رواية حب في مهمة رسمية
الفصل التاسع9
بقلم ايه الموافي
اروی ببرود:
- الله يبارك فيكي
بصت ندى على قلم الحكل وقالت ببرود:
مكنش متوقعه والله انك ممكن تضحى بقلم براند وغالي اوي عشان تکسبي
اروی ببرود: انا ممكن اعمل اي حاجة عشان اكسب، بالرغم من أني حوشت كتير عشان اجيب القلم ده لاني كان نفسي فيه من زمان بس للأسف عشان أكسب حاجة لازم أضحى بحاجة، هى الدنيا كده عن اذنك
مشت اروى وراحت أوضتها واسر والظباط كان بيبصوا على الباقي في الكاميرا، لؤى:
- تفتكروا هيعرفوا يخرجوا؟
حاتم: مأظنش الجواب باين من عنوانه
ليان بزهق: ما تخرجونى بقى هو ايه الزهق ده بس ياربي
• عند کیان
- اه لو كنت طويلة كان فاتي طلعت على الحيطان دي وشوفت ام الباب فين واخرج منه
حاولت كيان أنها تتسلق الحياطان دی بس وقعت على الأرض، كيان بوجع:
- اه یا ضهری يانی
اعدت کيان على الأرض وقالت:
أدينى قاعدة أهو لحد ما حد يخرجى من هنا
شافت بتول قطة صغيرة فقالت بإبتسامة: الله دى شكلها حلو اوى
اعدت جنبها وقالت:
- انتى ايه جابك هنا؟ دخلتى أصلا إزاى ؟!
لؤى بغيط:
- هي مفكرة نفسها في رحلة ! صبرني يارب
غسان بزهق: أنا يقول ندخل نجيبهم أحسن
حاتم بغيظ: انا بقول كده برضو
اسر: هاتوهم على ما أروح أجيب أروى
لؤي: ماشی
خبط أسر على باب اروى ففتحت، اسر وهو بيبص في عيونها:
- لا طلعتى بتعرفي تتشغلي مخك يا اروى
اروي بتحدى وتوتر من نظراته: طالما حطيت حاجة فى دماغى يبقى مش هتهد غير لما اعملها
اسر ببرود: وطالما كده مشغلتيش دماغك من البداية ليه؟!
اروی ببرور: کیفی کده
اسر بغيظ: والله
مردتش اروی علیه فقال اسر ببرود:
- تعالی ورایا
نفخت اروى بزهق ومشت وراه لحد ما وصلوا للمكان اللى الكل متجمع فیه، كیان بإستغراب:
- انتي کنتی فین؟!
اروى: كنت في الأوضة
ليان بصدمة:
- انتى عرفتى تخرجي من المتاهة؟
اروی بغرور وهی بتبص على اسر: اه
بتول بصدمة: ازاى؟!
غسان: بطلوا كلام دلوقتي لما تبقوا تتجمعوا في الاوضة ابقوا اتكلموا براحتكم
كيان: هو ممكن أسأل سؤال
غسان: أسالی
كيان : أنا نفسى أعرف هما الشباب فين
غسان بغيط: وانتى مالك انتي
بصتله کیان بغيط واسر قال:
- مبدأيا كده كل واحدة منكم هتدرب على حاجة مختلفة عن الثانية بس ده مش قبل ما تدربوا على فنون القتال لأننا ملحقناش ندربكم فى معسكر الجيش
اروی بإستغراب: هو لیه كل واحدة هتدرب على حاجة مختلفة؟
اسر: لانكم مش هتأدوا نفس المهمة، قصدي يعني ان كل واحدة منكم ليها دور معين هتقوم بيه
كيان باستغراب: مهمة ايه ودور إيه؟
اسر ببرود: هتعرفوا بعدين
اروى بغيظ: انا نفسى اعرف بعدين ده امتى هيجي
اسر ببرود: تعالوا ورايا يلا لمكان التدريـب
• بليل
خلصوا تدريب وهم مش قادرين ياخدوا نفَسهم، كيان:
- اه ياني انا ما عنتش حاسه برجلي
ليان: ومين سمعك يا اختي
اروى انا مش عايزه اخوفكم بس اجمدوا كده عشان شكلنا داخلين على حاجه جامده ولازم نستعد ليها كويس
