رواية مراتي طفله مجنونه
الفصل الخامس5
بقلم ايه الموافي
قام كريم من النوم ودماغه مصدعه اوي، دخل الحمام واستحمى ولما خرج قال بتعب:
- يا ترى هتتحول لايه انهاردة انا تعبت
دخل اوضتها عشان يشوفها بس ملقهاش،كريم:
- اه ابتدينا
دور عليها في البيت كله وملقهاش فقال بخوف:
- استرها يارب
كان هينزل يدور عليها بس موبايله رن، رد عليه وقال:
- انت كريم جوز المدعوة ليلى؟
بلع كريم ريقه بخوف وقال:
- اه انا ليه؟
الظابط: تعالا للقسم حالا عشان مراتك محجوزة عندنا
كريم بصدمة: تاني
قفل معاه السكة وخرج من البيت وهو بيقول:
- منك لله يا ليلى على المرمطة اللي انا فيها دي
راح كريم القسم وقال: انا كريم الاسيوطي جوز ليلى
الظابط: هي مراتك مجنونة ولا ايه؟
كريم بتوتر: ليه بتقول كده
الظابط: اصلها عمالة تقول من امبارح انا نجيبة انا نجيبة وفين وفين لما عرفنا ان اسمها ليلى لما اخدنا بطاقتها عشان نحاول نتواصل مع حد من اهلها
كريم بصدمة: من امبارح بليل!!
الظابط: اه، انا هتضطر آخد ضدها اجراءات قانونية عشان كذبها عليها
كريم بتوتر: لا هو انت متعرفش
الظابط: اعرف ايه؟
اتصنع كريم الحزن وقال:
- انت متعرفش هي بتقول على نفسها نجيبة ليه؟
الظابط: ليه
كريم بتأثر: اصل هي كان ليها اخت صغيرة، ليلى مكنتش بتعتبرها اختها لا كانت بتعتبرها بنتها
الظابط بفضول: وبعدين
كريم: اكتشفت انها مش اختها اصلا
الظابط بذهول: نعم
كريم: اه زي ما بقولك كده
الظابط: اومال طلعت مين؟
كريم بتصنع الخوف: طلعت جنية اللهم احفظنا
الظابط بصدمة: نعم!!
كريم: عشان ليلى يتيمة وكانت عايشة لوحدها طول الوقت فاتلبست
الظابط بخوف: ده انا زعقتلها جامد، ربنا يستر والعفريتة متنتقمش مني
كريم: لا متخافش العفريتة دي مبتإذيش
الظابط: طب وانت ايه اللي خلاك تتجوزها يا ابني هو العمر بعزقة؟
كريم بحزن: عشان للاسف ابويا غصبني اني اتجوزها بحكم انها بنت عمي
الظابط بصدمة: يعني عشان هي بنت عمك يجوزك ليها عادي، دي ملبوسة يا ابني
كريم: قفل على السيرة دي عشان لو اعدنا نتكلم عليها كتير العفريتة هتظهر
الظابط بخوف: اللهم احفظنا يارب اللهم احفظنا
كريم: ممكن تجيبها بعد اذنك
الظابط: طبعا يا ابني، يا عسكرييي
اجى العسكرى فقال الظابط:
- هات المتهمة نجيبة قصدي ليلى
العسكري: تمام يا فندم
• في الحجز
نجيبة: انتي بتبصيلي كده ليه؟
عفاف: ابصلك براحتي يا حبيبتي بالاصفر اللي ضرباهولي في شعرك ده
نجيبة: ايه الاسلوب البيئة اللي حضرتك بتتكلمي بيه ده؟
عفاف بشرشحة: ايه يا مامي؟ ايه يا تيزا ايه يا دادي، ايه يا حبيبتي يا بيئة
نجيبة بشرشحة: لائة، لمي روحك يا عفاف وانتي وسماح، واللي يعملي قلق لسة ما اتخلق، واللي يتهور معايا يتعور، اعاااا
نطت نجيبة عليهم وشدتهم من شعرهم، دخل العسكري وقال بزعيق:
- بس يا حوش، بس يا همج، نجيبة متولي الخولي
نجيبة: اناا
العسكري: تعالي
تفت نحيبة عليهم وخرجت وراحت مع العسكري، كريم بصدمة:
- انتي لابسة كده ليه وشعرك لونه اصفر ليه
الظابط بهمس وخوف: شش اسكت وسيبها تعمل اللي هي عايزاه بدل ما العفريته تحضر
كريم بغيظ: كده بس، حاضر
نجيبة بملل: هخرج امتى من المخروبة دي
اتعصب الظابط فقال كريم:
- معلش يا باشا ما انت عارف ظروفها
الظابط بغيظ: عاجبك اللي الهانم مراتك عملته
كريم: عملت ايه يا فندم؟
الظابط: ضربالي الناس في الديسكو
كريم بصدمة: ديسكو!!
