رواية فرعون الجزء الثالث3
الفصل الخامس عشر والسادس عشر
بقلم ريناد يوسف
اميره اليومين دول لو وصفت الحاله اللى بتعيشها بالسعاده هتكون ظالمه ...لانها حاسه بأحساس تخطى السعاده بمراحل ...
احمد وحبه الواضح واهتمامه بكل تفاصيل حياتها .. الاهتمام اللى عمرها ماحست بيه من شخص قبل كده ...
اول ماتصحى تلاقى رسالة حب على تليفونها ..يسألها فطرتى ..اكلتى ..شربتى ...ارتاحتلك شويه بعد الشغل ولو لا يحلف عليها لازم تدخل تريح ساعه ...لازم يحكيلها تفاصيل يومه من اول مايصحى لحد مايدخل ينام وهى كمان تحكيله ...حست انهم بقو روح وحده فجسدين ...عارفه عنه كل حاجه وعارف عنها كل حاجه ...لكن الحاجه اللى كانت بتدايقها فيه سؤاله المتكرر اللى مبيزهقش منه وهو ايه سبب انفصالها هى وجوزها الاولانى ...قالتله كتير مفيش نصيب ..ودى ارادة ربنا ..مفيش تفاهم كان بينهم لكن برضو كان يسكت شويه ويرجع لنفس السؤال ...
اميره ملقتش مفر من انها تكذب عليه كذبه مينفعش بعدها يسأل السؤال دا مره تانيه ...انه مكانش راجل معاها ..
وكان بيعانى من مشكله صحيه تمنعه من انه يمارس حياته الزوجيه بشكل طبيعى ...
وعشان هى بنت اصول متكلمتش ولا طلعت سره دا بره وفضلت مستحملاه سنين على امل انه يتعالج لكن مفيش فايده ...
ودا سبب انهم مخلفوش طول الفتره دى ...وان السر دا لغاية دلوقتى محدش يعرفه غيرها هى وطليقها بس وقالتهوله عشان بس تسكت فضوله ....
وفعلا دى الاجابه اللى سكتت احمد وارضته بعد ماتأكد ان اميره بنت اصول طالما حافظت على سر جوزها وبيتها سنين واطلقت منه بمنتهى التحضر وفرح انه عرف يختار صح ومش ندمان على اختياره وان اميره هتتحمل معاه كل الظروف ...
************
غريب ...
طول الوقت بيفكر ايه الطريقه اللى ممكن تتوزع بيها البضاعه من غير ماحد ياخد باله او يحس بحاجه غير طبيعيه ...جرب يفكر بنفس نمط الناس دى وحط قدام عنيه كل الاحتمالات لغاية مااهتدى ان الناس اللى بتنقل البضاعه فوضح النهار وقدام الكل بمنتهى الذكاء والحرفيه هتتبع نفس الاسلوب فالترويج ..يعنى البضاعه هتتوزع قدام عيون الكل وفوضح النهار ...ولازم عشان دا يحصل يتوفر تجمع او تجمهر ...زى مثلا ماتش مهم فاستاد ...حفله لفنان معروف فمنطقه معينه ...وبما ان البلد دى مبتحصلش فيها اى مناسبه من دول يبقى ملهاش غير فرصه وحده ...يوم شم النسيم ...اللى فيه بتخرج العائلات والتجمعات بتكون باعداد كبيره وطبعا محدش هيفتش وحده ماشيه بحلة محشى او سبت فيه فسيخ وملانه وبيض ملون ...وبكده البضاعه تتوزع بالكميات اللى تغذى البلد لغاية ميعاد الشحنه الجايه وبمنتهى السهوله واليسر ....
وبرضو غريب هيراقب وحتى لو وجهة نظره واستنتاجه طلع صحيح مضطر يستنى لغاية ميعاد وصول الشحنه الجايه عشان الناس دى متاخدش حذرها وتتعامل طبيعى ..
القضيه دى تعتبر قضية القرن وشاغله تفكير غريب جدا ..لكن مهما كان حجم القضيه واهميتها ..الا انها مش مستحوذه الا على جزء بسيط من دماغ غريب والجزء الاكبر شاغلاه نجمه بنته وازاى هيعرف يلاقيها هى وامها ....
***********
النهارده خطوبة ناديه ...نايمه فأوضتها وابتسمت قبل ماتفتح عنيها وهى بتصحى على احلى نغمة صوت فالدنيا ...صوت مامتها سميه وهى بتهمس فودنها بعد ماحست ببوسه حنينه على خدها ...اصحى يااحلى عروسه فالدنيا دى كلها ...
ناديه فتحت عنيها وصرخت بفرحه قبل ماتدخل فحضن مامتها وتدفن نفسها فيه ...وحشتينى اوى ياماما .
سميه :وانتى اكتر ياروح وعقل وقلب ماما ..
ناديه :كنت هزعل اوى لو مكنتيش جيتى ..
سميه :مقدرش اسيبك فيوم زى دا لوحدك وانا اصلا بستناه من سنين يمكن اكتر منك انتى شخصيا ..
ناديه :مقدرتيش برضو تأثرى على نادر وتجيبيه معاكى !
سميه :رافض ومصمم ومرضتش اضغط عليه ...بس باعتلك معايا رساله بيقولك هو عند وعده ليكى وهييجى على الفرح ..بس هو باعتلك معايا هديه وبيتمنى تعجبك ...هى زوقى انا بس هو اللى دافع تمنها ..
ناديه بفضول :ايه هى الهديه دى ياترى ...
سميه ميلت واخدت حاجه من جمب السرير وكانت علبه كبيره مربعه وفتحتها قدام ناديه اللى صرخت بفرحه وهى شايفه فستان سواريه فضى غايه فالروعه ..
ناديه :واااااو ..مش معقووول ...هو فيه جمال كده ! ومسكت الفستان وقامت حطته على جسمها قدام المرايه وفضلت تبص لنفسها باعجاب ...
سميه :عجبك ؟
ناديه :تحفففه ...وانا اللى كنت فاكره ان الفستان اللى اخترته احلى فستان فالدنيا ...دا جمب دا ولا حاجه ...يمان هيتجنن النهارده .
سميه :اسمه يمان
ناديه هزتلها دماغها بتأكيد ورجعت تانى تبص لنفسها فى المرايه ومش مصدقه جمال الفستان وسميه بصالها بسعاده وبتشكر ربنا انه استجاب لدعواتها وابتسمت لذكرى ليها هى وغريب وكان بيأكدلها ان اليوم دا لما ييجى هتكون فيه مع ناديه زى اى ام وبنتها ...
رجعت ابتسامتها اختفت لما افتكرت غريب اللى برغم كل اللى عمله مع اخوه واللى كل حاجه حواليها بتأكده وهو كمان أكدهولها بلسانه الا انها لغاية دلوقتى مش مصدقه وحاسه ان فيه حاجه غلط ...لكن مجرد الاحساس مش كفايه عشان نكدب باقى حواسنا ونصدق مجرد احساس ...غريب خيانته اتشافت واتسمعت واتأكدت بجوازه من خطيبة اخوه ...سميه هتستنى ايه تانى ...برغم سعادتها باليوم دا وبفرحة بنتها الا ان لقائها بغريب منغص عليها الاحساس دا ...ازاى هتشوفه بعد السنين دى ومش هتقدر تاخده فحضنها ...ازاى هيقف قصادها زى الغريب ...ازاى هتقدر متعاتبهوش على اللى عمله فأخوه والحاله اللى وصله ليها ...
ازاى هتستحمل كل ده ...
فاقت من شرودها على صوت ناديه ...ماما مقولتليش البس عليه الطرحه اللى بنفس لونه ولا الدرجه الاغمق دى ؟
سميه :الكوافيره هى اللى هتحدد الدرجه اللى هتليق مع وشك ولون الفستان متحيريش نفسك ..
ابتدا الوقت يعدى والناس تتجمع وناديه طالعه زى القمر من تحت ايد الكوافيره بالفستان والميكب وسميه واقفه جمبها وخايفه عليها من عيون الناس لدرجة انها عايزه تخبيها ومتخليش حد يشوفها ..
ناديه وهى بتبص لنفسها :واااو مين دى ! .
سميه ضحكت وقربت منها وباست جبينها بحب وقلعت سلسله ناعمه من رقبتها ولبستها لناديه وهى بتقولها ..مقدرتش اجيبلك حاجه بس السلسله دى غاليه عليا اوى كانت بتاعة المرحومه ماما ..وعشان دى حاجه من اغلى وحده بديها لاغلى وحده ...
ناديه وهى بتلمس السلسله قدام المرايه ...الله ياماما رقيقه وحلوه اوووى ...متشكره يااجمل ماما فالدنيا ...
شويه ودخلت جواهر شايله بنتها بعد ماخبطت على الباب واتفاجأت بسميه وسلمت عليها وسميه اخدت منها حلا سلمت عليها وباستها وفضلت شايلاها وسابت جواهر تشوف ناديه محتاجه ايه تعملهولها ...
يمان وصل هو واهله واستقبلوهم وادو خبر لناديه تنزل ...شويه ونزلت مع جواهر وامها اللى اتسمرت على السلم وهى شايفاه وحتى مقدرتش تكمل نزول مع بنتها وفضلت واقفه مكانها ...وهو مكانش رد فعله يقل عنها وهو واقف عند اول درجات السلم من تحت وعينه عليها متثبته وبتلمع بالدموع وملتفتش حتى لاخته اللى اترمت فحضنه اول مانزلت وهو رفع ايده حاوطها وباسها وباركلها ولسه برضو عينه على سميه ...
يمان واقف مذبهل وهو شايف ناديه بتقرب منه وطالعه زى الحوريه لغاية ماوقفت قدامه ...
