رواية ملاذي وقسوتي كامله) بقلم دهب عطيه جميع الفصول مكتملة حتي الفصل الاخير الخاتمه

رواية عشقته قبلها 

الفصل الثاني2

بقلم اسراء ابراهيم

اتفاجأت الهام بفتون بترد عليها بغضب واندفاع : علي اساس انك مش عارفة السبب الحقيقي اللي خلاني

 اطلب اني اتجوز رائد ،، عموما يا ماما انا هرد عليكي بنفس  طريقتك ، انا لا في حاجة تانيه ولا تالته انا بس عشان لو هو فكر يتجوز ميدخلش واحده غريبه تربي بنت اختي ولو هو عايز يتجوز بعد كده يبقي يتجوز بس ساعتها هبقي انا مراته واولي بتربية بنت اختي 

الهام بصتلها بغضب ومعلقتش علي كلامها واتجاهلت قصدها وقالت  :

 ماشي هحاول اصدقك واهو ابوكي قال هيتكلم معاه  ان شاء الله وهنشوف اايه اللي هيتم

فتون بفرحه: بجد يامااما 

الهام بشك : مش مرتحالك يابنت  بطني بس عموما بكرة تعرفي ان مفيش فايدة من اللي بتعمليه ده لان رائد هيرفض وبكرة تشوفي 

وخرجت الهام من القوضة و فتون كل اللي شاغلها ان جواها فرحه متتوصفش علي حب عمرها اللي بتحلم يكون من نصيبها   ومش بس كدة ده كمان في نفس الوقت جواها خوف وارتباك احسن يرفضها وافتكرت معاملتها ليه اللي علطول جافه ورخ*مه عشان كدة ممكن فعلا زي ما قالت الهام امها انه يرفضها ،، شوية وغمضت فتون عنيها وبقت تدعي من قلبها ان رائد يوافق 

......... 

رن جرس الباب ورائد قام فتح الباب لعمار وسلم عليه وخده بالحضن وقال: 

واحشني والله ياابو الغاليه اتفضل اتفضل نورت البيت 

عمار الله يكرمك يابني منور بصحابه

دخل رائد ووراه عمار وقعدو في الانتريه فقال عمار بحب : 

الا فين الصغنن بتاعنا مش سامعله حس يعني

رائد اتكلم وهو بيقوم : 

مش عارف دي لما بتسمع جرس الباب بتيجي جري 

هقوم اشوفها واعملنا كوبايتين شاي 

عمار بابتسامة  : 

ماشي يابني تسلم ايدك 

دخل رائد اوضة نورا لقاها في سابع نومه فعمل الشاي ودخل لعمار :

حقك عليا ياعم عمار بس نور بتاكل رز مع الملايكه 

عمار بص لرائد  بتردد  وقال : طيب كويس عشان الموضوع اللي كنت عايزك فيه

رائد باستغراب :  

خير ياعم عمار اتفضل الشاي الاول 

عمار وهو بياخد الشاي: 

تسلم ايدك يابني،، 

بص يارائد يعلم ربنا معزتك عندي قد ايه واني بعتبرك ابني اللي مخلفتوش  

رائد ابتسم وقال بثقة :

 عارف والله ياعم عمار 

عمار اتردد شوية بس كمل وقال : بص يابني انا عارف انك قولت قبل كده انك مش هتتجوز بعد فاتن الله يرحمها وانا مقدر كلامك ده جدا

بس يابني مفيش راجل بيقدر يعيش من غير ست لو قعد شهر مش هيقعد التاني لو قعد سنه مش هيقعد اللي بعدها من غير جواز واحنا مش هنخاف شرع ربنا يابني  بس انا كل اللي يهمني بنت بنتي ابقي مطمن عليها مش اكتر ومش هيعدي في عمري قد اللي عدي 

رائد بسرعة :

 بعد الشر عنك ياعم عمار ربنا يديك الصحه 

عمار بابتسامة وهدوء  :

 الله يكرمك يابني  فانا كان عندي اقتراح هبقي مطمن بيه علي بنت بنتي 

رائد بص لعمار بقلق وقاله :

 ايه هو ولو هقدر مش هتاخر

عمار رد بثقة واندفاع :

 انك تتجوز فتون بنتي 

رائد بتردد واحراج  : 

بس ياعم عمار يعني

قاطعه عمار وقال:

استني بس يابني اخلص كلامي 

رائد حرك دماغه بتفهم وكمل عمار وقال:

كده هبقي مطمن علي نور حتي لو انت اتجوزت تاني هبقي مطمن انها مع فتون لاني مش هبقي ضامن اللي جايه هتعاملها ازاي  واهو منها تبقي مطمن علي بنتك وانت في الشغل ومتبقاش شاغل نفسك وترجع تلاقي اكلة كويسه وهدمة نضيفه 

رائد فكر شوية وقال بتردد :

 عم عمار انا الصراحه مبفكرش خاالص في الموضوع ده ولا كنت هفكر فيه

عمار كان متردد بس اتكلم بثقة: بص يابني انا مش عايز رد دلوقتي فكر كويس وبعدين كلمني انا هستني منك مكالمه تليفون 

رائد وهو بيحرك راسه بموافقة : حاضر ياعم عمار ان شاءالله

عمار قام وقف وهو بيقؤل :

طيب يابني هستأذن انا بقي

رائد وقف هو كمان وقال بسرعة: خليك قاعد معانا 

عمار ابتسم وطبطب علي كتف رائد وقاله : 

لا يابني كفايه اوي كده ابقي بوسلي نور بقي 

رائد بابتسامة: 

حاضر ان شاءالله  

.......

