رواية ساعرفهم من انا
الفصل الثالث عشر13
بقلم ايه الموافي
رغد بقرف وهى باصة على الأكل :
- ايه دا..!!
هشام بإستغراب من قرفها الغير مبرر :
- دا ستيك مشوى.
رغد بقرف : يع انت مش شايف ريحته عامله ازاى...؟!
شم الأكل بإستغراب وبص عليها بحيرة وهو بيقول :
- ماله ريحته ما هى حلوة اهى.
هزت راسها بقرف وهو قطعلها حتت لحمه وقربها من بوقها بالشوكة بس اول ما هى شافت اللحمة قريبة من الشوكة مسكت بطنها وقامت تجرى على الحمام وفضلت ترجع.
بص على أثرها بإستغراب ونده للجارسون علشان يشيل الأكل، فضل مستنيها تخرج من الحمام لحد ما اجت واعدت قدامه وهى لسه حاسة بالقرف.
هشام بحيرة : انتى كويسة....؟!
هزت راسها بتعب وهى بتقول :
- كويسه بس انا مش عارفة بطنى اتقلبت مرة واحدة لما شوفت الأكل ليه...!
بص عليها بتركيز وبعدين قال بضحك :
- انتى لو مكنتيش قولتيلى انك مش متجوزة كان زمانى قولت انك حامل.
ضحكت على كلامه وبعدين وسعت عيونها بصدمة لما استوعبت اللى قاله، بصت على بطنها وهى بتتمنى ان يكون اللى قاله غلط وقالت وهى بتكلم نفسها :
- اكيد مش حامل مستحيل.
بص عليها بإستغراب وهو بيقول :
- مالك سرحتى فى ايه..؟؟
بصت عليه بتوتر وبعدين قامت من مكانها وهى بتقول بإستعجال :
- انا أسفة بس انا لازم امشى حالاً
قام هشام وهو بيقول :
- طب استنى اوصلك
رفضت وقالت وهى بتمشى :
- لأ ملوش لزوم عن اذنك
اعد مكانه تانى بإستغراب وهو بيقول بحيرة :
- هى مالها وشها اصفر كدا ليه لما قولت انها حامل.
وسع عيونه بصدمة وهو بيقول :
- معقول تكون حامل...!! بس ازاى وهى بتقول انها متجوزتش قبل كدا ومش متجوزة
ضحك على نفسه وهو بيقول :
- هو انا ليه مصدوم لتكون حامل، ما دا الطبيعى واحدة نصابة وبتلف على الرجالة علشان تنصب عليهم المفروض اكون متوقع منها اى حاجة ومش بعيد كمان تكون حامل من الصايع اللى بيشاركها فى النصب.
• اول ما رغد خرجت من المطعم وقفت تاكسى وراحت على الصيدليه اللى جنب بيتها، دخلت الصيدليه وقالت بتوتر :
- لو سمحت انا عايزة اختبار الحمل ويكون كذا نوع
سمع طلبها وجابلها اللى هى عايزاه، اخدتهم ودفعت فلوسهم وراحت بسرعة على بيتها
اول ما دخلت البيت دخلت على الحمام على طول وفضلت تجرب الإختبارات
- بعد شوية اعدت على الأرضية بدموع وايدها بتترعش وهى بتقول بصدمة :
- كل الإختبارات ايجابية، اعمل ايه دا منبه عليا انى محملش انا خايفة ليجبرنى انزله.
اتماسكت وقالت بإصرار وهى ماسكة بطنها بحب :
- انا مش هسمح ابداً ان دا يحصل حتى لو اطلقت منه
انا لازم افوق بقى من القرف اللى انا بعمله دا واقنع ابراهيم هو كمان بكدا، كفاية علينا اوى الفلوس دى ويا إما نبيع كل حاجة ونسافر برا يا إ ما نشتغل شغل شريف
مسحت دموعها وخرجت برا لما سمعت صوت قفل باب الشقة، أول ما ابراهيم شافها ضم حواجبه بحيرة وقال بقلق :
- انتى كنتى بتعيطى ولا ايه
وقفت قدامه بجدية وقالت مرة واحدة :
- ابراهيم انا حامل
وسع عيونه بصدمة وبعدين قال وهو بيضحك :
- بطلى هزار تقيل بقى
بصتله بغضب وقالت بعصبية :
- على فكرة انا مبهزرش انا بتكلم بجد
وقف ضحك وقال بهدوء يسبق العاصفة :
- يعنى ايه يعنى حامل
ضمت جواجبها بإستغراب وقالت بعدم فهم :
- هو ايه اللى يعنى ايه انا حامل مش فاهمة قصدك
قلب الكرسى اللى كان جنبه بعصبية وقال بغضب و صراخ :
- هو انا مش قايلك اننا مينفعش ناخد الخطوة دى دلوقتى
اتفزعت من عصبيته وقالت بهدوء وهى بتحاول تقنعه :
- يا حبيبى مش كفاية علينا كدا احنا معانا فلوس لو اعدنا نصرف منها مش هتخلص، ما تيجى نسافر برا ونعيش حياتنا ونخلف البيبى دا ونعيش زينا زى الناس الطبيعية.
