رواية زواج بالاجبار ولكن
الفصل السابع7
بقلم ايه الموافي
ميرنا بسخرية: اتنين واقفين قدام بيت عروسة صاحبتهم هيكونوا بيعملوا ايه يعني؟!
مروان: انتوا لسة طالعين ولا نزلتوا
سارة: لسة مطلعناش
مروان لميرنا: دا القدر عايز يلم شملنا بقى، يكش البعيد يفهم
بصتله ميرنا بقرف وسارة قالت: يلا نطلع
طلعوا فوق وخبطوا على الباب ففتحلهم مراد ومنظره متبهدل خالص، مروان بصدمة وهو شايف الدقيق مالي هدومه:
- ايه دا يا مراد؟!
مها من وراه: مين اللي بيخبط يا مراد
بصوا عليها فاتصدموا للمرة التانية لان منظرها ميقلش عن منظر مراد، ميرنا:
- انتوا ايه اللي عاملينه في نفسكم ده!!
مراد بضحك: اصل بعد عنكم عاملين كيكة
مها: ادخلوا انتوا واقفين كده ليه
دخلوا وشموا ريحة حريقة فقال مروان بإستغراب: ايه الريحة دي
مها بضحك: اصل بعد عنك الكيكة اتحرقت
ضحكوا عليها واعدوا كلهم ومروان قال: قولولي بقى الجواز حلو؟!
مراد بغيظ وهو بيبص على مها: اه طبعا حلو
مروان: يعني اتكل على الله وابطل سنجلة واتجوز؟!
مراد بضحك: انت طول عمرك بتعارض الجواز ايه اللي حصل؟!
مروان وهو بيبص على ميرنا: اصل بعد عنك في واحدة شقلبت كياني وجابتني على بوزي فعايز استقر بقى
اتحرجت ميرنا جدا وبصت الناحية التانية ومها فالت بضحك:
- دا الصنارة غرست بقى
مروان: دي غرست لحد ما عششت في قلبي
ضحك مراد عليه وسارة قالت بضحك: اوعدني يارب
ضحكوا كلهم وفضلوا يتكلموا لحد ما اجت الساعة تسعة، مراد: يلا من غير مطرود امشوا بقى عشان زهقت
مروان: بيموت فينا
مها بضحك: لا مهو واضح
سارة: اه صح يا ميرنا انتي ناوية تستقري هنا ولا هتسافري تاني
مها: يارب بجد يا ميرنا تبطلي رخامة ومتسافريش
ميرنا بإبتسامة: متقلقوش انا نويت استقر هنا خلاص
سارة ومها: بجد يا ميرنا
ميرنا: اه بجد وبدور على شغل كمان
مروان: انتي تخصصك ايه؟!
ميرنا: انا مبرمجة
مروان: طب تعالي عندنا لاننا كنا محتاجين مبرمجة وسكرتيرة ليا، صح يا مراد؟!
مراد بإستغراب: دا امتى ده؟!
برقله مروان ففهم مراد وقال: اه صح ده انا كنت نسيت
مروان بغيظ: هو الجواز حلو لدرجة انك نسيت
مراد: اعد قر بقى على اللي جابوني
ضحكوا عليه ومروان طلع الكارت بتاعه واداه لميرنا وقال:
- مستني تليفون منك عشان تشتغلي معانا
ميرنا بتوتر: انا متخيلتش بصراحة اني ممكن الاقي شغل بالسرعة دي
مروان بغمزة: اى خدمات
مراد بغيظ: طب يلا يا عم النحنوح من هنا عشان عايزين نرش ماية
مروان بضحك: مش قولت بيموت فيا
ضحكوا عليه ونزلوا كلهم فقال مروان: تعالوا اما اوصلكم
ميرنا: لا احنا هنروح بأوبر
مروان بغيظ: سوسن انا قدامكم عشان اسيبكم تركبوا اوبر وانا معاكم
سارة بضحك: خلاص وصلنا يا عم احنا طايلين
بصتلها ميرنا بحدة فبلعت سارة ريقها، مروان يضحك:
- طب اركبوا يلا
ركبت سارة ورا وميرنا ركبت جنبها، ساق مروان العربية وقال:
- بيتك فين يا سارة؟!