نحيبة: ياااس
الظابط: ومش بس كده، دي دا نص اللي ضربتهم في المستشفى
كريم بعصبية: انتي كنتي بتعملي ايه في الديسكو؟
نجيبة: هكون بعمل ايه يعني لما اروح مكان يسهرون فيه يرقصون يسكرون يرتكب
كريم بمقاطعة وعصبية:
- ده انتي يومك اسود
الظابط: هدي نفسك يا استاذ كريم مش كده
كريم بعصبية: اهدي نفسي ايه وانا مراتي رايحالي ديسكو
الظابط: معلش اعذرها يا ابني ومتنساش اللي هي فيه اللهم احفظنا
جز كريم على سنانه وقال:
- اقدر اخدها تاني يا فندم ولا لسة في اجراءات تانية؟
الظابط: انا مكنتش هخليها تخرج من الحجز ابدا بسبب طولة لسانها بس بعد اللي حكيتهولي انا هفرج عنها، مش عشان انا خايف لا لاسمح الله عشان بس مبقاش انا والزمن عليها
كريم بسخرية: لا مهو واضح
الظابط: بتقول حاجة؟
كريم: احم، بقول كتر خيرك يا فندم
بص كريم لليلى بحدة وقال: يلا
خرجت معاه وهي بتبتسم للظابط فقال بخوف:
- هش انصرفي
خرجوا من القسم وكريم قال بحدة:
- نروح البيت بس وانا هعرفك ازاى تروحي ديسكو يا هانم
نجيبة: بيبي خليك كول
كريم بعصبية: كوول، اصبري عليا بس لما نوصل
نجيبة بملل: شكلك كده خنيق وهتطير عليا الدماغ اللي عملاها
كريم بصدمة: دمااغ، انتي بلبعتي حاجة يا بت ولا ايه؟
نجيبة: لا بس لسة هبلبع قدام
كريم بعصبية: وريني هتبلبعي ازاى
وصلوا للبيت فقال كريم:
- بتروحي ديسكو هاا
نحيبة بملل: هتفضل تكرر الكلمة دي كتير؟
كريم: انتي كمان مش عاجبك!! استني هنا متتحركيش انا جايلك اهو
نحيبة: متتأخرش يا بيبي
دخل كريم وجاب الحزام وقال بعصبية:
- مع اني ضد ضرب المرآة بس انا اعتبرتك مش مرآة خلاص
نجيبة بتوتر: انت هنتعمل ايه يا مجنون انت
كريم: انا هوريكي
جري وراها عشان يضربها بالحزام وهي فضلت تجري وتقول ببخوف:
- في ايه يا بيبي ما تهدي اعصابك شوية
كريم بعصبية: شرفي يا روح امك، كله الا شرفي
نجيبة: وانا عملت ايه دلوقتي
كريم بعصبية: بقى انا مراتي تروح الديسكو، الناس تقول علينا ايه، انتي ايه اللي وداكي هناك اصلا
نجيبة: بغير جو ايه مغيرش؟
كريم بعصبية: تغير جو في ديسكو!! اومال جمصة وراس البر بيعملوا ايه؟ ده انا عمري ما دخلت الديسكو انتي تدخليها
نجيبة: خلاص بما انك مدخلتهاش فتعالا معايا المرة الجاية
كريم بعصبية: هو لسة في مرة تانية!!
