رواية مراتي طفله مجنونه
الفصل الثالث3
بقلم ايه الموافي
كان كريم نايم بس حس بهوا على وشه، فتح عيونه واستغرب لما لقى ليلى بتبتسمله وماسكه مروحة ايد في ايدها وبتهوي عليه، اتعدل من مكانه وقال:
- بتعملي ايه؟
امينة: بهويلك يا سي السيد عشان الدنيا حر عليك
كريم بصدمة: سي السيد!!
امينة: انت بتنده على نفسك ولا ايه يا سي السيد
كريم: انتي اسمك ايه؟
امينة: سلامتك يا سي السيد انت تعبان ولا ايه اني امينة
كريم: يعني انتي سي السيد وانا امينة، ق قصدي انا سي السيد وانتي امينة
امينة: اه، انت تعبان ولا ايه يا سي السيد اجبلك الحكيم
ابتسم كريم بخبث وقال:
- ولله وجه اليوم اللي هاخد حقي منك يا ليلى
امينة: انت بتكلم نفسك ولا ايه
كريم بغرور: وانتي مالك انتي؟ يلا حضريلي الفطار عشان جعان
امينة: فوريرة وهتلاقي الاكل عندك يا سي السيد
دخلت امينة المطبخ وخرجت منه بسرعة وقالت بذهول:
- هو ايه اللي عمل اللي المطبخ كده
كريم بغيظ: واحدة بنت ج ولا بلاش خلينا حافظين لسانا احسن
امينة: وكمان مفيش اكل في التلاجة يا سي السيد
كريم: خلاص اعمليلي شاي
دخلت امينة المطبخ وبعد شوية جت وفي ايدها كوباية الشاي، امينة بإبتسامة:
- احلى كوباية شاى لسيد الرجالة
ابتسم كريم بغرور وكان هياخد منها الكوباية بس هي اتكعبلت وكوباية الشاى وقعت عليه، كريم وهو بيتنطط من الوجع:
- يا غبية
شهقت امينة بصدمة وقال: يقطعني
دخل كريم الحمام بسرعة عشان يغسل ايده بالماية الباردة وامينة ابتسمت وقالت:
- انا عارفة انا هعوضه ازاى
دخلت اوضته ومسكت مفاتيح عربيته وقالت بإبتسامة:
- طالما كده كده مفيش اكل في التلاجة يبقى اجيبهم انا واوفر عليه المشوار والتعب ده
نزلت امينة وركبت العربية، وكريم خرج من الحمام وقال بصوت عالي وهو رايح اوضته:
- نفسك مسمعهوش يا امينة والا هزعلك انتي فاهمة
رزع الباب جامد وفضل يلعب في موبايلة لحد ما جاتله رسالة مخالفة بسبب تهوره في السواقة، كريم بإستغراب:
- مخالفة ايه دي وانا متحركش من البيت هما هيتبلوا عليا ولا ايه؟
برق بصدمة وقال: هي ملهاش صوت عشان انا قولتلها كده ولا هي ملهاش صوت عشان هي مش في البيت اصلا!
خرج بره بسرعة وهو بيقول بزعيق:
- اميننننة
لما ملقاش رد فضل يدور عليها زي المجنون، كريم:
- يارب لا انا كده هموت فيها
جرى على الاوضة بسرعة عشان يدور على مفاتيحه بس ملقهاش، كريم بصياح:
- كله الا العربية، هي حد مسلطها عليا دي ولا ايه، يارب انا راضي انها تعمل حادثة بس العربية تبقى سليمة مش مهم هي يارب المهم العربية
اجى اتصال على موبايله فرد بسرعة:
- انت كريم الاسيوطي
كريم بسرعة: ايوه انا
- تعالا على القسم بسرعة
كريم بخوف: ليه
- مراتك خبطت عربية واحد بعربيتك
كريم بصدمة: نعم!!
