انا عاملة مسلسل خفيف في رمضان ١٥ حلقة، هنزل الحلقة يوم اه ويوم ولا واليوم اللي مش هنزل في الحلقة هنزل اسكريبت خفيف ان شاء الله+ رمضان كريم عليكم كلكم
مسكته من هدومه وقالت بغيظ:
- ما تطلقني بقى يا بني ادم انت
كريم: هأ أو أو، أ ايه يا عنيا اطلقك، لا يا حبيبتي اخلعيني انتي
ليلى بغيظ: وانا عبيطة عشان اخلعك
كريم: اومال انا اللي عبيط يعني، انا لو عليا عايز اطلقك من بكرة بس هنعمل ايه بقى انتي ناسية ان لو انا طلقتك كل الورث هيبقى ليكي انتي بس
ليلى: ما انا لو خلعتك كل الورث هيبقى ليك انت بس
كريم: يبقى تتلمي يا دكتورة المجانين انتي عشان جدك كاتب في الوصية بتاعته انا لو حد مننا اتطلق من التاني بمزاجه الورث بتاعه هيبقى للتاني
ليلى بغيظ: وليه ماتتلمش انت وتحترم نفسك يا دكتور البهايم
كريم بغيظ: انا دكتور البهايم
ليلى بغيظ: يعني انا اللي دكتورة مجانين
كريم: بقولك ايه يا ست ليلى لو انتي مفكراني قيس اللي هيبقى ميت فيكي تبقي بتحلمي، اني سي السيد يا حبيبتي عارفة يعني ايه سي السيد
ليلى بعصبية: سي السيد على نفسك يا حبيبي
زقها كريم بخفة وقال: من انهاردة نظام البيت ده هيتغير، لما انا اخلص اكل انتي تاكلي، اول ما ارجع من الشغل تقلعيني الجزمة، كلمتي انا اللي هتمشي في البيت ده
ليلى بشرشحة: نعم يا اخويا! اقلعك ايه يا حبيبي، الله يرحم ابوك اللي كان بياكل المكرونة بإيديه
كريم بغيظ: احترمي نفسك بدل ازعلك
حطت ليلى ايدها على وسطها وقالت:
- زعلني يا اخويا، يلا وريني انت هتعمل ايه
قرب كريم منها وقال بحدة وهو بيمسكها من الزعبوط:
- انتي لو مدعكتيش رجلي دلوقتي بماية دافية وملح انا هوريكي اسود ايام حياتك
كانت ليلى لسة هتشتمه بس ابتسمت ابتسامة صفرا وقالت بتصنع الخوف:
- طب بعد عني شوية
كريم بذهول: انتي خوفتي بجد ولا ايه؟
بعدت عنه وقالت: انا هعمل اللي انت عايزة بس متعملش فيا حاجة
بصلها كريم بشك وهو شايفها راحة المطبخ عشان تجيب الماية، اعد كريم على الكنبة وقال بذهول:
- هي فعلا هتعمل اللي انا قولتلها عليه؟
ابتسم بغرور وقال: طول عمري مسيطر
ملحقش يكمل كلامه لانه صرخ مرة واحدة لما اتكب عليه ماية سخنة، ليلى بسخرية:
- قال ادعكلك رجلك قال، فوق يا بابا ده انا ليلى مش امينة
جرت على الاوضة بسرعة لما لقت عيونه حمرا من العصبية، جرى وراها بس كانت هي قفلت الباب بالمفتاح، كريم بعصبية:
- افتحي الباب ده
ليلى: لا مش فاتحة
كريم بغيظ: افتحي يا ليلى بدل ما اكسر الباب عليكي
ليلى بسخرية: يا عم روح وانت شبة خلة السنان كده
كريم بغيظ: ماشي يا ليلى، مسيري هحفقك يعني انتي هتفضلي طول اليوم في الاوضة يعني
مشى كريم وليلى قالت بغيظ: الله يسامحك يا جدي كله بسببك، يعني جوزتني للبني ادم ده غصب عني وفي الاخر نتصدم كلنا بالوصية بتاعتك دى
فتحت ليلى الدرج بتاعها وشربت كذا حباية برشام من غير ما تبص على العلبة، بعد ما شربت اتصدمت من اللي شربته وقالت بصدمة:
- هارسوح، هو انا شربت ده بدل ما اشرب المنوم!!
اغمى عليها مرة واحدة وهي مش حاسة بأي حاجة
• بليل
اجى كريم من بره بس اتصدم لما لقى ليلى اعدة على الكنبة ولابسة جلبية صعيدي وعمة على راسها، كريم بصدمة:
- انتي ايه اللي عملاه في نفسك ده يا ليلى!
