رواية كنوز العسل
الفصل الرابع عشر14
بقلم عادل عبدالله
: الطلب الرابع حته من جسم ابنك حمدي .
: ينفع بردو شعره او ضوافره ؟
: ايوه ينفع . الطلب الخامس : مراتك الصغيرة .
: اجيبلك شعرها او ضوافرها بردو ؟
: لأ ، دي تجيبهالي هنا بنفسها .
: طب ليه يا عم الشيخ ؟؟ المشوار بعيد عليها اوي ؟؟
: مش انت بتشوفها قردة في اوضة النوم ؟؟
: ايوه فعلا .
: طيب مش عاوز اسئلة كتير بقي ، احسن تتسخط قردة بجد .
: ايه !!!!!! تتسخط !!! انت بتتكلم بجد يا شيخ ابو الخلا ؟
: ايوه ممكن لو مش نفذت كل المطلوب منك ومنها تتسخط .
: طيب حاضر انا همشي وهجيلك ف الميعاد وهنفذ كل اللي طلبته مني .
وبعد ما خرجنا من هناك سألت دسوقي : الرجل ده عرف الحاجات دي منين يا دسوقي ؟
: معرفش بس بيقولوا ده رجل بركة .
: يعني انت مش اتكلمت معاه في حاجة .
: لأ ، انا اللي هقوله بىدو يا ربيه !!!! ده كلام يا راجل ؟؟!!! انا هكلمه ازاي ؟؟ انا مش شفته قبل كده ابدا لكن سمعت عنه العجب .
: انا حاسس يا دسوقي ان الرجل ده مخاوي .
: مخاوي ؟!!! لا يا ربيع ده كلهم بيقولوا عليه بركة .
: بركة ايه ؟ انت مش شوفت لما ورانا في الكريستاله هدير ونعمة والعيال !!
: وده معناه اي ؟ يعني كويس ولا وحش ؟؟
: معرفش يا دسوقي بس قلبي مش مطمن .
: وهتعمل ايه ؟؟
: مش عارف !! الرجل ده يخوف بجد !!
: يعني هتعمل ايه يا ربيع ؟
: خلينا معاه للاخر لما نشوف اخرتها ايه ؟
روحت عند هدير في بيت اهلها وعرفتهم ان كل المشاكل اللي حصلت بسبب اعمال السحر و صالحتها بعد ما عاهدتهم اني هشتري دار تانية لهدير علشان تبعد عن المشاكل مع نعمة .
رجعنا البيت وقعدت مع هدير ونعمة وقولتلهم ان اللي دخل بينا شيطان واعمال سحر واتفقنا نتحمل الفترة دي علي ما السحر يتفك .
ورغم ان نعمة كانت مش مقتنعة بكلامي وبتقول في راسها ان الشيطان االي دخل هو هدير نفسها ، لكن حاولت تتظاهر قدامي انها راضية عن كلامي وموافقة .
و طلبت من هدير انها تيجي معايا وقولتلها : علفكرة يا هدير انتي هتيجي معايا للشيخ .
هدير : نعم اروح فين !!! لا انا اخاف .
: متخافيش انا هبقي معاكي .
: لا يا ربيع روح انت وخد شعري معاك زي حمدي ومني ، انا اخاف اروح .
: وبعد محايلات كتير مني رفضت انها تيجي معايا .
اما نعمة بمجرد ما قولتلها ان الشيخ عايز جزء من شعر مني وحمدي خافت اوووي وانفزعت ورفضت .
( يا نعمة انتي خوفتي كده ليه !!! مفيش أذي ليهم ، علشان مشكلتنا تتحل ) .
وبردو بعد محايلات كتير مني نعمة رفضت .
وخلال الاسبوع كنت قدرت اقص جزء من شعر حمدي وهو نايم واخدت جزء من شعر هدير اما مني مكنش فيه طريقة الا اني اروحلها البيت واحاول اصالحها بعد ما مشيتها من البيت عندي مضروبة في اول جوازي .
واول ما روحتلها وفتحتلي الباب وشها اتغير وقالتلي : اتفضل ادخل يا بابا .
دخلت و لحسن الحظ كانت مني لسه صاحية من النوم وبتسرح شعرها ، لفت شعرها بسرعه لما انا دخلت وقعدنا نتكلم .
وفضلنا نتعاتب انا وهي وبعدين مني نادت علي بنتها وقالتلها ترمي بعض الشعر اللي سقط منها وهي بتسرحه ف الحمام !!
بعدها مباشره دخلت انا الحمام واخدته في جيبي وبعدها مشيت من هناك وبقيت جاهز اروح للشيخ في الميعاد .
لكن كنت قلقان ان الشيخ يغضب لما اروح من غير هدير .
وقبلها بيوم حاولت كتير مع هدير لكنها رفضت تيجي معايا .
وتاني يوم الصبح اخدت دسوقي اللي كان خايف ييجي معايا في المرة دي لكن مع ضغطي عليه وافق .
وبعد الضهر كنا وصلنا لخيمة الشيخ ابو الخلا .
ولما طلبنا ندخله اتفاجئت به بيسألني : انت جاي ليه يا ربيع ؟
: جتلك علي ميعادنا يا عم الشيخ .
