رواية غرام الاسد كامله جميع الفصول بقلم شروق محمد

 رواية المجنونه التي احببتها الفصل الثالث3بقلم رحاب خالد

_«خرجت ندي من اوضتها وشعرها كان منكوش بشكل بشع،قعدت جنب مامتها وباباها وهما بيفطرو».. 

احمد بهدوء: انتي مش عندك جامعه النهارده؟!.. 

ندي وهي تاكل بنفس مفتوحه، ومش منتبهه لكلام احمد.. 

الهام بزعيق: انتي ي زفته ردي ع باباكي.. 

ردت عليه ندي من.غير متبصله: خير ي ابو حميد ع الصبح.. 

احمد وهو يكتم غيظه منها قالها: انتي مش عندك جامعه النهارده؟.. 

ندي بتوتر: ااه عندي محاضره وحده وبعد العصر عندي كورس، بس مش رايحه المحاضره مليش نفس.. 

احمد بجديه: تعرفي رغم كل البلاوي اللي فيكي الا انك مش بتعرفي تكذبي، ها ي ندي مش رايحه المحاضره لي؟.. 

ردت عليه بقلق: اقولك ولا تزعلش.. 

ساب احمد الاكل من ايده وقالها بخوف: ي منجي من المهالك ياارب، احكي يلاا.. 

_ حكتله ندي اللي حصل بينها وبين خالد من اول مره شافته فيها لحد مخلاها تاخد صفر فاعمال السنه».. 

الهام بقلق وهي تمسك ايد احمد: انت كويس ي حبيبي مالك؟.. 

احمد وهو يمسك رأسه بألم: هتعبك ي حبيبتي تناوليني حباية الضغط من جوه.. 

الهام وهي تجري لجوه عشان تجيبله البرشام: حاضر ي حبيبى.. 

ندي ببراءه: خير ي بابا حصل اي تعبك كده؟.. 

احمد بغيظ: ياارب اديك شايف لوحدك ياارب، ادعي عليها ولا اعمل اي نجينا منها ياارب.. 

ندي بمرح: انت بتضرب بودره ولا اي ي حجوج.. 

احمد بعصبيه بعد ان تناول حبوب الضغط الخاصه به: بصي ي زفته انتي بكره هنروح انا وانتي للدكتور ده نعتذرله عن اللي حصل مش ناقص انا تشليلي ماده اخر السنه بسبب غباءك ده.. 

الهام: اهدي ي احمد انت عشان متتعبش، وسيبكم من الموضوع ده وركزو ففرح النهارده، شكله في عريس ليكي ي ندوش.. 

ندي بصدمه وهي تقف عن الاكل: عريس ليا انا، مين هاا مين؟..

 

احمد وهو يمشي من قادامها بغيظ: حد متعرفهوش اعقلي انتي بس والنبي خلينا نخلص.. 

ندي وهي تجري لاوضتها: تعليم اي بس ودوني ع بيت حبيبي نعيش مع بعض فيه.. 

احمد بنفاذ صبر: الهام اتكلمي انتي معاها الولد ده دكتور جامعه وعاقل وابن ناس، مش عايز وحده مجنونه هو، وبعدين لو فضلت بطريقتها دي هتقعد فوشنا العمر كله.. 

الهام بهدوء: متقلقش انا هظبط الدنياا.. 

ــــــــــــــــــــــــــــــــــــــــــــــ

«فالفرح».. 

خالد بملل: ي جماعه انتو جايبيني معاكم لي، انا معرفش حد هنا.. 

رجاء مامته: ي بني اهو فرح وحاجه تفرفش عليك، وبعدين بصراحه انا وابوك جايبنلك عروسه.. 

خالد بأبتسامه واسعه: هو ده الكلام، طيب كنتو قولو كده من الاول.. 

محمد بمرح: عملنهالك مفجأه وكمان لسه لما تشوفهاا.. 

خالد. بحماس: انت شوفتها ي حج.. 

رجاء: لا ي حبيبي ابوك يعرف ابوها بس، هي بنت الدكتور احمد بس انا شوفتها قبل كده مع مامتها فالنادي من بعيد قمر وحلوه جدا.. 

