رواية حكايات بنات
امنيه
اسمي امنيه او عادل وهفهمكم حكاية عادل دي بعدين، عندي 25 سنه وفي السنه الاولي في كلية التجارة جامعة القاهرة ايوه بظبط في السنه الاولي، رجعت لتعليم
بعد غياب 7 سنين، وانا كنت موقفه تعليم عشان كنت براعي
اخواتي،، شيري و عدي، اللي بقيت انا امهم وابوهم بعد وفاة امي وابويا، وبعد ما شيري خلصت الثانوية العامة بقت تزن عليه ارجع لتعليم واكمل معاها، وبعد الحاح منها ومن عدي، وافقت
وقررت اقدم ورقي وندخل اول سنه مع بعض في نفس الكليه، .. وجه العام الدراسي الجديد ورحت الصبح قبل معادالشغل علشان اشوف الدنيا ماشيه ازاي هناك و عدا اول يوم بسلام وبعدين روحت جري علي محل ورد مشغلاه واحده صحبتي وبروحه كل يوم ادخل امنيه واطلع عادل.. بسيب هدوم الشغل في
المحل وبروح البس لبس شاب وشنب وبروكه عليها كاب مع بعض المكياج واطلع بشخصية عادل عشان انفع لشغلانة
الديليفري،.. ايوة بكون هتفضح بسبب صوتي وملامحي الناعمه علي إنها تكون ملامح شاب، بس بتعدي و بيعتبروني
ولد مايع وبيقولولي انت شاذ.. وانا مبديلهمش اهتمام كتير لاني عاوزة اشتغل وأكل اخواتي ومش بركز في اراء الناس
مروه بضحك_ والله هتشبهيني
امنية _ معلش يا مروش مليش غيرك.. وانتي عارفه مقدرش اوصل الطلبات بشكل بنت
مروه _ انتي هتقوليلي دول ممكن يفترسوكي.. الله يقويكي يابنتي
امنيه _ هما مش سيبيني ف حالي كده ما بالك لو عرفو اني بنت
مروه _ مش هيعرفو، بس انتي قللي كلام ولما تتكلمي تخني صوتك
امنيه بصوت رجل _ طيب تؤمرني بأي خدمه اباشا ههههه
مروه بضحك _ لا يا دوله اتفضل اصاحبي قبل ما حد يجي
امنيه _ باي يا جميل
سبتها وطلعت جري علي المطعم وهناك قابلت ريتاااج اللي معجبه بيه وبسببها بحس اني قرفانه من نفسي اوي وهي بتسبلي وتلمحلي بمشاعرها المكبوته وتقولي شبه جيرمين ناقص بس تشيل الشنب، دا غير المعاكسات من تحت لتحت هي وصحبتها اللي بتحاول تخطفني منها وهي متعرفش،
ريتاج بإبتسامة _ حمدلله على السلام اتاخرت ليه
امنيه بتفخيم الصوت _ كنت مع خطيبتي
ريتاج بغيره _ انت خاطب ياعادل
امنيه _ من زمااان
ريتاج _ خسارة
امنيه _ خساره ليه البنت بتحبني وانا بحبها،
ريتاج بغيظ _ اممم طيب اتفضل خد الاوردر ده وادي العنوان
امنيه _ تماام عن اذنك
سبتها وركبت على الموتسيكل وروحت العنوان اللي قالتلي عليه وياريتني ما روحت
منه
انا منه 25 سنه الفرقه الرابعه كلية اداب جامعة القاهره... صحيت بدري ولبست اجمل حآجه عندي عشان النهارده اول يوم دراسة.. طلعت من اوضتي وانا مبسوطه ف لقيت إبراهيم اخويا في الصاله
إبراهيم _ اي الشياكة دي
منه بفرحه _ اقل حآجه اعملها وانا رايحه الجامعه
إبراهيم _ بتحسسيني انك رايحه فرح دي كليه وتعليم وقرف
منه _ انا بحب الكليه مانت عارف
إبراهيم _ ماشي ياستي ربنا يوفقك
منه _ طيب ما تيجى توصلني بعربيتك بدل ما اتبهدل في المواصلات
إبراهيم _ رايح استقبل واحد صاحبي من المطار
منه _ صاحبك مين
إبراهيم _ مروان
منه بخنقه _ هو رجع
إبراهيم_ راجع النهارده
منه _اه طيب ، يلا سلام
**
مروان رجع بعد اربع سنين... كنت خلاص قربت انسا ولما سمعت اسمه كل حآجه رجعت قدامي كان معداش عليها يوم واحد ...
