رواية حب في مهمة رسمية
الفصل الثالث3
بقلم ايه الموافي
كانوا لسة هيقربوا منها بس لؤي قال:
- ابعدوا عنها
بعدوا عنها وهما خايفين عليها اوي، قرب لؤي منها وشالها وقال وهو بيروح لاوضتها:
- ابعتولي الدكتور محمود بسرعة على اوضة البنات
راح هناك وحطها على السرير وفضل مستني الدكتور يجي، دخل محمود الاوضة ولؤي قال بعصبية:
- انت اتأخرت ليه
محمود: معلش يا باشا كنت نايم
لؤي: طب اكشف عليها بسرعة يلا
محمود: حاضر
كشف محمود عليها واول ما خلص قال:
- جالها تلبك معوي يا فندم
لؤي بصدمة: تلبك معوي!!
محمود: اه، انا هركبلها محلول ويفضل انها تاكل اليومين الجاين دول شوربة خضار عشان معدتها مش هتستحمل تاكل حاجة تقيلة
لؤي: ماشي، طب هي دلوقتي كويسة؟
محمود: اه لما المحلول ده يخلص هتخف كتير ان شاء الله، بس ركزوا على صحتها لانها ضعيفة ومحتاجة فيتامينات كتير
لؤي: ماشي يا دكتور
مشى الدكتور ولؤي قال:
- كل ده عشان كلتي فول بايظ!
طفى عليها النور وقفل الباب وراه وراح المعسكر، اول ما البنات شافوه قالوا بخوف:
- بتول عاملة ايه يا حضرة الظابط
لؤي: هي دلوقتي كويسة الحمد لله بس جالها تلبك معوي
غسان بصدمة: تلبك معوي، اومال لو كانت اكلت الغدا كانت هتعمل ايه!!
اروى: اصل بتول عمرها ما اكلت الفول والكشري والحاجات دي فاكيد لما اكلت الفول ده بوظلها معدتها
كيان بحزن: ياريتنا ما قولنالها تاكل
لؤي: وهي مبتاكلش الاكلات الشعبية ليه؟
ليان: اصل بتول من عيلة غنية اوي وهما مبياكلوش الاكل ده
لؤي: اه فهمت، طب وهي ايه اللي وداها الجيش؟ اصل باين عليها مدلعة اوي والجيش ميناسبهاش
كيان: اصل لما ليان اقترحت علينا الاقتراح ده ووافقنا هي حبت تكون معانا عشان احنا مبنسيبش بعض من صغرنا
اسر: خلاص خليها بعد كده تاكل من الكانتين وخلاص
ليان بصدمة: هو في هنا كانتين؟
اسر: اه في
حاتم: مش خلاص اطمنا؟ يلا نبدأ بقى
غسان: استنى لما نعرفم الخبر الاول
حاتم: اه صح كنت هنسى، ركزوا في كلامي كلكم
كلهم بصوله بتركيز وهو قال:
- بعد كام يوم في حملة عسكرية هتيجي وهتختار منكم شوية وهتتقسموا لفرق وهنبقى احنا المسؤلين عن تدريب الفرقة دي والباقي هيتولى تدريبهم ظباط تانيين
علي بإستغراب: ليه؟
حاتم: الحقيقة دي حاجة مجهولة واحنا لسة منعرفهاش، احنا بس حبينا نقولكم عشان تبقوا مستعدين
كيان بهمس لاروى: تفتكروا ايه الحاجة المجهولة دي
اروى: انتي بتسأليني انا!
كيان: ومسألكيش انتي ليه؟
اروى: ما انتي عارفة اني سلبية ووممكن افكر في اسباب تخلينا نخاف كلنا
كيان: اه صح انا نسيت انك بومة متحركة
اروى بغيظ: طب لمي نفسك بقى
كيان ببرود: ولو ملمتهاش هتعملي ايه؟
اسر بغيظ وحدة: هو احنا مش قولنا ممنوع الكلام الجانبي؟
سكتوا بسرعة بخوف ولؤي قال:
- يلا عشان نبدأ
حاتم: الرجالة هيبقوا معايا انا وغسان واسر والبنات هيبقوا مع لؤي، الرجالة تعمل تلت صفوف يلا
عملوا الصفوف بسرعة واروى وقفت قدام وكيان وليان وراها، مسك لؤي السهم وقال:
- ركزوا معايا
بصوله بتركيز وهو قال:
- اول حاجة تعملوها وهي تفردوا ضهركم كويس وبعدين تشدوا السهم وضهركم لسة مفرود وتنشنوا، فهتموا حاجة؟
كيان: اه فهمنا
لؤي: كويس، انا هعمل الكلام اللي شرحته اهو عشان المعلومة تدخل دماغكم اكتر، ركزوا
ليان: تمام
مسك لؤي السهم ونشن في نص الدايرة بالظبط، لؤي:
- جربوا يلا
اخدت اروى السهم وعملت زي ما قال، لؤي:
- ركزي على الهدف الاول وبعدين نشني
اروى بثقة: ده انا متخصصة تنشين
اطلقت اروى السهم بس برقت بصدمة لما السهم مر جنب اسر، اسر بصدمة:
- انتي بتنشني عليا انا!!