يمان :انا مش بحلم صح ...يعنى انتى واقفه قدامى بجد وخلاص بقيتى خطيبتى وكلها شويه وتبقى مراتى !
ناديه :لا ياروحى مش بتحلم وانا فعلا واقفه قدامك وبقولك انا خطيبتك وحبيبتك وملكك انتا وبس.
مسك ايدها واخدها وراحو قعدو فالمكان المخصص ليهم ..
اما سميه فنزلت اخيرا بعد مااخدت نفس وغمضت عنيها وقررت انها تتجاهل وجوده مع انها عارفه ان دا صعب جدا عليها وعلى قلبها اللى هيخرج من مكانه ويجرى يحضنه ...
نزلت سميه واتخطت غريب بخطوتين لكن وقفها لما همسلها بكلمه زلزلت كيانها :وحشتينى .
سميه وقفت ثوانى لكنها بعدت خطوه كمان وهى بتهز دماغها برفض عشان تفوق عقلها اللى مبقاش قادر على قلبها اللى بيقولها فاللحظه دى لفى وخديه فحضنك وانسى اى حاجه دا غريب قلبك حبيبك ...لكن عقلها رفض دا وكملت فطريقها من غير ماتبص للى سابته وراها محطم من لقائها بيه اللى كان فاكر انه هيكون ارحم من كده ...
سميه طول الوقت قاعده لوحدها وبتتفرج على كل الناس وشايفه اللى عاش حياته زى ماهر وخلف واستقر والسعاده واضحه عليه وخصوصا وهو بيبص لاولاده وشايفه فعيونه نفس الحب تقريبا اللى كانت بتشوفه فيهم لغريب ...
وناديه اهى بتستقر ونادر اكيد بكره هيقتنع بفكرة الجواز لما يلاقى اللى تحرك قلبه ..وفالنهايه هتفضل لوحدها ...مش عارفه ليه فاللحظه دى جه على بالها شريف ولقت نفسها بتبتسم لا اراديا وهى بتتخيل نفسها قاعده معاه الصبح وبيشاركها فنجان قهوتها وروتينها وتفضل تتكلم معاه ويسمعها وهو يحكيلها عن شغله ومشاكله وتسمعه..
انتبهت لحد قعد جمبها ولما بصت شافته غريب كانت هتقوم بسرعه لكنه مسك دراعها وعنيه كلها ترجى وهو بيبصلها ..
سميه :عايز ايه ياغريب
غريب :عايز منك حاجه اديتهالك زمان ومحتاجها دلوقتى ..
سميه ديقت حواجبها بتساؤل ؟
غريب :عاوز الحب اللى قدمتهولك بسخاء مهما كنتى بتعملى فيا ...عايز ثقتى فيكى رغم كل اللى شوفته منك ...
عايزك تأمنى بيا زى مأمنت بيكى ...عايزك تقفى جمبى زى ماوقفت جمبك فوقت الكل اتخلى فيه عنك ....محتاجلك تكونيلى ام زى ماكنتلك ابن ...
عيون سميه اتملت دموع وهى بتمشيهم على ملامحه اللى واحشاها وبتقاوم فاللحظه دى بكل قوتها عشان متاخدهوش فحضنها لان مهما كان كلامه صح بس اللى عمله مش شويه ...
غريب :هو عامل ايه ؟
سميه بعتب :يهمك !
غريب :قلبي كل يوم بيتقطع عليه مليون حته ...هو وليل اندبحو وانا كنت السكينه اللى قطعت شرايين قلوبهم ...لكن صدقينى السكينه مش اكتر من اداه فأيد المجرم ...السكينه دايما مبيبقاش ليها ذنب ...لكن من غيرها الدبح ميتمش ...
سميه اتنهدت : هو انا ليه حاسه انك معملتش كده ! هو انا ليه حاسه ان فيه حاجه غلط .. غريب انتا خنت نادر مع خطيبته ولا لا ؟ فهمنى محتاجه افهم !
غريب :خنته ...بس مخنتهوش ...ولو فهمتك هتتعبي لانك هتلاقى نفسك مقسومه بين اتنين ...واحد مشفقه عليه ومتعاطفه معاه ...وواحد تانى لايمكن هيصدق غير اللى شافه وسمعه ...مش هتقدرى تتعاملى معايا طول مانادر واخد منى الموقف دا ..ومش هتقدرى تتجاهلينى بعد ماتعرفى الحقيقه ...فخليكى معاه هو افضل ...انا صحيح محتاجلك بس هو محتاجلك اكتر ...
وبالنسبه للدين اللى ليا عندك ياستى انا هتنازل عنه كله فمقابل حاجه وحده بس..واتكلم بهمس وترجى واضح فنبرة صوته ....حضن .
سميه مقدرتش تقاوم اكتر من كده وهى بتشد غريب لحضنها وترفع ايدها تملس على شعره نزولا على ضهره عشان تسمع بعدها تنهيدة ارتياح طالعه من قلبه بعد ماترس رئتينه هوا وهو فحضنها ودخلت معاه ريحتها طبطبت على روحه المهلَكه .
اما قاسم فاطول الخطوبه وهو عينه منزلتش عن يمان وناديه ..
جواهر :عينك يبنى هتحرق العرسان مالك مبرقلهم كده ليه ؟
قاسم :الكلاب دول يتممو كل حاجه من ورا ضهرى ويحرمونى انى العب بأعصابهم لعبتى المفضله واشعوطهم شويه قبل ما يتخطبو ...تقدرى تقوليلى سيادتك انا همارس لعبتى على مين وامتا وناديه آخر حد هيتجوز فالعيله دى وبعدها هستنى لغاية مالعيال دى تكبر وياعالم هتكون فيا صحه امرمطهم ولا لأ ؟
جواهر :والله انا بحس سعات ...بص هى مش ساعات ..هى اغلب الساعات بحس فيها انك عندك عقدة الطفوله ولسه جواك قاسم صغير محبوس ونفسه يطلع وبرغم انك طول الوقت حابسه الا انه احيانا بيخرج عن سيطرتك غصب عنك ويتصرف تصرفات ميتصرفهاش واحد فسنك ولا منصبك ابداااا ..
قاسم :بقولك ايه يبت انتى ..انتى مره هتقولى عليا مجنون ومره تطلعينى مريض نفسى ومعقد انتى عايزه منى ايه بالظبط ...على فكره انا ساكتلك عشان انتى مراتى بس ..لكن لو زودتى فيها هنسى انك مراتى واخدك ارميكى فحبس انفرادى واطلع عليكى عقدى وجنانى براحتى واثبتى ساعتها بقا انى سليم ..منا مجنون ومعقد بقا ..يلا روحى من قدامى شوفى عيالك فين .
قاسم اتحرك من قدام جواهر وراح على غريب اللى قاعد مع سميه وناسى الدنيا ...احممم ايه ياعم من لقى احبابه ولا ايه ...متخليك معانا شويه ياجدع دحنا مابنصدق نشوفك .
غريب قام من جمب سميه وراح مع قاسم ووقفو فالجنينه بعيد عن الدوشه ...
قاسم :موصلتش لحاجه فموضوع نجمه بنتك ؟
غريب :لسه ..بس هوصل بأذن الله ...لازم اوصل ..
قاسم :ربنا هيجبر خاطرك قريب انا متأكد ...طيب قولى ايه آخر المستجدات فقضية بطن الزير دى ..
غريب :قدرت استنتج طريقة التوزيع وهتاكد منها بعد كام يوم فشم النسيم ..وابتدا يحكيله عن استنتاجاته ..
قاسم :وضيف عليهم ان الموزعين هيكونو متخفيين فشكل باعه جائلين فاليوم دا عشان يقدرو يقربو من كل الناس بحجة انهم بيبيعولهم اى حاجه ...
غريب :بالظبط كده ...
قاسم :اه يامين يجيب اليوم اللى الناس دى هتقع فيه تحت ايدى .
غريب :هييجى قريب متقلقش ..كله هييجى بس عايز صبر ..
قاسم :ربنا يصبرنا ...
غريب حط ايده فجيبه وهو باصص لناديه وابتسم وهو شايف فرحتها بعريسها ...كويس الولد دا ياقاسم مش كده ؟
قاسم :فوق ماتتصور ..والا مكنتش خليت الخطوبه دى تتم ..ناديه دى اختى الصغيره ومش هرضالها بواحد باقل من الممتاز ...ويمان بصراحه فوق الممتاز ...تربيتى بقا وانتا عارف تربيتى يعنى ايه .
غريب :اهو انا مش خايف غير من حتة انه تربيتك دى ...يلا ربنا يستر .
شويه ودخلو الفيلا مجموعة بنات صحبات ناديه فالكليه وهجمو عليها واخدوها من يمان اللى فضل قاعد لوحده لغاية ماجاله قاسم قعد جمبه بعد ماغريب سابه وراح يقعد مع ابوه ماهر شويه ...
قاسم :منور يايمان ..منور ياحبيبي ...بس طلعت صايع انتا برضو ..مش سهل خالص ...من ورايا يايمان !...دى حاجه محصلتش طول مشوارى التخطيطى والتفريقى ...قوم لما تحصل تحصل منك انتا ؟ معلش بسيطه بسيطه ..وقال لنفسه ..ان مفسختكم ورجعتكم تانى بعد مااشحتفكم مبقاش انا قاسم ..
ناديه واقفه وسط صحباتها اللى حرفيا اتهبلو على الفستان بتاعها وكل وحده طلبت منها انها هتستلفه منها مره ...
ناديه :ايه الصحاب العره دى ..بدال ميجيبولى هدايا جايين يقلبونى ففستان خطوبتى !
عموما عشان انتو غالين عليا مش هزعلكم ...اللى عايزه الفستان هتاخده بس ايجاره فالساعه ٥ تلاف جنيه ..
