رواية ملاكى الحزين
الفصل الرابع 4
بقلم نور السيد
أسيل كملت طريقها وجواها يقين أن الدنيا هتضحك لها و سليم كان طول الوقت مشغول بالملاك الحزين اللى شغلت تفكيره من اول لقاء بينهم
بسام وقلبه اللى انسحر برفيف وابتسامتها الجذابه ورقتها شغلت باله ببساطتها وقرر من جواه أنها تكون شريكة حياته
عصام وكمية السعاده اللى هو فيها اخيرا حبيبته وافقت أنها تكون شريكة حياته اخيرا حب الطفوله والمراهقه قبلت أنها تكمل حياتها معاه قبلت أنها تنور حياته
اما فريده كان جواها رهبه وخوف ياترى هتنجح مع عصام ياترى اتصرفت صح ولا اخدت قرار غلط
ومر النهار بحلوه ومره وجاء وقت المساء
فى شقة شهيره متجمع عصام /أسيل / شهيره/ام عصام /فريده/رفيف /تولين
ام عصام : بصى بقى ياست ام أسيل انتى طبعا عارفه عصام ابنى اسم النبي حرسه وصاينه شغال فى شركة كبيره والحمد لله ربنا ميسرها معاه وأهى ماشيه بفضل الله
شهيره : لزومه ايه الكلام ده يا ام عصام ابنك عصام ابنى زي أسيل بالضبط ده انا اللى مربياه
عصام : تسلمى يا خالتى وانا ليا الشرف أن أكون ابنك وهمس لوالدته ادخلى فى الموضوع على طول يا امى
ابتسمت ام عصام : تسلمى يا حبيبتى ماهو ده العشم ....... احنا يشرفنا نطلب ايد ست البنات فريده لابنى عصام
شهيره بصت لاسيل
أسيل : ده شرف لينا يا طنط عصام عزيز علينا ومش هنلاقى لفريده احسن منه
عصام : حلو يبقى نقرا الفاتحه بقى
ضحك الجميع
ام عصام : يخيبك يا واد اصبر شويه فضحتنا
عصام بص لفريده وبغمزه : اصبر ايه بس انا ماصدقت قالت موافقه عايز اكمل نص دينى ياااا ناااااااس
تولين همست رفيف : يعنى ايه اكمل نص دينى
رفيف بنفس الهمس : يعنى ياخد فريده معاه فى بيتهم ونرتاح منها
تولين ضحكت بصوت عالى ورفيف كتمت ضحكتها
فريده بصت لها بتسأل فى ايه ؟رفيف بهمس ولا حاجه وأشارة لتولين تسكت
عصام : هاه قولتى ايه يا خالتى
شهيرة : قولت لا اله الا الله لو فريده موافقه انا كمان موافقه
عصام بص لفريده بلهفه : قولى موافقه يا فيرى انا خلاص تعبت من الانتظار
ام عصام : يابنى أهدى شويه
فريده ابتسمت وهزت رأسها بموافقه
رفيف زغردت فجأه
عصام : الله ينور عليكى يا رفيف نقرأ الفاتحه بقى
وبدأو يقرأوا الفاتحه وتمت خطوبة عصام وفريده بحمد الله
______
فى إحدى المستشفيات بألمانيا
سوزان : حبيبى انت كويس ؟
أيمن بتعب : انا بخير يا حبيبتى
سوزان: يارب دايما بخير
أيمن : أطمنتى على سليم
سوزان : أطمن ؟! تفتكر انا هطمن عليه وهو وحيد كده
أيمن : وحدته تاعبه قلبى اكتر من مرضى تعرفى انا بتمنى ربنا يعطينى عمر وأشوفه متجوز ويملى البيت عيال
سوزان : صعب ينسى ياسمين ولارا ويأسس حياة جديده
أيمن : يعنى هيكمل بقية عمره لوحده
سوزان : لا طبعا انت بس تقوم وتروق وترجعلى تانى بشقاوتك واحنا ندور على عروسه تكون قمر وتنسيه ياسمين و تنسيه أمه نفسها
ضحك أيمن : خليكى كده يا سوزى عايزه اشوف ضحكتك دائما