بتول: قصدك ايه
اروى: هو انتوا ما سمعتوش الظابط اسر وهو بيقول ان كل واحده مننا ليها دور معين، معنى كده ان في مهمه هنأديها
كيان بصدمه: مهمه ايه ده احنا عساكر مش ظباط ولينا فتره تدريب معينة وهنمشي
اروى: والله لما الوقت اللي هما بيقعدوا يقولوا عليه انه هيجي هنفهم كل حاجه
ليان: والله ربنا يستر بس تعالوا ننام دلوقتي عشان شكلهم هيقوموا الصبح زي ما كنا في المعسكر
اروى: يلا
• عدى شهرين وهما كل يوم على نفس النظام، يقوموا الصبح بدري ويتدربوا ويرجعوا اخر الليل وهما هلكانين وتعبانين لحد ما اتقنوا الفنون القتاليه الى حد ما اسر:
- بصراحه انا مبهور بيكم لاني ما توقعتش انكم تبقوا بالمستوى ده في الاخر وخصوصا اروى
ابتسمت اروى واسر قال:
- بالليل هاجي اخدكم لاوضه اللوا وهتعرفوا كل حاجه واحنا جايبينكم هنا ليه، اما دلوقتي فانا عايز اشوف مستواكم في التنشين من ساعه اخر مره واللي هتعمل كده هي الظابط ندى لانها من اكفأ الظباط في التنشين لانها متدربه عليه من صغرها زي الانسه كيان كده
جت ندى وادت لكل واحدة مسدس وقالت:
- ركزوا معايا لان الموضوع هنا يختلف عن الرمايه بشويه
ركزوا معاها وهي قالت:
- اول حاجه تعملوها وهي انكم تشدوا ضهركم وتفردوا دراعكم اللي ماسك المسدس وتحطوا دراعكم الثانيه تحت المسدس عشان تتحكموا فيه اكتر لانكم يعتبر لسه مبتدئين، في حد عايز يستفسر عن حاجه قبل ما نبدا؟!
اروى: اه انا
ندى ببرود: ايه هو استفسارك؟
اروى: هو امتى نعمر المسدس لان حسب معلوماتي البسيطه كل نوع بيختلف عن الثاني وكم عدد الرصاصات في المسدس اللي هنستخدمه
ندى: سؤال حلو، في نهايه كل يوم هعرفكم على الانواع الشائعه والنوع اللي احنا بنفضل نستخدمه وده اللي هيبقى معاكم اما دلوقتي فخلينا نبدا، في البدايه خالص المسدس هيبقى تقيل في ايديكم لانكم مش واخدين عليه بس بعد كده لما تتعودوا عليه هتحسوا ان جزء لا يتجزا من ايدكم، ودلوقتي ركزوا مع حركه جسمي وشوفوا انا هصيب الهدف ازاي
بصولها كلهم بتركيز وهي ضغطت على الزناد واصابت الهدف، ندى:
- مين يجرب؟
اروى: انا
قربت اروى منها واخذت المسدس اللي في ايدها وعملت كل التعليمات اللي ندى قالت عليها وركزت على الهدف وضغطت على الزناد، ابتسمت اروى بفرح لما عرفت تصوب على الهدف وبصت لكيان بامتنان لانها كانت كل يوم تديها معلومات عشان تعرف تصيب الهدف المظبوط
بصلها اسر باعجاب، وندى قالت ببرود:
- كويس مش وحش
خلصوا كلهم تدريب وغسان قال:
- بجد انا مبسوط منكم يا بنات على المجهود اللي انتم بتعملوه ده
ابتسموله ولؤي قال:
- يلا احنا خلصنا تدريب لحد كده النهارده، روحوا الاوضه وارتاحوا عشان بالليل ان شاء الله هتعرفوا كل حاجه
بتول: يلا يا بنات
راحوا الاوضه واروى قالت بتعب:
- انا رايحه انام ما تنسوش تصحوني بالليل
كيان: حاضر ما تقلقيش روحي نامي وارتاحي لان انتي صحيتي النهارده بدري
