رواية حبيبة اخي الفصل الثاني2بقلم ايمان شلبي
-طلبتي تقابليني خير؟!
قالها " يوسف" بهدوء وهو قاعد قدامي في الكافيه بعد مرور يومين علي كتب الكتاب
يومين حاولت فيهم بكل الطرق ابرر غلطي واعتذر اني بدون قصد آذيته لكن للاسف كل محاولاتي كانت سراب
وفي الحقيقه هو عنده حق عمري ابدا ما هلومه لاني كنت انانيه ومفكرتش غير في نفسي وبس
كان لازم اتحمل نتيجه أخطائي !
اتنهدت وانا بمسح دمعه نزلت من عيوني وحطيت ايدي علي أيده
- يوسف انا ....
سحب أيده وبصلي بجمود :
- سامعك
بلعت ريقي بصعوبه وانا بضغط علي ايدي
- يوسف ا ا انا عارفه اني غلطت و...
رفع حاجبه بسخريه:
-ويفيد بأيه اعترافك بالذنب دلوقتي !
-ا اخوك آذاني اوي يا يوسف
-والمطلوب مني
- انك تسمعني للأخر
حط رجل علي رجل وسحب سجاره من العلبه وولعها وهو بيرد ببرود
- عارف كل حاجه
- شايف أن اخوك ظلمني ولا لا ؟!
- ظلمك طبعا
- ط طب ا انت اكيد هتسامحني مش كده
- اسامحك !!!
علي ايه علي انك ظهرتي في حياتي من العدم واتقربتي مني وخلتيني احبك كل ده عشان تنتقمي من اخويا طب وانا ايه ذنبي
حطيت وشي بين ايديا وانا بعيط بحرقه:
- ا انا اسفه ا انا كنت موجوعه اوي م مكنتش عارفه افكر في أي حاجه ك كنت انانيه وحقيره كمان
م م مكنتش اعرف ان الموضوع هيقلب جد وانك هتحبني وتتجوزني صدقني انا ...
قاطعني وهو بيشاور بأيده بجمود :
- الكلام ده مش هيغير اي حاجه يا ايمان خلاص اللي حصل حصل !
رفعت وشي والدموع في عيوني وانا ببصله بتوسل
- هتسيبني
بصلي بملامح خاليه من اي تعبير:
- معتقدش انك هتتأثري فهجاوبك ب اه هسيبك
هزيت راسي بنفي وانا برد بصوت مبحوح :
- ارجوك لا
- لا ايه ؟!
بلعت ريقي وانا بتنفس بسرعه وبرد بصوت متقطع:
- م متسبنيش يا يوسف ا ارجوك متسبنيش
سند علي الطربيزه وقرب وشه من وشي وهو بيبص في عيوني وبيرد بقسوه
- عايزه تكملي لعبه انتقامك لسه !
احب اقولك انك مش فارقه معاه ولو عملتي اي هو بيحب مراته وعمره ما هيتأثر ابدا متتعبيش نفسك
قلبي اتنفض وانا برجع لورا وبهمس بحزن :
- ل لا لا مش عايزه اكمل لعبه انتقامي صدقني
رجع بظهره لورا ورفع حاجبه بابتسامه بارده :
- الا تكوني شفقتي عليا ؟
هزيت راسي بدموع :
- ل لا
- اومال مش عايزاني اسيبك ليه
- لانه مينفعش تسيبني ا ارجوك افهمني
- ايه اللي منفعهوش ياتري !
