رواية تزوجت اخو زوجي
الفصل الاول1
بقلم وسام الفرجاني
ليش متفاجئين من العنوان فعلا اني تزوجت اخو زوجي ..
اني زينة
قصتي بدت احداثها من قديم بحرب ايران ومستمرة للان
تزوجت زياد
وصارت حرب ايران وعندي ولد عمره سنة
ونص اسمه حيدر
وحامل وهو من راح جان يدعي تطلع بنت ويسميها طوعة جان كلش يحب هالاسم واصدقائه بالجيش يصيحوله ابو طوعة قبل ما يتزوج حتى
راح للحرب وانفقد واني تمرضت عليه ارييده زياد وينك ليش غبت حياتي شلون تروح وتعوفني وتعوف جهالك
من كد ما بجيت وانقهرت وانغثيت طرحت الطفل ماجنت اعرفه ولد او بنت بس مات من حالتي ومرضي اثرت ع جنين وماجانت قبل تحاليل مثل هسة
المهم انفقد وبعد ما نسمع عنه اي شي اي خبر و عيالي ما سووله فاتحة لا اول سنة ولا ثانية وحدما صارت الثالثة وتأكدوا مات مايرجع يلا صارت فاتحته
وطبعا يوم فاتحته كأنما رجعني لاول يوم فقده كأنما هسة مات هم لعبت بروحي لعب وهم عيالي وامه هيج وطبعا عيالي زينين وعمتي ام زياد وردة وووردة
جانت العمات دائما علاقتهن زينة ويا الجناين مو مثل البعض هسة يعادونهن .. القصة لوسام الفراجي حصريا
اني من تأكد الخبر
جان حيدر عمره تقريبا 4 او 4 ونص
كلت لعمتي ماظلي مكان هنا
ولازم ارجع لبيت اهلي الزم عدتي شعندي باقية زياد وراح
رادوا وياي وهم ناس متفهمين الوضع
خلوني اروح لاهلي و #حيدر وياي
ورا سنة من الفاتحة اجت عمتي زيارة لبيتنا ورحبت بيها وسوينا هالغدة الزين
لاحظت عمتي بحلكها سالفة بس مستحية مني !
شربنا جاي سألتني ناوية تزوجين ؟ عادي ترا سنة الحياة
كتلها عمة وعدت زياد محد يمسني غيره بالدنيا واني ع وعدي هذا ..
كالت يا بنيتي ميصير هاي تهلكة .. بصراحة ماجنت اعرف شنو ببال عمتي .. كتلها لا بس ليش عمة هيج تسألين ؟
كالت تعرفين حيدر ديكبر بدون اب
واني يحز بكلبي جاهل شنو ذنبه !!
كتلها عمة شبدية يعني
كالت عندي حل .. ابني #حسام تعرفينه لو الله يهديج وتتزوجون وتحافظون ع ابن المرحوم
كتلها عمة شلون يصير عمة ما بالي حسام وثانيا اصغر مني وشلون اخذ اخو زوجي واني وعدته
ما اتزوج اي بشر مو عود اخوه
كالت بنيتي فكري بالموضوع مو علمودج
بس علمود حيدوري !!
فكرت ورفضت الفكرة رفض تام ..
بس عمتي ما كطعت نفسها وصارت تتردد بين فترة وفترة حدما قنعتني وحجيت ويا اهلي واهلي موافقين
هم اتزوج وهم احافظ ع ابني
بس شرطت عليهم شرط ماريد لا زفة ولا دك ولا اي شي
وطبعا وافقوا وعمتي كالت ترا
حسام مثلك ماتقبل الموضوع بعدين كتله لخاطر المرحوم وتعرفين هو شكد متعلق بالمرحوم زياد ووافق عاد
صار عرس ع الصامت
تزوجت حسام .. حسام انسان طيب ويستحي ودا يدرس واصغر مني .ما شفت من عنده اي شي يضوجني
صرت اتعود ع حسام شوي شوي
واتعلق بحسام
وحسام يحب حيدوري وابد ما حسسه هو مو ابوه الحقيقي
يخاف ع حيدر هواي ويلاعبه ومتعلق بي جدا
حملت من حسام وجان دايخين بالاسم
وحسام كال اذا بنت اسميها #طوعة
لان هالاسم المرحوم هواي يحبه وماراح اخليها بنفسه وحسميها ع هالاسم الي يحبه
واذا ولد بكيفكم
قبل ما جان عدنا فحص جنين ويعرفه من قبل ما يولد
نولد يلا نعرفه ذكر لو انثى
المهم صارت وقت الولادة
جبت بنت وسماها طوعة مثلما كال ..
مشت الايام .. والحب بيناتنه يكبر .. وطوعة بدت تكبر وتكبر وجان وقت عصيب جدا ..
وابد مافرقنا بين طوعة وحيدر
وحيدوري بالمدرسة
وطوعة صارت تخطي وتمشي بس مو حيل حيل يعني
كاعدين بالحديقة اني وعمتي وحسام ديلاعب بطوعة ..
اندك الباب .. اندك 3 مرات بس سريع ..
فتحنا الباب !!
زلمة فات ووكف ع درجة الباب يشبه زياد !!
بس هذا شعره ولحيته طويلة ومتعوب
بس ملامح قوية من زياد !!
كلبي فز ميعرف شيسوي !! يتبع !