ولا اجدعها شيف يعرف يعمله ...ودا مش كلامى دى شهادة كل اللى عيدوقه ...
الامور اتحسنت والشقه اللى قصاد شقة خاله فريال مستأجرينها طلعو وقررت انى اتأجرها انى
وخصوصى انى عايزه موطرح مختصر عشان اعرف اشتغل براحتى فالليل فالنهار اكركب فالحلل براحتى ومخافشى انى اصحى خالتى فريال ولا رحاب وادايقهم وخصوصى ان وحده عتكون شقيانه طول النهار ومعتصدق الليل ياجى عليها عشان تريح جتتها والتانيه عتبيتها ليله وحده بس فالبيت وعيبه لو معرفتش تنامها زين ...
خدت الشقه وكانت عتبتها خضره علي وعلى بتى ...الشغل وسع وطلبت من خاله فريال انها تسيب الفرشه وتقعد معاى وتساعدنى فالطبخ او تاخد بالها من نجمه وانى اطبخ ووافقت لما شافت ان مكسب الطبخ اكبر واحسن من بيع الخضار والمناهده وحسها اللى بيروح من كتر مابتنادى عالخضار ...وحسيت انها ارتاحت كتير وديه حاجه ريحتنى نفسيا ..
مره قاعده مع رحاب وعنتحدتو عادى فيوم اجازتها وكانت جايبه معاها ورقة دعايه لعياده فاتحه جديد وسمعتنى وانى ماسكه الورقه وعقراها بصوت عالى ..
رحاب :والله اللى يشوف مستوى قرايتك دا ياليل مايصدق ابدا انك مدخلتيش مدارس .
ليل :ههههههه كله عيقولى اكده ...البركه فجواهر حبيبتى هى اللى علمتنى الله يمسيها بالخير موطرح ماقاعده .
رحاب :طب انا عندى فكره ..انتى ليه ماتتعلميش ياليل وتبقا معاكى شهاده
ليل :بعد ماشاب ودوه كتاب ؟
رحاب :افهمى بس ...انتى هتقدمى عشان تمتحنى محو اميه ..هتمتحنى وتنجحى فيه علطول ودى بمثابة شهادة ابتدائيه وهتاخديها فخلال تلات شهور ...وبعدها هتقدمى فاعداديه منازل وتجيبى الكتب تزاكرى فيهم فالبيت هنا وانا واثقه هتفهمى كويس اوى ..ولو حاجه وقفت معاكى خدى فيها درس وهتبصى تلاقى الايام بتعدى وانتى بقيتى بشهاده وانتى قاعده فبيتك ومرتاحه ومية فل وعشره ...انتى متعلمه بس عايزه الشهاده اللى تثبت دا ودى مش صعبه عليكى ...
ليل بتفكير :اشوف
رحاب :مفيش شوف متشوفيش انتى انا شوفت مكانك وخلاص ..
ومن يومها ابتدت رحلتى مع التعليم وقسمت وقتى بين شغلى اللى بحبه وبيجبلى فلوس حلوه قوى ..وبين بتى وقرايتى..
برغم وجود نجمه اللي كانت ماليه عليا كل حياتي وشغلي ودراستي ووقتى اللي دايما مشغول الا اني حاسه بفراغ جواي، حاسه ان في هوه في قلبي ،حاسه قلبي بقى اجوف في حاجه ناقصه في حياتي ومتاكده ان النقص ده مفيش حاجه هتقدر تكمله غير وجود غريب في حياتي واننا نرجع زى الاول .. عارفه انها امنيه مستحيله لكن الامنيات هتفضل دايما تتخطى حدود المستحيل...... منكرش اشتياقي ليه رفرفة قلبي عليه وما كانش حيلتي حاجه عطفى بها شوقي ديه
غير انى ادخل حسابه على فيسبوك كل ليله واشوف هو كاتب ايه وامني نفسي ان كل كلامه كاتبه ليه انا وعشانى
ما اعرفش ايه جرالي فاول مره طلع فيها لايف واتكلم بصوته حسيت حيلى كله باد و قلبي وجعني وانا شايفه شكله تعبان ..تحت العيون اسود والوش ضعيف ..استغربت . مش هو ده غريبي ..ابتدت دموعي تنزل وانا شايفه واحد ثاني قدامي بس قلت لحالي اوعى تصدقي ان اللي هو فيه ده عشانك انتي ده اكيد ضميره عذبه على اللي عمله فيكي ما هو عذاب الضمير مش سهل بردك... صحيح صعب علي بس ما اقدرش اقول اني مسامحاه ولا اقدر اقول اني لسه كارهاه بنفس الدرجه... اني حاسه نفسي محبوسه بين احساسين مختلفين.
وبرغم كل السنين دى الا ان لسه جرح غريب ليا لجمه فقلبي وجمر كل ماريح الشوق تهب عليه يوهوج من تانى .
لقراءة باقي الجزء الثالث من هنا
لقراءة الجزء الثاني جميع الفصول كاملة من هنا
لقراءة الجزء الاول جميع الفصول كاملة من هنا