رواية مراتي طفله مجنونه
الفصل السابع7
بقلم ايه الموافي
صحى كريم من النوم بس اتخض لما لقى ليلى بتجري بره الاوضة وهي لابسة هدوم شبه الحرامية، قام كريم من على السرير بسرعة وجري وراها وقال:
- خدي يا بت تعالي هنا
كانت هتقفل باب اوضتها عليها بس هو مسكها بسرعة وقال:
- انتي لابسة كده ليه يا بت انتي
ليلى: نزل ايدك من عليا يا شبح
كريم بصدمة: شبح
ليلى: ياض بقولك نزل ايدك بدل ما ازعلك
كريم بسخرية: هتزعليني ازاى يعني؟
عضته ليلى من ايده جامد فسابها كريم وقال بوجع:
- اه يا بنت العضاضة
قفلت ليلى عليها الباب بسرعة وكريم قال بغيظ:
- بقى بتعضيني يا ليلى!! ماشي
سمع كريم جرس الباب ففتحه واستغرب لما لقى جيرانه الاتنين واقفين على الباب، كريم بإستغراب:
- في ايه؟
هادي: انت متعرفش اللي حصل؟
كريم بإستغراب: حصل ايه؟
لؤي: مش كان في حرامي عندنا
كريم بصدمة: حرامي
هادي: اه والله، انا مش عارف حرامية ايه اللي بقت في عز النهار كده
كريم بتوتر: هو الحرامي كان لابس ايه؟
لؤي: احنا مشفناهوش غير من ضهره وهو بيجري بس كان لابس اسود
كريم بتوتر: انتوا متأكدين انه حرامي
هادي: طبعا متأكدين ده سرق حاجات كتير من عندنا
كريم بصدمة: يا بنت ال
لؤى: في ايه مالك
كريم بندب: مفيش يا اخويا كمل
لؤي: انا اتسرق مني الساعة بتاعتي ومراتي اتسرق منها طقم ملايات
كريم بإستغراب: هو ايه اللي يخليها تسرق طقم ملايات
هادي: بتقول حاجة
كريم بتوتر: لا مبقولش، انت اتسرق منك انت كمان ايه
هادي: سرقت الخلاط بتاعي انا ومراتي
كريم بهمس: هي البت دي غبية ولا ايه؟
هادي: انا مش سامع انت بتقول ايه؟
كريم: متركزش معايا، المهم انتوا هتعملوا ايه؟
لؤى: احنا بنقلب العمارة كلها وبندور في شقة شقة لتكون هربت هنا
كريم: لا متقلقوش مفيش حد في الشقة غير مراتي
هادي: يعني امان
كريم: امان الامان يا عم، بص انا عايزك تطمن على الاخر
لؤى: هنمشي احنا بقى ولو عرفت حاجة عن الحرامي ده قولنا على طول
كريم: طبعا هقولكم على طول اومال انتوا مفكرني ايه؟ مفكرين اني هتستر على حرامي!
هادي بإبتسامة: الجيران لبعضيها فعلا
مشوا الاتنين وكريم قال بضحك:
- مراتي الحرامية يا ولاد الهبلة
برق بصدمة وقال: مراتي الحرامية!!
لطم على وشه وقال:
- يا فضيحتك في العمارة يا كريم، يا بختك الاسود يا كريم، امبارح رقاصة وانهاردة حرامية
سمع كريم صوت الباب وهو بيتفتح فاستخبى بسرعة، خرجت ليلى من الاوضة وهي بتتسحب وبتبص حواليها بحذر، اجى كريم من وراها ومسكها من قفاها وقال بغيظ:
- راحة فين يا حلوة
ليلى بقرف: يا فتاح يا عليم يا رزاق يا كريم، انت تاني
كريم: وحياة امك؟ على اساس اننا مش في شقة واحدة صح
ليلى: نزل ايدك يا اخ انت بدل ما ازعلك
كريم: تاني
ليلى: استغفر الله العظيم يارب، شكلنا كده مش هنخلص انهاردة، نزل ايدك يا اخ انت عشان التلامس حرام
كريم بغيظ: نعم يا اختي!! ولما انتي متقية اوي كده بتسرقي ليه
ليلى بحزن: اكل العيش يا بيه
كريم بسخرية: المرة دي ايه بقى، ابوكي طردك ولا ايه
ليلى: بقولك ايه يا اخ انت، تاخد كام وتحل عني
كريم بغيظ: ده انا هاخد روحك
ليلى: طب ليه الغلط ده بقى
كريم بغيظ: قبي بالحاجات اللي سرقتيها عشان نرجعها لاصحابها