ردت عليها وحده من صحباتها/ايوه ياعم منتى سيدة اعمال دلوقتى ومن هنا ورايح مافيش حاجه عندك هتبقى ببلاش ولا هتعرفى حد من غير مايكون وراه مصلحه ..مهو دا نظام رجال وسيدات الاعمال ..
ناديه بضحكه :بالظبط كده انتى جبتى من الآخر ...قال يستلفو الفستان قال !
************
سيليا :ملاحظه شرود نادر من يوم مااديتله المذكره وواثقه ومتأكده انه واقع فحيره ومش عارف يعمل ايه وقلبه مشتت بين سعادة مامته مع انسان بيحبها وهيعوضها عن كل حاجه مرت بيها وبين تعلقه بيها واحتياجه ليها ورفضه انها تبعد عنه ...
استغلت حالة التشتت اللى هو فيها وراحتله مكتبه عشان تتكلم معاه وتضرب على الحديد وهو سخن ...
نادر سمع خبط على باب مكتبه سمح للى عالباب بالدخول ..
سيليا دخلت بدماغها :انا جايه ارغى مش جايه فشغل ياترى ادخل ولا ادخل ..
نادر فضل باصصلها وهى بتدخل من باب المكتب ومتكلمش لغاية ماقعدت على الكرسى قدامه ..
سيليا :اكيد عارف انا جايه اتكلم فايه.
نادر :سيليا انتى عايزه ايه بالظبط ؟
سيليا :انا عايزاك متبقاش انانى ومبتفكرش غير فنفسك وبس ...
عايزاك تحس باللى حواليك ..عايزاك متنتقمش من حد جرحك فحد تانى .
نادر اتجلت العصبيه على ملامحه وهو بيقولها بصوت جهورى :
بأى حق تتهمينى بالانانيه وعلى اى اساس ..واى انتقام اللى بحققه فالناس ، سيليا راعى كلامك وشوفى انتى بتقولى ايه ...وبعدين مين قالك ان فيه حد جارحنى !هى ماما اتكلمت معاكى فحاجه ؟
سيليا :مش لازم حد يقولى عشان اعرف وافهم اللى انتا فيه واللى موصلك للحاله دى ...نادر الحياه مبتوقفش على حد ولو انتا موقف حياتك بارادتك متوقفش حياة غيرك ...لان ببساطه دا مش من حقك ..
نادر :انا مش موقف حاجه ولا بتدخل فحياة حد ...ولو حد موقف حياته عشانى دى مشكلته مش مشكلتى .
سيليا ضحكت بتهكم :عارف انتا مشكلتك ايه يانادر ...مشكلتك يبن عمتى انك مش شايف طول الوقت غير نفسك وعايش ليها ...وبطل بقا كل مااتكلم معاك تكلمنى باسلوب انى راميه نفسى عليك وموقفه حياتى عشانك عشان انا مش بتكلم عن نفسى دلوقتى ...ولعلمك انا متقدملى عريس ومبدأيا موافقه عليه واكيد انتا اول المدعويين ...عشان لما تشوفه واقف جمبى ومكمل الصوره تصدق ان الدنيا مبتوقفش عند حد وان الناس بتدوس على قلبها وتكمل حياتها عادى ...
نادر :طيب دا خبر حلو اوى ده ...
وياترى بقا مين العريس ..حد اعرفه ؟
سيليا :اه حد تعرفه ..وحد ناجح جدا واخلاقه عاليه جدا جدا ...والاهم من دا كله اختارنى انا بالذات دونا عن كل البنات عشان يكمل حياته معايا ويدينى اسمه ويأمنى عليه...واللى زى دا يستاهل اشيله فوق راسى العمر كله ..
نادر : ايه دا بجد ...طيب الف الف مبروك ياستى ..وياترى اسمه سر حربى ولا بيتقال عادى !
سيليا :لا مش سر ولا حاجه هتعرفه فالوقت المناسب ...المهم عمو شريف وابنه النهارده معزومين عندنا ...فالو وجودهم على الغدا هيدايقك تقدر تطلب اكل وتاكل فالمكتب او تنزل تتغدى فمطعم ...
نادر :هو انا اصلا هعمل كده كل يوم لغاية ماماما ترجع من السفر لان بصراحه مفيش وحده فيكم بتعرف تعمل حاجه تتاكل اصلا ان كان انتى او اختك ..
سيليا :والله دا اللى نعرفه ودا اللى عندنا واللى عاجبه ياكل من اكلنا ياكل واللى مش عاجبه المطاعم ماليه الدنيا ..
نادر :لو خلصتى كلام اتفضلى على مكتبك .
سيليا :لا انا مروحه عشان يادوب الحق احضر الاكل لعمرو ..قصدى لعمو شريف ..عن اذنك وراحت على الباب ولفت لنادر اللى كان لسه عينه عليها وقالتله :اه ..على فكره لو كنت خلصت الاجنده انا عايزاها عشان ارجعها لصاحبها ..
نادر :سيليا ..هى ماما قرت الاجنده دى ؟
سيليا :ليه السؤال ده
نادر :مجرد سؤال .
سيليا :اه قرتها ..وانا بنفسى اصريت عليها عشان تقراها ...
نادر هز دماغه بتفهم وسيليا خرجت وفهم دلوقتى سبب الحاله اللى كانت فيها مامته فى الكام يوم اللى فاتو دول وسبب تغير احوالها واهتمامها بنفسها فالفتره الاخيره .
شبك ايديه ورا دماغه ورجع دماغه لورا وفضل يلف بالكرسى شمال ويمين وهو سرحان مفاقش من شروده غير على صوت رسايل فالتليفون فتحه لقاها ناديه بعتاله صور الخطوبه بتاعتها عالوتس ...
فضل يقلب فيهم وابتسامته مع كل صوره تزيد اكتر وهو شايف فرحة ناديه والحب اللى باين فعنيهم هى وخطيبها ...
لغاية ماشاف فصوره غريب وقاسم واقفين ورا ناديه بيتكلمو وواضح انهم ظهرو فالكادر صدفه ...نادر حس بالحنين لايامهم سوا ...لصحبتهم ...لضحكهم ...
لايام الشقه وسكنهم فيها ..لسنين عاشو فيها روح وحده متقسمه على تلات اجساد ...ابتسم وهو بيكبر الصوره عليهم هما الاتنين لكن سرعان ماحنينه دا انطفى لما رجع افتكر اللى عمله غريب معاه ...وبسرعه الكره والحقد رجعو اتملكو مكان الحنين وبددو الاشتياق وحولوه لضباب اسود كسى قلبه وعيونه فثانيه ...محسش بنفسه غير وهو بيرمى تليفونه بكل قوته على الحيطه عشان ينزل اجزاء كل جزء فمكان ..
اللى قاهر نادر اكتر من خيانة غريب ليه ...انه طلق اميره بعد ماعرف من ناديه انه كان هاجرها طول الفتره اللى فاتت ..
معنى كده ان كل اللى حصل بينهم كانت نزوه من غريب مقدرش يسيطر عليها ...
حليت فعنيه فاستكترها عليه ومقدرش يسيطر على نفسه ولا اخوه ولا مراته ولااى حد وقف قدام عنيه وهو بيعمل كده ...يمكن لو اتأكد ان اللى فقلب غريب حب لاميره كانت ناره بردت شويه وكان هيلتمسله حتى لو عذر واحد لانه عارف ان الحب محدش بيبقاله يد فيه ..
وقف نادر واخد مفاتيح عربيته ونزل لف شويه بيها وبعدين ركن على جمب وفضل واقف ومش عارف يعمل ايه عشان يخفف وجع الخيانه اللى رجع اتجدد جواه من تانى بمجرد انه شاف غريب فصوره ..وسأل نفسه لما احساسه كده من مجرد صوره امال لو شافه قدامه فالحقيقه هيكون احساسه وقتها ايه..
نادر بعد ماتعب من القعاد فالعربيه ساق ورجع للبيت ورن الجرس على شقة خاله وخاله عامر فتحله الباب واستقبله ...
نادر دخل يتلفت فالشقه وملقاش شريف ولا ابنه موجودين فرجع بص لخاله وسأله :هو صاحب الغفله لسه مجاش ولا ايه ؟
عامر بضحكه :لا لسه مجاش وبعدين اسمه صاحب العمر مش صاحب الغفله ...وبعد ماخلص جملته دى اتكلم بجديه ...نادر انا بصراحه مدايق من الموقف اللى انتا واخده من شريف دا ومش قادر افهم ايه سببه ...مع ان الراجل وابنه مصدرتش منهم اى حاجه وحشه وناس فمنتهى الاحترام والرقى ..
نادر قعد على الكنبه واتكلم بتقل :مش عارف ياخالو بس بصراحه اللى اسمه شريف وابنه دول من ساعة ماشفتهم اول مره وهما مش نازلينلى من زور ...
عامر :سبحان الله ..عموما يمكن فكرتك عنهم تتغير مع الايام انا فعلا بتمنى ده..وعلى رأى المثل اللى بيقول مامحبه الا من بعد عداوه .
نادر كان هيتكلم مع خاله لكنه شاف سيليا خارجه من اوضتها لابسه دريس شيفون ازرق ولونه عاكس على لون عنيها الفيروزى اللى بتتلون على حسب اللون اللى لابساه وحاطه طرحه من نفس لون الفستان بس افتح درجه ورامياها على دماغها باهمال وخرجت قدامه على المطبخ بعد ماادتله نظره عابره من غير ماتتكلم وتجاهلته تماما وهو فضل ماشى بعنيه وراها ..
عامر :ناااادر بكلمك رحت فيين ؟
نادر :معاك ياخالو ...كنت بتقول ايه .
فضلو يتكلمو مع بعض فالشغل شويه وسمعو صوت جرس الباب ونادر قام فتح وعمرو وشريف ارتبكو لما لقوه هو اللى بيفتح ...