مروان صاحب اخويا، او صاحبه مخصوص عشان يقربلي، و اكبر مني ب 4 سنين، كنت صغيره وقتها مكنتش افهم نوايا الناس نحيتي ولا كنت اتصور ان في حد ممكن يتلون لدرجة ان يقنعني قناعه تامه انه شخص كويس واديله
الامان بشكل اعمي، ومروان كان كده في الوقت اللي كان حلم لكل البنات اللي لجل الحظ سابهم كلهم وقرر يلعب بيه، انا في الوقت اللي مكنتش جربت احب ولا يكون ليه علاقه بشاب قبل كده....
وانا في ثانوي كان دايما يجي عند المدرسه ويمشي قدامي بعربيته السوده زي قلبه، وكان يطلب مني اركب معاه ومره يعملي مفاجأة غير متوقعه، واعرف انه عارف انا بحب ايه وبكره ايه ... وانا بقيت اصده مره ورا مره وفي النهايه نجح يخليني انشغل بيه واكمل معاه، ونعيش قصة حب خياليه زي ما اي بنت بتحلم وتتمني واهملت دراستي مع اني كنت متفوقه جداً وبسببه اتاخرت سنتين عشان اقدر ادخل الكلية..
وبعدين قرب من ابراهيم وبقا يجي عندنا البيت، وكنا كل يوم بنقرب من بعض اكتر لغيت ما في يوم عزمني على حفله ليه هو وصحابه، ولما روحت اكتشفت انه بيسجل كل مكالمتنا سوا ويصور الشات، وكان بيحفظ الصور بتاعتي اللي كنت ببعتهالو بعد محايله واتهامه ليه باني مش واثقه فيه و وعوده باننا هنكون لبعض بعد ما اخلص الثانويه ، هو مقالش حاجه بس صحابه قامو بالواجب وعرضو كل حاجه علي شاشه كبيرة وعرفت انه كان متراهن معاهم على 100 جنيه علي انه يوقعني، وبقو يضحكو ويشاورو عليه ويحتفلو بيه انه نجح، و واحد منهم طلع 100 جنيه وادهالوه،، سبتهم و مشيت وانا مش حاسه بنفسي وببكي بقهر بسبب احساسي بالخزلان وفقدان الثقه في نفسي وصدمتي فيه وفجاه خبطتني عربية و بقيت في غيبوبه سنه كاملة ولما فوقت عرفت انه سافر..
دي قصتي مع مروان، القصة اللي من بعدها رافضه فكرة الجواز والحب، والارتباط من اي نوع،،
وصلت الجامعة واول ما دخلت قابلت معاذ معيد في الكليه،
معاذ بإبتسامة _ منه! كل سنة وانتي طيبه
منه بإبتسامة _ وانت طيب يا دكتور،
معاذ _ منه احنا قولنا بره السيكشن اسمي معاذ
منه _ انا اسفه مش حابه اعود لساني علي اسمك علشان مغلطش في السيكشن
معاذ _ زي ما تحبي، سنه دراسيه سعيده
منه _ سنه سعيدة عليك
معاذ _ ممكن بعد ما تخلصي نقعد شويه مع بعض
منه _ متأسفه يا دكتور مش هقدر
معاذ بخيبه _ ولا يهمك
منه _ عن اذنك
مشيت وسبته زي كل. مره، كنت فاكره انه هيسيبه مني بعد غياب شهور، لكن مش باين انه نسي
معاذ معيد من سنتين وكان قبلها موجود في نفس الكليه، ومن اول مره اتقابلنا وهو بيحاول يساعدني باي شكل، بس انا مش
مديالوه فرصه، هو شاب كويس بس انا مش مستعده ادي فرصه لحد تاني، لانه مهما كان. كويس مش هيكون الطف من مروان وهو بيحفرلي حفره يوقعني فيها...
