رواية حب في مهمة رسمية
الفصل الحادي عشر11
بقلم ايه الموافي
قرب منها غسان وقال بحده:
- اللي فات كان حاجه ودلوقتي بقى حاجه تانيه خالص، انتي دلوقتي مرات الظابط غسان، يعني مراتي انتي فاهمه
كيان بتوتر من قربه: فاهمه بس انا عملت ايه
غسان بحده انت ازاي يا هانم تخرجي بالمنظر ده افرضي حد تاني كان هو اللي بيخبط على الباب وشافك بالمنظر ده
كيان بتوتر وفيها ايه يعني
بعد غسان عنها شويه وبص ليها من فوق لتحت، اتحرجت كيان من نظراته وهو قال بعصبيه:
- هو ايه ده اللي فيها ايه انتي مش شايفه لبسك ضيق ازاي
كيان: ده العادي بتاعي
غسان بحدة: لا يا حبيبتي من النهارده نظام لبسك كله هيتغير
كيان بصدمه: انت بتقول ايه؟
غسان ببرود: بقول اللي انتي سمعتيه
اتعصبت كيان اوي وقالت:
- شكلك كده نسيت ان جوازنا ده على ورق وانت ملكش حكم عليا
اتعصب غسان اوي وقال: لا مش ناسي بس انتي مراتي لحد ما المهمه تنتهي، يعني طول ما انتي مكتوبه على اسمي ليا حكم عليكي
كيان بإستنكار: لا والله
غسان: متقاوحيش معايا عشان متعصبش عليكي
كيان بتحدي: طب اتعصب كده عليا وريني، حاكم انا مابخافش
بصلها غسان بعصبيه ونفسه كان عالي من كتر الغضب، بلعت كيان ريقها بخوف من منظره وقالت بتوتر:
- بس ساعات بخاف عادي يعني
غسان وهو بيتجز على سنانه:
- ادخلي اندهي صحابك وتعالوا على مكتب اللوا
كيان بتوتر: بس كده من عينيا حاضر يا باشا
مشي غسان وكيان اتنهدت براحه وقالت:
- الحمد لله انه مشى ده كان هياكلني
دخلت كيان الاوضه وصحت اروى اللي نامت تاني وصحت بتول وليان، بتول بتذمر:
- ياربي بقى امتى نخلص من القرف ده
اروى بسخريه: نخلص ايه ده احنا لسه داخلين على ايام سودا
ليان بزهق: يا اختي انا مش عارفه ايه القرف ده يعني ماينفعش يستنوا كمان ساعتين ثلاثه كده لحد ما نتنيل نصحى
كيان بسخريه: هو انتي مفكره نفسك في اوتيل عشان يستنوكي اما تصحي
دخلت بتول الحمام عشان تغسل وشها واروى قالت بتوتر:
- هو انتي هتمشي انهارده يا كيان؟
كيان بتوتر: للاسف اه
ليان: ربنا معاكي
كيان: ومعاكم انتوا كمان، هو انتوا نسيتوا ان كلها يومين وتحصلوني على هناك؟
ليان: عندك حق
خرجت بتول من الحمام فقالت اروى: يلا نروح
كانت كيان هتخرج بس افتكرت لبسها فقالت بتوتر:
- استنوا هغير بسرعه واجي
اروى: مش لازم تغيري ما احنا كلنا رايحين بالبيجامات اهو
كيان بخوف: ما هو مش هينفع
ليان باستغراب: مش هينفع ليه يعني؟
كيان بتوتر: اصل بصراحه غسان شافني وانا باللبس ده واتعصب عليا
رفعت اروى حاجبها وقالت:
- ويزعقلك ليه ان شاء الله؟
كيان: عشان بيقول انه ضيق
اروى: ما انتي طول عمرك بتلبسي كده
ليان: شكله هببتدي تحكمات والجو ده
اروى: انتي هتسيبيه يتحكم فيكي يا كيان! ده حتى جوازكم مؤقت
كيان بخوف: ما هو بصراحه كده انا ماكنتش هسمح ليه انه يتحكم فيا بس لما اتعصب خفت منه، حسيت انه هيبلعني
اروى بسخريه: جبانه
كيان بغيظ: على اساس يعني لو كان اسر اللي اتعصب عليكي ماكنتيش هتخافي منه
اروى بغرور: نعم يتعصب على مين يا حبيبتي طب يعملها كده، وكمان مش انا اللي اسمح لواحد انه يتحكم فيا
بتول بسخريه: شكلك كده نسيتي لما اغمى عليكي بسببه من كتر الخوف
