رواية ساعرفهم من انا
الفصل الحادي عشر11
بقلم ايه الموافي
كانوا قاعدين كلهم لحد ما ملك قالت :
- كنتوا عايزينا فى ايه؟!
أدهم وبيرى بصوا لبعض بإبتسامة وقالوا فى نفس الوقت :
- احنا اتخطبنا لبعض
هشام وملك بصوا عليهم بصدمة لحد ما ملك قالت بإبتسامة بعد ما استوعبت اللى قالوه :
- ألف مبروك والله انتوا لايقين على بعض اوى وانا من الاول شكيت ان ممكن يبقى فى حاجة بينكم مع مرور الوقت
أدهم بص لبيرى بحب وهى اتكسفت وودت وشها الناحية التانية وهى بتقول لملك :
- الله يبارك فيكى عقبالك
كشرت بعد ما كانت مبتسمة وهشام بصلها بنظرة ذات معنى وقال :
- اوعدنا يارب
بصوا كلهم عليه بضحك ماعدا ملك وأدهم قال وهو بيغمز لهشام :
- اتشطر انت بس وانت هتحصلنا قريب
ضحك هشام وهو بيقول :
- يارب يا اخويا
بصتلهم بجدية وقالت وهى بتحاول تغير الموضوع :
- احنا الأربعة معدش ينفع نجتمع فى مكان واحد مع بعض وبلغى سوزى هى كمان بالكلام دا
التواصل الوحيد اللى هيبقى بينا هو الموبايل غير كدا لأ؛ علشان مفيش حاجة تبوظ من اللى بنخططه
بصولها بصدمة وأدهم قال بذهول :
- حتى انا وبيرى
بصتله بحدية وقالت :
- احنا لازم نعمل كدا علشان خلاص قربنا من هدفنا، لانهم لو شكوا فينا ١٪ اللعبة هتتقلب علينا احنا
اتنهد أدهم بغيظ وقال بصوت واطى :
- ربنا ياخدك يا ابراهيم ونخلص منك بقى
ضحكوا كلهم علشان سمعوه وملك بصت لموبايلها بإستغراب لما شافت رقم غريب بيرن عليها
ردت بإستغراب تحت نظرات هشام الفضولية ووسعت عيونها بصدمة وهى بتبصله
ضم حواجبه بحيرة وهو بيقول بشك لنفسه :
- هى بصتلى ليه هى المكالمة دى ليها علاقة بيا
سمعها وهى بتقول ببرود انا جاية وقفلت الموبايل وقامت، بصتلها بيرى وقالت :
- انتى رايحة فين احنا كنا لسه هنعد شوية مع بعض بمناسبة الخطوبة
بصتلها ملك بإعتزار وهى بتقول بأسف :
- انا اسفة والله بس دى حاجة مهمة وانا لازم امشى
بصتلها بيأس وهى بتقول :
- اكيد هتعوضهالى
ابتسمت بحب وهى بتقول :
- متقلقيش اول لما نخلص من الاتنين دول هتلاقينى لزقالك لحد ما تزهقى منى
ضحكوا وقالت وهى بتمشى :
- مبرك مرة تانية
اول ماخرجت هشام وقف على طول وبيرى قالت بصدمة :
- انت هتمشى انت كمان
قال بإستعجال وهو بيبص على الباب :
- معلش ورايا حاجة مهمة
ابتسم أدهم بمكر وقال بنبرة ذات مغزى :
- سيبيه يا بيرى يروح يشوف مصالحه
بصله هشام بضحك قبل ما يمشى وأدهم قال بمرح اول ما هشام مشى :
- شكلها فى الأخر كدا هيبقى فرحين مع بعض مش فرح واحد
اول ما هشام خرج استخبى ورا الشجرة وهو شايفها بتركب عربيتها، اول ما ساقت العربية ركب عربيته بسرعه ومشى وراها ببطئ
فضل ماشى وراها وهو بيقول بفضول :
- ياترى رايحة فين
وقف مكانه بالعربية لما لقاها وقفت عربيتها ونزلت منها ودخلت كافيه
ركن عربيته ونزل منها واول ما هى دخلت دخل وراها وفضل ماشى براحة وهو بيقول :
- هى هتقابل مين
وقف بعيد عنها وهو شايفها واقفة قدام الترابيزة وفى حد وراها بس مش باين، اول ما اعدت وشاف اللى وراها وسع عيونه بصدمة وقال بعدم تصديق :
- شيماء
اول ما اعدت قالت شيماء بإبتسامة :
- بقالى كتير اوى مشوفتكيش
بصتلها ملك بجدية وقالت ببرود :
- نعم عايزانى فى ايه
اتحمحمت شيماء بإحراج وقالت بندم :
- ملك انا أسفة
ضحكت ملك بسخرية وقالت بإستنكار :
- انتى جيبانى المسافة دى كلها علشان تقوليلى انك اسفة
دمعت شيماء وهى بتقولها :
- انا عارفة انك شايلة منى جامد وعارفة ان الموضوع دا مر عليه وقت كبير بس انا....