يارا
انا يارا 22 سنه في الفرقه الرابعة كلية اداب جامعه القاهرة، انا من الصعيد محافظة سوهاج، محجبه وبيقولو عليه جميله بس انا مش مصدقاهم
وجيت اهنه من كام شهر مع ابوي اللي شغال بواب في محافظة القاهرة، وقررت انقل ورقي من سوهاج للقاهره علشان أقعد امعاه بعد موت امي بدل مقعد وحدي في البلد او مع عمي عشان معاه رجاله كبار...
وصلت الجامعة وكانت كبيره قوي وفيها طلاب زي النمل، بقيت الف في الجامعه وانا مزهوله بالحياه الجديدة اللي انا داخلاها، ابااي علي البنته اللي اهناك، قالعين اكتر من اللي لبسينه. جامعه دي ولا مرقص، وحاطين في خلقتهم كومين الوان حائط تقولوش الجوكر اللي بنشوفه في التلفزيون، لا وكمان كل واحده ماشية مع واحد وامعتضحك امعاه، ، خوفت منيهم ومن العيشه دي معقول هقدر اكون وسط الناس دي، لغيت ما قابلت بت من البنته، شكلها جميل قوي، شعرها إصفر فاتح وعينيها زرقه،.. جميله جميله يعني
منه _ انتي جديده هنا، باين عليكي صعيديه صح
يارا بذهول _ وه وعرفتي كيه
منه بإبتسامة _ من لبسك واستغرابك للمكان
يارا _ ايوه صوح اني من سوهاج، وانتي منين علي اكده
منه _ انا من القاهرة.. و اسمي منه وانتى
يارا _ انا اسمي يارا
منه _ يارا،
يارا _ ايوه اسمي اكده مستغربه ليه
منه _ اسمك مدلع شويه علي انه يكون صعيدي
يارا _ اصلك متعرفيش، اني البت الوحيدة لبوي جيته بعد حرمان 15 سنه وعشان اكده قرر يدلعني بأسم وعلام واخرها جابني اهنه عشان اكون جمبيه
منه _ عاشت الاسامي حبيبتي، مش عاوزاكي تخافي احنا ممكن نكون صحاب
يارا _ وه انا اصاحب بت حلوه زيك اكده
منه بضحك _ مانتي كمان قمر ما شاءلله عليكي
يارا _ مش قوي اكده
منه _ لا قمر. و تعالي بقا اوريكي المدرجات ونلف لفه قبل معاد المحاضره
يارا بفرحه _ متشكره قوي يامنه
عز الدين
انا عز الدين واختصار اسمي عز.. رجل أعمال عندي 38 سنه أرمل، مراتي ماتت من 9 سنين بعد. جوازنا بسنه واحده ، كان اسمها سميره ، واتجوزتها عن حب، ومن بعدها محبتش غيرها ولا في واحده قدرت تشغلني،،،
بعد ما ماتت جه اسامه ابن اختي الكبيره الله يرحمها ، هو يتيم اب وأم وعنده 27 سنه فرق السن بينا مش. كبير اوي وعلشان كده انا وهو صحاب، مع عدم رضايا عن
تصرفاته المتهوره وفشله الدراسي اللي مخليه مبلط لغيت دلوقتى فى سنه تالته كليه... والنهارده كان اول يوم دراسه وهو ماقمش من مكانه غير الضهر واول حآجه عملها انه طلب دليفري ونام تاني .. وبعد وقت بيرن الجرس وانا عرفت انه بتاع الدليفري ف خرجت من الحمام ب فوطه علي وسطي وفتحتله
عز _ دخلهم جوه
امنيه بتوتر _ اتفضل انا مستعجل
عز _ دخلههم جوه وتعاله خد حسابك
امنيه بارتباك _ حاضر
