رواية جدايل حكيمة الجبايل
الفصل الخامس عشر15
بقلم ايمان صالح
وأستعد المنزل للعرس وأصبح الجميع علي أهبت الإستعداد لتوديع العروس إلي بيت زواجها،، وأصبحت حماتها كثيرة الدخول والخروج علي بيتهم في تلك الأيام،، لايعجبها شيئااا مما يفعلون،، مهما كلفو انفسهم تحبط مجالبهم بحديثها السخيف،،
تقلل من شأن مايجلبون،، لايعجبها شيئاا أبدااا،، أخذت تفتح شقة إبنها العريس بعدما جهزت وأغلقت،، وتقلب في أغراض إسراء دون علم الفتاه ولا أهلها،، وفي يوم أخذت أخواتها وعائلتها ثم صعدت لتفرجهم شقة ولدها بدون إستئذان،، وحالفها حظها السئ بمفاجأه لم تكن لها علي بال،،
إسراء••خلصي عاد يمااا !! عاوزين نسجروا عالشجه وأشوف إيه الخزين اللي لسه متحتاچاه!!
تهاني••بصوت منخفض وتوبيخ لها،، يامشندله وهيا لسه فيها مچايب خزين عااد ؟؟ هنجولهم إعطونا فلوس تاني عااد؟؟ الله يچزايكي يابتي !! الله يچازيكي،،
إسراء ••ومين بس اللي جالك إني عجولهم يدونا فلوس تاني؟؟ إنتي اللي عتديني فلوس ولمي دورك بجي ياتهاني الناس مجصرتش معانا،،
تهاني ••والله إنتي نفضتي تهاني وخليتي چيبها بجي كيف المخروم كل اللي داخل فيه يجع عالأرض،،
إسراء ••لاااه ياتهاني،، الي داخل فيه واجع في بيتي،، لحد ماترحيني عااد،، وهانت كلها يامين تلاته عاد وعتخلصي مني،،
تهاني ••يامين تلاته ؟؟ السبوع بجي يامين تلاته؟؟ لازجه معتطلحش إنتي أباااي !! يلا ياخيتي خلينا نروحو نشوفو شجتك كيفها،،
إسراء ••كيفها يعني ؟؟ كيف ماهيا يما،،
تهاني ••خوفي من حماتك وعمايل الحما !! ربنا يستر عالشجه منيها،،
إسراء ••متخافيش يماا،، آني مأكدة علي عبد الباري مايدخلش حد عشان ماتتبهدلشي ويروح ترتيبها،،
تهاني ••والله؟؟ طب ياختي زين،، يلا بينا خلصي آني لبست چلابيتي مش لازمن تتزوجي وتتحسوكي عاد.!
إسراء••وة يماا ؟؟ يلابينا عاد ياستي،، يالاااا،، وذهبتا في طريقهم إلي شقتها،،
أما چدايل وعالمها التي هي فيه فما زال الرجال في الخارج بأشكال غريبه،، يبحثون ويسألون بالخارج عن كل شئ،،
كلف سلمان بعضهم أن يصاحب البقاله والجيران حتي يعرف منهم الأخبار،، وبالفعل قد حدث،،
بعض الرجال للبقال،، ألااا،، جولي يابو خالو !! هي الست چدايل دياتي بتحكم بالحج صح؟؟
البقال••وه ياود عميى!! صح جووي كمان دي ست بتاعت ربنا وعارفااه زيين !!
الرجل ••يعني !! ممكن لو موضوع واعر وعتحكم فيه !! بس الخصم شديد جول جتال جتله مثلااا،، تشهد برديك؟؟
البقال••اة تشهد لو علي رجابتها كماني،،
الرجل ••أباااي !! هيا معتخافش حد؟؟
البقال••لاااه،، كانت عما تخاف أبا رشيد چوزها وكبير الجبايل سابجاا وحاليا معتخافش غير الله،،
الرجل ••دي واعره جووي كنها !!
