رواية حب في مهمة رسمية
الفصل الثاني والعشرون22
بقلم ايه الموافي
كيان بصدمه: ايه بتحبني؟
غسان بتنهيده:
- اه يا كيان بحبك
كيان بصدمه: امتى واز ي
غسان باستغراب:
- هو ايه ده اللي امتى وازاي
كيان بصدمه:
- امتى حبيتني وازاي
غسان بإستغراب:
- هو انتي مصدومه كده ليه؟
كيان بتوتر:
- اصل انا متوقعتش بصراحه انك في يوم من الايام هتقولي كده، هو انت بتتكلم بجد يا غسان
غسان:
- هي الحاجات دي فيها هزار يا كيان!
كيان: اشمعنا انا
غسان باستغراب: اشمعنا انتي ايه؟
كيان: اشمعنا انا اللي حبتني
غسان: الحب يا كيان مفيهوش اشمعنى انت اللي حبتني، القلب هو اللي بيختار حبيبه وانا قلبي اختارك انتي يا كيان
لاحظ غسان توهانها فمسك ايدها وقال:
- انا بحبك يا كيان مش بشفق عليكي، انتي اللي خليتي قلبي اللي عمره ما دق لحد يدق ليكي، انتي اللي انا اتمنيت اعيش معاها باقي حياتي، تقبلي يا كيان تشاركيني حياتي وتعيشي باقي عمرك كله معايا؟
بصت كيان للفراغ بشرود وهي مش مصدقه اللي سمعته ولما طال صمتها قال غسان بقلق:
- مردتيش عليا ليه يا كيان؟
- كيان بخوف: مستحيل يا غسان
غسان: هو ايه ده اللي مستحيل يا كيان؟
كيان: مستحيل اللي انت بتفكر فيه ده انا هفضل طول عمري عايشه لوحدي
كانت كيان هتخرج بره الاوضه بس غسان مسك دراعها وقال بعدم فهم:
- ايه الكلام اللي انتي بتقوليه ده يا كيان؟
كيان: بقول اللي انت سمعته انا هفضل طول عمري لوحدي انت فاهم يا غسان
غسان بعصبيه:
- لو انتي مش عايزاني قولي انما متقوليش الكلام الاهبل ده هو ايه اللي عايزه تعيشي طول عمرك لوحدك انتي بتتكلمي بجد ولا بتهزري
كيان: لا بتكلم بجد يا غسان
بصلها غسان بصدمه وهو مش مصدق اللي هي قالته وكيان دموعها نزلت على خدها وقالت:
- انا مش هتعلق بحد تاني وفي الاخر يسيبني ويمشي، انا كنت متعلقه بماما وبابا اوي وفي الاخر مشوا وسابوني لوحدي في الدنيا دي انا معنتش هقدر استحمل مراره الفراق ابدا يا غسان
غسان بصدمه:
- انتي مقتنعه باللي انت بتقوليه ده يا كيان! الاعمار بيد الله واللي انتي بتقوليه ده بيدل على قله ايمانك
كيان بدموع و هي بتهز راسها:
- لا يا غسان انت مش هتقدر تقنعني اتعلق بيك انت ما جربتش كسره الفراق ويعني ايه ظهرك وسندك في الدنيا دي يسيبك ويمشي مره واحده كده انا متوقعتش ابدا ان ممكن اخسرهم من ساعه ما ابويا وماما ماتو الله يرحمهم وانا بتمنى اني اروح ليهم انا حاسه ان مكاني مش في العالم ده انا مكاني معاهم
قرب منها غسان وقال:
- الكلام الاهبل ده تشيليه من دماغك خالص
كيان: انت مش فاهمني يا غسان وشكلك كده عمرك ما هتفهمني
غسان بحده:
- لا انا فاهمك يا كيان وفهمك كويس قوي ومستحيل اسيبك تدمري حياتك بالشكل ده انت فاهمه مش عشان تجربه قاسيه مريتي بيها تاثر على حياتك انت مش هتبقي وحيده يا كيان، ليان وبتول واروى جنبك وحواليك انا ظهرك وسندك في الدنيا دي وعمري ما هسيبك وبكره لما الايام تمر وتلاقي عيالك بيتنططوا ويلعبوا حواليكي هتحمدي ربنا على النعمه اللي اديهالك ويعوضك صبرك خير
كيان بخوف: لا انت كذاب مفيش حاجه من دي هتحصل انا لو اتعلقت بحد ثاني هيسيبني ويمشي ابعد عني
قرب منها غسان وقال:
- اهديي يا كيان
كيان بيزعيق ودموع:
- ابعد عني
كانت هتخرج بره بس غسان وقفها وقال ببرود:
- خليكي هنا انا اللي هخرج
ادالها ضهره وكان هيخرج بس وقف مكانه وقال:
- على فكره يا كيان مش انتي لوحدك اللي خسرتي اغلى اتنين في حياتك، انا ما اعرفش شكل امي لحد انهارده عامل ازاي، انا امي ماتت وهي بتولدني الله يرحمها وابويا كان رجل اعمال فكان كل شويه بيسافر ومكانش ينفع ياخدني معاه عشان دراستي وعشان متشتتش معاه في كل حته لانه كان بيسافر كذا بلد مش بلد واحده ولما كبر مبقاش يقدر يسافر في كل حته
انا كنت وقتها شاب كبير بس كنت فرحان زي الطفل الصغير ان اخيرا هيقعد مع ابوه اطول وقت ممكن وهيعوضني عن غيابه الكتير عني بس للاسف حلمي مدامش لان ربنا استرد امانته
دمعت عيون غسان وقال:
- انا مفتقد حنين الاب والام يا كيان
مسح دموعه وقال ببرود: خليكي فاكره ان انتي اللي اخترتي البعد يا كيان
خرج غسان من الاوضه وكيان دموعها فضلت تنزل لحد ما اعدت على السرير وفضلت تعيط بانهيار وهي بتفكر في كلامه
• عند اروى
قام اسر من النوم ولقى اروى طلبت الفطار وقاعده مستنياه، اسر باستغراب:
- انتي صاحيه بدري انهارده ليه؟
اروى:قوم بس نفطر الاول، انا طلبتلك الفطار اللي انت بتحبه وجبت كمان عصير الليمون اللي انا بشوفك بتشربه كتير
قام اسر من على السرير وقال:
- ده ايه الدلع ده كله، من امتى وانتي كده؟
اروى: ولا دلع ولا حاجه انا قلت بس ان احنا احتمال نموت النهارده فندلع نفسنا شويه
اسر بقرف: ده انت بومه، في حد يقول كده على الصبح
اروى: مش بقولك اللي فيها اكذب عليك يعني؟
اسر بغيظ: لا متكذبيش يا بومه، اللي انا اعرفه ان الواحده بتقول لجوزها صباح الخير صباح النور قوم يا حبيبي من النوم، مش احتمال نموت انهارده، ايه يا بت الاصطباحه دي
اروى بغيظ: انا غلطانه اعد بقى عشان نطفح
اسر بقرف: نطفح! اصطبحنا وصبح الملك لله يا رب
اروى باستنكار: وبعدين ايه قوم يا حبيبي دي؟ بقولك ايه محن على الصبح مش عايزين
اسر وهو بيعض على شفايفه من كتر الغيظ:
- لولا ان مينفعش امد ايدي على بنت كان فاتي موريكي اسود ايام حياتك مع اني اشك انك بنت بصراحه
اروى بشرشحه:
- نعم يا حيلتها؟ ده انا ست الستات كلهم يا..
