رواية كنوز العسل
الفصل الرابع4
بقلم عادل عبدالله
يلا بقي تعالي وحشتيني اوي .
: طيب اطمن الاول اذا كانت واقفة ورا باب الاوضة ولا لأ .
: لا لا لا ، نعمة متربية وعمرها ما تعمل كده ابدا .
: معلش افتح الباب نطمن بس .
: حاضر .
فتحت الباب و كانت فعلا نعمة مش واقفة و دخلت اوضتها .
: مش قولتلك يا هدير نعمة دي متربيةوعمرها ما تعمل كده ابدا .
: معلش اصل انا بنكسف اوي ولسه مش اعرف حد هنا .
: طيب تعالي بقي وحشتيني اوووي .
: تؤ تؤ .
: اي ده !!! بتقوليلي لأ ؟؟
: لو عرفت تمسكني . ( وضحكت بصوت عالي اوي )
: وطي صوتك مش كده .
: اووووف بقي ، اي كتم الحرية ده !!! من اول يوم كده !!!
: مفيش كتم حرية ولا حاجة ، خدي حريتك بدون ما حد يحس بينا .
وبعد ما ريحنا ساعتين قومت من النوم لقيت السرير جنبي فاضي !!!
خرجت وكانت هدير واقفة في وسط الدار بالبيبي دول !!! ونعمة واقفة بتتفرج عليها !!!
: اي اللي موقفك بالشكل ده ؟؟
: ماله الشكل ده ؟ مش فاهمة !!
: واقفة كده ليه بقولك ؟
: كنت داخله الحمام اخد شاور .
: طيب يلا بسرعة ومتخرجيش من الاوضة كده تاني .
في الوقت ده رجع حمدي من بره وأصابه الذهول من منظر هدير ووقف متنح ولا بيتكلم ولا بيتحرك !!!
كان موقف محرج جدا لنا كلنا ، اضطريت اني ازعقلها واشخط فيها وقولتلها : يلا ادخلي واياكي تخرجي كده تاني .
نعمة دخلت الحمام وحمدي دخل اوضته و نعمه قاعدة بتبصلي وساكتة من غير ولا كلمة وايدها علي خدها !!!
: مالك يا نعمة ؟
: مفيش يا عريس ، عروستك حلوة اوي .
جريت قعدت جنبها : مش احلي منك يا نعومتي .
وحطيت ايدي عليها وبهزر معاها ، قالتلي : عاوز تضحك عليا بكلمتين زي عوايدك ؟!!!
: اضحك عليكي ازاي !!! انتي عارفة ان انتي اللي في القلب .
: طيب تعالي معايا .
واخدتني من ايديا دخلتني اوضتها !!!
بعد ربع ساعة خرجت هدير من الحمام و باب الاوضة خبط ، سألت : مين ؟
: انا هدير ، تعالي عاوزاك .
: طيب روحي دلوقتي يا هدير بتكلم مع ام حمدي كلمتين وجاي .
: كلمتين ؟؟!!! ومحليش الكلام الا والباب مقفول ؟
: روحي دلوقتي يا هدير ميصحش كده !!
: طيب انا رايحة بس متتأخرش علشان عاوزاك .
وبعد حوالي ساعة حسيت فيها بفرق كبير بين نعمة وهدير قامت نعمة وهي متعصبة وبتقولي : سلامتك يا جوزي ، ليك حق ما انت مهدود حيلك !!!
: ايوه فعلا انتي عارفة مشوار السفر بعيد .
: ايوه ايوه عارفة ، والعروسة الجديدة كمان !!! ربنا يقويك . انا بعد كده بقي مش هعطلك عنها !! مش هبقي انا وهي عليك ، هي اولي مني .
: ازاي تقولي كده !! انتي مراتي وهي مراتي وانتي ليكي حق عليا. قبلها طبعا .
: بتجبر بخاطري !! الهي يجبر بخاطرك .
: متقوليش كده ، دا انتي اول واخر حب في حياتي .
: طيب يا عريس ، انت كده هفتان و محتاج تتغذا كويس ، دا انت محتاج تاكل دكر بط لوحدك ، ولا اقولك اعملك كوارع ولا اعملك حمام ؟؟
كانت تلميحاتها واضحة اوي وضايقتني لكن لأني عاذرها مش رديت عليها وعملت نفسي مش واخد بالي من كلامها وتلميحاتها وقولتلها : اي حاجة من ايدك حلوة .
: تحب تاكل من ايدي ولا من ايد العروسة ؟؟ ولا عاوزني اخدمكم انتو الاتنين ؟
: انا مش بحب اكل الا من ايدك لكن لازم اكل من ايدك يوم ومن ايدها يوم ، هي دي قسمة الحق .
خرجت من الاوضة ودخلت الحمام اخدت شاور وخرجت لقيت هدير قاعدة متعصبة اوي : مالك يا حبيبتي ؟
: مفيش .
: لأ شكلك متضايقة اوي !!
: ملكش دعوة بيا .
: ازاي بقي !! ينفع اشوف حبيبتي وقلبي زعلانه كده واسكت !!
: حبيبتك هناك اللي كنت معاها من شوية .
: دا احنا كنا بنتكلم .
: وقفلين الباب ليه ؟
: علشان محدش يسمعنا .
: انت بتضحك عليا يا ربيع ؟
: لا يا قلبي مقدرش .
: اومال خرجت من عندها اخدت شاور ليه ؟
: عادي هو لازم يكون فيه سبب !!
: بردو عاوز تضحك عليا ؟!!
: انا بقولك الصراحة وعلي العموم متنسيش ان هي كمان مراتي ولها حق عليا .
: وانا مش اعترضت ، اتفضل روح اديها حقها .
: هدير .
: نعم .
: انتي بتعملي كل ده علشان انسي انك خرجتي بقميص النوم ؟؟
: اسمه بيبي دول .
: ايا ما كان اسمه ، مينفعش تخرجي كده !!
: هو انا كنت خرجت به في الشارع !!! دا انا كنت جوه الدار .
: ولو يا هدير اللبس ده مكانه اوضة النوم وبس ومتخرجيش من باب الاوضة كده تاني .
: انت بتغير عليا يا بيبي ؟؟
: مش موضوع غيرة دي مسألة اصول .
: حاضر ، رغم اني مش مقتنعه بس هعمل كده علشان خاطرك .
سمعت صوت بناتي زهرة ومني بره ، خرجت وكانوا قاعدين مع امهم واول لما شافوني كانوا هيقوموا يمشوا !!! لكن انا قولتلهم : رايحين فين ؟ سكتت زهرة وردت عليا مني : هنمشي .
: وماشيين بسرعة كده ليه ؟ دا انا سامع صوتكم لسه جايين !!!
: وهنقعد ليه !! احنا كنا جايين نطمن علي امنا وماشيين .
: تطمنوا علي امكم بس ؟
: ايوه ليكون في حد زعلها او ضايقها .
( وكانت بتعلي صوتها علشان العروسة تسمع ) اصل مني دي طول عمرها قوية ومستقوية .
: وابوكي يا مني مش عاوزين تطمنوا عليه ؟
: هنطمن عليك ازاي يعني ؟ هنقولك رفعت راسنا ولا لأ يا عريس !!! ما انت مخلف ٤ شحوطه اهم .
مقدرش اسمع الكلام ده ورفعت ايدي وعلي وشها بالقلم ....