رواية حب بعد الزواج
الفصل الثاني2
بقلم زينب أمير
بعد خمسه دقايق تفكير ووشوشه قمت ع حيلي جهزت اموري ورتبتا حالي الساعه كانت الوقت داك حداشر الا،،، نزلت ليهم تحت سلمت ع امي وجاراتنا،، دخلت المطبخ،،لقيت رحمه بتجهز في الفطور،، كبيت لي شاي،، وقلت ليها انتي ي بت هاا م قالو ليك م تشتغلي وارتاحي بس،، طبعا هي حامل وكده في الرابع ،، قالت لي حاجات خفيفه بس قلت ليها ولو تعالي اقعدي هنا واشرت ع الكرسي الجنبي،، قالت لي ثواني اخلص الفي يدي،. كانت بتعمل في عصير،، خلصتو وقعدت،،، قشت العرق الفي وشها بتوبها وعاينت لي وقالت،، احساسك شنو؟ طبعا عرفتها قاصده شنو اصلا ماف موضوع غيرو قلت ليها عادي جدا،، قالت لي والله كذابه اتاريك من جووه أسي بترقصي عديل،،، قلت ليها م للدرجه دي كمان،، غمزت لي وضربتني بكتفها في كتفي وقالت لي ده منذر لكن،، مع غمزه كده،، قمت ع حيلي ومشيت ب اتجاه التلاجه شلت قطعه باسطه وقلت ليها رحمه يااخ بخجله كده،، ضحكت وقالت اشي اشي دي م حصلت دي،، لجين أحمد بحالها تخجل،،!! كلام لكن،، جيت عليها،، قلت ليها قومي من هنا يلا.. طلعتها بره وقعدت أتم باقي الفطور بعد ثواني جاتني تاني.. عاينت ليها وقلت ولا كلمه ي رحمه ولا كلمه... يلا اديني ضهرك سريع، قعدت تضحك قالت لي اهدي حبيبه،، بس عايزه اقول ليك النسوان ديل فاتو يعني ختي الفطور ع قدرنا،، قلت ليها خلاص تمام،، خلصت باقي الفطور وطلعتو بره قعدنا كده امي قالت فاطمه ناديتوها؟ قلت ليها هي جات يعني؟ قالت لي اي من الصباح قلت ليها م عارفه والله وين هي أسي؟ قالت لي خليتها بتنضف في الصاله قلت ليها خلاص تمام بناديها وبجي،، (طبعا فاطمه دي بتنا الشغاله بتجي من فتره ل فتره كده،، لو عايزين نضافه عامه،، غسيل مكوه،،) مشيت ليها بهناك لقيتها بتمسح.. سلمت عليها وقلت ليها الفطور ارح.. قالت لي قربت الحقيني،، قلت ليها خلاص م تتأخري،، رحمه قالت لي وينها؟ قلت ليها جايه جايه،، امي قالت لينا خلاص أبدوا الزمن ضيق،، سمينا وبدينا ناكل،، فاطمه جات وقعدت،، خلصنا فطور،، جبت الشاي والقهوه،، شربناها وخططنا نعمل شنو ونجيب شنو والحاجات الزي دي،، امي قالت سميه دي قبيل قالت الا هي التجيب الخبيز،، قلتها ليها م بتقصر والله (وحده من جيرانا بتبيع خبائز وكده) بعدها رحمه قالت لي ادخلي جوه أسي بجيك قمت وقلت ليها خلاص م تتأخري قالت لي طيب،،،
طيب رأيكم شنو احكي ليكم عننا حبه؟! اممم طبعا زي م عارفين اسمي لجين 22 سنه،، اتخرجت ترجمه لغات طويله وحلبيه،، ملامح سودانيه عاديه،، عيون عسليه،، حواجب مقرونه،، وابتسامه جميله،، رحمه دي صحبتي شديد من ايام الأساس،، اصلا نحنا جيران من زمان،، عايشين كلنا في مدني،، اتزوجت في سنتنا الاخيره وزي م قلت ليكم حامل أسي،، عندي اخت وحده اسمها لمى متزوجه وعندها 26 سنه عندها بت وولد(احمد ودان) تؤام 4 سنه،، عايشه مع أهل راجلها في بورتسودان بتجينا دائما في الإجازات والعطل،،، ياهو تاني احمد اخوي ده مهندس بترول،،
بعد عشره دقايق جاتني رحمه وفي يدها صينيه صغيره فيها كم حاجه،، عاينت ليها باستغراب ،، قالت لي م تعايني لي كده ديل كم ماسك أعمليهم في وشك خليهو ينور شويه،،، عملت لي كركم في وشي وطلعت فاتت..