ليلى بحدة: ليلى مين، اني اسمي حشمت
كريم بسخرية: حشمت، طب وانتي عاملة في نفسك كده ليه يا حشمت
حشمت: اني اعمل اللي بكيفي ومحدش يقولي انتي بتعملي اكده ليه
كريم بملل: طب قومي يلا غيري الهبل اللي انتي لبساه ده وفزى اعمليلي اكله اكلها
حشمت بحدة: ووه، انت بتكلمني اني
كريم بسخرية: وهو في حد غيرك هنا وانا معرفش ولا ايه؟
حشمت بحدة: اتقي شري يا سي عويس بدل ما اوريلك الوش التاني
كريم ببرود: خلصتي المسرحية اللي انتي بتعمليها دي؟ قومي بقى عشان انا جعان
قامت حشمت وقالت بحدة: ديه اخر مرة تكلمني على اني ست تاني، اني بميت راچل يبقى تكلمني على اني راچل
كريم بعصبية: ليلى على فكرة انا مش فايقلك ومزاجي متعكر لوحده، وعلى فكرة انا مش ناسي اللي انتي عملتيه فيا بس انا مليش مزاج اعاقبك دلوقتي
حشمت بحدة: وه، انت اتچنيت ولا ايه، اني الخُط يعني تلم روحك وانت بتتحدت ويايا
كريم بسخرية: الخُط والم روحي! ده انتي شكلك كده محتاجة تتربي من اول وجديد
حشمت بحدة: اني محتاچة رباية يا قليل الرباية، ده انت چنيت على نفسيك
كريم بسخرية: هتعملي ايه يعني؟
حشمت: هبوس راسك
مسكت حشمت راسه وادتله روسيه، احول كريم وقال قبل ما يغمى عليه:
- يا بنت الغبية
• بعد شوية
فتح كريم عينيه وحاسس ان راسه وجعاه اوي، برق بصدمة لما افتكر اللي حصل فقام بسرعة بس لقى نفسه مربوط، كريم بزعيق:
- انتي يا زفتة
دخلت من الباب وقالت بحدة:
- انت محرمتش ولا اييه؟
كريم: انتي ازاى تعملي كده وكمان انتي ربطيني ليه
حشمت: اني مش قولتلك قبل اكده كلمني على اني راچل
كريم: طب فكيني قصدي فكني
شاورت حشمت على الازازة اللي في ايدها وقالت:
- انت تعرف ده ايه؟
كريم: لا
حشمت: ديه ماية حارقة، يعني فكر بس مچرد تفكير انك تعارضني وانت هتلاقي وشك الحلو ده راح كيف السراب
كريم برعب: م ماية ايه
حشمت: كيف ما سمعت يا اخوي
كريم: انا لحد دلوقتي مش فاهم اي حاجة، انا خرجت وانتي كنتي كويسة ايه اللي جرالك
حشمت: انت هتعد تتحدتوا كتير ولا ايه
كريم بخوف: انا عندي سؤال بس، طالما انت حشمت يبقى فين ليلى ولا انت ليلى بس اتلبست
حشمت بحدة: اني هفكوك دلوقتي، تعرف لو لقيت منك اي تصرف اكده ولا اكده اني هعمل فيك ايه
كريم بخوف: مش عايز اعرف
حشمت: زين
فكته حشمت وكريم بعد عنها بخوف، قربت حشمت منه فقال كريم:
- انت عايز ايه دلوقتي
حشمت: روح اعملي لقمة عشان چعانة
كريم بشرشحة: نعم! بقى كريم على اخر الزمن يعمل لحرمة اكل، اه قولي كده بقى، انتي عاملة فيا مقلب عشان تردهالي
حشمت بحدة: شكلك اكده مستغني عن روحك
هرش كريم في دماغه وقال بصوت واطي:
- هي دلوقتي اتلبست ولا بقت مجنونة زي اللي بتعالجهم ولا عاملة فيا مقلب ولا ايه حكايتها
حط كريم ايده على دماغه بوجع وقال:
- بس عليها حتت روسية
حشمت بعصبية: انت هتعد تتحدت مع روحك اكده كتير ولا ايه
كريم: اعرف بس ان ده مقلب وصدقيني مش هرحمك
فتحت حشمت غطا الازازة فقال كريم بخوف:
- تحبي تاكلي ايه يا كبيرة
قفلت حشمت الغطا تاني وقالت:
- ايوه اكده، اعمل اي حاچة، انت واقف عنديك لغاية دلوقتي بتعمل ايه، فز على المطبخ قوام
جرى كريم على بره وراح المطبخ وهو بيقول:
- لا دي شكلها اتجننت فعلا مبتمثلش
حشمت: انت يا اللي اسمك كريم، تعالا اهنيه
خرج كريم من المطبخ وقال: في ايه تاني
حشمت بقرف: هو البيت ده مترب اكده ليه؟
كريم بسخرية: اصل بعيد عنك كان في واحدة اسمها ليلى مسؤلة عن البيت ده بس هي بتحب تعيش في النتانة فمكانتش بتنضف