شريف :أءهلا يانادر اخبارك ياحبيبي .
نادر :بخير الحمد لله ..اتفضلو ...
عمرو وهو داخل رفع ايده بتوتر شاور لنادر ..هاى ..
نادر :هايات .
دخلو الاتنين وقعدو جمب عامر وعمرو ميل على باباه ...مش قولت مش هيكون قاعد اخينا دا ...بتضحك عليا وبتدبسنى ياشرشر ؟!
عامر :والله المره الى فاتت مكنش قاعد انا قولت زهق ومش هيقعد معانا تانى .
عامر :ايه ياشريف انتا وعمرو مالكم كده حاسسكم متوترين ليه ؟
نادر :سيبهم الظاهر بيتوشوشو فموضوع مهم ..مش قالك لا يتناجى اثنان لما نكون قاعدين مع حد ...
وهنا ردت عليه سيليا اللى كانت خارجه من المطبخ وشايله بايركس مكرونه بالبشاميل وهى لابسه جوانتى المطبخ وشكلها ست بيت وكيوته فنفسها اوى ...
دا لما يكونو تلاته لا يتناجى اثنان دون الثالت لكن لو اكتر من تلاته يتناجو عادى جدا على فكره ..
وحطت الاكل على السفره وقلعت فردة الجوانتى اليمين ومسكته فايدها الشمال وراحت عليهم ...اونكل شريف اخبار حضرتك .
شريف بضحكه :والله ياسيليا انا مش بكون بخير غير فوجودك يابنتى .
سيليا كملت بابتسامه ونغمة صوت رقيقه :هاى عمرو ازيك ...ومدت ايدها سلمت عليه ..
عمرو :انا بخير سيليا اخبارك انتى .
سيليا :ايام فاين ثانك يو ..ثوانى والاكل يكون جاهز ...بعد اذنكم ..
وسابتهم ودخلت جوه وعيون عمرو عليها وعيون نادر عليه وخرجت هى وسيلين اللى مكانتش تقل عنها شياكه وجمال وهما شايلين الاكل ..
رجعو للمطبخ وعمرو قام وراح وراهم مما ادى الى صعق نادر من الذهول :
عمرو :
تسمحولى اساعدكم فنقل الاطباق على السفره انا متعود على فكره عشان انا اللى مسئول عن الطبخ عندنا اللى هو بيتلخص فى بيض مسلوق وبطاطس محمره وسلطه .
سيليا :ياراجل خضيتنى قولت دا طلع بيعرف يطبخ وهتفضح النهارده بعد مايدوق اكلى ...الحمد لله ربنا ستر ..
عمرو بضحكه :على فكره انا اه مبعرفش اطبخ بس بعرف ادووق حلو اوى يعنى ...
سيليا :دى نبقا نشوفلها حل بعدين ...وخرجو من المطبخ يضحكو سيليا وعمرو وهما شايلين اطباق وحطوهم على السفره ورجعو تانى وشالو اطباق ولسه هيلفو اتفاجئو بنادر واقف على باب المطبخ وحاطط ايديه فوسطه اتخضو ورجعو لورا وبطلو ضحك ...
سيليا :اكيد جاى تساعدنا يانادر مش كده ، اكيد شفت تصرف عمرو الجنتل حبيت تقلد ...عموما خد الطبق دا حطه عالسفره وخلاص كده مش فاضل حاجه تانى ..
اتحرك نادر بالطبق بعد مانقل عنيه بينها وبين عمرو بنظرات ناريه وراح رزعه على السفره وقعد والنهارده عمرو هو اللى كان تحت الميكروسكوب وعدسات المراقبه طول الوقت لدرجة ان نادر كان ناسى شريف تماما ...
شريف :غريبه هو انتو مش قولتو ان سمس...قصدى ام نادر مسافره ...امال حاسس ان الاكل دا فيه نفسها ليه ..نفس الطعم تقريبا ونفس الطعامه ..
سيليا :بجد يااونكل شريف عجبك !
شريف :جدا ياروح اونكل ..
عمرو :بجد تسلم ايدك ياسيليا الاكل روعه ...
وهنا نادر رفع الشوكه لاول مره يدوق الاكل اللى اتفاجأ بطعمه فعلا لانه نفس اكل امه بالظبط ...
سيليا اتكلمت بعد ماشافت علامات التعجب على وش نادر ...على فكره نفس عمتو موجود فالاكل فعلا ياعمو انتا مكذبتش لانى طول الوقت فاتحه كام معاها وفضلت معايا خطوه بخطوه لغاية ماخلصنا الاكل سوا ...
وكملت :انا مبعرفش اطبخ صحيح ..لكن لما الواحد يحب يعمل حاجه لحد غالى عليه بيبذل كل جهده عشان ينجح فيها وتطلع زى مابيحبها ...وبصت لنادر بطرف عينها وهى شايفاه باصص عليها وهى بتكلم ..
شريف :والله انتى حتتة سكر ياسيليا ..
سيليا :ميرسى يااونكل دا حضرتك اللى جميل عشان كده بتشوف كل حاجه حلوه ...
اما سيلين فبتاكل وهى مش معاهم خالص ومن وجهة نظرها الشخصيه ان كلامهم دا تافه جدا وان الواحد المفروض حتى الكلام يطلعه بحساب ويكون كلام مفيد ولذلك مش بتهدر وقتها ولا مجهودها فكلام فاضى واحاديث جانبيه ...
سيليا بصت لشريف وغمزتله قبل ماتتكلم وهو فهم وسايرها ..
على فكره ياعمو انا ابتديت افكر فطلب حضرتك انتا وعمرو بجديه وبأذن الله يومين وارد عليك ..
شريف بفرحه مصطنعه :بجد ..والله فرحتينى اوى ياحبيبتى بالخبر دا ..على فكره دا خبر بمليون جنيه ..ولا ايه ياعمرو ..وخبط عمرو اللى مكانش معاهم خالص وعمرو رد بدون فهم :اه اه طبعا يابابا امال ايه ..
نادر ساب من ايده الشوكه والسكينه وشبك ايديه بعد ما سندهم على السفره وسند عليهم دقنه واستمر فمراقبة سيليا وعمرو ومش عارف ليه مش مرتاح للوضع .
عدو ٣ ايام بالظبط وسميه رجعت من مصر على الامارات من تانى
وللاسف شريف مكانلوش نصيب انه يشوفها لانه سافر هو وابنه على دبى للفرع بتاعهم هناك وسأل سيليا هى سميه متكلمتش معاكى ولا قالتلك حاجه بعد ماقرت الاجنده وسيليا قالتله انها سافرت على مصر قبل ماتلحق تسألها على حاجه او عمتها تحكيلها عن احساسها بعد المذكرات وده احبط شريف جدا لانه كان فاكر ان مشاعره هيكونلها تاثير اكبر من مجرد قرايتها وتجاهلها من سميه...
*********
عدو تقريبا ٣ شهور والكل عايش حياته بنفس الروتين ...
ابتدت سنه دراسيه جديده زادت فيها الاعباء على ليل مره تانيه بين دروس وطبخ وبيت ونجمه وكالعاده بتجرى من هنا لهنا ويادوب بتلاحق وبالعافيه قادره تقسم وقتها عشان متقصرش فاى من واجباتها .
رحاب راحت للكليه بتاعتها ورجعت زياراتها ليهم تبقى بشكل أسبوعي من تانى ...
فريال بتساعد ليل على اد ماتقدر فالشغل ونجمه وحتى شغل البيت احيانا على اد صحتها بتساعد فيه مع ان ليل بتعترض على مساعدتها دى لكن برضو فريال بتخلى ليل تنام وتخلص اى حاجه من شغل البيت اللى ليل مكملتهوش عشان بتصعب عليها وهى ليل نهار فتعب مش بترتاح ..
نجمه كانت احيانا ليل تعدى عليها فالحضانه تجيبها فطريقها فايام الدرس بعد ماتخلص لكن فاغلب الاحيان فريال هى اللى كانت توديها وتجيبها نظرا لان الحضانه مش بعيده اوى .
ناديه بتعيش اسعد ايام حياتها مع يمان اللى ملى عليها دنيتها بحنيته ورومانسيته واحيانا هبله وهو الوحيد اللى تقدر تقول انه فعلا عوض غياب غريبووو فحياتها ..
قاسم مشغول جدا طول الفتره اللى فاتت دى عشان شغال على قضيه تقيله متورط فيها روس كبيره اوى فالبلد
وفيه منهم ناس عندها حصانه وتعب جدا هو والفريق اللى معاه على ما جمعو كل الخيوط والادله واثبتو تورط الناس دى واخيرا عرفو يقبضو عليهم وكالعاده مهمه صعبه وشبه مستحيله لقاسم تكلل بالنجاح اللى يتضاف لرصيد قاسم ويكون مصدر فخر ليه وتقدير من كل القيادات المباشره .
ناديه كل يوم بتثبت لباباها شطارتها فالشركه وسرعة تعلمها وفهمها لكافة امور الشغل فوقت قياسى مخليه ماهر دايما فحالة ذهول وهو بيتفاجأ بيها وبقدراتها اللى مكنش يتخيلها بتزيد يوم بعد يوم ..
غريب راح العقبه لما سمع ان فيه رحلة سفارى متنظمه واتأكد ان كل شكوكه واستنتجاته طلعت فمحلها ومسك نفسه بالعافيه وهو شايف الناس قدامه بتتحرك بحريه وكل واحد منهم شايل اللى يسجنه مؤبد على الاقل دا ان مكانش ياخد اعدام لكن هو هدفه كان اكبر من مجرد ديلرات وموزعين ...هدفه الموردين والمستوردين نفسهم .
