رواية حب في مهمة رسمية الفصل الثامن8 بقلم ايه الموافي

رواية حب في مهمة رسمية 

الفصل الثامن8

 بقلم ايه الموافي

ليان بهمس: هي مين دي

اسر: اه هما دول

ندى: اه ده انا شكلي هتعب معاهم اوي

اسر: معلش هما كام يوم وبعد كده مهمتك تخلص

ندى بصوت عالي: اهلا بيكم انا الظابط ندى وهبقى مسؤولة عن تدريبكم لفترة صغيرة

اسر: انا عايزكم تشرفوني قدامها، الظابط ندى من اكفأ الظباط اللي هنا وانا واثق فيها وفي ادائها اللي هينقلكم لمستوى تاني

اروى ببرطمة: والله، اه واثق فيها قولتلي

كيان: ده البت دي مزة مزازة

اروى بغيظ: تعرفي تخرسي

حطت كيان ايدها على بوقها واسر قال:

- اتفضلي ارتاحي انتي يا ندى ولما نبدأ في الحتة اللي هتدربيها ليهم هقولك قبلها

ندى: ماشي يا اسر

اروى: وكمان مفيش رسميات بينهم

مشت ندى واسر قال:

- التمرينات والتدريبات هتبدأ من اول بكرة، شدوا حيلكم يا شباب

اروى ببرود: مشوفتش يعني اعتراضك او تريقتك عليها

اسر بعدم فهم: مش فاهم قصدك ايه

اروى ببرود: اصلك يعني اول ما شوفت خلقنا وانت عمال تقول خليكم في بيتكم احسن وكنت ناقص تتف في وشنا، اشمعنا يعني دي اللي فخور بيها اوي ومقولتلهاش اخرك في البيت لجوزك وعيالك ولا احنا يعني ولاد البطة السودة وهي بنت البطة البيضة

ابتسم اسر بخبث لما عرف انها غيرانة منها فقال:

- وانتي هتقرنيها بيكي ولا ايه؟

اروى بغيظ: ومقارنهاش ليه بقى ان شاء الله ناقصة ايد ولا ناقصة رجل

اسر: ولا ناقصة ايد ولا ناقصة رجل بس هي في حتة وانتي في حتة تانية خالص

اروى: ليه يعني عشان هي ظابط وانا عسكري، ما ممكن بمواهبي وشطارتي ابقى اكفأ منها كمان واترقى واغيظك

اسر بسخرية: انتي تبقي اكفأ منها؟ ده لو السما اطبقت على الارض مستحيل يحصل

اروى بتحدي: هنشوف يا اسر

اسر بإستنكار: ايه اسر دي اسمي الظابط اسر

وقفت قدامه وقالت ببرود:

- واحنا انهاردة مبنتمرنش، يعني اجازة وطالما اجازة يبقى انت مش الظابط اسر انت اسر

بصلها بغيظ وهي مشت قدامه بغرور، كيان بهمس:

- هي البت اروى كبرتها ولا انا بيتهيألي

ليان: لتكون الموكوسة غيرانة

كيان: هي فعلا غيرانة بس اكيد مش غيرانة عليه هي غيرانه منها

ليان: يمكن

اسر: حد عايز يسأل سؤال قبل ما امشي

عدي: اه انا

اسر: اسأل

عدى: هو احنا المفروض نعمل ايه دلوقتي؟

اسر: عندكم مكانين اللي تعدوا فيه مفيش تالت، يا اما الغرف اللي قاعدين فيها يا اما ساحة المبنى غير كده لا، ولا تدخلوا اوضة تانية غير بتاعتكم ولا تحاولوا تستكشفوا المكان عشان ممنوع، مفهوم

كلهم: تمام يا فندم

مشى اسر ومصطفى قال:

- ما تيجوا كلنا نروح الساحة 

ليان: لا خليها بليل عشان انا مبحبش الشمس

فؤاد: خلاص خلينا كلنا نتجمع بره على الساعة تمانية كده

كيان: تمام وانا هقول لاروى وبتول وهنيجي كلنا

فؤاد: ماشي

قاموا كلهم راحوا الاوضة ولقوا اروى راحة جاية بغيظ، كيان بإستغراب:

- في ايه

اروى بغيظ: بقى انا يقولي انتي هتقارنيها بيكي ولا ايه، ليه مشبهش ولا مشبهش

ليان: هو انتي ولعتي اوي كده ليه اول ما شوفتيها

اروى بغيظ: ايه ولعتي دي، هي ولا فارقة معايا اصلا

كيان: يعني منتيش غيرانة مينها

اروى بإستنكار: نعااام، انا اغير من دي

كيان وهي بتحاول تكتم ضحكتها: لا واضح واضح

اروى بغضب: بقى انا يقولي انتي عمرك ما هتوصلي لكفائتها طيب انا هوريه مين هي اروى لما تحط حاجة في دماغها وهوريه ازاى انا هبقى اكفأ منها ومنه هو شخصيا

ليان: كل الدعم يا وحش

كيان: بتول دي اللي مزاجها عال، كل لما تلاقي نفسها فاضية تنام انا هموت واعرف هي بتعملها ازاى 

اروى: انا هتخمد انا كمان عن اذنكم

نامت اروى جنب بتول وكيان قالت بهمس:

- اشك انها هتنام من كتر الغيظ اللي فيها

ليان: تنام ايه دي كلها شوية وتفرقع من الغيظ

اروى بغيظ وهي قافلة عنيها:

- اسكتوا انتوا الاتنين بدل ما افرقع في وشكم

سكتوا بخوف واروى فضلت تشتم اسر في سرها لحد ما نامت، عدى الوقت لحد ما الساعة جت تمانية، اتجمعوا الشباب في الساحة ولما ملقوش البنات قال عدي:

- هما نسوا ولا ايه؟

علي: اكيد لا بس تلاقيهم بيعملوا حاجة ما انت عارف ان البنات بتتأخر ومبتجيش في الميعاد المظبوط

مصطفى: عندك حق

عدي: البنات جت اهي

قربوا منهم وقالوا: انتوا اتأخرتوا ليه؟

كيان: معلش اصل بتول لما بتنام بتبقى غيبوبة وبنعاني لما بنصحيها

بتول بغيظ: ما قولتلكم روحوا انتوا وسيبوني نايمة

ليان: لا يا تيجي معانا يا منروحش واحنا وعدناهم اننا نيجي يبقى متبقاش غير انك تيجي معانا

بتول بغيظ: حد قالك قبل كده انك رخمة؟

ليان بسماحة: يااه، كتشير اوي

ضحكوا عليها واروى قالت:

- تعالوا نعد

كيان: على الارض؟

اروى: يعني انتي شايفة يعني مكان نعد فيه غير الارض

كيان: ما كده هدومنا هتتوسخ

اروى: هيتغسلوا عادي يعني يا كيان مش حوار، وبعدين هي الهدوم دي بفلوسنا؟

كيان: لا

اروى: يبقى براحتنا

ضحكوا عليها واعدوا كلهم على الارض، فؤاد: 

- المفروض نعمل ايه دلوقتي؟

اروى: ايه رأيكم لما نتكلم كلنا في حاجة معينة

ليان: اتكلموا عن الكراشات اللي في حياتكم

بتول بغيظ: انا كام مرة قولتلك اسمها الناس اللي معجبين بيهم او بنحبهم

ليان بغيظ: وانا نفسي اعرف يفرق في ايه؟

بتول: انا مبحبش كلمة كراش 

اروى بزهق: خلصونا يا جدعان عشان انا خلقي ضيق، مين هيبتدي يتكلم؟

مصطفى: بما اني عندي كراش او واحدة معجب بيها فادعولي اني اتجوزها لاني بحبها اوي

ليان: الله على الرومانسية 

ضحك مصطفى واروى قالت:

- كده بس، احكيلنا شوفتها اول مرة فين وكده يعني

مصطفى: هي بنت الجيران

عدي: ايوا بقى

بتول: وهي

مصطفى: هي ايه؟ قصدك بتحبني ولا ولا

بتول: اه

مصطفى: الحقيقة معرفش لاننا متكلمناش قبل كده بس انا حاسس من نظراتها ليا انها معجبة بيا 

كيان: ان شاء الله لما تخلص جيش اتقدملها واتكلم معاها شوية وشوف هي معجبة بيك برضو ولا لا

مصطفى بحزن: ياريت وهو انا اكره

اروى بإستغراب: وانت مالك زعلان كده ليه

مصطفى: اصل انا واحد على قدى، يعني لسة مكونتش نفسي عشان اتقدملها ولسة قدامي سنين كتيرة اوي عشان اعرف اخد الخطوة دي

فؤاد: ربنا يرزقك يا صاحبي

مصطفى: يارب

كيان: انوي انت بس وان شاء الله ربنا هيرزقك

مصطفى: ان شاء الله

علي: وانتوا يا بنات معندكوش حد كده لا كده

اروى: انا كان عندي بس طبعا يا علي انت عمرك ما هتقول لابويا بما انك قريبنا من بعيد

