رواية اصون كرامتي
الفصل الاول1
بقلم عبير سليم
ليس للمحب كرامه ولا يطرق على قلب العاشق الكبرياء كثيرا ما نسمع تلك الكلمات فنجد من يتفق معها وهناك من يعارضها
وبشده فإذا فقد أحدهما كرامته وكبرياءه في علاقته بحبيبه فلا ندري كيف سيرى الطرف الآخر هذا
الأمر هل سيعتبر هذا الأمر نابعا من شدة عشقه له ام سينظر للأمر على أنه شئ يقلل منه ويهينه ويعيبه ولا يجعل قلبه يميل له او يبادله العشق
في صباح يوم جديد بإحدى المدارس الثانويه للبنات يدق الجرس اعلانا عن بدء يوم دراسي جديد حيث يتحرك الجميع نحو الطابور و كل يفعل ما هو موكل به فنجدهم جميعا على أرض الطابور مابين مدرسات التربيه الرياضيه اللاتي ينظمن الصفوف بين الفتيات وبين المدرسات والمدرسين الذين يقف كل منهم أمام فصله وبين الطالبات اللاتي يقفن مع معلمتهن استعدادا لالقاء الإذاعة المدرسيه اما هي فبرغم وقوفها أمام فصلها لحرصها على الالتزام إلا أن عينيها كانت متجهه نحو باب المدرسه تنتظر دخوله بفارغ الصبر لعلمها بتأخيره الدائم عن الحضور وغيابه المتكرر تظل موجهه بصرها نحوه تنتظر مجيئه بلهفه وشوق شديدين حتى تراه وهو يدخل من الباب متجها نحو مكتب شئون العاملين للامضاء فتشعر بالسعاده والارتياح لاطمئنانها بأنها ستنعم برؤيته هذا اليوم
تقترب منها زميلتها وتهمس لها : اطمنتي خلاص يا رقيه هديتي
رقيه : في إيه يا نورا مالك عالصبح
نورا :أنا اللي مالي بردو يابنتي اهدي على نفسك شويه مش كده
رقيه : طب اقفي قدام فصلك دلوقتي عشان المديره بتبص علينا
يصعد الجميع إلى الفصول ومع كل فصل مدرسه تدخل رقيه الفصل وتشرح درسها حيث انها معلمة لغه انجليزيه وعند انتهاء وقت الحصه تتجه مباشرة لحجرة المدرسات والمدرسين حيث يجلس بها معظم العاملين بالمدرسه
تدخل الحجره وعينها على المقعد الذي يجلس عليه دائما فتجده جالسا يتحدث لأحد الزملاء فتلقي عليهم السلام : صباح الخير
يردون : صباح النور يا رقيه
رقيه وهي توجه له الحديث : هو انت كل يوم حتيجي متأخر كده يا إسلام مفيش يوم تيجي فيه بدري شويه قبل الطابور
إسلام : صعب اوي يا رقيه انا بسهر ومبقدرش اصحى بدري
رقيه : طب ما تحاول تنام بدري شويه عشان تقدر تصحى بدري
إسلام : للأسف اتعودت خلاص عالسهر مبقتش بعرف انام بدري نهائي
محمود : بكرة لما تتجوز حتلاقي نفسك بتنام من المغرب عشان تهرب من دوشة العيال وزنهم
إسلام : جواز ايه يا عمنا لافكك انا مرتاح كده عايش لنفسي وسلطان زماني
تحس رقيه انها اتضايقت لما قال كده تحاول تغير الموضوع : فطرتوا
اسلام وهو بيشرب السيجارة : دلوقتي نبعت حد من العمال يجيب فطار
رقيه : لاء انا جايبه معايا وعامله حسابكم
محمود : يا بنتي انتي كده بتكلفي نفسك اوي كل يوم تجيبي معاكي فطار واكل ما احنا نبعت العمال يجيبوا وخلاص
رقيه : أنا بحب اعمل الأكل بايدي
واهيه نورا جت ياللا يا نورا عشان نفطر
نورا : ياللا طيب بسرعه عشان الحق احضر
تحط رقيه و نورا الفطار على المكتب اللي ادام اسلام ويقعد محمود ويبدءوا ياكلوا
إسلام : حقوم احط الكاتيل عشان نشرب شاي
تقوم رقيه من مكانها بسرعه : خليك انت انا حعمل الشاي
محمود : رقيه حطيلي الشاي في الكوبايه الصغيره دي
رقيه : لاء دي كوباية اسلام مبيعرفش يشرب غير فيها