- انجز عشان نعمل الاجراءات، واحنا كنا ناقصين قرفكم على الصبح كتكم البلا
قفل الظابط في وشه وكريم حس انه هيغمى عليه من كتر الصدمة، كريم وهو بيحاول يطمن نفسه:
- ان شاء الله تكون العربية سليمة وليلى اللي مش سليمة ان شاء
راح كريم على القسم بسرعة ولقى امينة بتعيط، كريم بعصبية:
- عاحبك كده يا بومة يا وش الفقر
امينة: انا مكنش قصدي يا سي السيد
كريم بعصبية: اعمل ايه بمكنش قصدك!! انتي ايه اللي خلاكي اصلا تركبي العربية من غير ما تقوليلي
امينة: ده بدل ما تحمد ربنا اني سليمة
كريم: نعم يا اختي، احمد ربنا انك سليمة وانتي وش المصايب اصلا
خرجت الظابط منة وقالت بصرامة:
- في ايه
الراجل اللي ليلى خبطته بعربية كريم:
- جوزها اجى يا سيادة الظابط وانا عايز حقي ناشف
كريم: متقلقش حقك هتاخده
بص على امينة وقال:
- اهم حاجة العربية بتاعتي اخبارها ايه
امينة بقلق: لازم يعني
حط كريم ايده على قلبه وقال:
- العربية جرالها ايه يا زفته انتي
امينة بخوف: هي راحت للميكانيكي ولو عرف يصلح فيها حاجة هيصلحها
كريم بصدمة: انتي بتتكلمي على عربيتي انا؟
امينة: اومال عربيتي انا، هو انا عندي عربية اصلا
كريم: وربنا لاقتلك
جرى كريم وراها ومنة قالت بزعيق:
- انت هتضربها قدامي!!
كريم بعصبية: انتي مش سامعة هي قالت ايه يا حضرة الظابط، ده انا لسة مخلصتش اقساطها
امينة: يووه يا سي السيد ميبقاش قلبك اسود بقى
كريم بعصبية: ميبقاش قلبي اسود ايه انتي عارفة العربية دي بكام
منة: استنى كده، انت اسمك ايه؟
كريم: انا اسمي كريم
شدته منه بعصبية من هدومه فقال كريم بخوف: في ايه يا حضرة الظابط
منة بعصبية: انا كده فهمت، في الاول اعدت اقول معلش اعذريه العربية بالشئ وشويات برضو بالرغم من ان ده ميدلكش الحق انك تحاول تمد ايدك عليها او تزعلقها حتى بس قولت عديها معلش الراجل لسة مصدوم برضو، انما تستعبد مراتك وتخليها تقولك يا سي السيد وتعاملها كجارية ده اللي مش هسمح بيه ابدا
كريم بخوف: احيه انتي منهم، على فكرة انتي مش فاهمة حاجة
منة لامينة: انتي مش قولتي انها عربيته؟
امينة: اه
منة: انتي كنتي بتعملي ايه بعربيته
امينة: كنت هجبله فطار عشان اعوضه لاني كبيت عليه كوباية الشاي بالغلط
منة بعصبية: نعم!! وكمان بيعاقبك على حاجة انتي مكنتيش تقصديها
بلع كريم ريقه بخوف وقال:
- طبعا انتي مش هتسبيلي فرصة اشرحلك اي حاجة صح
منة بإبتسامة صفرا:
- وليه لا ده انت مطول معانا هنا
كريم بخوف: مطول معاكم ليه
منة: عشان تبقى تتعلم بعد كده ازاى تحترم المرأة
كريم بخوف: لا على فكرة انتي فاهمة غلط، سي السيد كان بيحترم امينة وبيقولها يا هانم مكانش بيهينها
منة بعصبية: كان بيحترمها قولا انما فعلا لا، لو انت مفكر ان زمن سي السيد ده هيرجع تاني فا انت بتحلم
بصت لامينة وقالت: وانتي لو غلط فيكي رديهاله على طول، امينة اللي كانت بتدعك لسي السيد رجله وتتقبل خياناته ليها مش هترجع ابدا انتي فاهمة
هزت امينة راسها بخوف وكريم قال بتوتر:
- وانا كمان فاهم سيبيني بقى
منة بخبث: اسيبك كده من غير ما تاخد ضيافتك، وده اسمه كلام يا راجل، يا عسكري اسلاااام
اجى العسكري وقال:
- اوامرك يا فندم
منة بخبث: خد المتهم ده معاك ووجب معاه احلى واجب، مفهوم
كريم بصدمة: متهم، انا بقيت متهم
العسكري: تمام يا فندم، قدامي يلا
كريم بخوف: سيبيني اروح وحياة عيالك
منة: عشان تبقى تتربي يا ذكوري متعفن
عادل: طب وانا يا حضرت الظابط لسة مخدتش حقي
منة: استني يا عسكري
اسلام: تحت امرك يا فندم
منة: خد البتاع ده كمان معاك
عادل بصدمة: ياخدني ليه
منة بقرف: عشان تبقى تخلي بنت قمورة زيها كده تيجي القسم، فيها ايه يعني لما تطيرلك النص القدماني من العربية حصل ايه لكل ده عادي بتحصل
عادل بصدمة: نعم!!
