رواية حب بعد الزواج
الفصل السادس عشر16
بقلم زينب أمير
قمت وقعدت في نص السرير، ساعه سمعت الباب بقفل، جاني صوتو وهو بقول لي صباح الخير، رقدتا تاني وم رديت عليهو كنت نعسانه شديييدد ياخ، "بصوت تقيل"قلت ليهو لا ياخي عايزه انوم، وهو لسه مستمر يرش فيني بالمويه، جراني من يدي وقعدني، قال لي صحصحي معاي شويه،، فتحت عيوني بعد كنت مغمضاهم وقلت ليهو، في شنو طيب؟ عايزه انوم انا، كنت دايره ارقد تاني، جراني من يدي وقومني من السرير عديلل، عاينت ليهو "بنعاس" وقعت فيهو ونمت في كتفو.. بقى يضرب في وشي خفيف وينادي فيني، همست ليهو همممم، قال لي شكلو نومك تقيل شديد فتحي عيونك ديل، زحاني منو وقال لي لجين، رجعت ل ورا ودعكت عيوني، قال لي انا ماشي الصلاه صحصحي وانزلي تحت تمام، هزيت ليهو راسي،اتحرك شويه، بعد وصل الباب فتحو وقبل على وقال "بابتسامه"م تنومي تاني هاا ؟! وطلع طوالي، قعدت في السرير تاني، وبعد خمسه دقايق قمت دخلت الحمام....
وانا نازله شايفه خالتو خديجه ومها قاعدين وقدامهم صواني الشاي والحاجات الرهيبه ديك،، صبحت عليهم وقعدت،، جات سهى طالعه من المطبخ، وشايله صحن بسكويت، بعد ربع ساعه كده منذر وابوهو واخوانو كلهم جو،، كنت لابسه توب من تياب الشيله،، ساكته وبعاين بس، كان ظاهر عليهم مبسوطين وهم بتونسوا،، خالتو خديجه قبلت علي وقالت مالك ساكته ي لجين؟ شاركينا شويه عايزين نسمع صوتك، وقتها هم سكتوا وبقو مركزين معانا،،، ابتسمت ليها وقلت : م عارفه اقول شنو الصراحهه لكن مبسوطه جدا وانا وسطكم،، مها قالت :شويه شويه وبتتعودي علينا، والله نحنا ظريفين وسمحين،، قعدوا يضحكوا ع كلامها، ياهو تاني الونسه استمرت، لحدي م فجأة الرجال قاموا، وبعدها ب عشره دقايق، سهى ومها، هم زاتهم استاذنوا ومشو، خالتو خديجه قالت لي مشو يجهزوا ل رجالهم بكونوا طالعين الشغل،،هزيت ليها راسي بس،، جاني صوت منذر وهو بنادي لي،، رفعت راسي لقيتو واقف في الطابق التالت ياهو حقنا، وبأشر لي بيدو تعالي،، خالتو قالت لي م يكون ماشي الشغل ، امس جا من سفر والليله طوالي نازل قومي ي لجين شوفيهو لو عايز حاجه، انا زاتي بقوم اشوف عبدالرحيم،، قلت ليها تمام، قمت ع حيلي، طلعت ليهو وانا ماشه في الممر لقيتو واقف جنب باب الشقه،، وصلتو وقلت ليهو ايوه، قال لي اااا هو يعني، اممم شويه وطالع وين ال.. ال "بتفكير كده" عاينت ليهو باستغراب، وبقيت منتظره باقي كلامو، دخل ل جوه ودخلت وراهو، قعد في الكرسي وعاين لي بعدها قال، الصور اقصد الكاميرا وين؟! قلت ليهو جوه في شنطتي ثواني وبجيبها ليك، اتحركت ع الغرفة وخليتو قاعد قبلو، جريت الشنطه وختيتها في السرير، فتشت بجاي وجاي،لقيتها، شلتها وراجعه لافه لقيتو وراي، ختيت يدي في صدري وقلت ليهو خلعتني والله، مديتها ليهو، وهو واقف في مكانو، قلت ليهو منذر واشرت ليهو ع الكاميرا، اتنحنح وشالها فات.. نفضت الأفكار من رأسي ب انو مالو وكده،، طلعت التوب وطبقتو، ختيتو في الكرسي ومشيت قعدت قدام التوليت، فكيت شعري وبقيت اسرح فيهو وانا سرحانه بعيد..