البقال••لااه مش واعره،، چدعه،،
الرجل ••طيب آني رايح آني بجي معاوزشي حاچه ؟؟
البقال••لاة ياخوي،، وأخذ ينظر اليه،، والله كنك مانتا من النچع اصلااا وبتشتغلني يابو إنتا،، ربنا يسترها علي الست!! دة عاوز منيها إيه دي؟؟ لما يعاود تاني لاازمن أسأله عما يسأل عليها ليه كل شوي،،
في المنزل،،،
چدايل ••شهلو ياصبايا عاوزين الدار يرچع يضوي و يچلچل كيف زمان،، وهنحتاچكو يوم الفرح عندنا شغل كاتيير جوي جوي،،
ردت عليها الفتيات حاضر ياست الكل،، ومن ضمنهم تلك الفتاه بدريه التي تركت المدرسه يومها وذهبت لتري متطلبات الست چدايل،،
بدريه••ستي ياستي آني چيتلك عشان أشوفك محتاچه إيه،،
چدايل ••ياحبيبتي يابدريه !! توحشتك جووي يابت الإييه،، تعالي أديكي شكلاطه ولا ارواح،،
بدريه ••لاه معاوزاشي،، آني إستأذنت من أمي لچل أكون وياكي النهاردة،،
چدايل ••إكده؟؟ طيب يلا ياستي،، خشي چوا شوفي البنته محتاچين إيه وخليكي معاهم چوا،،
بدريه ••ماشي ياستي حاضر،، وجرت الفتاه للداخل،،
نزلت من أعلي تهاني وإسراء ذاهبين للشقه،،
تهاني ••ياچدايل !! إعطينا فيدنا جرشين رايحين نكملو حاچة الخزين،،
چدايل ••إنتي ياتهاني معتشبعيش جرشينات؟؟ المعاش بتاع الراچل إتصرف،، وإيراد الأراضي إتصرف،، وحج الفروچات اللي براهيم بيبيعهم طيرتيهم !! لسه إيه تاني عااد !؟؟ مبجاش غير العچول الزيادة !! اللي عيتدبحوا فليلة بتك لچل تتشرفي جدام نسايبك ؟؟
تهاني••معلش ياخيتي إعتبريهم دين فرجبتي المرادي،،
چدايل ••عاوزة كااام هاااه،، أباااي !! أخرجت المحفظه،، ممتلئه بالنقود ولكن ليست كلها ملكه فمنها ما هو أمانات لأعمال الخير،،
تهاني ••ماشاءالله !! كنها كلها خير أهااا !!!
چدايل ••خمست بأصابعها في وجهها،، الله أكبر الله أكبر،، والله آني بعطيكي الجرشين من فلوس المعونات لحد ماياچي المعاش الچاي اردهم منيه،، إتفضلي خمسميت أچنيه اهماتي،، هاتي الاازم وحاولي تدبري الليله،،
إسراء••حبيبتي ياخاله چدايل،، وأحاطت برقبة جدايل وقبلت وجهها،، خالتي چدايل دي بما مافيش متل جلبها الصافي،، يلا بجي،،
تهاني ••امام چدايل،، بابتي دي عتعمل إكده لچل تعلجك في حبها ياخايبه،، دي وش من بره بس،!!
چدايل ••نظرت إليها،، أشكو إلييك ياربي،، أشكو اليك،،
وذهبت المرأه وهي تضحك والفتاة توبخها علي كلماتها،،
وه يما بس عااد،، تهاني،، ههههههه،، بنكشهايابت،، كيف ناجر وناجير يلاخلصي،،
إسراء من الخلف تلقي لچدايل قبله في الهواء،، نظرت وضحكت،،
نزل إبراهيم ممسكااا بالهاتف ليعطيه لچدايل،،
إبراهيم ••بصوت متدنِ،، الأمانه عاوزة تروح لصاحبها،، تلفت بالجانبين،،
چدايل ••تنظر له،، أمانة إيه انت كماني ونا كني نجصااك؟؟
غمز إبراهيم وأخد يقول،،
إبراهيم ••الإمانه ويغط علي شفته كانه يحكيها سرااا،، تعجبت چدايل،،
چدايل ••وه ؟؟ ياعجلي وراسي يااني !! ثبتهم فيا ياارب!! إنفرط إبراهيم بالضحك علي تلك الكلمات،،
إبراهيم ••الأمانه ياخيتي وه ؟؟
چدايل ••غمزت بعينها بضغطه وأخذت ترمش بعين واحده،، الأمانه وه ؟؟ وإنت إكده المفتش كوم إمبوه ياخووي؟! صبرني يارب؟؟ ماتجول البنته،، الصبيه،، واحدة صاحبتك هاات زمانها خللت عااد !! روح وراجب الچو،،
وأخذت الهاتف،، الووة؟؟ إيه ياجلبي وعجلي توحشتك جووي،، كيفك دلوك أحسن؟؟
مروة••الحمد لله ياحبيبتي،، جوي جووي،، زينه وچيبالك الخبر الحلو دواتي،، المحكمه حددت ميعاد للچلسه الأولي،، بعد تلات أربع أيام بالظبط،، وشكل حجي هياچي، بس متوجفه علي شهادتك معايا جدام المحكمه،،
چدايل ••وااه؟؟ تلات أربع تيام ؟؟ داني فرح بت چوزي في الدار وكنه ممكن يكون يومها !!