حط اسر ايده على بوقها وقال بقرف:
- اقفلي الباكابورت اللي طفح علينا ده على الصبح
اروى بغيظ: تصدق يا اسر انا غلطانه اني جبتلك فطار معايا
اسر بقرف: انتي كمان كنت عايزه تجيبي لنفسك فطار وانا لا
اعدت اروى على الكنبه ببرود وقالت:
- وفيها ايه يعني؟
اسر بغيظ: لا مفيهاش حاجه بس ابقي افتكري بس
اروى ببرود: متقلقش مبنساش حاجه انا
اعد اسر جنبها وبص لطبق الفطار بتاعهاؤ اروى باستغراب:
- في ايه؟
اسر: بقولك ايه
اروى باستغراب: ايه؟
اسر: ما تيجي نبدل الفطار بتاعنا، اصل بصراحه كده انا زهقت من الفطار ده عشان بقيت باكله كل يوم تقريبا وعايز اغير
اروى: لا
اسر بغيظ: يا بت متبقيش تنحه كده
اروى ببرود: والمقابل ايه؟
اسر بغيظ: انتي عايزه مقابل
اروى: اه اومال يعني هتنازل عن طبق الفطار بتاعي من حبي فيك ولا عشان سواد عيونك
اسر وهو بيجز على سنانه:
- صدقيني هيجي يوم واقصلك لسانك الطويل ده
اروى: طب عشان كلامك ده بقى منيش عطياك حاجه
اسر بغيظ: مش عايز منك حاجه
اروى ببرود: احسن وفرت
بص اسر باستغراب ورا اروى فبصت هي كمان باستغراب بس اتصدمت لما لقيته مسك طبق الفطار بتاعها وجرى بيه، قامت اروى بصدمه وقالت بشهقه:
- اه يا حرامي
اسر بغيظ:
يا بت احترمي نفسك
اروى بغيظ:
- هات بقى الفطار بتاعي
اسر ببرود: لا
جرت اروى وراه واسر جري في الاوضه وهو بياكل من الطبق بتاعها بسرعه، اروى بصدمه:
- انت خلصت الاكل بتاعي كله
اسر باستفزاز :
- الله اكبر في عينك، قوليلي بالهنا والشفا
اروى بعصبيه: والله
كانت لسه اروى هتكمل كلامها بس افتكرت اللي عملته فابتسمت بخبث وقالت:
- ابلع بقى اللي انا عملته
اسر باستغراب من ابتسامتها الخبيثه ومن كلامها:
- قصدك ايه مش فاهم حاجه
سمعوا صوت خبط على الباب فبلعت اروى ريقها بخوف وقالت:
- افتح الباب
اسر باستغراب: ده مين ده
اروى بتوتر: ما انت لو فتحت الباب هتعرف
اسر بشك وهو بيضيق عينه:
مش عارف ليه انا حاسس اني مش مطمن بصت اروى الناحيه التانيه بتوتر وهو راح عشان يفتح الباب، استغرب اسر لما لقى واحد في سنه تقريبا واقف قدامه، اسر باستغراب:
- انت مين؟
الشاب: انا معايا طرد للمدام اروى
اسر باستغراب: طرد ايه ده؟
الشاب: شويه منتجات عنايه بالبشرة بص اسر على اروى وقال:
- انتي طلبت حاجه
اروى بتوتر: اه
اخذ اسر الشنط من الشاب وقال:
- شكرا
كان لسه اسر هيقفل الباب بس رجعه تاني وقال:
- اه صح الحساب كام؟
الشاب: الفين جنيه يا فندم
اسر بصدمه: كام
الشاب: الفين جنيه
بص اسر على اروى بغيظ وقال للشاب:
- استنى اما ادخل اجيب الفلوس
جاب اسر الفلوس من المحفظه بتاعته وهو بيبص لاروى بغيظ، دفع الفلوس للشاب وقفل الباب وبص عليها بغيظ وقال:
- الفين جنيه مرة واحدة يا اروى
اروى وهي بتبلع رقيها: اه مش خسارة فيا
اسر بغيظ: وحياه امك
اروى بتوتر: ما الحاجات دي ضروريه اجيب منين يعني الله، هو انا قاعدالكم على بنك
اسر بغيظ: لا انا اللي قاعد على بنك
اروى: ما انت ظابط وما شاء الله فاتك بتاخد على قلبك قد كده
اسر بغيظ: الله اكبر من عينك
اروى ببرود: وكمان فيها ايه يعني دول الفين جنيه؟ عادي لما المهمه دي تخلص واخد المكافاه اللي اللوا راجح هيديهلنا هديهملك بالتمام والكمال
اسر بغيظ: انا مشوفتش في بجاحتك بصراحه، وكمان دلوقتي لما المهمه دي تخلص، مش من شويه احتمال نموت؟ طب افرض انتي موتي دلوقتي مين هيدي لي الالفين جنيه