قاطعتها ملك وهى بتقول بسخرية ومرارة :
- الموضوع دا مر عليه وقت كبير بس انا لسه حاسه بالوجع والخيانة منك، انتى عارفة يعنى ايه صاحبتى اللى مكنتش بحب قدها حتى كنت بحبك اكتر من هشام ترتبط بيه وانتى اكتر واحدة عارفة ان انا بحبه
بصتلها بدموع وهى بتقول :
- انا عارفة والله انتى حسيتى بإيه علشان انا مريت بنفس اللى انتى مريتى بيه
بصتلها ملك بتركيز وهى مستنية تكمل كلامها لحد ما قالت شيماء بحزن :
- بعد ما سبت هشام لانى اكتشفت انه بيحبك انتى من كتر ما كان بيغلط فى اسمى و ينادينى بإسمك، بعدها بفترة قابلت واحد واتخطبتله وحبيته لدرجة العشق بس فجأه اتصدمت لما لقيته خانى مع واحدة انا معرفهاش وبكل بجاحة بيقولى انه حبها هى
دموعها نزلت وكملت بندم :
- بعدها على طول حسيت باللى انتى حسيتى بيه وعلشان كدا كان لازم اجى اعتذر
ضحكت ملك بوجع وهى بتقول :
- بس اللى انتى مريتى بيه مش زى اللى انا مريت بيه
بصتلها شيماء بعدم فهم وكملت ملك :
- البنت اللى خطيبك خانك معاها انتى مكنتيش تعرفيها، انما انا كنت صحبتك لسنين طويلة واكلنا مع بعض عيش وملح، بجد ماكنتش متوقعة الغدر منك ابدا
بصت فى الارض ودموعها نزلت بندم وملك قالت :
- اذا كان على المسامحة فامتقلقيش، انا سامحتك من زمان علشان انا قررت انى اخرجك من تفكيرى زى ما انتى خرجتينى من حياتك
كانت هتقوم بس برقت بصدمة لما سمعت هشام بيقول من وراها بعدم تصديق :
-هو الكلام دا بجد
سكتوا الإتنين وهشام قال لشيماء :
- انتى كنتى عارفة انها بتحبنى وانتى بتعترفيلى بحبك
بصتله شيماء بإحراج وندم وهى بتقول :
- انا كنت وقتها بغير منها
ضحك بصدمة وملك غمضت عيونها بوجع بس فتحتهم تانى وقامت بسرعة من مكانها وخرجت برا
بص هشام على شيماء بقرف وقال :
- انا مش مصدق انى جرحتها زمان علشان واحدة زيك
مشى وسابها وخرج ورا ملك ومسكها بسرعة قبل تركب عربيتها، زقته بغضب وقالت بعصبية :
- سيب ايدى
بصلها بحزن وهو بيقول :
- انا والله ماكنتش اعرف اى حاجة
زقته جامد وهى بتقول :
- سواء كنت تعرف او متعرفش دا ميهمنيش
ركبت عربيتها من غير ما تبص عليه وساقت بسرعة، بص على اثرها بحزن وراح علشان يركب عربيته وهو بيقفل موبايله بضجر لما لقى ان رغد بترن عليه
نزلت من عربيتها واعدت قدام البحر وهى بتقول بسخرية ووجع :
- كل واحد يإذينى شوية وبعدين يجى يعتذر منى
طلعت موبايلها وبصت على صورة باباها وهى بتقول بحزن :
- الله يرحمك يا بابا كنت انت الوحيد اللى بتهون عليا
اتنفست بعمق وهى بتقول :
- انت ربتنى على انى اكون قوية وهفضل طول عُمرى قوية، ضحكت بصوت عالى على نفسها وهى بتقول :
- سبحانه الله دكتورة نفسية ومحتاجة لدكتور نفسى علشان يعالجها.