قالتله سارة على العنوان فساق مروان وهما طول الطريق ساكتين، وقف مروان قدام بيتها وقال:
- مع السلامة.
سارة: مع السلامة
ميرنا: خدي بالك من نفسك
مروان بضحك: هي راحة تحارب
ميرنا ببرود: ملكش دعوة انت
مروان: احم، بيتك فين
قالتله ميرنا على العنوان فقال مروان: بيتك قريب شوية من بيتي
ميرنا: ماشي
مروان بصوت واطي: يخربيت ابو برودك يا شيخة
فضل كل شوية يبصلها في المراية فقال: انتي عندك كام سنة يا ميرنا
ميرنا: ستة وعشرين سنة
مروان بضحك: ده انا قولت انك هتهبي فيا عشان سألتلك
ميرنا بإستغراب: ليه يعني؟!
مروان: اصل البنات بتكره اوي السؤال ده
ميرنا: انا بستغرب اوي منهم بصراحة، اصل دا سننا ليه نتحرج منه
مروان: بحب عاقلة يا ناس
ميرنا يصدمة: ايه!!
مروان: ايه؟!
وصل مروان قدام البيت وقال: وصلنا
نزلت ميرنا من العربية بتوتر وقالت: شكرا على التوصيلة
مروان: انا معملتش حاجة تستدعي الشكر
ابتسمت وكانت هتقفل باب العربية بس هو قال:
- متنسيش تتصلي بيا
ميرنا: حاضر اول ما هظبط اموري هتصل بيك ان شاء الله
طلعت على بيتها وهو مشى بالعربية وهو بيبتسم
• عند مها
مها: مراد انت مش ملاحظ حاجة غريبة؟!
مراد: ايه هي
مها: طنط سوزي وعمو محمود مظهروش خالص من ساعة ما اتجوزنا
مراد: انا برضو مستغرب اوي وبتصل بيهم بس محدش بيرد
مها: اتصل بيهم تاني عشان انا بدأت اقلق
طلع مراد موبايله، واتصل على باباه فرد وقال:
- عايز ايه يا زفت انت
مراد بضحك: في ايه يا حج هو انا عملتلك حاجة دلوقتي
محمود: انجز عايز ايه
مراد: انتوا اختفيتوا ليه وليه مبتردوش؟!
محمود: انا وامك سافرنا عشان نجدد شهر عسلنا
مراد بصدمة: نعم!! تجددوا ايه
محمود بغيظ: نجدد شهر عسلنا يا خفيف، ايه مستكتر عليا افرح شوية
مراد بغيظ: هو مين فينا العريس انا ولا انت؟!
محمود: اقفل بقى انت اخدت من وقتي كتير
مراد بغيظ: والله، ماشي يا...
مكملش مراد كلامه لان محمود قفل في وشه، مها بضحك: هو في ايه؟!
مراد بغيظ: دا قفل في وشي، تخيلي انه سافر مع امي عشان يجدد شهر العسل، شهر عسل ايه وهو في السن ده
مها بضحك: ابوك ده رايق اوي اقسم بالله
مراد: انتي بتضحي
مها: اومال عايزني اعمل ليه يعني
مراد بغيظ: متعمليش حاجة
دخل مراد اوضته ورزع الباب وراه ومها قالت بضحك: راجل نكدي بصحيح
• تاني يوم
دخلت سارة الشركة وهي خايفة اوي بسبب ان مفيش حد فيه، اتكلم ادم من وراها وقال:
- اتأخرتي خمس دقايق ليه؟!
صرخت سارة من الخوف وقالت: خضتني
ادم ببرود: لا سلامتك من الخضة
شد ادم المج اللي كان في ايدها فقالت بتذمر:
- دا الشاى بتاعي
ادم ببرود: بقى بتاعي خلاص
سارة بعند: لا هو بتاعي فلو سمحت هاته
ادم: لو فضلتي ترغي كده كتير هخصملك من مرتبك
سارة ببلاهة: انا كنت بهزر ايه مبتهزرش؟!