اروى بشهقه: انت بتفول عليا؟ بعد الشر عليا ان شاء الله اللي يكرهني يا رب
اسر بغيظ: بت انتي برج الجوزاء؟ اصل انتي مش طبيعيه والله هتجننيني
اروى ببرود: بقول لك ايه يا عم انت مش انت دفعت الفلوس خلاص متصدعناش بقى
اسر بصدمة: ايه يا بت التناحه اللي انتي فيها دي؟ وكمان انا نفسي اعرف حاجه الفين جنيه ايه اللي عناية بالبشره ليه؟
اروى: ده انا كده موفرة
اسر بصدمة: نعم
اروى: انت تعرف الغسول بقى دلوقتي بكام؟
اسر بغيظ: انا داخل اخد دش قبل ما ميجرالي حاجة
اروى: استنى
اسر: ايه تاني؟
مسكت اروى شنطه من الشنط اللي اسر حطها على الارض وطلعت منها علبه وقالت:
- خد ده ليك
اسر باستغراب: ايه ده؟
اروى: وانا بجيب حاجات لنفسي قلت اجيبلك معايا حاجة، انا جبتلك شاور چيل رجالي عشان لاحظت ان بتاعك خلص
ابتسم اسر واخذوه منها وهو فرحان عشان افتكرته بحاجه وهي بتجيب لنفسها، اسر:
- شكرا
اروى بصدمه:
- ايه ده
اسر باستغراب: ايه؟
اروى: انت بتشكر زينا كده
ضحك اسر وقال:
- هو حد قالك ان انا من الفضاء ولا ايه؟
اروى: مش قصدي بس انا متخيلتكش بتشكر بصراحه
اسر: لا انا بشكر وبعتذر كمان عادي
اروى: بقولك يا اسر
اسر: ايه
اروى: هو احنا بعد ما نتطلق هنبقى اصحاب ولا كل واحد مش هيعرف التاني؟
بصلها اسر من غير ما يتكلم وهو مش عارف اتضايق ليه اول ما جابت سيره الطلاق
اروى باستغراب: انت ساكت ليه؟
اسر: خلينا منسبقش الاحداث
بصتله اروى باستغراب وهو قال:
- شكرا للمره الثانيه على الهديه دي
داخل اسر الحمام واروى قالت باستغراب:
- هو ماله ده؟
• عند غسان
كان قاعد قدام البحر وهو حاسس بخنقه من اللي كيان قالته، دموعه نزلت لما افتكر الكلام اللي قاله ليها عن ابوه وقال بحزن:
- وحشتني اوي يا بابا بالرغم من انك على طول كنت بعيد عني
حس بحد بيقعد جنبه فلقاها لارا، لارا:
- هو باباك ميت؟
غسان بضيق: خرجتي ليه من غير ما تقوليلي؟
لارا بضيق: عشان انا مش عيله صغيره شكل ابويا لحد دلوقتي مش مقتنع ان انا قربت على التلاتين
بص غسان قدامه ومردش عليها ولارا قالت بحزن:
- بتوجع عارفه
غسان باستغراب: هي ايه؟
لارا بدموع: فراق الام والاب
غسان: هي مامتك متوفيه؟
لارا بدموع: اه
غسان بحزن: اسف عشان فكرتك
مسحت لارا دموعها وقالت:
- لا ولا يهمك انا كده كده فاكراها
غسان: محدش بينسى شخص عزيز على قلبه
لارا بدموع: فعلا وخصوصا لو كان الشخص ده حد ميتعوضش
غسان: كل ما تحزني عشان مامتك افتكري ان في ناس محرومه من الاثنين
لارا: تقصد ايه؟ تقصد ان عندي بابا يعني؟
غسان: اه، حاولي تشبعي منه عشان لو حصل اي حاجه
كان غسان يقصد وانهم لما يقبضوا على باباها مش هتعرف تشوفه مره ثانيه، لارا بسخريه:
- انا عندي اب بس معنديش اب
بصلها غسان باستغراب وهي قالت:
- انا عمري ما جربت حضن ابويا، فريد الابوه بالنسبه ليه هي انه يبعتلي فلوس على الكريكت كارد كل اول شهر وخلاص، انما يسالني صرفتهم في ايه عامله ايه في حياتي، عمره ما عملها، وعشان ضميره يريحه شويه يجيبلي حارس شخصي ويريح دماغه عشان ميتعبش من السؤال عليا
بص غسان قدامه وهو بيقول في عقلي باله ان حتى لارا جواها شرخ صعب يتلم بالرغم ان مش باين عليها اي حزن، بصلها تاني وقال:
- هو انت ليه عايزه تدخلي في مجال الشغل بتاع باباكي؟