رجع على المقر بتاعه ..لمكتبه لروحه اللى فصوره وخلوته اللى مش بيرتاح غير فيها ويراقب نجمته اللى فالسما و يدعى ربنا كل يوم فكل صلاه وبين كل اذان واقامه ان نجمته اللى عالارض يجى يوم و تنام فحضنه زى نجمته اللى فى السما مانايمه فحضن القمر ..
فرعون 3
البارت السادس عشر 16
اميره :اتحدد ميعاد فرحنا انا واحمد وماما وبابا بيجهزو وفرحانين كأنى اول مره اتجوز ..حساهم فرحانين الفرحه اللى معرفوش يفرحوها بجوازى من غريب
ماما مريم مبطلتش شرا فهدوم وفرش ولوازم مطبخ لدرجة ان من فرحتها هى وبابا مخلوش احمد يجيب اى حاجه وهما اللى جهزولنا الشقه من الالف للياء وعلى قلبهم زى العسل ...
اما احمد فبرغم حبه وحنيته الا انى كنت بدايق منه اوى طول الفتره اللى فاتت دى لما بيتصرف احيانا تصرفات غير عقلانيه ويطلب طلبات مستفذه ...
كان يتدخل فكل كبيره وصغيره فحياتى تخصه او متخصهوش زى مثلا اهلك بيعملو ايه ...بيتكلمو فايه وايه المواضيع اللى بيتناقشو فيها قدامكم ...بتكلمى مين ومين صحابك ...انا مش مرتاح لصحبتك فلانه اقطعى معاها ...النهارده تلبسى الطقم الفلانى ...متنزليش من البيت ولا تتكلمى مع حد من غير بعد ماتستأذنينى الاول ..ولو شافنى بتكلم مع وحده لازم احكيله اتكلمنا فأيه بالتفصيل الممل ولو لخصتله كلامنا يقولى لا احكى بالتفصيل ...
صفحتى على الفيس لازم تبقى مفتوحه على تليفونه وتليفونى ...الواتس كمان لازم يفتش فيه على غفله وقت مايحب ويفتش فالارقام والمكالمات الصادره والوارده ....لازم انقله رأى الناس فيه وبيقولولى ايه عليه لما تيجى سيرته فالكلام ...شكله قدام الناس مهم جدا لازم احافظ عليه واراعيه فكل تصرفاتى....واوامر كتير وحجات صغيره وتافهه كتير كانت بالنسباله حجات فغاية الاهميه وممكن الدنيا تقف لو متنفذتش ....
زعلت منه مره واتنين ولفتت نظره ان اسلوبه دا بيدايقنى ..وكان رده عليا دايما ان دا نابع من غيرته عليا والغيره بتبقا نابعه من الحب والمفروض انى ازعل لو كان بيعمل العكس ومكبر دماغه من ناحيتى ومبيسألش فيا ...
سالت كذا وحده من صاحباتى كانو يقولولى كل الرجاله بتعمل كده وبعد الجواز هيبعد عنك وانتى بنفسك هتطلبى الاهتمام دا منه مش هتلاقيه ...
صدقتهم وبقيت مره اتعصب منه ومره اسايره وأضطر انى انفذ اوامره واسمع كلامه حتى لو غصب عنى ياكده يأما القيامه تقوم ويخاصمنى بالايام وميتكلمش معايا غير لما انا اللى اتصل بيه واعتذرله ..
عدى علينا بالحال دا تلات شهور طول مدة الخطوبه اللى اخيرا انتهت وخلاص فرحنا بعد يومين وقلت مرحله وخلصت وهندخل على مرحله جديده مختلفه وهقدر اغير طبعه دا نهائى ..
فريده كانت طول الوقت فوادى تانى خالص بعيد عنى من يوم مااتجوزت غريب .وحتى فجوازتى دى حاساها مش فرحنالى ولا متحمسه ولاكأن اختها اللى بتتجوز مع انى طول عمرى بشوف الاخت بتبقا فرحانه لاختها اكتر منها هى شخصيا ...
سبتها براحتها خالص لان الاهتمام مينفعش ينطلب وخصوصا من حد المفروض اهتمامه بيك يكون من اولوياته ..
اما اكتر موقف استغربته هو موقف احمد لما اهلى بلغوه انهم هما اللى هيفرشو الشقه كلها وهيعتبروها هديه منهم ليه ...
كنت فاكراه هيرفض او حتى هيحاول انه يحفظ ماء وجهه انه يتكفل بحاجه معاهم لكن دا لقيته فرح جدا ورحب بالفكره وكأن دا شيئ عادى يحصل ،وكانه كان منتظره وحتى مقالش كلمة شكر لبابا وماما اللى صرفو دم قلبهم على الشقه توضيب وفرش ..
لما قلت الكلام دا قدام ماما قالتلى فيه ناس بتنحرج انها تشكر حد او تعترف قدامه انه عمل فيها جميل لكن شكرهم مبيبقاش بالكلام بيبقى بالافعال.. وبيكونو مستنيين اقرب فرصه عشان يردو الجميل لاصحابه واعتقد ان احمد ممكن يكون من الناس دى والله اعلم ...وكالعاده انهت كلامها بجملة ...بس علفكره احمد دا انا مش مرتحاله ..
*************
قرب ميعاد دخول البضاعه لمصر وغريب بيستعد لليوم دا بكامل جهده وقاسم طول الوقت متابع معاه وقدرو يعرفو بالتحديد انهى وقت اللى بيرجع فيه الزودياك للخليج لانه له اوقات محدده وهى شهر ١٢ وشهر ٥ وشهر ١٠ ويفضل فالخليج من ٣ ل٥ ايام وبعدها يختفى هو والزودياك التانى واللى محدش شاف زيهم قبل كده فمصر من حيث الشكل والتصميم ومن الواضح انهم صناعه غير مصريه ...
غريب بلغ القياده بالمهمه والمستجدات والخطه اللى وضعها للهجوم على الناس دى والجهاز قام بتكليف فريق من امهر الغطاسين بالدخول لمنطقة النفق وزرع كاميرات مخصوصه بطريقه احترافيه تمكنهم من رؤية اللى بيحصل فالمكان لحظه بلحظه وبكده مفيش بس غير انهم ينتظرو لحظه ظهور البضاعه عشان يهجمو ...
*************
نادر كان رايح لخاله فالشركه اللى بيشتغل فيها عشان ياخد رأيه فحاجه مستعجله فالشغل ويتناقشو فيها بسرعه نظرا لديق الوقت واتفاجأ وهو بيستاذن ويدخل مكتب خاله ان شريف وابنه عمرو قاعدين هما الاتنين فمكتب خاله عامر بعد ماكانو فدبى وكان مرتاح منهم طول الفتره اللى فاتت دى ..لف عشان يقفل الباب وراه واللى كان جرار وقفله وهو مديهم ضهره وبيجز على اسنانه .
نادر دخل سلم عليهم وقعد وسطهم وابتدا يتكلم قدامهم مع خاله عن سبب زيارته ليه النهارده لما لقاهم مش ناويين يقومو وهو مستعجل ..
شريف رد على نادر بالنيابه عن عامر بعد مااستاذن عامر طبعا وقاله وجهة نظره واللى عجبت عامر جدا وبصراحه عجبت نادر هو كمان لكنه مأبداش اعجابه بيها ولا اظهر انه هيعتمدها واكتفى بانه قالهم هفكر وادرس الفكره الاول فدماغى كويس وبعد كده هقرر ..
نادر كان هيستأذن عشان يرجع الشركه وينفذ فكرة شريف بسرعه لكن وقفه خاله وهو بيقوله ...نادر عمك شريف وعمرو جايين النهارد يخطبو وحده من بنات خالك .
نادر بص لشريف ورفع حاجبه :والله ..طب كويس ..وياترى محدد وحده ولا هتعمل حادى بادى مابينهم بقا ؟!
شريف :بصراحه يانادر بنات اخويا عامرالاتنين احسن من بعض وعمرو معندهوش اى مشكله يتجوز اى وحده من الاتنين... وانا عن نفسى بتمناله سيليا عشان البنت العفريته دى انا بعشقها ...لكن بقا هنسيب الاختيار ليهم هما واللى تشوف انه مناسب ليها وتوافق ترتبط بيه عمرو هيشيلها فعنيه ...مش كده ياعمرو .
عمرو :فعلا يابابا انا ليا الشرف انى اناسب اونكل عامر واتجوز من بناته وزى ماحضرتك قولت الاتنين احسن من بعض .
نادر :امممم ...عموما على خيرة الله والف مبروك مقدما .
وقام مشى وهو متعصب وقفل الباب وراه بمنتهى العنف ..
عمرو اتكلم بعد مااتخض من خبطة الباب هو واللى موجودين :اونكل هو نادر دا ملوش علاج ...يعنى هيفضل دايما معانا كده مش هيهدى ؟
عامر :لا باذن الله هيهدى دلوقتى وخصوصا لما نبقى نسايب اكيد هيحاول يتقبل الموضوع متقلقش .
نادر رجع على مكتبه فالشركه ومضى على العقود اللى على مكتبه بمنتهى العصبيه بعد ماكلم الشركه وبلغهم انه هيغير الشرط الجزائى بشرط جديد وهما قبلو ورن الجرس على سيليا وقبل ماتوصل مسك العقود بعصبيه وخرج وهو خارج هى كانت داخله ونادر اول ماشافها خبطها بالاوراق على صدرها :
خدى ابعتى دول لشركة AMGبالفاكس وبعد ماتخلصى نزليهم لمحامى الشركه ... وكمل بتهكم ياعفريته هانم .
ومشى قدام سيليا اللى لسه واقفه حاضنه الاوراق ومش مستوعبه تصرف نادر المجنون دا ولا كلامه ومش فاهمه ايه سر عصبيته ...ومكانش منها غير انها هزت دماغها بقلة حيله بعد مااختفى من قدام عنيها واتحركت وهى بتلعن فحظها اللى خلاها تحب واحد مجنون ومعقد زى نادر ..