- متسبنيش ع علي الاقل الفتره دي
- اقدر اعرف السبب
- لاني مينفعش اقول لاهلي ا اني هتطلق بعد يومين من كتب الكتاب ا ارجوك مش حابه اهلي يتفضحوا قدام الناس
اتنهد تنهيده طويله وبص قدامه وسكت شويه وانا مراقبه ملامحه اللي مكانتش واضح عليها أي رد فعل
وبعد دقائق من الصمت بصلي فجأه وقالي بهدوء :
- تمام مش هطلقك
رديت بفرحه :
- بجد
- بس بشرط
- ا ايه هو ؟
- هو شهر واحد ونتطلق
وقتها بقي انتي تخترعي الف حاجه تقولي أننا متفاهمناش تقولي اني مطلعتش كويس اي حاجه المهم متدبسنيش في الآخر لاني وقتها هزعلك وجدا كمان
بلعت إهانته جوايا وانا بهز راسي بوجع وحزن
- تمام
- حاجه كمان
- ايه
- مش عايز ولا اشوفك ولا اشوف رقمك عندي علي الفون ابدا مهما كان لاني حرفيا مش طايقك
عيوني دمعت ورديت بنبره أوشكت علي الانفجار في العياط :
- حاضر
- اوك
وبص في الساعه بتاعته وقام وقف وهو بيطلع فلوس من محفظته وبيرميها في وشي
- مضطر امشي حاسبي وخلي الباقي عشانك
كان لسه هيمشي بس انا وقفت وناديت عليه بعصبيه:
- استني
وقف ولف وهو بيرفع حاجبه ،قربت منه وانا بسحب أيده وبحط الفلوس فيها وببصله بقوه وتحدي
- انا مش شحاته عشان اخلي الباقي عشاني
قولت كلامي وخرجت من الكافيه كله وانا بحاول اكتم صوت دموعي لحد ما بعدت عن المكان بمسافه مش كبيره لكنها كانت كافيه لخروج دموعي المكتومه وصرخه قلبي
وقفت في ركن بعيد وحطيت ايدي علي قلبي اللي كان شويه وهيقف من كتر ما بيدق
كنت بعيط بحرقه لدرجه اللي رايح واللي جاي كان بيقف يسألني " مالك" بس مكنتش برد علي حد فيهم
كان صعبان عليا نفسي اوي ،كان صعبان عليا قلبي اللي حب شخص ووثق فيه وفي الآخر داس عليه بكل قسوه
-انا اسف
لفيت لمصدر الصوت لقيته واقف وحاطط أيده في جيب الجاكيت بتاعه وهو بيبصلي بشفقه
بلعت ريقي وانا بمسح دموعي بطرف الكم بتاع الجاكت :
- ا انت ايه اللي جابك هنا ؟؟
قرب مني وبص في عيوني وهو بيتنهد:
- انا اسف مكانش ينفع اعمل كده
غمضت عيني وبصيت في كل الاتجاهات ماعدا عيونه
- ع عادي تمام
- تحبي اوصلك
رفعت راسي وبصيتله بسخريه :
- شكرا عارفه طريق بيتي
اخدت نفس طويل ومسحت الجزء المتبقي من دموعي ولفيت ومشيت من قدامه
- إيمان
لفيت لمصدر الصوت كان واحد زميلي من أيام الكليه
قربت منه بابتسامه سعيده :
- محمود ازيك
- تمام الحمد لله انتي ايه اخبارك
- الحمد لله
- الف مبروك
رديت باستغراب :
- علي ايه
- انتي مش اتكتب كتابك يابنتي ؟
اتوترت وانا ببتسم ابتسامه مهزوزه:
- ااااه ا الله يبارك فيك عقبالك يارب
كان لسه هيرد بس حصل اللي كنت خايفه منه وجه " يوسف" لاني مكنتش بعدت عنه غير خطوتين بالتقريب !
- مين ده
بلعت ريقي وانا بلف وببتسم ابتسامه مزيفه :
- ي يوسف حبيبي اعرفك د ده محمود كان زميلي في الكليه
محمود بفرحه :
- ازيك يا استاذ يوسف الف مبروك
يوسف بابتسامه بارده :
- الله يبارك فيك
- ا احم والله انت اخدت فاكهه الشله
همست بخفوت :
- روح منك لله كشفت راسي ودعيت عليك
حط أيده في جيب الجاكيت ورفع حاجبه بابتسامه صفراء
- فاكهه الشله
محمود وهو مكمل :
- اه والله يعني حقيقي انت محظوظ بجد جمال واخلاق وتفوق وكل حاجه ماشاء الله
يوسف :
- ماشاء الله كل ده ؟
- اه والله يا استاذ محمود ده كمان ....
قاطعته بابتسامه مهزوزه وانا من جوايا بشتمه في الحقيقه
- طب يا محمود ا احم مبسوطه اني شوفتك ب بعد اذنك عشان مستعجلين
مدلي أيده بابتسامه واسعه :
- وانا كمان مبسوط اني شوفتك
بلعت ريقي وبصيت لايده ورفعت راسي ابص ليوسف اللي كان بيبصلي وهو رافع حواجبه الاتنين بتكشيره
وفي ثانيه كانت أيده في ايد محمود الممدوده وهو بيضغط عليها بابتسامه برزت أسنانه وكأنه اسد هينقض علي فريسته
-اتشرفنا يا استاذ محمود
محمود بوجع من ضغطه علي أيده :
- ا الشرف ليا
ساب أيده وفورا اختفي محمود من قدامنا وانا واقفه ركبي بتخبط في بعض
- ا ا أنا انا
- مش فارقلي عن اذنك
رفعت حاجبي وانا ببص لآثره بذهول
- واما انت مش فارقلك يااهبل يابن الهبله جيت ليه وعامل فيها غيران
-اممم بس لا يابت يا ايمان ده شكله غيران عليكي
- ايه الهبل ده غيران اي ده اصلا مش طايقك !
- لا بس نظره عينه كانت مخيفه بجد
- هه فوقي من اوهامك استحاله يحبك بعد ما خدعتيه