كان ولد جسمه قليل وصوته ناعم وبشرته ناعمه وحواجبه متظبطه بالشعره، دا غير شفايفه اللى لونهم وردي، وخجول جداً، لما شافني بشكل ده توتر اوي وكان خايف يدخل ضحكت في نفسي على الزمن اللي احنا فيه،. وبعدين روحت جوه اجيب الفلوس ورجعت لقيته لسه في المطبخ ، دخلت عنده لقيته حاطط ايد على بوقه والايد التانيه ورا ضهره وبيرتجف... شكيت انه يكون سرق حاجه.. وانا اكتر حاجه اكرها عدم الامانه، قربت منه
عز بحده _ مخبي اية..... بكلمك مخبي ايه
مردش عليه وبقا يرتجف ف اتعصبت منه اكتر ومسكت ايده اللي مخبيها لقيته ضاممها بقوة وعمال يرتجف، الغريب ان ايده ناعمه مش ايد راجل، فتحتها غصب ولقيت فيها شنب مستعار... بصتله شويه باستغراب وهو بقا يبص بعيد بخوف ف شيلت ايده التانيه من علي وشه و ملقتش الشنب وبان شكله بوضوح... وفهمت انها بنت مش ولد وعلشان اتاكد اكتر شيلت الكاب من علي راسه ف البروكه وقعت مع الكاب وطلعت فعلاً بنت وشعرها نزل ورا ضهرها يدور من كتر النعومه
عز بذهول _ بنت
امنيه بارتباك _ اديني الحساب خليني امشي
عز _ عامله في نفسك كده ليه
امنيه _ اديني حسابي لو سمحت
عز _ اسمك ايه طيب
امنية _ يافندم الاوردر اهو اديني الحساب خليني امشي
عز باستغراب _ خدي
خطفت مني الفلوس والكاب ومسكت البروكه وطلعت تجري، روحت علي البلكونة ابص عليها لقيتها راكبه علي موتسيكل بتاع الدليفري وبتلم شعرها تحت البروكه والكاب تاني وبتركب الشنب وبعدين بتمشي ... احترت لأمرها وخدني الفضول اني اعرف هي عامله في نفسها كده ليه
امنيه
قلبي كان هيوقف لما فتحلي وهو قالع وكل اللي عليه فوطه مداريه نصه،.. هو جسده رياضي ويظهر علي شكله الجديه والشده في التعامل، بس قليل الادب بيخرج من الحمام بفوطه... والمصيبه انه عرف اني بنت مش ولد،.. بقيت مرعوبه يكلم المطعم ويقولهم،.. محدش يعرف اني بنت غير الطباخ اللي هناك وستر عليه وساعدني اني اكمل شغل لانه اعتبرني بنته، انما ده انا مضمنهوش ممكن يعمل ايه.. ربنااا يستر
اسامه
اسمي اسامة 27 سنه موز الجامعه والنوادي الليليه ومعشوق الفتيات ودمي خفيف والبنات بتتمنا ابصلها بصه وانا مبحرهمش من حآجه، حياتي كلها عبارة عن مراهنات مع صحابي علي البنات.. دي حياتي بنسبه للبنات، انما حياتي العاديه، مع خالي عز الدين اللي انا بقوله يا واد ياعز واحيانآ عزوز.. وانا وهو صحاب من صغري ومن تسع سنين جيت اعيش معاه علشان ملناش غير بعض كل اهلنا ماتو وهو بقا مسؤول عني وعن ورث ماما ومشغلهولي وانا بصرف ومليش دعوه بحاجه
عز _ اسامه انا اضايقتلك يابني النهارده اول يوم دراسه وانت لسه نايم
اسامه _ الأكل وصل ولا لسه
عز بإبتسامه _ وصل
اسامه _ ايه سر الإبتسامة دي يا عزوز
عز _ مفيش يلا قوم شوف كليتك محدش ناقصك
اسامه بزهق_ ياعز انت مبتتعبش انا هعمل ايه بالكلية، مالي بيها بس
عز_ لا ياحبيبي انت فاشل اه بس لازم تتخرج ويكون معاك شهادة دي وصية امك
اسامه بزهق_ مش هنبتدي خلاص انا رايح بس افطر الأول ولا بلاش
عز _ قصدك تتغدا