ليلى: انا مسرقتش حاجة
كريم بغيظ: لا حاكم بقولك ايه، انا خلقي ضيق فقبي بالحاجات كده بدل ما اديكي على بوزك الفقر ده
ليلى ببرود: انا اه حرامية بس لا يمكن اسرق ابدا، وطالما قولت اني مسرقتش يبقى مسرقتش
كريم بسخرية: لا تصدقي اقنعتيني، انتي شكل اسلوب الاحترام ده مينفعش معاكي
قربها ليه فقالت ليلى بخوف:
- انت هتعمل ايه يا اسطا
كريم بقرف: اسطا
دخل كريم ايده في جيبها وطلع الساعة، كريم بغيظ:
- لا واضح انك مسرقتيش، ساعة الراجل بتعمل ايه في جيبك يا ليلى
ليلى بتمثيل الصدمة: ايه ده بسم الله الرحمن الرحيم، هي الساعة دي جت في جيبي ازاى
كريم بغيظ: انتي هتستعبطي يا روح امك
ليلى: طب لم الفاظك دي عشان انت اللي هتزعل في الاخر، واللي يقرب من نعناعة تبقى امه داعية عليه
كريم بقرف: ايه شغل السرسجة دي، وكمان مين نعناعة دي
ليلى: انا مش مالية عينك ولا ايه؟
كريم بغيظ: وطاما اسمك نعناعة سايباني اندهلك بإسم ليلى ليه
ليلى: اهو كيفي كده
كريم بقرف: ابعدي ايدك عن جيبك عشان اشوف سرقتي ايه تاني
ليلى بتوتر: لا مش باعدة، انت مش جبت اللي انا سرقته خلاص، عايز ايه تاني؟
كريم بشك: انتي مخبية ايه تاني جوه جيبك
ليلى بتوتر: مش مخبية حاجة
بعد كريم ايدها عن جيبها ودخل ايده وطلعها تاني، كريم بصدمة:
- دي الفيزا بتاعتي
ليلى بتوتر: انا معرفش برضو ايه اللي جابها لجيبي
كريم بغيظ: لا والله، على اساس ان الفيزا ليها رجلين تستخبى في جيبك صح؟
ليلى بنفخ: يا عم ما تحل عني على الصبح بقى عشان اشوف رزقي
كريم بغيظ: منتيش ماشية من هنا غير لما نشوف هنرجع الحاجات لاصحابها ازاى
ليلى: طب بقولك ايه انا عندي فكرة حلوة اوي
كريم بزهق: مش عايز اعرف
ليلى: اعم استنى بس متبقاش فقري كده
كريم بسخرية: انا برضو اللي فقري يا حرامية
ليلى: ومالها الحرامية يا اخويا؟ مش احسن ما اشتغل شغلانة متعبة
كريم بصدمة: هي مش كانت العكس؟
ليلى: لا ما الزمن اتغير، وبعدين اسكت بقى عشان اقول الكلمتين اللي واقفين في حنكي
بصلها كريم بقرف وهي قالت:
- ما تيجي نبيع الحاجات دي ونقسم الفلوس بالنص
كريم: هو بعيدا عن ان كده كده الحاجات هترجع لاصحابها بس فلوس ايه يا معفنة اللي هتجيلنا من الحاجات اللي انتي سرقتيها! ده انتي سرقتي خلاط وطقم ملايات في حرامية برضو عندها عقل تسرق الحاجات دي
ليلى: اهو اللي اجى في ايدي بقى
كريم: اهمدي وفكري معايا ازاى نرجع الحاجات دي من غير ما يتعرف ان انتي اللي سرقاهم
ليلى: حطهم قدام الباب واجري
كريم: تصدقي عندك حق
ليلى بسخرية: الموضوع ابسط من كده بكتير بس انت اللي معقدها
كريم بغيظ: ما انتي لو مكنتيش سرقتي مكنش حصل كل ده
ليلى ببرود: ما قولتلك نبيعهم بس انت اللي منشف دماغك
كريم بغيظ: اخرسي بدل ما اجي اجيبك من شعرك
ليلى ببرود: اتفلق بس خليك فاكر اني حذرتك
بصلها كريم بقرف ودخل اوضتها وجاب الخلاط وطقم الملايات، كريم:
- انا هحطهم قدام الباب واجري بسرعة متتحركيش من هنا
ليلى ببرود: ماشي
نزل كريم تحت وحطها قدام الباب بتاعهم، ليلى بصريخ:
- حرامي الحقوني
اتصدم كريم وجري على فوق بسرعة بس من كتر لبخته وقع على السلم، كريم بوجع:
- ااه يا ضهري
فتح هادي ولؤى الباب بسرعة وقالوا:
- انا سمعت واحدة بتقول حرامي