ضحك بطريقة مجنونة وقال وهو بيبص عليها بحده :
- الطفل دا هينزل
بصتله بصدمة وخوف وهى بتقول :
- مستحيل دا يحصل انت مجنون
شدها من شعرها بعصبية وقال بصراخ :
- هو ايه دا اللى مستحيل يحصل يا روح امك، الطفل دا هينزل يعنى هينزل
بعدت ايده من شعرها وهى بتقول بعصبية :
مش هينزل يا ابراهيم وانا من طريق وانت من طريق
فتحت باب الشقة وخرجت بس هو خرج وراها بحقد وشدها قبل ما تنزل من على السلم وقال بغل و طمع :
- هو ايه دا اللى انتى من طريق وانا من طريق، انتى مش هتروحى فى حته يا روح امك غير لما تتنازليلى عن كل حاجة انتى بتملكيها.
بصت عليه بصدمة وقالت بعدم تصديق :
- اه يا حقـ ـير يا واطى
ضربها بالقلم ومن شدة الضربة وقعت على السلم جامد وفضلت تنزف بغزارة
بص عليها بصدمة وخوف ونزل السلم بسرعة وشالها وحطها فى عربيته وراح على المستشفى
• بليل
كانت قاعدة فى البلكونة وعمالة تغنى :
- سلام يا اغلى حبيب سلام يا احلى حبيب كان نفسى اعيش معاك لكن مفيش نصيب انا عـمرى ما نسيتك
صدقنى حبيتك بقا يعنى دا جزائى بعتنى لما اشتريتك
- صوت فى البلكونة اللى جنبها رد عليها وقال بغنى :
- غلطنا في حقك والله إحنا
ياريتك بس تسامحنا
لينا ها المرة فوتها وإن عدناها حاسبنا
يا مخاصمنا يكفينا بعدك عنا يأذينا
من ليلتها شاغلنا ناوي شو تسوي فينا
ليلي يا ليلي يا ليل، ليلي يا ليلي يا ليل
ملك بخضة وصدمة وهى بصاله :
- انت ايه اللى جابك هنا وجيت ليه
ضم حواجبه بحيرة وقال ببراءة مصطنعة :
- هو الواحد مينفعش يجى بيته ولا ايه
اتنهدت بنفاذ صبر وقالت بعصبية :
- هشام انا بتكلم بجد انت ايه اللى جابك هنا
سند على سور البلكونة وقال ببرود :
- اكتشفت ان الجو هنا حلو فا اشتريت الشقة اللى جنبك دى علشان استجم شوية
بصت عليه بغيظ وقالت بإستنكار :
- يعنى سيبت شقتك اللى قدام البحر وجيت هنا علشان تشم هوا...!!
رفع كتفه ببراءة وهو بيهز راسه، بصت عليه بعصبية وخلت من البلكونة ورزعت الشيش جامد
فضل يضحك عليها بصوت عالى وقال بإستمتاع :
- ولسه يا ملك مش هسيبك غير لما تزهقى منى وتسامحينى
• عند رغد
فتحت عيونها بتعب وهى حاسة بوجع شديد فى بطنها، ركزت فى الأوضة بإستغراب و مرة واحدة افتكرت ايه اللى حصلها
قامت منطورة من مكانها بس صرخت من الوجع وحطت ايدها على بطنها وهى بتبكى وبتهز راسها وهى بتقول بإنهيار :
- ابنى محصلهوش حاجة مستحيل دا يحصل مستحيل
فضلت تصرخ و تحدف اى حاجة تقابلها بجنون لحد ما دخل الممرضين وهما بيحاولوا يهدوها
رغد بصراخ :
- قولولى ان ابنى لسه فى بطنى و ممامتش
واحدة من الممرضين بحزن :
- احنا اسفين بس الجنين نزل و انتى شيلتى الرحم بسبب شدة الوقعة
رغد بصتلها بصدمة والممرضة التانية بصتلها بحده علشان قالتلها كدا و حالتها لسه مستقرتش
رغد بألم وهى بتنفى براسها زى المختلة :
- كدابة انتى كدابة
الممرضة حطت وشها فى الأرض و رغد جرت عليها وفضلت تضرب فيها بعنف وهى بتقول :
- كل دا محصلش، قوليلى ان ابنى لسه عايش رحم ايه اللى شيلته يا كدابة انا هخلف ابنى غصب عنك وهحميه من ابوه اللى عايزه ينزل
فضلوا يبعدوها عن الممرضة بالعافية وادوها حقنة مهدئة وهى لسه بتقول وهى حاطة ايدها على بطنها :
- ابنى حبيب ماما متزعلش من الكلام اللى قالوه، انا هخدك واربيك فى مكان بعيد علشان محدش يقدر يإذيك
نامت من أثر الحقنة و هما اشتالوها بحزن و حطوها على السرير