نادر رجع على شقته وفتح الباب ودخل على اوضته علطول لما ملقاش امه مستنياه ودا طبعا لانه رجع قبل ميعاده ....غير هدومه وراح على شقة خاله ورن الجرس وامه فتحتله الباب واتفاجات بيه قدامها لانه عمره ماعملها ورجع قبل ميعاد شغله ..
سميه : رجعت بدري ليه عن ميعادك انتا تعبان يانادر ؟ فيك حاجه ياحبيبي ؟
نادر :لا ياماما متخافيش انا كويس بس خلصت شغلى بدرى وقلت اروح ارتاح شويه وابقا ارجع الشركه على بعد العصر كده ..
سميه :احسن حاجه عملتها ياحبيبي ...طيب مدخلتش تناملك ساعه ولا ساعتين ليه على بال ماخالك وبنات خالك يرجعو عشان نتغدى مع بعض ...
نادر :حاولت بس معرفتش ...انا هقعد هنا استناهم لما يرجعو ..وقعد على الكنبه ومسك الريموت وفتح التليفزيون ..
سميه :طيب انا داخله اكمل الاكل .
نادر :روحى ياحبيبتى ...
دخلت سميه المطبخ ونادر مقدرش يركز فالتليفزيون وطفاه لما حس ان الدوشه اللى فدماغه كفايه ومش ناقصه دوشة التليفزيون تزيدها ...فرك وشه بأديه وبص على امه اللى واقفه فالمطبخ وبتقلب فالاكل وهى سرحانه ودا واضح جدا من حركة ايدها البطيئه وزوغان عنيها ...قام نادر مشى بالراحه لغاية ماوقف جمبها وكل دا وهى مش حاسه بيه لغاية مااتكلم .
نادر :ماما
سميه انتبهت وبصت لنادر :ايوه ياحبيبي عايز حاجه اعملهالك ...
اجيبلك عصير ولا حاجه خفيفه تاكلها لحد ميعاد الغدا ؟
نادر :لا ياحبيبتى مش عايز حاجه ..انا بس عايز اسألك سؤال ...
سميه باستغراب :سؤال ايه ياحبيبي قول .
نادر :لو قدامك فرصه انك تعيشى باقى حياتك بسعاده والفرصه دى لو ضاعت مش هتتعوض تانى ..
وخيرتك بينى وبين الفرصه دى هيكون ايه اختيارك .
سميه ردت بدون تفكير :طبعا هختارك انتا ياحبيبي ..وهو انا اقدر اكون سعيده ازاى وانتا بعيد عنى ! انتا يانادر اهم حاجه عندى فالدنيا ..اهم حتى من نفسى ..انا وانتا ملناش غير بعض وانا مش هتخلى عنك ابدا .
نادر ابتسم وميل على امه باس دماغها ومسك ايدها باسها بحب وسابها ولسه هيخرج لكنه لف وقالها :على فكره شريف رجع من السفر ...وكمل طريقه وسابها مرتبكه ومش قادره تسيطر على اعصابها ولا على دقات قلبها بعد ماعرفت الخبر دا ونادر قعد فالصاله مبتسم وهو كل شويه سامع صوت حاجه بتقع من امه فالمطبخ ودى مش من عوايدها .
***********
رحاب النهارده الجمعه ويوم اجازتها واخدت نجمه الساعه ٩ الصبح زى عوايدها ونزلو عشن يتفسحو ويلفو شويه فالشوارع والمول مع بعض لكن وهما ماشيين رحاب اتفاجات بصوت رجالى بينادى عليها انسه رحاب ..انسه رحاب .
رحاب التفتت وشافت شاب لابس بنطلون وقميص شيك جدا لكنه ملتحى بيقرب منها هى ونجمه ..
كامل :انتى الانسه رحاب بنت الست فريال مش كده ؟
رحاب :ايوه انا ..حضرتك تعرفنى؟
كامل ابتسم وعنيه باصين للارض ورد عليها :الحقيقه لا انا معرفش حضرتك بس يعنى سمعت عنك ...
خلينى اعرفك على نفسى ..
انا الشيخ كامل شيخ الجامع الجديد وابتديت بأمر الله ادى دروس تحفيظ قرآن ودروس دين للاولاد والشباب بتوع المنطقه ...
وفيه بعض الفتيات بيجو يحضرو الدروس واحيانا فيه حجات فى بعض الايات بتكون محتاجه شرح وتوضيح وانا بصراحه بلاقى مشقه فى شرحها للفتايات وبرغم من ان لا حياء فالعلم الا انى بحس بحيائهم وبحس انهم مكسوفين يسألو عشان يفهمو اكتر ...
وعشان كده انا سألت اهل المنطقه عن وحده تكون متعلمه ومثقفه تقدر تساعدنى فالمشكله دى وبصراحه الكل اجمع عليكى وعرفت منهم انك ماشاء الله تبارك الله جامعيه ازهريه ودارسه اصول دين وانك انسب وحده تنفع للمهمه دى .
رحاب :ايوه ياشيخ بس انا لسه بدرس ..يعنى باروح كليتى ومش باجى غير خميس وجمعه بس .
كامل :وانا مش طالب من حضرتك غير بس ساعه وحده يوم الجمعه بعد صلاة العصر تقضيها مع البنات ومش هتشرحيلهم الا الحجات اللى انا هلاقى صعوبه فى شرحها ليهم باستفاضه ...
انا عارف ان الساعه دى هتكون من وقت راحتك اللى بتنتظريها من الاسبوع للاسبوع لكن انا مستعد اعوضهالك واخصصلك مبلغ اسبوعى نظير تعبك ...بس يعنى مش هيكون كبير اعذرينى عشان انا هدفعه من جيبى الخاص وانا متعين جديد ولسه المرتب على اده ..هاه قولتى ايه ؟
رحاب :اولا انا موافقه ...ثانيا بالنسبه للفلوس فأنا هعمل كده لوجه الله تعالى ومش هاخد اى فلوس ...ثالثا بعد اذنك يكون الدرس بعد صلاة الجمعه مباشرة عشان انا بيكون ورايا شغل من بعد الضهر للمغرب ..بس بعد اذن حضرتك هبتدى من الجمعه الجايه عشان النهارده معملتش حسابي ولا اديت خبر لماما .
كامل ابتسم ورفع عنيه غصب عنه وهو بيشكر رحاب اللى بمجرد ماشافت لونهم العسلى الفاتح حست انها اتعرضت لصعقه كهربائيه ونزلت عنيها بسرعه وهى بترد عليه وتقوله مافيش داعى للشكر واتحركت فورا من قدامه وهى حاسه بارتباك شديد لمجرد ان عينها جت فعينه لجزء من الثانيه ....
يومها رحاب روحت ونسيت موضوع الشيخ كامل دا خالص مفتكرتهوش غير وهى بتسمع الاذان الاول لصلاة الجمعه بصوت عذب جميل فيه خشوع يجبر اللى بيسمعه على الانتباه ليه بكل حواسه ....
فريال بعد ماخلص الاذان :والله من ساعة الشيخ الجديد دا ماتوظف فالجامع والواحد بيستنى ميعاد الاذان بفارغ الصبر عشان يسمع صوته ...
ليل :فعلا صوته حلو قوى ماشاء الله
رحاب فسرها :وهو احلى من صوته ...واستغفرت نفسها لما انتبهت هى قالت ايه وبصت لمامتها واتكلمت :صحيح ياماما الشيخ الجديد دا طلب منى انى ادى درس دين فالجامع للبنات ساعه كل يوم جمعه وانا قولتله هسأل امى وابقا ارد عليك .
فريال :ودى فيها سؤال يابنتى ؟يعنى انا هعترض انك تعلمى العيال دينهم ..وهو انا كنت بعلمك ليه ودخلتك ازهر ليه مش عشان تتعلمى ومتبخليش بعلمك دا على حد .
رحاب :انا كنت متأكده من ردك دا بس مينفعش برضو انى اتخطاكى واوافق على اى حاجه من غير مااديكى خبر ...دى الاصول يافريال خانوم ..وانا متعلمه الاصول على اديكى .
فريال :يبت بكره الاسم دا بقولك ...
ويلا قومى من جمبى يام الاصول انتى عايزه اسمع الخطبه بتاعت الشيخ السكره دا دانا بستناها من الجمعه للجمعه دا بيقول كلام جميل ويحكى قصص الانبياء هتخليها تفوتنى .
رحاب :لا ياستى متخافيش مش هتفوتك انا قايمه اتوضى عشان اصلى ...يلا ياجوجو نتوضى سوا ..
قامت نجمه ومسكت ايد رحاب وراحو يتوضو عشان يصلو الجمعه مع بعض ورحاب بعد ماتخلص تفضل تقرا فسورة الكهف بصوت عالى ونجمه تردد وراها ...
ليل قعدت جمب فريال وفضلت باصه لرحاب وهى واخده نجمه ورايحين على شقتهم وقالت لفريال :
يازين ماربيتى ياخاله والله ...رحاب دى اللى هتكون سبب دخولك الجنه باذن الله .
فريال :ربنا يسمع منك ويريحها ويريح قلبك يابنتى ببركة اليوم اللى فيه ساعة استجابه دا ..
ليل اتنهدت وهمست :يارب ياخاله يارب.
**************
عدو يومين ونادر اتفاجأ بخاله بيقول ان شريف جايله النهارده عشان عازمه هو وابنه على الغدا وبالمره يرد عليهم بخصوص موضوع الخطوبه دا ..