مروة ••يعني إيه؟؟ راح تتخلي عني؟؟
چدايل ••لاااه طبعاا واصل،، آني معاكي حتي لو يومها الصبح وأرچع أكمل الفرح،، متخافيشي،،
مروة ••دة ظني فيكي بردك ياأم الأصول والواچب،،
چدايل ••بس أعذريني يامروه لو الأيام الچايه إنشغلت غصب عني،، إنتي عارفه البيت كابير وآني وچميله والبنته الصغيرة اللي بنكمله مطرح حاچة البنته ماطلعت،، فالو بس دجيتي ولجتيني إتأخرت متتضايجيش هة!!
مروة ••والله ياخيتي آني لو بيدي كنت چيت وبجيت يدي بيدكو،، بس إنتي عارفه اللي فيها زين،،
چدايل ••ياخيتي إنتي فإيه ولا فإيه،، عارفه اللي عندك والله،، طب انتي محتاچه حاچه ابعتلك بيها خوكي براهيم؟؟ تمام ياحبيبتي سلاام،،
خد ياخووي محمولك أها،، يابراهيم ؟؟ جاء يهرول،
إبراهيم••إيه ياستنا؟؟ فيه حاچه؟؟
چدايل ••الچلسه الأولي يوم الفرح أو جبليه بيوم،،
إبراهيم ••وهيا محتچاكي أول چلسه ؟؟
چدايل ••أكيد عشان لو طلبو شهادتي،، وأكيد لچل أئمن خوفها ،، وحتي لو ماليش لازمه حبه ابجي چارها جلجانه عليها حاسه انه ممكن يعمل فيها حاچه عفشه،،
إبراهيم ••بلاش ياخيتي مالوش لازمه تعرضي نفسك للخطر،،
چدايل ••يومها اللي ربنا عاوزة هوا اللي هيكون ان شاء الله،، إن لاجيت ماليش عازة مهاروحش،،
،، وإنشغلت في عمل المنزل بعدها،،
في منزل العريس،،
دخلت تهاني تنادي علي أهل المنزل ولكن دون رد،،
تهاني ••سلام عليكم،، ياأم عبد الباري !! وه؟؟ هوا مافيش حد إهنه ولييه؟؟ فين ياخيتي المرة دى،، بصوت منخفض،،
إسراء ••يلا،، أحسن يما،، عشان نطلعو نشوفو ايه اللي ناجص بدون حرجة دم ووچعت راس،، يلا،،
تهاني ••وياكي مفتاح؟؟
إسراء ••أمال اييه ؟؟ معايا النسخه الاصليه كمان،،
تهاني ••طب يلا،، صعدو السلالم وصوت أحذيتهم يصدر صوتااا بخبط نعالهم في الأرض،، إيه ده ؟؟ آني سامعه دوشه فوج يابت !!
إسراء ••وه !! وآني كماني !! لانصيبه لاتكون بت المجهوره دي فوج !!
تهاني ••كنها إكده،، وة وة وة،، فوج والباب مفتوح،، بدات تعلو بصوتها بأعلي درجاته،، ياصلاااة الزيين ياصلاااة الزيااااان ؟؟
إنصدمت بعددٍ من النسوة والشقه بابها مفتوح علي المصراعين،، وأطفال تجري داخل الشقه ذهابا إيااابااا،، والأم واقفه أمام الدولاب الخاص بالملابس مخرچه أحشاءه،، وتفرج الاغراض لرفيقاتها،،،
تهاني ••ياصلاة الزين يا صلااة الزياااان ؟؟ الشجه مفندجه كنها نادي !!
إسراء رأت المنظر صرخت بعلو صوتها،،
إسراء ••ياامراااااي !!إيه اللي إنتي عاملاااه دي ؟؟ سمعت صرخاتهم أم العريس وقفت متيبسه دون حراك،، ردت عليهم بخيته أم عبد الباري،،
بخيته ••وة !! إنتو ايه چايبكم بغير ميعاد؟؟ أء أجصد مدجتوشي ليه جبل متتااچو !!
إسراء ••يابوي عالبچاحه والمجدرة !! دا بيتي ياست انتي،،
بخيته ••طيب ياچماعه ماتحرمش من زوجكم إتفضلو يلا،، وبدأت النسوة من حولها تنصرفن،، بعد نزولهم واحده تلو الاخري،، صاحت بخيته،، فيه إيه يابت؟؟ إنتي عما تزجعي وتصرخي علي ايه؟؟ شجة ولدي وبفرچ حبايبي عليها،،
تهاني ••أما انتي مرة چبله وجليلة الزوج صحيح !! دى شجة عروسه ناچي نلاجيها مبهدله إكده !!
