روايه سامحيني الفصل الثاني 2 بقلم نسمة مالك

روايه سامحيني

 الفصل الثاني 2

 بقلم نسمة مالك

دخلت حماتي وخطفت ابنى من جنبى  بغضب وهو لسه بيزن

شاديه:عملتى ايه فى الواد..انطقي ؟؟

ادهم:  دى مريم اللى تعبانة يا ماما....

شاديه بتريقه..تعبانة ... اه!! وتعبتى من ايه ان شاء الله؟؟

جعانه مش لاقيه تاكلى؟؟ ولا عايزه تاكلى كل يوم لحمه ولا ايه حكايتك بالظبط…

قربت منى وخبطتنى على كتفى بغل وكملت..

عيشى و ارضى يا ختى متشمتيش فيكى حد..

مريم بتعب و ذهول..انتى بتقولى ايه يا ماما لحمه ايه واكل ايه انا تعبت ودوخت شويه مش أكثر !

شاديه:وايه بقى اللى تعبك ودوخك اكيد من كتر نومك بالنهار..

 ما انتي بتفضلى مقفله الشقه ولا بيدخلها شمس ولا بتهويها لازم تتعبى..  بصتلى بقرف وكملت بتحذير..

اتعدلى كده وعيشى وخلى بالك من بيتك وابنك وجوزك اللى شقيان دا…

اول ما خلصت كلامها و انا اتفاجئت بجوزى اللى خد هدومه وخرج لبس فى الحمام و جيه قالى..

ادهم:قومى البسى ولبسى الواد علشان اوديكى عند أهلك

مريم بستغراب .انت قولت ايه يا ادهم؟؟!!

ادهم بزهق وزعيق..قولت قومى البسى ولبسى الواد علشان اوديكى عند اهلك سمعتى كده؟

مريم بضحكه وجع..وانت من امتى بتودينى ؟؟  ما انا من ساعه ما اتجوزتك وانا بروح و باجى لوحدي يا اما مع اخواتي

كملت بتجاهل لمقصد كلامه…

- عموما شكرا انا مش عايزة اروح عند ماما انهارده..

ادهم:بغضب..قومى يامريم انا على أخري قووومي بقوولك !!

انا قولت هتروحى عند اهلك يعنى هتروحى..

قومت من مكانى واتحركت ناحيه ابنى اللى حماتى شايلاه وبتبصلى ببسمه شماته معرفش ايه سببها..اخذت ابنى من على ايديها واتكلمت وانا خرجه من الاوضه…

انا مش هروح فى حته يا ادهم امى لسه قايمه من دور تعب جامد ولما تشوفنى كده هتحس ان فيا حاجه وتتعب زياده..

ادهم:بنرفزه ونفاذ صبر.. طب ايه رأيك و الله العظيم ما انتى بايته فيها يامريم.. !!!

كميه وجع فى قلبى ربنا وحده اللى عالم بيها..

رديت بكل هدوء عكس الانفجار اللى جوايا..

من امتى وانت بتسبنى ابات بره بتنا؟؟!

بصيت لمامته اللى باين على وشها وابتسامتها الشماته اكتر..

ما تقولى حاجه يا ماما !!

شاديه:هقول ايه يعنى .. ما  تقومى تلبسى و تمشى  عشان حلفان جوزك وابقى تعالى بكره…

مريم بإبتسامه وجع..دا اللى قدرتى  تقوليه ! اروح عند اهلى و ابنك ضاربنى بالشكل دا وانا كمان اللى اجى بكره؟؟

 ده بدل ما تقولى انا هخدها عندى يابنى على ما النفوس تهدى..!! بس هتقولى كده ازاى ما انا مش بنتك..

بصيت لجوزى..

انا هروح عند اهلى يا ادهم بس ليا طلب واحد عندك..

متقولش اللى حصل بنا لحد من اهلى علشان خاطر تعب أمى..اخذت نفس وكملت.. و بأمر الله  هجى بكره..

لبست انا وابنى..و  اخذت غيارات تكفى يوم واحد..

وعملت ميكب خفيف ادارى بيه القلم اللى أخذته..

وصلنى أدهم لحد البيت وطلع معايا كمان ودا مش في عادته ابدا..

من ساعه ما اتجوزنى وهو مبقاش يجى عند اهلى خااالص.. عكس الخطوبه سبحان مغير الأحوال..