علي: سرك في بير اطمني

اروى: انا في ايام المراهقة كنت معجبة بواحد كان بيشتغل عند ابويا

اسر من وراها: اه وايه كمان

كلهم بصوله بصدمة وهو قال:

- ايه مالكم سكتوا ليه؟ كملوا كملوا

اعد قدامها وقال: كملي سامعك

اروى بتوتر: ها

اسر: انتي وقفتي عند انك كنتي معجبة بواحد بيشتغل عند ابوكي، كملي

اروى بتوتر: احم، انا كنت معجبة بيه بس لما لقيته مرتبط بعدت على طول

اسر: اه، لا مطلعتيش حرباية يا اروى

اروى ببرود: هو انا زي ناس

اسر: قصدك ايه

اروى: لا مقصديش

عدي: هو كان عنده كام سنة على كده عشان يبقى مرتبط

اروى: كان عنده عشرين

فؤاد: ده كده عيل انتي اعجبتي بيه ليه

اروى: يعني انا اللي كنت كبيرة، ما انا كنت عيلة برضو وهبلة

اسر: كويس انك عارفة نفسك

اروى بغيظ: كنت هبلة اه بس انا دلوقتي كبرت وعقلت

اسر: لا مهو واضح

قام اسر وقال: روحوا ناموا يلا عشان هتقوموا بكرة بدري

ليان بصدمة: تاني

اسر: هو انتوا مفكرين انك جاين هنا عشان تلعبوا؟ اعتبروا نفسكم لسة في معسكر الجيش

مشى اسر وبتول قالت بزهق:

- امتى نخلص بقى

اروى بتحدي: وماله لما نقوم بدري، على الاقل هنبقى مليانين نشاط

بتول بصدمة: معقولة انتي اللي بتقولي كده

كيان بضحك: اصلها بعيد عنك داخلة تحدي مع نفسها ومش هتتهد غير لما تنفذه

بتول بإستغراب: تحدي ايه ده

اروى: لا ده الموضوع طويل هبقى احكيهولك

قاموا كلهم وودعوا بعض ورجعوا الاوضة، اروى:

- بقولك يا كيان

كيان: ايه

اروى: انتي بتشني ازاى

كيان: انا برفع ضهري وبمسك السهم 

اروى بمقاطعة: لا مش قصدي على السهم انا قصدي على العموم يعني

كيان: اه فهمتك، بص انتي بتقفلي العين اليمين شوية وبتركزي على الهدف اللي عايزة تصوبي عليه بالعين الشمال، فهمتي

اروى: اه فهمتك

كيان: انا راحة انام هتنامي ولا ايه؟

اروى: لا ناموا انتوا انا مش هنام دلوقتي

كيان: ماشي، تصبحي على خير

اروى: وانتي من اهله

راحوا ناموا واروى جابت كوباية وحطتها على الارض بعيد عنها شوية ومسكت اقلام وفضلت تحاول تدخلهم فيها وهي بعيد عنهم، فضلت تدرب عليهم طول الليل ولما تتقن التنشين شوية تبعد الكوباية عنها اكتر لحد ما تعبت فراحت تنام

• تاني يوم

خبط الراجل اللي كان خبط عليهم قبل كده وقال:

- تعالوا ورايا

اروى: استنى يا عم انت

الراجل بإستغراب: ايه

اروى: مش تقولنا اسمك الاول عشان نبقى عارفين انت مين

الراجل: مع ان دي حاجة مش هتفيدكم بس ماشي انا اسمي سلطان

كيان: عاشت الاسامي يا سلطان

سلطان: تعالوا ورايا بقى

بتول: على فين

سلطان: هتعرفوا لما توصلوا

مشوا وراه لحد ما دخلوا اوضة صغيرة شوية، سلطان:

- استنوا هنا

ليان: انت رايح فين

مردش عليها ومشي وليان قالت:

- ايه الجو ده

الباب اتقفل عليهم مرة واحدة، راحت ليان عشان تفتحه بس قالت بصدمة:

- الباب مبيفتحش

اروى: مبيفتحش ازاى يعني

ليان: مبيتفتحش اهو تعالي جربي كده

حاولت اروى تتفتح الباب بس معرفتش، اروى:

- ده زي ما يكون الباب مقفول من بره

بتول بخوف: انا بدأت اخاف

كيان: متخافيش كلها شوية وحد يجي يفتح

بتول بخوف: ولو محدش فتح

اروى بغيظ: هنخبط على الباب جامد يا بتول او هنعمل اي حاجة، وكمان انتي نسيتي ان اللي اسمه سلطان دهجاابنا هنا، يعني اكيد احنا هنا بعلمهم فمتخافبش

صرخت بتول مرة واحدة بخوف فقالت اروى:

- في ايه

شاورت بتول فبصوا ناحيتهم واتصدموا لما لقوا تعبان بيقرب منهم، كيان بصدمة:

- ده جاى ناحيتنا

ليان بخوف: هش هش

اروى بغيظ: هش ايه هو دبانة

ليان بخوف: اعمل ايه يعني

قلعت اروى الچاكت بتاعها واول ما التعبان قرب منهم حدفته عليه، بتول بصدمة:

- ببساطة كده الموضوع خلص

اروى: انا كنت خايفة بس لو سيبت الخوف يتغلب عليا مكنتش هعرف افكر ولا اعمل حاجة

الباب اتفتك مرة واحدة واسر قال:

- بصراحة انا متوقعتش رد الفعل دي

اروى بصدمة: هو ده كان مقلب 

اسر ببرود: مكنش مقلب ده كان تدريب من ضمن التدريبات

كيان بصدمة: تدريب ايه لو اروى مكنتش عملت حاجة كان فاتنا موتنا

اسر ببرود: لا متخافيش ده تعبان آلي مش حقيقي، تعالوا ورايا يلا

مشوا وراه وهما متغاظين اوي، اسر:

- انت لازم تتحكمي في خوفك شوية يا انسة بتول

بتول بتوتر: حاضر

ليان بإستغراب: اومال فين الشباب

اسر ببرود: ملكيش دعوة

ليان بغيظ: ما تفك معانا كده شوية يا باشا، ده ايه اصله ده

اسر بحدة: بتقولي حاجة

ليان بخوف: لا يا باشا مبقولش هو انا فتحت بوقي اصلا

فتح اسر باب اوضة من الاربع اوض اللي جنب بعض وقال:

- ادخلي هنا

ليان بخوف: ليه يا باشا

اسر: ادخلي وانتي هتعرفي

دخلت ليان وهو قفل الباب وراها بالمفتاح، اروى بصدمة:

- انت بتعمل ايه يا باشا

اسر ببرود: دول متاهات كل واحدة تدخل اوضة وتحاول تخرج منها من الباب التاني

ليان بصدمة من جوه: وانا اعملها ازاى دي بس يا باشا

اسر ببرود: شوفي انتي بقى

بتول بخوف: استأذن انا بقى

اسر بحدة: تعالي هنا

بتول بخوف: نعم

شاور اسر على الاوضة التانية وقال:

- ادخلي يلا

بتول وهي بتبلع ريقها: حاضر يا باشا

دخلت بتول واسر قفل الباب وراها بالمفتاح، بصتله اروى ببرود ودخلت الاوضة من غير ما يقولها وكيان دخلت الاوضة الرابعة، قفل اسر عليهم الباب وقال بصوت عالي:

- لما اعد من واحد لتلاتة تبدؤا مفهوم

كلهم: مفهوم يا باشا

اسر: تلاتة ابدأوا يلا

اروى بتحدي: انا لازم اكسب واعرف اخرج من هنا عشان يعرف اني لما بقول حاجة بنفذها وانا هبقى اكفأ من البت اللي بيمجد فيها دي

فضلوا كلهم يحاولوا يخرجوا من هنا بس كل نتايجهم باءت بالفشل، اروى بإصرار:

- انا لازم اخرج يعني لازم اخرج

افتكرت اروى قلم الكحل اللي في ايدها فقالت:

- اسفة مقدما على اللي هعمله فيك بس مفيش حل تاني ‏

طلعت قلم الكحل من جيبها وعلمت بيه على الحيطة اللي جنبها وكل ما تمشي حتة جديدة تعلم بالكحل على الحيط عشان تعرف هي مشت فيه قبل كده ولا لا

كانوا كلهم بيبصوا عليها من الكاميرا ومستغربين هي ليه حاطة كحل في جيبها، بعد ما خلصت اروى خالص لقت طريق الحيطة بتاعته معلمتش بالكحل عليه فيه فمشت فيه وابتسمت بفرح لما لقت الباب، فتحته وخرجت منه وقالت بفرح:

- انا مش مصدقة اني نجحت

تلاشت ابتسامتها لما ندى قالتلها ببرود:

- مبروك

           الفصل التاسع من هنا 

لقراءة باقي الفصول اصغط هنا