رواية مراتي طفله مجنونه
الفصل الثامن8
بقلم ايه الموافي
صحى كريم من النوم وهو مش طايق نفسه، خرج من اوضته وقال بقرف:
- هي الهانم لسة مصحتش
دخل اوضتها من غير ما يخبط بس اتصدم لما لقاها مولعة بخور وبتلف في الاوضة، كريم:
- انتي بتعملي ايه يا ولية انتي؟
ليلى: يلا بسرعة حضره معايا عشان الناس فاتها جاية
كريم بعدم فهم: احضر مين وناس ايه اللي هيجوا
ليلى: جرى ايه هو انت اول مرة تشتغل معايا ولا ايه، يلا اعمل زي ما اتفاقنا عليه
كريم: معلش ممكن اخد من وقت حضرتك دقيقة وتفهميني
ليلى بزهق: خلاص هحضره انا روح انت بس افتح باب الشقة عشان الناس
كريم: ايوه ناس مين بقى
ليلى بحدة: انجز وافتح الباب بدل ما اسيبه عليك
كريم بإستغراب: هو مين ده
ليلى: چامايكا
كريم بإستغراب: هو مين چاميكا ده
ليلى بزعيق: انت لسة هترغي معايا، روح يلا افتح الباب
اتخض كريم من زعيقها وخرج بره الاوضة وفتح باب الشقة وهو مش فاهم اى حاجة، دخلت واحدة من الباب وكانت هتدخل اوضة ليلى فقال كريم:
- استنى هنا انتي رايحة فين
عفاف بقرف: راحة للخالة نوسة
كريم بإستغراب: مين الخالة نوسة دي وليه بتبصيلي بقرف كده
عفاف بقرف: عشان كلكم زي بعض اتفوا
تفت عفاف في وشه ودخلت اوضة ليلى وكريم قال بصدمة:
- هي تفت عليا!!
دخل الاوضة وكان لسة هيشتمها بس استغرب لما لقى الست رابطة الطرحة حوالين دماغها وبتقول بندب:
- شوفتي يا خالة نوسة اللي حصل فيا
ليلى: حصل ايه يا اختي احكي
عفاف بإنفعال: الراجل الواطي، باعني عشان واحدة بلاستك، بقى انا اللي كنت صايناه وشايلاه طول العمر يرميني رمية الكليبابة عشان واحدة مزة
ليلى بقرف: اخص عليه راجل ناقص، متزعليش يا اختي حلك عندي
عفاف بفرح: بجد يا خالة نوسة
ليلى: وهو انا بقول حاجة ومبنفذهاش!!
عفاف: لا يا خالة حقك عليا مش قصدي
ليلى: في حلين، الحل الاول ارجع جوزك ليكي ويرمي البت اللي خانك معاها رمية الكليباه او اسيب عليهم هما الاتنين مايكل ويخلوهم ميعرفوش يناموا الليل من كتر الخوف
عفاف بلهفة: طب مينفعش الخيار التاني وبعدين ترجعي جوزي ليا
ليلى: انتي عايزة تربيه الاول
عفاف: اه عشان يعرف ان الله حق
ليلى: بس كده الميزانية هتبقى غالية حبتين
عفاف: ولا يهمك انا هبيع سيغتي وهديكي اللي انتي عايزاه
كريم: خلصتوا!! ممكن تفهموني بقى ايه اللي بيحصل ده
عفاف بقرف: انت تاني
ليلى: حاكم چامايكا عايز يسيب نفسه عليك وانا اللي مانعاه عنك بالعافية
كريم: مين چامايكا ده بقى
ليلى: جرى ايه يا بتاع انت هو انت نسيت چامايكا ومايكل العفاريت بتوعي
كريم بصدمة: عفاريت!! هي حصلت
عفاف: مش چامايكا بس والله يا خالتي اللي عايز يسيب نفسه عليه، انا ماسكة نفسي بالعافية وهموت وانزل الشبشب على دماغه
كريم بصدمة: وانا عملتك ايه دلوقتي يا ولية انتي
عفاف بقرف: عشان انتوا صنف عينه فارغة
كريم بشرشحة: جرى ايه يا ولية، هو عشان جوزك اداكي الصابونة وزحلقك هتشتمينا احنا؟ ما تتشطري عليه هو، وكمان بصراحة هو عنده حق ده انتي تقطعي الخميرة من البيت
عفاف بصدمة: انا بقطع الخميرة من البيت يا راجل يا عرة، طب وربنا ما انا سايباك
قلعت عفاف الشبشب بتاعها وجرت وراه، كريم وهو بيجري:
- انتي اتجننتي يا ولية انتي، مش كفايا عليا الولية التانية
الخالة نوسة: سيبيه يا عفاف ده الصبى بتاعي
كريم بصدمة: صبي!!