وقفت قدام بيت ابويا و رسمت احلى ابتسامه على وشى وخبطت خبطتى المعهوده..

ماما يا ماما ماما ياماما ياماما ماما يا ماما ماما..

سمعت صوت فرحه أمى بوصولى..

جيهان:بنوتى حبيبه قلبى..

حضنتى كتييير وباستنى انا وابنى كتييير..

كنت نفسى انفجر من العياط فى حضنها واقولها انا اد ايه زعلانه وتعبانه.. بس مقدرتش خوفى عليها منعنى…

مريم:وحشتينى يا قلب بنوتتك…

جيهان:تعالى ادخلى واقفه بره كده ليه؟؟

مريم:أدهومى معايا ياست الكل واقف على السلم ادخلى البسى الخمار علشان اندهلو…

جيهان:وهى بتلبس الخمار..اتفضل يا ادهم ياابنى دا نورك هل علينا اخيرا شوفناك..!!

ادهم:بإبتسامه..دا نورك انتى يا ماما عامله ايه وصحتك عامله ايه دلوقتى..

جيهان:الف حمد وشكر لله يابنى خفيت لما شفتكم ربنا ما يحرمنى من دخلتكم عليا…

بت يامريم هاتى الواد تيمو مدام نايم انيمه فى سريره..

مريم:اه يا ماما خدى والنبى دا معاد نومنا اصلا الاستاذ صاحى من امبارح وبينام الساعه 10اصبح..

ادهم بهزار بايخ : واد سهيييير زى ابوه..

رديت بوجع حاولت اخفاءه.هههه  لا فعلا.. سهير اوي 

أخدت امى مني تيام ودخلت الاوضه

 بصيت لجوزى  بغضب وقولتله..

قوم امشى من قدامى احسن  انا ماسكه نفسى بالعافيه

 لحظه كمان وهمسك فى زماره رقبتك واضربك القلم اللى ضربتهولى..

ادهم بإستفزاز..بتتشطرى عليا فى بيت اهلك..متنسيش إنك هترجعيلى بكره وساعتها هنفخك..

خرجت امى لقتنا بنبص لبعض بشرار من عنينا..

جيهان:الله مالكم ياولاد بتبصو لبعض زى الديوك كده ليه اوعى تكونو متخنقين؟؟

مريم:حضنتها جامد وببتسامه..ربنا ما يجيب خناق ياست الكل..

أمي طيبه ولانها بتصدقنى فى كل حاجه.. عدت الموقف 

طيب ياحبيبتى ربنا يهدى سركم..  طب انا هاحضرلكم الفطار تاكلى وتدخلى تنامى شويه جنب ابنك..

أدهم وقف ويستعد للذهاب..طيب استأذن انا بقى و سلمى لي على عمى انا عارف انه بيروح الشغل بدرى اشوفه مره تانيه ان شاء الله..

جيهان:اقعد يابنى كل لقمه مع مراتك الاول مستعجل على ايه؟؟

مريم:سبيه ياماما أدهم مش بياكل الصبح كده...اصله جاى من الشغل و عايز ينام هو كمان..

جيهان:الله يعينك ويقويك يابنى..

ادهم:يارب يسمع منك يا ماما يله سلام انا.. مريم لو احتاجتى حاجه كلمينى.. ماشي !! 

مريم و هى بتبص للباب وبنظره وجع : لو احتجت حاجه !! 

 لا متقلقش روح نام انت…

خرج ومشى ناحيه السلم وقبل ما ينزل ناديت عليه بصوت هامس…

أدهم؟؟

التفت من غير ما يرفع عينه فى عينى كالعاده…خير !!

- استنى بوس تيام قبل ما تمشى..

أدهم:خليه نايم متقلقهوش وكده كده انتو جاين بكره..

مريم:بأصرار..لا معلش مش هيجرى حاجه برضو خدو فى حضنك و بوسو.. يمكن يفكرك تحافظ على اللى بنا..

دخلت جبت ابنى وفعلا باسه ومشى وسابنى بمثل دور الزوجه السعيده قدام امى…

جيهان:تعالى يا مريومه عملتلك الطعميه مقرمشه زى ما بتحبيها تعالى يا حبيبتى كلى الاول وبعدين نامى..