: ايوه هو نفس الميعاد ، لكن ليه مش نفذت الطلبات ؟
: نفذتها كلها يا عم الشيخ .
: فين الطلبات اللي طلبتها منك ؟
: دي قصة شعر من حمدي ابني ودي قصة شعر من مني بنتي ودي قصة شعر من هدير مراتي .
: شوفت انك مش نفذت الطلبات كلها ، انا قولتلك مراتك الصغيرة تيجي وتحضر هنا ، اما انها هتتسخط قردة بجد .
: اصلها مريضة وتعبانه ومش هتقدر ع المشوار .
: مادام مش هتقدر تيجي تبقي تتحمل اللي هيحصل .
: مفيش اي حل تاني غير انها تيجي هنا ؟؟
: في اكيد .
: قول يا عم الشيخ ابوس ايدك .
: انها تتسخط قردة وانت كمان عمرك ما هترجع رجل تاني .
: وانا ممكن اجيبها تاني امتي ؟
: في اي ليلة من الليالي التلاتة الجايين .
: ليلة !!! هو احنا هنيجي هنا كمان بالليل ؟؟
: ايوه خلاص علشان اتأخرت الميعاد بقي الميعاد بالليل ، ولو اتأخرت اكتر هتصعب الموضوع عليكم اكتر .
: لأ خلاص يا عم الشيخ احنا جايين بكره او بعده .
خرجت من عند الشيخ وانا هموت من الخوف علي هدير وع نفسي .
اول لما روحت البيت اخدت هدير ودخلنا الاوضة وقولتلها : جهزي نفسك بكره خارجين .
: خارجين رايحين فين ؟
: هنروح للشيخ ابو الخلا .
: ما انا قولتلك خايفة اروح هناك .
: وانا قولتلك اني هكون معاكي متخافيش .
: ما انت اخدت قصة شعري زي عيالك .
: الشيخ قالي مينفعش انتي بالذات لازم تروحي هناك والا ...
: والا ايه يا ربيع ؟؟ هيحصل ايه ؟؟
: والا هتتسخطي قردة بجد يا هدير .
: بتقول ايه ؟؟ اتسخط قردة بجد !!!
: ايوه .
: طيب انا جاية معاك وامري لله .
تاني يوم خرجنا قبل المغرب انا وهدير وسافرنا علي ماوصلنا لبداية الصحرا كانت العشا عدت والجو ليل وسكون .
وكنت انا وهي في التاكسي والصحرا ضلمه عتمة ومفيش اي ضوء جاي من اي مكان حتي لحظنا السيئ القمر كان في اخر الشهر ومش باين في السما ، مفيش الا النجوم في السما كانت واضحة اوي وبتلمع بشدة وسط الضلام المعتم ده .
وبعد حوالي ربع ساعة بالتاكسي جوه الصحرا ومفيش الا اصوات الريح اللي كان لأول مرة اسمعه بالوضوح ده وفجأة سمعنا صوت عواء ديب عال اوي وقريب جدا زي ما يكون علي بعد امتار مننا .
ورغم قرب صوت الديب الا ان كان حولنا مفيش اي ديابة ابدا !!!
وبعد وقت قصير لكنه عدا طويل جدا بسبب خوفنا ورهبة الصحرا والليل اللي اتملكت قلوبنا وصلنا لخيمة الشيخ ابو الخلا !!!
ولما وصلنا وانا بحاسب التاكسي سألته السؤال اللي كان بيطار تفكيري طول الوقت ( انت يا اسطي مش خايف من المشي في الصحرا في الليل ده ؟ ) .
بص ليا وابتسم وقالي : الصحرا مش بتخوف اللي منها ، الصحرا مبتخوفش الا الغريب . بقلم / عادل عبد الله
وضحك بصوت عال اوي وسابنا ووقف بعيد !!!
قولتله : طب بعد اذنك استنانا هنا هنخلص جلستنا مع الشيخ ونجيلك ترجعنا من مكان ما جيبتنا .
كان شكل الخيمة بالليل مختلف نهائي !!!
في اضواء مشاعل صغيرة خارجة من اركان الخيمة والخادمة اللي عنده قاعده عند باب الخيمة ، ومنظر جلود وعظام. الحيوانات المنتشرة جوه الخيمة اكتر بشاعة ورعب !!!
وبمجرد ما وصلنا عند خادمة الشيخ ولسه هتكلم اتفاجئت بها بتقولنا اتفضلوا الشيخ في انتظاركم !!!!
العجيب ان الخيمة بالنهار بيكون فيها زباين كتير. طالبين مقابلة الشبخ ابو الخلا لكن لما روحنا بالليل كانت الخيمة فاضية ومفيش الا خادمته بس الموجودة !!!
هدير بمجرد دخولنا الصحرا كانت مرعوبة وكنت بحاول اجمد قلبي قدامها علشان اطمنها واطمن نفسي معها .
دخلنا الخيمة والخادمة سحبت الستارة ونزلنا السرداب اللي تحت وهدير ماسكة فيا بقوة من الخوف !!!
واول ما دخانا علي الشيخ ابو الخلا قال ......