اروى بخوف: لا والله انا كنت عايزة انشن على الدايرة بس معرفش السهم طار ازاى
اسر بغيظ: لا والله! متعرفيش طار ازاى
اروى بخوف: اه والله زي ما بقولك كده
لؤي بسخرية: لا واضح انك استاذة تنشين اوي
اروى بتوتر: المرة دي متحسبش يا حضرة الظابط انا هجرب تاني
اسر بخوف: المرة اللي فاتت كانت هتيجي فيا المرة دي هتعملي ايه
اروى بتوتر: لا مهو الواحد بيتعلم من اخطاؤه وانا ان شاء الله هتعلم من اخطائي
لؤي: انا بقول ندخلك في اوضة لوحدك تدربي فيها بدل ما نفقد حد ونروح في داهية كلنا
اروى بتذمر: والله ده ظلم
لؤي بغيظ: اللي بعده
مسكت كيان السهم ولؤي قال:
- خلي بالك لتجبيها في حد
ابتسمت كيان بجانبية وقالت:
- لا متقلقش
اطلقت كيان السهم واجت جنب السهم بتاع لؤي، بصولها بصدمة ولؤي قال:
- انتي جبتيها ازاى هنا من اول مرة
كيان: اصل انا جدو الله يرحمه كان شاطر اوي في الهواية دي وعملمهالي من صغري
لؤي: طالما كده يبقى انتي مش محتاجة تدربي، اللي بعده
ليان بهمس: يا بختك
كيان بغيظ: هنبتدي قر وحسد بقى
مسكت ليان السهم ولؤي قال:
- افردي ضهرك كويس
فردت ليان ضهرها وركزت على الهدف ونشنت، اجى السهم في طرف الدايرة فقال لؤي:
- بالنسبة لاول مرة كويس، مع التدريب المستمر ان شاء الله هتبقي محترفة فيها
ليان ببرطمة: يا بخت بتول هتتعفى من التدريب ده
سمعها لؤي فقال: ومين قالي انها هتتعفي؟
ليان بإستغراب: مش هي تعبانة ومينفعش تدرب؟
لؤي: وهو العيان مبيروقش يعني ولا ايه؟ لما تروق ان شاء الله هتدرب في نفس الاوضة اللي اروى هتدرب فيها
اروى بغيظ: انتوا برضو مصصمبن تدربوني في اوضة
اسر بغيظ: اصل الروح غالية بعيد عنك
كشرت اروى وفضلوا كلهم ينشنوا السهام ماعدا كيان واروى وليان كانت بتبص عليهم بغيظ، رقصتلها اروى حواجبها بإستفزاز وليان جزت على سنانها بعصبية، هز اسر راسه بقلة حيله وقال ببرطمة:
- وقعنا مع شوية اطفال
اجى ميعاد الغدا فكانوا هيروحوا هناك بس قبل ما يروحوا قال اسر ليهم:
- زي ما قولتلكم قبل كده، ممنوع اى احتكاك او كلام مع الشباب ولحد منهم قرب منكم قولولي على طول
اروى بغيظ: حاضر، اى اوامر تانية؟
اسر ببرود: لا
راحوا هناك وليان قالت بغيظ:
- محسسني انه الواصي علينا
كيان بغيظ: انا مش عارفة ايه القرف ده
اروى: رغم انه بيتحكم فينا بس بصراحة هو عنده حق
ليان بصدمة: عنده حق
اروى: اه، انتي مش شايفة نظرات بعض الشباب لينا عاملة ازاى
بصت ليان حواليها ولقت ان في شباب بيبصوا عليهم بتركيز، ليان:
- تصدقي عندك حق
كيان بغيظ: هاين عليا اقوم البسلهم الطبق في وشهم
اروى: كلي الاول وبعدين اعملي كده بدل ما الوقت ينتهي
ليان بقرف: بجد الاكل ده شكله وحش اوي
كيان: متقرفنيش بقى
اروى: كلوا بسرعة وانتوا مش هتحسوا بحاجة
اكلوا بسرعة وكيان قالت بقرف:
- تعالوا ناكل البونبوني اللي انا عايناه عشان نغير طعم بوقنا شوية
اروى: ياريت والله، وبالمرة نتطمن على بتول
قاموا من مكانهم وكانوا هيخرجوا بره بس واحد وقف قدامهم وقال:
- ما تيجي نتعرف بما اننا زمايل في المعسكر