تبص لها نورا وميعجبهاش تصرفاتها نهائي
تدخل صفاء زميلتهم ومعاها دفتر الاحتياطي : اسلام عندك دلوقتي احتياطي
رقيه : طب هو بيفطر دلوقتي
نورا تخبطها فرجلها عشان متتكلمش
اسلام : ماشي يا صفاء حاخد كوباية الشاي واروح
صفاء : لاء يا اسلام في متابعه إياك تروح الفصل بالشاي مش عاوزين مشاكل
رقيه : خليك انت يا اسلام انا حروح مكانك
اسلام : لا يا رقيه مش كل ماتجيلي حصه احتياطي تاخدبها
رقيه : عادي والله يا اسلام حروح احضر في الفصل خليك انت كمل فطارك براحتك
تاخد رقيه حاجتها وتروح الفصل و تاخد صفاء نورة وتتكلم معاها : هي صاحبتك دي مش مافوراها شويه
نورة : والله بكلمها كتير بس مفيش فايده فيها يا ميس صفاء
صفاء : مينفعش اللي هيا بتعمله ده هي لو فاكره انه كده حيشيلهالها ويحبها تبقى غلطانه الراجل مبيحبش اللي تندلق عليه اوي كده لازم تعمل لنفسها كرامه شويه دي الود ودها تقعده وتدخل كل حصصه
نورة : بتحبه اوي يا ميس صفاء وكل أملها في الدنيا انه يحبها زي ما بتحبه
صفاء : مش بكده يا نورة مش باللي هيا بتعمله ده دي بتذل نفسها ليه يا بنتي الحب مبيتشحتش يا نورة واللي انا شايفاه الصراحه انه مبيتعاملش معاها بنفس معاملتها ليه هي بالنسبه له شئ عادي دي مرة كانت غايبه وبقولله خد حصه مكان رقيه عشان مجاتش النهارده لقيته عادي جدا ولا اي رد فعل وانا والله معارفه ايه اللي مشحتفها عليه اوي
كده مش عمر الشريف هويعني
نورة : زي اللي مشحتفك على مستر أحمد يا صفصف
صفاء : ياختي قطيعه تقطعهم كلهم بلا هم ياللا اما اروح اشوف أي طالبه تلف بالغياب قولي لرقيه تلم الدور شويه محدش بياخد غير نصيبه
تسيبها و تتحرك و تدخل نورة تاني عشان تحضر اما إسلام فجاله تليفون وخرج يرد عليه ومحمود بدا يتكلم معاها : عامله ايه يا نورة
نورة : الحمد لله و الله يا محمود
محمود : وحنفرح بيكي امتى انتوا طولتوا اوي
نورة : لسه شويه يا محمود الأسعار غاليه اوي وكل ما نحوش قرشين عشان نشتري حاجه نلاقي الأسعار عليت أضعاف
محمود : ربنا معاكم يارب فتح البيوت مش بالساهل وانتوا يعني مش لازم تجيبوا كل حاجه لو نقصكم حاجه تبقوا جيبوها بعد الجواز المهم دلوقتي تتلموا فبيت واحد بقى
نورة : أنا بتكلم في الأساسيات يا محمود احنا مفيش قدامنا مجال للرفاهيات اصلا
يدخل اسلام على حوارهم : والله انا شايف ان الجواز ده مشروع فاشل ولا ليه لزمه
محمود : لا طبعا يا إسلام مفيش حاجه ربنا شرعها وكانت فاشله احنا اللي بنضيع جمال وبهجة كل حاجه فحياتنا ويعدين ده على أساس انك مش ناوي ترتبط و اللا إيه
اسلام : ما قلتلك اني مرتاح كده يا محمود
يضرب جرس انتهاء الحصه و تاخد نورة حاجتها و تخرج عشان تروح حصتها و تقابل رقيه في الدور : فصل تانيه رابع ده زي الزفت البنات فيه يرفعوا الضغط الود ودهم يقوموا يرقصوا معرفتش اعمل اي حاجه ولا عرفت احضر ولا كلمه
نورة : تستاهلي
رقيه : استاهل
نورة : أيوة تستاهلي عشان محدش قالك تتبرعي وتدخلي الحصه مكانه هو ميدخلش حصته ليه هاه على رجليه نقش الحنه رقيه خدي بالك عشان تصرفاتك دي مش عجباني و لافته نظر المدرسه كلها
رقيه : لافته نظر المدرسه ازاي يعني
نورة : أيوة يا رقيه كل اللي في المدرسه بيتكلموا
رقيه : بس انا معملتش حاجه غلط يانورة
