رواية كنوز العسل
الفصل الخامس عشر15
بقلم عادل عبدالله
دخلنا الخيمة والخادمة سحبت الستارة ونزلنا السرداب اللي تحت وهدير ماسكة فيا بقوة من الخوف !!!
واول ما دخلنا علي الشيخ ابو الخلا قال كلام كتير مش مفهوم .
هدير لما بدأت تسمع كلامه ارتجفت اكتر ومسكت فيا اوي وطلبت مني انها تمشي فورا ، لكن بعد حوالي دقيقة او دقتين اتغير حالها وبدأت تظهر عليها الراحة !!!
الشيخ ابو الخلا قالنا : اقعدوا ، كويس انكم جيتوا في الميعاد المحدد ، كده هيكون فك السحر سهل .
بصيت لهدير لقيتها بصة للشيخ وساكتة ومركزة نظرها عليه بهدوء غريب !!! فقولتله : ايوه يا شيخ عاوزين نخلص في اقرب وقت من الموضوع ده !!!
رد وقالي : كله بأوانه يا استاذ ، ممكن النهاردة وممكن تحتاجوا تيجوا زيارة تانية .
: لا يا شيخ المشوار صعب اوي عاوزين نخلص النهاردة .
: طيب هحاول بس اهم حاجة انكم تساعدوني .
: نساعدك ازاي ؟
: يعني اول حاجة تجيب شعر ابنك وبنتك وانا هنا معايا باقي الطلبات اللي انت معرفتش تجيبها انا جيبتهالك اهي ، هتدفع دلوقتي ٥ الاف جنية حق الحاجات دي قبل اي حاجة .
: ٥ الاف جنية !!! ده كتير اوي !!!
: يبقي بلاش ، مش هقدر اعملكم حاجة .
: طيب خلاص حاضر ، كويس انا كنت عامل حسابي . اتفضل .
اخد الشيخ ابو الخلا الفلوس وبدأ يشتغل شغله ، ويطلق البخور كتير اوي في المكان ويتمتم بكلام غريب مش مفهوم ويعلي صوته اكتر واكتر لحد ما حسينا بهزة شديدة كأن فيه زلزال جامد !!!
بعدها ظهر خيال ( ظل ) راجل طويل اوي علي جدار الخيمة وبدأ الشيخ يتكلم معاه !!!
فجأة لقينا في ايد الشيخ ابو الخلا ورقة مطبقة عليها تراب مندي !! فتحها وكان مكتوب فيها طلاسم غريبة رسوم ونقوش وحروف مش مفهوم منها اي حاجة !!!
بعدها الشيخ حط الورقة تولع مع البخور لغاية ما خلصت .
الشيخ قالنا كده العمل اتفك خلاص .
حمدت ربنا وقولت لهدير يلا بينا و التفت اتجاه الشيخ وقولتله : متشكربن اوي يا شيخ .
قالي : استني احنا فكينا العمل بتاعك انت اللي كان معمول بالغم والمشاكل انما لسه في مشكلة تانية اكبر واهم .
: لسه ايه يا شيخ ؟
: اللي كان بيخليك تشوفها قردة قدامك .
: مش فاهم ؟؟
: اللي كان بيخليك تشوفها كده الجن اللي لابسها .
: جن ؟!!!!
: ايوه ، حتي لو مش مصدق هخليك تسمع بودانك .
بعدها بدأ يتكلم مع الظل اللي كان علي الجدار كلام مش مفهوم وبعدها بدأ بينهم حوار مفهوم لما الشيخ سأله : انت مين وعاوز منها ايه ؟ وبعدها الجن قال انه جن وبيحبها وساكن فبها وبيغير عليها مني لما اتجوزتها !!!
وقال انه مش هيسبها ابدا لأنه بيحبها من زمان !!!
كل ده وهدير قاعدة مستسلمة تماما وبتسمع في صمت !!!