خالد بحماس: طيب ع خيرة الله هي فين بقي؟.. 

محمد بابتسامه واسعه: اهم جم.. 

_«بص خالد للمكان اللي شاورله عليه محمد، فشاف الدكتور احمد ومراته جنبه داخلين القاعه ومعاهم بنت لابسه فستان اوف وايت رقيق جدا وشعرها طويل جدا حطاه ع كتفها،بس مقدرش يشوف وشها عشان كانت بتبص جوه شنطتها... 

_ وبعد شويه  رفعت رأسها، حتي تحولت ملامح خالد من الهدوء للصدمه والغضب».. 

بص خالد لباباه ومامته وقالهم بعصبيه: ملقتوش غير دي.. 

رجاء بقلق: مالها دي ي خالد؟... 

قاطعهم صوت احمد وهو يقول  بهدوء: السلام عليكم ي حج محمد.. 

رد عليه محمد وهو يقف ويسلم عليه: وعليكم السلام ي احمد.. 

وبعد كده سلم ع  الهام: اهلا وسهلا ي دكتوره الهام اتشرفت بمعرفتك.. 

الهام بهدوء: الشرف ليا ي حج محمد.. 

وقفت رجاء هي كمان وسلمت عليهم، وبعدين بصت.لندي باعجاب شديد من جمالها: ازيك ي ندي ي حبيبتي.. 

ندي بهدوء مصطنع: ازاي حضرتك ي طنط.. 

محمد بنصف عين: انا شوفتك فين قبل كده؟.. 

احمد بهدوء: تلاقيك شوفتها وانت عندي فالعياده.. 

محمد وهو مش فاكر: يمكن، خالد تعالي سلم ع دكتور احمد ي حبيبي... 

بصت  ندي للارض بخجل مصطنع، ليتنهد الاخر ويستدير ليهم وقال ببرود: السلام عليكم ي دكتور احمد.. 

_«اول ماا سمعت صوته حتي بصت له بصدمه وقالت: انت؟؟.. 

بص لها خالد بغيظ وسكت.. 

ــــــــــــــــــــــــــــــ

«وبعد شويه».. 

رجاء بفرحه: يعني انت ي خالد طلعت الدكتور بتاعها.. 

ندي بغيظ: ده من حظي الاسود.. 

خالد بنفس طريقتها: وحظي.. 

احمد بعدم فهم: استني ي خالد هو انت اللي سقطت بنتي فاعمال السنه؟!.. 

خالد بتوتر: اا يعني ي دكتور احمد مكنتش اعرف انها بنت حضرتك.. 

احمد بغيظ وهو بيبص لندي: لا ي بني براحتك انا لو مكانك هعمل كده.. 

خالد بمرح عكس مابداخله: ده اقل واجب يدكتور.. 

_«ضحكو كلهم ع هزار خالد،معادا ندي اللي بصتله بغضب.. 

خالد بجديه: انا بعتذر لحضرتك ي دكتور احمد واوعدك ان الانسه هتتعامل باسلوب يليق بحضرتك بعد كده.. 

ندي بغيظ: ويليق بيا الاول.. 

خالد ببرود: اللي يليق بيكي انتي شوفتي جزء منه قبل كده.. 

ندي بغيظ: قصدك اي ي ملزق انت.. 

الهام بسرعه: يااه عليكي ي ندي بتحب تهزر كده ع طول.. 

خالد بضحكه صفراء: سم.. اقصد سكر دمها سكر.. 

رجاء بخبث: العريس والعروسه بيرقصو سلو اهو يلاا ي خالد خد ندي وارقصو وسيبونا احنا بقي عواجيز فبعض.. 

ندي بضيق: مبعرفش ارقص.. 

محمد وهو يكتم ضحكاته: يعلمك هو ي بنتي يلاا.. 

_«شاورلها احمد بحده عشان تقوم مع خالد، فتنهدت بغيظ  وقامت وهي متجاهله خالد وراحت الي ساحة الرقص وهو وراهاا.».. 

مسك خالد.ايدها وشدها عليه وهو بيقول: اهدي ي حجه جموسه واطلقت.. 