حشمت: هات چردل مية ونضفلي التراب ده يلا
كريم بعصبية: لا بقى كده كتير، انتي شكلك كده متعرفيش انا ممكن اعمل فيكي ايه
طقطقت حشمت رقبتها وقالت: ممكن تعمل ايه عاد
كريم بصدمة: عملتيها ازاى دي، لا انا مليش دعوة انا عايز ليلى اللي كنت انا وهي بنشد في شعور بعض
حشمت: ايه الاسم الماسخ ده
كريم بسخرية: ماسخ اه، اسمالله على الاسم اللي انتي مسكاهولي، حشمت!! في واحدة يبقى اسمها حشمت
حشمت بحدة: مش عاچبك الاسم ولا ايه؟
كريم: لا عاجبني يا كبيرة وانا اقدر اقول غير كده برضو
حشمت: طب يلا وريني عرض كتافك وهات الچردل والحاچة
دخل كريم وهو بيبرطم وجاب جردل الماية، فضل يمسح وينضف لحد ما اتهد، اعد على الكنبة فقالت حشمت:
- انت بتعمل ايه؟
كريم بنهجان: برتاح شوية ايه مستكترة الراحة عليا ولا ايه
حشمت: اني هروح الحمام وراچعة تاني، لما ارچع الاقي الوكل على السفرة
ادتله حشمت ضهرها وكريم رفع المقشة عشان يضربها بيها بغيظ بس اتصدم لما لقاها لفت ليه بسرعة، حشمت بحدة:
- انت كنت هتعمل ايه؟
كريم بتوتر: انا لمحت عنكبوت في السقف فكنت هموته
بصتله بسخرية ودخلت الحمام وكريم انتهز الفرصة ودخل اوضتها عشان يجيب موبايلها، لقى كريم الموبايل على السرير فاخده ورن على الدكتور اللي بتشتغل معاه، رد الدكتور وقال:
- اتأخرتي ليه يا ليلى المفروض نكون اختبرنا العقار الجديد
كريم: ده انا كريم جوزها يا دكتور
الدكتور بإستغراب: اهلا، هو في حاجة ولا ايه؟
كريم: اه فيه
الدكتور: في ايه؟
كريم: ليلى بقت غريبة اوي يا دكتور
الدكتور: غريبة ازاى يعني
سمع كريم صوت الحمام وهو بيتفتح فقال كريم بسرعة:
- انا هتضطر اقفل دلوقتي يا دكتور وهكملك بليل ان شاء الله، سلام
قفل كريم معاه وخرج بره بسرعة، بصتله حشمت وقالت:
- انت كنت في اوضتي بتعمل ايه؟
كريم بسخرية: متنسيش انها اوضتي انا كمان
حشمت: من انهاردة اني ليا اوضة وانت ليك اوضة
شوح كريم بإيده وقال بصوت واطي وهو بيمشي:
- يا شيخة اتنيلي على اساس اني هموت عليكي
عمل كريم سندوتشات وخرج بره بس فتح بوقه بصدمة لما لقاها بتشيل حديد، كريم:
- ده انا معرفش اعمل كده
حشمت بسخرية: عشان انت طري مش واد ناشف
كريم بغيظ: مين ده اللي طري، لاه انتي متعرفيش انا مين دا شيل الحديد ده لعبتي
حشمت: طب ما تيچي توريني
كريم ببلاهة: اوريكي ايه؟
حشمت: توريني وانت بتشيل الحديد
كريم بتهرب: انا حضرتلك سندوتشات كتير يا كبيرة عشان ترُمي عضمك
حشمت بسخرية: انت بتتهرب ولا ايه؟
كريم بغرور مصطنع: انا اتهرب!! لا يمكن ده انا عايزك بس تعدي تاكلي وانتي بتتفرجي عليا، بس مش عايزك تشنقي من الصدمة ماشي
حشمت بسخرية: لاه متخافش عليا
شمر كريم كمامه وقال: استعنى على الشقا بالله
وطى كريم عشان يشتال الحديد بس ضهره طرقع لما حاول يشيله، حط كريم ايده على ضهره بوجع وقال:
- ضهري اه، الحقيني يا اما ضهري شكله اتكسر
ضحكت حشمت عليه وقالت:
- تعالى كل انت مكاني عشان تتغذى
كريم بغيظ: بتضحكي عليا، طب والله ما انا قاعدلك فيها
خرج كريم بره وحشمت قالت: رچالة اخر زمن
حطت حشمت طبق السندويتشات على جنب ونزلت من البيت
• بعد شوية
كان كريم بيتمشي وهو مكشر وبيفكر في كل حاجة حصلت، رن موبايله فرد عليه بإستغراب لما لقى جاره وقال:
- في حاجة يا محمود ولا ايه؟
محمود: الحق يا كريم مراتك بتتخانق في الشارع
كريم بصدمة: نعم!