نادر فضل ساكت ومتكلمش برغم ان سيليا لآخر لحظه كان عندها امل ان نادر يتأثر او يثور او حتى يبدى اى اهتمام بالموضوع لكن للاسف برود اعصابه كان هو سيد الموقف كالعاده ..
قامت سيليا ودخلت اوضتها ولبست اشيك حاجه عندها واستعدت لمقابلة عمها شريف وابنه وهى مقرره بينها وبين نفسها انها هتقبل تتجوز عمرو وهتدوس على قلبها وعلى حبها لنادر اللى ماثرش فيه حب اربع سنين مفوتتش يوم فيهم الا وتحاول تتقرب من نادر لكن من غير اى فايده ..
قام نادر وراح على شقته وغير هدوم البيت ولبس اشيك طقم كاجول عنده ورش من برفانه المفضى وظبط شعره وبص لنفسه فالمرايه وابتسم وهو راضى عن نفسه لكنه فنفس الوقت مستغرب من اللى بيعمله دا ومش عارف بيعمله ليه ! وبعد كده راح على شقة خاله ودخل وقعد على الكنبه جمب خاله بكل شموخ وخصوصا بعد مالبس الطقم الاسود اللى سيليا مش بتقدر تقاوم جمال نادر فيه وتفضل باصاله طول الوقت وهو لابسه ومحاوطاه بعنيها ..
لكن الغريب ان سيليا المرادى متجاهلاه تماما ومن ساعة مادخل وهو عينه عليها عشان يشوفها وهى بتبصله لكن دا محصلش ..
شريف وعمرو وصلو ونادر فتحلهم واتخضو هما الاتنين وهما شايفين ابتسامه على وش نادر لاول مره وهو بيستقبلهم .
سلم عليهم ودخل قدامهم وعمرو ميل على باباه :شرشر ..انا خايف ...اكيد الابتسامه دى آخر حاجه هنشوفها قبل مانموت صح ؟
...
شريف :متخفش ياولد انا معاك وزى ماعايشين سوا هنموت سوا .
دخلو الاتنين وابتدت سميه وبنات اخوها ينقلو فالاكل على السفره من بعد ماسميه سلمت على شريف وابنه سلام عابر وبارد خالى من اى مشاعر خوفا على مشاعر نادر ابنها اللى خيرها بطريقه غير مباشره بينه وبين شريف وهى اختارت ابنها ومش ندمانه ابدا على اختيارها دا لان فعلا ابنها عندها اهم من نفسها وتضحى عشانه بروحها لو تطلب الامر .
الكل قعد على السفره وشريف كل شويه يرفع عينه على سميه بنظره مكسوره وهو شايفها طول الوقت باصه فطبقها ومستكتره عليه حتى مجرد بصه من عنيها اللى واحشينه لدرجة الجنون بعد الغياب دا كله .
خلصو اكل وقامو قعدو فالريسبشن وسيليا خرجت بصينية حلويات وسيلين بصنية جاتوه واطباق وحطوهم على الطربيزه وقعدو وسميه فضلت فالمطبخ تكمل الشاى .
شريف فتح الكلام :
هاه ياعامر مردتش علينا فالموضوع اللى كلمناك فيه !
عامر لسه هيتكلم لكن سبقه نادر بالكلام :معلش ياعمى اسمحلى انا ارد ...انتو مفيش قدامكم اختيارين زى ماانتو فاكرين... لان سيليا بره الاختيارات دى عشان انا اللى هتجوزها ..وبناء عليه مفيش قدامكم غير سيلين بس ...وهى اللى فأيدها القرار توافق او ترفض .
الكل ساكت وسيليا برقت عنيها وفضلت باصه لنادر ومستنيه انه يقول بهزر او يقول اى حاجه تثبتلها ان اللى سمعته دا مش حقيقى وفضلت تبربش بعنيها عشان تقنع نفسها انها مبتحلمش لغاية ماسيلين ضربتها كوع وهمستلها من بين سنانها ...اقفلى بوقك فضحتينا .
سيليا قفلت بوقها وبلعت ريقها وبصت لباباها اللى كاتم ابتسامته وفرحته بالعافيه ورجعت بصت لشريف اللى غمزلها وابتسم وبصت لنادر الوحيد اللى قدر يفوقها من حالة الذهول اللى هى فيها دى وهو مثبت عنيه عليها ورافع حاجبه وكانه بيقولها مش بمزاجك تختارى تتجوزى مين ..بمزاجى انا..
وهنا استجمعت شجاعتها واتكلمت بثبات زائف :ومين بقا قا....وقبل ماتكمل نادر كان مزعق فيها :
سيليا انطقى كلمه وحده تعصبنى وانا اوعدك رد فعلى مش هيعجبك بالمره ...اهدى كده واعقلي لغاية مااحدد مع خالى ميعاد كتب الكتاب والفرح عشان انا مش هخطب ولسه هنتعرف ...
وبص لسيلين :وانتى رايك ايه فعمرو يابنت خالى موافقه عليه ولا ليكى رأى تانى ؟
سيلين :لا بعد اذن بابا واذنك يانادر طبعا... انا موافقه .
عمرو ابتسم بفرحه لانه من الاول كان متقدم لسيلين لكنه اتقدم للاتنين وعمل الخطه دى بأمر من باباه عشان يحرك نادر شويه ويتكلم لو كان عايز سيليا اللى عرف من باباه حبها لنادر وموقف نادر تجاه حبها دا وتجاهله ليها ...
شريف :على خيرة الله يبقا نقرا الفاتحه بقا ..فاتحة عمرو على سيلين ونادر على سيليا ..
نادر :وفاتحتك على ماما سميه .
شريف سمع الجمله دى وقام وقف وبص حواليه وقعد تانى وهو بيتلفت حواليه فكل الوشوش المبتسمه ..
شريف :نادر هو انتا قولت حاجه دلوقتى يبنى؟
نادر :قولت ان حضرتك هتتجوز ماما ...ايه مسمعتش اعيدهالك مره تالته ... اصل المثل بيقول اخطب لامك ولو انتا عندك اعتراض خلاص انا بسحب كلامى
وهنا الكل سمعو صوت تكسير وبصو شافو سميه واقفه وصينية الشاى وقعت من ايدها بعد ماسمعت كلام نادر وواقفه بتبلع ريقها ومش مستوعبه اللى سمعته ..
شريف قام وراح عليها بخضه ونادر سبقه ليها ومسكها من وسطها وبعدها عن الفناجين المتكسره ...
حاسبى ياحبيبتى ..جرالك حاجه ؟ الشاى جه عليكى ؟
سميه هزت دماغها برفض وبتتحرك مع نادر ببطئ لغاية ماقعدها على الكنبه جمب سيلين وقعد جمبها على حرف الكنبه ...كل دا وشريف واقف ومتابعها بعنيه وحاسس ان خلايا جسمه كلها بتنهار فاللحظه دى وهيغمى عليه من كتر الفرحه اللى حاسس بيها الى لا عقله ولا قلبه ولا روحه مستوعبينها ولا مستحملينها ..
اما سميه فكانت ايدها بتترعش ومتوتره وعرقانه كانها لسه بنت صغيره اول مره يخطبوها واول مره هتتجوز ...واستغربت الاحساس اللى اول مره تحس بيه دا واللى حتى فجوازها من ماهر محستهوش ...
بصت لسيليا اللى مكانتش تقل عنها توتر وهى بتهز دماغها بعدم استيعاب لكل اللى بيحصل دا والاتنين مدو ايدهم وكل وحده مسكت ايد التانيه تتقوى بيها ...بعكس سيلين اللى كانت طول الوقت متماسكه وقاعده بثبات ويمكن دا بسبب انها بتتجوز بعقلها مش بقلبها زيهم
سميه لما بصتلها شافت فيها نفس موقفها لما اتجوزت ماهر مكانتش حاسه باى مشاعر وكانت بنفس الثبات دا وقلقت وهى شايفه سيلين كده لكن اللى بدد قلقها وخوفها دا الفرحه اللى شايفاها فعيون عمرو وهو بيبصلها واللى عمرها مشافت زيها فعيون ماهر فيوم من الايام ومن هنا اتأكدت ان الوضع هنا مختلف بوجود طرف مُحب .
نادر قطع الصمت اللى طال اكتر من اللازم وهو بيوجه كلامه لشريف ..
عمو شريف احنا لازم نتفق من الاول ان مهر ماما غالى اوى خد بالك .
شريف :مالى وحالى وكل مااملك تحت رجلين سمسمه...من بكره اكتبلها كل املاكى باسمها .
عمرو بصدمه :فلسنا والحمد لله...وطلع عمرو من المولد بلا حمص ...كده تبيعنى ياشرشر فى قراية الفاتحه ! امال لما تتجوزها هتعمل فيا ايه هتنكرنى وتتبرى منى ؟
الكل ضحك وشريف طلع من جيبه منديل وفضل يمسح بيه عرقه وهو باصص لسميه وحاسس انه فحلم ..خلصو قراية الفاتحه وبعد ماخلصو سيليا رفعت عينها على نادر اللى ابتسم وغمزلها غمزه خلت قشعريره سرت فكل جسمها وابتسمت بفرحه وهى مش مصدقه ان اخيرا بعد كل السنين دى التمثال اللى اسمه نادر اتحرك واتكلم ،ومش بس كده دا خطبها كمان وقرا فاتحتها وهتكون مراته ..
وهمست لنفسها :طب يعنى لو اقوم دلوقتى احضنه وابوسه قدام الناس دى كلها وهو بالطعامه دى حد يلومنى! والله ماحد هيلومنى ..