شاورلهم كريم على الحاجة اللي حطها وقال بوجع:
- انا قفشت الحرامي وجبت الحاجات اللي سرقها منكم بس للاسف قبل ما اخبط عليكم عشان تسلموه للبوليس زقني وهرب مني
هادي بغيظ: يعني مكنش ينفع تمسكه كويس بدل ما يهرب
كريم بغيظ: انت مش ملاحظ اني واقع على الارض بسببه؟ حد فيكم يمد ايده ليا ويقومني
شوحوا الاتنين بإيدهم واخدوا حاجتهم وكل واحد دخل شقتهم، كريم بصدمة:
- دول قفلوا الباب في وشي
قام من على الارض وقال بصوت عالي:
- اتفقوا على دي جيرة معفنة
طلع السلم وهو بيقول ببرطمة:
- يارتني كنت سمعت كلامها وبعتهم اهو على الاقل كان يعوض اى حاجة من الخساير اللي خسرتها بسبب البومة دي
بص على الباب الشقة ولقاه مقفول، كريم بغيظ:
- تعمل العملة وتهرب
خبط كريم على الباب وقال:
- افتحي يا هانم
ليلى: مش فاتحة
كريم: افتحي بدل ما اكسره على دماغك
ليلى: يا عم روح كده كتك خيبة على خيبتك
كريم: بقى كده؟ ماشي
طلع كريم المفتاح من جيبه وقال:
- الحمد لله اني عملت حسابي وحطيته في جيبي
فتح كريم الباب وهي اول ما شافته دخلت اوضتها بسرعة وقفلت الباب، كريم بعصبية:
- بقى انا تعملي فيا كده
ليلى بتوتر: ده كان مقلب يا اخويا ايه مبتحبش المقالب
كريم بعصبية: لا يا اختي مبحبهمش، واخرجي يلا
ليلى: هو انا عبيطة عشان اخرج
كريم بغيظ: ام الباب ده انا هخلعه عشان مش كل شوية تهربي مني كده
مردتش عليه وكريم سمع جري الباب، كريم بزهق:
- مين تاني، مش هنخلص بقى
راح فتحه وقال بتوتر: عم سعيد ازيك
دخل سعيد وقال:
- انا جاى افكرك ان الاسبوع قرب يخلص
كريم بتوتر: متقلقش فاكر
سعيد: انا جاى اخد منك حاجة غالية عشان اضمن انك هتدفع
كريم بصدمة: حاجة غالية
سعيد: اه وانا ايش ضمني انم مش هتخلع
كريم بغيظ: تاني يا عم سعيد
سعيد: هو في الحقيقة انا اخدت خلاص
كريم بإستغراب: اخدت ايه
سعيد: مش انت وديت عربيتك عند الاسطى محمود عشان يصلحهالك
كريم: اه
سعيد: هو جبها تحت البيت من شوية وانا اخدت المفاتيح منه ومش هديهالك غير لما تدفع الفلوس
كريم بصدمة: نعم!!
سعيد: هو ده اللي عندي
كريم بغيظ: لا طبعا انت بتقول ايه
سعيد: انا مش جاى استأذنك انا جاى اعرفك بس
كريم بتذمر: عشان خاطري متعملش كده يا عم سعيد انا كنت مستنى انها تتصلح بفارغ الصبر
سعيد: انا ماليش دعوة بالكلام ده، تجيب الفلوس تاخد المفاتيح على طول، ولا انت معاك فلوس لتصليح العربية ومعكش فلوس ليا
مشى سعيد وكريم قال بتذمر:
- حسبي الله ونعم الوكيل
قفل باب الشقة وخبط على اوضة ليلى وقال:
- اخرجي
ليلى: مش خارجة
كريم: اخرجي ومتخافيش مش هعملك حاجة
ليلى: والمفروض بقى اصدقك صح
كريم بغيظ: يا بت اخرجي ده في سبوبة حلوة ليكي
ليلى بتردد: بجد
كريم: اه والله اخرجي بس
خرجت ليلى وكريم قال:
- عندي ليكي مصلحة انما ايه لوز اللوز
بصتله ليلى بشك فقال كريم:
- انتي مش مصدقاني ولا ايه؟
ليلى: اصل لو كان فيه الخير ما كان رماه الطير
كريم بغيظ: بلدي اوي
ليلى: سبوبة ايه انجز
كريم: عندي ليكي طلعة، انما ايه
ليلى: طلعة ايه؟
كريم: سرقة
ليلى: لا يا اخويا انا توبت من الشغلانة دي
كريم بغصبية: وحياة امك
ليلى: انت هتفضل تغلط كده كتير
كريم بغيظ: انتي توبتي مرة واحدة كدة، مش كان من شوية تعالا نبيع الحاجات اللي سرقتها