جرى كريم على البيت بسرعة ولقى ليلى ماسكة واحد من هدومه وبتقول بعصبية:
- ده اني هخلي اللي ما بيشتري يتفرچ عليك
عصام بعصبية: انا لحد دلوقتي عامل حساب انك ست ومش راضي امد ايدي عليكي
حشمت بعصبية: تمد يدك على مين يا عرة الرچالة
عصام بعصبية: لمي نفسك يا ست انتي
كريم: في ايه؟
عصام: انت مين؟
حشمت: تعالى شوف مرتك بتتهزق ازاى قدامك وانت ساكت
عصام لكريم: انت جوزها
بص كريم على عضلاته وقال بخوف: على حسب
عصام بعصبية: انت هتهزر
كريم: هو ايه اللي حصل الاول
حشمت بعصبية: الراچل المركوب ده كان بيقرب مني بطريقة مش كويسة
كريم بعصبية: نعم
عصام بسخرية: انت هتصدقها ولا ايه، بقى في حد برضو يجيله نفس يقرب منها، انا افتكرتها راجل عشان كده حطيت ايدي على كتفها من وراه عشان يلفلي واطلب منه يزق معايا العربية العطلانة، بس طلعت في الاخر ست قليلة التربية
كانت حشمت هتتكلم بس كريم قال بعصبية: سيبي الطلعة دي عليا
كريم بشرشحة للراجل: ما تلم نفسك يا جدع انت واتكلم عن مراتي حلو، اذا كانت هي قليلة التربية فا انت حيوان وقليل الادب و..
مكلمش كريم كلامه لان عصام ضربه بالبوكس، وقع كريم على الارض وقال بوجع:
- ايدك تقيلة الله يخربيتك
حشمت: اني سكتلك كتير انما لحد اكده فا اني مش هسكت تاني
ادتله حشمت بالروسية فوقع عصام على الارض وهو مغمى عليه، سقف كريم وقال:
- الله عليكي يا فنانة
حشمت بسخرية: قوم يا سابعي
قام كريم ونضف هدومه وقال: احم، هدومي معدولة؟
بصتله حشمت بسخرية وطلعت على فوق، حط كريم ايده على وشه بوجع وقال:
- ما كانت تضربه من الاول ولا لازم يعني اتمرمط
طلع فوق وحشمت جالها صداع جامد، كريم بقلق وهو ملاحظ تعبها المفاجئ:
- مالك يا حشمت
حشمت: مفيش حاچة
كريم: طب تحبي اساعدك طيب في اى حاچة
حشمت: لاه، اني هبقى كويسة لما ...
مكملتش كلامها لانها اغمى عليها، كانت هتقع في الارض فمسكها كريم بسرعة وقال بخوف:
- بت يا ليلى
خبط على وشها ولما ملاقاش رد منها دخلها الاوضة وحطها على السرير، انتهز كريم الفرصة ورن على الدكتور بسرعة، الدكتور:
- ممكن تفهمني ليلى بقت غريبة ازاى عشان انا قلقان من ساعتها
حكاله كريم على كل حاجة فقال الدكتور بخوف:
- انا في حاجة في دماغي لو طلعت صح يبقى هنروح في داهية كلنا
كريم بخوف: حاجة ايه؟
الدكتور: دور كده على المكان اللي ليلى بتحت فيهم الدوا
افتكر كريم لما شاف ليلى بتحط حاجة في الدرج ففتحه وقال:
- لقيت المكان
الدكتور: في علبة لونها ازرق شوف كده هي متاخد منها حاجة ولا لا
كريم: العلبة كانت مفتوحة اصلا ومفيش منها غير شريط
الدكتور بصدمة: يا انهر اسود
كريم بخوف: في ايه
الدكتور: ده الدوا الجديد اللي احنا اخترعناه لمرضى الانفصام ولسة منعرفش ايه اعراضه وبيعلاجهم فعلا ولا لا
كريم بصدمة: ايييه