نورة : من وجهة نظرك يا رقيه اللي برة الدايرة بياخد باله من كل حاجه وبيركز اكتر من اللي صاحب الموضوع نفسه السنه اللي فاتت لما هدى كانت مامتها تعبانه ومش عاوزة تقول لحد وكانت كل شويه تاخد التليفون وتقف تكلمها على جنب وتوطي صوتها مش وقتها بقى الكل واخد باله لدرجة ان في ناس هنا شككت في أخلاقها وقالوا بتكلم مين دي كل شويه لحد ما اضطرت تقول ان مامتها تعبانه ومكنتش عاوزة حد يعرف حاجه عن تعبها
احنا مش لوحدنا يا رقيه احنا حوالينا ناس بيعدوا علينا النفس
تلاقي بنت جايه تجري : ميس نورة ميس سعاد بتزعق وبتقولك روحي حصتك البنات عاملين دوشه والصوت حيوصل للمديرة
نورة : قوليلها ميس نورة جايه واقفي عالفصل على مااجي
تلتفت لرقيه : عارفه البنات دول عارفين كل حاجه عننا ومفيش حاجه بتفوتهم و بيتكلموا عننا و بيروحوا يحكوا لاهاليهم واحنا مدرساتهم يعني لازم نكون قدوة ليهم مينفعش يبصوا لنا بصه مش حلوة
رقيه : انتي ليه مكبره الموضوع اوي كده يا نورة انا عملت ايه لكل ده
نورة : معملتيش حاجه يا رقيه وانا غلطانه اني بكلمك انتي حرة اعملي اللي انتي عاوزاه واللي يريحك
رقيه : نورة انا مقصدش
نورة : يا رقيه ده المثل بيقول يابخت من بكاني وبكى علية ولا ضحكني و لا ضحك الناس علية وانا مش عاوزة حد يضحك عليكي يا رقيه
يالهوي سعاد جت يا وقعتك السوده يا نورة : يعني ينفع كده يا نورة
نورة : خلاص والله انا رايحه معلش بقى يا سوسو
تجري عالفصل بسرعه اما سعاد فتكلم رقيه : ازيك يا رقيه عامله ايه يا حبيبتي
رقيه : الحمد لله و الله يا ميس سعاد
سعاد : انتي معانا في الكنترول ان شاء الله السنادي
رقيه : هو اسلام معانا بردو
سعاد : لا يا رقيه ميس ايناس قالت اسلام يخرج من الكنترول
رقيه : ليه يا ميس سعاد
سعاد : والله يعني مش عارفه نسيتي واللا إيه ده احنا كنا بنطلع من وراه غلطات كتير و مش ملتزم ودايما متأخر اسلام مش حينفع معانا هو كفايه عليه المراقبه والتصحيح
رقيه : طب هو ممكن ابقى اساعدهم في التصحيح
سعاد : رقيه انتي حتجنينيني مانتي عارفه ان أعضاء الكنترول ممنوع يشاركوا في التصحيح وبعدين هو من قلة الشغل عندنا عاوزة تساعديهم كمان ياللا سلام
تدخل الاوضه وهي متضايقه ان اسلام مش حيكون معاها في الكنترول يعني معنى كده انها مش حتعرف تشوفه ولا تتكلم معاه ايام الامتحانات
تقعد على مكتبها وباين عليها انها متضايقه وهو قاعد بيلعب في موبايله وفي مدرسين غيره كانوا قاعدين : مالك يا رقيه شكلك متضايقه
رقيه : لا عادي مفيش حاجة يا نهى
نهى : ماشي
رقيه : اسلام عاوزاك معلش
يقرب منها اسلام : خير يا رقيه
رقيه : بقولك ايه عاوزاك تكلم المديره عشان عاوزة تخرجك من الكنترول
اسلام : احسن بردو انا اصلا مكنتش عاوز ادخله تاني بركه انها جت منهم
رقيه : أيوة يعني انت مش زعلان اننا مش حنشتغل مع بعض
اسلام : عادي يا رقيه مااحنا فمدرسه واحده
رقيه : طب ومين حيفطرك بس يا اسلام
اسلام : على اساس اننا فصحرا يعني والله انتي تحفه يا رقيه
رقيه : أنا تحفه يا اسلام
اسلام : بس تحفه جميله الصراحه
تفرح رقيه اوي هيا اصلا بتفرح بأي كلمه تسمعها منه و طول ما هيا قاعده بتحاول تفتح معاه كلام في أي موضوع وبتحاول تعمل له أي حاجه عشان ترضيه وتخليه يحبها
