الفصل الاول1
بقلم ايه الموافي
الظابط حاتم بقرف: يعني هو احنا كنا ناقصين قرار زي ده
غسان بغيظ: عندك حق، انا لحد دلوقتي مش مصدق، بقى انا الظابط غسان على اخر الزمن ادرب بنات
اسر بغيظ: انا اللي غايظني اكتر ان اول ما القرار ده نزل بنات كتير اوي قدمت وزي ما يكون ما صدقوا
حاتم: انا مش عارف انا ايه القرف ده، ما يتهدوا ويعدوا في البيت وخلاص لازم يعني يقرفونا معاهم
انضم لؤي ليهم وقال بقرف: يلا عشان البنات وصلوا
حاتم: اما نشوف اخرتها
راحوا لساحة التدريب وغسان قال:
- كل واحدة تعرف عن نفسها
ليان: انا ليان
بتول: وانا بتول وعندي خمسة وعشرين سنة ومتخرجة من كلية حاسبات ومعلومات وبينادوني ب
لؤي: بااس خلاص، ايه كل ده، هي واحدة تقول اسمها بس وكإن الكلام بفلوس والتانية مفيش عداد على لسانها
بتول: مش بعرف عن نفسي
ليان: هما الرجالة كده، مبيعجبهومش العجب
غسان: اه ابتدينا
كيان: وانا اسمي كيان وعندي خمسة وعشرين سنة
اروى بإبتسامة بلهاء: وانا اسمي اروى
اسر: انتي مالك فرحانة كده ليه
اروى: عشان هتجند
اسر بسخرية: انتي محسساني انك في حنة خالتك
اروى: لا في حنتك انت
اسر بحدة: نعم!!
كتمت البنات ضحكتهم بصعوبة واروى قالت بتوتر:
- قصدي يعني لما تتجوز ان شاء الله في حنتك هبقى ابتسم كده
اسر: شكلنا كده مش هنسلك مع بعض
اروى: انا عن نفسي سالكة شوف انت نفسك بقى
كيان بهمس: قصري لسانك ده شوية، ده مش واحد من الحارة هتبجحي معاه ده ظابط يا هبلة
اسر بحدة: بتقولوا ايه
كيان بخوف: مبقولش
وقف اسر قدام اروى وقال:
- قصدك يعني اني مش سالك صح؟
اروى بتوتر: لا طبعا متقولش على نفسك كده، ده انا بهزر عشان ايامنا هنا تبقى لوز
اسر: خلي بالك انا حطيتك في دماغي
اروى بتوتر: طب خرجني بقى عشان دماغك ضيقة ومش عارفة اخد نفَسي، هههه
بص اسر عليها بقرف وبعد عنها، حاتم:
- انا عايز اعرفكم الاول حاجة، بما انكم جيتوا هنا وعاملين فيها اندربيندت وومان استحملوا بقى اللي هتشوفوه عشان انتوا هتتعاملوا هنا زي ما بنعامل الرجالة بالظبط
ليان ببرود: طب انطقها صح الاول يا حضرة الظابط
حاتم بغيظ: ونطقها ايه يا مثقفة يا ام العريف
ليان: اسمها اندبيندت وومان مش اندربنديت وومان
حاتم: انتي قولتيلي اسمك ايه؟
ليان: محسوبتك ليان
حاتم بقرف: محسوبتك، طيب يا ليان متقاطعنيش بعد كده عشان متتعرضيش للعقاب
ليان: بس انت كنت خلصت كلامك
حاتم بغيظ: متتكلميش خالص احسن
ليان ببرود: حاضر
لؤي: انا هعرفكم بينا وبالنظام بتاعنا عشان احنا الغلطة عندنا بعقاب شديد، انا الظابط لؤي، وده الظابط غسان واسر وحاتم، التدريب هيبقى كل يوم من الساعة خمسة الصبح لحد
كيان بصدمة: خمسة الصبح!! ليه هنبيع لبن
لؤي بحدة: طول ما انا بتكلم حطوا لسانكم جوه بوقكم
حطت كيان ايدها على بوقها وهو قال:
- التدريب من الساعة خمسة الصبح لحد الساعة عشرة
بتول بصدمة: خمس ساعات تدريب ليه
بصلها لؤي بحدة فسكتت،لؤي:
- والفطار هيكون بعد التدريب وهيبقى في استراحة بسيطة وبعدين هيبقى في منافسات والتدريب على القضاء على العدو
اسر: انا بس عايز اعرفكم ان الموضوع مش زي ما انتوا مفكرين، ده انتوا هتتمرمطوا مرمطة
اروى بغيظ: انا حاسة انك فرحان فينا
اسر: لا انا مش فرحان، انا شمتان وخصوصا فيكي انتي من اللي هيحصلك
بتول بهمس: هو احنا اتسرعنا لما جينا هنا ولا ايه
ليان: اتكلمي عن نفسك
