رواية حب بعد الزواج
الفصل الخامس عشر15
بقلم زينب أمير
*تنبيه*
*(ساره واحمد م عندهم علاقه بالروايه شويه أحداث وخلاص)*
#عندي:
فارشين في الأرض وقاعده جنبي ساره وبتها"لميس" منذر واحمد الكانو قاعدين ع جنب شويه وبتونسوا،، الوكت داك كانت الساعه خمسه بعد العصر،، قدامنا في مأكولات وعصائر،، كنت بعاين في باب الحديقه،، المنها الناس داخله وطالعه،، ساره ماسكه بتها وبتأكل فيها،، قبلت عليها وقلت ليها،، اول زياره ليك؟ رفعت راسها عاينت لي وقالت لا م اول مره، بنجي كتير هنا،، اصلا احمد ده شغال قبلو،، مغترب وكده،، بنجي دائما في الإجازات،، قلت ليها آها حلو طيب،، هزت لي راسها وابتسمت،، بعد ساعه كان قمنا، وقلنا ماشين، وقتها ساره قالت لي بكره ي لجين ح امشي المول،، اشتري حاجات،، رايك شنو تجي ونمشي سوا؟! ونقضي اليوم مع بعض؟ ،، عاينت ل منذر اشوف رايو شنو،، قبلي م يرد لي، تلفونو ضرب، استأذن ومشي فات،، بقينا واقفين نحنا وبناخد وندي في الكلام،،لمن جا راجع ودعهم،، قبل علي وقال لي يلا مشينا،،، اتحركت وراهو،، وكنت زعلانه علشان م قال لي رايو، وحسيت بيها هي فرحانه وبتقول لي نطلع سوا،، بعد وصلنا البيت، مشيت قعدت في الكرسي قدام الشاشه، واصلي م فتحت خشمي معاهو، دخل الغرفه، وجا راجع بعد ربع ساعه،، م اشتغلت بيهو نهائي،، عاين لي وقال لي مالك ي لجين؟ مسكت الريموت وشغلت لي فيلم،، ردد لي تاني، وريني طيب الحاصل شنو مالك ساكته كده؟ زدت الصوت زياده،، فهم اني م عايزه معاهو كلام،، وقام طوالي فات وين م بعرف..
#في عماره كبيره وسمحه:
(قاعدين في كراسي جلوس وقدامهم صينيه شاي)
قالت ليها، قال ليك شنو؟ ردت ليها قال كويس الحمد لله وامكن يجو بكره ولا بعدو،قالت ليها بالسلامه ان شاء الله،، قامت ع حيلها، وشالت شنطتها،، قالت ليها ماشه وين ي مزن، اقعدي شويه،، اتناولت تلفونها من التربيزه وقالت ليها لالا بمش بعده الوكت اتأخر ي امي ، عبدالله وين يجي يوصلني،، جاها صوتو وهو بشاغل في بتها شايلها في يدينو،، قال ليها ماشه وين ي اختنا اقعدي حبه ياخ،،عاين ل" لين " البتضحك وقال ليها حبيبه خالو عايزه تقعد معاهو صح، هي طوالي هزت ليهو راسها وقعدت تضحك،، ابتسم ليها وقال ل مزن الكانت واقفه بتعاين ليهم "بابتسامه" مستعجله ل شنو انتي؟! قالت ليهو م هو فعليا الوكت اتأخر، وعمتو ندى بتكون جات بعده من ناس ساره،، قال ليها ثواني طيب اجيب المفاتيح واجي طياره بس مسكها "لين" وجرا،، امهم قعدت تضحك قالت ليها اصلو م بعقل الولد ده !! ..
