رواية أنانية ام
الفصل الثاني 2
بقلم نجلاء ذكي
مرت ٤ سنوات على سفر ايهاب وقد حدث بها الكثير فهو لم ينزل اجازات بل ظل بعيدا وكلما كلم والديه كان يتحجج بان لديه عملا كثير فكان قليل الكلام معهم
اما ايمن فقد انجذب الى اهل زوجته وعمله كثير فلم يكن ياتى لزيارة والديه الا قليلا وبالمناسبات وقد انجب طفلين توأم تقريبا ماجدة لم تراهم الا مرات قليلة تعد على اصابع اليد الواحدة فايمن وزوجته دائمى الانشغال بالعمل بالمشفى وتاركين تربية الاولاد الى المربيات مثلما تربت والدتهم للاسف ماجدة اصبحت وحيدة بلا ابناء
اما ضحى وعائلتها فلقد حصلت ضحى على الليسانس بتقدير عام امتياز فهى كانت مميزة فى دراستها وقد عينت معيدة بكليتها واصبح لها صيت بين طلابها واساتذتها والان وبعد مرور اربع سنوات انكبت على دراستها و تعد الان الماجستير
باسل من الله عليهم وتفوق بالثانوية العامة وهو الان بكلية الطب الاسنان كما تمنى
عائلة ضحى ظلت كما هى متماسكة ومترابطة لم يكن ينغص عليهم غير رفض ضحى الزواج بسبب تجربتها الفاشلة
-صباح الخير على احلى ماما فى الدنيا لترد امنة بمحبة
-حبيبة قلبي نمتى كويس يا قلبي انتى طول الليل صاحية شايفة نور اوضتك منور لحد الفجر
-فعلا يا ماما كنت بكمل البحث اللى طلبه مني دكتور طارق انتى عارفة هو المشرف على رسالة الماجيستر بتاعتى
-ربنا يوفقك حبيبتى ويرزقك الخير وابن الحلال
-مفيش فايدة فيكى ياماما بردو ابن الحلال انا مش بفكر فى الجواز خالص يا ماما
-ليه يا بنتى فى بنت متتمناش تتجوز ويبقى عندها بيت واولاد
-يا ماما انا مش عايزة افكر فى الموضوع ده وبعدين انا ورايا حاجات كتير لازم اعملها والجواز هيعطلنى
-ايه بقى ان شاء الله اللى وراكى
-مستقبلى يا ماما وشغلى ان شاء الله بعد الماجستير اكمل الدكتوراة واكون دكتورة وممكن افتح عيادة كمان
-يا بنتى عمرك بيجرى منك وايه يعنى تكملى دراستك وتتجوزى
-يا ماما انا بجد مش عايزة افكر فى الموضوع ده كفاية اللى حصل قبل كده مش عايزة اسلم قلبي لحد وفى الاخر يسبنى ويكسر قلبي تاني منغير رحمة
-يا حبيبتى الناس مش زى بعضها واكيد ربنا شايل ليكى الاحسن ربنا يسمحك يا ايهاب انت وامك عقدت البنت
-يا ماما بلاش ندعى على حد ربنا يسهل لهم وياستى لو ربنا اراد اكيد هيبعت ليا نصيبي خلاص كده يا قمر ارتحتى
-ربنا يبعتلك ابن الحلال
لتضحك ضحى فهى تعلم ان امها تفكر فى زواجها طوال الوقت ولن تتغير
-طيب يا ست الكل الحق بقى انزل عندى سكشن بدرى النهاردة سلام يا قمر وتتركها وتغادر الى عملها