غسان: العسكري ابراهيم هيوصلكم للاوضة اللي هتعدوا فيها طول ما انتوا هنا، ناموا بدري عشان خمسة بالظبط لو مجتوش هتتعاقبوا
بتول ببرطمة: هو كل حاجة عقاب عقاب
لؤي: بتقولي حاجة يا انسة بتول
بتول: لا مبقولش
حاتم بصوت عالي: يا عسكري ابراهيم
ابراهيم: امرك يا فندم
حاتم: خد البنات على اوضتهم
ابراهيم: تمام يا فندم
كانت اروى هتمشي بس اسر وقف جنبها وقال:
- افتكري اللي قولتهولك
بلعت ريقها بتوتر وراحت معاهم، العسكري ابراهيم:
- دي الاوضة بتاعتكم
دخلوا جوه وليان قالت:
- استعدوا يا بنات عشان احنا هنشوف اسام سودة
اروى بغيظ: انتي بتشجعينا ولا بتخوفينا
ليان: الله، مش بقولكم الحقيقة
بتول بغيظ: انا من رأيي انك تسكتي خالص يا ليان
كيان: انا بقول نتخمد عشان احنا نومنا تقيل ولو مصحيناش هيتعمل معانا الصح
بتول: انا مش مصدقة لحد دلوقتي اننا هنصحى خمسة الصبح، ده انا ما صدقت اني عالجت الهالات اللي تحت عيني
ليان بغيظ: هالات ايه دلوقتي يا حبيبتي ده احنا هيتعمل مننا شاورما اسكتي بالله عليكي
اروى بغيظ: وكمان انتي مسكتي في مدة الصحيان وممسكتيش في مدة التدريب، ده بيقول خمس ساعات
بتول بصياح: اه ياني يا اما، لا وايه، المصيبة انه بيقول ان في استراحة صغيرة بعد الفطار وهنكمل تاني
كيان: هارسوح، لا الغي رحلتشي انا مروحة البيت
ليان بغيظ: بمزاج امنا هو صح؟
كيان بغيظ: انا بقول تسكتي خالص زي ما الظابط الرخم ده قال عشان انتي السبب في اللي احنا فيه
ليان بصدمة: انا
اروى: اه يا اختي انتي، مش انتي اللي اعدتي تزني فوق دماغنا لحد ما وافقنا
ليان ببرود: اديكي قولتي اهو، وافقتم يعني انا مضربتش حد على ايده
اروى بغيظ: امسكوني عشان مجيبهاش من شعرها
ليان: انتي متقدريش اصلا يا حبيبتي
اروى: متخليهاش تطق في دماغي يا ليان وانتي عارفة كويس اوي اني ولية قادرة واعملها
ليان: على نفسك يا حبيبتي مش عليا
اروى: لا عليكي يا حبيبتي، تعالي كده
شدوا الاتنين شعور بعض فحاشت بتول ما بينهم وقالت:
- في ايه يا بنات اهدوا احنا صحاب مش كده
زقوها من غير ما يقصدوا فوقعت على الارض، كيان بزعيق:
- هو انتوا عيال صغيرة عشان تشدوا في شعور بعض
ليان: تصدقي عندك حق
اروى: انا بقول كده برضو
عضت اروى ليان فصرخت بوجع، ليان:
- بقى كده، ماشي يا اروى
شدتها ليان من شعرها وكانت لسة هتعضها بس سمعوا صوت خبط جامد على الباب سابوا بعض وكيان فتحت ولقته الظابط لؤي، لؤي بحدة:
- صوتكم عالي ليه منك ليها
اروى بخوف: متشغلش بالك انت يا حضرة الظابط
لؤى بحدة: لو صوتكم علا تاني انا هخلي كل واحدة تعد في الحجز الانفرادي، مفهوم
ليان بخوف: مفهوم يا باشا
لمح لؤي بتول وهي قاعدة على الارض وبتعيط، لؤي:
- في ايه
بتول بدموع: مفيش
اعد لؤى قدامها وقال: لا في، هو في حد من البنات دي عملك حاجة
هزت بتول راسها فقال لؤي بحدة:
- انتوا عملتوا فيها ايه
اروى بخوف: والله يا باشا ما عملنالها حاجة
لؤي: اومال هي بتعيط ليه؟ اكيد يعني مش هتعيط من نفسها
ليان: والله يا باشا ما نعرف هي بتعيط ليه
لؤي: انجزي وقولي انتي بتعيطي ليه
بتول بدموع: لما اروى وليان كانوا بيتخانقوا زقوني من غير ما يقصدوا فوقعت على ضفري واتكسر
لؤي: وبعدين
بتول: وبعدين ايه كده خلاص
لؤي بصدمة: انتي بتعيطي عشان ضفرك اتكسر
بتول بغيظ: انت عارف انا اعدت اهتم بيه قد ايه عشان يطول!