ضربها كريم بالحزام فقالت بوجع:
- بتلسع، ليه كده بس
كريم بعصبية: بتلسع، هو انتي لسة شوفتي حاجة
فضل يجري وراها وهي تجري لحد ما قفلت الباب على نفسها، كريم بعصبية:
- اخرجي يا بت انتي
نجيبة من ورا الباب: مش اى شاب اتخلق يعملي قلق
كريم بصدمة: ايه
نحيبة: العسل حلو بس النحل بيقرص
كريم بغيظ: انتي بتقولي ايه يا بت انتي
نجيبة: اللي يتهور معانا يتعور
كريم بعصبية: ولما انتي شبح اوي في نفسك كده مستخبية ورا الباب ليه
نحيبة: نو انا مش مستخبية
كريم بسخرية: لا والله، اومال بتعملي ايه ورا الباب بتذاكري
نجيبة: ياااس
كريم بسخرية: ياس ونو، الله يرحم لما كانت مفكرة ان بيوتفول شتيمة
قفل كريم باب الشقة بالمفتاح وقال:
- وريني بقى هتهربي ازاى، ما انتي اكيد مش هتفضلي قاعدة طول اليوم جوه
سمع كريم صوت جرس الباب فقال بإستغراب:
- مين؟
- انا معايا اوردر للمدام نجيبة
فتح كريم الباب بإستغراب وقال:
- اوردر ايه دا
الراجل: لازم المدام نحيبة هي اللي تستلمه
كريم: انا جوزها عادي
الراجل: ولو، لازم برضو هي اللي تستلمهم
كريم ببرطمة: ده انت راجل رخم
الراجل: بتقول حاجة؟
كريم ببرود: لا مبقولش
خبط كريم على باب نجيبة وقال:
- اخرجي يا اختي عشان جايلك اوردر، ويا ترى بقى انتي اللي هتدفعي فلوسه ولا انا
خرجت نجيبة من الاوضة وقال:
- اكيد طبعا انت اومال انا متجوزاك ليه؟
بصلها بصدمة وهي وقفت قدام الراجل وقالت:
- جبت اللي قولتلك عليه؟
الراجل: ايوه يا ابلتي
نجيبة: اهم حاجة الصنف تمام؟
الراجل: طبعا يا ابلتي ده عوكشة هو اللي جابلك الصنف ده بنفسه
بصلهم كريم بريبة وقال: صنف ايه ده؟
نجيبة بتجاهل لكريم: طالما عوكشة هو اللي جايبه يبقى بصرا ياض
كان الراجل هيمشي فقال كريم:
- استنى عندك
وقف الراجل وكريم قال بشك:
- ايه الاوردر اللي انت جبته ده؟
بص الراجل على نجيبة وقال:
- اقول يا استاذة؟
كريم بعصبية:
- هو انا نجفة عشان تكلمها هي
الراجل: في ايه يا عم على الصبح هدي اعصابك كده
نجيبة بتوتر: امشي انت يا صاصا
كان هيمشي للمرة التانية فمسكه كريم وقال بحدة:
- انت عارف انت لو مجاوبتنيش على السؤال اللي سألتهولك انا هعمل فيك ايه؟
صاصا بتوتر: ما الاجابة شارحة نفسها يا استاذ، ليه الغباء ده، بنقولك صاصا وعوكشة وقدامك ديلر هيكون ايه يعني؟
كريم بصدمة: ديلرر
صاصا بخوف: شش هنتفضح
كريم بصدمة: هي الحاجات دي بقت بتتوزع في عز النهار كده، ده على ايامي كان الديلر بيلبس لبس متخفي ويسلم الشحنة في حتة مقطوعة بليل وياخد الفلوس ويطلع يجري
صاصا: ده كان زمان انما دلوقتي احنا اتطورنا
كريم بعصبية: انت عارف لو ممشتش من قدامي دلوقتي انا هعمل فيك ايه يا صاصا
صاصا بخوف: اعتبرني اختفيت خلاص
جرى صاصا على تحت بسرعة وكريم بص لنجيبة بحدة، نجيبة بتوتر:
- في ايه، متبصليش كده عشان انا حاسة انك عايزة تخلص عليا
كريم بعصبية: حاسة مش متأكدة!!