************************************
بكلية الاداب ذهبت ضحى الى مكتب دكتور طارق بعد ان استاذنت الدخول وما ان شاهدها حتى وقف يرحب بها وعيناه تحتضنها نعم فدكتور طارق معجب جدا بضحى بل تعدى مرحلة الاعجاب وتحول الى حب فى صمت فلقد كانت طالبته فى عامها الاول بالجامعة وكانت طالبة متفوقة ونشيطة ولكنها خجولة فلفتت نظره من اول محاضرة له ثم تحول هذا الاعجاب لحب مع الايام لكنه اصبح حب بلا امل عندما تمت خطبتها حاول ان ينتزعها من قلبه وخصوصا وانه حب من طرف واحد استطاع تقبل انها ليست نصيبه الى ان علم ان تلك الخطبة قد فُسخت فتجدد الامل بقلبه مرة اخرى فهو يحاول ان يقتحم قلبها منذ اربع سنوات لكنها خائفة من اى تجربة جديدة تخشى الفشل وهو بالتالى يخشى ان يصرح فيخسر طالبة مجتهدة وزميلة غالية ينتظر ان الايام تداوى جرحها ويستطيع ان يعبر عن مكنون قلبه فقد تحول حبه الى عشق لن يشفى منه ابدا
-صباح الخير دكتور طارق
-صباح الخير دكتورة ضحى ايه الاخبار خلصتى البحث
-اه الحمد لله كان فاضل جزء بسيط سهرت عليه وخلصته اتفضل ممكن حضرتك ترجعه ولو فى اى ملاحظات ممكن حضرتك توضحها ليا وان شاء الله اضبطها ليتحدث بقلق
-طب ليه جيتى وانتى سهرانة كده هتكونى تعبانة خلاص خليكى ارتاحى وانا ممكن ادخل مكانك
-لا يا دكتور انا كويسة الحمد لله وهقدر ادخل السكشن عادى والله لو تعبانة هعتذر متقلقش
-وانا لو مقلقتش عليكى هقلق على مين
ليصمت وهى ايضا وتشعر بالخجل من حديثه فهى تشعر بمشاعره نحوها لكنها تخشى الخذلان مرة اخرى ليحاول طارق تغير الموضوع عندما شعر بخجلها وتوترها
-طب اتفضلى انتى على محاضرتك وانا هراجع البحث وبعد المحاضرة نتناقش فيه لو عندك وقت
لترد بتوتر وهى لا تستطيع ان ترفع عينها عن الارض
-تمام يا دكتور بعد اذن حضرتك
لياذن لها الانصراف ويظل محدق فى اثرها وعلى وجهه ابتسامة فهو لديه شعور ان ضحى بدات تشعر بمشاعره ليحدث نفسه
-طب احبك اكتر من كده ايه يا رب تكونى من نصيبي
فهو لا يمل ولا يكل من الدعاء لكى تصبح نصيبه الجميل ،لينكب بعد ذلك على البحث لكى يراجعه
ويتناقش معها بعد ذلك
*************************************
وبمنزل والدا ايهاب تجلس ماجدة وحيدة وهى تبكى وحدتها وحرمانها من اولادها ، اولادها الذان كان لها كل حياتها فهى تشعر ان لم يعد لديها احد حتى زوجها منذ ان احيل الى المعاش وهو يجلس على القهوة مع رفقائه
لتبكى حالها لتجد محمد يدخل المنزل وهو يدندن وما ان رأها بتلك الحالة حتى جزع فخاف ان يكون هناك مكروه حدث لها او للاولاد
-ماجدة مالك بتعيطى ليه لتجفف دموعها وتنظر اليه بحزن والم
-بعيط على حالى يا محمد
-ماله حالك فيه ايه بس
-يعنى منتش عارف ماله حالى
-لا مش عارف
-انا قعدة لوحدى طول الوقت واولادك خلاص محدش بقى موجود البيت فضى عليا
-ما انتى اللى فضيتى البيت ده يا ماجدة
-انا يا محمد
-اه تحبي تعرفى ازي اقولك فضتيه بطريقة تربيتك لاولادك فضتيه بانانيتك
-ايه يا محمد اللى بتقوله ده طريقة تربيتى لاولادى ازى دول ولادك بنتحسد عليهم ما شاء الله الاتنين دكاترة ولا فى زيهم دى الناس كلهم بيشكروا فى اولادى واللى وصل ليه اولادى