ادم ببرود: لا يا اختي مبهزرش ويلا بقى على مكتبك
دبدبت سارة في الارض ودخلت مكتبها، مسكت الورق بتاع امبارح وقالت بغيظ:
- مهو لو مكنش جابلي دول دفعة واحدة كان فاتي نايمة ومتدفية
فضلت تشتغل فيهم لحد ما خلصتهم، مسكتهم وخبطت على مكتبه ودخلت وقالت بإبتسامة:
- انا خلصت
ادم: حطيهم على المكتب
حطتهم وادم قال: انا عايزك تروحي المخزن وتجبيلي مستندات اخر صفقة عشان هنراجعهم مع بعض
سارة: طب هو يعني مينفعش افطر الاول؟!
ادم: انتي مفطرتيش؟!
سارة بسخرية: اكيد يعني مش هفطر الساعة ستة او سبعة الصبح
بص ادم في ساعته ولما لقى ان لسة ساعة على بدأ ميعاد الشغل قال:
- تعالي معايا.
سارة بعدم فهم: اجي فين؟!
ادم: هنروح مطعم نفطر
سارة بذهول: انا وانت
ادم: اه، مالك مستغربة كده ليه؟!
سارة بتوتر: بس بس يعني انت المدير وانا الموظفة ولو حد شافني معاك هيفتكر حاجة تانية
ادم بملل: امم شكلك كده بتهتمي لكلام الناس اوي
سارة بسخرية: لا هو علشان لو افتكروا ان انا وانت مع بعض هيتكلموا عليا انا وان انا عرفت اوقعك عشان فلوسك والكلام ده انما انت يعيني الرجل البرئ الملاك وانا الشيطانة اللي لفيت عليك
ادم بذهول: ايه كل دا!! انتي كبرتي الموضوع اوي.
سارة: لا انا مكبرتش الموضوع ولا حاجة بس هو دا حال المجتمع الولد والبنت غلطوا نفس الغلطة بس هو الراجل عادي يعمل اللي هو عايزه انما البنت اهلها معرفوش يربوها والغلط كله عليها حتى لو كان غلطها اقل من غلط الراجل
ادم: انا بكره الناس اللي تفكيرها كده
سارة: يبقى انت كده بتكره اكتر من نص المجتمع الشرقي
ادم: بقولك ايه متخرحيني من الحوارات دي وتعالي بقى نفطر انا جعت اوي، وصدقيني لو حد فكر بس يتكلم عليكي نص كلمة انا هعرفه مقامه
بصت سارة في ساعتها وقالت: بما اني جعانة اوي فيلا
خرجوا من الشركة وركبت عربيته وساق ناحية المطعم
• عند مروان
كان مروان نايم بس صحى على صوت رنة موبايله:
- دا مين الرخم دا على الصبح
رد لما لقى رقم غريب وقال: مين معايا؟!
ميرنا بتوتر: هو انت كنت نايم؟!
قام من مكانه بسرعة وقال: مين انا، لا انا مكنتش نايم بس لسة صاحي من شوية
ميرنا: اسفة لو ازعجتك
مروان بضحك: لا ازعاج ايه هو في حد برضو ينزعج لما يسمع صوت الكروان دا على الصبح
لما مردتش عليه قال بتوتر: احمم، انتي فكرتي في اللي اتكلمنا عليه؟!
ميرنا: اه
مروان بترقب: وقررتي ايه؟!
ميرنا: انا موافقة بس في مشكلة
مروان: ايه هي؟!
ميرنا: شغل البرمجة انا ممتازة فيه واشغلت فيه كتير انما شغل السكرتارية مشتغلتعوش قبل كدا فكنت عايزة حضرتك تفهمني النظام عامل ازاى عشان امشي عليه لاني معرفش
مروان: متقلقيش خالص، كل اللي عليكي انك تنظمي المواعيد وتفكريني بيهم وتنظمي الورق وتيجي معايا الحفلات الرسمية والاجتماعات وحاجات شبه دي يعني، عموما انا مش هتقل عليكي في الاول لحد ما تاخدي على الوضع
ميرنا: انا متشكرة اوي
مروان ببلاهة: ده انا اللي متشكر
ميرنا بعدم فهم: متشكر لايه؟
مروان: احمم، هو انتي هتبدأي شغل من امتى؟!
