رواية حب بعد الزواج
الفصل الثامن عشر18
بقلم زينب أمير
برتب في السرير، علشان عايزه انوم، جا منذر داخل الغرفه، قال لي بس م تكوني عايزه تنومي! هزيت ليهو راسي ب "ايوه" مشي ع اتجاه الكومودينه وختا فيها مفاتيح، التفت على وقال،، في فيلم في mbc2 رهيب نص ساعه ويبدأ تعالي، احضريهو، فكرت كده وتاني قلت قلت ليهو، لا عايزه انوم، لو م كده كان قعدت حضرتو معاك، هزا لي راسو وفات،، وقتها رقدتا، وم كان جايني نوم اصلا، "لقيت نفسي بقول ليهو عايزه انوم" ، شلت تلفوني واشتغلت بيهو حبه، قمت تاني ع حيلي، وقفت جنب الشباك، قعدت اعاين في الشارع والعربات، رجعت تاني قعدت في الكرسي، رفعت راسي وعاينت للحيطه المعلقه فيها ساعه كبيره، لقيتها تسعه،، اتحركت ع باب الغرفه، عايزه افتح الباب كده رجعت تاني وقفت قدام المرايا عاينت ل شكلي فيها وبقيت بصلح في شعري، فكيت الكعتكتين وعملتهم وحده، لمن طلعت الهول، كان مضلم، الا من ضو الشاشه وصوت الفيلم الفاتح فيها،، مشيت عليهو براحه براحه وقعدت في كرسي بعيد منو شويه، وقتها هو انتبه لي، وطى الصوت شوبه وقال لي جيتي! قلت ليهو م جاني نوم بس، قال لي طيب، وبقينا قاعدين نحضر، نص الفيلم وانا م فاهمه منو حاجه، شوفتو قام من كرسيهو.. ودخل المطبخ خليت الفيلم وبقيت مركزه معاهو، كان بتحرك هنا وهناك، بعد عشره دقايق جا طالع وشايل صينيه، جا قعد جنبي، وختاها قدامنا في التربيزه، مد لي بسكويت حق كوكيز ، شلتها منو، وبقيت باكل فيها وساكته شويه بقى يتونس معاي، ويسأل فيني، عن هواياتي وطموحاتي، خلينا الفيلم وبقينا ناكل ونتونس،
يوم جا من الشغل بدري، كنت راقده في السرير بمغص، جا داخل الغرفه ووقف جنب راسي سألني مالك حاسه ب شنو؟ كنت متكوره في نص السرير وببكي بصوت واطي، قعد جنبي في السرير ولمس جبيني، قال لي م عندك حمه! حاسه ب شنو؟ قلت ليهو وانا ببكي بطني ي منذر بطني بتحرق فيني شديدد! قال لي طيب اعمل شنو، نمشي الدكتور؟! ولا اناديك ليك امي؟ عايزه حاجه اعملها ليك، اسوي ليك نعناع طيب؟ مسكت بطني وقلت ليهو وانا بقطع في الكلام، حبوب، جيب لي حبوب مغص بس وببقي كويسه، وقتها قام من السرير سريع، وقال لي وهو متحرك ع الباب، طيب م تبكي دقايق وبجي، بعد هو طلع، دقيقتين او تلاته، لقيت خالتو خديجه جات داخله الغرفه، قالت لي مالك ي بتي، حاسه ب شنو؟ الواجعك شنو؟ عايزه اقوم من السرير جات علي وقالت لي ارتاحي م تقومي، كنت بتألم شديد وبردانه، وفي نفس الوكت كنت مسخنه، قلت ليها ده مغص البريود اصلو حار كده، قالت لي طيب، اقوم اعمل ليك حاجه دافيه تشربيها،، بتعملي ليهو شنو انتي؟ قلت ليها ببلع ليهو حبوب،، قالت لي سمح منذر مشى الصيدليه أسي بجي، قامت قالت لي بعمل ليك قرفه، غمضت عيوني ودموعي لسه نازله، جاتني تاني وادتني ليها، جات سندتني ومسكتني الكبايه شلتها وقعدت اشرب منها،، شويه ومنذر جا داخل شايل كيس في يدو وكبايه مويه، بلعت الحبه، ورقدت تاني قام غطاني، خالتو خديجه قالت ل منذر انا تحت لو في حاجه تاني ناديني، قال ليها تمام، طلع معاها وصلها الباب وجاني تاني، قعد في الكرسي الجنبي وقال لي أحسن هزيت ليهو راسي ب "ايوه" مسك يدي وقعد يمسح لي عليها، شويه شويه لحدي م لقيت نفسي غفيت،،ومفعول الحبه بدا يخفف لي ،، فتحت عيوني ساعه لقيتو رقد جنبي في السرير خاتي يدو في بطني وبمشي عليها، عاينت ليهو، قام ابتسم لي، غمض عيونو وفتحهم همس لي ب "نومي" عملت زي م قال لي، ونمتاا..