اروى بغيظ: انا كنت زمان حاجه ودلوقتي حاجه تانيه خالص
ليان بسخريه: اما نشوف
اروى بتحدي: ما انتي هتشوفي فعلا
بتول: روحي يلا يا كيان غيري هدومك عشان منتاخرش عليهم
كيان: حاضر
غيرت كيان هدومها وراحوا المكتب ولقوا كلهم متجمعين هناك، بص غسان على هدوم كيان برضا وراجح قال:
- انتوا تاخرتوا ليه؟
ليان: ما انت عارف يا باشا ان احنا بنات وبنتاخر
كان لسه راجح هيتكلم بس اسر قال بحده وهو بيبص على اروى:
- معلش يا باشا استنى عما اروى تغير هدومها وتيجي
بصله راجح بتعجب واروى قالت بإستغراب:
- اغير هدومي
اسر بحدة: هو انتي فاكرة نفسك فين عشان تيجي بالبيچاما اللي مبينة تفاصيل جسمك دي
اروى بتحدي: وانت مالك انت
شاور اسر لأصحابه بغيرة عشان مبيصوش عليها وقال بحدة:
- مالي ونص انتي دلوقتي مسؤولة مني
اروى: اه ده انتوا مطبخينها انتوا الاتنين بقى، لا بقولك ايه جو انتي مراتي وتسمعي كلامي ده مش عليا انت ملكش حكم عليا انت فاهم
مردش اسر عليها وشالها فقالت بصدمة:
- انت بتعمل ايه
اسر ببرود وهو بيخرج بيها بره:
- هنشوف كلام مين فينا اللي هيمشي
كتموا البنات ضحكتهم عليها بصعوبة وهي قالت بعصبية:
- انت مجنون
اسر بإنزعاج: وطي صوت اللي عامل زي السرينة ده
اروى بعصبية: نزلني
مردش عليها واول ما وصل قدام الاوضة قال ببرود:
- ادخلي غيري
حطت ايدها على وسطها وقالت بتحدي:
- مش مغيرة
اسر: ماشي
شدها وراه فقالت بغيظ:
- انت رايح فين
دخل بيها الاوضة وقال ببرود:
- لو مغيرتيش دلوقتي انا هغرقك بماية ساقعة
اروى بصدمه: مايه ساقعه
اسر ببرود: اه تحبي تشوفي؟
مردتش عليه فقال: من الاخر كده انتي هتغيري ولا لا؟
اروى بعند: لا ووسع كده
اسر ببرود: انتي اللي جبتيه لنفسك
شالها اسر على ايده فقالت اروى بعصبية:
- نزلني يا اسر
دخل بيها الحمام وفتح الدش فقالت اروى بصدمة:
- انت هتعمل اللي قولت عليه بجد
اسر ببرود: مش اسر اللي يقول كلمة ومينفذهاش
اروى بخوف: خلاص هغير متجيبش الماية عليا
اسر بعند: بس انا بقى جالي مزاج اغرقك
اروى بغيظ: قولت هغير متبقاش عنيد بقى
اسر بسخرية: وهو مين فينا اللي عنيد انا ولا انتي؟
اروى بغيظ: نزلني يا اسر
نزلها اسر وهو قال ببرود:
- خمس دقايق والاقيكي لابسة، انا هستناكي بره
خرج اسر واروى قالت بغيظ:
- هو مفكر نفسه مين
غيرت هدومها وخرجت بره فقال اسر بغرور:
- مش بطال
جزت على سنانها بعصبية وسابته ومشت، ضحك اسر عليها ودخل وراها، اول ما اروى دخلت تجاهلت نظرات البنات اللي بتبصلها بضحك، اروى بغيظ:
- حضرتك جمعتنا ليه يا سيادة اللوا؟
راجح: جمعتكم عشان هقولكم على الخطة اللي هتمشوا عليها، ركزوا معايا كويس
كلهم ركزوا عليه وراجح قال الخطة بتاعته، راجح:
- حد عنده اى استفسار؟
كلهم: لا
راجح: حضر نفسك يا غسان انت وكيان عشان هتسافروا كمان شوية، قسيمة الجواز اجت اهي
غسان: تمام يا فندم
بص راجح لكيان وقال:
- بلاش التوتر ده يا كيان كل حاجة هتبقى تمام ان شاء الله
كيان: ان شاء الله
راجح: جهزي شنطتك يلا عشان لما توصلوا تكونوا وصلتوا على بليل كده
كيان بتوتر: تمام يا فندم
راحوا الاوضة وكيان حضرت شنطتها، مسكت اروى ايدها:
- متخافيش يا كيان
كيان بإبتسامة: حاضر
ليان بتأثر: هتوحشيني اوي
كيان: ده هما يومين يا ممحونة
ليان بغيظ: تصدقي انا غلطانة، طب غوري يلا
ضحكوا عليها وكيان قالت:
- وانتي كمان هتوحشيني، كلكم هتوحشوني
بتول بدموع: هو احنا اوفر كده ليه، اومال لو مكناش جايلنك بعد يومين كان ايه اللي هيحصل
كيان بتأثر: متخلونيش اعيط بقى
حضنوا بعض هنا الأربعة واروى قالت:
- تصدقي دي اول مرة واحدة تسافر لوحدها من غير التانية
ليان بغمزة: لوحدها ايه يا بنتي ما معاها جوزها
كيان بسخرية: اومال لو مكنتيش عارفة اللي فيها
بتول: ومين عالم مش يمكن تحبوا بعض ومتطلقوش
كيان بصدمة: نحب بعض، شكل كده قلة النوم اثر عليكي
سمعوا صوت خبط على الباب فقالت كيان بدموع:
- عايزين حاجة
اروى بحزن: مش عايزين غير سلامتك
كيان: لا اله الا الله
كلهم: محمد رسول الله
مسكت كيان شنطتها وخرجت بره الاوضة ولقت غسان واقف مستنيها وهو ماسك شنطته، غسان: يلا
مشت معاه وخرجوا من المبنى وركبوا العربية بتاعته، ساق غسان ومحدش فيهم اتكلم بكلمة، عدى وقت طويل فقرر غسان يكسر الصمت فقال:
- بقولك يا كيان هو انتي جعانة
مردتش عليه فبص عليها وابتسم لما لقاها نايمة
• في المعسكر
بتول بحزن: فيها ايه يعني لو كنا روحنا معاها
اروى بحزن: للاسف مش هينفع
ليان: تفتكروا يا بنات احنا هنرجع من المهمة دي عايشين
بتول بغيظ: بقولك ايه ليان اخرسي، الواحد اصلا مرعوب من غير اى حاجة
ضحكت اروى فبصولها بإستغراب، ليان:
- بتضحكي على ايه؟
اروى: بصراحة انا مكنتش متوقعة خالص أن افلام الاكشن اللي احنا كنا بنتفرج عليها هنعملها في الحقيقة
بتول بضحك: عندك حق
ليان: بس يا ترى هنبقى زي البطلات اللي بتكسب في الاخر ولا هنبقى لفتة
بتول بغيظ: انا نفسي اعرف انتي بتجيبي مصطلحاتك دي منين
اروى بغيظ: يعني هو ده اللي هامك انتي كمان
ليان بغيظ: قوليلها
اروى بنعاس: انا هنام لاني معنتش قادرة افتح عيوني اكتر من كده
بتول: وانا كمان بصراحة
قفلت ليان النور وناموا هما التلاتة بعمق من كتر التعب بس بالهم مشغول بكيان
• بليل
صحت كيان وهي حاسة أن في حد بيهزها، بصت جنبها فلقت غسان بيقول بهدوء:
- احنا وصلنا
بصت حواليها وقالت:
- هي الساعة كام دلوقتي؟
غسان: الساعة تسعة
كيان: يااه هو انا نمت كل ده
غسان بإبتسامة: انتي مكنتيش حاسة بالدنيا، ده العربية خبطت في مطب جامد عشان مشوفتوش وانتي متأثرتيش وفضلتي لسة نايمة
كيان بإحراج: اصل انا بقالي كام يوم منمتش فعشان كده مكنتش حاسة بحاجة
نزل غسان من العربية وفتحلها، بلعت كيان ريقها بخوف فمسك غسان أيدها وقال:
- انا مش عايزك تخافي طول ما انتي معايا
بصتله بتوتر فلقته بيبص في عينها بعمق، احمرت خدودها بكسوف وهو ضحك عليها وقال:
- يلا
نزلت كيان من العربية وهو مسك الشنط ودخلوا جوه، غسان لموظفة الاستقبال:
- لو سمحتي عايز احجز غرفة اقضي فيها شهر العسل
الموظفة بإعجاب: هو انت عريس جديد
اتعصبت كيان لما لقت نظارات الموظفة هتاكله فقالت وهي بتجز على سنانها:
- اه يا اختي عقبالك
الموظفة: احم، ممكن اشوف قسيمة الجواز
غسان: اه طبعا اتفضلي
ادالها غسان القسيمة فقالت:
- اوضة لمدة شهر صح؟
غسان: اه
حجزتلهم الموظفة الاوضة وادتلهم المفتاح، ابتسم غسان وقال:
- شكرا
مشوا من قدامها وكيان قالت ببرود:
- حلوة مش كده
غسان بإستغراب: هي مين؟
كيان ببرود: الموظفة
غسان بإستغراب: وانا مالي إذا كانت حلوة ولا لا
كيان ببرود: اومال الابتسامة دي ايه
بصلها غسان بعدم فهم وكيان قالت:
- انا جعانة اوي في ايه هنا يتطفح
غسان بصدمة: يتطفح! دي مش ليان بس اللي بيئة على كده
كيان ببرود: قصدك ايه
غسان بسخرية: ماقصديش حاجة، ادخلي يلا يا اختي عشان نطلب الطفح
دخلت الاوضة وهو دخل وراها، اول ما قفل غسان الباب اتوترت كيان اوي بس مبينتش، غسان:
- اطلبي اكل على مزاجك على ما اخد شاور
كيان: احم بقولك يا باشا
غسان بصدمة: باشا ايه انتي هتودينا في داهية، انا أسمى غسان وبس
كيان: حاضر يا غسان، بقولك
غسان: قولي وخلصيني
كيان: هو الاكل على حساب اللوا صح؟
غسان بإستغراب: اه بس بتسألي ليه؟
كيان بفرح: حيث كده بقى فهطلب لحمة براحتي
ضحك غسان عليها ودخل الحمام وهي طلبت الاكل، خرج غسان من الحمام ولقى كيان بتهز في رجلها بسرعة، غسان بإستغراب:
- هو في ايه؟
كيان: مستنياك عشان ناكل، انت مش شامم ريحة الاكل عاملة ازاى؟
ضحك غسان عليها واعد جنبها وبدأوا اكل، لما خلصوا قال غسان:
- انا هنام انا عايزة حاجة
كيان: انا مش جايلي نوم
غسان: طبعا مش هيجيلك نوم ده انتي نمتي الطريق كله
كيان بحيرة: طب انا المفروض اعمل ايه دلوقتي؟
غسان: معرفش اعملي اى حاجة انا هموت وانام
كيان: خلاص انا هنزل تحت شوية
غسان بصدمة: لا طبعا انتي اتجننتي
كيان باستغراب: ليه؟
غسان: تنزلي فين والاوتيل ده مليان شباب وفي منهم اللي مش كويس
كيان: طب وفيها ايه؟
غسان بصدمة: نعم يا اختي
كيان: مش قصدي بس انا مش صغيرة ولو حد منهم فكر يقربلي هديلهم بالشبشب
غسان بغيظ: اتهدي يا كيان عشان مفيش نزول تحت
كيان بغيظ: ده انت رخم
غسان بحدة: انا ايه؟
كيان بخوف: قصدي انا اللي رخمة
مردش عليها فقالت:
- خلاص هكلم البنات اكيد صاحين
غسان: لا طبعا ممنوع
كيان بغيظ: هو كل حاجة ممنوع ممنوع
غسان بغيظ: هو انتي مش مستوعبه لحد دلوقتي اننا في مهمة! احنا مش بنتفسح هنا ها
كيان بغيظ: انا هتنيل اترزع على الكنبة لحد ما اتخمد
غسان ببرود: احسن حاجة
غمض غسان عيونه وراح في النوم وكيان قالت بغيظ:
- نوم الظالم عبادة
• في مبنى المخابرات
كانوا كلهم في الاوضة فقال راجح:
- عايزكم كلكم تطمنوا على كيان هي وصلت بخير هي وغسان
اروى: الحمد لله
بتول: احنا لو حصلنا حاجة يا باشا هتبقى في رقبتك
راجح: وانا متحمل المسؤلية دي بس مش معنى كده انكم تستهبلوا فيها
ليان: قصدك ايه؟
راجح: قصدي انكم لازم تعقلوا وجو الخناق اللي بينكم كل شوية ده ممنوع منعا باتا يحصل هنا
اروى: لا من الناحية دي اطمن يا باشا
راجح: ربنا يستر
شغل راجح اغنية هادئة وقال:
- يلا وروني انسجامكم مع بعض
بصله كلهم بإستغراب فقال راجح:
- قصدي أن كل واحد يرقص سلو مع شريكه في المهمة عشان انتوا اكيد هترقصوا في مرة هناك
ليان ببرطمة: سلو، وماله يعني الرقص الشعبي هاتولي كده بدلة بترتر وانا اوريكم الانسجام على اصوله