فتون دخلت لامها بتردد وفضول وسألتها: ماما هو بابا فين واتأخر ليه كدة انهاردة 

الهام من غير ما تبص لفتون ردت ببرود : 

معرفش 

فتون اضايقت من برود امها معاها فقالت باصرار :

 طيب هيجي امتي ؟

الهام بصت لفتون بغيظ وردت   : 

بردو معرفش 

فتون بضيق: ماشي ياماما وسابتها وراحت اوضتها وهي بتقفل الباب وراها بضيق 

........ .......

رائد كان قاعد بيفكر في كلام حماه وامه ومسك التليفون واتصل علي صاحب عمره مدحت 

رائد بابتسامة:

 ازيك يامدحت عامل ايه 

مدحت بسرعة ولهفة   : 

عاش من سمع صوتك ياااخي

رائد باحراج :

 حقك عليا انا عارف اني مقصر والله بس غصب عني 

مدحت وهو بيضحك  :

 ياعم متشغلش بالك الله يكون في عونك انا بنكشك بس 

رائد ضحك هو كمان وقال : واحشني والله ياصاحبي

مدحت بتنهيدة :

 انت اوحش 

رائد بضحك: 

 عارف انك هتقولها 

مدحت  ابتسم بغرور وقال بهزار : طيب بتقولها ليه مبتتعلمش 

رائد بضحك :

 عندك حق انا اللي مبحرمش ،،فينك كده 

مدحت بجدية : 

هكون فين ياخويا   في الشغل كالعاده 

رائد اضايق وقاله برجاء : 

يعني مش هتعرف تيجي 

مدحت بقلة حيلة :

 لا لسه معايا مشروع شغال عليه يعني ممكن  ساعتين  بس هتكون انت نمت

رائد بحيرة  : 

طيب كنت عايز اخد رايك في حوار مش عارف اخد قرار فيه 

مدحت بهزار :

 اشجيني ياسيدي 

رائد بدأ يحكيلو كل الكلام اللي دار بينه وبين امه وحماه

 ..................

فتون سمعت جرس الباب رن

 خرجت تجري تفتح لابوها 

عمار وهو بيدخل من الباب : السلام عليكم ودخل قعد بياخد نفسه 

فتون بابتسامة : 

وعليكم السلام ،، بابا حضرتك كنت فين 

عمار بغموض : 

هي امك مقالتلكيش 

فتون بجدية : 

لا والله 

الهام وهي خارجه من المطبخ: 

لا ياحاج مقولتش حاجه 

عمار اتنهد بجدية  وقال: 

كنت عند رائد

فتون بفرحه مقدرتش تسيطر عليها :  

بجد يابابا قولتله 

عمار بص لفتون بطرف عينه وسكت 

فتون اتوترت وقالت بفضول:

 بابا طيب هو قالك ايه ؟

عمار وهو بيقوم:

 مستني منه مكالمه وسابها ودخل اوضته 

الهام ضر"بت فتون في ايدها  وقالتلها بحد*ة:

اتهدي بقي وسابتها ودخلت المطبخ 

...........

رائد بتنهيدة :

 بس ياسيدي ومن ساعتها حاسس مخي هيقف من كتر التفكير 

مدحت بعقل :

 والله يابني حل حماك مش وحش 

رائد نفخ بضيق وقال :

 بص انا ولا عايز فتون ولا غيرها بس اتفجأت بكلام حمايا ومبقتش عارف ارد 

مدحت بثقة : 

طب اقولك،، فكر فيها بالعقل  بنتك دي بدل ماهي متشحطته بينك وبين الست الوالده تبقي في هنا وانت مطمن عليها وانت في  شغلك انها روحت من المدرسه وكلت و ذاكرت ،، وامك بردو كبرت مش قد خدمت العيال ودي تبقي خالتها يعني هتعوضها حنان الام ومتنساش انها نسخه من فاتن الله يرحمها يعني بنتك مش هتحس بغياب امها اوي وانت تلاقي اكله كويسه وهدومك نضيفه فكر بعقلك وفي مصلحت بنتك يا رائد  

رائد وهو بيفكر في كلام مدحت : عارف يا مدحت مره كنت بودي نور لجدتها وستها يشوفوها وخرجت علينا فتون من الاوضه اقولك افتكرتها فاتن للحظه

مدحت بثقة : 

طيب ياسيدي اهو كمان تحس ان فاتن ممشيتش ولسه معاك في البيت حتي لو طيفها 

رائد بتفكير : خلاص اللي في الخير ربنا يقدمه  انا هقفل معاك واصلي استخاره وكام يوم كدة افكر وبعد  كدة  ان شاءالله هكلم عم عمار 

مدحت بجدية : 

ان شاءالله هسيبك انا بقي عشان تصلي وتنام وانا اشوف شغلي اللي هترفد منه بسببك 

رائد بضحك : 

خلاص ياخويا روح  يلا

مدحت بتمثيل : 

اه ما انت اخدت غرضك مني 

رائد بهزار  : 

اللي يسمعك يقول ايه يلا ياض من هنا سلام 

.............