منة: نعم الله عليك يا اخويا، ترضى حد يعمل مع اختك كده؟
عادل: انا ماليش اخوات بنات
منة: طب ترضى حد يعمل في امك كده؟
عادل: انا امي الله يرحمها ماتت وهي بتولدني
منة بعصبية: انت هتحكيلي قصة حياتك! خده يا عسكري
اخدهم العسكري وهما بيحسبنوا عليهم، بصت منة بعصبية على امينة فقالت بخوف:
- في ايه؟
منة: تعالي ورايا
راحت منة وراها وهي خايفة ودخلوا المكتب بتاعها، قفلت منة الباب وقالت:
- لسة قدامنا مشوار طويل
بعد شوية: امرت منة العسكري انه يجيب كريم، دخل كريم من الباب وهو بيعرج وشه بايظ خالص، امينة بقلق:
- ايه اللي جرالك يا سي السيد
بصتلها منة بطرف عينها فقالت امينة بجمود:
- انت بتعرج ليه؟
كريم بغيظ: وحياة امك
رفعت منة حاجبها بتهديد فقال كربم:
- قصدي يعني وحياة والدتك
منة: ايوة كده
ادتله منة البطاقة اللي كانت اخدتها منه وقالت:
- متنساش تدفع للراجل حق تصليح العربية بتاعته
كريم وهو بيحاول يمنع نفسه من العياط:
- حاضر، اى اوامر تانية؟
منة: طبعا مش هوصيك على مراتك
كريم بغيظ: ده انا هحطها في عنيا، يلا يا برنسيسة
خرجت امينة معاه ومنة قالت: ربنا يقدرنا على فعل الخير
روحوا البيت واولوا ما قفلوا الباب قلع كريم الجزمة بتاعته وقال بعصبية:
- بقى انا يحصلي كل ده من تحت راسك
امينة ببرود: قدر ولطف احمد ربنا انها جات على قد كده
كريم بصدمة: ايه؟
امينة ببرود: ايه؟ مش عاجبك الكلام ولا ايه؟ ولا انت كنت هتكون مبسوط لما كان يحصلي حاجة والعربية تبقى سليمة
كريم بعصبية: اه كنت هبقى مبسوط، مهو انتي مش غرمانة حاجة مهي لو كانت العربية بتاعتك انتي مكونتيش قولتي كده
امينة: فيها ايه يعني فدايا؟ هو مش انا برضو اللي ببقى تعبانة طول النهار في الطبيخ والتنضيف
كريم بصدمة: طبيخ ايه هو انتي كنتي بتعرفي تعملي كيس مكرونة حتى!!
امينة: والعيال
كريم بصدمة: عيال مين
امينة: عيالنا
كريم: اه ده انتي مجنونة بقى
امينة: مش انا اللي على طول كنت بذاكرلهم واسهر معاهم
كريم: تسهري مع مين؟
امينة: عيالنا
كريم: اه وايه كمان؟
امينة: انت بتتريق عليا؟
كريم: امينة يا حبيبتي عيال ايه اللي بتتكلمي عليهم احنا مبقالناش كتير متجوزين اصلا
امينة: قصدي ما سيكون يعني، بقول المستقبل يا اخي ايه ماقولش
كريم: اه وانتي متخيلة اننا هنخلف وهنجيب عيال، ليلى يا حبيبتي انا نفسي ارميكي من البلكونة اصلا عيال ايه اللي بتتكلمي عنهم؟
امينة بصدمة: مين ليلى دي
كريم: ده حوار ملكيش انتي فيه
صرخ كريم بصدمة لما لقت ليلى الفازة عليه بس تفاداها بأعجوبة، كريم بصدمة:
- دي كانت هتيجي عليا
امينة بعصبية: ما انا قصدي اجيبها عليك
كريم بصدمة: نعم!!
مسكت امينة المقشة وقالت: اه يا خاين
كريم بصدمة: خاين ايه، وانتي ماسكة المقشة ليه؟
امينة وهي بتقرب منه: ماسكاها عشان انا اللي هربيك من اول وجديد
كريم وهو بيعرج عشان يبعد عنها:
- اعقلي يا امينة انا متشفلط خلقة
امينة بعصبية: كلكم كده، عينيكم فارغة
كريم: كلنا مين
امينة: الرجالة، ده انتوا مبيملاش عينكم غير التراب
بصلها كريم بشك وقال:
- الكلام ده مش كلامك ده انتي امينة، هو انتي اعدتي مع الولية الخرفانة اللي كانت في القسم دي
امينة بعصبية: انت كمان مكنتش عايزني اعد معاها، اه قول كده بقى ما انت مش عايزها تفتح عيني وتخليني اشوف حقيقتك يا ذكوري يا متعفن
كريم بصدمة: انا ذكوري متعفن
امينة: وعينك فارغة كمان يا بتاع ليلى
كريم بعصبية: اغذي الشيطان يا امينة وابعدي عني بدل ما ازعلك
امينة: يا عم اعد كده في حتة ناشفة، تزعل مين وانت مفيش فيك حتة سليمة اصلا
كريم بعصبية: مهو كل ده بسببك اصلا
امينة: فدايا يا روحي
كريم: طب جنان بجنان بقى
شد كريم منها المقشة وهي قالت بخوف:
- انت هتعمل ايه؟
كريم بشر: جبتي ورا ليه يا امينة، مش كنتي من شوية استرونج اندبندت وومن
امينة بشهقة: انت هتمد ايدك على بنت!!