نجيبة بخوف: متقلقش يا بيبي انا هدوقك منه
كريم بصدمة: نعم
نحيبة بتوتر: عشان انا كريمة ازاى ومبستهسرش فيك حاجة
كريم بعصبية: ده انا هخرب بيتك اكتر ما هو مخروب، بقى على اخر الزمن القرف ده يدخل بيتي
نحيبة بتوتر: جرب بس ومش هتندم
جرى كريم وراها وقال بعصبية:
- انا هربيكي من اول وجديد يا بنت عمي
ضدها كريم من شعرها بس اتصدم لما لقى الباروكة في ايده، كريم بصدمة:
- كل الوقت ده كان باروكة؟ وانا اللي افتكرتك صبغتيه يا معفنة
نجيبة: ليه كده بس، بوظتلي النيولوك
كريم: ده انا هبوظلك وشك كمان
نجيبة: انت ليه قافش كده ما تفك وترحرح شوية
بص كريم حواليه فقالت نجيبة:
- انت بتدور على ايه؟
كريم: كان في عصاية هنا بس معرفش راحت فين
جابتها نجيبة من تحت الكنبة وقالت:
- قصدك على دي؟
اخدها كريم منها وقال:
- يا اميرة يا بنت الاومرة، بقى بتديني العصاية اللي هضربك بيها
نجيبة بخوف: تضربني ليه
كريم بعصبية: انتي بعد كل ده بتسألي!! طب خدي
رفع العصاية وكان لسة هيضربها بخفة بس سمعوا صوت خبط جامد على الباب وكإنه هيتكسر، كريم بعصبية:
- ده مين الحمار اللي بيخبط ده
فتح كريم الباب وكان لسة هيشتم بس اتصنم مكانه لما لقى البوليس قدامه، كريم بخوف:
- في ايه
دخلوا الشقة والظابط قال: دوروا كويس
نجيبة بخوف: في ايه يا باشا
الظابط بحدة: انتي تخرسي خالص
نجيبة بخوف: حاضر
جاب العسكري العلبة اللي صاصا اداها لنجيبة وقال:
- لقيت دي يا باشا
كريم بلطم: الله يخربيتك يا ليلى الله يخربيتك، هنروح في داهية، لا هنروح ليه احنا روحنا خلاص
الظابط بحدة: اخرس انت كمان
كريم بخوف: حاضر
فتح الظابط العلبة وقال: يا حلاوة يا ولاد، بودرة كمان
نجيبة بخوف: ده انا جبته عشان اعمل كيكة يا باشا
الظابط بحدة: انتي هتستهبلي يا روح امك، انتي مفكراني عيل توتو وميعرفش يفرق ما بين الدقيق ولا البودرة ولا ايه؟
كريم بخوف: طبعا انا لو قولتلك انها مجنونة مش هتصدقني صح
الظابط بسخرية: العب غيرها يالا
نجيبة: بقولك ايه يا باشا تاخد كام وتحل عننا
كريم بصدمة: اخرسي الله يخربيتك
برق الظابط بصدمة وقال: انتي قولتي ايه؟
كريم بخوف: مقالتش حاجة يا باشا
الظابط بحدة: اخرس انت
بص على نجيبة بعصبية وقال:
- قوليلي كده تاني انتي قولتي ايه
نجيبة بخوف: هو انا عكيت الدنيا ولا ايه؟
الظابط بعصبية: ده انا هوديكي في ستين داعية، انا يتقالي كده انتي معاكي كام يعني
كريم بصدمة: نعم
الظابط بتوتر: قصدي قدامي على البوكس
نجيبة: ما انا لسة جاية من القسم من شوية ايه البهدلة دي