يدخل المدرس الأول : صباح الخير يا شباب
يردوا عليه التحيه وبعد كده يبلغهم ان الموجه العام جاي بكرة ولازم دفاتر تحضيرهم و كشوفهم و كل حاجتهم تكون كامله عشان ميحصلش مشاكل و تطمنه رقيه ان كله تمام لكن بعد ما يخرج تعرف من اسلام ان حاجته مش كامله فتاخد منه دفاتر تحضيره و شغله و كشوفه كلها عشان تخلصهاله وتفضل سهرانه عليها لحد ما تخلصها كلها وتروح الصبح تديهاله وهو ياخدهم منها من غير حتى ما يقوللها كلمة شكرا وكأنه بقى حق مكتسب ليه ويعدي اليوم وتعدي الأيام ورقيه اهتمامها بيه بقى مبالغ فيه وهو بالنسبه له الموضوع عادي كانت بتفرح بأي ضحكه بيضحكها فوشها اي كلمه حلوة بيقولهالها اي مجامله بيجاملها بيها على حاجه حلوة لابساها او اكله حلوة عاملاها
وبرغم ان كتير كلموها لكن هيا مكنتش بتهتم وكل اللي كان شاغلها انها تكسب رضا اسلام وانه يحبها زي ما هيا بتحبه وتعملله اي حاجه عاوزها او محتاجها حتى من غير ما يطلبها
ييجي معاد امتحانات الترم الأول وتنشغل رقيه في الكنترول ويطلب المدرس الأول من المديره تكلف حد من المواد غير الاساسيه يساعدهم في التصحيح عشان عددهم صغير خصوصا ان رقيه في الكنترول و كمان واحده زميلتهم وضعت مولود واخدت اجازة الوضع فالمديره كلفت صافيناز الاخصائيه الاجتماعيه الجديده في المدرسه انها يوم امتحان الانجليزي تساعدهم في التجميع
كانت رقيه بتصمم انها هيا اللي تلف عاللجان تاخد غياب البنات عشان تعرف تشوفه وتسلم عليه : صباح الخير يا اسلام
اسلام : صباح الفل يا روكي عامله ايه يا جميل
رقيه : الحمد لله و الله على فكره انا عامله حسابك معايا في الفطار
اسلام : انا فطرت خلاص يا رقيه
رقيه : ومين بقى اللي فطرك غيري
اسلام : محمود كان جايب سندويتشات واخدت منه متشغليش نفسك بية وشوفي شغلك
رقيه : وهو انا لو مشغلتش نفسي بيك حشغل نفسي بمين
اسلام : شكرا يا رقيه ربنا يخليكي
تاخد الغياب وتخرج من اللجنه ويكلمه زميله اللي معاه في اللجنه : إيه حنفرح بيكم امتى
اسلام : تفرحوا بمين مش فاهم
باسم : أنت و رقيه يا بني
اسلام : أنا ورقيه اللي هو ازاي يعني
باسم : هو انتوا مش بتحبوا بعض يا بني
اسلام : ياربي بقى عاللك الكتير رقيه زي اختي بالظبط
باسم : اختك انت بتستهبل المدرسه كلها عارفه ان رقيه بتحبك و بتقوللي اختك
اسلام : باسم اديك قلت اهوه هي بتحبني وانا مليش دعوة بحد كل واحد حر فمشاعره انا لا في دماغي حب ولا جواز انا بتعامل معاها عادي زي ما بتعامل مع كل اللي في المدرسه
انتي يا بنت بصي ادامك باسم بقولك ايه ظبط معايا اللجنه
ييجي مراقب الدور : إيه يا جماعه اللجنه دي الوحيده اللي صوتها عالي في الدور ركزوا شويه مع البنات وشوفوا شغلكم يا اساتذه
و ييجي يوم امتحان الانجليزي و يعرفوا ان صافيناز الاخصائيه حتساعدهم في التصحيح وياخد اسلام اخر سؤال في الورقه وهي تقعد جمبه عشان تجمع الورقه
كان كل ما يكلمها ترد على اد السؤال كلامها قليل جدا و لما طلبوا يشربوا شاي معرضتش عليهم اي خدمه بالعكس هما اللي كانوا بيخدموها حتى اسلام نفسه هو قام بنفسه يعمل شاي وعمللها معاه : شكرا تعبت نفسك
اسلام : مفيش تعب ولا حاجه انتي منورانا
صافيناز : شكرا يا مستر