-اهو انتى مش همك الا كلام الناس بس بس اولادك وصلوا للى هما فيه ازى مش مهم على فكرة اولادك اللى فرحانة بيهم دول اكتر ناس فشلة فى الدنيا دى وانتى السبب
لترد عليه بغضب
-ازى يعنى ولادى فشلين
-اه فشلين انتى لغيتى شخصيتهم من وهم صغيرين كل المهم عندك تحققى حلمك فيهم ان تبقى بتتباهى بيهم ادام الناس لكن هما من جواهم ايه انتى دمرتيهم
لترد بتعجب
-انا دمرتهم يا محمد انا
-اه يا ماجدة انتى عاملة زى الدبة اللى قتلت صاحبها من حبها بيه وخوفها عليه انتى من حبك وخوفك على اولادك للاسف بقيتى انانية فى حبهم عايزاهم طوع ليكى وبس والنتيجة ايه اتفرط العقود اللى اقعدتى تلضمى فيه وولادك سبوكى ومشيوا
-انت بتقول ايه يا محمد انا انانية
-اه انانية تحبى تعرفى ازى اقولك اول حاجة محيتى شخصية الاولاد علشان ميعرفوش يخدوا اي قرار الا بموفقتك والنتيجة ان ايمن اللى انتى فرحانة بيه تجوز واحدة تانية انانية زيك ومسيطرة قدرت تسيطر عليه وخلته طوع ليها عرفت انه شخصية مهزوزة حاست انها فى حرب معاكى ولازم تكسبها وانتى بردوا السبب والنتيجة اي انها بقيت مسيطرة عليه بمالها وجمالها وللاسف انتى اللى سلمتى ابنك ليها وانتى بمنتهى السعادة مش ده النسب اللى كنتى شيفاه يشرف اهو النسب ده اللى حرمك من ابنك واحفادك تقدرى يا ماجدة تروحى تشوفى احفادك فى اي وقت تقدرى تقولى لايمن انه يجبهم معاه وهو جاى فى المرات القليلة اللى بيجى فيهم لا متقدريش لانك مهما طلبتى مش هيتحقق لان ايمن ماشي وراء مراته واللى عرفت انك خطر عليها وعلى بيتها يعنى بمعنى اصح طلعت اشطر منك وعرفت تاخد ابنك منك وعمرها ما هتدى ليكى فرصة ترجعى تسيطري بيها تانى على ايمن افرحى بالنسب العظيم اللى يشرف
-انت فرحان فيه يا محمد مكنش العشم
-انا مش فرحان فيكى انا بفوقك قبل متخسري ولادك نهائى اه هما الاتنين بعدوا عنك لكن تقدري ترجعيهم تقدرى ترجعى ايمن بانك تحسسي مراته انك مش ند ولا منافسة ليها وده اللى وصلتيه ليها بتعاملك مع ايمن كنتى عايزة تبينى ليها انك مسيطرة عليه وانك الاهم عنده والنتيجة العكس حسسيها انك ام تانية ليها وايهاب كمان ممكن ترجعيه لحضنك تانى لترد بالم وحزن
-هو انا اللى سفرته ولا ضربته على ايده انه يسيب ضحى
-لا بس نتيجة تربيتك وضغطك عمل كده اه ايهاب بردوا زى ايمن بس هو الصراح حاول انه يخرج من تحت ايدك بس انتى عارفة نقط ضعف اولادك وخصوصا ايهاب انه للاسف بيخاف من زعلك لانك اغلى ما عنده وحطى تحت اغلى دى مائة خط علشان انتى كنتى واخدة ضحى منافسة ليكى هى كمان مش خطيبة وحبيبة ابنك ونسيتى ان حب الام غير حب الزوجة والحبيبة الانسان ممكن يعوض الزوجة والحبيبة لكن الام لا انتى خفتى انها تاخد منك ايهاب فضلتى تحاربي وتحاربي بكلام فارغ تتجوز دكتورة ونسب ميشرفش زى اخوك واخيرا غضبك عليه لحد ما رضخ للى انتى عايزاه والنتيجة ايه خسر انسانة عمره