عفاف بقرف: عشان خاطرك انتي بس يا خالة
ليلى: يلا امشي بقى عشان انا ورايا حالات كتير اوي ووقتي ضيق
عفاف: حاضر يا خالة، متنسيش اللي اتفقنا عليه
ليلى: متقلقيش انا بعت مايكل هناك وبيقوم بشغله اهو
خرجت عفاف بره وكريم قال بخوف:
- هو انتي دجالة
ليلى: انت لسة هترغي، دخل الحالة اللي بعدها يلا بسرعة
دخلت ست وقالت: انا جيت على طول مش محتاجة حد يقولي
كريم بخوف من شعرها المنكوش: بسم الله الرحمن الرحيم
بصتله بحدة وقالت: في حاجة
كريم بخوف: ها، لا لا مفيش
ليلى: اتفضلي اعدي
اعدت الست وليلى قالت: بتشتكي من ايه؟
اشجان: انا مش عارفة اخلص منه
اشجان بصوت تاني: ومش هتعرفي تخلصي مني
انتفض كريم بخوف وقال: انتي ملبوسة ولا ايه يا ولية انتي
اشجال بصوت الراجل: متتكملش معاها بدل ما انهيك
ليلى: اه قولي كده، جن عاشق يعني
كريم بخوف: انتي ملبوسة بجد، اللهم احفظنا
اشجان بصوت الراجل: انا قولتلك ايه
حط كريم ايده على بوقه وفضل بترعش وليلى قالت:
- اطلع من عليها
اشجان بصوت الراجل: مش طالع
اشجان بصوت الست:
- متطلع بقى وتريحني بسببك بقيت عانس
ليلى: يعني مش هتطلع؟
اشجان بصوت الراجل: لا مش طالع
طلعت ليلى ازازة وقالت لاشجان:
- اشربي ده كل يوم لمدة اسبوع وادنهي مسك وبعون الله هيتحول ومش هيعرف يجيلك تاني
اشجان: ربنا يبارك يا خالة نوسة
ليلى: يلا طرقينا من هنا بقى
قامت اشجان وقال بفرح: اخيرا هخلص منك
اشجان بصوت الراجل: مش هسيبك يا اشجان
اشجان: يا اخي اتلهي
خرجت اشجان بره وكريم قام بسرعة وقال لليلى:
- ايه الهباب اللي انتي بتعمليه ده انتي مجنونة
ليلى بحدة: انت بتشتمني! شكلك كده عايزني اقلب عليك
كريم بعصبية: تقلبي ايه وزفت ايه هي حصلت يا ست هانم تجيبي واحدة ملبوسة هنا
ليلى: مش ده شغلي ما طبيعي
كريم بعصبية: شغلك ده تعمليه بره البيت مش هنا، ما كفايا انك مجنونة تبقى ملبوسة كمان هو انا ناقص
ليلى: لم نفسك بدل ما اسيب چامايكا عليك
كريم بغيظ: ده انا اللي هسيب نفسي عليكي اقسم بالله
دخل راجل الاوضة وقال:
- وحدوه
الاتنين: لا اله الا الله
اعد فتحي وكريم قال بغيظ:
- هي الشقة بقت مفتوحة لاي حد كده يدخل زي ما هو عايز
ليلى: خير انت بتشتكي من ايه
فتحي: بشتكي من قلبي
ليلى: ما تروح لدكتور وانا مالي انا
فتحي: لا مهو الحل عندك
ليلى: عندي ازاى
فتحي: انا مبنامش الليل بسببك
ليلى: بسببي!! هو انا عملتلك حاجة ولا اعرفك اصلا
فتحي: ما هي دي المشكلة
ليلى: بقولك ايه يا عم انت، انجز عشان انا خلقي ضيق وربنا يكفيك شر ما بقلب
فتحي: حيث كده بقى انا هدخل في الموضوع على طول، احم انا يشرفني ويسعدني اني اطلب ايدك في الحلال ونعيش مع بعض طول العمر ويبقى عندنا اولاد واحفاد
كريم بشرشحة: نعم يا اخويا!!!