سوزان : ربنا مايحرمنى منك يا حبيبى وتقوم بألف سلامه
__________
فى فيلا سليم
بسام بهمس : قوليلى مطلوب مني ايه وانا اعمله
عديله بنفس الهمس : كل اللى عليك تحاول دايما تشغله بموضوع أنه يتجوز ولازم يشوف عروسه تكون حلوه وتليق به
بسام : على أساس أنه هيقتنع يعنى
عديله بقلة حيله : يابنى بقولك حاول .... حاول
بسام : هحاول بس ايه المقابل
عديله : اعملك اكله تحلف بها عمرك كله
بسام : وانا موافق
سليم : موافق على ايه ؟
بسام : موافق أن اتعشى عندك واخدك نتمشى فى وسط البلد
سليم : انا كمان موافق يلا بينا
بسام : لا يا عم اكل الاول
عديله : خمس دقائق والأكل يكون جاهز
سليم : لا احنا هنأكل برا
واخد مفتاح العربيه ومشيوا
_________________
فى عرفة أسيل فريدة خبطت على الباب
أسيل بهمس : ادخل
فريده : أسيل ممكن اتكلم معاكى شويه
أسيل بصوت خافض : تعالى يا فريده
فريدة : انا أسفه
أسيل ؛ قولتك أسفك مرفوض
فريدة : ارجوكى أسمعينى من حقى ادافع عن نفسى
أسيل : وانا من حقى ارفض اى كلام معاكى
فريدة بدموع : أنا خايفه ........ خايفه عصام يعمل فيا زى ما محمود كان بيعمل فيكى
أسيل : انتى عارفه أن عصام غير محمود
فريدة : ومع ذلك خفت ........ محمود كان قبل الجواز انسان محترم و كلامه حلو والأهم من ده أنه كان بيعشقك
أسيل : محمود وعصام شخصين مختلفين عن بعض مافيش وجه مقارنه بينهم عصام متربى معانا وانتى عارفه كده كويس وخالتك ام عصام طول عمرها بتعاملنا معاملة الام لبناتها وعصام نفسه رغم أنه بيحبك لكن عمره مارفع عينه فيكى فى يوم من الايام بالعكس كان محافظ عليكى حتى من نفسك أما محمود كلنا انبهرنا بأسلوبه وشخصيته المزيفه اللى قدر أنه يضحك علينا بيها كان فى غشاوة على عينى ماقدرتش اشوف الجانب السئ اللى فيه كنت دائما ابرر له أى غلط واقول مايقصدش كنت بتعاطف معاه فى اى حاجه يمكن لانى كنت محتاجه حد اتسند عليه من صغرى وانا شقيانه شايله مسؤلية انا مش قدها
كنت بشوف ماما بتلف من بيت لبيت علشان توفر لنا اللقمه وظهر محمود كأنه طوق نجاه فى الوقت ده وقت كنت محتاجه سند وضهر أرمى حمولى عليه قولت لنفسى شكله ابن ناس وافقى اهو تخفى الحمل على امك شويه ما كنتش اعرف أنى برمى نفسى فى النار وانا مش حاسه
خلاصة الكلام خدى بالك من عصام وحاولى تقربى منه لان لو عصام ضاع منك صدقينى هتندمى
فريدة : انا عمرى ما شككت فى أخلاقه ولا تربيته بالعكس عصام اكتر انسان حنين ومحترم انا شوفته انا اتعاملت مع ناس كتير فى الكليه شوفت شباب كتير منهم الحلو ومنهم الوحش لكن عصام غير حاجه تانيه .......... أسيل حقك عليا ارجوكى اقبلى اعتذارى
أسيل حضنتها : وانا ماقدرش ازعل منك يا فريدة
فريدة : يعنى خلاص صافى يا لبن
أسيل :صافى يا لبن
دخلت رفيف و(بصوت يوسف وهبى) : خياااانه يالاااا الهول الت.ار ولا العار الت.ار ولا العار
ضحكت أسيل وفريدة وحضنتهم رفيف بحب