اروى ببرود: اسفة مبنتعرفش
الشاب: ليه كده
كيان بعصبية: هي مش قالتلك مبنتنيلش نتعرف
احمد: ايه كل العصبية دي خلاص يا ستي مش عايز اتنيل
مشى من قدامهم وليان قالت بضحك:
- جدعة يا بت
كيان: اللي زي دول مينفعش معاهم الزوق والاحترام لازم تديهم فوق دماغهم
اروى: عندك حق
خرجوا بره واحمد رجع للشلة بتاعته وهو هيفرقع من الغيظ، كريم بضحك:
- ما قولتلك بلاش
ابراهيم بضحك: اديها جرستك اهي وقلت منك
احمد بغيظ: اخرسوا انتوا الاتنين
فضلوا يضحكوا عليه فقال بغيظ:
- يووه، انا قايم وسايبها ليكم
مشى من قدامهم وهما كملوا ضحك عليه
دخلوا الاوضة وكيان قالت بحزن وهي شايفاها نايمة بتعب:
- ياريتها ما كانت جت معانا
اروى: للاسف هي اللي صممت تيجي
ليان بتعب: هو احنا هنام امتى؟
اروى: انا معرفش اذا كان لسة في تدريب تاني ولا لا
كيان: يارب ميبقاش في بجد كده كتير اوي
ليان لاروى: طب ما تسألي اذا كان في ولا لا
اروى: انتي بتكلميني انا
ليان: اه
اروى بشرشحة: ما تروحي انتي يا حبيبتي ولا اتشليتي
ليان: بعد الشر عليا ان شالله اللي يكرهني يارب
كيان بحدة: وطوا صوتكم انتوا الاتنين البت تعبانة ونايمة
اروى: اه صح يخربيت غبائنا
ليان: وحياة ابوكي يا اروى روحي اسألي عشان انا مش قادرة
اروى بغيظ: يعني انا اللي مش قادرة!
ليان: انا دراعي وجعني من كتر التدريب على السهام روحي بقى بالله عليكي
اروى بغيظ: ده انتي رخمة
ابتسمت ليان وقالت: حبيبي ده العشم برضو
اروى: اعملي حسابك اني هخرج المردة دي بس غير كده لو اتشقلبتي على راسك مش خارجة
ليان بغيظ: حاضر
خرجت اروى بره عشان تسأل ظابط من الظباط، لقت الظابط اسر فقالت ببرطمة:
- يعني كان هيحصل ايه لو كنت لقيت واحد تاني
اترددت انها تروحله بس جمعت شجاعتها وقربت منه وقالت:
- ممكن اسألك سؤال يا حضرة الظابط
اسر ببرود: ارغي
اروى بصوت واطي: ده انت بني ادم رخم
اسر: بتقولي ايه؟
اروى: بقول لحضرتك هو هيبقى في لسة تدريب ولا كده خلاص
اسر: لا كده خلاص، بس متتعوديش على كده عشان بس انتوا لسة مستجدين
ابتسمت اروى بفرح وقالت: عن اذنك
كانت هتمشي من قدامه فقال:
- انتي راحة فين؟
اروى: هروح الاوضة
اسر: مش قبل ما تكملي تدريبك
تلاشت ابتسامتها وقالت بصدمة: نعم! تدريب ايه؟
اسر ببرود: التنشين، ولا انتي نسيتي؟
اروى بصدمة: دلوقتي؟
اسر ببرود: اومال انتي مفكرة ايه؟
اروى بغيظ: انا ما صدقت اني استريحت
اسر ببرود: معلش
بصتله اروى ببرائة وقالت برقة:
- ممكن حضرتك تأجلها يوم تاني؟
اسر ببرود: لا
بصتله بغيظ وهو قال:
- انا هديكي ضهري دلوقتي وهروح لاوضة التدريب، انتي عارفة لو ملقتكيش ورايا انا هعمل فيكي ايه؟
اروى بخوف: مش عايزة اعرف
ادالها اسر ضهره وراح للاوضة وهي مشت وراه وهي بتقول بغيظ:
- منك لله يا ليان الكلب
دخلوا الاوضة واسر قال:
- مبدأيا كده اول حاجة تقفي بالجنب شوية صغيرين وترفعي ضهرك وتشدي السهم وتنشني، وقف اسر وعمل الحركة وقال:
- اعملي زي ما انا عملت دلوقتي
عملت اروى زي ما هو قال بس قبل ما تطلق السهم قال:
- متستعجليش ركزي الاول
هزت اروى راسها وطلقت السهم بعد ما خلصت بس بصت لاسر بإبتسامة بلهاء لما السهم مر من جنب الدايرة، حاول اسر انه يتمالك اعصابه وميتعصبش عليها فقال وهو بيجز على سنانه:
- حاكم انا خلقي ضيق
اروى بتوتر: اعمل ايه طيب
اسر بغيظ: ركزي على ام الهدف ومتتسرعيش
اروى بتوتر: اعصابك يا حضرة الظابط مش كده
اسر بغيظ: حاولي تاني اما نشوف اخرتها
اروى بزهق: حاضر
مسكت اروى السهم وحددت الهدف، وقف اسر وراها وقرب منها وقال:
- ارفعي ايدك شوية
اروى بتوتر: ها
رفع اسر ايدها وقال: ارفعي ايدك زي كده وركزي على الهدف
اروى بتوتر: حاضر
ركزت اروى على الهدف واطلقت السهم واجى اخيرا في الدايرة، بعد اسر عنها وقال:
- شوفتي لما بتركزي ايه اللي بيحصل
اروى بتوتر: بما اني نجحت اخيرا فعن اذنك بقى يا باشا
خرجت اروى بره بسرعة واسر قال بإستغراب:
- مالها دي
دخلت اروى الاوضة وهي بتقول بتوتر:
- هو ازاى يقرب كده!
كيان بإستغراب: انتي بتكلمي نفسك ولا ايه؟
ليان: انتي اتأخرتي ليه معقوله كل ده بتسألي اذا كان في تدريب ولا لا؟
اروى بعصبية: كله بسببك، تعاليلي
قربت اروى منها فبعدت ليان بسرعة عنها وقالت بخوف:
- في ايه؟
اروى بعصبية: بسببك اتدبست والظابط الرخم ده خلاني اتدرب على التنشين
ليان بصدمة: بجد
اروى بعصبية: وانا ههزر ليه
ضحكوا عليها فقالت اروى بعصبية:
- انتوا بتضحكوا عليا!!
وقفوا ضحك بسرعة واروى قالت بغيظ:
- اه ما ليكم حق تضحكوا ما انا بس اللي اتدبست
ليان بتوتر: وانا هعرف منين يعني انه هيعمل فيكي كده الله
كيان: هو مين اصلا اللي دربك؟
اروى بغيظ: الظابط اسر
رفعت ليان حاجبها وقالت:
- وانتي ملقتيش غير هو وتسأليه؟ ما انتي عارفة يا بنتي انه مستقصدك
اروى بغيظ: ما هو اللي لقيته في وشي
كيان: كنتي هتخسري حاجة يعني لو كنتي دورتي على اى ظابط تاني
اروى بغيظ: بقيت انا اللي غلطانة دلوقتي
ليان بضحك: مهو انتي اللي غلطانة فعلا
اروى بغيظ: لو اني مش عايزة اقلق بتول انا كنت فرجت عليكم الدنيا كلها
كيان بضحك: طب الحمد لله انك عندك دم ومش هتصرخي في وشنا
اروى بغيظ: انا هتنيل هتخمد، على الله اسمع صوت واحدة فيكم
ليان: متخافش يا كبير منستجرش نعمل كده اصلا
اروى: عالم تخاف متختشيش
كيان بغيظ: بت متخلنيش ازعلك
اروى: طب وريني كده انتي هتزعليني ازاى؟
كيان بغيظ: متخلنيش اجيبك من شعرك
اروى بشرشحة: تجيبي مين من شعرها يا حلوة انتي وهي، ده انا افعصكم تحت ايدي
ليان بشرشحة: تفعصي مين يا ماما ده انا اكلك بسناني
كانت لسة اروى هتتكلم بس سمعوا صوت خبط جامد على الباب، كيان بخوف:
- هارسوح ليكون الظباط سمعونا واحنا بنتخانق
اروى بخوف: ربنا يستر
فتحت اروى الباب وغسان قال بحده: قدامي
ليان بخوف: ليه؟
غسان: هتتعرضوا للحبس الانفرادي
اروى بصدمة: ايه
لؤي: من غير كلام قدامنا يلا
كيان وهي بتبلع ريقها: ما سماح المرة دي يا باشا
لؤي: كلمة وتتسمح، نفذ الاوامر يا عسكري
كيان بخوف: تمام يا فندم
صحت بتول من النوم وقالت بتعب:
- هو ايه اللي حصل وانتوا واخدينهم على فين؟