*عند منذر*
من جيت داخل وشفتها لابسه التوب، ابتسمت بدون م احس، اخر مره شفتها لابساهو يوم الجرتق، لقيت اني كل شويه بعاين ليها وهي بتصلح فيهو،، الابتسامات الكانت بتوزع فيها وم منتبهه لنظراتي ليها،، ساعه ناديتها انا زاتي م كنت عارف انا عايز شنو، لمن بقت تسألني، بقيت اتمتم وم قادر ارد ليها، فجأه طلعت مني كلمه صور وكاميرا، بقيت قاعد منتظرها، من دخلت قمت وراها طوالي،، متعود دائما الايام الفاتت ألقاها جنبي، واسي من امس الضهر م لاقيتها ولمن جيت كانت نايمه، أمكن اتحججت ب الكاميرا علشان اشوفها او ممكن كمان لاني ببساطه اشتقت ليها؟! ابتسمت شدييدد وانا بردد ايوه اشتقت ليها، غريبه صح؟ اللهم حصل،، ساعه لقيتها م طلعت من الغرفه تاني، شلت رجولي ومشيت ليها، لقيتها قاعده بتسرح في شعرها،، البقيت بحبو شديد،، قعدت في الكرسي وماسك الكاميرا، وبعاين للصور حبه وليها هي حبه... بعاين للمشط وهي بترفعو من من بدايه شعرها وعيوني معاهو وهي بتنزلو ل نهايه ضهرها،، بحركه دراميه شديد وقفت ع حيلي وقلت ليها لا،، عاينت لي متفاجئه،، ابتسمت ليها وقلت، هو سؤال غريب شويه بس ممكن! ممكن تخليهو كده؟( كانت عايزه تلفو) قالت لي "بابتسامه " ممكن جدا،، وقامت فكتو،، قعدت شويه وقمت اتجهزت وطلعت ع شغلي..
*عندي*
كنت بتكلم مع رحمه، وهي بتحمد لي في السلامه وبتسألني ح نجيهم متين؟ قلت ليها دقيقه ي رحمه في زول في الباب،، مشيت فتحتو، لقيتها سوزي قالت لي بنادوك للفطور قلت ليها تمام، رديت ل رحمه الفي الخط، قالت لي لجين امشي افطري طيب ونتكلم بعدين قلت ليها خلاص تمام سلمي لي ع امي بعد اجيكم قالت لي تمام يوصل يلا،،لبست توبي ونزلت...
بعد الفطور، مشينا الحوش كان فيهو مظلهه كبيره فيها سراير وبنابر،، مرشوشه برمله ومويه، ع جنب كان في كانون صغير وجنبو حاجات جبنه،، مع قعدتنا كده جات مره داخله، قمنا وسلمنا عليها، خالتو خديجه قالت لي، اقعدي خليها ترسم ليك،ي لجين حنتك دي طلعت بعده ، قعدت ليها وم اخدت كتير انتهت لي منو، شالت لي الحواجب والوش وفاتت،، ياهو تاني انتظرتها لمن نشفت وقمت غسلتها، جيت داخله ليهم تاني.. استلمتني مها وقالت لي قومي يلا الحفره،، قعدت برضو فيها زي ساعه كده، وتاني قعدت سهى،، ل تلاته كده مع العصرر باب الشارع فتح ، بعدها ب خمسه دقايق جات سوزي وقالت لي استاذ منذر قال ليك تعالي..
من دخلت البيت مشيت ع المطبخ اول، جبت صينيه ختيت فيها عصيرر ومويه، وطلعت فوق دقيت الباب ودخلت، ختيتها في الهول بره، وصلتو في الغرفه جوه لقيتو طالع من الحمام وشعرو مبلول لابس لبس بيت عادي، قلت ليهو كده م ممكن بتمرض، قفلت المروحه وقبلت عليهو، شلت منشفه من الدولاب، وقفت قدامو ومديتها ليهو، شالها وابتسم لي... طلعت تاني جبت الصينيه وجيت، ختيتها في التربيزه قدامو، قلت ليهو عايز حاجه؟ هز لي راسو لا، عايزه اتحرك لقيتو بقول لي لجين، ممكن م تمشي وتقعدي حبه؟! قلت ليهو ااا طيب،، قعدت جنبو في السرير وبقيت اطقطق في اصابعيني بتوتر، فجأة مسك يدي "وبضحكه" قال لي مالك انتي متوتره كده، لجين، عايني لي هنا! م رديت عليهو قال لي طيب اسمعيني ح تمشي بيت اهلك متين؟ بدون م اعاين ليهو قلت ليهو بكره ان شاء الله، قال لي تمام،، طيب ممكن ترفعي راسك حبه! وضحك، عاينت ليهو وم قلت حاجه، مسكني من يدي وقال لي عايز اعمل حاجه بس بدون تسألي هي شنو تمام؟ هزيت ليهو راسي ب "ايوه" لقيتو بقرب مني، مسك وشي بيدينو الاتنين وباسني في خدي، سكت مسافه وبعدها قال "بضحكه"من قبيل نفسي والله،، قمت ع حيلي واتحركت ع الباب، عايزه افتحو كده، قال لي لجين، قبلت عليهو، قام غمز لي، وشال كبايه العصير قعد يشرب فيها...
#خاطره :
*انتي م نصيحه وده المجنني فيك، ازعل واعاتبك واراضيك م هو القلب مهما شال منك بفضل محتويك*