لؤي وهو بيجز على سنانه:
- انا هخرج دلوقتي حالا عشان لو مخرجتش هقل ادبي عليكي
بتول بخوف: لا انت محترم ومش هتقل ادبك
لؤي بغيظ: صبرني يارب
وقف وقال: كنتوا بتتخانقوا ها، في زريبة احنا مش في جيش
كيان: احم، غلطة ومش هتتكرر يا حضرة الظابط
لؤي: دي حاجة في صالحكم انتوا عشان لو اتكررت متلوموش الا نفسكم
خرج لؤي بره وبتول قالت بغيظ: رخم اوي
بلعت ريقها من نظرات البنات ليها فقالت بخوف:
- بتبصولي كده ليه
ليان بغيظ: بقى بتقِري علينا وبتقولي اننا كنت بنتخانق
بتول بخوف: ما انتوا اللي زقتوني
اروى بغيظ: ما انتي اللي اتحشرتي بينا
بتول بغيظ: ما انا لو مكنتش اتحشرت كنا هنتعاقب كلنا
كيان بسخرية: على اساس ان هما مكانوش هيتعاقبوا بسببك
بتول بغيظ: ما انا ضافري اتكسر بسببهم
ليان: صبرني يارب على ما ابتلتني
اروى: انا هتخمد عشان اتنيل اصحى بكرة بدري مع اني مش عارفة هعملها ازاى دي
كيان: خديني معاكي
ليان: تصبحوا على خير يا بنات
كلهم: وانتي من اهله
• تاني يوم
بص اسر في ساعته وقال بخبث:
- انا كنت مستنيهم يتأخروا
غسان: انت هتعمل ايه
اسر بخبث: هعمل كل خير
دخل اسر الاوضة ومعاه جردل ماية ومرة واحدة كبوا عليهم وخصوصا اروى، صحوا بفزع واروى قالت:
- في ايه
اسر ببرود: الساعة جات خامسة وانتوا مجتوش
اروى بعصبية: يعني عشان احنا اتأخرنا تكب علينا ماية
اسر: احمدي ربنا اصلا اني عملت كده
اروى بعصبية: لا والله
اسر بحدة: وطي صوتك وانتي بتتكلمي، ده اولا ثانيا اقسم بالله لو بعد خمس دقايق ملقتكومش في ساحة المعسكر هكثفلكم التدريب
بتول بصدمة: خمس دقايق
اسر ببرود: عدى منهم دقيقة
قاموا بسرعة وفضلوا يجروا في الاوضة بخوف، خرج اسر بره وهما لبسوا هدومهم وخرجوا بره من غير حتى ما يغسلوا وشهم، راحوا المعسكر واسر قال:
- من حظكم ان كان لسالكم ثانية واحدة والخمس دقايق يعدوا
اروى بصدمة: هو انت بتحسب الوقت بالثانية
اسر ببرود: استعدوا يلا عشان هنبدأ
حاتم: انتباه
محدش عمل حاجة فقال حاتم بحدة:
- انتبااه
كيان بتوتر: انا حاسة ان المفروض نعمل حاجة بس مش عارفة ايه هي
غسان بغيظ: لما حد مننا يقول انتباه انتوا تحطوا ايدكم ورا ودنكم وتقولوا تمام يا فندم
بتول: حاضر عدوها تاني
حاتم بزهق: انتباه
كلهم في نفس الوقت: تمام يا فندم
العسكري ابراهيم: نجمع الرجالة المستجدة يا فندم
لؤي: اه جمعهم بسرعة قبل ما نبدأ
بتول بغيظ: اشمعنا هما يتأخروا عادي واحنا لا