ميرنا: في اى وقت انت عايزة انا جاهزة
مروان: تعرفي تيجي انهاردة؟!
ميرنا: اه اعرف
مروان: تمام انا مستنيكي انها الساعة عشرة في الشركة
ميرنا: تمام، مع السلامة
مروان: مع السلامة
قفلت معاه مروان فضل يطنطت على السرير بفرح
• في المطعم
ادم: انا ملاحظ انك مش بتاكلي، مبتاكليش ليه؟!
سارة بتوتر: اصل انا مش متعودة على اني اكل مع حد غريب
ادم: كلي عشان ورانا شغل كتير
سارة ببرطمة: هو كل يوم هيبقى ورانا شغل كتير
ادم: بتقولي حاجة
سارة: لا مبقولش
حط ادم البيض بتاعه في طبقها، فقالت بإستغراب:
- ايه؟!
ادم ببرود: انا ملاحظ انك بتحبي البيض عشان كلتيه كله مرة واحدة
سارة بتوتر: هو انا فعلا بحب البيض بس انت حطيتهولي ليه؟!
ادم: كليه وانتي ساكتة
كشرت سارة وادم ابتسم عليها، بعد ما خلصوا اكل شاور ادم للجارسون، مسكت سارة شنطتها وطلعت البوك منه فقال ادم:
- انتي بتعملي ايه؟!
سارة بإستغراب: هدفع حساب اللي اكلته
ادم بعصبية: هو انتي مش شايفاني راجل ولا ايه!!
سارة بتوتر: انت مالك متعصب كده ليه هو انا عملت ايه غلط؟!
ادم: انا الراجل وانا المفروض اللي احاسب
سارة: لا طبعا الكلام ده لو انت كنت جوزي او اخويا او حتى خطيبي انما غير كده لا لان انت ملكش اى الحق انك تصرف عليا في اى حاجة
ادم: انتي كبرتي الموضوع كده ليه؟!
سارة: انا مكبرتهوش بس دا الصح
ادم ببرود: وانا عازمك اظن مفيش حد معزوم بيدفع
سارة بتحدي: ماشي يبقى العزومة الجاية عليا
ادم ببرود: زي ما تحبي
دفع ادم الحساب وخرجوا من المطعم وراحوا على الشركة
• عند مها ومراد
خبط ادم على اوضتها وقال:
- بقالك مل دا نايمة؟! اخرجي بقى
كب ادم زيت بسرعة على الارض وكان هيمشي بس مها فتحت الباب وخرجت فاتزحلقت ومسكت في مراد فقوقعوا هما الاتنين على الارض
مها بوجع وهي متسكة ضهرها:
- انت غبي يالا
مراد بوجع: احترمي نفسك
مها: مين فينا اللي المفروض يحترم نفسه انا ولا انت!!
مراد: انتي بدأتي لما حطيتي ميكب على وشي
مها: يا سلام وانا بقى اللي مبيت عليا ماية وانا نايمة صح؟!
مراد: مش كنت بصحيكي
مها: ملاك برئ يا جدعان وانا ظلماه
قام مراد بس اتزحلق تاني ووقع، مها بضحك: احسن تستاهل
مراد بغيظ: انتي مش هتسكتي بقا
مها ببرود: لا لساني وانا حرة فيه ملكش دعوة انت
مراد: اللهم صبر الوحش على الجحش
قامت مها وقالت: بقولك ايه يا مراد
مراد: عايزة ايه
مها: متخلينا عاقلين شوية ونبطل شغل العيال ده
مراد بتفكير: وبعدين
مها: احنا ممكن نبقى صحاب لحد ما نطلق
فكر مراد شوية وبعدين قال: ماشي
مدتله مها ايدها فمسكها وقال، مراد: خيث كده بقى تعالي نعمل اكل عشان جعان
مها بضحك: يلا
• عند مروان
كان قاعد في الشركة وهو مستني ميرنا بفارغ الصبر، سمع صوت خبط على مكتبه فقال بلهفة:
- ادخل.