*عند منذر*
كانت منتظره رأي في شنو بالضبط؟ اخليها تمش معاها كده ساي، هم سببين اني اتجاهلت كلامها، اولا ياداب اتعرفت عليهم وعايزه تطلع معاها طوالي، طيب البضمن شنو أنو م يحصل ليها شي، وتاني حاجه ل سبب اناني جدا، اني م عايزها تمش واقضي يوم كامل وم اشوف وشها فيهو،، طيب أسي انا غلطت في حاجه؟ ،، من دخلنا وم اتكلمت عرفتها زعلانه،، دخلت الغرفه، شلت لي ملابس ومشيت ع الحمام،، بعدها حاولت اتكلم معاها وم طلعت منها بحرف،، شلت تلفوني ومشيت البلكونه، وخليتها قاعده في مكانها..مر طويل وانا قاعد،، قمت وبقيت اعاين تحت، العربات الماشه، وأصوات البوري العاليه،، وانا داخل ع جوه سامع صوت الشاشه عاليه،، كانت تاكله في يد الكرسي وراقده، ساعه قربت اكتر لقيتها، نايمه، مشيت قفلت الشاشه وجيت راجع ليها تاني بدون م اصحيها او افكر كتير، لقيت اني برفعها وبشيلها، فجأه فتحت عيونها، وهمست "بصوت ناعس" (منذر) وغمضت تاني، رقدتها في السرير، وطلعت ليها الشبط الكانت لابساهو، انتبهت ل طرحتها، مسكتها براحه وطلعتها هي كمان، بعاين ليها وهي نايمه، لقيت يدي بتمش ع شعرها وبتفكو،، ابتسمت وجيت رقدتا جنبها وانا ماسك يدها...
*عندي*
وانا بجهز في السفره، لقيتو طالع من الغرفه وجاي باتجاهي وشغال يدعك في عيونو،، رديت ليهو صباح العافيهه، قعد في الكرسي، وشكلو نعسان، قلت ليهو ساهرت ولا شنو؟ قال لي شكلي كده، دخلت المطبخ،، كبيت لبن في كبايه وجيت قعدت ومديتها ليهو، عاين لي "باستغراب" وقال لي لبن؟؟ قلت ليهو ع فكره هو ضروري يعني ولازم تشربو ولاحظت كمان انك م قاعد تهتم بصحتك،، ضحك وم قال حاجه، مسك الكبايه وشرب منها،، قلت ليهو اتخليتك ح تعترض وتقول لي م بشربو وحق شفع،، قال لي بالعكس ياخ، سمح شديييد امي الله يديها العافيهه، كانت كل يوم بتجيب لي كبايه، بجي راجع من الشغل بكون تعبان وم بقدر اكل،، لمن اطلع من الحمام بلقاها قاعده في السرير وجنبها كبايه اللبن،، قلت ليهو الايام الفاتت م شفتك بتشربو لو عارفه كان جبتو ليك، قال لي فعلا، م مشكله ي زولهه و"ابتسم" ابتسمت ليهو وقلت ليهو طيب..
ياهو باقي اليوم عديناهو طلعات ومطاعم،، بعد رجعنا رقدنا هلكانين،، واليوم البعدو من الصباح ستفنا الشنط ومشينا ع المطار،، الساعه كانت 12 ضهر لمن وصلنا مطار الخرطوم،، لقينا محمد ومؤيد، واقفين لينا بره، سلمنا عليهم واتحركنا ع البيت، من وصلنا أصوات الزغاريد دي فوق،، خالتو خديجه،، مزن، مها، (مرت مدثر) سهى (مرت محمد) جو كلهم وسلمو علينا،، بعدها دخلنا جو، وجابو المويه والعصير،، خالتو خديجه قالت لي بتكوني تعبانه اسي قومي ادخلي جوه وارتاحي حبه، قبلت ع سهى وقالت ليها معليش ي سهى بتي وصليها بس قامت ردت ليها وقالت عادي ي خالتي م طلبتي حاجه،، عاينت لي وقالت ارح ي لجين،، قمت ومشيت معاها ركبنا الدرج،، وقفت وقلت ليها لسه؟ ضحكت وقالت لي شويه بس ونصل، بعدها هي فتحت باب، قلت ليها الحمدلله، ابتسمت وزحت لي، جاني صوتها وهي بتقول لي يلا قولي بسم الله وادخلي بيتك الجديد، وع فكره ده الطابق التالت، هم اصلا خمسه طوابق، والخامس ياهو حقي، قلت ليها م بتتعبي أسي؟ ضحكت وردت لي اتعودت والله بس وانتي زاتك شويه وبتبقي ليك ساهله،، يلا انا ماشه لمن يجي وكت الغدا، برسل ليك البت "سوزي"هزيت ليها راسي وفاتت.. عملت زي م قالت لي، ودخلت لاقتني ريحه بخور سمحه،، في المقدمه كان في كراسي جلوس وقدامهم شاشه كبيره، ع الطرف مطبخ نظامو أمريكي كده،، مشيت ل جوه لقيت تلاته غرف وحمامين،،،اخدت لفتي، ورقدت لي في غرفه، ياها غرفتنا عرفتها من سرير الدبل الفيها،، رقدت بملابسي الجيت بيها علشان الشنطه لسه م جابوها،، وشويه شويه نمتاا..