ندي بغيظ: لا توور.. 

خالد بضحكه صفراء بيحط ايده ع وسطها ليقربها منه بقوه فتالمت من ايده وقالها من بين اسنانه بحده: اللهم طولك ي رووح، اسمعي ي بت انتي تخرسي خالص عشان اليوم ده يعدي ع خير انا لا طايقك ولا طايق ابوكي ولا امك.. 

ندي بغيظ وهي تحاول تبعد ايده من ع وسطها: ولا انا برضو طايقه ابوك وامك منتجين البيض دول.. 

خالد بحده: صبرىني ياااارب.. 

ندي بحده: ااه يارب صبره خليه يقلب صباار اهو حاجه منها فايده ع الاقل بتتعمل فتيكا كريم الشعر.. 

خالد بضحكه صفراء لاهلهم اللي كانو بيبصولهم من بعيد: تعرفي ان اهلك واهلي بيتفقو ع خطوبتنا.. 

ندي بغضب: لو اخر راجل ع وش الارض مستحيل اتجوزك لاني مش شيفاك راجل اصلا.. 

خالد وهو يقربها منه اكتر وقالها بقوه وغضب: تحبي اوريكي راجل ولا لا.. 

احمر وشها بكسوف لاول مره بحياتها  فغمضت عيناها وفتحهتا بشكل عفوي وقالت بصوت مهزوز: اا انت قليل الادب..

 

_«مردش  عليها و لاول مره يلاحظ جمالها ، تلك عينيها البني ورموشهما الغزيره للغايه، وانفها الصغير وشفتيها المنتفختين بشكل مغري وبشرتها البيضاء  وو وايضا ذلك اللسان اللي ببنقط سم برضو».. 

ندي بحده: تعالي خدلك صوره، جرا اي مبحلق فيا كده لي؟.. 

خالد بتوتر: وانا هبحلق فيكي لي من حلاوتك ولا من حلاوتك.. 

ندي بثقه: من الاتنين حلاوتي وحلاوتي.. 

_ ضحك هو بهدوء وهو بيبص للناحيه التانيه فبرغم انها حلوه اووي الا انها عنيده وتصرفاتها زي الاطفال».. 

_بعد عنها بعد مخلصت الاغنيه الرومانسيه وبطلو رقص،وبعد.ثواني اشتغلت اغنيع شعبيه بصوت عالي جدا.. 

ندي وهي تصرخ بصوت عالي: عااااااا سالكه بنسوق فالدنياا عن عن عن عن.. 

خالد بفزع واحرااج: ي بت المجانين اهدي الناس تقول عليا اي سمعتي..

ندي بمرح: انا عملتلك حاجه ي عمم انا بحب الاغنيه وهرقص عليها.... 

خالد باحراج شديد وغضب : المشكلة ان الناس شيفاكي تبعي وانا دكتور محترم اتلمي بقي.. 

ندي ببرود وهي ترقص : هيهي قال محترم، ع نفسك ي دوك.. 

مسح خالد بايده ع وشه بغضب،وحاول ان يتحلي بالصبر عشان ميقتلهاش ع اللي بتعمله ده.. 

احمد بملامح باكيه وهو بيقول لألهام وهما بيبصو ع ندي اللي كانت بترقص بحماس: منها لله حسبي الله فيهاا.. 

الهام باحراج شديد: ابتلاء وربنا هيخلصنا منه ي احمد الصبر بس.. 

ــــــــــــــــــــــــــــــــــــــــــ

_ بعد مروحت ندي وعيلتها.. 

ندي وهي بتمشي يمين وشمال قدام الهام واحمد اللي قاعدين قدامها امام بخوف.. 

ندي بحده: انا تجيبولي اناا الملزق ده اتجوزه .. 

احمد بخوف: والله مكنت اعرف ان هو ده اللي.. 

ندي بحده: انت تسكت خالص.. 

احمد بخوف: حاضر اتفضلي.. 

ندي بغيظ: قال انا اتحوزه انا مش بطيقه وهو دكتور بتاعي اتجوزو وكمان بتتكلمو معاه بمحن وتخلوني اقوم ارقص معاه اعمل فيكم اي بس قولولي.. 