إسراء ••آني هكلم سبع البرمبه يشوف الوضع،، دقت عليه وجدته صعد جريااا،،
عبد الباري ••وه؟؟ إنتي چيتي؟؟ مش جولتلك يما مالهوش لزوم دلوك ؟؟
إسراء ••نظرت له ولها،، لا والله ؟دة اللي جدرك عليه ربنا؟؟
تهاني ••الوضع دة مينفعش واصل ياولدي عاوزين المفتاح اللي معاها،،
إسراء ••إيوة وزة المفتاح اللي وياها اللي ماجولتليش إنك إديتهولها،،
بخيته ••غنچت وهزت رأسها،، إيه ياااخيتي؟؟ عما تجولي ايه انتي؟؟
تدخل إبنها سريعااا،،
عبد الباري ••هاتي يما إكده هاتي،، وانزلي يلاا،، هه،، وبدأ يخرجها خارج الشقه،، وأغلق الباب،، خلاص ياست البنات؟؟ مشيت وانتي اللي فيها أهوة،،
تهاني ••ينفع إكدة؟؟ دة وضع ؟؟ ربنايرضيه إكده؟؟ صوري يابتي عشان نوري الوضع لخوكي عشان لما نجعدك مع ناس،،
عبد الباري ••لاه لاه ياحماتي الله يخليكي،، ماتكبريش الموضوع،، والله ماعادت تطلع فوج جبل الفرح تاني،،
إسراء ••لما هيا طالعه وبتجلب فحاچتي وانا لسه ماچيتش !! عاتعمل فيا إيه وفشجتي بعد الزواچ؟؟ عتجولي نزلي حاچتك تحت ؟؟
عبد الباري ••ماخلاص عاد ياسراااء !! مش فيلم يعنى،، جولتلك ماهتتكررش،، وكلها كام يوم وتاچي تنوري دارك،،
تهاني ••خشي يابتي شوفي ايه النواجص،، وآني واجفه اتحدت مع الدكر حبتين،،
دخلت الفتاه ووقفت تهاني تتحدث مع زوج إبنتها،،
كنه اللي بيحصل ده بين مستجبل بتي جدامي،، بتي لو أمك چت عليها فيوم مش هجولك هتتطلج والكلام الخايب دواتي لاااه !! آني بنفسي اللي هاچي ساعتها آخد حج بتي بيدي،، ووجتها هتطلع روحها علي يدي ويد بتي فهمت ؟؟ ودخلت لترتب ما أفسدته بخيته وتعيد الشقه كما كانت،،، بعد أن إنتهت خرجت لشرفه من شرف الشقه واتصلت بأحد وفي دقيقه جاء من تتصل به،،
تهاني ••غير الكالون ياعم صبيحه،،
عبد الباري ••إيه ده ياحماتي!!
تهاني ••هس ولا كلمه واإلا كل واحد يروح لحاله،،
انجز الرجل عمله وأخذت نسخ المفاتيح منه كامله،،،
تهاني ••خلصتي يابتي؟؟
إسراء ••إيوة يماا،، وانتي؟؟
تهاني ••اااة ياحبيبتي خلصت،، يلابينا،، يلا ياعريس لامؤاخذة من غيرمطرود،، إنزل بجي چارمامي،، ولمن البت تدخل وتتچوز ليلة الدخله تبجي تاخدو المفاتيح،، سلام،، وتركته يحدث نفسه،، ونزلت هي والفتاه،، في الطابق السفلي،، تهاني تتحدث،، يكش تكوني مفكرة إني هاسمح أشوف المنظر دة تاني يابتي !! لاااه !! دحنا الكبيرة تبجي بتاعتنا،،
إسراء والله يمااا تچيبلنا حجنا من أي حد،،
سمعت بخيته الحديث ورأتهم وهم يخرجون وقفت لإبنها،،
بخيته ••والله انت ماراچل ولو بربع چنيه رچوله حتي،،،
في اليوم التالي،،،
سلمان••إيوة يامتر عامل ايه خيير !!
المحامي••ايه ياسلمان بيييه !! إيه النصايب الكتيرة دياتي؟؟
سلمان ••نصايب إيه تاني؟؟ فيه إيه؟؟
المحامي••إنت مرفوع عليك جضيتين تانيين غير جضيه الورث،،