سمعت الباب بضرب قمت ع حيلي وانا نعسانه شديييدد،، جاني صوت بت من ورا الباب وبتقول لي،، انا سوزي، فتحت ليها الباب وسلمت عليها، قالت لي دي الشنطه وهي بتأشر عليها، وقالو ليك الغدا اجهزي وتعالي، شكرتها وقفلت الباب، طلعت لي فستان مورد، ودخلت الحمام، عملت ميكب خفيف واتعطرتا بخ بخ، طلعت تلفوني من الشنطه شلتو وطلعت، لقيتهم، متلمين في السفره ومنتظريني،قلت ليهم وانا بقعد، معليش ياخ اتاخرت عليكم قالو لي لا م مشكله ياداب قعدنا زاتو، كان معاهم لين وتاني بت وولد،، سهي قالت لي ديل أولادي ي لجين علي ده خمسه ونون سبعه، قمت سلمت عليهم وقلت ليها م شاء الله والله ربنا يحفظهم ليك،،
ياهو تاني بعد الغدا جابو الشاي والقهوه والعصيرر، والفواكهه، الونسه كانت حلوه ولطيفه شديييد معاهم،، اتونسنا كتير ومن جينا م لمحت منذر تاني، حتى وكت الغدا كانوا الرجال براهم والنسوان براهم.. المغرب اذن وقمنا نصليهو، قالو لي خشي صلي وارتاحي،، ل بكره ان شاء الله، نتونس مع شاي الصباح، مها قالت لي بالمناسبه ي لجين شاي الصباح ده بنشربو سوا،، الرجال بقوموا بمشوا صلاه الصبح، نحنا بنقوم بنجهز الشاي ونخت الكيك والبسكويت،، بعدهم لمن يرجعوا بنشربوا مع بعض،، قلت ليها م شاء الله حلو والله، اشتهيت الصباح يجي، قعدوا ضحكوا، خالتو خديجه جات مسكتني من يدي وقالت لي ارح لو قعدتي معاهم ل بكره م بتقومي وانتي تعبانه وجايه من سفر، مشينا وخليناهم بضحكوا،،
*عند منذر*
لمن جيت داخل الساعه كانت عشره مساء، قفلت باب الشقه وختيت المفاتيح في التربيزه، فتحت باب الغرفه براحه وخليتو فاتح شويه، علشان كانت مضلمه، الجو بارد شديدد،، شلت لبس من الدولاب واخدت شور،، حرفيا اليوم كان متعببب شديد، اصحابي جو وقعدوا معاي كتير،، من ونسه وتشغيلات، وغيرو، بعد مشو فاتو، لقيت امي وقعدت اتونس معاها، وياهو منها جيت داخل هنا،،عاينت ل لجين، الكانت مدياني ضهرها ونايمه، قربت منها وبستها في كتفها،، ابتسمت وغمضت عيوني ونمت طوالي من الارهاق...