فتحي: في حاجة يلا ولا ايه؟
كريم بصدمة: يلا! ولولوا عليك بدري يا شيخ
ليلى بعصبية: ششش اسكت
كريم بعصبية: اسكت ايه انتي مش سامعاه بيقول ايه
ليلى ببرود: انا مش قولتلك اسكت
جز كريم على سنانه بغيظ وليلى قالت:
- هو انت شايف ان المكان ده مناسب عشان تطلب ايدي فيه
كريم بصدمة: نعم!! هو ده كل اللي هامك
بصتله ليلى ببرود وفتحي قال:
- انت قارش ملحتي كده ليه يا اخويا
كريم: وانا هقرش ملحتك ليه يا اخويا، يلا امشي من هنا عشان مش فاضين للكلام الفارغ ده
فتحي: شوفتي يا نوسة الولا ده بيقول ايه
كريم بعصبية: ياض متخلنيش اقل منك
فتحي: احترم نفسك انا اكبر منك
كريم: اكبر مني ايه انت محسسني انك راجل كبير
فتحي: انا قصدي اني اكبر منك في المكانة
كريم: تقصد ايه
فتحي: انت هنا صبي الجامدة اللي قاعدة دي وبس ملكش دعوة بأي حاجة تانية
كريم بعصبية: جامدة، طب تعالي بقى اما اوريك
ضربه كريم بالبوكس وليلى قالت:
- انت اتجننت
قام الراجل وقال: عشان خاطرك انتي يا نوسة انا هردله اللي عمله فيا
كريم بعصبية: لا ردلي البوكس وشوف انا هعمل فيك ايه
نوسة: انت متعصب ليه
كريم بعصبية: هو ازاى يجرؤ ويطلب ايدك
نوسة: وفيها ايه؟
كريم بعصبية: هو ايه اللي فيها ايه
فتحي بعصبية: انت بتحبها ولا ايه نوسة دي بتاعتي انا
كان كريم رايح يضربه للمرة التانية بس نوسة وقفت ما بينهم وقالت:
- اهدوا انتوا الاتنين
بصت لكريم وقالت: انت بتحبني بجد ولا ايه؟
كريم بعصبية: احبك ايه انتي مرات
مكملش كريم اللي كان هيقول فقال: قصدي اه بحبك
فتحي بعصبية: انا اتقدمتلك قبل منيه يا نوسة
نوسة: هو انا حلوة اوي كده عشان تتخانقوا عليا
كريم بهمس: سامحني يارب على الكدب اللي هقوله
كريم: حلوة بس، ده انتي بطة ومدملكة كده
اتكسفت نوسة وفتحي قال:
- ده انتي تقولي للقمر قوم وانا اعد مكانك
كريم بعصبية: احترم نفسك يا راجل انت بدل ما اقل منك
نوسة: يا اخي يخربيت حمشانتك
كريم بقرف: حمشانتك
فتحي بعصبية: انتي مش هتبقي مرات حد غيري يا نوسة
كريم بعصبية: نوسة هتبقى مراتي انا يلا انت سامع
نوسة: بس انتوا الاتنين، انا اللي هختار
كريم بغيظ: ويا ترى اختارتي مين بقى يا نوسة؟
نوسة: مش انا اللي هحدد
كريم وفتحي بإستغراب: اومال مين؟
نوسة: چمايكا اللي هيحدد
كريم بصدمة: نعم!!
فتحي: انا متأكد انه هيختارني انا يا نوسة
حطت نوسة ايدها على ودنها وقالت:
- ايه، بتقول ايه يا چمايكا
كريم بغيظ: هي عاشت في الدور للدرجة دي
فتحي: چمايكا قال ايه يا نوسة
نوسة: في حاجة چمايكا بيحب ياكولها اوي، المطلوب منكم تجيبوا اكل وچمايكا هيقول هو ده الاكل اللي بيحبه ولا لا
فتحي: انا موافق
نوسة: وانت يا كريم؟
كريم بغيظ: هو انا قدامي حل تاني غير اني اوافق
نوسة: يبقى على بركة الله، التحدي ابتدى
بس انا عندي سؤال
نوسة: سؤال ايه؟
كريم: الاكل اللي الاخ بتاعك ده بيحبك ياكله حاجة جاهزة ولا معلبة ولا حاجة بتطبخ
نوسة: استنى اما اسأله
حطت نوسة ايدها ودنها وقالت:
- چامايكا بيقولك حاجة بتتباع في السوبر ماركت
فتحي: استعنا بالشقا بالله
خرجوا الاتنين واجوا بعد شوية، اعدوا جنب نوسة وهي قالت:
- يلا كل واحد يطلع الحاجة اللي جابها
طله كريم كيس شيبسي وقال:
- طبعا مفيش حد في الدنيا مبيحبش الشيبسي
طلع فتحي علبة نوتيلا وقال:
- طبعا مفيش حد الدنيا مبيحبش النوتيلا
كريم بغيظ: متقلدنيش