اسامه _ اللي تشوفه يلا جهز يكون خدت دوش ولا ايه
عز_ ولااا انا خالك يلا مش سفرجي اللي خلفوك
اسامه بضحك_ الخال والد ياعزوز
عز_ طيب يلا خلصني علشان انا ورايا اجتماع الساعه اتنين وأتاخرت
اسامه_ ماشي حبيبي، دقيقتين وهطلع
خلصنا اكل ونزلت علي طول علي الجامعه علشان اشوف اي مستنيني هناك،،، مقصدش محضرات اقصد البنات الجديده اللي جت،.. وصلت وقابلت سامر شريكي في المراهنات
اسامه_ سموره حبيبي وحشني ياض
سامر_ حبيبي يا اؤس اؤس وانت كمان ياغالي
أسامه_ عبط اول يوم دراسي بدء مش كنا بالليل مع بعض
سامر_ انت اللي بدأت ياعم
اسامه_ طيب سيبك وقولي اخبار البضاعه الجديده ايه
سامر_ في شوية بضاعه طول صوباعي، البضاعه كل يوم بتضرب فين ايام سنه اوله لما كنت تلاقي بنت فرعه كده مش زي اليومين دول
اسامه _ يعني السنه اضربت يااض
سامر _ لا ان شاءلله خير اكيد فيه بس احنا جاين متأخّر عاوزين نيجي بكره من اول اليوم نستلقط رزقنا
اسامه _ علي رأيك، قالوها زمان الرزق يحب الخفيه ههههه
سامر _ ههههه طيب هتعمل إيه دلوقتى
اسامه _ نتمشا شويه يمكن نلاقي حآجه وبعدين نروح
سامر
انا سامر 26 سنه مبلط في سنه رابعة اداب بقالي سنتين وقبلها سنه تالته سنتين كمان.. انا باجي الجامعه ك تسليه مش تعليم، مش. محتاج اتعلم ولا محتاج شهادة..
بقينا نلف انا و اسامه وروحنا الكافتريا وبقينا ندور حولينا علي حآجه
نضيفه ملقيناش وبعد ما فقدنا الأمل قررنا نمشي ف استوقفنا صوت بنت صعيديه، بتتكلم مع. منه المعقده
يارا_ اباي علي البنته عرفو يوصلو البنطلون لفوق كيه
منه بضحك_ ههههه نفس سؤالي اللي بسأله لنفسي لما بشوفهم
يارا _ انتي عارفه انا ببقا هموت والبس اكده بس بتكسف من نفسي لمجرد الفكره.. هي النار هتاكل حطب... وه وه شوفي الواد ده كمان شعره ملون كيه للوهله الاوله تخيلت نار ماسكه فيهم
منه_ ههههه شكلك معندكيش تيك توك
يارا _ تك توك يفوت فيهم ياكولهم، له.. ده ابويا لو سمع بس اني محملاه يموتني
سامر من الخلف _ طيب الجميل معندوش تويتر او انستجرام
منه بجديه_ يلا بينا يا يارا
يارا _ يلا يابو قوصه امشي من اهنه .. اقعددي انتي
اسامه _ ههههه يابو قوصه امال بتقول ليه مفيش ياض
سامر بضحك _ اصل قوصتي مداريه على عيني يا ابو العيييله
يارا_ دمك ده ولا دم سمك
سامر _ ولسانك ده ولا مبرد
منه _ يلا يا يارا وبتشدها من ايدها
يارا بغيظ_ انت لو عيندينا في الصعيد كانو ساقو بيك الكروزه
سامر _ يعني ايه كروز ياض
اسامه بضحك_ مخبرشي
سامر بإبتسامة _ رهان على كام
اسامه _ لا اوعا انا اتراهن علي واحده صعيديه، ودي هوصلها ازاي
سامر _ الرهان معايا انا... انا اللي هوصلها مش انت
اسامه بضحك_ الف جنيه اهم ينفعوني اعزم بقيت المقاطيع بيهم علي العشا لما تخسر
انا بحب الحاجات الصعبه والبنت دي دخلت دماغي وقررت اني
هوقعها بس شكلي هتعب كتييير وهضحك اكتر