قريب للمغرب اخدت شاور واتوضيت لقيتو اذن،، وانا في المصلايه بدعاا،، جات داخله امي ومعاها ريم اخت رحمه حلاتها كده وظريفهه شديد عمرها 20 سنه قالت لي شنو يجميل خلاص عايزه تلحقي الأخت دي،، قصدها رحمه،، قلت ليها وشكلو كده ح نخليك براك كمان قالت لي احييا ي قلبي م تخافي علي انا في عرسك ده بطلع ب دستهه ان شاء الله،، ضحكت وقلت ليها ياهو نفس كلامك في عرس رحمه برضو قلتيهوو،، امي قالت لي بري ي يمه بتنا سمحه وميه زول يتمنااهاا ريم ختت يدها في اكتاف امي وقالت ليها مش كده ي خالتو،، كلمي بتك دي شكلها فرحانه ساي ومخلعوهه لسه،، يحليلا بورتها فكت خلاص،، ضحكنا كلنا،، وبعدها امي قالت لي دي ليها ريم جاتك اجهزي سريع واطلعي الناس ديل ع وصول،، قلت ليها تمام حاضر،، طلعت فاتت،، وريم طوالي مشت ع الدولاب فتحتو وقالت لي ح تلبسي شنو؟ قلت ليها الفستان الوراك،، كان في الكرسي،، شالتو وقالت لي حلوو شديد يلا تعالي البسيهو علشان اعمل ليك الميكب قلت ليها تمام،، مشيت لبستوو وجيت قعدت ليها وبدأت تعمل لي فيهوو،،، الفستان لونو زهري خفيف مع زخارف بالاطراف لونها ابيض وحجاب بالأبيض،،، انتهت لي وبقيت قاعده مترقبه،، شويه كده واسمع صوت الناس والسلام عرفتهم جوو،، واتوترت زياده،، جات رحمه داخله ولابسه فستان رهيب حاولت اخفي توتري بأني اسألها عن الفستان وجابتو من وين،، عاينت لي كده وقامت ضحكت قالت لي متوتره صح،، قلت ليها اقسم بالله عايزه اموت عديل هو الموضوع ده للدرجه دي صعب؟؟ ضحكت زياده وقالت لي لا ويلا قدامي نص ساعه والموضوع بنتهي وتلقيهو أسهل من ساهل،، بس لبسيهو ويلبسك وخلاص،، قلت ليها م دي الحاجه الصعبه زاتها انتي بس كيف دايراني امسك يدو وادخل ليهو خاتم كمان،، رحمه دي قعدت في السرير وهي بتضحك بعد اتمسخرت تمام،، قامت ع حيلها وقالت لي لجين ارح قدامي بالله،، مسكتني من يدي وطلعنا ليهم بره،، قبل م ادخل ع الصاله جوه،، مسكتني ريم صينيه فيها شاي وقالت لي يلا ي عروس بضحكه كده،، مسكتها منها وانا قبلي بضرب اخماس في اسداس،، اول م دخلت لقيت في مواجهتي منذر،، الود السمح الرزين،،، لابس جلابيه سعوديه وشال وطاقيه بالاسود،،، ساعه رجاليه راقيهه،، وابتسامه كساره.. منذر! منذر ده حاجه غريبه وفي نفس الوكت حلوه شديد،،، غريب من ناحيه الهدوء الهو فيهو والطريقه الوافق بيها على الرباط ده،، حتى هو م شافني كتير ولا حتى قال لي نتعرف اول،، شخصيتو حلوه وجذابه شديد بشوفو وبلمحو كتير بس تقريبا هو الما مركز معاي!! بالنسبه لي هو أطول مني واحلى كمان هههه عيون بنيه كبيره،، أنف مستقيم،،، جسم رياضي،،اصفرااني،، ضحكتوو حلوهه....