لؤي ببرود: عشان هما اجوا بعدكم بتلت ساعات، فمش من العدل نعاقبهم
ليان ببرطمة: لا بس من العدل تكبوا علينا ماية صح
حاتم: بتبرطمي بتقولي ايه
مردتش ليان عليه فقال حاتم بغيظ:
- مبتتكلميش ليه
ليان: هو مش انت يا حضرة الظابط قولتلي اني متكلمش بعد كده
حاتم: لا وانتي بسم الله ما شاء الله اميرة وبتسمعي الكلام اوي
ليان: طبعا يا باشا
اجت الرجالة فقال غسان:
- في البداية كده احنا عايزين نسخن ونبدأ بخمسين ضغط
كيان بصدمة: كااام
غسان ببرود: خمسين ضغط
بتول: هو حضرتك شايفينا سوبر وومان واحنا منعرفش ولا ايه
غسان: مش انتوا عاملين فيها رجالة وبتدخلوا الجيش، قابلوا بقى
ليان بغيظ: على فكرة انا هشتكيك لجمعية حقوق المرأة
حاتم بسخرية: مش لو عرفتي تخرجي من هنا اصلا
ليان بخوف: قصدك ايه
حاتم: انا بقول نبطل رغي ويلا ابدأوا
اروى بتوتر: خمسين خمسين يعني، مينفعش خمسين الا اتنين ههه
اسر بقرف: لا انتي لو عايزة تخرجي من هنا على خير متخفيش دمك تاني
اروى بإحراج: احم، تمام يا باشا
لؤي: يلا ابدأوا
نزلوا كلهم على الارض وبتول قالت بغيظ:
- انا كان مالي ومال القرف ده بس يا ربي
لؤي ببرود: بطلي برطمة
بتول بغيظ: حتى البرطمة محرمينها علينا
فضلوا يعملوا ضغط لحد ما اجوا عند الرقم خمسة ووقعوا على الارض، حاتم بصدمة:
- يا حلاوتكم
ليان بتعب: التدريب ده صعب اوي
غسان بصدمة: صعب ايه هو احنا لسة اتدربنا
ليان: اصلا
حاتم بغيظ: طالما انتي خرعة كده داخلة الجيش ليه
ليان بصدمة: خرعة
حاتم بسخرية: انتي شايفة ايه
ليان بعصبية: انا مش خرعة
حاتم: لا انتي خرعة
ليان بعصبية: لا مش خرعة
حاتم: طب ما تثبتيلي العكس
ليان بتحدي: اثبتلك وماله
وقفت قدامه وقالت: عايزني اثبتلك ازاى
حاتم: اتحداكي تقفي على ايدك لمدة خمس دقايق
ليان بإستهزاء: كده بس
حاتم ببرود: ورينا يلا
همس غسان في ودنه وقال: البت مفيهاش عصب يا حاتم مش هتقدر تقف على ايدها دقيقة واحدة
حاتم ببرود: عارف
ليان بشك: بتقولوا ايه
حاتم ببرود: وانتي مالك انتي، روحي يلا اعملي اللي قولتلك عليه يا اللي عاملة فيها قادرة على التحدي والمواجهة
ليان بتحدي: اه قادرة وهثبتلك اهو
وقفت ليان على ايدها وقالت بخوف: يا مصبتي
خبطت ليان برجليها من غير ما تقصد على حاتم ووقعوا هما الاتنين على الارض، ليان بإحراج وهي بصاله:
- ممكن تعتبرني معملتش حاجة واجرب من تاني
حاتم بغيظ وهو على الارض:
- غوري من وشي بدل ما اعملها معاكي
قامت ليان بسرعة من على الارض وقالت بخوف:
- ده بيتحول