___________
فى صباح يوم جديد يوم كله امل
امام شركة الامل للاستيراد والتصدير
أسيل : انت متأكد يا عصام من الشغل ده
عصام : زى مانا متأكد من وجودك قدامى بس قولى يارب
أسيل : يارب يارب
عصام : ده ياستى يبقى مكتبى خلصى المقابلة وعدى عليا هنا
أسيل : انا متشكره اوى يا عصام
عصام : ايه الكلام ده يا أسيل انا ماعملتش حاجه
أسيل : ادعيلى يا عصام أنى اتقبل
عصام : منتظرك فى المكتب اللى جنب مكتبى
لكن الحقى قدمى اوراقك قبل ما الوظيفه تطير منك
أسيل : ايوه صح الحق اقدم ورقى
بعد لحظات كانت أسيل فى غرفة الانتظار وبتستعد للمقابله
السكرتيره : الاستاذه أسيل مهران
أسيل : افندم
السكرتيره : اتفضلى ادخلى للمقابله
أسيل : تمام
فى الداخل :
بسام : أسيل مهران بالكالوريس تجارة حاصله على تقدير امتياز على مدار الأربع سنين
أسيل : نعم يا فندم
بسام : تقديرك ممتاز طول الاربع سنين ومع ذلك ما اشتغلتيش قبل كده
أسيل : كل وظيفه بقدم لها للاسف محتاجه شهادة خبره ولسبب ظروف خاصه انا ماقدرتش اشتغل بعد ما خلصت الكليه
بسام : الملف تبعك ممتاز وكل بياناتك كامله مبروك عليكى وظيفتك الجديده أستاذة أسيل
أسيل بفرح : الله يبارك فى حضرتك انا متشكره اوى وان شاء الله اكون عند حسن ظن حضرتك
بسام : و ده املى وطلب من السكرتيره توصل أسيل قسم المحاسبه
بعد لحظات كانت أسيل عند عصام فى المكتب الخاص بهم السكرتيره عرفتها على باقى الزملاء عصام / مراد / الهام
أسيل : السلام عليكم أنا أسيل مهران زميلتكم الجديده
الهام : اخيرا
أسيل بعدم فهم : اخيرا ايه ؟
الهام : اخيرا فى زميلة معايا فى الاوضه كلهم زملاء شباب .... انا ياستى ابقى الهام عامر اعتبرينى اختك من هنا ورايح
أسيل بابتسامه : يشرفنى طبعا
عصام : الهام خدى بالك منها كويس أسيل بتكون اخت فريدة خطيبتى
الهام : خطيبتك انت كمان خطبت من ورانا
مراد : انت خطبت من ورانا يا عصام ياعم طب كنت قولت نعمل معاك الواجب ...... اهلا بيكى يا أسيل نورتى المكان انا مراد شرف الدين
أسيل : اهلا بحضرتك استاذ مراد
مراد : لا استاذ ايه قوليلى مراد بس ومد أيده يسلم عليها
عصام مد أيده سلم بدل منها: عندك يا عم مراد أسيل اختى قبل اى حاجه يلا يا أسيل كفايه تضييع وقت واتفضلى اقعدى على مكتبك
أسيل ابتسمت ومن جواها كانت سعيدة بالوظيفه الجديده ولاول مره تحس ان ربنا بيعوض صبرها لكن يا ترى السعادة هتدوم ولا مكتوب عليها الشقى والانكسار طول عمرها
___________
فى مكان آخر
شاب وبنت فى غرفة النوم
الشاب كان بيدخن السيجار وفى أحضانه بنت
الشاب : هى مفكره انى هسيبها كده بالساهل وتعيش حياتها ده بعدها
البنت : وانت بتلف وراها ليه سيبها فى حالها بقى
الشاب : انا هدفعها الثمن الغالى
البنت : حرام عليك كفايه اللى شافته تعالى نبدأ انا وانت من جديد وانسى كل اللى فات