كريم بصدمة: نعم يا اختي
امينة بقرف: اخص، انت نزلت من نظري اوي
كريم بصدمة: يعني لما كنتي هتضربيني عادي انما انا لما كنت هضربك بقيت ابن ستين في سبعين صح؟
امينة بعصبية: اه طبعا وانت تضربني بتاع ايه
جرى كريم وراها فقالت امينة بخوف:
- انت لو قربت مني انا هصوت والم عليك الناس كلها
كريم: ما خلاص اتعودت على الفضايح يا حبيبتي، حسبي الله ونعم الوكيل فيكي الواحد كان ملك زمانه قبل ما يتجوزك، كنت برنس في نفسي كده وعلى وضعي، اول ما دخلتي حياتي فلستيني وفضحكتيني في كل حتة، ده كفاية العلقة اللي بقيت بخدها كل يوم بسببك يا ظالمة
امينة بغيظ: اه ما انتوا الرجالة كده بتنكروا اي حاجة احنا بنعملها
كريم بغيظ: انتي بتجمعي ليه دلوقتي
امينة: عشان انتوا كلكم صنف واحد بيحب الرمرمة
كريم بغيظ: وانتوا اللي ملايكة بقى صح؟
امينة بغيظ: انت بتجمع ليه دلوقتي؟
بصلها بصدمة وهي قالت:
- تموت انت في اى حاجة اخرها تاء مربوطة يا خاين
كريم بغيظ: طب وربنا ما انا سايبك
امينة بخوف: الحق في فار وراك
كريم بسخرية: المفروض اكون اهبل بقى واصدق صح؟
امينة بخوف: انا مبهزرش في فار وراك بجد
لف كريم راسه وهو بيبتسم بسخرية بس صرخ بخوف لما لقى فار زي ما قالت، جري كريم ناحيتها واستخبى وراها وقال:
- اقتليه بسرعة
امينة بصدمة: نعم!!
كريم بخوف: ايه؟
امينة: هو مش المفروض العكس ولا انا غلطانة
ضحكت بسخرية وقالت: انت بتخاف يا كيمو؟
كريم بتوتر: لا طبعا اخاف ايه، انا عمري ما بخاف من حاجة وكمان يوم ما هخاف هخاف من حتت فار!!
امينة بسخرية: طب ما تقتله بالمقشة اللي معاك دي
كريم بتوتر: انتي بتكلميني انا؟
امينة بسخرية: هو في حد غيرك هنا ولا ايه؟
كريم بتوتر: احم، اه طبعا هقتله انتي مفكراني خايف ولا ايه؟
امينة: مستنية اشوف يا سابع البرومبة
كريم بغيظ: استني هنا
امينة: ايه؟
رفع كريم حاجبه وقال بسخرية:
- مش انتي اللي عامله فيها اللي قادرة على التحدي والمواجهة وعماله تقولي من الصبح يا ذكوري يا متعفن، ما توريني شطارتك انتي يا ست امينة
امينة بصدمة: هاا
كريم بسخرية: انتي بتخافي ولا ايه؟
امينة بتوتر: لا طبعا اخاف ايه!
كريم بخبث: طب ما توريني شطارتك بدل ما انتي لسان على الفاضي
امينة بغرور مصطنع: انت فاكرني هخاف من حتت فار ولا ايه؟
كريم بخبث: طب وريني عرض كتافك يلا
بعدت امينة عنه وهي بتقول بخوف:
- كان لازم اطبق كلام منة بحازفيرها يعني؟
وقفوا الاتنين على صوت خبط على الباب فقال كريم بإستغراب:
- مين؟
الراجل: انا سعيد الفكهاني
كريم بإستغراب: وانت عايز ايه يا سعيد؟
سعيد: مراتك يا استاذ كريم وهي بتسوق العربية دخلت في المحل وانا عايز فلوس تعويض
حط كريم ايده على قلبه وقال:
- انا شكلي كده انا هموت
اغمى عليه مرة واحدة فقالت امينة بخوف:
- سي السيد