بعدها الشيخ طلب مني اني اخرج بره السرداب واقف بره الخيمة ، واسيب هدير لوحدها معاه علشان يقدر يفك السحر !!!!
ورغم اني كنت خايف اسيبها وحدها معاه لكن اضطريت اني اخرج خوفا عليها من الجن وعلشان نرتاح من مشكلتنا .
ولما خرجت ووقفت بره بدأت اقرا قران كتير .
وبعد وقت مش طويل من قراءة القران اتفاجئت بهدير بتصرخ بصوت عال اوي و خارجة بتجري !!!
سألتها : ايه ده ؟ مالك يا هدير ؟ اي اللي حصل ؟
: يلا بينا بسرعة لازم نمشي حالا .
: ليه ؟ في ايه ؟
: مش وقته لازم نمشب الاول .
جرينا انا وهي وركبنا التاكسي وقولتله : يلا يا سطي بسرعة .
: انتو بتجروا ليه ؟
: يلا اسطي امشي الاول وبعدين اسأل برحتك .
: اكيد هاربانين من سيدي ابو الخلا و عاوزكم وانتوا بتجروا منه ؟؟
: سيدك !!! هو انت بتشتغل عنده ؟
وفي لحظة لمحت ابو الخلا بيقرب ركبت العربية بسرعة ومعايا هدير وسوقتها مكان السواق وجريت بأقصي سرعة وسط ضلام مش عارف بدايتة او نهايته .
مشيت بالتاكسي في الضلمه وكان اهم شئ عندي اني اهرب من ابو الخلا .
وبعد عشر دقايق كنت اطمنت اني بعدت نهائي عنه وقفت بالعربية وانا مش شايف اي حاجة الا النجوم في السما !!!
كانت هدير خايفة اوي فسألتها : متخافيش خلاص احنا بعدنا خالص ، احكيلي ايه اللي حصل يا هدير ؟
: انا فجأة بعد ما دخلنا حسيت اني مغيبة و فاقدة السيطرة علي نفسي !!!
كنت حاسة بكل اللي بيحصل حواليا بس مش قادرة اعمل اي حاجة !!!
بعدها شوفتك خرجت وفجأة قرب الشيخ ابو الخلا مني وبدأ يمسكني وانا مش قادرة اقاومه !!!
كان بيحاول يعتدي عليا وفعلا بدأ يخلع ملابسي لكن سبحان الله فجأة رجعت ارادتي ليا وبدأت اقاومه !!!
: ايوه انا في الوقت ده كنت بقرا قران كتير .
: لما انا قاومته كان بيحاول يشل حركتي ويخلع باقي ملابسي لكن الحمد لله قدرت اجري منه وخرجت .
: ابن ال ..... ، انا كنت حاسس انه مش شيخ ولا حاجة ومجرد دجال ومشعوذ ، انا لازم ارجعله وانتقم منه .
: لا لا لا ، بلاش ارجوك ، الحمد لله اني جريت منه وربنا انقذني في الوقت المناسب ، لو رجعتله منعرفش ممكن يحصل ايه !! الرجل ده ممكن يكون مخاوي الجن ويأذينا !!! احنا نمشي وربنا هو اللي هينتقم منه .
بعدها قررنا نمشي ونحاول نوصل للطريق اللي يخرجنا من الصحرا !!!
ولمدة اكتر من نص ساعة تانية كنا ماشيين في الصحرا ومش عارفين نخرج منها من اي اتجاه !!!
وفكرت اني مع الوقت ممكن بنزين العربية يخلص واحنا في وسط الصحرا وخاصة اننا مش معنا اكل او مياه و بكده ممكن نموت في الصحراء بدون ما يشعر بينا حد !!!
كان لازم نقف بالعربية لغاية ما نحدد الطريق اللي هنخرج به من الصحرا !!!
لكن يا تري لو وقفنا بالعربية ايه اللي هيحصلنا ؟؟ وياتري هنخرج من الصحراء ولا هنموت فيها ؟؟؟