رواية حب مستحيل
الفصل التاسع عشر19
بقلم سارة اللومي
لما صحيت الصبح لقيت نفسي جسمي مكسر وتعبانه مش قادره اقوم حتى والاهم اني مكنتش قادره اواجهه بعد اللي حصل ما بينا امبارح بالليل ، كتر التفكير في الأحداث اللي حصلت في ال ثلاثة ايام اللي فاتو بس وجعلي دماغي ، كنت لوحدي في الاوضه قومت وفضلت قاعده في سريري بفكر هأعمل ايه اروح ولا استنى !؟ ما هي الحكايه اتعقدت خالص ولو قعدت هنا اكتر من كده هتحصل كارثه !
لقيت حياه داخله و جايبالي تفاح ،
- صباح الخير يا بسمه مالك يا حبيبتي ؟ دبلانه ليه قوي كده دا انتي كنتي زي الورده المفتحه ؟ ايه اللي حصلك ؟
- مفيش حاجه ما تشغليش بالك ؟
- ما شغلش بالي ازاي انتي شوفتي نفسك في المرايه !؟؟
- لا ما هو انا متعوده على كده كل شهر هما يومين ثلاثة بس وهابقى كويسه .
- طب ايه رائيك تقومي تغيري جو شويه ؟ النهارده السوق الأسبوعي وانا والبنات رايحين لو تحبي ناخدك تتمشى معانا هتبقي احسن قولتي ايه ؟؟
- قولتلك مش عايزه يا حياه تعبانه سيبيني براحتي بقى ؟
- وبعدين معاكي هتفضلي هنا بين اربع حيطان ؟ طيب تعالي اخذك لدكتورة البلده يمكن تديكي مقويات !
- ارجوكي يا حياه انا بخير ومافياش حاجه بس عايزه ارتاح شويه .
- انتي مخبيه عليا ايه يا بنت شكلك مخطوف كأنك شايفه عفريت ما انا قولتلك اني كاشفاكي يا بت قوليلي مالك ؟!
- بصراحه ؟ مش عايزه اطلع من الاوضه لاني مش عايزه أقابل اخوكي تاني ! 😣
- هو عمل معاكي حاجه ؟ قولي بس ما تخافيش دا انا كنت اطينلك عيشته !!
- لا مفيش حاجه بس انا مش عايزه مواجهات بيني وبينه خايفه اهلك يحسو بحاجه وهو بصراحه زودها قوي اليومين اللي فاتو كفايه بقى لحد كده
- يا ستي اذا كان على محمد ما تشيليش هم هو طلع مشوار بعيد مش راجع قبل الليل ٫ أصل انا امبارح كلمت أمي في الموضوع ؟
- كلمتيها قولتيلها ايه اوعي تكوني خربتي الدنيا ؟
- لا ما تخافيش انا قولتلها " ابنك مش عاوز يسيب بنت الناس في حالها وملاحقها زي خيالها دا غير أنه بقاله ثلاثة ايام ما خرجش من البيت ، ما تشوفيله صرفه ولا تكلميه يغور لاي مكان يخلينا نتنفس شويه !! "
- هاه وكلمته ؟
- ايوه وقالها إن عنده توصيله لواحد في محافظه بعيده شويه ويمكن يتأخر لحد الليل .
- طيب الحمدلله يبقى انا اقوم اغسل وشي واروح الجنينه اشم شوية هوا نِضاف بقي ☺️
- احسن حل وانا طالعه كمان ولو عايزه حاجه اجيبهالك وانا راجعه قوليلي اوعي تتكسفي ؟
- لا يا حبيبتي سلامتك أبقي سلميلي على خالتي أم نفيسه لو روحتي عندها
- طيب ماشي سلام عليكم .
- وعليكم السلام ورحمة الله
البنات طلعو وبقيت انا وطنط نفيسه لوحدنا طلعت عالجنينه
اتمشى شويه وفضلت يجي نص ساعه ، قولت يمكن طنط تحتاجني ولا حاجه جيت اطلع لقيته واقف قدام الباب !!!
يا لهوي هو هنا ؟!! مش قالو انه غار مش راجع الا بعد المغرب !!!