رواية ساعرفهم من انا
الفصل الثالث3
بقلم ايه الموافي
كان خارج من الشركة و لسه كان هيركب عربيته بس سمع واحدة بتعيط قريب منه
راح بإستغراب ناحية الصوت لقى واحدة واقفة جنب عربيتها و مش مبطله عياط
ابراهيم بلطف و هو بيمدلها المناديل : القمر بيعيط ليه
سوزى بشهقات : علشان كوتش العربية نام
ابراهيم بضحك : نام نوقفه تانى عادى، مش مستهلة يعنى كل البكا دا
سوزى و هى بتمسح دموعها : اصل مافيش حد معايا علشان يصلحهالى و مش هينفع اقول لبابى علشان يعرف انى بعرف اعتمد على نفسى
ابراهيم بضحك على منظرها : خلى بالك الكحل ساح على وشك
شهقت بفزع و هو كمل بغمزة : وبالنسبة يا ستى لكاوتش العربية فا انا بعمل ايه هنا
بصتله ببراءة و هى بتبربش خلته يضحك اكتر و هو بيقول : معاكى المعدات و الكاوتش الاستبن اللى هنحطه بدل اللى نام
دموعها زادت و هى بتقول : لأ
وقف قدامها و قال بإبتسامة : يبقى خلاص تعالى اما وصلك فى طريقى بقى و امرى لله
سوزى ببراءة : طب و العربية
ابراهيم بضحك : اكيد يعنى مش هسرقها، متقلقيش انا هكلم واحد معرفه يجى يغير الكوتش و بصى كدا
شاور على شركته و قال : و دى شركتى يعنى متخافيش محدش هيقدر يسرقها لانى هوقفلك الامن مخصوص قدامها علشان ميجرلهاش خاجة
سوزى بإمتنان : انا بجد مش عارفة اشكرك ازاى
ابراهيم بإبتسامة : ولا تشكرينى ولا اشكرك قدامى يالا على العربية
- مشت قدامه و هى بتبتسم بشكر، فتحلها باب العربية و هى ركبت و ركب جنبها من الناحية التانية
ابراهيم و هو بيسوق : بس مقولتيش اسمك ايه
سوزى برقة : اسمى سوزى
ابراهيم بغزل : ما هى القطة الناعمة دى ميلقش عليها غير الاسامى اللى زى اسمك
سوزى بغضب : انا مش قطة
ابراهيم بضحك : هكدب لو قولت غير كدا
بصت عليه بغيظ وودت وشها الناحية التانية
.........................**************......................
أدهم بحماس : هى اتأخرت ليه
ملك بتأفف : هفضل كل شوية اقولك فى الطريق، ماتفصل بقى
أدهم بغيظ : لو تبطلى برودك دا شوية
سكت لما سمع صوت خطوات رقيقة جاية ناحيتهم، وسع عيونه بصدمة لما شاف الملاك دا قدامه
بيرى بهدوء : ازيك يا ملك
ملك : الحمد لله، عملتى اللى اتفقنا عليه
بيرى ببرود : اه متقلقيش كل حاجة تمام
ضمت حواجبها بإستغراب لما لقت اللى واقف قدامها بيبصلها ببوق مفتوح
ملك بيأس : دا أدهم اللى قولتلك عليه
هزت راسها بعدم اهتمام و هو مد ايده بإبتسامة بلهاء و قال :
انا أدهم خطيب ملك المؤقت اتشرفت بيكى
بصت على ايده بعدم اهتمام وودت وشها الناحية التانية، ضحك بعدم تصديق و حمحم بإحراج و غيظ و هو بينزل ايده
ملك : انتى واثقة فيها
بيرى : متقلقيش انا جربتها قبل كدا و كانت قد المسئولية
أدهم بتطفل : انتى ماقولتليش انتى عايزة تنتقمى ليه
بيرى ببرود : ودا يهمك فى ايه
أدهم ببرطمة و ضجر : سبحانة الله .. نفس البرود و الاستفزاز و اللسان الطويل
ملك بتوعد : هنبتدى فى رغد امتى .. خلى بالك هى صفرا مش سهلة زى ابو ريالة التانى
بيرى بإبتسامة جانبية : متقلقيش .. فاتهم اتعرفوا خلاص
......................***************........................
ابراهيم بزهول : دا بيتك
سوزى بضحك : حرام عليك بقى كل دا و يبقى اسمه بيت اومال القصر بقى يبقى اسمه ايه
ابراهيم بضحك : عندك حق
سوزى و هى بتنزل : دا الكارت بتاعى ليك عندى عزومة على جدعنتك معايا
ابراهيم بتكشيرة : هو انا عملت حاجة يا بنتى، اى حد فى مكانى كان هيعمل كدا
سوزى برقة : علشان خاطرى، اصل بصراحة كدا انا عايزة اتعرف عليك علشان شكلنا هنبقى اصحاب اوى
ابراهيم بضحك : ماشى ياستى اللى تشوفيه
سوزى بتحذير : هتتصل بيا اوعى تنسى
ابراهيم بإبتسامة : لا متخافيش طالما انا قولت ماشى يبقى هنفذ وعدى
نزلت و قفلت الباب و هو بص على الكارت بخبث و نطق اسمها بتلذذ : سوزى عبد العاطى
مصممة ازياء
ابراهيم بمكر : فريسة جديدة حلو دا
.......................*************.........................
كانت ماشية و هى بتفكر فى اللى هتعمله علشان تعرف تكس..رهم بس صرخت بفزع لما لقت العربية اللى قدامها فرملت على آخر لحظة
رغد بخضة و عصبية : انت متخلف يابنى ادم انت
هشام بعصبية : مين فينا اللى متخلف برضو انا ولا انتى
رغد بشهقة : انت بتقول عليا انا متخلفة
هشام بسخرية و هو بيبص حواليه : و هو فيه حد هنا واقف غيرك
رغد بغضب و صوت عالى : اه ماتلاقى امك اللى جايبهالك علشان كدا ماشى تدوس على خلق الله
هشام ببرود و إستفزاز : يعنى مش انتى اللى كنتى ماشية سرحانة فى نص الطريق تؤتؤ انا اللى ماشى ادوس على خلق الله
رغد بصريخ : دا انت مستفز
هشام ببرود اعصاب : براحة على نفسك ليطقلك عرق ولا يجيلك جلطة و تنامى فى السرير
رغد بصدمة : ايه
ركب عربيته بإستهزاء و قبل مايمشى فتح ازاز العربية و قال بإستفزاز : ابقى خلى حد كبير يمشى معاكى علشان متعمليش حدثة فى الطريق يا كوكو
ساق عربيته و هو بيضحك بتسلية لما فقدت السيطرة على نفسها و فضلت تشتم فيه