اما عامر فغمض عنيه وهو بيتنهد وهز دماغه برضى وهو شايف اخيرا بناته كل وحده بتتخطب لواحد احسن من التانى ومش بس كده دول عرسان بناته الاتنين فغلاوة ولاده اللى مخلفهمش
وغير كده راحة قلبه وفرحته ان صاحب عمره هيتجوز اخته وضحك بخفه وهو شايفه غرقان فبركة عرق ووشه احمر بلون الدم وبياخد نفسه بالعافيه وحرفيا هيموت من شدة الفرحه وبالفعل دا مكانش تعبير مجازى وملامحه اتغيرت وهو شايف شريف ابتدت انفاسه تعلى قبل مايقف ويرجع يقعد على الكرسى مره تانيه مغمى عليه وعمرو صرخ عليه بعلو صوته والكل جرى عليه ....
*********
اميره بتبص على شكلها بفستان الفرح بإعجاب شديد وفرحه وهى بتسأل نفسها كانت بتفكر فأيه وهى بتتنازل عن كل الحجات الحلوه اللى بتحصل معاها دى والاحاسيس الجميله اللى حاسه بيها دلوقتى عشان واحد مشافتش منه غير كل ذل واحتقار ...
ايوه النهارده فرحها وفرحتها الكبيره على احمد اللى خلاص هياخدها لجنته بعد ساعات معدوده ..
دخلت مامتها عليها ووقفت وهى متفاجأه بجمال بنتها وعنيها دمعت من الفرحه وهى شايفه بنتها بفستان الفرح زى ماكانت بتتمنى تشوفها بيه.... من اول يوم خلفتها وفضلت تستنى اليوم دا لغاية ماكانت فاكره نفسها اتحرمت منه للابد لكن اهو بيحصل وبنتها بتتجوز وفرحانه وطالعه اجمل عروسه فالدنيا ..
شويه ودخل احمد الكوافير عشان ياخد عروسته ووقف ثوانى بيتأمل جمالها قبل ماياخدها فحضنه بمنتهى الحنان ويهمس جمب ودنها ...انا النهارده اسعد انسان على وش الارض ...انا النهارده الفقير اللى فاز بالاميره بعد مبارزة حياه او موت ..
اميره ابتسمت وهى بتردله الهمس :ايه الكلام الحلو دا كله ...انا مش متعوده منك على كده !
احمد :من النهارده مفيش غير كده .
واخدها وراحو على الكوشه اللى كان راضى عاملها فالشارع بتاعهم على حسابه واهل المنطقه كلهم جاملوه وكان فرح يجنن والكل فرح وانبسط وفالاخر العريس اخد عروسته وروحو على شقتهم ...
اميره بمجرد مادخلت مع احمد الشقه وبصت لاوضة النوم وشافت نور احمر قاتم طالع منها قلبها انقبض وبصت لاحمد وسألته:ايه النور الغبى دا يااحمد لونه مش لطيف خالص ...
احمد وهو بيقرب منها :بالعكس دا اللون الاحمر دا احلى لون فالدنيا ..دا لون مبنشوفهوش غير بعد مجهود ...مبيظهرش غير مع القوه ..
اميره رفعت عنيها عليه ولاول مره تشوف فعنيه النظره دى ..شافت عنيه مضلمه من شدة الرغبه ، لكن اللى متعرفهوش واللى اكتشفته بعد كده ان الرغبه دى مكانتش زى اى رغبه ..كانت رغبه من نوع خاص .
احمد اخد اميره ودخل بيها واضة النوم وساعدها انها تقلع الفستان وابتدا يلمسها لمسات حنونه ووحده وحده ابتدت اللمسات دى تقسى وتكون حاده واميره بتحاول تقنع نفسها ان دا طبيعى لكنها مقدرتش تستمر فالاقناع دا بعد ماشافت احمد بيفتح باب الكوميدينو ويسحب منه حبل وبحركه مفاجئه يربط ايدين اميره ويقرب منها وهو بيهمسلها ...انا آسف سامحينى .. انا عارف انك بتحبينى وهتستحملى اى حاجه عشان خاطرى ...
وابتدا يقرب منها بمنتهى الوحشيه والساديه واميره تصرخ وهى حاسه ان روحها بتروح منها وبتحصلها حجات فوق طاقتها وفوق مستوى تحملها لغاية مااغمى عليها ودا برضو مشفعلهاش عند احمد اللى كمل اللى بيعمله وكأن شيئا لم يكن لكن صدمته الكبيره لما اكتشف انها لسه بنت وانها فقدت عذريتها على اديه النهارده ...
بعد ماخلص فك الحبل من ايديها وابتدا يفوقها وفعلا فاقت معاه واول مافتحت عنيها ولقت نفسها فحضنه بعدته عنها بعنف وهى بتضرب فيه بضعف وتصرخ فيه وهى بتبكى ..عملت كده ليه يااحمد حرام عليك ليه كده انا عملتلك ايه عشان تأذينى بالشكل دا ؟
احمد فضل يتأسفلها وهو بيبوس كل انش فيها ...آسف والله آسف انا مش عارف حصلى ايه ...انا غبى وحيوان بس صدقينى انا لما شفتك قدامى وحلالى ومع كل الحب اللى ليكى فقلبي فقدت اعصابى ومقدرتش اتحكم فيها ...
اميره بعدت عن حضنه وهى ماسكه اسفل بطنها بألم وبمجرد مااتزحزحت من مكانها شويه شافت تحتها بقعة دم كبيره منظرها خض اميره وحتى احمد خاف منها وبص لاميره بخوف ..اميره انتى بتنزفى !
اميره بصتله بعتب قبل ماتستسلم لدوامه الظلام اللى ابتدت تهاجمها ..
احمد اتصل على حماته بهلع وهو بيساعد اميره انها تلبس ولبسها هدومها ونقلها للصاله عشان مريم امها متشوفش الدم اللى على السرير
مريم نزلت فورا لما قالها اميره عايزاكى لكنه مقالهاش انها تعبانه عشان كده قالت لراضى شويه وجيالك متقلقش ومفيش داعى تروح معايا عيب ابو العروسه يروحلها فليلة دخلتها ...
وصلت مريم ووقفت التاكسى تحت البيت على اساس انها هتطلع تشوف فيه ايه وتنزل بسرعه لكنها اتصدمت لما احمد فتحلها و شافت اميره مغمى عليها على كنبة الانتريه لا بتحرك ايد ولا رجل ...
ساعدت احمد عشان يشيلها وينزلها للتاكسى ويودوها لاقرب مستشفى واتصدمت وهى شايفه مكانها على الكنبه غرقان دم ومدت ايدها لمسته عشان تتأكد ان اللى شايفاه دا حقيقى وغمضت عنيها بألم وهى بتفرك فصوابعها وبعدها بصت لاحمد بصه ناريه خلته اتحرك على تحت فورا قبل مامريم تنطق باى كلمه ..
وصلو المستشفى وبعد الكشف الطبى اتضح ان اميره النهارده اتفضت عذريتها وبمنتهى العنف والساديه مما ادى اللى جرح قطعى وهو سبب النزيف اللى عندها ده .
مريم واقفه قدام الدكتوره مصدومه ...يعنى ايه يادكتوره اتفضت عذريتها النهارده!دى كانت متجوزه قبل كده وحصلت علاقه كامله مابينها وبين جوزها ازاى كده ؟
الدكتوره :لا يافندم اكيد حضرتك غلطانه لانه لايمكن تكون حصلت علاقه قبل كده من اى نوع ..وبأكدلك دا ..لان غشاء بنت حضرتك عادى مش مطاطى واتفض من اول مره ولو كانت حصلت علاقه قبل كده زى ماحضرتك بتقولى كان زمانها مش فيرجن ...انا دكتوره وعارفه بقول ايه ومتأكده من كلامى دا جداا ..
مريم بشك :بس انا شفت دم عذريتها بنفسى !
الدكتوره :اكيد اللى شفتيه دا مكانش دم عذريتها ...كان دم اى حاجه تانيه ..
مريم باصرار :يادكتوره بس انا متأكده انه حصل ...هو فيه ايه انا هتجنن ..بنتى كانت فيرجن اللى هو ازاى يعنى ؟
وهنا كان احمد قرب عليهم وسمع كلام الدكتوره واللى كان ..
ايوه يامدام ماانا كلامى واضح ..ممكن اللى كان بيحصل قبل كده بينها هى وزوجها ياأمه كانت علاقه خارجيه وكانت بتتم بمنتهى الحرص ..يامه الزوج كان ضعيف او مريض لدرجة انه مقدرش يعمل علاقه كامله معاها ..بعكس المرادى اللى كانت العمليه اشبه باغتصاب ودا برضو ارجح انه تم بسبب حاجه من اتنين ..يأما جوزها سادى ودا هنكتشفه بعد مالمريضه تفوق وندخلها على فحص كامل ...يامه حصل نتيجة توتر وعدم خبره من الزوج وعدم سيطره على الرغبه فالمره الاولى ودا بيحصل كتير اوى ...
وهنا احمد اتحرك خطوتين للخلف بعد مااتأكد من صحة كلام اميره وان جوزها فعلا كان مريض وانها مكذبتش عليه وفعلا فضلت ساكته اربع سنين ومتكلمتش وابتسم بمكر وهو رايح على اوضتها ..
اما مريم فاحطت ايدها على بوقها بصدمه ..بعد مااستنتجت من كلام الدكتوره ايه اللى حصل مع بنتها وغريب بالظبط ومستوعبتش اى كلام تانى اتقال وبصت للدكتوره واتكلمت بإصرار ....
دكتوره ...لو سمحتى انا عايزه من حضرتك تقرير يثبت ان اميره بنتى فقدت عذريتها النهارده ...وبلاش حتتة انها اتعرضت لعنف دى ...اكتبى انها فقدت عذريتها النهارده وبس ...
لقراءة باقي الجزء الثالث من هنا
لقراءة الجزء الثاني جميع الفصول كاملة من هنا
لقراءة الجزء الاول جميع الفصول كاملة من هنا