رواية سجين الروح
الفصل الثامن عشر18
بقلم ريم ابو القاسم
قبلته وراء لقيتا بت قصيره عندها صحه لابسه بنطول جنز و قميص كت قالت لي انتي البت الجديده..
قلته ليها اي 😊...
جات سلمت علي بالاحضان استغربته من تصرفا كانو بتعرفني قبل كده قالت لي انا اسراء وبقولو لي سرو و داك سريري جمبك طوالي و هنا في ندى معانا في الغرفه كدي ملابسك .. بقت تشيل في العبايات و الجلابابات و تفر فيها مع انو مكويه و انا بكره الحركه ده قلته ليها لو سمحتي يا سرو ما عايزه اتعزب في المكوه تاني .. بقت تضحك مكوه ما تشيلي هم انا بكوي ليك يا قلبي و مشت قعدت غيرت و بقت شغاله بي تلفونا اما انا خلصته قلته ليها وين الحمام قالت لي اطلعي تالت باب علي يدك اليمين طلعته فعلا لقيتو دخلته اخدته حمام و طلعته طبعا جعته شديد لاني ما ماكله شي عاينته للساعه لقيتا عامله 1 ظهر مشيت لي اسراء قلته ليها في مكان اكل هنا ولا الا اطلع ...
والله يا ....
اسمي تبيان و بقولو لي تنو ...
حلو والله يا تنو اكل هنا ما سمح شديد في بوفي جوه افضل تنزلي تحت في وجبات ظريفه وحلوه كمان ..
بس ما بعرف المكان ممكن تقدميني ده كلو و هي بتعاين في تلفونا قبلت عاينت لي من فوق لي تحت زي تلاته مرات لمن اتعقدته من نفسي قالت لي ده لبس شنو ليكي ..هنا ما في ولد علي فكره ...
قلته ليها انتي مالك انا مرتاحه كده 😊 ...
يا بت انتي هبله مرتاحه بي قميص اكمام و طرحه كبيره بلاي انتي بت لسه صغيره باين حرري نفسك و عيشي شبابك لانو الشباب ده مره لو ضاع ما بتلقى اجدعي و البسي علي كيفك معليش لو بره بس في البيت او هنا كلنا بنات ما في داعي لي كده ...
بصراحه كلاما دخل لي راسي و سمم لي عقلي خلاني افكر بالجد اني مضيعه شبابي و اتذكرته كلام خالتو سميه نفس كلاما قلته ليها يعني اغير عادي ..
ايوا عادي شوفي مثلا انا لابسه شنو ..
فعلا هي لابسه تلت اربع قصير بس انا ما بقدر مشيتا قلته ليها كويس ، بس اسي انا جعانه ممكن تقدميني او ... طوالي قامت لفحت عبايتا وكانت مفتحه من قدام و قالت بشرط تعزميني بقيت اضحك بس كده حاضر ما يغلي عليك اها نزلنا تحت في مطعم ظريف و هادي باين الظهر ما في ناس بتكون كتيره لانو الزحمه الصباح طلبته اتنين بيتزه حجم كبير و بارد و طقينا و طلعنا من دخلنا جدعت لي جلباب من خزانتا قالت لي اسي امشي غيري اترددته في البدايه صح هو حلو و كل شي و رهيب بس انا ما حصل لبسته كده قلته ليها صعب شوفي لي شي اطول وبعدين انا ما طلبته منك غيار ...
علي فكره دي اطول حاجه عندي و ما ضروري تطلبي ده زوق مني و ما تتعودي 😂 ..
اتفاجئته من كلاما بس كيف و هي باين انو متحرره زياده عن اللزوم و من طلعت من السودان ما لقت الينصحا و يقول ليها كده غلط او كده صاح ... كنته رافضه البس جلباب ضيق و قصير كده بس بعد الحاح و اصرار منها لبستو طلع حلو بس كنته متعقدة ماشه و بجرجر في من شافتني قالت لي رهيب رهيب فيك خلاص شيلي بقى ليك قلته ليها لا ح اقلعو انا لانو قصير شديد...
والله تقلعي ازعل منك يا تنو ما تبقى بايخه كده ...
خلاص طيب مشيت قعدته طرف السرير و من فتحته التلفون جاني اتصال من رقم غريب استغربته طبعا (عمي من جيت جاب لي شريحه تركيه عشان اقدر اتواصل بيها مكالمات بس ما سجلته فيها رقم غير رقم عمي و خالتو سميه كان موجوده فيها ..) منو البتصل لي في الشريحه دي واصلا لسه ما اديت رقمي لي زول فتحته الخط ...
السلام عليكم...
كان صوت احمد قلته لي احمد و عليكم السلام...
ممكن تنزلي تحت ....
ما عايزه معاك كلام تاني يا احمد لانك ما خليت مجال للنقاش و التفاهم ...
انا تحت و ماسك سكين و خاتيها في شرياني والله ما تنزلي اقطعهم و اموت و ارتاح و ترتاحي ...
ما بصدق امشي اعمل درامتك دي لاي وحده تانيه فاهم و يا ريت تاني ما تتصل لي ...
لو ما مصدقه عايني بالشباك مشيت الشباك فعلا لقيتو واقف و ماسك التلفون بي كتفو و يدو موجه فيها السكين قال لي شفتي نزلتي لحدي عشره نزلتي ما نزلي بقطع يدي و اموت طوالي شلته عبايه اسراء و هي شغاله لي في شنو مالو ده تنو احكي لي وهو شغال لي واحد اتنين تلاته اربعه خمسه عشان نحنا في الطابق التالت انا يداب في التاني سته سبعه العبايه مفتحه و ما لابسه غيرا حتى النقاب ما لبستو ما اتذكرته ده الا وقت وصلته تحت و قال عشره كنته قدامو بقى يعاين لي و يبكي قال لي اعفي لي انا عملته غلط كبير يا تنو غلط ما بنغفر اعفى لي 😭😭😭 قلته لي في شنو احكي لي ياخ عايزه تموت اسي اقتل نفسك و موت كافر عشان تبقى ليك اتنين وتخسر الدنيا و الاخره عايز مني شنو تاني مش قلته ما مربيه فجأه اتحول نظرو لي شعري و جسمي و الجلباب تحت العبايه و العبايه و حالتي و العرق و انفعالي في اللحظه دي ما حسيت الا بي كف صمت اضاني ....