اول م شافني ابتسم لي! لقيت نفسي برد ليهو الابتسامه،، بابتسامة اكبر.!! ختيت الصينيه وقعدت اسلم عليهم،، (شكلي ح احكي ليكم عنهم بعدين لانو م شاء الله جمااعهه) ،، ابتدت مراسم الخطوبه ولبسناها الحمدلله، مع حبت عواره وهباله مني،، لا والاحلى والغريب من كده،، ساعه عايزه البسو يدي براها بقت ترجف لاحظت لي رحمه وقعدت تضحك فيني،، بعد ساعتين من الونسه والاتفاقات انو العرس ح يكون بعد شهرين! يعني شهرين واكون متزوجه؟ قعدوا شويه وطلعوا طوالي،،
راقده في سريري وبفكر فيهوو اتنهدت وعاينت للساعه لقيتها ماشه ل حداشر،،، طبعا هم م شاء الله عليهم خمسه اولاد وبت وحده،، الكبير اسمو محمد 33 سنه متزوج بت عمو اسمها سهى وعندهم ولد وبت (نون 7،، علي 5) وبعدو طوالي مدثر 31 سنه،، مرتو اسمها مهااا،، بت عمو برضو،، م عندهم اولاد،، متزوجين ليهم تلاته سنوااات تقريبا،، حسب م قالت لي رحمه،، منذر بعدو طوالي 29 سنهه،،، يلا مؤيد ده بعد منذر عمرو 26،، طبعا هو مربط مع ريم،، والعائله كلها عارفه بس عاملين فيهم رايحين،، مزن 24 سنه متزوجه ود عمتها،، ظريفهه وطيبه شديد وعلاقتنا حلوه كمان عندها بت وحده اسمها لين،، واخر العنقود زي م بقولو،، عبدالله،، ده الوحيد الخارب الرصه كلهم بالميم اسمائهم بتبدأ،، الا هوو 20 سنهه،،بقرأ it في السنهه التالته،، وياهو. خالتوو اسمها خديجه وابوهم اسمو عبد الرحيم... (طبعا كلهم شغالين مع ابوهم،، التلاته الكبار،، رجال أعمال وكده،، مؤيد ده تقريبا صيدلاني )
الصباح بدري،، صحيت بنشاط زايد كده،، عملت حاجاتي كلها وطلعت ليهم بره لقيتهم بشربوا في الشاي. كانت سبعه اظن لي الوكت داك،، صبحت عليهم وقعدت،، رحمه قالت لي ده كلو حمااس،، يحليل العرس الخلاك تصحي بدري قلتها ليها برجع انوم أسي،، قعدت تضحك قالت لي لا والنبي عندنا شغل فوق راسنا كدي اشربي ونشوف ح نعمل شنوو،، امي قالت لي ماف وقت،، ابتسمت ليها وقلت يماا لسه في شهرين قدامنا اقصد قدامك انا م معاكم في الكلام ده،، قرصت خدي خفيف وقالت لي كبرتي والله وبقيتي عروسه،، عيونها دمعوا،، قلت ليها امي عليك الله م تبكي اصلا كل يوم ح اجيك،، لمن تزهجي مني براك،، ك محاوله ل تغيير الحو قلت ليها،، لكن منذر بخليني بعدين.؟ ضحكت كده وقالت لي ده كل همك؟ مسكت يدي وواصلت،، بعرفو انا حنين شديد ومستحيل يقطعك مننا،،، الزول ده ماف زيو اتنين امسكي فيهو قوي وم تخليهو يضيع منك،،، بدون م احس لقيت نفسي بقول ليها هو انا لقيتو بالساهل علشان اضيعوو؟؟! ضحكت رحمه دي رجعتني لواقعي سريع،، اتنحنحت وقمت سريع.. قلت ليها عندي حاجه بعملها وبجيكم،، خليتم بضحكوا علي،،، لمن وصلت الباب،، سمعت امي بتقول لي بصوت عالي سمعتك ي بت كمان بقى فيها خجل،، بقينا نحب شكلنا ي رحمه بتي،،، ردت ليها رحمه بصوت اعلى كبرناا والله،، دخلت الغرفه وانا بضحك ع نفسي....