بعد اسبوع  كانت حالة فتون غريبة ،، كانت دايما متعصبة و حابسة نفسها في اوضتها ومتوترة وقلقانة وكل ده متابعاه الهام امها بس ولا كانها شايفاها رغم انها عارفة سبب قلقها بس كانت دايما بتحاول تعمل نفسها مش شايفة فتون ولا حالتها وفي يوم  خب*طت فتون علي اوضة ابوها 

عمار وهو بيتعدل في قاعدته: خشي يافتون 

فتون دخلت وقفلت الباب وراها : عرفت منين اني فتون مش ماما

عمار بابتسامة : 

وهي امك هتخبط بردو دي بتدخل عليا ولا داخلة البوليس 

فتون ضحكت جامد وقالتله: ماشي ياسيدي غلبتني 

عمار بجدية وهو بيطبطب عليها : 

ها كنتي عايزة ايه

فتون اتوترت وبصت في الارض وبعدين جمعت شجاعتها وقالت :

بابا هو رائد مكلمكش 

عمار  ملامحه اتغيرت للغضب لانه كان بيحاول يكدب نفسه واحساسه رغم انها كل يوم تسأله نفس السؤال وكان عمار بيرد عليها بلا ومع ذلك كانت برضه بتسأله بس لحد هنا وخلاص مقدرش يستحمل فقام بغضب وهو بيقؤل :

انا عايز اعرف ايه حكايتك يا فتون ،، قوليلي دلوقتي ايه سر اصرارك علي جوازك من رائد ولهفتك الغريبة دي عشان بس تعرفي هو وافق ولا موافقش ،، واوعي تكدبي عليا 

فتون بصت لابوها بتردد وخافت تتكلم ودموعها بقت تنزل بهدوء بس فجأة رفعت وشها بصدمة لما سمعته بيقؤلها :

طبعا مش لاقية حاجة تقوليها ،، يا خسارة تربيتي فيكي  ،، انا مكنتش متخيل انك ممكن تكوني و*حشة كدة لدرجة انك تبقي حاطة عينك علي جوز اختك ،، دلوقتي فهمت ايه سر انك دايما مكنتيش بتحبي تطلعي لما بيكونو هنا او تحضري  اي مناسبة يكون فيها اختك وجوزها موجودين ،، يااه يا فتون للدرجادي انتي حقو*دة ،، اسمعي الجوازة دي لا يمكن تتم انتي فاهمة و

في نفس الوقت فتون كانت بتسمع كلام عمار ابوها بصدمة ومش متخيلة انه شايفها و*حشة اوي كدة ،، هيا ممكن تتقبل ان امها تقولها كدة لكن ابوها اللي دايما كان قريب منها وبيعاملها بحنان والاصعب انه يحكم عليها بالموت ويخليها تبعد عن الانسان الوحيد اللي قلبها حبه ويضيع فرصتها التانية انها تكون معاه   فقا*طعته بصوتها اللي كان مخنوق من العياط وقالت باندفاع :

لا يا بابا لو سمحت رائد لا  ،، بابا انا مش زي ما انت شايفني متظلمنيش زي ما هما ظلموني ،، انت الوحيد اللي عمرك ما حسستني اني لوحدي ،، بابا انا ضحية امي واختي ،، انا كل ذنبي انها محبتنيش كل ذنبي اني طبعي غير طبعهم ،، انا مكنتش استاهل انهم يعملو فيا كدة 

قعدت علي الارض فتون وهيا منهارة وبتتكلم بحر*قة وكان متابعها وسامع كلامها عمار بس مكنش فاهم هيا بتتكلم عن ايه ومين،، بس كل اللي كان حسو انه قلبو و*جعه كأب عليها فقرب منها وقعد جمبها عالارض وهو بيقؤلها باستفهام :

انا مش فاهم حاجة يا فتون ،، مين دول اللي ظلموكي ومين اللي مكنتش بتحبك فهميني يا بنتي 

في نفس الوقت كانت بتسمعهم الهام اللي قربت من القوضة علي صوت عمار الغاضب وسمعت كل اللي قالته

 فتون واول ما سمعت عمار وهو بيسأل فتون وانها ممكن تقؤله علي اللي حصل منها فجأة ف.....

                     الفصل الثالث من هنا

لقراة باقي الفصول من هنا

تعديل المقال