راحت اروى علشان تنام وليان قالت:
- انا وحشني المعسكر قوي يا بنات مين زيي
كيان: بصراحه وانا بالرغم من اننا ما قعدناش هناك كتير الا ان المعسكر وحشني قوي
بتول: تقريبا انا الوحيده اللي مش عايزه ارجع هناك ابدا ده كفايه الفول واللي عمله في بطني
كيان بضحك: تصدقي فول المعسكر وحشني هو كمان
ليان بقرف: وحشك على ايه بلا خيبه
كيان بضحك فاكره لما كنا بناكله بسرعه عشان ما نحسش بطعمه
ليان بقرف: تصدقي يا بت انتي فقر، بقى احنا بناكل هنا احسن اكل وانت تقولي وحشني الفول الاسود، وحشك قطر يا بعيده
كيان: بعيد الشر عليا
بتول: بتعب انا هاخد شاور انا عن اذنكم
ليان: اذنك معاكي يا اوختشي
كيان بقرف: انتي امتى يا بت انتي هتبطلي شغل البيئه ده بقى
ليان: لما انت يا اختي تبطلي شكل الصفار ده تعالي اشربي بيبسي
كيان بقرف: انا مش هرد عليكي احسن
ليان: احسن
بصتلها كيان بغيظ وما تكلمتش وليان قالت بنعاس:
- انا هنام جنب البت اروى لاحسن ما عنتش قادره
راحت ليان علشان تنام وكيان اعدت على السرير وهي بتفتكر ذكريات زمان، نزلت دمعه من عيونها بس مسحتها بسرعه وفردت ضهرها على السرير وهي بتبص لسقف الاوضة لحد ما نامت من غير ما تحس
• بليل
اتجمعوا كلهم في اوضه اللواء وهما مستنيينه يتكلم، راجح:
- انا عايزكم كلكم تركزوا معايا في اللي هقوله، احنا جبناكم هنا ودربناكم على اكمل وجه علشان هتتعاونوا معانا عشان نقبض على اكبر تاجر اثار وممنوعات هو وشريكه
بتول بصدمه: نعم تاجر ايه
كيان بخوف: واحنا مالنا احنا يا باشا ده احنا يا حيا الله عساكر في الجيش ومش دايمين كمان ده هي لفتره معينه وبعد كده كل واحد هيرجع مكان ماجه
اروى: دي مش مهمتنا يا باشا انتوا اكيد عندكم ظباط كتير اشمعنا احنا
ليان: انا مستحيل اخاطر بحاجه زي كده احنا مالنا احنا بكل الحاجات دي
راجح: اهدوا انا عارف انكم مصدومين وخايفين وخصوصا انكم ما عملتوش مهمات ابدا قبل كده ولا تخيلتوا حتى انكم ممكن تعملوها في يوم، بس للاسف عشان العصابه دي تعتبر اكبر عصابه في الشرق الاوسط وليهم جواسيس كتير مزروعين وسطنا فمش هينفع نكلف ابدا الظباط اللي عندنا انهم يأدوا المهمه دي لأن لازم يكون في وجوه جديده عشان ما نتكشفش والاختيار وقع عليكم انتم
كيان: واحنا مش عايزين نأدي المهمه دي شوفوا حد غيرنا
راجح: للاسف ده مش بمزاجكم ده غصب عنكم
اروى: مش بمزاجنا ازاي يعني احنا ما اترددناش ندخل الجيش عشان عارفين أن اننا هنبقى في امان طول فتره تدريبنا، انما اللي انت بتقوله ده خطر علينا واحنا مستحيل نعرض حياتنا للخطر
راجح: متقلقوش الظابط اسر وغسان ولؤي وحاتم هيبقوا معاكم وهيحموكم وكمان احنا زارعين ظباط سريين هناك يعني احنا مامنين حياتكم ولا يمكن نسمح ابدا انكم تتعرضوا لخطر
ليان بسخريه: خطر ايه ده اللي مش هتسمح اننا نتعرض له ده احنا رايحين في منبع الخطر انت بتقول ايه يا سياده اللوا!