مريم:حبيبتى يا مامتى تسلم ايدك…

قعدت أكل وانا بغصب على نفسى وسرحت فى حنيه امى وهى قعده تقشرلى البيض وتقطعلى خصار وفاكهه وبتأكلنى فى بوقى كمان وبطبطب على ظهرى.. وبتتكلم بكل الحنان اللى فى الدنيا..

جيهان:كلى يا ضنايا بألف هنا وشفا..

مريم:بحب شديد..حبيبتى متحرمش منك ومن رضاكى وحنيتك عليا ابدا..

جيهان:ولا انحرم منك يا قلب ونن عين أمك..مالك يا مريم فيكى ايه قلبى بيقولى انك متخانقه مع جوزك صح..

مريم:بهزار..فعلا انا متخانقه معاه وضربته حته علقه وقولتله غور يالا  على بيت اهلك 😂

جيهان: يابت يا شقيه انتى..😂

على امك برضو ؟ وحياه امك تلاقيه هو اللى عمل فيكى كده وانتى بتدارى عليه ...انتي ي بنتى تربيتى وعرفاكى وحفظاكى

مريم:ببتسامه بتخفى بيها دموعها اللى هتخونها و تنزل..

فاكره يا أمى لما كنتى تتخانقى مع بابا وافضل انا اقولك انتى ازاى تسمحيلو يزعقلك كده وأزاى يكلمك بالاسلوب دا..

رغم ان بابا حبيبى معلش يعنى يا ماما كان بيزعق على حق.. بس عمرى ما شوفته بيمد ايدو عليكى…

وانا افضل اقومك عليه علشان تقولى لتيته وجدو وتقولى كمان لأخواتك…

قربت وحضنتها.. بس انتى حبيبتى عمرك ما اشتكتيه لحد وكنتى تردى عليا وتقوليلى..

ملكيش دعوه باللى يحصل بينى وبين ابوكى وهو حر يزعق براحته فى بيته وانا اللى غلطانه اصلا فى حقه وهتشوفى لما يهدى هيجى هو يرضينى ازاى..

جيهان:ببتسامه رضى..وفعلا حبيبى هو اللى دايما يراضينى ولحد دلوقت كمان ربنا يديله الصحه وطولة العمر..

..بس ايه اللى فكرك بالكلام دا دلوقتى..

قوليلى مالك يابنتى ريحى قلبى وطمنينى عليكى..

مجيتك انتى وجوزك مع بعض الصبح بدرى كده غريبه مش مطمنانى..

فى ايه يا مريم؟؟

مريم:فى انى كبرت يا امى وعرفت انتى كنتى بتستحملى بابا وقت زهقو وعمرك ما سبتى بيتك ولا سبتى بابا وغضبتى زى باقى الستات ليه…

واطمنى يا حبيبتى انا وجوزى كويسين جدا بدعاكى لينا ياست الكل ومتقلقيش على بنتك انا تربيتك..

جيهان:طيب يا ضنايا انتى مش عايزه تقوليلى وانا مش هضغط عليكى..

ربنا يصلحلك حالك ويريح بالك…

مريم:يارب يا ماما ادعيلى كتير اوى من قلبك بكون مطمنه بدعواتك ربنا يديكى الصحه وطولت العمر ياحبيبتى..

انا كلت الحمد لله تسلم ايديكى يا مامتى..

جيهان:بألف هنا وشفا يا مريومه قومى بقى الحقى نامى شويه جنب الواد تيمو..

وانا هعملك ورق العنب اللى بتحبيه وهدبحلك فرخه بلدى تقويكى شويه يا نور عينى….شكلك مش بتاكلي خالص

….بوست ايد امى ودماغها ودخلت نمت جنب ابنى وروحت فى النوم فى ثوانى من كتر تعبى وسهرى طول الليل..

 و بسبب اللى حصلى من جوزى وحماتى نمت كتير اوى..

لدرجه مسمعتش ابنى لما صحى وامى خدته من جنبى سكتته..

وحاولت تصحينى لكنى كنت تعبانه اوى صعبت عليها سبتنى اكمل نوم..

فجأة صحيت على صوت زعيق بابا وسمعت اسم جوزى فى وسط كلامه..

               الفصل الثالث من هنا

لقراءة باقي الفصول من هنا