ما هيقدر يعوضها وكسر قلبه وقلبها وفى الاخر سبنا وسافر وبرضوا مقدرش اعفيه من الغلط ابنك بردوا غلطان وغلطان بالقوى كمان لانه محربش علشان حبه محولش معاكى مرة والف لغاية مترضى للاسف استسلم وكان يقدر يخليكى ترضى لكن بردوا لانك ربتيه على تنفيذ اومرك وتحقيق رغباتك منغير تفكير قاوم شوية لكنه مقدرش يكون له شخصية مش قصدى انه يقف ادامك ويبيع امه لكن بالعقل والحكمة كان خلاكى غيرتى رايك كان خلاكى تشوفى فى ضحى البنت اللى اى ام تتمناها للاسف ضحى كانت هتبقى حنينة عليكى بس انتى اللى رفص.تى النعمة اللى ربنا بعتها ليكى
كانت تستمع لمحمد وهى تبكى وتؤنب نفسها هل هى من اخطا فى تربية ابنائها هل هى من اوصلت نفسها لما هى فيه الان كانت تبكى حد الانه.يار وهي تحاول ان تستوعب ذلك الكلام الذى اباح به محمد
-انا اللي دمرت اولادى انا اللى ضيعتهم بدل محاوط عليهم ليتحدث محمد ليهدئها
-انا عارف ان كلامى صعب يا ماجدة لكن كان لازم الكلام ده يتقال كان لازم تفوقى من دور الضحية اللى انتى معيشة نفسك فيها وبردوا ده كمان ميعفنيش من الغلط انا كمان غلط لتنظر اليه باستفهام
-ايوة غلط لما كنت بشوف طريقتك وانانيتك فى حب اولادك وسكت كنت بشوفك وانتى بتجذبيهم ليكى وتبعديهم حتى عنى وبردوا سكت كنت بقول مادام الاولاد شاطرين والدنيا ماشية خلاص المهم انهم بخير وانتى بتقومى بدورك كويس معاهم للاسف كنت ناسي ان الاولاد محتاجين اب كمان مع وجود الام انا كمان غلط فى حقكم لما ريحت نفسي وسبت الحمل عليكى جايز الوقت فات على تصليح اللى حصل بس ممكن نعمل حاجة نقدر نعوض ولادنا اللى غلطنا فيه ايمن هنحاول ونحاول اننا نكون جنبه مش نشده لينا بانانية لا بحبنا ليه ايمن محتاج حبنا وحنيتنا عليه فى الدنيا اللى حط نفسه فيه الدنيا مش شغل بس ولا فلوس بس فى حاجات كتير غير كده لازم يعرف قيمة العيلة نحاول نعرفه حاجة قبل الاجل ما يجى اما ايهاب فانا عرفت من واحد من اللى بيقعد معانا على القهوة وهو صديق لسامى انها لسه لغاية دلوقتى ضحى متجوزتش وانها بقيت معيدة فى كليتها وبتحضر الماجستير يمكن لو قدرنا نرجعها هى وايهاب لبعض نكون كسبنا بنت جميلة باخلاقها وتربيتها هتكون نعم الزوجة والام والابنة بس لو رضيت انها تغفر لابنك كسرته ليها
لترد عليه ماجدة بلهفة
-لو عايزنى اروح واعتذر منها واترجاها توافق ترجع لابنى تانى انا مستعدة انا عايزة ابنى يرتاح ويرجع لحضنى تانى
-تانى يا ماجدة تانى انتى اللى هتحلى مشاكلهم وتلغى شخصيتهم احنا كنا بنقول ايه لا يا ماجدة هو اللى لازم يواجه غلطه و ياما هى وفقت ورجع حب انسانة تستحق انه يتعب علشان ينول رضاها ياما رفضت وده حقها ماهى عمرها ما هتبقى حاسة بالامان مع ابنك بعد اللى حصل بس على الاقل ابنك ينول شرف المحاولة لان ضحى تستحق وانا هتكلم مع ايهاب وانتى كمان وربنا يعمل اللى فيه الخير