الايام بتمشي ومواصله:
يوم الجمعه بعد العصر كنت قاعده عند ناس امي، بنتغدا مع بعض ب ابوي واحمد، الا رحمه الكانت قاعده في السرير، وبتتونس معانا، قدامها بطنها البقت كبيره شديد، قبل كم يوم دخلت في التامن، مفترض من السابع تكون مع امها وكده، زي م بقولو، لكن احمد قال لا علشان هم اصلا جيران وأهلها قراب، ومتى م تكون عايزه تولد، بتلقاهم جنبها،، بالنسبه لي انا جيتهم من الصباح وصلني منذر ورجع طوالي، بعد الغدا، رفعت الصينيه وجبت الشاي، الباب ضرب، فات احمد وفتحو، جا داخل ومعاهو منذر، كان لابس جلابيه الجمعه، الجهزتها ليهو من بدري، سلم وقعد، امي قالت لي، قومي ختي ليهو غدا، م كنت قايلاهو م اكل لسه، فعلا قمت وجهزتو، وجيت قعدت جنبو، ابتسم لي وقعد ياكل، بعد خلص ومشينا ليهم، لقيناهم لسه م شربو الشاي، كانو منتظرننا، كنا قاعدين في الحوش وفارشين السراير، قعدت جنب ابوي، ومنذر قعد جنب احمد، منذر قال ل امي كيفك ي خالتي ان شاء الله طيبه؟ ردت ليهو امي، نحمدالله كويسه ي ولدي الحمدلله، قبل ع رحمه وسألها برضو قالت ليهو الحمدلله كلو بخير، ابوي قال لي ي لجين كبي الشاي، بعد صلاة المغرب طوالي، ودعناهم وطلعنا،،
وقف جنب مكان آيس كريم وقال لي نطلب ولا ننزل؟ قلت ليهو اطلب احسن، قال لي تمام ومشى فات،، بعدها جا ركب ومسكني الكيس، كان جايبو كميه، قلت ليهو كويس جبتو كتير، علشان ندي ناس البيت برضو، قال لي ايوه، لمن دخلنا لقيناهم مجتمعين وبشربوا في شاي المغرب ، سلمنا عليهم ومشيت المطبخ، ختيت الآيس كريم في التلاجه، ورجعت ليهم تاني، العشا لمن قرب، قامو الرجال اتوضوا وفاتو، انا قعدت مع ناس خالتو شويه وقمت تاني، طلعت فوق، بعد صليت وكذا ولعت لي فحمات وعملت بخور، في زي استريو صغير، وصلت فيهو سوره البقره وختيتو في الهول بره، دخلت المطبخ اغسل في العده وارتب فيها،، سمعت صوت المفتاح، كوركت ليهو منذر؟ ، جاني صوتو وهو بقول لي ايوه ده انا، شويه وجا داخل لابس ملابس بيت عاديه ،وشايل في يدو الايس كريم قال لي خلصتي ولا لسه؟ قلت ليهو لالا انتهيت خلاص، مسكتها منو، قال لي انا م عايز مسحت يديني في الجلباب، وشلت لي واحد واكلتو ، ساعتها كان هو فات، قفلت لمبه المطبخ وطلعت لقيتو ما في الهول ، مشيت الغرفه، كان واقف في البلكونه ومديني ضهرو،، فتحت الدولاب، شلت لي بجامه ودخلت اخدت لي شور، كان لسه في مكانو، ساكت وبعاين في الشارع، سرحت شعري وخليتو فاكي زي م هو بحبو! وقفت جنب باب البلكونه وناديتو منذر! التفت على، قلت ليهو ح تتأخر بره؟ قفل الباب وجا داخل ل جوه قال لي عايزه حاجه؟ سكتا شويه تاني قلت ليهو، ايوه، هو عندي موضوع عايزه اقولو ليك! هو م مهم كده، "بتردد" لكن، خلاص، الموضوع ... مشيت منو، زحيت الغطا ورقدت، بدون م أعاين ليهو قلت ليهو تصبح على خير، عايزه ارفعو فيني تاني لقيتو بقول لي في شنو ي لجين عايزه شنو، قعدت في نص السرير، عاينت ليهو، وقلت... مفترض امشي ناس امي علشان رحمه خلاص قربت وزي م عارف احمد م رضي تمشي ناس امها، وامي م ح تقدر ع الشغل براها، لازم امشي اقعد معاها واساعدها، مع انو ريم م بتقصر منها بس برضو مع جامعتها بتكون ليها صعبه، ح امش ليها بعد اسبوعين وبعد تولد بالسلامه وتبقى كويسه،، بجي راجعه، ها قلت شنو؟ ، بقيت قاعده منتظره رأيو،وهو حاجه م قالها، حسيت بيهو زي الرافض كده، رقدتا تاني وقلت ليهو سريع تصبح ع خير، اتغطيت ل وشي وم عارفه إذا قاعد ولا بعمل في شنو، لحدي م سمعت باب الغرفه وهو بفتح وبقفل، قعدت في نص السرير وقعدت اتكلم مع نفسي، م هان على امش واخليك، مجبوره والله، ومنها زاتو اعرف ح يفرق معاك وجودي ولا لأ.. ! الساعه عشره جات وهو لسه م جا.. بقيت قاعده وقاعده. شويه وجا داخل ، الوكت داك كنت عامله نفسي نايمه.. حسيت بيهو رقد في السرير، بعد نص ساعه كده، قبلت عليهو براحه، شهقت بصوت عالي، لمن لقيتو صاحي ووشي في وشو،،وكان بعاين في اتجاهي اتوترتا شديد وهو لسه كان بعاين لي، م عرفت اقول شنو! فجأه قال لي لجين، رفعت راسي عاينت ليهو بعد كنت منزلاهو، قال لي ح تمشي متين؟ رديت ليهو بصوت مبحوح ورايح، "بعد اسبوعين" كنت متوتره شديد وقلبي بضرب بصوره مبالغه فيها، شهرين وحاجه ولسه بخجل منو وبتوتر من قربو لي، كيف أسي وراقده جنبو وعيوني بتعاين ليهو !! رجعت تاني قبلت زي م كنت واديتو ضهري، بعد كم دقيقه كده جاني صوتو وهو بنادي فيني، عملت نايمه ب كلو وم رديت عليهو، قرب مني وختا يدو في خصري وجراني عليهو، وبقي شبه حاضني، جسمي كلو برد وقلبي بقى يضرب من اول وجديد، انفاسي الكانت بتلفحو في رقبتو وهو حاضني عليهو، حسيت بيهو اتوتر، سامعه صوت نفسو البقى عالي،،باسني في شعري ورجع عاين لي تاني، ساعتها غمضت عيوني شديد، خفت يشوفني او يعرفني صاحيه،، سمعتو بقول، شكلي كده ح اشتاق ليك... !!
*#خاطره:*
*ي ليت الذي بيني وبينك حبال ملموسه لاشدك نحوي كلما اشاء💜*
*#خاطره:*
*س اتوسد الجرح واحتضنه جيد مدام يضمك💛*