الشاب مسك شعرها بقوة واخد عقب السيجار وحر.ق دراعها صرخت بقوة ..... لو سمعت منك الكلام ده مره تانيه انتى عارفه انا هعمل فيكى ايه
البنت : اخر مره صدقنى بس سيبنى
الشاب قربها لحضنه اكتر : براڤو عليكى بيعجبنى انك بتفهمينى بسرعه
___________
اما فى شركة الامل للاستيراد والتصدير
سليم : هاه يا بسام طمنى ايه الاخبار
بسام : تم تعيين عشرة من الشباب الحقيقه اتقدم ناس كتير لكن أنا حاولت على قد ماقدر اشوف الأنسب ووافقت عليه
سليم : الأهم من ده أننا تلاقى نتيجة كويسه فى أقرب وقت
بسام : قريب اوى تسمع اخبار كويسه
سليم : اتمنى وأتمنى أن بابا يرجع بسرعه لان مش واخد على الجو هنا حاسس ان انجلترا وحشتنى اوى
بسام : انسى بقى يا سليم
سليم : انسى ايه .... انسى روحى ..... انا روحى هناك بالمكان عايزنى انسى نفسى انا عايش حياتى على أمل أن هقابلهم قريب انا تعبت مش عارف اعيش من غيرهم انا بلوم نفسى كل يوم وحاسس أن انا السبب يمكن لو كنت سوقت يومها كنت قدرت أحافظ عليهم
بسام : كفايه حرام عليك اللى بتعمله فى نفسك ده ابدأ حياتك بقى من جديد عيش حاول تنسى عيش على أمل انك كنت بتحلم حلم جميل وخلص اى نعم النهايه كانت قاسيه لكن الدنيا مش هتقف هنا يا صاحبى
سليم : صدقنى بحاول لكن مش قادر وكل مكان بشوف ضحكتها بحس بهمسها بشوف صورتها فى كل مكان مش قادر انا تعبت
بسام : انا معاك نحاول مع بعض حاول ترجع سليم صاحبى واخويا ارجع لطبيعتك انت مابقيتش عارف تضحك يا سليم ضحكتك ضاعت جوا أحزانك حاول ترجع ضحكتك
سليم بحزن : احاول ...... يلا ياعم نشوف شغلنا بلاش عطله
بسام ابتسم : يلا
ومر الوقت أسيل عجبها شغلها الجديد وحبت المكان جه وقت الانصراف
عصام : يلا بينا يا ستى
أسيل : ايه خلاص كده خلصنا
الهام بضحك : انتى لسه عايزه تقعدى اكتر من كده يلا قومى بسرعه واخدت شنطتها وخرجت
عصام : انتى ناويه تباتى هنا ولا إيه يلا بينا أنا لازم اسلمك لفريده بايدى
أسيل اخدت شنطتها وخرجت مع عصام : قول بقى انك عاملنى حجه كل شويه تتحجج لا جاى أخد أسيل لا جاى اوصل أسيل وتعملنى كوبرى لا ياعم انا ماحبش أكون كوبرى
فى الوقت ده سليم كان خارج من مكتبه هو وبسام
سليم بهمس : ملاك
بسام : ملاك مين
سليم : الحقنى بسرعه
بسام : فى ايه ياعم انت مالك
سليم : نزل وراها لكن فى الوقت ده أسيل كانت ركبت التاكس بتاعها هى وعصام سأل الأمن مين البنت الل ركبت التاكسى
الامن : موظفه جديده يافندم
بسام : ايه ياعم قطعت نفسى مالك فى ايه ومجرينى وراك ليه
سليم :مين البنت اللى اخدت التاكسي دى
بسام : موظفه جديده هنا لسه متعينه النهارده
سليم : بكره تجيلى كل البيانات عن البنت دى
بسام بعدم فهمت : مالها البنت دى سرقت حاجه
خبطة بخفه وابتسم : لا
_____________
وصلت أسيل وعصام وفى الوقت ده الفون الخاص بأسيل كان بيرن برقم مجهول
أسيل: السلام عليكم ورحمه الله وبركاته
: وحشتينى ياقطة أسيل انصدمت و الفون وقع من أيدها .