الظابط: ده انتي رد سجون بقى
كريم بخوف: بقولك ايه يا باشا
الظابط: عايز تقول ايه انجز
كريم: الحاجة دي جاية بإسمها يا باشا، فإيه رأيك اني ارمي عليها الطلاق بالتلاتة واخلع انا، طبعا عشان احنا رجالة زي بعض فهتقف جنب اخوك وتسيبني امشي، سلام عليكم
مسكه الظابط من قفاه وقال بعصبية:
- خد هنا يالا رايح فين
نجيبة بقرف: بقى بتسلمني تسليم اهالي يا عرة الرجالة، اخص عليك بجد اخص
كريم بعصبية: اخرسي انتي ده انا شوفت ايام سودة بسببك ربنا يسامحك يا جدي
الظابط بعصبية: انتوا هتتخانقوا قدامي، خدوهم على البوكس يلا
كريم بتوتر: طب ممكن اقولك حاجة اخيرة عشان خاطري
الظابط بملل: قول
كريم: ممكن بعد اذنك ننزل احنا بكرامتنا عشان الجيران متشمتش فيا، ده بعد اذنك يعني
الظابط: يا حبيبي، بس كده
هز كريم راسه فشاله الراجل على كتفه وقال:
- بس كده؟ ده انا هجرسك في الحتة كلها
كريم بصدمة: انت بتعمل ايه نزلني يا باشا وحياة ابوك
الظابط: اخرس يالا
نجيبة: وااو، وانا كمان عايزة اتشال مليش دعوة
كريم وهو على كتف الظابط:
- بقولك يا حياتي
نجيبة بإبتسامة: ايه يا روحي
كريم: ربنا ياخدك يارب
نجيبة: اخص عليك راجل واطي بصحيح
نزلوا تحت وكل الجيران كان شايفاهم، حطوهم في البوكس وساقوها وراحوا القسم، كريم بلطم:
- الله يخربيتك يا ليلى، بسببك دخلت القسم تلت مرات
الظابط: شش يخربيت ندبك يا اخي
اعد الظابط على المكتب بتاعه وقال:
- انت تعرف القضية دي هتلبسك كام سنة سجن
كريم بخوف: مش عايز اعرف
الظابط: طب تعرف المساجين هيعملوا فيك ايه لما يشوفوا انك عيل فرفور
كريم بخوف: برضو مش عايز اعرف
نجيبة بإبتسامة: بس انا عايزة اعرف
الظابط: انتي مالك منشكحة كده ليه وكإنك راحة حفلة مش سجن
نجيبة: اي حاجة منك حلوة يا باشا
كريم بعصبية: انتي بتعكسيه قدامي!!
الظابط: يعني لو من وراك عادي؟
قام الظابط وقال: ده انت هيتعمل منك انت وهي كفتة، هتطلبوا الرحمة ومش هتلاقوا اللي يديهالكم
اترعش كريم من الخوف والظابط قال:
- انت المفروض متنامش من كتر الخوف لان الظابط اللي هيبقى مسؤول عنك سيكوباتي وبيحب التعذيب، ده اذا كان احنا بنخاف منه ما بالك انت بقى
دخل العسكري وقال:
- احنا فحصنا البودرة وطلعت دقيق بجد يا باشا
الظابط بصدمة: دقيق
نجيبة بإبتسامة: يااس
كريم: هي الدنيا بتغشش ليه
اغمى عليه فقال الظابط:
- هو اغمى عليه ليه؟
نجيبة بإبتسامة: سيبك منه يا باشا
الظابط بإبتسامة: عندك حق، خدها يا عسكري على الحبس لحد ما جوزها بفوق
نجيبة بصدمة: ليه كده يا باشا
الظابط: ششش مش عايز صداع