اروى باستغراب: هو مش حضرتك قولت انهم عارفينكم؟ ازاي بقى الظباط هيجوا معانا؟
راجح: لان اسر ولؤي وغسان وحاتم ظباط في الجيش مش في الشرطه وملهمش علاقه بالحاجات دي فاحنا هنتعاون معاهم ومعاكم عشان نقبض عليهم
كيان: ايوه يا باشا بس دول اكيد عملوا مهمات قبل كده خاصه بالجيش انما احنا ملناش اي تجارب خالص
راجح: متقلقوش من اي حاجه احنا حاطين لكل واحده منكم مهمه معينه وحاطين خطه مدروسه هتمشوا عليها
قام راجح من مكانه وقال:
- احنا حاولنا كتير جدا اننا نقبض على العصابه دي وللاسف في الاخر بنفشل وفي شباب كتير بتضيع بسببهم صدقوني احنا لينا عيون كتير جوه العصابه ومراقبين كل الاوضاع هناك ومش هيحصل ليكم اي حاجه، ده غير ان بعد ما المهمه تنجح ان شاء الله كل واحده منكم هيبقى ليها مبلغ مالي كبير انتم والاربع شباب واللي عايز منكم انه يكمل معانا ويبقوا ظباط مخابرات هننفذ طلبه
اروى بصدمه: هنبقى ظباط ازاي يا باشا ده احنا في تخصصات مختلفه تماما
راجح: انتوا نسيتوا ان انا لوا ولا ايه واقدر اعمل اي حاجه، وكمان انتم مش هتبقوا ظباط عاديين انتوا هتبقوا ظباط للمهمات الخاصه
اسر بقلق عليهم: ظباط ايه يا باشا ما انت عارف ان الشغل ده مش سهل ابدا وهيبقوا دايما متعرضين للخطر
راجح: والله بقى ده هيبقى بإختيارهم هما وهما اللي هيقرروا اذا عايزين يدخلوا في المجال ده ولا لا
ليان بتوتر: وهو كل واحده مننا ليها دور ايه يا باشا
راجح: هقولكم اهو
اتحمم راجح وقال بتوتر:
- بس في حاجه مهمه الاول لازم تعرفوها
اروى باستغراب: حاجه ايه يا باشا؟
راجح بتوتر: انتي واسر وكيان غسان لازم تتجوزوا
كلهم بصدمه: نعم
اسر بصدمه: انت بتقول ايه يا سيادة اللوا
غسان بصدمه: جواز جواز ايه
كيان بصدمه: جواز ايه يا باشا
اروى بصدمة: انت اكيد بتهزر صح؟
راجح: لا انا مش بهزرش
اسر بصدمه: ما بتهزرش ازاى يا سيادة اللوا انت حضرتك مدرك للي انت قولته
راجح: اه مدرك وعارف انا بقول ايه كويس قوي
كيان بتوتر: وانت حضرتك عايزنا نتجوز ليه؟
راجح: لاسباب مهمه اوي هتعرفوها دلوقتي
وقف راجح قدام اروى وقال:
- انتي واسر هتمثلوا انكم رؤساء العصابه الثانيه
اروى بتوتر: ايوه يا فندم بس انا لحد دلوقتي مش فاهمه احنا المفروض نتجوز ليه؟
راجح: عشان فريد بيحب الستات المتجوزه
اسر بصدمه: نعم! تقصد ايه بانه بيحب الستات المتجوزه!!
راجح: انا قصدي مفهوم، يعني لما فريد يعرف ان هي متجوزه هيحاول يقرب منها وهي بدورها تتسهوك عليه شويه عشان تقرب منه وتحط له منوم في العصير اللي هيشربه وتجيب الاوراق اللي هو مخبيها في الخزنه بتاعته
اسر بصدمه وغيرة: تتسهوك عليه انت بتقول ايه يا سياده اللوا دي مراتي
اتوترت اروى اوي اول لما قال ان هي مراته، وراجح قال باستغراب:
- اولا هي لسه ما بقتش مراتك ثانيا الجواز ده هيبقى جواز مؤقت وعلى الورق بس انت ايه اللي مضايقك
ما ردش اسر عليه بس كان حاسس بغليان جواه، اروى بتوتر:
- طب ما نمثل يا فندم اننا متجوزين من غير ما نتجوز
راجح: للاسف مش هينفع لان فريد كده كده هيتاكد اذا كنتم انتم متجوزين ولا لا من قسيمه الجواز اللي هتقدموها للاوتيل اللي هتقعدوا فيه عشان يسمحوا ليكم انكم تقعدوا في اوضه واحده
اروى بصدمه وتوتر: نعم اوضه واحده ايه اللي هنقعد فيها
راجح: اومال انتي مفكره ايه ما عشان كده انا هخليكم تتجوزوا
سكتت اروى وهي حاسه باحراج من نظرات اسر، وليان قالت:
- طب انا دوري ايه يا باشا
راجح: انت هتبقي البيئه بتاعتهم
ليان بصدمه: بيئه
راجح: اصل رامي شريك فريد بيحب البنات الشعبيه والبيئه قوي وهو اول لما هيشوفك هيحاول يقرب منك زي ما فريد هيحاول يقرب من اروى
سكتت ليان بصدمه وكلهم كتموا ضحكتم عليها بصعوبه، بتول بقرف:
- هي ايه الرجاله دي واحد بيحب الستات المتجوزه والثاني بيحب البنات البيئه اللي زي ليان
ليان بغيظ: قصدك ايه يا حبيبتي
كانت لسة بتول هترد عليها بس واحد دخل من الباب وقال:
- انا جيت يا فندم
كل البنات بصتله بصدمة وليان قالت بذهول:
- ابراهيم
بصلها ابراهيم بصدمة وقال: هو انتي