الهام بخوف: غلطه ومش هتتكرر سامحيناا.. 

احمد بهدوء: ايو سامحينا.. 

ــ فبيت خالد...... 

خالد بحده لاهله: بزمتكم انا ينفع اتجوز دي؟.. 

رجاء بمرح: ومالها ي بني مهي حلوه ودمها زي الشربات.. 

سرح.خالد فيها لما كانت بترقص معاه وقال من غير مياخد باله: هي ااه حلوه وجدا كمان.. 

محمد بسعاده: طيب ع بركة الله.. 

خالد بانتبااه وتوتر: اا اقصد يعني يفيد بأي الجمال والدماغ فالمهلبيه.. 

محمد بجديه: صغيره ي بني تكبر وتعقل.. 

خالد بغضب: محسسني ي بابا انك بتتكلم ع طفله مش انسه كبيره مكتملة الانوثه بنت الجزمه.. 

محمد بضحك شديد: ههههههههههه طيب انا افهم اي دلوقتي انت عايزها ولا لا؟.. 

خالد بجديه: لا طبعا انا مش هتجوز المجنونه دي، ولسه كمان هربيها ع اللي عملته واحنا بنرقص دي فضحتني قداام النااس..

 

محمد: اسمع ي خالد انت مش عايز تتجوزها براحتك ده قسمه ونصيب، انما تستعندالبنت فالجامعه فده غلط.. 

قام خالد وراح لاوصته وقال لباباه: ان شاء الله خير ي بابا.. 

ــــــــــــــــــــــــــــــــــــــــــــ

_«تاني يوم بالجامعه» 

نسرين بضحك شديد: ي نهاااااااااري بجد، ده انتي ي ندي كأنك بتحكيلي روايه مش حاجه حصلت معاكي بجد.. 

حطت ندي راسها ع البينش وقالت: اه والنبي حصل كده، قال وانا اتشيك واشتري فستان جديد عشان العريس المز يطلع الواد الملزق ده تقوليش طالعلي فالبخت.. 

نسرين بمرح: ده بخت اسود جاتك نيله ع حظك، تيجي ترسمي ع الدكتور المز يطلع هو، يجيلك عريس مرتاح يطلع هو بووومه.. 

ندي بملامح باكيه: اجلدي كمان اجلدي يختي.. 

نسرين وهي تكتم ضحكاتها: بس طيب بس اهوو دخل.. 

ندي بخوف: ربنا يستر ومطردش لاحسن سمعتي سمعت فالدفعه.. 

_ دخل خالد.المحاضره وسلم ع الطلاب، ولا  تلقائياً فضل يدور عليها بعنيه تبحث ولما شافها وهي

 بتبص فكتابها ومش باصه عليه بدأ قلبه ينبض جامد، بص للناحيه التانيه ثم بدأ بشرح

 محاضرته التي طولت اكثر من ساعتين،وهو كل شويه يبصلها وهي بتتجاهله وده خلاه.اتعصب منها»..

 

خالد بجديه : ودلوقتي ي جماعه هسأل عشوائيا حسب القائمه اللي معايا فالمحاضره وهتكون دي درجة شهر 7 الجاي مع اضافة الميد تيرم.. 

بدأ خالد يسأل بعض الطلاب ويديهم  درجات ، وبعدين ابتسم بخبث  وبصلها وقال: ندي احمد البدري.. 

لطمت ندي ع وشها بشكل مضحك ووقفت وقالت: نعم.. 

خالد بخبث شديد: عايز ملخص المحاضره مع بعض الأمثله ع الاسهم والسندات و.. 

ندي وهي تكتم دموعها وحزنها: بااس بااااس هتعرف تكتب الصفر ولا اجي اكتبه انا.. 

خالد بضحكه شامته فيها: لا اتفضلي اقعدي.. 

قعدت ندي وقالت بغيظ: سؤال ده حسبي الله تلاقيه فعيالك، 

اللهي ياارب يجيلك تسلخات وتمشي وسط الجامعه زي تتح كده ياارب..           

                    الفصل الرابع من هنا

لقراءة باقي الفصول من هنا

تعديل المقال