دخلت ميرنا من الباب وقالت: صباح الخير
مروان بإبتسامة: صباح النور، تعالي اعدي
اعدت ميرنا قدامه وهو قال:
- شغل انهاردة هيبقى بسيط خالص.
ادالها ورقة وقال: انا عايزك كل شوية تفكريني بمواعيد الاجتماعات انهاردة
ميرنا: كده بس
مروان: اه دا بالنسبة لشغل السكرتيرة اما بالنسبة لشغل البرمجة فالاستاذة مروة هتعرفك على كل التفاصيل
ميرنا: هي فين استاذة مروة
مروان: مكتبها في اخر الدور ومكتبك قدام مكتبي
ميرنا بإبتسامة: تمام ماشي
مروان: لو اى حد ضايقك عرفيني على طول
ميرنا بإستغراب: ليه بتقول كد
مروان: عشان يعني انتي موظفة جديدة فممكن حد يسوق الرخامة عليكي
ميرنا: لا متقلقش لو حد ساق الرخامة عليا انا هعرفه مقامه كويس اوي انا مش مستنية حد يجيبلي حقي
مروان ببلاهة: اووه شرسة اوي وانا بموت في كده
ميرنا بحدة: افندم
مروان بتوتر: روحي للاستاذة مروة عشان مستنياكي
قامت ميرنا وهو قال بصوت واطي: امسك لسانك ده شوية لتلاقي كف خماسي الابعاد على وشك
خرجت ميرنا وهي سمعاه بيبرطم بس مهتمتش وهو حط ايده على قلبه وقال:
- هتعملي فيا ايه تاني يا ميرنا، بقى مروان اللي كل البنات بتتحدف عليه وقع لواحدة تقيلة في نفسها، بس انا وانتي والزمن طويل ومبقاش انا مروان ان ما خليتك تحبيني زي ما بحبك
• عند مها
كانت باصة لمروان بقرف فقال:
- في ايه حجة انتي بتبصيلي كده ليه؟!
مها: انا اخدت خازوق في الجوازة دي على فكرة مكنتش متوقعة انها هتبقى كده
مراد بسخرية: اومال كنتي متوقعة ايه يا ست الحسن والجمال
مها: بالرغم من اننا مكناش بنطيق بعض ومازالنا بس ليه اتحبس في ام البيت ده
مراد بملل: عايزة ايه من الاخر كده
مها: انا عايزة اتنيل اتخرج
مراد ببرود: لا
مها بعصبية: ليه؟!
مراد: عشان انا مش عايز كده
مها: يا مراد بطل بقى انا قربت اخلل في ام البيت ده من كتر القعدة
رفع مراد حاجبه وقال:
- دا هما تلت ايام قربتي تخللي ايه؟!
مها: وانت مستهون بالتلت ايام!!
مراد: ريحي نفسك مفيش خروج
مها: هي بقت كده يا مراد؟!
مراد بإستفزاز: اه بقت كده
مها: ماشي يا مراد بس خليك فاكر ان مسير الملوخية تيجي تحت المخرطة
مراد: بيئة اوي
دخلت اوضتها مها ورزعت الباب جامد ومراد ضحك عليها
• دخلت ميرنا مكتب مروان من غير ما تخبط عشان تفكره بالاجتماع بس اتصدمت لما لقت واحدة لابسة لبس مايع في حضن مروان
بعد مروان فرح عنه بسرعة وقال بتوتر:
- ميرنا
بصتله ميرنا بقرف وقالت: اسفة اني مخبطتش على الباب بس فكرك بميعاد الاجتماع اللي بعد ساعة، وياريت بعد كده لو هتعمل القرف ده متعملهوش في مكتبك عشان مش ده المكان المناسب
مروان بتوتر: ميرنا استني انتي فاهمة غلط
ميرنا: عن اذنك
مشت وسابته وكان هيمشي وراها بس فرح مسكت دراعه وقالت بغضب:
- بقى هي دي اللي مش معبرني علشانها