ليلى: وانت مالك يا اخي، توبت مرة واحدة كده انت مالك
كريم بغيظ: لا مليش دعوة اجلي التوبة دلوقتي
ليلى: لا يا اخويا حد الله ما بيني وما بين الحرام
كريم بغيظ: اولا بطلي تقولي اخويا عشان انا مش اخوكي، ثانية انتي هتسرقي حاجة مسروقة اصلا
ليلى: انا مش فاهمة حاجة
كريم: بصي، في واحد سرق مني مفاتيح عربيتي وانا عايزك تسرقيها منه
ليلى: اه، طب ما تقول من الاول يا عم انت
كريم: اديني قولت اهو، ها ايه رأيك
ليلى: هفكر، بس انا لو عملت ده مش هعمله حبي كده كله بحسابه
كريم بقرف: متقلقيش عامل حسابي، اصل انا عارفك كلبة فلوس
ليلى: الله يسامحك يا عم، ها هتديني كام بقى
كريم: هي مية جنية مفيش غيرها
ليلى بشرشحة: نعم يا عنيا!! مية جنية ايه ده انا لو هقلب عيل صغير هاخد اكتر من كده
كريم ببرود: والله ده اللي عندي، انا معدتش حيلتي غيرها اصلا
ليلى: طب طالما انت معفن ومحيلتكش غيرها فانا هاخدها وهيبقى ليا طلبات كمان
كريم بإستنكار: طلبات!! انتي محسساني اني بتكلم مع اكتر واحدة ايدها خفيفة في السرقة
ليلى: انت مستقل بقدراتي ولا ايه؟ هات انت بس حرامي مستجد وشوف هياخد منك كام
كريم بسخرية: والهانم ايه طلباتها
ليلى: انا حاسة ان رجليا واجعني فاعملي مية بلمح وادعكلي رجلي
كريم بصدمة: نعم
ليلى: ويا حبذا لو كانت الماية دافية شويتين تلاتة كده
كريم بحدة: ده انتي محدش سمى عليكي
ليلى بخوف: في ايه
كريم: بقى انا يتقلي كده، انا هوريكي
جرى كريم وراها فقالت ليلى:
- انت بتتحول بسرعة كده ليه يا عم الحاج انت
كريم بعصبية: ده انا هكسرلك رجليكي بدل ما ادعكهملك
ليلى: ايه يا عم العنف ده اهدى على نفسك شوية
بصلها بحدة فقالت:
- خلاص يا عم بلاها الطلب ده
كريم: مفيش طلبات تانية اصلا، هو ايه عشان سكتناله دخل بحماره
ليلى بغيظ: خلاص، ممكن تهدى بقى عشان نخطط هسرق المفاتيح بتاعتك ازاى
كريم: انا بقول تستني لبليل شوية وبعدين تسرقي المفاتيح
ليلى: لا انا مبعرفش اسرق غير في عز الضهر
كريم بخوف: اوعي توديني في داهية يا نعناعة
ليلى: عيب عليك يا اسطا ده انا هبهرك
كريم: اهو انا مبقلقش غير من الكلمة دي، ربنا يستر
ليلى: طول ما معاك نعناعة متخافش
كريم: استرها علينا يارب
ليلى: قرب عشان اقولك الخطة
قرب كريم منها وهي فضلت تهمس في ودانه، كريم بقلق:
- انتي متأكدة من الخطة دي
ليلى: الخطة دي مفيش اجمد منها اصلا
كريم: اما نشوف
ليلى: هات المية جنية الاول
كريم بسخرية: انتي مفكراني غبي وهديهالك ولا ايه؟
ليلى: اه المفروض تديهالي دي حقي
كريم: انا كده كده هديهالك بس بعد ما تجيبي المطلوب
ليلى: وانا ايش عرفني بقى انك مش هتنصب عليا
كريم: لا يا حلوة سلم تستلم، يعني تسلميني المفاتيح اسلمك الفلوس
ليلى بغيظ: طب يلا قدامي
نزلوا الاتنين مع بعض وكريم وقف في اخر الشارع زي ما اتفقوا، اتصدم لما لقاها واقفة مع سعيد وبتشاور عليه وبتقول بصوت عالي:
- الراجل ده كان عايزني اسرق المفاتيح بتاعته منك
شهق كريم بصدمة وسعيد بصله بعصبية وقال:
- بقى كده، انا هوريك
جرى سعيد وراه وكريم جري وهو قال:
- ربنا ياخدك يا ليلى يارب
ليلى بضحك: يارب قدرنا دايما على فعل الخير وابعدنا يارب عن أذية الغير