صححت معاهم يومين وكانت بتعاملهم بتعالي إلى حد ما حتى انهم كانوا مش حابين وجودها معاهم لكن اسلام انجذب ليها وحسها مختلفه عن كل اللي في المدرسه احساسها بنفسها و كبرياءها شدوه ليها ولأول مرة اسلام يعمل حاجه لحد قام اكتر من مرة يجيبلهم حاجات و نزل اشترى حاجات حلوة من تحت بعد ما كان العمال مشيوا. و هي مكانتش بتقوم من مكانها غير وهي ماشيه وطبعا كانوا بيخلصوا بالليل و بيخرجوا بعد الليل ما بييجي
وبعد ما خرجوا من المدرسه : انتي حتروحي ازاي
صافيناز : حركب اي حاجه
اسلام : طب انا معايا عربيه لو تحبي اوصلك
صافيناز : انت معاك عربيه
اسلام : أيوة بس في أيام الدراسه مبجيش بيها باجي مواصلات أسهل
صافيناز : بس انا مش حابه اتعبك
اسلام : مفيش تعب ولا حاجه وبعدين هو انا أطول ان الجمال ده كله يركب معايا دي العربيه حتنور
صافيناز : ميرسي يا اسلام
تركب معاه العربيه ويتكلم معاها و يلاقي رقيه بترن عليه يسيبها ترن و ميردش عليها
صافيناز : مش حترد عالتليفون
اسلام : لا مش مهم
يفتح معاها موضوعات لحد ما يوصللها لباب العماره عندها و يسلم عليها و تنزل وهو مبسوط و يلاقي رقيه بترن تاني فيفتح الخط : أيوة يا رقيه في حاجه
رقيه : لا مفيش انا بس بطمن عليك خلصتوا و اللا لسه
اسلام : أيوة خلصنا و مروح في الطريق
رقيه : أنا كنت عاوزة اساعدكم و الله بس انت عارف بقى
اسلام : عدت يا رقيه و بعدين صافيناز ساعدتنا
رقيه : وانت عامل ايه طمني عليك
اسلام : أنا كويس يا رقيه
رقيه : عرفت بقى تاكل وانا مش موجوده
اسلام : اه اكلنا الحمد لله
رقيه :بالف هنا على قلبك اسلام بقولك انت عيد ميلادك الاسبوع الجاي وانا نفسي احتفل معاك بيه
اسلام : لا عيد ميلاد ايه انا مبحتفلش بعيد ميلاد
رقيه : بس انا نفسي اوي احتفل بيه معاك واجيبلك هديه
اسلام : ملهاش لزمه والله يا رقيه متتعبيش نفسك انا مش عاوز حاجه رقيه انا وصلت و تعبان مش قادر ياللا تصبحي على خير سلام ويقفل معاها من غير حتى ما ينتظر ردها
رقيه وقتها زعلت بس قالت لنفسها اكيد هو تعبان من الملاحظه والتصحيح طول اليوم وخلصت الامتحانات و بدأت اجازة نص السنه ومكنتش بتشوفه نهائي لدرجة انها كان نفسها الاجازة تنتهي بسرعه عشان ترجع
تشوفه لأنها كانت كل ما تحاول تتصل عليه يا تلاقي تليفونه مغلق يااما جرس وميردش عليها و لو رد يرد بكلمتين و يقفل على طول اما علاقته بصافيناز قويت وبقوا أصدقاء عالفيس و اخدوا أرقام بعض و كان بيكلمها باستمرار في الاجازة لكن هيا مكنتش بتتصل بيه نهائي و ده غير كمان انها كانت
اوقات كتير مبتردش عليه كان طول الوقت هو اللي بيجري وراها و بيتصل عليها كتير لحد ما ترد عليه
وبلغها بيوم عيد ميلاده وانه عاوز يقضيه بره البيت و لو تحب تكون معاه فهنته بس رفضت بطريقه شيك
وجه يوم عيد ميلاده اللي كانت رقيه منتظراه بفارغ الصبر رنت عليه الساعه
اتناشر بالظبط عشان تكون أول واحده تهنيه بعيد ميلاده لكن لقته انتظار فتره طويله و مردش عليها
و لما اتصلت عليه الصبح لقته مغلق اشترت ليه ميداليه قيمه و ازازة بيرفيوم غاليه اوي وريحتها جميله جدا و حاولت تكلمه تاني عشان تهنيه لكنه مردش عليها
كتبتله تهنئه عالفيس رد بكلمتين زي اللي بيرد بيهم على أي حد وخلاص فانتظرت اول يوم في الترم التاني عشان تقدر تقدمهاله