رواية بعد عقد قران
الفصل الحادي عشر
بقلم ريم ابو قاسم
ما اني لسه حاسه شويه لاكن غاظني تعليق وحده عشان كده ح اكتب البارت و اتنين كمان ..😂
اكلته شويه و قمته مرت عمي قالت لي مالك يا بتي ده اكل شنو ، والله شبعته يا خالتو و بعدين انا اكلته قبل شويه، بري القراصه ما بتمسك البطن ، والله ما جعانه لو جعته بجي باكل تاني ، عمي قال ليها خليها على راحتا اما مصطفى يعاين لي ساي مشيت دخلته الغرفه رقدته في الكنبه بقيت اعاين فوق وقت سمعته صوت خطواط غمضته عيوني تقريبا ده مصطفى نفس مشيتو زي الزول الما نصيح بمشي بي صوت بعد شويه سامعه تلفونو اتصل قال معقوله حبيبتي اصلا انا ما عندي غيرك و ما في زول بقدر يشغلني عنك ، ايوا يا عيون مصطفى بكره جهزي نفسك لانو ح يكون يومنا ، نفس العنوان يا سوسو نسيتي ولا شنو، تمام وانا كمان بحبك يا قلبي انتي و فصل الخط شكلو ، فجأه سامعه صوت خطواطو زي الجاي علي قلته اسي لو فتحته جزء من عيوني يمكن يكون بعاين لي و يكشفني عملته نفسي نايمه و بقيت اشخر قال اعوذ بالله و رجع تقريبا رقد لانو طفى النور اها فتحته عيوني قلته يعني بكره عايز تمشي تقابل سوسو شكلها دي جديده انا بوريك فتحته الواتساب رسلته لي مرت عثمان قلته ليها صاحيه يا بت قالت لي في شنو مالك يا غنوان،
ما في شي ما تخافي بس لو صاحيه اركبي السطوح جايه عليك ...
خير يا زوله الليله عثمان متحسس شويه ما بقدر اخلي ..
في سري عان الفرحانه دي ، لا يا سحر عليك الله شي مهم شديد خمسه دقايق وارجعي حضن راجلك ...
رسلت لي اموجي الضحك ومعاها طيب ...
لفحته توبي و مشيت لقيتا قاعده قالت لي خير مالك ، لقيت طوبه جمبها قعدته فيها بقيت قصادا ..
اتخيلي يا سحر مصطفى بخوني ..
يعني ده ما شي جديد اصلا بخونك من شهر العسل ...
استغربته طبعا عرفت كيف قلته ليها عرفتي كيف بخوني حتى هناك في الشقه ..
ما يعني ظاهر لانو هو بتاع بنات قالتا بي توتر كده ..
حتى لو بتاع بنات كيف عرفت اكيد عارفه شي البت دي قلته ليها خلاص بكره عايز يقابل وحده اسمها سوسو و انا متاكده بت شافعه لانو ما بصاحب الا الشفع انا عايزه اديهم درس الاتنين ما ينسو اعمل شنو...
كيف تديهم درس قالتا بي غضب ..
استغربته شديد المره دي ، ما تنسي هو طالما لسه راجلي ما بسمح يدمر مستقبل شافعه و حتى لو ما راجلي برضو الشي البعمل فيو ده اكبر غلط...
ايوااا عايزه تعملي شنو ...
عايزه امشي ليهم في الشقه رايك شنو اقع فيهم خبط من طرف و اشيل لي خرطوش كبير 😂....
البت جسما عرق قالت لي لي تعملي كده انتي مجنونه خرطوش شنو ...
رفعته ليها حاجبي قالت لي قصدي كده يا عويره ح تدخلي السجن لو حصل ليهم اي شي بزات بت الناس ، صح كلامك خلاص اعمل شنو فكري معاي بقيت ماشه و جايه و بفكر قلته ليها لقيتاااا ، قالت لي شنو ، طيب شوفي اصلا الشقه الح يمشوها دي اكيد ح تكون مشبوهه صح ،طبعا عشان كده انتي ما تمشي و تورطي نفسك ساي ، لا لا انا اصلا ما ح امشي ولا ح الوث يدي ح اتصل للشرطه و اوصف ليهم يقبضوهم بالسابته .. كده البت اهلا يعرفو اما العواليق ده ياخد درس عمرو ما ينسي بزات متزوج كمان ...
ده ما حل كده ح تشوهي سمعتك يقولو راجلك قبضو مع بت و تبقى سيرتك في كل لسان ..
اخر همي كلام الناس ، الناس بتعرف شنو قاعدين معانا هم اكيد لا عشان كده بعمل البريحني و البشوفو مناسب ...
اممم انا ماشه لي عثمان دي الخمسه دقايق بقت ساعه ...
المهم شكرا يا سحر ما قصرتي...
ابتسمت و مشت حسيتا ما طبيعيه بس ما اشتغلته بيها بزات بكره عندي حرب كبيره لازم اتجهز ليها ...
رجعته الغرفه لقيتو فاتح الواتس عرفتو من صوت الرسايل عاين لي مسافه و رجع لحدي ما نمته ما نزل التلفون من يدو ،، الصباح قمته لقيتو في الحمام لقيت تلفونو في السرير شلتو و فتحته الموقع و ختيتو و غريبه الليله قام بدري عاينته للساعه لقيتا 5 يداب اها طلع و لا عاين لي رابط لي وش من صباح الله قلته ده مالو كمان لبس و شال المفتاح و مرق قمته انا كمان اصلا النوم طار لي و بعدين لازم اجهز نفسي للح يحصل الليله اثناء ما برتب الغرفه لقيت تلفونو قلته معناها نساهو شلتو فتحتو من غير رمز قلته اشوف العواليق ده بتراسل مع منو امس فتحته الواتساب اخر رساله مكتوب طلعته حبيبي لانو عثمان طلع و انا مسافه البس و اجيك وهو مرسل ليها داخل الحمام قومي اتجهزي ، اتفاجئته عثمان الدخلو شنو ؟ ...
فتحته المحادثه اول شي مسجله بي سوسو لقيت انو كلامي مع سحر كلو مرسلاهو البت كنته سحر واتاكدته انو دي هي سوسو سحر ٠٠💔 الماشي يقابلا و اتفقو يمشو شقه تانيه حتى كاتب ليها العنوان طوالي سجلتو و قلته اكيد بكون انتبه انو نسى تلفونو قفلته التلفون و ختيتو مكانو و رجعته في الكنبه عملته نفسي نايمه فعلا ما مرت عشره دقايق بس جاء فتح الباب بقوه قايل ح يلقاني ماسكه التلفون تقريبا شالو و قفلو و مرق ،اها فتحته عيوني قلته الموضوع بعد ده كبر و ما حقي براي ...