فتحي ببرود: انت مين انت اصلا عشان اقلدك
نوسة: بااس انتوا الاتنين
سكتوا وهي قالت:
- مش دي الحاجة اللي چامايكا بيحب ياكولها
طلع كريم بسكوت وقال: يبقى حاجة من الانواع دي صح؟
نوسة: لا
فتحي: يبقى اكيد بيحب اللي هطلع دلوقتي
طلع فتحي لبان فقالت نوسة:
- انت غبي يا فتحي؟
فتحي: ليه الغلط ده بس يا نوسة
نوسة بغيظ: هو اللبان بيتاكل ولا بيتمضغ؟
فتحي: احم، مأخدتش بالي
نوسة: الانتوا الاتنين خسرانين
فتحي: يعني ايه؟
نوسة: يعني مش هتجوز حد منكم
كريم: ريحتي واستريحتي
فتحي: لا طبعا لازم يبقى فيه فرصة تانية
نوسة: موافقة بس لو خسرتوا مش هيبقى فيه فرص تانية
فتحي: موافق
كريم ببرطمة: ليه الفرهدة دي طيب
قاموا الاتنين وكريم قال بغيظ:
- قدامي، اما نبقى نشوف اخرتها
فتحي: اخرتها هتكون مراتي انا ان شاء الله
كريم بغيظ: ده انت عايز تتضرب تاني بقى
نوسة بغيظ: اطلوا بره انتوا الاتنين بدل ما الغي الفرصة التانية
جرى فتحي على بره بسرعة وكريم خرج وراه وهو مش طايق نفسه
• بعد شوية
اجوا الاتنين وفضلوا يطلعوا حاجات من الشنط ونوسة كل شوية تقولهم ان مش ده المطلوب، حس كريم بالزهق فقام من مكانه وراح المطبخ عشان يعمل ساندويتش ولما خرج شاورت نوسة عليه وقالت:
- انت الكسبان
كريم بعدم فهم: مين؟ انا!!
فتحي بصدمة: نعم!!
نوسة: هارد لاك مع واحدة تانية بقى يا فتحي
فتحي بعصبية: هارد لاك ايه، هو كسبان على اساس ايه
نوسة: چامايكا بيحب الجبنة وكريم عمل ساندويتش جبنة
فتحي بعصبية: ده ظلم، اراهنك ان هي جت معاه بالحظ
نوسة: لا طبعا انت بتقول ايه، حقى يا كريم
كريم بتوتر: هاا، لا طبعا حظ ايه انا لما لقيت ان معظم الحاجة اللي جبناها مش عاجبة چامايكا بتاعك ده قولت انه ممكن يكون بيحب الجبنة فعملتله ساندويتش جبنة
نوسة: مبروك عليك انا يا كيمو
فتحي: انا عايز فرصة تانية وهتبقى الاخيرة والله
كريم: يلا يالا من هنا هو الواحد ناقص فرهدة
نوسة: للاسف معدتش ينفع يا فتحي كريم هو اللي كسب
بصلها فتحي بحزن وقال:
- ها لقد خسرت معشوقتي التي كنت اتمناها منذ
مكملش كلامه لان كريم مسكه من هدومه وقال وهو بيخرجة بره الشقة:
- انت لسة هترغي وتعملنا فيها شاعر، اخرج بره يلا مش ناقصين قرف
طرده كريم بره البيت وقال:
- يا ساتر عليه، عيل لازقة بصحيح
قربت ليلى منه وقالت برقة:
- ولما انت بتحبني اوي كده مقولتليش ليه
كريم: اديني قولتلك اهو
ليلى: بتحبني قد ايه يا كيمو
كريم ببرطمة: ايه المحن ده مش كانت من شوية بتطلع عفاريت
ليلى: بتقول حاجة يا كيمو
كريم: بقول الف مبروك يا نوسة
نوسة: انت من انهاردة مش هتبقى الصبي بتاعي
كريم: ما انا هبقى جوزك اكيد يعني مش هفضل صبي
نوسة: ايه ده
كريم بإستغراب: ايه
نوسة: ده في حاجة مأخدتش بالي منها
كريم: حاجة ايه؟
نوسة: ان انت اسمك كريم
كريم: ودي فيها ايه دي
نوسة: اصل اسم كريم بيفكرني بحاجة كده
كريم بإستغراب: حاجة ايه؟
نوسة: بيفكرني بالعفريت اللي كنت طلعته
كريم بسخرية: هو في عفريت اسمه كريم!!
نوسة: طبعا اومال انت مفكر ايه
كريم: بقولك ايه ما تسيبك بقى من سيرة العفاريت دي وتعمليلي حاجة نفسي فيها من زمان اوي
نوسة بإستغراب: حاجة ايه
كريم: بقالي اكتر من اسبوع باكل عيش وجبنة ما تحني عليا وحياة ابوكي وتطبخيلي لقمة ترم عضمي
بصتله نوسة بقرف فقال كريم:
- في ايه؟
مردتش عليه ودخلت اوضتها فقال كريم بإستغراب:
- مالها دي